Израелската војска објави дека на 27 септември го нападнала штабот на либанската милитантна група Хезболах во јужното предградие на Бејрут, а израелската телевизија извести дека водачот Хасан Насралах бил цел на нападот.

„ИДФ(војската) изврши прецизен напад врз централниот штаб на терористичката организација Хезболах“, рече портпаролот на армијата, Даниел Хагари во телевизиска изјава.

Хезболах е милитантна група и политичка партија која контролира голем дел од јужен Либан. Соединетите Американски Држави(САД) ја прогласија за терористичка организација, додека Европската унија го стави на црната листа нејзиното вооружено крило, но не и политичката партија.

Политичката партија на Хезболах има места во либанскиот парламент.

Штабот, рече Хагари, „служел како епицентар на теророт на Хезболах“ и „се наоѓа под станбени згради во Бејрут“.

Видете и ова:

Во очекување на говорот на Нетанјаху во ОН, Израел го отфрла примирјето

Висок израелски функционер изјави за Ројтерс дека „е премногу рано“ да се каже дали Насралах бил погоден во нападот.

Обединетите нации(ОН) соопштија дека се вознемирени од израелските напади врз „густо населената“ област во јужните предградија на либанската престолнина Бејрут.

„ОН со голема тревога ги следат нападите на Бејрут“, изјави портпаролот на ОН, Стефан Дужарик.

Портпаролката на Пентагон, Сабрина Синг, рече дека САД претходно не биле запознати со овој израелски напад.

„САД не беа вклучени во оваа операција и немавме претходно предупредување“, рече Синг.

Привремениот премиер на Либан, Наџиб Микати, рече дека израелските напади врз јужните предградија на Бејрут покажуваат дека Израел „не се грижи“ за напорите да се постигне прекин на огнот.

Нападот врз седиштето на Хезболах следуваше набргу откако израелскиот премиер Бенјамин Нетанјаху вети дека ќе продолжи да ја напаѓа милитантната група во Либан.

„Ќе продолжиме да го деградираме Хезболах додека не се исполнат сите наши цели“, им рече тој на светските лидери во ОН.

Нетанјаху, исто така, го обвини Иран за насилството на Блискиот Исток.

„Имам порака до тираните во Техеран: Ако не удрите нас, ние ќе ве удриме вас. Нема место во Иран до кое долгата рака на Израел не може да допре, а тоа важи за целиот Блиски Исток“, рече Нетанјаху во Генералното собрание на ОН.

Видете и ова:

САД и нивните сојузници бараат итен прекин на огнот меѓу Либан и Израел

Речиси 700 луѓе беа убиени во Либан оваа недела во израелски напади, според либанското Министерство за здравство.

САД, Франција и другите сојузници на 25 септември објавија повик за 21-дневен прекин на откако претседателот на САД, Џо Бајден и неговиот француски колега Емануел Макрон се сретнаа на маргините на Генералното собрание на ОН во Њујорк.

Израел ќе продолжи да разговара за предлозите за прекин на огнот во Либан во наредните денови, изјави израелскиот премиер Бенјамин Нетанјаху на 27 септември.

Нападите од двете страни на либанско-израелската граница се интензивираа по нападот врз Израел на 7 октомври 2023 година од страна на палестинската група Хамас.

Хамас е прогласен за терористичка организација од САД и ЕУ.

Групата Хезболах објави дека нападите врз Израел ќе продолжат се додека не дојде до прекин на огнот во Појасот Газа.

Момче родено 2006 година, едно од двајцата тешко повредени при падот на настрешницата во Нови Сад, денеска (21 март) почина по четири месеци и 20 дена борба за живот. Информацијата ја соопшти Воено-медицинската академија (ВМА) во Белград, каде момчето беше хоспитализирано од јануари.

„И покрај сите преземени мерки и максимална посветеност на персоналот, пациентот им подлегна на комплексните повреди и настанати компликации“, се наведува во соопштението.

Со овој смртен случај, бројот на жртви во падот на настрешницата на Железничката станица од 1 ноември, се искачи на 16.

ВМА во соопштението изразува сочувство до семејството на загинатото момче.

Видете и ова:

Европското јавно обвинителство спроведува истрага за реконструкцијата на Железничката станица во Нови Сад

Трагедијата во Нови Сад се случи четири месеци по свеченото отворање на реконструираната зграда на Железничката станица. Реконструкција траеше три години.

До каде е истрагата?

Поради падот на настрешницата се водат неколку постапки. Вишото јавно обвинителство во Нови Сад на 30 декември поднесе обвинение против 30 лица, под сомнение за пропусти во реконструкцијата на настрешницата. Меѓу обвинетите се поранешниот министер за градежништво, транспорт и инфраструктура Горан Весиќ и неговата помошничка Анита Димоски, како и поранешната директорка на Железничката инфраструктура на Србија, Јелена Танасковиќ.

Десетмина од обвинетите се во притвор, Весиќ е на слобода, додека Танасковиќ и Димоски се во куќен притвор. Вишото јавно обвинителство во Нови Сад на 3 февруари соопшти дека врши проверки дали имало корупција во текот на реконструкцијата.

Европското јавно обвинителство (ЕППО) потврди за Радио Слободна Европа дека спроведува истрага за можна злоупотреба на средствата на Европската унија во врска со реконструкцијата на железничката станица.

Видете и ова:

Масовен протест во Белград - „Ние сме државата“, порака од студентите

По смртта на 15 луѓе во падот на настрешницата во Нови Сад на 1 ноември, започнаа серија протести и блокади, предводени од студенти, кои повеќе од три месеци ги блокираат факултетите, инсистирајќи на одговорност за несреќата. Тие добија поддршка во нивните барања од просветните работници, земјоделците, адвокатите и голем број останати граѓани.

Власта предводена од Српската напредна странка и претседателот Александар Вучиќ, ги осудува протестите и блокадите.

Во меѓувреме, Милош Вучевиќ на 28 јануари поднесе оставка од функцијата премиер на Србија откако студентите во блокада во Нови Сад ги претепаа напаѓачи кои излегле од просториите на владеачката Српска напредна странка.

На Клиниката за токсикологија досега проциркулирале 20 пациенти кои вдишале отровни гасови при стравичниот пожар во дискотеката во Кочани што се случи во неделата во раните утрински часови – информираше директорот на оваа клиника, д-р Андон Чибишев.

Од овие 20 пациенти, 13 поради влошување на состојбата или поради потреба од механичка вентилација биле префрлени на други клиники, претежно на Клиниката за интензивно лекување, односно на КАРИЛ, а некои се транспортирани надвор од државата. Сепак, сите дваесетмина сега се во добра општа состојба.

Видете и ова:

Десетмина од повредените во пожарот во Кочани ќе бидат пуштени на домашно лекување

Во моментот на Клиниката за токсикологија се хоспитализирани седум пациенти.

Д-р Чибишев изјави дека тие имаат инхалирано голема количина на отровни гасови затоа што биле внатре во дискотеката додека таа горела.

„Немаат термички или механички повреди. Добра вест е што се сите стабилни без клинички манифестации. Меѓутоа ние не сме задоволни до крај од лабораториските, токсколошките наоди и од наодот на метаболната состојба на пациентите“, изјави директорот на Токсикологија.

Сите седум пациенти ќе бидат задржани таму до понеделник, до кога се очекува да бидат собрани сите наоди од иследувањата што се правени во претходните денови, по што докторите ќе донесат заклучок што понатаму.

Можни доцни компликации од труењето со отровни гасови

„Секако дека и откога ќе ги испишеме тие пациенти ќе останат извесен период под наша контрола, затоа што труењето со отровни гасови може да даде доцни компликации“, вели Чибишев.

Најмладиот пациент кај нив е на возраст од 19 години, а највозрасниот има 38 години.

Сите пациенти што се хоспитализирани во медицинските установи во државата се следат конзилијарно од доктори од Клиниката за токсикологија. Се очекува еден пациент кој во моментов е згрижен на Клиниката за хируршки болести „Св. Наум Охридски“ да биде префрлен на Токсикологија, со што бројката на хоспитализирани на Клиниката за токсикологија ќе изнесува осум.

На прашањето дали овие пациенти кои инхалирале отровни гасови при пожарот во дискотеката може да имаат трајни последици, директорот на Клиниката појасни дека при пожарот горела пластика, текстил, сунѓер при што биле ослободени повеќе видови штетни гасови меѓу кои јаглероден моноксид, јаглероден диоксид и цијанводород кои може да предизвикаат сериозни нарушувања на здравјето практично на целиот организам.

Тој потенцира дека веднаш кај сите пациенти пред приемот се направени токсиколошки и биолошки анализи за да се добијат што побрзо сознанија за колкав степен на труење станува збор.

Видете и ова:

Насилно задушување е причината за смртта кај сите настрадани во пожарот во „Пулс“

„Кај сите имаме детектирана покачена концентрација и на карбоксихемоглобин. Тоа е еден спој од хемоглобинот и јаглеродниот моноксид кој се создава кога се внесува голема концентрација на јаглероден моноксид и бидејќи има 270 пати поголем афинитет кон хемоглобинот од кислородот, го зазема неговото место, а бидејќи хемоглобониот е физиолошки пренесувач на кислородот, настанува блокада на дишењето, односно на размена на гасови. При тоа, настанува тежок недостиг на кислород во сите ткива на организмот и последиците што настануваат се поради тоа“, додаде Чибишев.

Според него, среќа е што повредените брзо се донесени:

„Јас сум среќен што досега немаме загуба на човечки живот ни посериозни компликации поради таа хипоксија што настанува што може да биде трагична кога го зафаќа мозокот“.

Во однос на пациентот кој треба да биде префлен кај нив денеска од старата градска болница, тој кажа дека според неговите сознанија пациентот имал тегоби кои укажуваат на тоа дека има вдишано поголема концентрација на отровни гасови, а сите други повреди - термички и механички се санирани. Во договор со колегите од Хируршката болница, утврдено е дека нема потреба таму да лежи, а ќе биде задржан на Токсикологија уште неколку дена заради дополнителни анализи и натамошно следење.

Кај сите настрадани во дискотеката „Пулс“ во Кочани е констатирана насилна смрт од задушување што е предизвикано директно од пожарот – изјави денеска (21 март) директорот на Судска медицина, Александар Станков, кој информираше за спроведената обдукција и идентификација на починатите.

Тој на денешната прес конференција рече дека во извршувањето на 59-те обдукции на телата, учествувале експерти од Судска медицина, од патологија, но и тимови од МВР.

„Кај дел од настраданите се утврдени изгореници од прв и втор степен, но кај три лица имало и изгореници од четврти степен. Кај четворица се констатирани скршеници на ребра и задушување од притисок при бегање (стампедо), а повреди од евентуално срушени греди нема“, изјави Станков.

Тој посочи дека кај жртвите при идентификацијата биле користени две методи, ДНК анализа и дактилоскопија. Сепак, кај четворица било невозможно да се добијат отпечатоци поради што била направена само ДНК анализа.

„Во тек се токсиколошките анализи за да се утврди што било присутно во крвта на загинатите, иако според макроскопскиот наод за време на обдукциите, кај најголем број од нив имало јаглерод моноксид“, рече Станков.

• Вања Мицевска
• Емил Златков

Стотици граѓани се собираат на на плоштадот Македонија во Скопје за да им оддадат почит на 59 -те жртвите во пожарот во Кочани. Вечерта на 15 спрема 16 март во пожар во дискотеката „Пулс“ загинаа 59 млади луѓе, а над 180 се повредени.

Тој очекува сите извештаи за обдукциите да бидат завршени месецов, а за токсиколошките анализи можеби ќе биде потребно повеќе време.

„Ќе се прават и патохистолошки анализи и сѐ што ќе биде сработено, Институтот за судска медицина ќе достави до Обвинителството ќе нареди вештачење“, додаде Станков.

Обдукциите почнале вечерта, на 16 март, а завршиле претпладнето на 18 март. Идентификацијата пак, 99 проценти била завршена во вторникот, на 18 март, а комплетно во утринските часови на 19 март.

Идентификацијата првично се спроведувала во болниците каде што биле жртвите, но само со помош на препознавање и лични документи, а потоа биле применети и ДНК анализа и дактилоскопија при што, за да нема никаква грешка, проверка се правела по неколку пати.

„Од обдуцираните 59 лица, 70 отсто биле меѓу 16 и 29 години, од починатите 16 се жени, а 43 се мажи. Во детали не би влегувал зашто не се завршени сите анализи, но постојат фрактури на ребра и знаци за притисок кои довеле до задушување“, потенцираше Станков на прес-конференцијата.

Во однос на задушувањето, докторот објасни дека под дејство на јаглерод моноксид се јавува главоболка, повраќање, вртоглавица, безсознание, дезориентираност, парализа на мускулите и во вакви случаи, жртвите, вообичаено, се наоѓаат веднаш до местото од кое се обидувале да избегаат.

„Овој гас е многу опасен, нема мирис и вкус, делува на централниот нервен систем, ги онеспособува жртвите и смртта може да настане многу брзо, за неколку минути, зависно колкава е концентрацијата. Во дискотеката каде што се случил пожарот, во тој чад и простор, под дејство на јаглерод моноксид смртта може да настане многу брзо“, рече директорот на Судска медицина.

Тој објасни дека се работи за многу опасен гас кој најчесто се јавува при вакви пожари, поради недоволно, некомплетно согорување.

„Сепак, во овој случај треба да се земат предвид и другите работи како амбиенталното задушување зашто огнот што гори го троши кислородот, па покрај влијанието на јаглерод моноксидот, има и намалено количество на кислород. Во најголем број случаи при вакви големи пожари не е исклучено да се појават и цијан водород и сулфур водород“, додаде Станков.

Одговорајќи на новинарски прашања, тој објасни дека обудкциите се нужни за да се докаже вистината.

-Обдукциите се вид собирање материјални докази зашто со нив се одредува причината на смртта, дали постојат други повреди и дали прчината за смртта е поврзана со настанот. Не може да вршиме идентификација и да одредуваме причина за смрт само со преглед, мора да се направи комплетна обдукција и позитивна идентификација за да излеземе пред судот - посочи докторот.

Досега се собрани 48.172.115 денари за поддршка на настраданите во пожарот во Кочани и за нивните семејства - информираше денеска (21 март) Црвениот крст.

- Упатуваме голема благодарност до сите кои донираа и ве информираме дека сме во фаза на подготовка за првична исплата на собраните средства за најитните потреби наменети за настраданите од пожарот во Кочани – наведуваат од Црвен крст во денешното соопштение.

Портпаролката на Владата пак, Марија Митева на прес конференција посочи дека на сите повредени од пожарот во Кочани, лекувањето им е и ќе им биде обезбедено од страна на државата.

Видете и ова:

Десетмина од повредените во пожарот во Кочани ќе бидат пуштени на домашно лекување

Таа рече дека според досегашниот пресек, згрижени се 180 лица од семејствата на повредените кои се хоспитализирани во странство.

„Бевме информирани од страна на Црвениот крст дека се прави формално правно усогласување и проценка преку која на сите семејства кои се погодени од ужасната трагедија за почеток ќе им биде дадена финансиска поддршка во висина од 150.000 денари на секое семејство. Истите средства ќе им бидат на располагање за покривање на тековни, дневни, најитни трошоци“, рече Митева.

Семејствата и на починатите и на повредените ќе добијат по 150.000 денари

Таа истакна дека ова не е еднократна помош и повика на покажување солидарност без шпекулации кои можат наштетат на семејствата на пациентите.

Во однос на финансиска поддршка во висина од 150.000 денари за секое семејство Митева посочи дека моментално се врши проценка и организација на состојбата.

„На секои три часа имаме редовен контакт со семјствата во странство со цел да видиме дали има нови несакани состојби, во постојана комуникација и координација сме и замолуваме да се следат официјалните информации“, додаде таа на денешната прес конференција.

Од издадени околу 1.100 лиценци согласно Законот за градење и Законот за урбанистичко планирање, Министерството за транспорт досега извршило контрола на 643 при што кај 97 е констатирано дека по издавањето на лиценците, правните лица престанале да ги исполнуваат законските услови врз основа на кои се издадени. За ова, денеска (21 март) информираше министерот за транспорт Александар Николоски.

На денешната прес конференција тој рече дека ќе бидат донесени решенија за одземање на овие лиценци. Додаде и дека до вторник ке бидат проверени сите издадени лиценци.

„На 13 правни лица одземена им е лиценца А за изведувач на градби од прва категорија, на 34 правни лица одземена им е лиценца Б за изведувач на градби од втора категорија, на две правни лица одземена им е лиценца А за надзор над изградбата на градби од прва категорија“, рече Николоски.

Тој посочи и дека на шест правни лица одземена им е лиценца Б за надзор над изградбата на градби од втора категорија, на три правни лица одземена им е лиценца А за проектирање на градби од прва категорија, на 20 правни лица одземена им е лиценца Б за проектирање на градби од втора категорија.

Видете и ова:

Истрагата лоцира „верижни пропусти и незаконитост“ кои довеле до пожарот во Кочани

Ресорниот министер информираше и дека на две правни лица одземена им е лиценца Б ревизија на проектна документација на градби од втора категорија.

Освен тоа, на едно правно лице одземена му е лиценца за управител за одржување на објекти од прва и втора категорија, а на 16 правни лица одземена им е лиценца за изработка на урбанистички планови.

Целиот извештај, ќе биде доставен до органите на прогонот.

Според Николоски, паралелно е почната постапката за контрола и на сите издадени лиценци и овластувања во делот на патен превоз.

„Министерството во моментов спроведува контрола на сите лиценци издадени согласно Законот за градење и Законот за урбанистичко планирање. Законите за контрола не се јасни и не се исклучиви и затоа контролата сега се прави врз основа на политичка одлука. По завршувањето на постапките ќе следат законски измени со кои ќе има обврска на секои шест месеци да се врши контрола на сѐ што е издадено од страна на институциите“, рече Николоски.

Ќе се прави ревизија на законите

Тој нагласи дека идејата е да се направи поголема ревизија на постојните законски решенија за да се спречи нивната злоупотреба. Како што кажа, ќе поднесат законски измени со кои ќе побараат веднаш да се одзема лиценцата, а жалбата да не го одлага извршувањето.

Тој истакна дека Министерството за транспорт нема надлежности за објектот на клубот „Пулс“, кој е од Б категорија, зашто после донесувањето на Законот за децентрализација Министерството е надлежно само за објекти од А категорија.

„Објектот е изграден во 1999 година според важечки план во рамки на општина Кочани. Изграден е како лесна незагадувачка индустрија и одреден период се користи како фабрика за текстил, а потоа како магацин. Потоа е дограден еден дел од околу 50-тина квадратни метри кој е легализиран во 2011 година согласно Законот за легализација на бесправно изградени објекти и е приклучен на постојниот објект. Тоа значи дека се е испочитувано од аспект на урбанистичко планирање, рече Николоски одговарајќи на новинарско прашање.

Проблемот, како што кажа, настанува во оној момент кога почнуваат адаптации и реконструкции на објектот во внатрешноста без никакво одобрение од никого и дополнително е ставен печат од лице кое или не видело што се случува таму или видело но го игнорирало.

Видете и ова:

Дали законите за работа на клубовите ќе ја амнестираат одговорноста?

Тој појасни дека согласно актуелниот закон, Министерството за економија по службена должност требало во рок од три работни дена да ги провери исказите во изјавата на поднесувачот на барањето за лиценца дека објектот ги задоволува сите пропишани одредби.

„Сметам дека ваквиот закон не е добар и мора да се смени. Мора да има многу појасна и многу поголема контрола од ова што е сега напишано. Сега е оставено на широко толкување – некој дава заверена изјава на нотар дека сѐ е во ред, а некој службеник од Министерството за економија после тоа по службена должност прибавува документи и за жал ни се случи ова што ни се случи“, нагласи Николоски

Тој порача дека Државниот пазарен инспекторат нема ни капацитет ни знаење да навлегува во сите аспекти на функционалноста на некој објект и токму затоа дел од законските измени ќе одат во таа насока.

Гувернерите на турскиот главен град Анкара и третата по големина провинција Измир денеска (21 март) ги забранија демонстрациите до 25 март, додека продолжуваат протестите против притворањето на градоначалникот на Истанбул, Екрем Имамоглу. Ова значи дека забраната сега е во сила во најголемите три турски градови, вклучувајќи го и Истанбул.

Гувернерот на Истанбул во средата веќе воведе забрана за демонстрации, собири и покривање вести за таа тема до недела. Потегот доаѓа откако Републиканската народна партија (ЦХП) на Имамоглу повика на протести низ целата земја, пркосејќи на забраната за демонстрации. Доцна во четвртокот избија судири меѓу демонстрантите и полицијата во неколку турски градови.

Имамоглу, клучниот ривал на претседателот Реџеп Таип Ердоган, беше приведен во средата поради обвинувања за корупција и тероризам. ЦХП се подготвуваше да го именува за свој претседателски кандидат во недела и рече дека ќе продолжи со гласањето.

Во задушувањето на протестите поради притворот, турските власти приведоа 54 лица, објави владата во петокот.

„Вкупно 326 профили се под истрага за објави за поттикнување омраза и охрабрување криминални дејствија“, напиша турскиот министер за внатрешни работи Али Јерликаја на платформата на социјалните мрежи X.

Во четвртокот Јерликаја рече дека се приведени 37 корисници. Одделно, властите поднесоа кривични пријави против 53 демонстранти кои се приклучиле на протестите. Според државната новинска агенција Анадолу, досега се приведени 88 од 105 барани, заедно со Имамоглу.

Видете и ова:

Протести во Турција поради притворањето на истанбулскиот градоначалник

Обвиненијата за корупција против Имамоглу вклучуваат измама, местење понуди и мито. Притворот на градоначалникот на Истанбул предизвика домашни и меѓународни критики. Уште не се знае дали и кога Имамоглу, кој моментално се наоѓа во седиштето на полицијата во Истанбул, ќе се соочи со судење.

Обвинителите тврдат дека Имамоглу, во координација со прокурдската партија ДЕМ, ангажирал градски функционери поврзани со забранетата Курдистанска работничка партија (ПКК)- која е наведена како терористичка организација од Турција и нејзините западни сојузници.

Неколку градоначалници на ДЕМ и некои ЦХП неодамна беа разрешени поради слични наводи за врски со ПКК.

Доколку Имамоглу биде осуден за тероризам, турската влада би можела да го замени со функционер поврзан со владата. Во 2019 година, за прв пат во 25 години, исламските конзервативци во Турција ја загубија контролата над главниот град Анкара. Имамоглу беше реизбран за градоначалник на Истанбул на изборите во 2024 година.

Српскиот претседател Александар Вучиќ оцени дека „на Србија и е доста од оние кои ја тероризираат четири месеци“, додавајќи дека мора да направат се за да се избегне насилство, но и да се спротивстават на оние кои ја „уништуваат и уриваат“ земјата.

„Врие во Србија, буквално врие, само тие тоа не го гледаат. На Србија и е доста од оние кои ја тероризираат четири месеци. И ние мора да направиме сѐ за да го избегнеме насилството и да се спротивставиме на оние кои ја уриваат и уништуваат нашата земја“, рече Вучиќ во видео-обраќање на својот Инстаграм профил.

Тој додаде дека затоа „во најкраток можен период“ ќе ги повика луѓето на мирен и достоинствен начин да демонстрираат дека сакаат „слободна Србија“.

По смртта на 15 лица при уривање на настрешница во Нови Сад на 1 ноември, следеа низа протести и блокади, предводени од студентите, кои повеќе од три месеци ги блокираат факултетите, инсистирајќи на одговорност за несреќата.

Поддршка во нивните барања добија од просветните работници, земјоделците, адвокатите и голем број граѓани.

Ноќта меѓу четвртокот и петокот (20 и 21 март), студентите го блокираа депото на Градското сообраќајно претпријатие (ГСП) во Нов Белград, поради што, како што наведуваат од ГСП, утрово на градските улици не излегле 150 автобуси и 130 трамваи.

Десет повредедни лица во пожарот во Кочани кои се хоспитализирани во македонските болници денеска (21 март) ќе бидат испишани и пуштени на домашно лекување, објави министерот за здравство, Арбен Таравари на прес-конференција пред Ургентниот центар.

„Еден ќе биде испишан од Клиничката болница во Штип, еден од Детска хирургија, еден од Торакална и пет од приватните клиники „Систина“ и „Жан Митрев“. Во моментот на лекување се 162 пациенти од кои 47 во домашните болници, а 115 во странство“. Освен едно лице во Турција, кое е во многу сериозна состојба и неколку во покритична состојба, сите останати се во стабилна состојба“, изјави Таравари.

Видете и ова:

Преживеани од пожарот во романската дискотека „Колектив“ нудат помош на погодените од несреќата во Кочани

Таравари додаде дека веќе нема да има праќање на пациенти на лекување во странство, туку од наредната недела се очекува дел од нив да почнат да се враќаат во Македонија.

Во странство, како што соопшти Таравари се лекуваат 115 лица од кои, во Србија -30, во Бугарија-15, Грција-12, Турција -12, Шпанија-7, во Австрија-5, во Унгарија-6, во Хрватска-5, Словенија-4, Литванија-4, Белгија-4, Италија-4, Шведска-4, Полска-двајца пациенти.

Во пожарот во дискотеката „Пулс“ во Кочани на 16 март животот го загубија 59 лица, а околу 200 беа повредени. Починатите, кои се на возраст од 16 до 48 години, вчера беа погребани во Кочани, Штип, Струмица и Скопје.

Советот за безбедност на Обединетите Нации ќе одржи седница втор ден по ред за палестинските територии, овојпат фокусирајќи се на повеќемесечните напади на Израел врз окупираниот Западен Брег.

На седницата на Советот што се одржа вчера (20 март) стана збор за ситуацијата во Газа. Заменик-рускиот амбасадор во ОН, Дмитри Полиански ги критикуваше израелските лидери дека не преминале на втората фаза од договорот за прекин на огнот, која предвидува ослободување на сите затвореници и траен прекин на борбите.

Тој рече дека е тешко да се разговара за иднината кога се чини дека израелските воени и политички лидери донеле одлука во корист на војна.

Видете и ова:

Најмалку 70 Палестинци загинале во најновите израелски напади во Газа

Британскиот заменик - амбасадор Џејмс Кариуки го осуди „предупредувањето на израелскиот министер за одбрана Израел Кац за целосно уништување на Газа“.

„Велика Британија повикува на повторно пружање помош на Газа, истрага за наводите за сексуално и родово насилство врз палестинските затвореници од страна на израелските сили и итно враќање на договорот за прекин на огнот“, рече Кариуки.

Во меѓувреме, најмалку 85 Палестинци биле убиени ширум Газа во текот на ноќта, со што бројот на загинати откако Израел го прекрши примирјето со Хамас се зголемил на речиси 600, соопштија локалните здравствени власти. Хамас е прогласена за терористичка организација од САД и ЕУ.

Во текот на ноќта, во напад на семејна куќа во близина на градот Кан Јунис загинале најмалку 16 лица, главно жени и деца. Министерството за здравство на Газа соопшти дека најмалку 592 лица биле убиени во израелските напади во изминатите неколку дена.

Основното јавно обвинителство Кочани во текот на ноќта донесе Наредба за спроведување истражна постапка против 27 физички и три правни лица во врска со катастрофалниот пожар во Кочани, информираат од Јавното обвинителство на РСМ.

Деталите за истрагата, осомничените и предложените мерки за обезбедување, како што е најавено, ќе бидат соопштени денеска напладне на прес-конференција пред зградата на ОЈО Кочани.

Основниот суд во Кочани, претходно донесе решение со кое се определува 30-дневен притвор за 13 лица меѓу кои и министерот за економија Крешник Бектеши. За уште шест осомничени, на кои претходно исто така им беше определен краткотраен притвор од 48 часа, судот ќе одлучува во текот на денот.

Видете и ова:

Нови приведувања за пожарот во Кочани

Обвинителството и полицијата синоќа (20 март) спроведоа акција за приведување на лица за кои постои сомнение за инволвираност во пожарот, за што Јавното обвинителство најави дека денеска ќе информира. Со истражните активности до пред приведувањето на тројцата поранешни градоначалници беа опфатени 28 лица.

Веќе е отворена истрага и е определен 30-дневен притвор за седум службени лица, вработени во СВР Штип и ПСОН Кочани, кои се осомнични дека како соизвршители, изготвувајќи, потпишувајќи и одобрувајќи позитивна согласност, му овозможиле на правно лице да се стекне со лиценца за вршење угостителска дејност – кабаре иако објектот не ги исполнувал законските услови за работа. Трајковски.

Во пожарот во дискотеката „Пулс“ во Кочани на 16 март животот го загубија 59 лица, а околу 200 беа повредени. Починатите, кои се на возраст од 16 до 48 години, вчера беа погребани во Кочани, Штип, Струмица и Скопје.