Државната изборна комисија донесе упатство со кое на граѓаните со право на глас им се укажува дека ако гласаат само на едните избори, потоа во текот на денот доколку се предомислат нема да можат да се вратат на гласачкото место и да гласаат на другите избори.

Претседателот на Државната изборна комисија (ДИК), Александар Даштевски во интервју за МИА вели дека на граѓаните треба да им се објасни дека имаат право да гласаат за двата вида избори, но и право да одлучат дали ќе гласаат само за парламентарните или само за претседателските избори.

Ова, вели Дашевски, мора добро да се објасни бидејќи за претседателските избори има ценсуз, односно за да биде изберен претседател во вториот круг, излезеноста треба да биде 40 отсто од вкупниот број на запишани гласачи во единствениот избирачки список.

„Граѓанинот ќе може да дојде само еднаш и да гласа и за двата избори и кога ќе дојде постапката е следна: прво ја дава личната карта да се види дека е тој, потоа оди на биометриска идентификација, потоа го бараат во списокот да го заокружат и му даваат ливчиња. И после оди да гласа. Претпоставувам дека најмногу ќе гласаат за двата избори, а може да се случи и само за парламентарните, бидејќи знаеме дека излезноста и интересот таму е многу поголем. Но не смее да се доведе човекот во заблуда, бидејќи ако ве прашаат прво дали сте за едните, па за другите вие може да кажете, па јас сум за парламентарни. Значи, треба добро да се објасни дали сте за претседателски, дали сте за парламентарните и дали сте за двата, за човекот да не помисли дека поважни му се едните од другите, туку да знае дека има право да гласа и за двата избори и така да направиме и цензус“, вели претседателот на ДИК во интервјуто.

Видете и ова:

ОБСЕ/ОДИХР: Изборниот ден позитивно оценет, забелешки за кампањата

Даштевски очекува дека и на 8 мај вечерта, резултатите од изборите би можеле да се знаат до полноќ, имајќи ги предвид промените што ДИК ги направила во изминатиот период, но и искуството од изминатите избори. Тој потенцира дека за да се забрза изборниот процес во избирачките места во секое време ќе има по седум наместо пет лица, како претходно, а за броењето на резултатите ќе бидат присутни сите.

Претседателот на ДИК апелира до гласачите да придонесат за слободни, фер и демократски избори и се надева на мирни и демократски избори.

На 8 мај во земјава се одржуваат двојни избори, вториот круг од претседателските избори и парламентарните избори. На првиот круг од претседателските избори најмногу гласови освои кандидатката на ВМРО-ДПМНЕ, Гордана Сиљановска-Давкова, пред кандидатот на СДСМ и актуелен претседател, Стево Пендаровски кој се најде на второ место по освоени гласови.

Досега се собрани 48.172.115 денари за поддршка на настраданите во пожарот во Кочани и за нивните семејства - информираше денеска (21 март) Црвениот крст.

- Упатуваме голема благодарност до сите кои донираа и ве информираме дека сме во фаза на подготовка за првична исплата на собраните средства за најитните потреби наменети за настраданите од пожарот во Кочани – наведуваат од Црвен крст во денешното соопштение.

Портпаролката на Владата пак, Марија Митева на прес конференција посочи дека на сите повредени од пожарот во Кочани, лекувањето им е и ќе им биде обезбедено од страна на државата.

Видете и ова:

Десетмина од повредените во пожарот во Кочани ќе бидат пуштени на домашно лекување

Таа рече дека според досегашниот пресек, згрижени се 180 лица од семејствата на повредените кои се хоспитализирани во странство.

„Бевме информирани од страна на Црвениот крст дека се прави формално правно усогласување и проценка преку која на сите семејства кои се погодени од ужасната трагедија за почеток ќе им биде дадена финансиска поддршка во висина од 150.000 денари на секое семејство. Истите средства ќе им бидат на располагање за покривање на тековни, дневни, најитни трошоци“, рече Митева.

Семејствата и на починатите и на повредените ќе добијат по 150.000 денари

Таа истакна дека ова не е еднократна помош и повика на покажување солидарност без шпекулации кои можат наштетат на семејствата на пациентите.

Во однос на финансиска поддршка во висина од 150.000 денари за секое семејство Митева посочи дека моментално се врши проценка и организација на состојбата.

„На секои три часа имаме редовен контакт со семјствата во странство со цел да видиме дали има нови несакани состојби, во постојана комуникација и координација сме и замолуваме да се следат официјалните информации“, додаде таа на денешната прес конференција.

Од издадени околу 1.100 лиценци согласно Законот за градење и Законот за урбанистичко планирање, Министерството за транспорт досега извршило контрола на 643 при што кај 97 е констатирано дека по издавањето на лиценците, правните лица престанале да ги исполнуваат законските услови врз основа на кои се издадени. За ова, денеска (21 март) информираше министерот за транспорт Александар Николоски.

На денешната прес конференција тој рече дека ќе бидат донесени решенија за одземање на овие лиценци. Додаде и дека до вторник ке бидат проверени сите издадени лиценци.

„На 13 правни лица одземена им е лиценца А за изведувач на градби од прва категорија, на 34 правни лица одземена им е лиценца Б за изведувач на градби од втора категорија, на две правни лица одземена им е лиценца А за надзор над изградбата на градби од прва категорија“, рече Николоски.

Тој посочи и дека на шест правни лица одземена им е лиценца Б за надзор над изградбата на градби од втора категорија, на три правни лица одземена им е лиценца А за проектирање на градби од прва категорија, на 20 правни лица одземена им е лиценца Б за проектирање на градби од втора категорија.

Видете и ова:

Истрагата лоцира „верижни пропусти и незаконитост“ кои довеле до пожарот во Кочани

Ресорниот министер информираше и дека на две правни лица одземена им е лиценца Б ревизија на проектна документација на градби од втора категорија.

Освен тоа, на едно правно лице одземена му е лиценца за управител за одржување на објекти од прва и втора категорија, а на 16 правни лица одземена им е лиценца за изработка на урбанистички планови.

Целиот извештај, ќе биде доставен до органите на прогонот.

Според Николоски, паралелно е почната постапката за контрола и на сите издадени лиценци и овластувања во делот на патен превоз.

„Министерството во моментов спроведува контрола на сите лиценци издадени согласно Законот за градење и Законот за урбанистичко планирање. Законите за контрола не се јасни и не се исклучиви и затоа контролата сега се прави врз основа на политичка одлука. По завршувањето на постапките ќе следат законски измени со кои ќе има обврска на секои шест месеци да се врши контрола на сѐ што е издадено од страна на институциите“, рече Николоски.

Ќе се прави ревизија на законите

Тој нагласи дека идејата е да се направи поголема ревизија на постојните законски решенија за да се спречи нивната злоупотреба. Како што кажа, ќе поднесат законски измени со кои ќе побараат веднаш да се одзема лиценцата, а жалбата да не го одлага извршувањето.

Тој истакна дека Министерството за транспорт нема надлежности за објектот на клубот „Пулс“, кој е од Б категорија, зашто после донесувањето на Законот за децентрализација Министерството е надлежно само за објекти од А категорија.

„Објектот е изграден во 1999 година според важечки план во рамки на општина Кочани. Изграден е како лесна незагадувачка индустрија и одреден период се користи како фабрика за текстил, а потоа како магацин. Потоа е дограден еден дел од околу 50-тина квадратни метри кој е легализиран во 2011 година согласно Законот за легализација на бесправно изградени објекти и е приклучен на постојниот објект. Тоа значи дека се е испочитувано од аспект на урбанистичко планирање, рече Николоски одговарајќи на новинарско прашање.

Проблемот, како што кажа, настанува во оној момент кога почнуваат адаптации и реконструкции на објектот во внатрешноста без никакво одобрение од никого и дополнително е ставен печат од лице кое или не видело што се случува таму или видело но го игнорирало.

Видете и ова:

Дали законите за работа на клубовите ќе ја амнестираат одговорноста?

Тој појасни дека согласно актуелниот закон, Министерството за економија по службена должност требало во рок од три работни дена да ги провери исказите во изјавата на поднесувачот на барањето за лиценца дека објектот ги задоволува сите пропишани одредби.

„Сметам дека ваквиот закон не е добар и мора да се смени. Мора да има многу појасна и многу поголема контрола од ова што е сега напишано. Сега е оставено на широко толкување – некој дава заверена изјава на нотар дека сѐ е во ред, а некој службеник од Министерството за економија после тоа по службена должност прибавува документи и за жал ни се случи ова што ни се случи“, нагласи Николоски

Тој порача дека Државниот пазарен инспекторат нема ни капацитет ни знаење да навлегува во сите аспекти на функционалноста на некој објект и токму затоа дел од законските измени ќе одат во таа насока.

Гувернерите на турскиот главен град Анкара и третата по големина провинција Измир денеска (21 март) ги забранија демонстрациите до 25 март, додека продолжуваат протестите против притворањето на градоначалникот на Истанбул, Екрем Имамоглу. Ова значи дека забраната сега е во сила во најголемите три турски градови, вклучувајќи го и Истанбул.

Гувернерот на Истанбул во средата веќе воведе забрана за демонстрации, собири и покривање вести за таа тема до недела. Потегот доаѓа откако Републиканската народна партија (ЦХП) на Имамоглу повика на протести низ целата земја, пркосејќи на забраната за демонстрации. Доцна во четвртокот избија судири меѓу демонстрантите и полицијата во неколку турски градови.

Имамоглу, клучниот ривал на претседателот Реџеп Таип Ердоган, беше приведен во средата поради обвинувања за корупција и тероризам. ЦХП се подготвуваше да го именува за свој претседателски кандидат во недела и рече дека ќе продолжи со гласањето.

Во задушувањето на протестите поради притворот, турските власти приведоа 54 лица, објави владата во петокот.

„Вкупно 326 профили се под истрага за објави за поттикнување омраза и охрабрување криминални дејствија“, напиша турскиот министер за внатрешни работи Али Јерликаја на платформата на социјалните мрежи X.

Во четвртокот Јерликаја рече дека се приведени 37 корисници. Одделно, властите поднесоа кривични пријави против 53 демонстранти кои се приклучиле на протестите. Според државната новинска агенција Анадолу, досега се приведени 88 од 105 барани, заедно со Имамоглу.

Видете и ова:

Протести во Турција поради притворањето на истанбулскиот градоначалник

Обвиненијата за корупција против Имамоглу вклучуваат измама, местење понуди и мито. Притворот на градоначалникот на Истанбул предизвика домашни и меѓународни критики. Уште не се знае дали и кога Имамоглу, кој моментално се наоѓа во седиштето на полицијата во Истанбул, ќе се соочи со судење.

Обвинителите тврдат дека Имамоглу, во координација со прокурдската партија ДЕМ, ангажирал градски функционери поврзани со забранетата Курдистанска работничка партија (ПКК)- која е наведена како терористичка организација од Турција и нејзините западни сојузници.

Неколку градоначалници на ДЕМ и некои ЦХП неодамна беа разрешени поради слични наводи за врски со ПКК.

Доколку Имамоглу биде осуден за тероризам, турската влада би можела да го замени со функционер поврзан со владата. Во 2019 година, за прв пат во 25 години, исламските конзервативци во Турција ја загубија контролата над главниот град Анкара. Имамоглу беше реизбран за градоначалник на Истанбул на изборите во 2024 година.

Српскиот претседател Александар Вучиќ оцени дека „на Србија и е доста од оние кои ја тероризираат четири месеци“, додавајќи дека мора да направат се за да се избегне насилство, но и да се спротивстават на оние кои ја „уништуваат и уриваат“ земјата.

„Врие во Србија, буквално врие, само тие тоа не го гледаат. На Србија и е доста од оние кои ја тероризираат четири месеци. И ние мора да направиме сѐ за да го избегнеме насилството и да се спротивставиме на оние кои ја уриваат и уништуваат нашата земја“, рече Вучиќ во видео-обраќање на својот Инстаграм профил.

Тој додаде дека затоа „во најкраток можен период“ ќе ги повика луѓето на мирен и достоинствен начин да демонстрираат дека сакаат „слободна Србија“.

По смртта на 15 лица при уривање на настрешница во Нови Сад на 1 ноември, следеа низа протести и блокади, предводени од студентите, кои повеќе од три месеци ги блокираат факултетите, инсистирајќи на одговорност за несреќата.

Поддршка во нивните барања добија од просветните работници, земјоделците, адвокатите и голем број граѓани.

Ноќта меѓу четвртокот и петокот (20 и 21 март), студентите го блокираа депото на Градското сообраќајно претпријатие (ГСП) во Нов Белград, поради што, како што наведуваат од ГСП, утрово на градските улици не излегле 150 автобуси и 130 трамваи.

Десет повредедни лица во пожарот во Кочани кои се хоспитализирани во македонските болници денеска (21 март) ќе бидат испишани и пуштени на домашно лекување, објави министерот за здравство, Арбен Таравари на прес-конференција пред Ургентниот центар.

„Еден ќе биде испишан од Клиничката болница во Штип, еден од Детска хирургија, еден од Торакална и пет од приватните клиники „Систина“ и „Жан Митрев“. Во моментот на лекување се 162 пациенти од кои 47 во домашните болници, а 115 во странство“. Освен едно лице во Турција, кое е во многу сериозна состојба и неколку во покритична состојба, сите останати се во стабилна состојба“, изјави Таравари.

Видете и ова:

Преживеани од пожарот во романската дискотека „Колектив“ нудат помош на погодените од несреќата во Кочани

Таравари додаде дека веќе нема да има праќање на пациенти на лекување во странство, туку од наредната недела се очекува дел од нив да почнат да се враќаат во Македонија.

Во странство, како што соопшти Таравари се лекуваат 115 лица од кои, во Србија -30, во Бугарија-15, Грција-12, Турција -12, Шпанија-7, во Австрија-5, во Унгарија-6, во Хрватска-5, Словенија-4, Литванија-4, Белгија-4, Италија-4, Шведска-4, Полска-двајца пациенти.

Во пожарот во дискотеката „Пулс“ во Кочани на 16 март животот го загубија 59 лица, а околу 200 беа повредени. Починатите, кои се на возраст од 16 до 48 години, вчера беа погребани во Кочани, Штип, Струмица и Скопје.

Советот за безбедност на Обединетите Нации ќе одржи седница втор ден по ред за палестинските територии, овојпат фокусирајќи се на повеќемесечните напади на Израел врз окупираниот Западен Брег.

На седницата на Советот што се одржа вчера (20 март) стана збор за ситуацијата во Газа. Заменик-рускиот амбасадор во ОН, Дмитри Полиански ги критикуваше израелските лидери дека не преминале на втората фаза од договорот за прекин на огнот, која предвидува ослободување на сите затвореници и траен прекин на борбите.

Тој рече дека е тешко да се разговара за иднината кога се чини дека израелските воени и политички лидери донеле одлука во корист на војна.

Видете и ова:

Најмалку 70 Палестинци загинале во најновите израелски напади во Газа

Британскиот заменик - амбасадор Џејмс Кариуки го осуди „предупредувањето на израелскиот министер за одбрана Израел Кац за целосно уништување на Газа“.

„Велика Британија повикува на повторно пружање помош на Газа, истрага за наводите за сексуално и родово насилство врз палестинските затвореници од страна на израелските сили и итно враќање на договорот за прекин на огнот“, рече Кариуки.

Во меѓувреме, најмалку 85 Палестинци биле убиени ширум Газа во текот на ноќта, со што бројот на загинати откако Израел го прекрши примирјето со Хамас се зголемил на речиси 600, соопштија локалните здравствени власти. Хамас е прогласена за терористичка организација од САД и ЕУ.

Во текот на ноќта, во напад на семејна куќа во близина на градот Кан Јунис загинале најмалку 16 лица, главно жени и деца. Министерството за здравство на Газа соопшти дека најмалку 592 лица биле убиени во израелските напади во изминатите неколку дена.

Основното јавно обвинителство Кочани во текот на ноќта донесе Наредба за спроведување истражна постапка против 27 физички и три правни лица во врска со катастрофалниот пожар во Кочани, информираат од Јавното обвинителство на РСМ.

Деталите за истрагата, осомничените и предложените мерки за обезбедување, како што е најавено, ќе бидат соопштени денеска напладне на прес-конференција пред зградата на ОЈО Кочани.

Основниот суд во Кочани, претходно донесе решение со кое се определува 30-дневен притвор за 13 лица меѓу кои и министерот за економија Крешник Бектеши. За уште шест осомничени, на кои претходно исто така им беше определен краткотраен притвор од 48 часа, судот ќе одлучува во текот на денот.

Видете и ова:

Нови приведувања за пожарот во Кочани

Обвинителството и полицијата синоќа (20 март) спроведоа акција за приведување на лица за кои постои сомнение за инволвираност во пожарот, за што Јавното обвинителство најави дека денеска ќе информира. Со истражните активности до пред приведувањето на тројцата поранешни градоначалници беа опфатени 28 лица.

Веќе е отворена истрага и е определен 30-дневен притвор за седум службени лица, вработени во СВР Штип и ПСОН Кочани, кои се осомнични дека како соизвршители, изготвувајќи, потпишувајќи и одобрувајќи позитивна согласност, му овозможиле на правно лице да се стекне со лиценца за вршење угостителска дејност – кабаре иако објектот не ги исполнувал законските услови за работа. Трајковски.

Во пожарот во дискотеката „Пулс“ во Кочани на 16 март животот го загубија 59 лица, а околу 200 беа повредени. Починатите, кои се на возраст од 16 до 48 години, вчера беа погребани во Кочани, Штип, Струмица и Скопје.

Суданската армија повторно ја зазеде претседателската палата во Картум од ривалските паравоени Сили за брза поддршка, соопштија воените лидери.

Видеото и фотографиите објавени на социјалните мрежи и потврдени од Би-Би-Си покажуваат радосни војници како мавтаат со пиштоли, навиваат и клекнуваат да се молат.

Се чини дека армијата е подготвена да ја врати контролата врз главниот град две години откако беше исфрлена од нејзините паравоени ривали, познати како РСФ, јави Би-Би-Си.

Паравоената група сè уште не коментирала.

Набил Абдалах, портпаролот на армијата, на државната телевизија изјави дека војската ја презела контролата врз палатата и зградите на министерствата во центарот на Картум.

„Нашите сили целосно ги уништија борците и опремата на непријателот и запленија големо количество опрема и оружје“, додаде Абдала.

Видете и ова:

Најмалку 39 лица загинаа во судирите во Судан

Картум е местото каде што почна бруталната граѓанска војна во земјата пред речиси две години и каде се водеа некои од најголемите битки.

РСФ го држеа најголемиот дел од главниот град, како и западниот дел на Судан од почетокот на војната. Враќањето на Картум би било огромна победа за суданските вооружени сили и клучен момент во конфликтот. Армијата, исто така, оствари придобивки во делови од централен Судан во последните недели.

Очевидци вчера (20 март)пријавија експлозии од напади со дронови и воздушни напади во близина на Републиканската палата.

На видео снимка во саботата, командантот на РСФ Мохамед Хамдан Дагало, познат како Хемедти, вети дека ќе ја брани претседателската палата и околните области кои се под контрола на неговата паравоена група. Тој се закани со дополнителни напади во неколку северни градови.

Неколку мировни напори пропаднаа бидејќи ривалските сили рекоа дека ќе продолжат со борбата за контрола на стратешките области. Војната ја предизвика најголемата хуманитарна криза во светот, според ОН, при што и РСФ и армијата се обвинети за кршење на човековите права.

Десет противпожарни возила и околу 70 пожарникари се борат со пожар во трафостаница во Хејс, кој е дел од Лондон.

Половина од трансформаторите во трафостаницата сè уште горат.

Помошникот командант Пат Гулбурн рече дека ова е многу голем инцидент, а пожарникари неуморно работат во тешки услови за да го стават пожарот под контрола што е можно побрзо.

„Пожарот предизвика прекин на електричната енергија во голем број домови и локални бизниси. Пожарникарите евакуираа 29 лица од соседните имоти и беше воспоставен кордон од 200 метри како мерка на претпазливост, при што беа евакуирани околу 150 луѓе. Поради големиот чад, ги советуваме жителите да ги држат прозорците и вратите затворени. Операторите во контролниот центар примија повеќе од 200 повици и даваат клучни упатства и ја смируваат јавноста. Ова ќе биде долготраен инцидент. Како што влегуваме во утрото, се очекува потешкотиите да се зголемат, па ги повикуваме луѓето да ја избегнуваат областа ако е можно“, додаде тој.

Пожарникарите биле повикани во 23:23 часот, а екипите од Хејс, Хитроу, Хилингдон, Саутхол и околните противпожарни станици биле испратени на местото на настанот.

Францускиот претседател Емануел Макрон најави нов самит на земји кои се подготвени да помогнат во гарантирањето на евентуалниот мировен договор меѓу Украина и Русија.

По самитот на лидерите на земјите од Европската унија вчера во Брисел, Макрон најави дека следниот четврток во Париз ќе се одржи нов самит за Украина.

Украинскиот претседател Володимир Зеленски треба да присуствува, рече Макрон.

„Ќе ја финализираме нашата работа за поддршка на украинската армија и ќе изградиме одржлив и отпорен воен модел за да ги спречиме идните руски инвазии. Ние, исто така, ќе ги дефинираме безбедносните гаранции што можат да ги обезбедат европските сили. Ние сакаме да го заштитиме мирот“, напиша Макрон на X.

Макрон рече дека на Украина и е потребна веродостојна поддршка за да се осигура дека секој можен прекин на огнот ќе се одржи. Тоа би ја зајакнало и нејзината позиција во можните преговори.

Состанокот во Париз има за цел да се надоврзе на напредокот постигнат на разговорите на воено ниво вчера во Лондон. На нив присуствуваа претставници на повеќе од дваесетина европски и неевропски земји.

Видете и ова:

Калас: За да го одвратиме агресорот, мора да ја зајакнеме одбраната

Макрон и британскиот премиер Кир Стармер ја предводат иницијативата за формирање на таканаречена „коалиција на подготвените“, која би била составена од нации подготвени да понудат војници или поддршка на мировните сили во случај да се постигне мировен договор за запирање на војната меѓу Русија и Украина, која трае повеќе од три години, потсетува ДПА.

Досега во дискусиите беа вклучени не само лидерите на земјите од НАТО и ЕУ, туку и претставници од други земји, вклучувајќи ги Австралија и Нов Зеланд.

Дискусиите вклучуваат прашања и дали и под кои услови европските сили би можеле да придонесат за обезбедување прекин на огнот.

Велика Британија и Франција во принцип ја покажаа својата отвореност за испраќање копнени трупи во Украина. Сепак, тие инсистираат на вклучување на САД во случај на ескалација. Австралискиот премиер Ентони Албанез изјави дека и неговата земја размислува да испрати војници.