Достапни линкови

Вести

Владата испраќа четворица нови амбасадори, а ќе враќа деветмина

Влада на Република Северна Македонија (фотоархива).
Влада на Република Северна Македонија (фотоархива).

Покрај нефрологот Игор Николов, Владата на вчерашната седницата именувала уште тројца нови амбасадори. Паралелно, како што потврдија од владината прес-служба за РСЕ, донесени се барања за покренување иницијатива за отповикување на девет актуелни амбасадори.

Според информациите од Владата, како нови амбасадори на Северна Македонија ќе заминат Димитар Блажевски во Украина, Драган Ѓурчевски во Хрватска и Андријана Цветковиќ во Јапонија.

Николов, како што и претходно во текот на денот соопшти премиерот Христијан Мицкоски, ќе биде нов амбасадор на земјава во Франција.

Од друга страна, Владата вчера одлучила да почне со постапка за отповикување на деветмина актуелни вонредни и ополномоштени амбасадори.

Меѓу нив иницијатива за отповикување е покрената и за амбасадорката во Бугарија, Агнеза Руси Поповска.

На оваа листа се и амбасадорите на Северна Македонија во: Босна и Херцеговина – Јакуп Реџепи, Црна Гора – Зеќир Рамчиловиќ; Чешка – Емил Крстевски; Шведска – Џенк Сејфила; Обединетото Кралство на Велика Британија и Северна Ирска – Катерина Ставревска; Белгија – Методија Белевски, кој е нерезидентен амбасадор на земјава и за Луксембург.

Меѓу деветмината за кои е поведена иницијатива за отповикување е и амбасадорката и постојана претставничка на Северна Македонија при Советот на Европа, Светлана Гелевева, како и амбасадорот и шеф на Постојаната мисија при Меѓународните организации, Пајо Авировиќ.

РСЕ во октомври минатата година пишуваше дека актуелната власт планира да врати десетина амбасадори. Станува збор за амбасадори кои минатата Влада ги испрати на должност без да бидат „сослушани“ во Собранието. Тие не ги бранеа тезите пред пратениците поради блокади и незакажување седници на собраниската Комисија за надворешни работи од страна на ВМРО-ДПМНЕ, која како опозиција претседаваше со ова собраниско тело.

Патот за покренување иницијатива за отповикување, го отвори актуелното владејачко мнозинство предводено од ВМРО-ДПМНЕ со изгласување автентични толкувања на два члена од Законот за надворешни работи на крајот на декември минатата година.

Според автентичното толкување на еден од членовите, „сослушувањето“ на амбасадорите во Собранието е задолжително. Автентичното толкување за вториот член од Законот, пак, и даде зелено светло на Владата да покренува иницијативи за отповикување.

види ги сите денешни вести

„Безбеден град“ стартува во 2026, над 18.000 казни за прекршоци во февруари

Jавната трибина за измените на Законот за безбедност во сообраќајот на патиштата и Законот за прекршоци за проектот „Безбеден град“
Jавната трибина за измените на Законот за безбедност во сообраќајот на патиштата и Законот за прекршоци за проектот „Безбеден град“

Системот „Безбеден град“ ќе почне да функционира од 1 јануари 2026 година, а првите казни за сообраќајни прекршоци ќе се изрекуваат од истиот датум. Пред тоа, возачите ќе добиваат предупредувања за направените прекршоци. За целосна имплементација на системот, потребни се измени во пет закони, кои до крајот на април треба да бидат доставени до Собранието.

Дел од проектот ќе бидат и возила со паметни камери што ќе регистрираат прекршоци како неправилно паркирање.

Според министерот за внатрешни работи Панче Тошковски, новите мерки веќе даваат резултати – во последните десет дена бројот на сообраќајни незгоди се намалил за 30 проценти, а незгодите со жртви за 60 проценти.

МВР објави дека од 1 до 20 февруари се изречени 18.132 казни за прекршоци во сообраќајот. Најчести прекршоци биле пречекорување на брзината (6.056), неправилно паркирање (4.213) и управување возило без возачка дозвола (1.510).

Министерството за правда работи на законски измени за забрзани прекршочни постапки, а прекршочните налози ќе се испраќаат електронски. Според УНДП, проектот е во согласност со глобалните цели за безбедност и треба да помогне во намалување на бројот на сообраќајни несреќи.

Упад во просториите на Независното здружение на новинари на Војводина

Илуастративна фотографија.
Илуастративна фотографија.

Непознати сторители упаднале во просториите на Независното здружение на новинари на Војводина (НДНВ) во Нови Сад ноќта кон петокот, 21 февруари, пренесува Бета.

Просториите на НДНВ се наоѓаат во Спортско деловен центар Војводина (Спенс).

Според првичните, неофицијални информации, упадот се случил околу 23 часот.

Спенс е објект којшто затвора за посетителите во 22 часот.

Во тек е полициска истрага, изјавија за Бета во НДНВ.

Новинарите и членовите на НДНВ во неколку наврати беа цел на напади и смртни закани.

Еден од последните случаи е забележан во декември 2024 година, кога Независното здружение на новинари од Војводина објави дека добиле нови смртни закани.

Како што наведоа, станува збор за истото лице кое постојано се заканувало дека ќе ја убие претседателката на НДНВ Ана Лалиќ и програмскиот директор на здружението Динко Грухоњиќ.

НДНВ тогаш соопшти дека „по правило нема реакција од надлежните органи, што ги охрабрува насилниците да продолжат со заканите“.

НДНВ ги пријави заканите до надлежните органи, преку механизмот на Постојаната работна група за безбедност на новинарите.

ОН одмерува две резолуции за третата годишнина од војната во Украина

САД - Германскиот канцелар Олаф Шолц зборува за време на „Самитот на иднината“ на маргините на Генералното собрание на ОН во седиштето на Обединетите нации во Њујорк, 22 септември 2024 година.
САД - Германскиот канцелар Олаф Шолц зборува за време на „Самитот на иднината“ на маргините на Генералното собрание на ОН во седиштето на Обединетите нации во Њујорк, 22 септември 2024 година.

Соединетите Држави предложија нацрт-резолуција во ОН што користи помалку критички јазик кон целосната инвазија на Русија врз Украина од нацрт-резолуцијата што ја предложија Европската унија и Украина.

Двата нацрти беа предложени за одбележување на третата годишнина од руската инвазија врз Украина на 24 февруари, кога Генералното собрание на ОН треба да гласа за резолуциите.

Нацртот на САД, предложен на 21 февруари, жали за „трагичната загуба на животи во текот на руско-украинскиот конфликт“, повикува на брз крај и повикува на траен мир. Но, не ја споменува територијата окупирана од Русија и не ја издвојува Москва како извор на конфликтот.

Американскиот државен секретар Марко Рубио ја нарече резолуцијата „едноставна и историска“ и ги повика членките на ОН да ја поддржат „со цел да се зацрта патот кон мирот“.

„Оваа резолуција е во согласност со ставот на претседателот Трамп дека ОН мора да се вратат на својата цел за која се основани, како што е содржана во Повелбата на ОН, за одржување на меѓународниот мир и безбедност, вклучително и преку мирно решавање на споровите“, рече Рубио во изјавата.

Спротивно на тоа, нацрт-резолуцијата од Европската унија и Украина се однесува на „целосна инвазија на Украина од страна на Руската Федерација“ и бара итно и безусловно повлекување на сите сили на Москва.

Украинско-европскиот текст ја нагласува потребата да се удвојат дипломатските напори за завршување на војната оваа година, истовремено обвинувајќи ја Русија за инвазијата и е посветена на „територијалниот интегритет“ на Киев. Во текстот, исто така, се потсетува на потребата да се имплементираат сите претходни резолуции на собранието „усвоени како одговор на агресијата врз Украина“.

Нацрт-резолуциите циркулираа во седиштето на ОН во Њујорк во услови на јаз меѓу Соединетите држави и Европа за тоа како да се преговара за крај на војната. Долгогодишната трансатлантска алијанса е потресена поради одлуката на администрацијата на Трамп да ги отвори преговорите со Русија оваа недела во Саудиска Арабија без претставници на Украина и на Европската унија на маса.

Откако Володимир Зеленски не беше поканет да учествува на разговорите во Ријад на 18 февруари, украинскиот претседател рече дека претседателот Доналд Трамп живее во „простор за дезинформации“ направен од Русија.

Трамп одговори со лажно обвинување кон Зеленски дека дозволил да започне војната и го опишува како „диктатор без избори“. Земјата не можеше да одржи претседателски избори додека беше под воена состојба.

„Тоа е добар потег“, изјави рускиот амбасадор во ОН Василиј Небензја за новинарите на ОН во врска со резолуцијата на САД.

Русија, исто така, предложи амандман на резолуцијата на САД за да се додаде фразата „вклучително и со решавање на нејзините основни причини“. Ова би го променило последниот ред кој би гласел „бара брз крај на конфликтот, вклучително и со решавање на неговите основни причини, и дополнително повикува на траен мир меѓу Украина и Русија“.

Генералното собрание стана најважното тело на ОН што се занимава со Украина. За разлика од Советот за безбедност на ОН, каде постојаните членки Велика Британија, Кина, Франција, Русија и САД имаат право на вето, ниту една земја-членка нема право на вето на Генералното собрание.

Резолуциите донесени од 193-членото тело не се правно обврзувачки, но внимателно се следат низ целиот свет.

Генералното собрание усвои шест резолуции за конфликтот во 2022 година, осудувајќи ја Москва и барајќи од Русија да ги повлече сите свои војници. Една од другите рани резолуции го осудува рускиот „обид за нелегална анексија“ на четири региони на Украина. Таа доби најголема поддршка со 143 држави кои гласаа „за“.

Времето сончево и студено

Илустративна фотографија.
Илустративна фотографија.

Времето денеска наутро ќе биде многу студено, а преку ден сончево со мала до умерена локална облачност, поголема во југоисточните делови. Ќе дува слаб до умерен ветер од јужен правец.

Минималната температура ќе биде во интервал од -12 до -2, а максималната ќе достигне од 3 до 10 степени Целзиусови.

Во Скопје наутро ќе биде студено, а преку денот сончево со мала облачност. Ќе дува слаб до умерен ветер од југоисточен правец. Минималната температура ќе се спушти до -8, а максималната ќе достигне до 9 степени Целзиусови.

Според најавите од Управата за хидрометеоролошки работи (УХМР), од недела следува период на променливо облачно време со постепен пораст на температурите.

По одделни котлини ќе има појава на магла и ниска облачност. Од понеделник, пак, ќе има услови за слаби локални врнежи од дожд, а на планините и на повисоките места од слаб снег.

Папата Франциск не е во животна опасност, но не е целосно излекуван

Папата Франциск на Бадник во базиликата Свети Петар, Ватикан, 24 декември 2024 година.
Папата Франциск на Бадник во базиликата Свети Петар, Ватикан, 24 декември 2024 година.

Папата Франциск, кој се лекува во болница од билатерална пневмонија, не е во животна опасност, но не е целосно закрепнат и неговата состојба може да се промени, изјави денеска (21 февруари) еден од неговите лекари во болницата „Агостино Џемели“ во Рим, Италија, јави агенцијата Ројтерс.

„Ако прашањето е 'дали е надвор од опасност', одговорот е 'не'“, рече Серхио Алфиери на денешната прес-конференција во Рим. „Но, ако потоа не прашате дали во овој момент неговиот живот е во опасност, одговорот е (исто така) 'не'“, додаде тој.

Фрациск во болницата беше примен на 14 февруари, откако неколку дена се бореше со тешкотии со дишењето.

Билатералната пневмонија е сериозна инфекција која може да ги воспали двете белодробни крила и да остави лузни, што го отежнува дишењето. Ватикан ја опиша инфекцијата на папата како „комплексна“ бидејќи е полимикробна, што значи дека е предизвикана од два или повеќе микроорганизми.

Неговиот медицински тим рече дека папата можел да стане од креветот и да седне на стол за да заврши некоја работа, но предвиде дека ќе остане во болница „барем“ до следната недела.

Докторот Алфиери рече дека имајќи предвид дека папата има 88 години, со веќе постоечки здравствени проблеми, тој очигледно е кревок пациент.

Тој им рече на новинарите дека папата немал сепса, состојба која е потенцијално опасна по живот кога телото реагира на инфекција со оштетување на сопствените ткива и органи.

Сепак, Алфиери додаде дека папата сè уште е во опасност неговата инфекција да се прошири од респираторниот тракт на другите делови од телото.

Петочната прес-конференција беше прва со медицински тим откако папата беше примен во болница минатата недела.

Ниту една фотографија од папата Франциск не е објавена поради почитување на приватноста на папата, рече Алфиери.

Коментарите на лекарот дојдоа откако Ватикан во четвртокот (20 февруари) вечерта соопшти дека состојбата на папата „малку се подобрува“ втор ден по ред.

Келог го пофали Зеленски среде зголемени тензии меѓу Трамп и Киев

Украинскиот претседател Володимир Зеленски и американскиот пратеник Кит Келог, Киев, 20 февруари 2025 година.
Украинскиот претседател Володимир Зеленски и американскиот пратеник Кит Келог, Киев, 20 февруари 2025 година.

Претставникот на американскиот претседател Доналд Трамп за Украина и Русија, Кит Келог, денеска (21 февруари) објави дека имал „обемни и позитивни разговори“ со украинскиот претседател Володимир Зеленски, додека Белата куќа продолжува да ги истражува опциите за мировен договор и исто така се обидува да постигне договор со Киев за пристап до вредни минерали во замена за американска помош.

„Долг и интензивен ден со високото раководство на Украина“, напиша Кит Келог во објава на платформата Х, како негов прв коментар за средбата со Зеленски откако новинарите се собраа за прес-конференција на 20 февруари, за таа да биде откажана во последен момент.

Келог го нарече украинскиот претседател „борбен и храбар водач на нацијата во војна“, додека Зеленски рече дека средбата „ја враќа надежта“ по јавниот раскол меѓу Киев и Вашингтон, при што Трамп го нарече украинскиот претседател „диктатор без избори“, а Зеленски го обвини за повторување на руската пропаганда.

Помирувачките коментари дојдоа на последниот ден од повеќедневната посета на Келог на Украина и неколку дена по разговорите на САД и Русија во Саудиска Арабија за ставање крај на тригодишната војна во Украина.

Од тие разговори, Трамп и Зеленски разменија јавна критика среде зголемените тензии меѓу Киев и Вашингтон.

Трамп денеска (21 февруари) продолжи со критиките, велејќи дека „нема потреба да се вклучува Зеленски во мировните преговори“ и дека украинскиот лидер досега не успеал да ја заврши војната.

„Го гледав како преговара без адути. Тој нема адути и тоа станува неподносливо. Доста е“, изјави Трамп за радиото Фокс њуз.

Покрај разгледувањето на опциите за мировен договор, посетата на Келог дојде во време на разговори меѓу Киев и Вашингтон за постигнување можен договор што ќе им овозможи на САД пристап до профитабилните украински минерални наоѓалишта како компензација за претходната американска помош по руската инвазија која започна во февруари 2022 година, потенцијално обезбедувајќи и идна американска помош.

Не се познати точните услови на американската понуда и останува нејасно дали е постигнат некаков напредок за време на патувањето на Келог.

И Ројтерс и Аксиос објавија дека американските власти му претставиле на Киев нов, поедноставен договор за минерали за време на посетата на Келог, откако Зеленски ја отфрлил првичната понуда презентирана од американскиот секретар за финансии Скот Бесент, која би им дала на САД 50 отсто удел во природните ресурси на Украина, вклучувајќи минерали, метали, нафта и гас.

Новата американска понуда, наводно, има за цел брзо да постигне нов договор со Киев, а подоцна да се преговара за деталните услови.

Кога ја одби понудата минатата недела, Зеленски изрази загриженост за некои од одредбите, вклучително и недостатокот на безбедносни гаранции за Украина. Ројтерс и Аксиос известуваат дека новата понуда на САД внесе „подобрени“ модификации во споредба со претходната.

Американскиот советник за национална безбедност, Мајк Волц, за време на Конференцијата за политичко дејствување на конзервативците (CPAC) во Вашингтон на 21 февруари рече дека очекува Киев да го потпише договорот и дека тоа ќе биде добро за Украина, додавајќи дека ќе ги „надокнади стотиците милијарди долари инвестирани во оваа војна“ за американските даночни обврзници.

„Претседателот Зеленски ќе го потпише тој договор“, рече тој. „И тоа ќе го видите за многу кратко време.

Американскиот државен секретар Марко Рубио, исто така, го обвини Зеленски дека почнал да се повлекува од разговорите за договорот за минерали за време на интервју на 21 февруари. Тој рече дека е постигнат начелен договор со Зеленски дека Соединетите Држави ќе земат дел од украинските наоѓалишта на ретки минерали. во замена за претходната и идната помош.

„[Зеленски] рече: „Секако, ние сакаме да го направиме овој договор, има совршена смисла, само треба да помине низ нашиот законодавен процес – тие треба да го одобрат“, рече Рубио.

„Два дена подоцна прочитав дека Зеленски вели „Го одбив договорот, им реков дека нема шанси, не го правиме“, иако тоа не се случи на состанокот. Така, почнувате да се нервирате“, рече американскиот државен секретар.

Трамп повeќе пати изјавуваше дека сака некаков вид компензација за помошта што Вашингтон ја инвестираше во одбраната на Украина и рече дека сака договор за ресурси пред да одобри поголема американска воена поддршка.

Пристапот до украинските ресурси, особено ретките минерални наоѓалишта во земјата, би можел вкупно да вреди трилиони долари.

Германското министерство предупредува на руска кампања за дезинформации пред изборите

Рускиот претседател Владимир Путин на монитор во берзата во Франкфурт, Германија, 25 февруари 2022 година.
Рускиот претседател Владимир Путин на монитор во берзата во Франкфурт, Германија, 25 февруари 2022 година.

Германското Министерство за внатрешни работи предупреди на руска операција за дезинформирање чија цел е да се влијае на изборната кампања во земјата со лажни видеа кои се шират на социјалните мрежи во Хамбург и Лајпциг.

Министерството денеска (21 февруари), соопшти дека има индиции дека кампањата е поврзана со таканаречената „Бура-1516“, операција на проруско влијание, претходно забележана на претседателските избори во САД во 2024 година, а која беше истражена од американските власти.

Безбедносните агенции во Лајпциг и Хамбург идентификуваа повеќе псевдо-медиумски страници и профили на социјалните медиуми како дел од мрежата, истакнувајќи ја загриженоста за руското мешање во демократските процеси.

Руската амбасада во Берлин не одговори на барањето за коментар.

Снимка која кружеше во источниот град Лајпциг остави впечаток дека кандидат на екстремно десничарската партија Алтернатива за Германија недостасува на изборниот список и дека таму не може да се даде втор глас за таа партијата, се наведува на официјалната веб-страница на градот.

Мрежата „Бура-1516“ шири погрешна или лажна содржина преку социјалните медиуми и сопствените веб-страници, користејќи сензационалистички извештаи за да го зголеми својот досег, соопшти Министерството.

Најпрво создава неавтентични сметки на социјалните мрежи и псевдо-медиумски сајтови како „спијачи“, првично пополнувајќи ги со неутрална и проруска содржина пред да ги активира за дезинформации.

„Градот моментално испитува какви правни чекори треба да се преземат како резултат на овие видеа“, се вели во соопштението на градските власти на Лајпциг.

Вчера (21 февруари), истражувачите кои работат со германската фондација „Роберт Бош“ рекоа дека мрежа од повеќе од 700 лажни сметки на социјалните мрежи се појавила во последната недела од германската изборна кампања, промовирајќи проруски наративи и демонизирајќи го конзервативниот фаворит, Фридрих Мерц.

Филипче без противкандидат на изборите за претседател на СДСМ

Опозицискиот лидер, Венко Филипче
Опозицискиот лидер, Венко Филипче

Актуелниот лидер на СДСМ, Венко Филипче, е единствен кандидат за претседател на партијата на редовните внатрепартиски избори кои ќе се одржат на 16 март 2025 година, утврдила Централната изборна комисија.

Комисијата одржала седница за разгледување на поднесените кандидатури за претседател на СДСМ и утврдување на листа кандидати за редовните внатрепартиски избори.

„Врз основа на Статутот на СДСМ како и врз основа на Член 9 од Правилникот за критериумите, начинот и постапката за кандидирање и избор, Централната изборна комисија утврди единствена листа на потврдени кандидати за претседател на СДСМ: 1. Венко Филипче“, соопштија денеска (21 февруари) од СДСМ.

СДСМ, велат оттаму, е единствената партија во земјата во која што членството бира претседател на директни внатрепартиски избори што, како што нагласуваат, говори за демократскиот капацитет и на партијата и на членовите.

Давкова: Химната не треба да се менува

Македонската претседателка Гордана Силјановска Давкова, архивска фотографија
Македонската претседателка Гордана Силјановска Давкова, архивска фотографија

Претседателката Гордана Сиљановска Давкова смета дека химната на државата не треба да се менува и се плаши „да не влеземе во нови страсни конфликти“ со промена на државните симболи.

Ова го изјави за време на нејзината денешна (21 февруари) посета на Македонската академија на науките и уметностите (МАНУ).

Оваа изјава доаѓа по минатонеделната потврда на премиерот Христијан Мицкоски дека со коалицискиот партнер ВРЕДИ разговараат за промена на државниот грб, како и по изјавата на вицепремиерот Изет Меџити дека може да се разговара и за промена на химната.

„Апсолутно мислам дека нема потреба од промена на химната. Химната никогаш не одразува сегашност, секогаш одразува историска меморија, генеза. И ние немаме право, замислете јас не сум чула да менуваат луѓе дури и, ако се сеќавате, во рамките на ЕУ, во обидот да се донесе Уставот во 2005 на ЕУ, беше предвидена химна. Не дојде до тоа. Значи целата историја сите народи низ историјата креирале песни или химни коишто се најважниот државен симбол впрочем и затоа незнам колку знаете, текстовите на химните во најголемиот број држави се во Уставот“, рече претседателката.

Таа посочи и дека знамето и грбот во некои држави се опишани во Уставот.

„Имам само една дилема околу моментот на отворањето на прашањето. Не негирам дека низ историјата најприсутен симбол бил црвениот лав на златна заднина. Но, мојата дилема е следната – секогаш кога почнуваме да разговараме за вакви етнички прашања, симболи, со таква страст го правиме тоа, што не ни останува време за соочување со вистинските дилеми. Ако денеска зборуваме за драматични промени, треба ние да се адаптираме на драматичните промени“, рече претседателката.

Претседателката додаде дека се плаши да не влеземе во нови страсни конфликти, а „симболите би требало да обединуваат, не да разединуваат“.

Претседателот на МАНУ, академикот Живко Попов, смета дека во овој момент менувањето на државните симболи не треба да биде најактуелно прашање, бидејќи земјата се соочува со многу други круцијални прашања.

Претседателот на Владата Христијан Мицкоски на 12 февруари рече дека партиите од владејачката коалиција, ВМРО-ДПМНЕ и Вреди, го отвориле прашањето за промена на државниот грб.

Но, една недела подоцна вицепремиерот и министер за животна средина и просторно планирање Изет Меџити изјави дека не се водат преговори во однос на химната и грбот, но и дека нема ни табу теми. Тој во интервју за емисијата „Дијалог во Лајм“ изјави дека ако се отвори темата за промена на грбот како остаток од комунистичкото минато, тогаш треба да се разгледа и промена на химната, велејќи дека „може да биде химна само со музика, без текст, или текстот може да биде изменет“.

Кремљ негира дека побарал НАТО да ги повлече трупите од источното крило

Русија е незадоволна од американскиот систем за противракетна одбрана во Романија „Aegis Ashore“ и го смета, заедно со распоредените единици на НАТО, за потенцијална закана. Фотографија од 12 мај 2016 година.
Русија е незадоволна од американскиот систем за противракетна одбрана во Романија „Aegis Ashore“ и го смета, заедно со распоредените единици на НАТО, за потенцијална закана. Фотографија од 12 мај 2016 година.

Кремљ денеска (21 февруари) ги негираше наводите дека руски официјални лица побарале од Соединетите држави да побараат повлекување на трупите на НАТО од земјите во близина или на руската граница.

„Не, тоа не е точно, тоа не одговара на реалноста. Нашиот став е дека сме заинтересирани за подобрување на воената инфраструктура кон нашите граници“, рече портпаролот на Кремљ, Дмитриј Песков.

Неговата изјава уследи по наводите на советникот на романскиот претседател, кој се чини дека изјавил оти руските власти го поднеле барањето за време на разговорите во Ријад меѓу делегациите од Москва и Вашингтон, објави редакцијата на РСЕ на англиски јазик.

Романскиот функционер Кристијан Дијаконеску, говорејќи на романската телевизија, подоцна ја повлече својата изјава, објаснувајќи дека Москва тоа го побарала порано - во 2021 година, пред почетокот на инвазијата на Украина во февруари 2022 година.

Со години Русија изразува незадоволство од присуството на трупите на НАТО во земји како што се трите балтички држави и Полска. Таа гласно се пожали и на поставувањето на ракетната одбрана на НАТО во Полска и Романија. А проширувањето на НАТО кон исток - прво во 1997 година, а потоа во два круга во 2000-тите - многу „руски јастреби“ го гледаат како суштински непријателски чин и делумно изговор за инвазија на Украина.

Откако администрацијата на американскиот претседател Доналд Трамп сигнализираше радикално нов пристап кон европските односи - тој повеќе пати се пожали дека членките на НАТО не трошат доволно пари за алијансата - во Европа се засилува алармот дека Белата куќа на Трамп може да ги прифати руските барања.

Претходно овој месец, американскиот секретар за одбрана Пит Хегсет ја вознемири 32-члената алијанса кога го отфрли членството на Украина во НАТО, како и можноста американските трупи да се приклучат на потенцијалните мировни напори во Украина. Тој исто така рече дека НАТО нема да и помогне на ниту една европска земја вклучена во случај на напад од Русија.

Говорејќи во интервју за Антена 3 на Си-Ен-Ен на 19 февруари, два дена по состанокот на делегациите на САД и Русија во Ријад, Дијаконеску се чини дека сугерираше оти Москва повторно бара повлекување на НАТО.

„Нивните (руски) очекувања се дека, во одреден момент, САД ќе ги принудат европските партнери во НАТО да ги повлечат безбедносните гаранции на НАТО на трасата од 1997 година“, рече тој.

Во следните коментари за други романски телевизиски станици, Дијаконеску ја повлече изјавата, велејќи дека мислел на претходните барања на Москва. Американците и Европејците „ниту тогаш, ниту сега“ ги прифаќаат руските барања, рече тој.

Полскиот претседател, чија земја беше една од најгласните во поддршката на Украина и го поддржа распоредувањето на трупите на НАТО долж источното крило на алијансата, оваа недела рече дека добил гаранции од САД дека нема да има намалување на американските војници.

НАТО ги зајакна своите источни сили по руската инвазија на Украина, настојувајќи да ги смири своите членки, особено оние кои беа под советска контрола за време на Студената војна.

Вчитај повеќе

XS
SM
MD
LG