Предложено е да се поведе дисциплинска постапка против шефот на Вишото јавно обвинителство Скопје Мустафа Хајрулахи и еден јавен обвинител.

Од Јавното обвинителство информираат дека јавниот обвинител на Северна Македонија ги разгледал записникот и конечниот извештај од извршениот надзор во Вишото јавно обвинителство Скопје, како и службените белешки во прилог, и врз основа на наодите за констатираните состојби одлучил до Комисијата за утврдување дисциплинска одговорност на јавните обвинители да достави предлог за поведување дисциплинска постапка против јавен обвинител од Вишото јавно обвинителство Скопје заради нестручно и несовесно работење во четири предмети во кои се откажал од жалба или обвинение.

Предлог за поведување дисциплинска постапка е поднесен и против Вишиот јавен обвинител на Вишото јавно обвинителство Скопје пред кого била реферирана и со чија согласност била донесена одлука во три од наведените предмети, како и поради констатираните неправилности во начинот на заведување на предметите во Вишото јавно обвинителство Скопје.

Иницирањето на дисциплинската постапка е уште една потврда за посветеноста на Јавниот обвинител на Република Северна Македонија да овозможи ефикасен кривичен прогон на сторителите на кривични дела и да побара одговорност од јавните обвинители кои неоправдано ги одолговлекувале постапките или неоправдано се откажувале од кривично гонење, се вели во соопштението од ЈОРСМ.

Вишиот јавен обвинител на Вишото јавно обвинителство Скопје Мустафа Хајрулахи, на прес-конференција пред Обвинителството, по одлуката за негова суспензија од функцијата на 11 септември, обвини дека кривичната пријава против него поднесена од страна на Републичкиот јавен обвинител, има тенденцијата да го отстрани и заќути, како и да ги заплаши и другите колеги кои што постапуваат согласно законот, а се со цел, како што рече, да се донесат нарачани одлуки.

Според Хајрулахи, надзорот над работата на Вишото јавно обвинителство, се случил откако тој на 19 септември бил повикан од Републичкиот јавен обвинител, кај него во канцеларија и му било кажано дека по однос на предметот со бонусите на СЈО треба да донесе одлука со која што ќе се потврди првостепеното решение од ОЈО ГОКК.

На 3 декември, високата претставничка на Европската унија за заедничка надворешна политика и безбедност, Каја Калас, во Брисел разговараше со лидерите на Косово и Србија за прв пат откако таа ја презеде оваа функција.

Шефицата на европската дипломатија, кој на оваа функција е од 1 декември, имаше одвоени разговори со премиерот на Косово, Албин (Албин) Курти и со претседателот на Србија, Александар Вучиќ.

Курти побара новите структури во Европската комисија да инсистираат на имплементација на основниот договор постигнат во процесот на дијалогот меѓу Приштина и Белград, а договорот да не се заобиколува секогаш кога ќе се спомене дијалогот.

Запрашана дали Калас даде некакви индикации за тоа како гледа на продолжување на дијалогот, Курти нагласи дека на оваа средба повеќе ги слушала двете страни.

Тој најави и интензивирање на процесот во наредната година.

„Но, во каква форма ќе биде, сега е тешко да се каже. Таа јасно ја покажува својата посветеност на регионот и тоа е добар знак за Косово, кое има очекувања од Калас, но и за целиот регион“, рече Курти по средбата.

Вучиќ, пак, рече дека имал „отворен и тежок“ разговор со Калас.

Шефот на европската дипломатија зборуваше и на социјалните мрежи, кој рече дека патот до членство е можен само преку спроведување на договорот за патот кон нормализација.

Таа се осврна и на нападот во Зубина Поток на северот на Косово.

„Ја поздравив подготвеноста за целосна соработка по неодамнешниот терористички напад. Сторителите мора да се соочат со правдата“, рече таа.

Состаноците во Брисел се одржаа само неколку дена по експлозијата на критичниот канал Ибар-Лепенац, на северот на Косово, кога беше оштетена критичната инфраструктура на земјата.

Косовските власти ја обвинија Србија дека стои зад нападот. Белград ги отфрла овие обвинувања Европската унија оцени дека станува збор за „терористички напад“ и за „акт на саботажа“.

Во експлозијата на каналот во селото Вараге кај општина Зубин Поток нема жртви, но на неговиот страничен ѕид настана голема пукнатина, поради што водата излеа од каналот, поради што некои делови од земјата се соочуваат со недостиг на вода честитки до лидерите на Косово и Србија со Калас се одржа на маргините на работната вечера за Западен Балкан, која ја организира Европскиот совет.

Главната причина за посетата на Вучиќ и Курти на Брисел е поканата на претседателот на Европскиот совет, Антонио Коста, да учествува на работната вечер што ја организира на 3 декември со лидерите од регионот.

Оваа вечера ќе послужи како подготовка за претстојниот самит ЕУ-Западен Балкан, кој ќе се одржи на 18 декември во Брисел и со кој првпат ќе претседава Коста, бидејќи тој, како и другите државни функционери, ја презеде функцијата на 1 декември. .

ОНА не може да се избрише како историја, а ние нејзините основачи и да сакаме да ја избришеме, нема да го постигнеме тоа, изјави министерот за социјална политика, демографија и млади Фатмир Лимани во одговор на новинарско прашање за ијавата на министерката Весна Јаневска за споредбите на комитите и УЧК кои ги даде по настаните со прославата на албанското знаме во образовни установи.

- Мојот татко е загинат како бранител. Историјата не може да се избрише. Министерката требаше да биде малку повоздржана во овој правец. Таа самата во вториот дел на изјавата спомена дека сите мајки од двете страни, беа изгорени од војната во 2001 година. Сепак тоа го оставам на нејзиното ниво, рече Лимани.

На прашањето дали ќе се побара одговорност од министерката на владина седница, Лимани рече дека таа за својата работа одговара пред премиерот, но како што кажа, ако тоа го кажел првиот човек на Владата, ќе побарал одговорност.

Опозициската партија ДУИ, претходно обвини дека вонредниот инспекциски надзор од власта во однос на училиштата е „антиалбанска политика“ и обвинува за „двојни стандарди“ посочувајќи го примерот од пред две години кога деца на приредба во Аеродром биле облечени како Комити и „изведувале воени поздрави“.

На ова министерката за образование Весна Јаневска рече дека во однос на Комитите меѓу нив имало од различни етникуми и тие се „дел од историјата на државата Македонија“ и треба да се изучуваат како тема во наставата додека УЧК и нејзините симболи „за оваа држава не значат ништо“.

За конкретниот случај во Аеродром таа потсети дека воспитувачката од градинката што ја организираше приредбата беше отпуштена од работа и во моментот е во судска постапка.

Инаку, извештајот од просветниот инспекторат во Челопек требаше да биде завршен дене. Директорот на инспекторатот, Шабан Алајбегу по надзорот изјави дека записникот сè уште не е составен, но верува дека најдоцна ќе биде готов.

Прославите низ неколку градови низ Северна Македонија по повод Денот на албанското знаме – 28 ноември, кога и се случи настанот во Челопек, предизвикаа неколку инциденти. Во Скопје имаше сквернавење на македонското државно знаме кое беше откачено и искинато, а МВР истата вечер приведе осум лица. Четворица од нив, меѓу кои и еден малолетник, поради сквернавењето на знамето, додека останатите за учество во тепачка.

Украина повторно повика на членство во НАТО, велејќи дека само целосното приклучување кон Алијансата ќе ја гарантира нејзината идна безбедност додека се бори да го спречи речиси тригодишниот напад на Русија во целосен обем.

„Убедени сме дека единствената вистинска гаранција за безбедноста на Украина, како и факторот за одвраќање за понатамошна руска агресија против Украина и другите држави, е само полноправното членство на Украина во НАТО“, се вели во соопштението на украинското Министерство за надворешни работи објавено пред состанок на министрите за надворешни работи на алијансата на 3 декември во Брисел.

Како реакција на изјавата на Министерството, портпаролот на Кремљ Димтриј Песков на 3 декември рече дека пристапувањето на Украина во НАТО би било „неприфатливо“ и „закана“ за Русија.

Изјавата доаѓа само неколку дена откако претседателот Володимир Зеленски изјави за Скај њуз дека приемот на Украина во НАТО може да стави крај на, како што рече, „жешката фаза на војната“ што ја предизвика Русија кога ја започна својата целосна инвазија во февруари 2022 година.

Зеленски изјави за Скај њуз на 30 ноември дека ќе биде подготвен да размисли за прекин на огнот доколку неокупираните територии на Украина паднат под заштита на НАТО, се додека поканата за приклучување кон алијансата ги признава меѓународните граници на Украина.

„Ако сакаме да ја запреме жешката фаза на војната, треба да ја земеме под чадорот на НАТО територијата на Украина што ја имаме под наша контрола“, рече Зеленски.

Состанокот во Брисел треба да се фокусира на континуираната воена поддршка на НАТО за Украина, да ги испита потребите на Киев за воздушна одбрана, а исто така да разговара и за руското лансирање минатиот месец на експериментална балистичка ракета против украинскиот град Днипро.

Русија соопшти дека новата ракета со среден дострел, наречена Орешник, може да погоди и цели низ Европа и не може да биде запрена од воздушната одбрана.

На почетокот на 3 декември, Русија започна уште еден напад со беспилотни летала врз Украина, кој во голема мера беше одбиен од украинската противвоздушна одбрана, која собори 22 од 28-те дојдовни беспилотни летала во девет региони - Киев, Чернихив, Винње, Хмелницки, Житомир, Суми, Одеса, Миколајев и Дњепропетровск.

Руската државјанка Нома Зарубина е уапсена под можни обвиненија за давање лажни информации на американската полиција и одржување врски со руските разузнавачки служби, поврзувајќи ја со друг осомничен шпион кој побегнал од САД додека властите го гонат.

Според наводите на ФБИ презентирани на сослушувањето во Јужниот окружен суд во Њујорк кон крајот на ноември, Зарубина била регрутирана од Руската Федерална служба за безбедност (ФСБ) во 2020 година и работела под кодното име „Алиса“.

Таа, наводно, работела на изградба на мрежа на контакти меѓу новинари и експерти додека извршувала задачи за офицер на ФСБ од нејзиниот роден град Томск во Сибир.

ФБИ тврди дека Зарубина намерно довел во заблуда агенти во 2021 година, негирајќи каква било поврзаност со руското разузнавање. Спротивно на нејзините изјави, таа наводно присуствувала на форуми и состаноци во Европа и САД за да ги исполни задачите на ФСБ.

Имено, самопрогонетиот руски опозиционер Леонид Волков на 2 декември на Фејсбук изјави дека ја видел Зарубина на собир во Вашингтон со неговите приврзаници во јануари 2023 година.

Случајот, исто така, ја поврзува Зарубина со Елена Бренсон (алијас Черних), шеф на Координативниот совет на руските сонародници во Соединетите држави, која беше обвинета во 2022 година за незаконски активности во име на руското разузнавање.

Бренсон, која побегна од Соединетите држави откако полицијата во тоа време упадна во нејзиниот стан во Њујорк и се верува дека моментално е во Русија, се вели дека е ментор на Зарубина од 2016 година.
Зарубина беше ослободена со кауција од 25.000 долари, со ограничувања што ѝ забрануваат да го напушти Њујорк, да контактира со руски официјални лица и да го предаде пасошот. Таа рече дека нејзината кауција ја гарантира трето лице, но не кажа за кого станува збор.

Зарубина одржува активен јавен профил, честопати учествувајќи како експерт на конференции, како што е Форумот на слободни поструски држави. Во објавите на социјалните мрежи, таа шпекулираше за политичката иднина на Сибир, залагајќи се за „обединета сибирска држава“.

И покрај нејзините јавни изјави дека негираат шпионажа, нејзината онлајн активност сугерира покомплексен наратив. На пример, до септември 2023 година, нејзиниот профил на ВКонтакте вклучуваше објави кои ги поддржуваат политиките на Кремљ, вклучувајќи го и говорот на претседателот Владимир Путин во 2014 година за анексијата на Крим на Украина, потег што ОН, САД и Европската унија (ЕУ) го нарекоа незаконски.

Во интервју за програмата на Радио Слободна Европа „Сибир реалитис“ Зарубина негираше дека работи како агент на ФСБ, но призна дека руските разузнавачки служби ја контактирале на крајот на 2020 година.

Таа опиша дека била принудена на состанок со офицери на ФСБ во Томск, каде што разговарала за нејзиното лично потекло, по што била следена. Зарубина тврди дека контактирала и со ФБИ во април 2021 година за соработка, споделувајќи сознанија за различни теми, вклучително и Украина, и продолжила да се состанува со нив.

Зарубина вели дека не очекувала ФБИ да ја уапси, изјавувајќи: „Мислев дека сме во добри односи; им помагав. Не очекував да ги искористат моите информации против мене“.

Таа се плаши од одмазда на руските разузнавачи, за кои верува дека не биле свесни за нејзината соработка со американските власти. „Ова повеќе не е за лажно сведочење - тоа е предавство во нивните очи“, рече таа.

Пратеничката група на Европскиот фронт, поднесе интерпелации за вицепремиерите Изет Меџити и Иван Стоилковиќ и за министерот за внатрешни работи Панче Тошковски и неговиот заменик Астрит Исени но и на наредната седница на дневен ред да биде ставена информација безбедносната состојба во земјата.

Координаторот на пратеничката група на ДУИ Блерим Беџети денеска на прес-конференција рече дека тие бараат информации за безбедносната состојба во земјата во последниот период, хронолошка детална информација за настаните во Куманово, особено во врска со палењето на деловни објекти во овој град и нападите врз имотите на граѓани од албанска етничка припадност , спроведените мерки и истраги за расветлување на случаевите имајќи го предвид нивното можно влијание врз меѓуетничките односи, во врска со настаните на кои се случија палења на знамиња, како и информација за селективниот пристап во смисла на процесирање на учесниците на истите настани и сите детали во врска со мерките за институционален одговор и превенција од потенцијални слични настани.

„Заменик премиерот Меџити како вицепремиер во оваа влада е одговорен за лошото управување со состојбите кои се случуваат во државата, вклучително и меѓуетничките односи“, рече координаторот.

Министерот за внатрешни работи Тошковски и неговиот заменик Исени, на денот на празникот на албанското знаме, како одговорни лица, според него, и наредиле на полицијата на невиден и неоправдан начин да интервенира, спречувајќи мирна и традиционална манифестација на Албанците.

„Оваа интервенција предизвика непотребни тензии и ја поткопа атмосферата на мир и меѓуетнички соживот. Полицијата наместо да го одржува јавниот ред и да ги почитува правата на граѓаните да го прослават овој ден, поттикна конфронтации и ескалација на тензии, рече Беџети.

Според него, не е уапсено лицето кое запалило албанско знаме.

Коалицијата ВЛЕН ја отфрли интерпелацијата. Ова е класичен предвидлив чекор на ДУИ кој следува после оркестрираното и организирано нарушување на мирното славање на 28 ноември од страна групи блиски до ДУИ и Артан Груби, сметаат од ВЛЕН.

Државниот јавен обвинител Љупчо Коцевски донел задолжително упатство со кое заради заштита на јавниот интерес и за поефикасно откривање и гонење на кривични дела и нивните сторители, се задолжуваат сите јавни обвинители итно да дадат приоритет во постапувањето по предметите за кривични дела од областа на корупцијата и од особен јавен интерес.

На ваквите предмети приоритет ќе се дава и во преземањето на дејствијата од страна на истражните центри на јавните обвинителства, а сите обвинители кои имаат во работа такви предмети се задолжени итно да извршат нивно ажурирање во смисла на проверка на преземените дејствија и на веќе издадените наредби и барања и на пристигнатите одговори од надлежни органи и институции.

Доколку по издадени наредби и барања не е пристигнат одговор или соодветни податоци од надлежни институции и органи во законски определениот рок, веднаш ќе бидат испратени ургенции за итно постапување.

„Од тие причини, во рамките на своите надлежности, кои се од организациски карактер и не навлегуваат во предметното постапување на јавните обвинители, републичкиот јавен обвинител презема чекори за сериозна реорганизација на силите Јавното обвинителство која овозможува поефикасен кривичен прогон на сторителите на кривични дела особено од областа на финансискиот криминал и корупцијата,“ се вели во соопштението.

Основните јавни обвинители на основните јавни обвинителства се задолжуваат во рок од 10 работни дена по донесувањето на Упатството да одржат стручен колегиум со сите јавни обвинители во основните јавни обвинителства на кој ќе го разгледаат обемот на работа на конкретното обвинителство во однос на предмети од областа на корупцијата по број на предмети, подносители, преземени дејствија и активни издадени наредби, ќе ги анализираат предизвиците при постапувањето во таквите предмети и ќе изнесат предлози за нивно надминување со цел поефикасен кривичен прогон.

Вишите јавни обвинители на вишите јавни обвинителства се задолжуваат во рок од 10 работни дена по донесувањето на Упатството да одржат стручен колегиум со сите јавни обвинители во вишите јавни обвинителства на кој ќе го разгледаат обемот на работа на конкретното обвинителство во однос на предмети од областа на корупцијата, предизвиците при постапувањето во таквите предмети во втор степен и предлозите за нивно надминување со цел поефикасен кривичен прогон.

За сите овие активности, како што се наведува, ќе бидат доставени извештаи до Јавниот обвинител на Република Северна Македонија, а доколку биде констатирано неоправдано одолговлекување на постапките ќе биде извршен вонреден надзор над постапувањето на соодветните јавни обвинители.

Да се најде системско решение за долгогодишниот проблем во наставата на знаковен јазик за учениците кои се глуви или имаат оштетен слух во „Партениј Зографски“ во Скопје, единственото средно училиште во Северна Македонија за нивна едукација, бара Народниот правобранител.

Од институцијата денеска доставиле препораки до Министерството за образование и наука, меѓу кои при вработување во училиштето да биде задолжително познавањето на знаковниот јазик на солидно ниво што ќе овозможи разбирливи предавања за учениците.

Според анкета што меѓу 20 глуви и наглуви ученици и 19 вработени наставници во училиштето ја спровела канцеларијата на Омбудсманот минатиот месец, констатирано е дека има наставници и со повеќегодишно работно искуство кои имаат почетно ниво (од вкупно шест нивоа од која се состои обуката) на познавање на знаковниот јазик, што е доволно за основна, но не и за сигурна интеракција, како и наставници кои воопшто не го познаваат за да комуницираат со учениците, бидејќи тоа не е задолжителен критериум за вработување.

За квалитетна комуникација и поучување на учениците, наставникот треба да има минимум четврто ниво кое минатата учебна година го имале девет наставници. Ниту еден од вработените нема завршено шесто ниво на обука на знаковен јазик.

Заменичката на Народниот правобранител, Васка Бајрамовска - Мустафа рече дека вработените на сопствена или иницијатива на раководството, посетуваат бесплатни обуки за изучување на знаковен јазик. Лиценциран обучувач на знаковен јазик е Национален сојуз за глуви и наглуви на Република Северна Македонија.

Анкетираните глуви и со оштетен слух ученици информирале дека најголем дел од наставниот кадар наставата ја реализира вербално, со пишување на табла или со споделување печатени наставни материјали, кои често не им се доволно јасни. Се изјасниле дека за нив тоа е сериозна пречка не само во наставата, туку и во секојдневната комуникација. Кога се испрашувани, учениците одговараат со помош на соученик кој е наглув и кој добро го знае знаковниот јазик и има улога на толкувач.

Учениците споделиле дека проценката на нивното знаење е нереална зашто „оценувањето е како лотарија“.

„Особено загрижувачки се изјавите на учениците дека оценувањето на нивното знаење не се базира на реална проценка на стекнатите знаења од наставниот процес. Како што самите наведоа, не добиваат квалитетно образование и се сериозно загрижени за својата иднина, бидејќи сметаат дека имаат недоволно стекнати знаења за да го продолжат образованието на факултет или да остварат вработување, што им создава чувство на нееднаквост и обесправеност“, истакна Бајрамовска - Мустафа.

Народниот правобрантел и партнерските организации ја изготвиле Информацијата со препораки упатени до МОН за унапредување на квалитетот на воспитно-образовниот процес кој овие ученици.

Покрај системско решавање на проблемот со вработување компетентен кадар, се препорачува и обезбедување континуирани обуки на вработените за употреба на знаковниот јазик, обезбедување сертифицирани толкувачи да се вклучат во наставата за која во моментов нема соодветен кадар, модернизирање на наставата со современа технологија, како и уредување на прашањето за инклузијата на учениците со попречености во новиот закон за средно образование.

Во „Партенија Зографски“ - Скопје во оваа учебна година се образуваат 45 ученици, шест повеќе од минатата учебна година.

Од нив, 20 ученици се со оштетен слух - глуви и наглуви, кои имаат потреба од исклучиво користење на знаковен јазик во комуникацијата, кој за нив е мајчин јазик. Останатите ученици во училиштето имаат друг вид попречености.

Советниците во Собранието на Нови Сад со мнозинство гласови на седницата одржана на 3 декември по барање на опозицијата го отфрлија разрешувањето на градоначалникот на Нови Сад.

Против измената гласаа 48 пратеници, а за измена 25 советници.

По гласањето, опозициските советници ја напуштија зградата на Собранието на Нови Сад.

Тие најавија дека се уште протестираат пред локалната полициска станица поради, како што тврдат, апсењето на четворица учесници на собирот пред Градското собрание на 3 декември.
За разрешувањето на градоначалникот на Нови Сад, Милан Ѓуриќ се разговараше по несреќата на железничката станица во која животот го загубија 15 лица.

Советниците за смена на градоначалникот гласаа со тајно гласање.

За време на гласањето дојде до нарушување и помал инцидент, откако Миран Погачар од опозициското „Движење Браво“ застана пред местото каде што седи градоначалникот и разговараше со него.

Членовите и на власта и на опозицијата станаа од столчињата и по кус метеж гласањето продолжи.

За тоа време граѓаните се собраа пред Собранието каде се случи инцидент во кој дел од нив се обидоа да влезат во зградата.

Голем број припадници на интервентната единица го напуштија Собранието, јави известувачот на РСЕ.

Полицијата во опрема за разбивање демонстрации е на влезот во Собранието. Ги спречуваат демонстрантите да влезат. Има спорадично туркање со демонстрантите.

Дел од демонстрантите се на влезот, а останатите се на страна и прават врева со свирежи, труби и тапани. Полицијата во цивилна облека однела еден демонстрант, јавува репортерот на РСЕ.

Дискусија и помал инцидент на средбата

Седницата започна со едноминутно молчење за жртвите од падот на настрешницата.

Предлогот за разрешување на Ѓуриќ е една од точките на дневен ред на седницата на Градското собрание на 3 декември.

Градоначалникот на Нови Сад, Милан Ѓуриќ, на дискусијата рече дека опозицијата се обидува да дојде на власт насилно, наместо на избори.

„Се надевам дека улиците во Србија никогаш нема да диктираат кој ќе биде на власт, бидејќи тоа е пораз за демократијата“, рече тој.

Пратеничката на СНС Билјана Пантиќ Пиља на седницата ја обвини опозицијата за корупција и ги обвини опозициските претставници дека „не избираат средства“ за пресметката.

„Престанете да предизвикувате страв кај граѓаните на Нови Сад дека нешто ќе пропадне, ќе пропадне, ќе се случи нешто страшно. Само вие господа од опозицијата имате крвави раце овде“, рече таа на седницата.

Собир на граѓани пред зградата на Собранието

Додека трае седницата, стотина граѓани предводени од пратеници од опозицијата се собраа пред зградата на Градското собрание.

Според известувачот на РСЕ, сообраќајот е блокиран во тој дел од градот.

Демонстрантите стојат на патот, на патот меѓу Градското собрание и покраинските институции - Владата и Собранието на Војводина. На митингот нема униформирана полиција.

Пред зградата со црвена боја е испишана пораката „Рацете ви се крвави“, што е еден од паролите на протестот.

Граѓаните почнаа да креваат врева во точно 11:52 часот, време на паѓање на настрешницата на Железничката станица.

Што се знае за реконструкцијата на железничката станица?

Железничката станица во Нови Сад беше отворена по втор пат во јули 2024 година, четири месеци пред смртта на патниците, а пораката на властите беше дека, вака реновирана, „ги надминува европските стандарди“.

Изведувач на станицата беше кинески конзорциум од кинески компании, додека шест компании од Србија и Унгарија беа ангажирани за стручен надзор.

Во јавно достапните документи на државните институции во Србија не може да се констатира дека железничката станица има употребна дозвола, која согласно законот се издава откако ќе се изврши технички преглед и ќе се утврди дека објектот е безбедно за употреба.

Од Градот Нови Сад претходно за РСЕ одговорија дека нивните инспекции не биле задолжени за издавање дозволи и надзор на работите на станицата.

13 лица се уапсени под сомнение дека се одговорни за падот на покривот на зградата на Железничката станица во Нови Сад.

Уапсениот министер за градежништво и транспорт, Горан Весиќ, кој по несреќата поднесе оставка, но и негираше одговорност, по неколку дена е пуштен од притвор.

Како Влада не ја гледаме објективноста на барањето за лидерска средба испратено преку медиумите. Сепак, нека го испратат барањето како што треба па ќе размислиме и ќе одлучиме, порача денеска (3 декември) портпаролката на Владата Марија Митева.

„Оваа Влада не работи за желбите на политичарите, туку исклучиво за интересите на граѓаните. Сосема е чудно зошто ова барање за лидерска средба доаѓа преку медиумите, се надеваме дека знаат како се испраќаат официјални барања за лидерска средба. Нека ги испратат, па ќе размислиме и ќе одлучиме“, рече Митева во одговор на новинарско прашање на денешната прес-конференција во Владата.

Нагласи дека Владата и во рамки на извршната, но и во рамки на законодавната власт има капацитет да води такви политички дијалози.

Пред неколку дена премиерот Христијан Мицкоски коментирајќи го барањето на СДСМ за лидерска средба, нагласи дека во моментов не гледа причина за такво нешто.

Во одговор на прашање посочи дека вчерашната оставка на претседателката на Судскиот совет Весна Дамева е најсоодветно нешто што можеше да се случи после сите скандали и ја повтори изјавата на премиерот дека ќе има робустна борба против состојбите во правосудството.

„Негативните поени кои ги имавме како држава доаѓаа од непостапувањето на правосудството во целина и од огромниот број на скандали кои се случуваат таму. Она што значи информација за состојбите онакви какви што се, е информација за тоа дека ќе имаме навистина робустна борба против состојбите кои ги има во делот на правосудството и не го цениме како притисок“, рече Митева.

Одговарајќи на новинарско прашање таа изрази надеж дека ќе се стабилизира состојбата во ЈСП Скопје и дека од јавното градско претпријатие ќе обезбедат нафта за нормално продолжување со работата.

„Денеска (3 декември) е последниот рок на тендерот на ЈСП Скопје за набавка на нафта за следните две години. Да видиме какви ќе бидат состојбите за да не давам одговор од аспект на хипотетичка ситуација. Факт е дека не може претпријатието да функционира постојано на ваков начин на кој функционира. Се надеваме дека ќе се консолидираат и дека ќе размислуваат за доброто на граѓаните, а не за други цели и интереси“, истакна Митева.

Проблемите со јавниот сообраќај во Скопје продолжуваат откако изминатиов период не сообраќаа автобусите на Јавното сообраќајно претпријатие ЈСП. Проблемите беа поради недостиг на гориво, со што неколку дена автобусите на ЈСП беа паркирани.

По колапсот со јавниот превоз, Владата на вонредна седница донесе одлука со која прогласи кризна состојба со топлинска енергија, за да може да му позајми гориво на ЈСП од државните нафтени резерви.