Вести
Фрлени рачни бомби во полициската станица во Звечан
Косовската полиција соопшти дека неколку минути пред полноќ на 26 ноември, непознати лица фрлиле две рачни бомби во дворот на полициската станица во Звечан на северот на Косово.
„Од експлозијата причинета е материјална штета, но повредени нема“, се наведува во соопштението од косовската полиција.
Се додава дека надлежните единици извршиле истрага, а информирана е и Единицата за тешки кривични дела која работи на откривање на сторителите на овој напад.
Известен е и државниот обвинител кој го отворил случајот за „предизвикување општа опасност“.
Овој напад на полициската станица во Звечан доаѓа еден ден откако косовскиот премиер Албин Курти го постави камен-темелникот за изградба на полициска трафостаница на територијата на таа општина, во селото Извор. Оваа полициска трафостаница, како што е најавено, треба да ја опслужува граничната полиција на Косово.
Претходно, на 23 ноември беше поставен камен-темелник за изградба на трафостаница на мостот на реката Бистрица, кој се наоѓа на главниот пат кој води до граничниот премин Јариње. На тој пункт се наоѓаат припадници на специјалната и редовна полиција на Косово.
Припадниците на српската заедница кои го сочинуваат мнозинското српско население на северот на Косово се против изградбата на полициски станици или бази со образложение дека се изложени на „притисок и дискриминација“ од страна на припадниците на полицијата.
Исто така, српскиот граѓански сектор деновиве бара меѓународната заедница да се занимава со поплаките на граѓаните за однесувањето на косовската полиција, со оценка дека тие се „непрофесионални“ и „заплашени“.
Инаку, фрлањето бомби во дворовите и палењето автомобили не се ретки случаи на северот на Косово во последните години. Во периодот на пререгистрација на возила од српски на косовски таблички се евидентирани повеќе такви случаи.
Повеќегодишната криза на северот на Косово кулминираше кога во септември минатата година вооружена група Срби ја нападна косовската полиција во селото Бањска во општина Звечан и уби полицаец. Косово го окарактеризира овој напад како терористички чин и ја обвини Србија дека стои зад него, што Белград го негираше.
Одговорноста за нападот во Бањска ја презеде поранешниот политичар и бизнисмен од северот на Косово, Милан Радоичиќ, кој е на црната листа на САД и Велика Британија поради корупција и организиран криминал.
види ги сите денешни вести
Украина вели дека го погодила рускиот магацин за нафта
Украина соопшти дека нападнала складиште за нафта и радар за противвоздушна одбрана во Русија рано на 29 ноември, во услови на ескалација на нападите и од Москва и од Киев пред инагурацијата на новоизбраниот претседател на САД, Доналд Трамп во Белата куќа.
Украинскиот воен Генералштаб соопшти дека нападот врз магацинот за нафта Атлас во руската област Ростов предизвикал пожар во објектот, кој претходно беше погоден од сличен напад на почетокот на оваа година.
„Атлас е дел од рускиот воено-индустриски комплекс, кој обезбедува снабдување со нафтени деривати за армијата на Руската Федерација“, се вели во соопштението објавено на социјалните мрежи.
Се додава дека радарската станица во која се наоѓа рускиот противвоздушен ракетен систем Бук-М3 е уништена во одделен напад во област контролирана од Русија во југоисточниот регион на Украина Запорожје.
Вршителот на должност гувернер на Ростовската област,Јуриј Сљусар, изјави дека има пожар во „индустриски комплекс“ во областа каде што се наоѓа рафинеријата, велејќи дека повеќе од 100 одговорни лица се борат да го изгаснат пожарот.
Во изминатите неколку месеци, Русија ги гаѓаше украинските градови со сè потешки напади со беспилотни летала, проектили и бомби, предизвикувајќи жртви и оштетувајќи ја енергетската инфраструктура со почетокот на студената сезона.
Украина започна неколку контранапади откако администрацијата на американскиот претседател Џо Бајден, главниот странски поддржувач на Украина во нејзината битка против целосната инвазија на Русија, и европските сојузници на Киев одобрија употреба на ракети со долг дострел против цели во Русија.
За време на претседателската кампања во 2024 година, Трамп беше критички настроен кон Бајден затоа што истури милијарди долари во Украина за да и помогне во борбата.
Трамп, исто така, рече дека може да ја заврши војната во рок од 24 часа по повторното заземање на Белата куќа, изјава што се толкува во јавноста како да значи дека Украина ќе мора да ја предаде територијата што Русија сега ја окупира.
Се чини дека таа можност ги поттикна и Москва и Киев да се обидат да ги зацврстат географските позиции пред Трамп да ја преземе функцијата во јануари.
Хезболах го прогласи слабиот прекин на огнот со Израел за „божествена победа“
Лидерот на Хезболах тврди дека нивниот договор за прекин на огнот со Израел е „божествена победа“ за либанската политичка партија и милитантна група.
Во своето прво обраќање по стапувањето на сила на примирјето на 27 ноември, Наим Касем на 29 ноември рече дека групата поддржана од Иран „победила“.
„Затоа што го спречивме непријателот да го уништи Хезболах“ и да го ослаби либанскиот „отпор“, изјави Касем.
Хезболах, кој контролира голем дел од јужен Либан и има претставници во парламентот, е прогласен од Соединтите држави за терористичка организација, додека ЕУ го стави на црната листа само воено крило, не и политичката партија.
Прекинот на огнот стави крај на речиси 14-месечните борби меѓу Израел и Хезболах. Израел го засили притисокот со започнување копнена офанзива во јужен Либан во октомври и со масовни воздушни бомбардирања на упориштата на Хезболах во Бејрут и на други места.
Со примирјето завршува присуството на Хезболах во јужен Либан. Израел, исто така, мора да ги повлече своите копнени сили од Либан во рок од 60 дена од стапувањето на сила на договорот.
Израелскиот премиер Бенјамин Нетанјаху на 26 ноември го предупреди Хезболах дека Израел ќе преземе акција доколку се посомнева дека Хезболах го прекршил договорот.
На 29 ноември, неколку часа пред Касем да го одржи својот говор, Израел соопшти дека погодил ракетен фрлач на Хезболах во јужен Либан, откако забележал милитантна активност.
Соединетите држави и Франција го надгледуваат спроведувањето на примирјето, кое вклучува одредби за илјадници либански војници кои се преселуваат во јужен Либан за да работат со мировниците на ОН и да го држат Хезболах подалеку од израелската граница.
Хезболах лансираше ракети врз северен Израел од почетокот на војната во Газа во октомври 2023 година. Таа рече дека ќе ги прекине своите напади само откако Израел ќе ја заврши војната во Газа.
Во текот на изминатите 14 месеци, Израел го уби речиси целото раководство на Хезболах, вклучувајќи го и претходникот на Касем, Хасан Насрала, и го десеткуваше воениот арсенал на групата.
Израел вети дека ќе обезбеди Иран да не може да продолжи да ја финансира и вооружува групата и го предупреди сирискиот претседател Башар ал Асад да не ја олеснува иранската помош за Хезболах.
Експлозивна направа била фрлена врз зградата на општина Звечан на северот на Косово
Експлозивна направа била фрлена врз зградата на општина Звечан на северот на Косово, каде живее мнозинско српско население, ноќта меѓу 28 и 29 ноември. Заменик-директорот на косовската полиција за северниот регион Ветон Елшани за Радио Слободна Европа (РСЕ) изјави дека се сомнева дека се работи за рачна бомба од типот М-75.
Тој рече дека во нападот што се случи по полноќ, нема повредени, оштетена е општинската зграда и четири возила паркирани во близина, а полицијата започнала истрага. Засега не се идентификувани осомничени за нападот.
Косовскиот премиер Албин Курти по нападот изјави дека „криминалните и терористичките напади“ врз косовските институции имаат за цел заплашување и истакна дека и покрај тоа, ситуацијата на северот на Косово „никогаш не била подобра. “.
„Не дека нема криминалци, но криминалните структури или побегнаа во Србија, или се во затвор во Косово или се кријат некаде надвор од нашиот регион. Нема внатрешни потенцијални безбедносни закани со кои не можеме да управуваме и на кои не можеме да им се спротивставиме“, изјави Курти на 29 ноември.
Министерот за внатрешни работи на Косово Џељаљ Свечља оцени дека последните напади врз косовските институции на север се „израз на очај и ароганција на криминалните групи во режија на Белград“. Тој додаде дека „криминалните групи“ на северот на Косово се минато.
„ Заврши времето на неказнивост и амнестија на криминалните групи. Уставноста, законитоста, законот и редот ќе функционираат на секој агол, бидејќи никој не може да ги запре слободата и правата на граѓаните со стравот од тероризам“, напиша министерот на неговиот профил на социјалната мрежа Фејсбук.
Во четири општини со српско мнозинство на северот на Косово, градоначалниците се од редовите на албанската заедница бидејќи Србите ги бојкотираа изборите по колективното напуштање на косовските институции, што беше иницирано од Српската листа - најголемата партија на Србите во Косово, кое има поддршка од Белград.
Инаку, на 28 ноември во општина Звечан се одржа свечена седница на Собранието на општината по повод Денот на албанското знаме. Градоначалникот Пеци во пресрет на оваа седница одговарајќи на новинарски прашања рече дека не верува оти одбележувањето на Денот на албанското знаме му пречи на локалното српско население и додаде дека ги почитува барањата на сите граѓани.
„Право на секој граѓанин е да се организира и да ги прославува своите празници. Како градоначалник, моја должност е да го почитувам тоа и да помогнам што е можно повеќе“, рече тој.
Ова е втор напад врз косовските институции во Звечан во рок од два дена. Во вторник, на 26 ноември, непознати лица фрлија две рачни бомби во дворот на полициската станица во Звечан на северот на Косово, еден ден откако косовскиот премиер Курти присуствуваше на поставувањето на камен-темелникот за изградба на полициска трафостаница во таа општина.
Сиљановска Давкова:Инцидентите со знамето значат директно поткопување на заедништвото
Македонската претседателката Гордана Сиљановска Давкова ги осуди вчерашните инциденти кога по повод прославата на Денот на албанското знаме, беше осквернавено македонското знаме. Таа на социјалната мрежа „Фесјбук“ напиша дека тоа е чин на непочитување на државните симболи, но и директно поткопување на заедништвото на сите македонски граѓани што тоа знаме го симболизира.
„Ваквите постапки не придонесуваат за градење доверба и почит меѓу граѓаните, туку поттикнуваат дополнителни тензии и поделби. Повикот за разум, толеранција и дијалог е клучен во вакви моменти. Надлежните институции треба да спроведат темелна истрага за настанот и да преземат соодветни мерки за одговорните лица“, напиша таа.
На одбележувањето на денот на албанското на 28 ноември, имаше сквернавење на македонското знаме што предизвика стравувања за подгревање на меѓуетничките тензии во државата. Во бројните видеа кои се споделуваат на социјалните мрежи, може да се забележи како лица го симнуваат државното знаме, го кинат и шутираат со нозе. Инцидентот за кој се тврди дека се случил во Скопје, во близина на Бит пазар, предизвика лавина реакции од граѓани, како и осуда од сите политички актери.
Обвинителството побара од Кривичниот суд да им изрече мерка притвор на три полнолетни лица, откако поведе постапка против нив за кривично дело „Предизвикување омраза, раздор или нетрпеливост врз национална, расна, верска и друга дискриминаторска основа“. Постапката против приведеното малолетно лице ќе се води редовна постапка според Законот за правда за децата, соопшти Обвинителството.
Миистерот за внатрешни работи соопшти дека уапсени се осум лица од кои четири МВР ги гони за кривично дело предизвикување национална, расна и верска омраза, раздор и нетрпеливост. Додека оостанатите четворица, пак, кои биле приведени во текот на изминатата ноќ, според информациите од полицијата, се за учество во тепачка.
Обвинителството побара притвор за тројца приведени за сквернавење на македонското знаме
Мерка притвор за три полнолетни лица побара Основното јавно обвинителство Скопје, откако поведе постапка против нив за кривично дело „Предизвикување омраза, раздор или нетрпеливост врз национална, расна, верска и друга дискриминаторска основа“. Постапката против приведеното малолетно лице ќе се води редовна постапка според Законот за правда за децата, соопшти Обвинителството.
На одбележувањето на денот на албанското на 28 ноември, имаше сквернавење на македонското знаме што предизвика стравувања за подгревање на меѓуетничките тензии во државата.
„Осомничените на 28.11.2024 година околу 20:00 до 23:00 часот на булевар „Крсте Мисирков“ во Скопје, по завршување манифестација на плоштадот Скендербег по повод прослава на денот на албанското знаме, со излагање на подбив на национални симболи, односно со палење, уништување и кинење на државното знаме, предизвикале омраза, раздор и нетрпеливост врз основа на етничка припадност“, е наведено во соопштението од скопското Обвинителство.
Во бројните видеа кои се споделуваат на социјалните мрежи, може да се забележи како лица го симнуваат државното знаме, го кинат и шутираат со нозе. Инцидентот за кој се тврди дека се случил во Скопје, во близина на Бит пазар, предизвика лавина реакции од граѓани, како и осуда од сите политички актери.
Министерстот за внатрешни работи Панче Тошковски соопшти дека уапсени се осум лица од кои четири МВР ги гони за кривично дело предизвикување национална, расна и верска омраза, раздор и нетрпеливост. За ова дело предвидена е казна од најмалку една година затвор. Осомничените се млади лица на возраст од 18 до 21 година, а има и еден малолетник.
„Еден од овие луѓе е фатен како се обидува да запали знаме, друг како го симнува знамето“, рече Тошковски додавајќи дека во расчистување на овој инцидент им помогнале токму снимките од социјалните мрежи.
Останатите четворица, пак, кои биле приведени во текот на изминатата ноќ, според информациите од полицијата, се за учество во тепачка. Тошковски најави дека ќе има и други апсења и повика граѓаните да помогнат со доставување видеа, фотографии, изјави итн.
Мицкоски најави акција против судии и обвинители кои ја попречувале правдата
Акција против судиите и обвинителите што ја спречуваат правдата од понеделник најави на 29 ноември премиерот Христијан Мицкоски. Тој изјави дека акцијата нема да биде „естрадна“, но ќе биде остра. Оваа изјава е последната во серија критики кон правосудниот систем што премиерот ги посочува во изминатава недела.
„Мислам дека имате претстава дека не функционираме како естрада и сигурно дека нема јас сега да кажувам како што тоа во минатото се случуваше пред камери или пред медиуми и да носам специјални полициски единици, да понижувам луѓе, индивидуи итн,“ изјави Мицкоски одговарајќи на новинарско прашање за можноста за распуштање на Судскиот совет.
Тој посочи дека власта има план и дека од понеделник почнува спроведувањето на планот.
„Доволно беше чекање, чекавме, дадовме шанса. Очигледно дека прежестоки се нападите наеднаш на дијареја, грчеви во цревата, главоболка, температура, анксиозност итн. кога ќе треба да се потпише последниот указ за да се спроведе правдата за жал кај поедини обвинители,“ изјави Мицкоски.
Претходно, на 28 ноември, од собраниската говориница, Мицкоски изјави дека имал информации оти неколку стотици случаи од Министерството за внатрешни работи и финансиската полиција кои се наоѓаат во Обвинителството за постапување и дека по нив не се постапува.
Одговарајќи на пратеничко прашање, рече дека таму има луѓе кои не ги интересира правдата, туку дека тие се заробеници на некого.
„Таму има еден клан од двајца, еден од тројца, една е сама, добивам документи од свиркачи за фалсифкувани записници со различни дати, различни печати, без потписи. И ако тоа не е основа за јавниот обвинител да влезе и да провери, не знам кој глас треба да допре до Обвинителството за да постапи. Но, затоа веднаш допре гласот за ТОЕФЛ на Бојан Христовски. Кога СДСМ излезе од говорницата, истиот момент тој глас допре кај Гаврил Бубевски. Веднаш таа фреквенција стигнува до него и тој беше спремен веднаш, но кога треба да се постапува, тогаш треба медицински третман за симптомите со кои излегува во јавноста и ги опструира акциите на истражните органи“, посочи Мицкоски од собраниската говорница на 28 номеври.
Државниот обвинител Љубомир Коцевски, пред почетокот на седницата на Советот на јавни обвинители по критиките за работата на правосудниот систем и конкретно на Обвинителството, како и дали очекува негова смена, изјави дека тој ќе продолжи да работи професионално, а доколку евентуално направил грешка, условите за негово разрешување се наведени во Законот за јавно обвинителство.
„Јас ќе продолжам да работам најпрофесионално, законито и чесно и се што е во мојата надлежност, што значи дека останатите политички изјави не можам да ги коментирам“, изјави Коцевски.
По однос на прашањата за отсуствата на обвинителите, Коцевски посочи дека станувало збор за само еден случај од пред дваесетина дена. Како што изјави, предметниот обвинител имал вирус и не можел да дојде на закажаниот состанок со претставници на МВР, но оти само по три дена обвинителот присуствувал на неколку состаноци со надлежните служби од полицијата за евентуална координација на одредени предмети.
Според последниот извештај на Европската Унија за напредокот на земјава, една од клучните препораки е да се зајакне довербата во правосудниот систем. Особен акцент во извештајот е ставен на високо профилираните судски спорови кои според ЕК, мораат да имаат епилог.
„Северна Македонија треба да продолжи да го спроведува спроведувањето на реформите поврзани со ЕУ, особено во кластерот за основи, особено судството, борбата против корупцијата и организираниот криминал. Корупцијата треба да се решава несмалено, вклучително и преку солидно досие во истрагата, гонењето и конечното осудување на случаи на високо ниво“, се вели во извештајот.
Затворениот поранешен руски пратеник Горинов доби нова затворска казна
Затвореникот и поранешен руски пратеник Алексеј Горинов, познат по своите отворени критики за војната на Русија против Украина, е осуден на нова тригодишна затворска казна за „оправдување тероризам“. По тридневно судење, рускиот воен суд на 29 ноември ја изрече казната на 63-годишниот Горинов, кој е во лоша здравствена состојба.
Во својата завршна изјава, Горинов, еден од најистакнатите затворени дисиденти оставен во земјата по големата размена на затвореници со Западот претходно оваа година, ја обвини Русија дека извршила „крвав колеж“ во Украина.
Претходно оваа недела, Горинов истакна дека за неговата болест „нема достапен третман“ во затворот каде што ја одлежува претходната досудена седум годишна казна.
Горинов за прв пат беше осуден во јули 2022 година на седум години затвор за ширење „лажни вести“ за руската војска поради неговото јавно противење на целосната инвазија на Русија во соседна Украина.
Во октомври 2023 година, властите отворија нов случај против него, обвинувајќи го за „оправдување тероризам“ врз основа на наводни разговори со колеги затвореници за украинските војници. За време на сослушувањето, Горинов категорично негираше каква било поврзаност со тероризмот.
„Јас сум далеку од каква било идеологија на тероризам“, рече тој.
Првото обвинение во 2022 година против Горинов произлезе од антивоениот говор што го одржа на состанокот на градскиот совет во московската област Красноселски.
Тој беше првиот човек осуден според новиот руски закон за криминализирање на „лажните вести“ за војската, воведен откако Русија ја започна својата целосна инвазија на Украина во февруари 2022 година.
Обвинет за шпионажа за Русија, разговарал за убиство на истражувачки новинар, тврдат британски обвинители
Бугаринот Орлин Русев обвинет за шпионирање за Русија во Велика Британија, во разговор воден преку СМС-пораки, зборувал за можноста за киднапирање или убиство на истражувачки новинар Христо Грозев, соопштија британските обвинители за време на судењето на членовите на наводниот шпионски синџир.
Британската обвинителка Алисон Морган истакна дека група Бугари, обвинети за шпионирање за Русија, го следеле Грозев, размениле пораки со наводниот шеф на мрежата, австрискиот државјанин Јан Марсалек, во кои разговарале за киднапирање или убиство на Грозев.
Грозев работел за истражниот медиум Белингкет. Тој ја водеше истрагата на медиумската мрежа за труењето на рускиот двоен агент Сергеј Скрипал во 2018 година во Солсбери, Англија.
Русев и уште еден бугарски државјанин, Бисер Џамбазов, се изјаснија за виновни по обвиненијата за шпионажа, додека на тројца други, Катрин Иванова, Вања Габерова и Тихомир Иванчев, во моментов им се суди во Кривичен суд во Лондон поради тоа што биле дел од таканречен шпионски синџир.
Тројцата обвинети го негираа обвинението за заговор за шпионирање помеѓу август 2020 и февруари 2023 година. Според обвинението, Русев ги водел обвинетите Бугари по упатства на австрискиот држајанин Марсалек.
Марсалек, за кој се вели дека има врски со руските разузнавачи кои датираат од најмалку 2014 година, сега се верува дека е во Русија.
Гаши:Тие што посакуваат дестабилизација, не и сакаа добро на државата
Претседателот на Собранието Африм Гаши ги осуди постапките поврзани со вчерашните настани кога, како што рече, беа палени и газени државни знамиња. Тој во одговор на новинарско прашање истакна дека таквите настани се во спротивност со државните и националните интереси на секоја етничка заедница.
Прославите за албанското знаме низ Северна Македонија предизвикаа инциденти и сквернавење на македонското знаме, што доведе до политички тензии и апсења. На одбележувањето на денот на албанското, имаше сквернавење на македонското знаме што предизвика стравувања за подгревање на меѓуетничките тензии во државата.
„Патриоти се тие кои го почитуваат своето знаме, но и знамето на другите“ изјави Гаши и посочи дека не верува дека зад ова има политичка заднина. Според него треба да одговараат несовесните граѓани кои го сториле делото.
„Сите кои сакаат дестабилизација во државата, не им посакуваат добро на својата нација и својот народ, а потоа и на државата. И затоа повикувам на освестување“, рече Гаши.
Според него, потребно е унапредување на државата со зачленување во Европската унија, подигање на степенот на меѓусебна толеранција и унапредување на меѓуетничките односи.
На прашањето дали наративот на политичарите во изминатиов период има влијание за појавата на вакви настани, тој посочи дека тоа треба да го кажат органите чија надлежност е да ги расветлат последните случувања и откријат мотивите.
Премиерот Христијан Мицкоски и министерот за внатрешни работи, Панче Тошковски синоќешните настани ги посочија како обиди за дестабилизација, нешто за што, велат, предупредувале досега.
Засега, како што соопшти министерот Тошковски, уапсени се осум лица од кои четири МВР ги гони за кривично дело предизвикување национална, расна и верска омраза, раздор и нетрпеливост. За ова дело предвидена е казна од најмалку една година затвор. Осомничените се млади лица на возраст од 18 до 21 година, а има и еден малолетник.
Грузиски дипломати со остра критика до Владата, откако безбедносни сили тепаа демонстранти и новинари
Повеќе од сто грузиски дипломати остро го критикуваа владиното запирање на преговорите за членство во ЕУ, откако безбедносните сили насилно ги растераа демонстрантите и новинарите од протестот во Тбилиси поради потегот.
Повеќе од 30 луѓе беа хоспитализирани рано на 29 ноември, откако полицијата употреби солзавец, водени топови и претепа некои од илјадниците собрани демонстранти кои се противат на најавата на премиерот Иракли Кобахидзе дека неговата влада нема да ги отвори преговорите за пристап во Европската унија (ЕУ) со Брисел до 2028 година, кога завршува мандатот на неговата влада.
Министерството за внатрешни работи соопшти дека 43 лица биле уапсени „како резултат на незаконски и насилни дејствија“, додека парламентот го подигнал своето безбедносно ниво на максимум.
Како одговор, повеќе од 100 службени грузиски дипломати потпишаа отворено писмо во кое ја критикуваа промената на политиката, велејќи дека таа го прекршува уставот, кој се обврзува на стремежот за членство во ЕУ.
„Застојот на процесот на пристапни преговори ќе доведе до изолација на земјата“, напишаа тие во нивното отворено писмо.
„Без поддршка од западните партнери Грузија останува лице в лице со заканите кои особено се интензивираат во позадината на тековните процеси во меѓународната и безбедносната средина“, се вели во писмото.
Грузија е во политички превирања по парламентарните избори во октомври, на кои партијата „Грузискиот сон“ обезбеди 54 отсто од гласовите, при што опозицијата и западните влади тврдат дека гласањето било нарушено со прекршувања и руско влијание.
На почетокот на 29 ноември, полицијата тргна да ги расчистува мирните демонстранти, при што маскираната полиција пукаше со гумени куршуми и брутално ги претепа демонстрантите и новинарите.
Новинарот на Грузиската служба на РСЕ, Давит Цагарели, беше удрен и фрлен на земја од полицаец додека известуваше во живо од местото на настанот. Претходно РСЕ сними видео на кое се гледа како полицаец постојано го удира по глава новинарот на ТВ Формула Гурам Рогава.
Откако Рогава паднала на земја, полицаецот побегнал од местото. Новинарот е хоспитализиран со повреди на лицето и главата.
"Има скршеници на коските на лицето, како и скршеница на вратот. Во оваа фаза не е потребна хируршка интервенција", изјави за новинарите лекарот кој го лекувал Рогава во болницата.
Кобахиџе ги обвини демонстрантите за насилството, велејќи дека ако не беа нивните постапки, „немаше потреба да се растури собирот“.
Грузиската претседателка Саломе Зурабишвили, жесток критичар на владејачката партија „Грузиски сон“, се приклучи на протестот во Тбилиси на 28 ноември во знак на солидарност со демонстрантите.
„Јас сум со овие луѓе. Отпорот започна и нема да заврши додека немаме нови избори“, им рече таа на новинарите.
Таа, исто така, се соочи со низа полицајци, велејќи им дека е нивна „должност да го заштитат“ суверенитетот на Грузија и прашувајќи ги дали „и служат на Русија или Грузија“.
Демонстрантите за грузискиот сервис на РСЕ изјавија дека владејачката партија Грузиски сон се оддалечува од ЕУ и ја турка земјата кон Русија.
„Грузиските власти ги прекинаа сите односи со Европската унија, а исто така одбиваат да добијат средства. Ова секако ќе доведе до економски колапс“, изјави за РСЕ Манана Микава, учителка.
Претходно денеска, Европскиот парламент усвои резолуција со која се повикуваат на нови легислативни избори во Грузија и санкции за високи членови на партијата Грузиски сон.
Во својата резолуција, Европскиот парламент рече дека резултатот од изборите „не служел како сигурно претставување на волјата на грузискиот народ“.
Говорејќи во седиштето на Грузискиот сон, Кобахиџе рече дека Тбилиси ги прекинува пристапните преговори, а истовремено ги отфрла сите буџетски грантови од ЕУ до 2028 година.
„Нема да влеземе во Европската унија со молење и стоење на една нога, туку на достоинствен начин со здрав демократски систем и силна економија“, им рече премиерот на новинарите без никакви прашања.
Грузија доби статус кандидат за ЕУ во декември 2023 година, но односите со Брисел се влошија во последниве месеци, почнувајќи со усвојувањето на контроверзниот закон за „странски агенти“ за кој критичарите велат дека се заканува јавно да дискредитира илјадници медиуми и граѓански групи.
Мултимедија
Најпосетени
Што треба да знаете