Вести
Најмалку шест луѓе загинаа при рускиот напад врз болница во украинскиот регион Суми
Русија на 28 септември изврши два напада врз болница во пограничниот регион Суми со Украина, при што загинаа најмалку шест лица, изјави украинскиот министер за внатрешни работи Ихор Клименко.
„Како резултат на првиот удар, едно лице загина, а неколку ката од болницата се уништени“, напиша Клименко на социјалната платформа Телеграм, додавајќи дека додека спасувачите ги евакуирале пациентите и персоналот, Русија започнала втор удар.
„Засега знаеме за шест загинати, меѓу кои и еден полицаец. Повреден е уште еден полицаец“, напиша Клименко. Полицијата подоцна додаде дека според првичните информации од терен, ранети се 10 лица.
Претходно, украинските воздухопловни сили соопштија дека нивната противвоздушна одбрана соборила 69 од 73 беспилотни летала лансирани од Русија во украинските региони рано на 28 септември.
Воената администрација на Киев одделно соопшти дека 15 дронови кои доаѓале биле соборени на периферијата на главниот град на Украина, при што паднале остатоци во еден од градските области.
Последната рунда руски напади дојде еден ден откако украинскиот претседател Володимир Зеленски се сретна со републиканскиот претседателски кандидат и поранешен американски претседател Доналд Трамп во услови на тензии поради, како што критичарите го нарекуваат прорускиот став на поранешниот претседател.
„Многу значаен состанок со Доналд Трамп“, напиша Зеленски на Телеграм по разговорите на 27 септември во кулата Трамп во Њујорк.
„Му го претставив Планот за победа. Тој детално ја изложи ситуацијата во Украина и последиците од војната за нашиот народ. Разговаравме за многу детали. Имаме заеднички став дека војната во Украина мора да се прекине. [Рускиот претседател Владимир] Путин не може да победи. Украинците мора да победат“, додаде Зеленски.
Стоејќи до Зеленски пред разговорите, Трамп рече дека доколку биде избран во ноември, „ќе работиме со двете страни“ за да ја завршиме војната во Украина.
„[Јас] имам многу добри односи [со Зеленски], а исто така имам многу добри односи, како што знаете, со претседателот Путин“, рече Трамп.
„Мислам дека ако победиме [во ноември], мислам дека ќе го решиме многу брзо“, додаде тој без при тоа да ја објасни својата стратегија за ставање крај на конфликтот.
Зеленски се сретна со Трамп по разговорите со американскиот актуелен претседателот Џо Бајден и потпретседателот и демократски претседателски кандидат Камала Харис во Вашингтон на 26 септември.
Зеленски им ги претстави на Бајден и Харис неговиот „План за победа“, стратегија за ставање крај на војната за која се познати малку детали.
Бајден претходно на 26 септември најави повеќе од 8 милијарди долари воена помош за Киев и повтори во изјавата дека Соединетите Држави „ќе ѝ дадат на Украина потребната поддршка за да победи во оваа војна“.
Пакетот за прв пат вклучува систем наречен Joint Standoff Weapon -- прецизно наведувана бомба со дострел до 130 километри лансирана од борбени авиони, како и дополнителна батерија за воздушна одбрана „Патриот“ и уште стотици ракети „Патриот“ и AMRAAM (напредни ракети воздух-воздух со среден дострел).
Соединетите Држави, главниот поддржувач на Украина и западните сојузници му дадоа на Киев милијарди долари воена помош и друга помош, а исто така и воведоа неколку санкции на Москва.
види ги сите денешни вести
Најмалку 150 луѓе загинаа поради поплавите во Непал
Училиштата во Непал беа затворени три дена по поплавите и лизгањето на земјиштето предизвикани од дожд низ целата земја, при што загинаа 151 лице, а 56 се водат како исчезнати.
Поради поплавите, сообраќајот и секојдневните активности беа запрени во областа Катманду, каде беа регистрирани 37 смртни случаи. Во тој регион живеат околу четири милиони луѓе.
„Ги повикавме релевантните власти да ги затворат училиштата во погодените области на три дена“, изјави за Ројтерс портпаролката на Министерството за образование Лакшми Батараи.
Обилните врнежи се намалуваат, но метеоролозите предвидуваат дека изолираните врнежи ќе продолжат.
Сезоната на монсуните носи дожд и поплави во Непал секоја година, но научниците велат дека врнежите стануваат поинтензивни поради климатските промени.
„Никогаш досега не сум видел поплави од оваа големина во Катманду“, рече Арун Бакта Шреста, службеник за еколошки ризик во Меѓународниот центар за интегриран планински развој.
Околу 10.000 полицајци, доброволци и војници се мобилизирани да помогнат во спасувањето и потрагата по исчезнатите во поплавите, јавуваа државните непалски медиуми.
Владата на Непал ги повика луѓето да избегнуваат непотребни патувања, ноќното возење е забрането во областа Катманду, а многу домашни летови се откажани.
Украинските дронови навлегуваат подлабоко во Русија
Украинската војска извести дека тешките борби продолжиле на 29 септември по ноќните воздушни напади кои вклучиле подлабока пенетрација во Русија. Во меѓувреме американскиот претседател Џо Бајден на социјалните мрежи напиша дека „Украина ќе победи во оваа војна“.
„Руските напаѓачи продолжуваат да ги напаѓаат позициите на украинските бранители [со] окупаторите кои активно напаѓаат во [стратешки важните] правци Покровск и Курахов“, соопшти украинскиот Генералштаб на својот редовен вечерен брифинг.
Во соопштението е посочено дека „околу 20 населени места во регионите Чернихив, Суми и Харков биле погодени од [руска] артилерија и минофрлачки гранатирања“.
Овие информации дојдоа откако Украина претпрела штета од нападите со руски беспилотни летала во текот на ноќта во неколку региони.
Од друга страна пак, руските одбранбени претставници тврдат дека собориле 125 украински беспилотни летала во најновиот одраз на зголемените напори на Киев да ја префрли две ипол годишната војна на руска територија.
Руското Министерство за одбрана сугерираше дека украинските прекугранични напади се повеќе се фокусирани на нејзиниот регион Волгоград, источно од регионот Курск, каде што украинските сили започнаа ненадеен упад во јули, за кој се смета дека зазеле околу 1.300 квадратни километри руска територија.
На дипломатскиот фронт, Бајден на социјалните мрежи објави видеа од неодамнешната посета на неговиот колега Володимир Зеленски на Белата куќа и изјави дека „Украина ќе победи во оваа војна“.
„И САД ќе продолжат да стојат покрај нив на секој чекор“, додаде Бајден.
Украинската војска во меѓувреме соопшти дека нејзината противвоздушна одбрана соборила 15 од 22 руски нападни беспилотни летала откриени во најмалку четири региони на земјата во текот на ноќта, и рече дека уште пет од тие беспилотни летала биле спречени со други „контрамерки“.
Австриската крајна десница постигна историска победа на парламентарните избори
Екстремната десница во Австрија „Партијата на слободата“ (ФПО) ги освои мнозинството гласови на парламентарните избори кои се одржаа на 29 септември, покажуваат прелинимарните податоци. Според мнозинството пребројани гласови ФПе освои 28,8 отсто од гласовите, победувајќи ја владејачката конзервативна Народна партија која е на второто место со 26,3 отсто.
Ова значи дека екстремната десница одбележа историска победа, но се очекува партијата да се соочи со предизвик во обидот да најде партнери со кои ќе може да владее, јавува новинската агенција Франс прес.
Додека ФПО беше дел и од коалициските влади и претходно, ова е првпат да победи на национално гласање, во време кога екстремно десничарските партии низ Европа бележат сериозен политички раст.
Лидерите на австриските политички партии се обединија да ја отфрлат идејата за формирање коалиција со шефот на екстремно десничарската Партија на слободата (ФПО) Херберт Кикл, откако неговата ФПО беше прва на парламентарните избори во неделата, јавува новинската агенција Ројтерс.
„Денес заедно напишавме парче историја...“, им рече 55-годишниот Кикл на симпатизери во Виена.
„Отворивме врата за нова ера“, додаде тој во својот говор.
Како и другите екстремно десничарски партии во Европа, ФПО забележа пораст на својата популарност, поттикната од гневот на гласачите поради миграцијата, инфлацијата и ограничувањата за време на ковид - 19 пандемијата.
Француската екстремно десничарска лидерка Марин Ле Пен изјави дека е „воодушевена“ од победата на ФПО.
Таа го поздрави, како што ја нарече, „појава што носи одбрана на националните интереси, заштита на идентитетите и воскреснување на суверенитети“.
Кикл, кој ја презеде партијата извалкана со скандали во 2021 година и го предводеше нејзиното закрепнување, рече дека е подготвен да формира влада со „секоја и секоја“ од партиите во парламентот.
„Нашата рака е испружена на сите страни“, рече тој.
Канцеларот Карл Нехамер, кој во последните недели успеа да ја намали разликата до ФПО во изборните анкети, во неговото партиско седиште изјави дека може да го види разочарувањето на членовите на партијата.
„Тоа беше трка да се стигне, и за жал не успеавме“, рече 51-годишниот Нехамер, ветувајќи дека „ќе продолжи да се бори за интересите на народот“.
Право на глас имаа повеќе од 6,3 милиони од деветте милиони жители на Австрија.
Израел ги нападна Хутите во Јемен, расте стравот од сеопфатна војна на Бллискиот Исток
Израелската војска ги прошири своите напади врз милитантните групи поддржани од Иран. На 29 септември изврши напади врз јеменскиот пристанишен град Ходеида, кој е под контрола на бунтовниците Хути, сојузници на Техеран.
Во меѓувреме ги интензивираше воздушните напади врз упориштата на Хезболах во јужен Бејрут и на други места во Либан, предизвикувајќи стравувања меѓу глобалните лидери од сеопфатна блискоисточна војна.
„Во голема воздушна операција денеска, десетици воздухопловни авиони, вклучувајќи борбени авиони, авиони за полнење гориво и извидувачки авиони, нападнаа цели за воена употреба на терористичкиот режим Хути во областите Рас Иса и Ходеида во Јемен“ изјави портпаролот на израелската војска капетан Дејвид Авраам изјави за новинската агенција Франс прес на 29 септември.
Војската соопшти дека воздушните напади биле насочени кон поморско пристаниште управувана од Хутите кои се користат за увоз на нафта и наводно примање иранско оружје. Претходно, во јули Израел го нападна истото пристаниште.
Јемен е во граѓанска војна уште од 2014 година, кога бунтовниците Хути го зазедоа главниот град Сана, што ги натера силите предводени од Саудиска Арабија да интервенираат за поддршка на меѓународно признатата влада и доведе до огромна хуманитарна катастрофа во земјата со околу 40 милиони луѓе на арапскиот Полуостров.
Голема количина на хуманитарна помош пристигнуваше преку пристаништето во Ходеида, но тоа се наруши откако Хутите го зазедоа објектот.
Израелскиот министерот за одбрана Јоав Галант на 29 септември изјави дека Израел ќе ги нападне непријателите без разлика на растојанието.
Јеменските бунтовници Хути, Хезболах во Либан и Хамас во Газа се сметаат за ирански застапници во регионот.
Бунтовниците Хути гаѓаа бродови во Персискиот Залив и лансираа проектили кон Израел во текот на изминатата година, тврдејќи дека тоа е поддршка на борците на Хамас во Газа.
Хезболах и Хамас се прогласени за терористички организации од САД. Европската унија, исто така, го означува Хамас како терористичка организација. На европската црна листа е ставена и вооруженото крило на Хезболах, но не и нејзината политичка партија.
Папата повика на итен прекин на огнот во Либан
Папата Франциск изрази жалење и болка поради проширувањето на конфликтот на Блискиот Исток и повика на итен прекин на огнот во Либан.
„Со болка и загриженост го следам засилувањето на конфликтот во Либан“, рече тој во пораката за време на мисата на стадионот во Брисел на 29 септември, на крајот од неговата посета.
„Премногу луѓе продолжуваат да умираат од ден на ден на Блискиот Исток“, рече тој.
Папата зборуваше во време кога израелската армија започна големи напади против високи функционери и локации за оружје на либанскиот Хезболах, во Бејрут.
„Ги повикувам страните веднаш да го прекинат огнот во Либан, во Газа и во остатокот од Палестина и Израел“, додаде папата.
Се верува дека речиси милион луѓе биле раселени поради израелските напади врз Либан, што е најголемото раселување на населението во историјата на земјата, според либанскиот премиер Наџиб Микати.
Израел продолжи со напади врз цели на Хезболах во Либан
Израелската војска соопшти дека го гаѓа упориштето на милитантната група Хезболах, поддржана од Иран, во јужен Бејрут на 29 септември во услови на зголемена меѓународна загриженост за поширокиот конфликт и покрај повиците на Обединетите нации за прекин на огнот.
Франција соопшти дека го испраќа својот министер за надворешни работи Жан-Ноел Баро во Либан, откако Баро телефонски разговарал со привремениот либански премиер Наџиб Микати. Париз повика на „итно запирање на израелските напади во Либан“.
Според либанскиот премиер Микати Либан нема „никаква опција освен дипломатска опција“.
Иран вети одговор за убиството на лидерот на Хезболах Хасан Насрала на 27 септември и сигнализираше континуирана поддршка за групите кои се спротивставуваат на Израел, но исто така побара итен состанок на Советот за безбедност на ОН.
Израелските одбранбени сили на 29 септември соопштија дека извршиле „прецизен удар“ врз упориштето на Хезболах во јужниот дел на Бејрут.
Микати предупреди дека борбите би можеле да раселат околу 1 милион либански цивили.
Хезболах е означен како терористичка организација од страна на Соединетите држави, додека Европската унија го става на црната листа но само вооружено крило, не и нејзината политичка партија. Политичката партија на Хезболах има места во либанскиот парламент.
Премиерот Бенјамин Нетанјаху го опиша убиството на Насрала како неопходен потег кон „промена на рамнотежата на силите во регионот во годините што доаѓаат“.
Иранскиот министер за надворешни работи Абас Аракчи беше цитиран од официјалната новинска агенција Фарс во Њујорк дека „сите треба да бидат свесни дека ситуацијата е крајно експлозивна и дека се е можно...па и војна“.
Тој рече дека „ова ужасно злосторство...нема да остане без одговор“.
Но, со оглед на тоа што аналитичарите изразија сомневање за подготвеноста на Техеран да ризикува директен конфликт со Израел или неговиот сојузник САД, тој исто така сигнализираше дипломатски притисок.
„Дипломатскиот апарат, исто така, ќе ги искористи сите свои политички, дипломатски, правни и меѓународни капацитети за да ги гони криминалците и нивните поддржувачи“, рече Аракчи.
Постојаните членки на Советот за безбедност на ОН, САД и Кина, повикаа на деескалација, додека Русија предупреди на „напорни“ и „драматични“ последици за регионот.
Либанската ескалација доаѓа кога израелската војна во Газа се приближува на една година откако терористичката група Хамас, назначена од САД и ЕУ, започна прекуграничен напад во кој загинаа повеќе од 1.200 луѓе во Израел на 7 октомври, од кои многумина цивили.
Постојат стравувања од брзо проширување на конфликтот што може да вклучи израелска копнена офанзива во Либан и на крајот да ги вовлече Иран и САД директно во борбите.
Израелските власти рекоа дека копнената инвазија на Либан е меѓу нивните потенцијални опции.
Американскиот претседател Џо Бајден рече дека „смртта на Насрала од израелски воздушен напад е мерка за правда за неговите многубројни жртви, вклучително и илјадници Американци, Израелци и либански цивили“.
Тој рече дека Вашингтон „целосно го поддржува правото на Израел да се брани од Хезболах, Хамас, Хутите и сите други терористички групи поддржани од Иран“.
Бајден, исто така, рече дека САД ја зајакнуваат својата одбранбена позиција на Блискиот Исток „за да ја одвратат агресијата и да го намалат ризикот од поширока регионална војна“.
САД: Убиени се 37 „терористички оперативци“ во Сирија
Американската Централна команда (Центком) на 29 септември соопшти дека извршила два воздушни напади во Сирија во кои загинале, како што тврди, десетици терористички оперативци и со тоа ја прекинале радикалната милитантна група Исламска држава (ИД) и наводниот огранок на Ал Каеда да дејствува против САД или нејзините партнери.
Во нивното соопштение е наведено дека во нападите на 16 и 24 септември загинале „37 терористички оперативци, вклучително и повеќе високи лидери“ на ИД и сириската огранок на Ал Каеда Хурас ал-Дин.
Најавата доаѓа со зголемувањето на тензиите на Блискиот Исток во услови на тековната израелска војна во Газа и големата ескалација на насилството меѓу Израел и милитантната либиска група Хезболах, поддржана од Иран.
Хезболах исто така има врски со Сирија и нејзиниот владетел претседателот Башар ал Асад.
Американската централна команда ги нарече сириските операции дел од напорите за „прекинување и деградирање на напорите на терористите за планирање, организирање и спроведување напади против цивили и воен персонал од САД, нашите сојузници и нашите партнери низ целиот регион и пошироко“.
Во него не се споменуваат конкретни закани за Соединетите Држави или нивните сојузници или партнери.
Нема информации за други можни жртви, а РСЕ не може да ги потврди информациите за нападите.
Центком рече дека „воздушен напад од големи размери“ на 16 септември бил насочен кон оддалечен камп за обука на ИД во централна Сирија, при што биле убиени „најмалку 28 оперативци на [ИД], вклучително и најмалку четворица високи водачи“.
Романија со евакуација на жителите покрај Дунав се подготвува за ново невреме
Романските власти во два источни региони ги активираа алармите за највисока тревога од поплави и наредија евакуација, а остатокот од земјата го ставија под зголемена контрола додека се приближуваа обилните дождови и ветровите на 29 септември.
Надлежните предупредија дека ризиците се зголемени поради затнатите водни канали, преплавени патишта и други штети од смртоносните поплави што ја погодија Романија и поголемиот дел од Централна Европа изминатиов месец.
Североисточните романски окрузи Галати и Васлуи кои се наоѓаат околу реката Дунав повторно беа главни области на загриженост бидејќи се очекува ново невреме оваа недела, кое го вклучи црвениот аларм за овие две окрузи и по должината на реките Барлад, Прут и Сирет.
Предупредувањата на Националниот институт за хидрологија и управување со водите (ИНХГА) ќе останат во сила до почетокот на 1 октомври.
„Никој не останува во ризичните области.Сите градоначалници кои имаат ризични области мора да ги евакуираат луѓето таму. Не смееме да имаме повеќе загуби на човечки животи“, објави градскиот совет на Галати.
Советот нареди училиштата и другите згради надвор од загрозените области да бидат подготвени да ги сместат евакуираните.
„Ситуацијата е полоша од минатиот пат“, изјави претседателот на советот на округот Галати, Костел Фотеа.
Метеоролозите предвидуваа дека најинтензивните врнежи ќе бидат на 29 септември.
Во поплавите од бурата Борис загинаа шест лица во Галати и оштетија илјадници домови таму.
Вкупно беа убиени уште 20 луѓе, вклучително и во Чешка, Полска и на други места.
Израел тврди дека е убиен и високиот функционер на Хезболах, Набил Каук
Израелската армија на 29 септември соопшти дека е убиен високиот функционер на Хезболах Набил Каук, кој во Либан се сметаше за еден од можните наследници на убиениот лидер на Хезболах Хасан Насрала.
Во соопштението на израелската армија се наведува дека Каук бил убиен во воздушен напад врз Бејрут ноќта меѓу 28 и 29 септември.
Хезболах, која САД ја сметаат за терористичка организација, а нејзиното вооружено крило е ставено на црната листа на Европската унија, засега не ја коментира оваа информација.
Израелската војска соопшти дека Каук бил командант на „превентивната безбедносна единица“ на Хезболах и висок член на централниот совет на милитантната организација.
Тие тврдат дека бил близок до раководството на Хезболах и дека бил „директно вклучен во извршување на терористички напади против државата Израел и нејзините граѓани, вклучително и оние од изминатите неколку дена“.
Каук се приклучи на Хезболах кон крајот на 1980-тите и беше заменик, а подоцна и лидер на областа на јужниот дел на Либан во извршниот совет, а потоа и заменик-претседател на тој совет.
Борбени авиони го убиле Каук во бејрутското предградие Дахија, познато како упориште на Хезболах, соопшти израелската војска.
Засега не се знае кој ќе го наследи Насрала на чело на Хезболах, кој беше убиен во нападите на израелската армија врз Бејрут на 27 септември.
Партиски обвинувања за „заглавената“ европерспектива
Последната одлука на Европската Унија со која се разделува Албанија од Северна Македонија во процесот на преговори со Унијата е повод и за денешните политички препукувања и обвинувања на меѓу власта и опозицијата.
Владејачката ВМРО-ДПМНЕ ја обвинува опозициската СДСМ дека се виновни што земјава се најде во исти „кош “ со Албанија и дека дозволи соседот да ја претрка Северна Македонија.
„СДС свесно работат Македонија да биде заглавена почнувајќи од договорите потпишани од (поранешниот премиер Зоран ) Заев, завршувајќи со криминалот и корупцијата кои царуваа седум години со СДС. Радоста на СДС нема да трае, Македонија оди напред“, е наведено во соопштението од ВМРО-ДПМНЕ.
Опозициската СДСМ смета дека за настанатата ситуација виновни се „штетните политики на ВМРО-ДПМНЕ и нивниот лидер Христијан Мицкоски “ со што е загубена европската перспектива. Оттаму велат дека напразни се обидите по „државниот дебалк да ги прават будали македонските граѓани.
„После сите блокади, после сите опструкции, деструкции, кочења, после сите можни изјави на Мицкоски од типот ‘не благодарам’ во ЕУ, денеска ВМРО-ДПМНЕ го обвинува СДСМ. СДСМ ги реши отворените спорови, обезбеди членство во НАТО и ја донесе Македонија пред прагот на ЕУ. ВМРО-ДПМНЕ цело време ги блокираше сите овие процеси, попречувајќи ја европската интеграција на земјата“, е наведено во партиското соопштение.
Албанија на 15 октомври ќе го отвори првиот кластер од преговорите со Европската Унија, со што се одвојува од Северна Македонија која не го исполни условот да го смени Уставот и да ја внесе бугарската заедница во Преамбулата.
Ваква одлука донеле амбасадорите на државите членки на ЕУ на 25 септември. Во документот во Брисел до коj Радио Слободна Европа (РСЕ) имаше пристап, се наведува дека Албанија „сега е доволно подготвена во оваа фаза за преговори за кластерот 1“.
Причината е што Северна Македонија досега не го исполни условот што го наметна Бугарија - да го смени Уставот и во него да го вметне и бугарското малцинство. Овој услов влезе во преговарачката рамка која македонското Собрание ја изгласа во јули 2022 година, под називот познат во јавноста како „француски предлог“. Тогашната опозиција предводена од ВМРО-ДПМНЕ беше против уставни измени.
Мултимедија
Најпосетени
Што треба да знаете