Вести
Русија го напаѓа Миколаев со ракети земја-воздух
Русија го гаѓаше јужниот украински град Миколаив со проектили земја-воздух во текот на ноќта, при што загина најмалку еден цивил, а ранити се неколку други, изјавија на 27 април украинскиот претседател Володимир Зеленски и регионалните власти.
Во исто време, украинската армија објави дека борбата за контрола продолжува во Бахмут, источниот град кој беше во епицентарот на руската офанзива на исток.
Руските трупи го гаѓаа Миколаев со четири ракети С-300, изјави на Телеграм шефот на регионалната воена администрација Виталиј Ким, додавајќи дека најмалку еден облакодер и две приватни станбени згради биле погодени во градот.
„Оружјето со висока прецизност беше насочено кон приватни куќи, историска зграда и повеќекатница“, рече претседателот Зеленски на Телеграм. „Засега знаеме за еден загинат и 23 ранети, меѓу кои и едно дете“, напиша тој.
Николаевската област и нејзиниот главен град беа често мета на руско гранатирање во последните месеци. Од почетокот на инвазијата на Украина, Русија негираше дека целела цивили, и покрај многуте докази за спротивното.
Тешките борби продолжија во регионот Доњецк на линијата на фронтот Бахмут-Адвиивка-Марјинка, соопшти Генералштабот на вооружените сили на Украина во секојдневното ажурирање на 27 април.
„Напаѓачот ги концентрира своите главни напори на офанзивните операции во Бахмут, Авдијивка и Маринка, каде одбранбените сили на Украина одбија 54 напади во последните 24 часа. Најжестоките борби продолжуваат во Бахмут и Маринка“, соопшти армијата.
Серхиј Череватиј, портпарол на Источната воена команда, на 26 април изјави за украинската телевизија дека руските сили го срамнуваат со земја Бахмут.
„Русите уништуваат згради во Бахмут за да ги спречат нашите војници да ги користат“, рече Черевати.
Евгениј Пригожин, бизнисменот поврзан со Кремљ, кој ја контролира озлогласената Вагнерска група платеници што го предводи рускиот напад врз Бахмут, на 26 април изјави дека украинската војска најверојатно ќе започне долгоочекувана контраофанзива, која тој ја нарече „неизбежна“.
Украинската страна не ја коментираше изјавата на Пригожин.
види ги сите денешни вести
Хрватска го осуди протерувањето на хрватските државјани од Србија
Хрватските власти го осудија протерувањето на хрватски граѓани од Србија. Премиерот Андреј Пленковиќ побарал и појаснување од властите во Белград.
„Протерувањето на хрватските граѓани од Србија е неприфатлива практика достојна за осуда, со инсинуација дека нашите граѓани се мешаат во внатрешните настани во Србија, што секако не е случај“, рекол Пленковиќ на владина седница на 10 април.
Тој посочил дека Хрватска бара „појаснувања од властите во Србија“ и додал дека протестна нота поднело и Министерството за надворешни работи, објави Владата на социјалната мрежа Икс.
Пленковиќ на владината седница рекол и оти за сè се информирани и хрватските партнери во ЕУ.
Шефот на хрватската дипломатија Гордан Грлиќ Радман изјави дека очекува Брисел да реагира на протерувањето на хрватските граѓани од Србија и оцени оти постапките на официјален Белград не се во духот на добрососедските односи.
„Секоја земја што претендира да стане членка на ЕУ треба апсолутно да ги прифати сите вредности на ЕУ, а слободата на движење е една од основните слободи на Унијата“, изјави Грлиќ Радман пред новинарите во Загреб, пренесува агенцијата Бета.
Тој рече дека во последните месеци се евидентирани 32 случаи на протерување или забрана за влез во Србија за хрватски државјани, нагласувајќи дека може да има уште такви случаи.
„Од земја-кандидат (за ЕУ) се очекува да развива и промовира добрососедски односи, а овој чин не го покажува тоа“, нагласи хрватскиот министер.
Еден од случаите на протерување е хрватската државјанка Ариен Стојановиќ Ивковиќ, која дипломирала на Медицинскиот факултет во Белград, се вработила, омажила и основала семејство во Србија. Но, по 12 години живеење во Белград, српските власти ја протераа и ѝ забранија влез во земјата во траење од една година.
На 8 април, полицијата и врачила решение со кое и го укинува претходно одобрениот привремен престој во Србија и ѝ забранува влез во земјата на една година.
Причините за тоа не се објавени во јавноста, но Стојановиќ Ивковиќ претпоставува дека тоа се должи на нејзината поддршка на студентите кои со месеци протестираат во Србија.
Хрватскиот амбасадор во Србија, Хидајет Бишчевиќ, за медиумите во Србија изјави дека во последните три дена добил информација за протерување на тројца хрватски државјани од Србија, меѓу кои и првиот човек на Хрватската стопанска комора.
Ова е само еден во низата случаи на протерување на хрватски државјани од Србија. Под изговор дека претставуваат безбедносен ризик, во јануари 2025 година беа протерани учесниците на работилница организирана од фондацијата „Ерсте“ во Белград.
Освен тоа, српското раководство ја обвини Хрватска дека се обидува да ја собори владата преку тајната служба и студентските протести.
На крајот на декември 2024 година, српскиот претседател Александар Вучиќ зборуваше за влијанието на хрватската разузнавачка агенција кај невладиниот сектор во Србија велејќи дека сето тоа директно или индиректно било поддржано од западните разузнавачки агенции, како од Европа, така и од САД.
Вучиќ во таа прилика не понуди никаков доказ за тие тврдења.
Во Србија со месеци се одржуваат протести и блокади на факултетите, а студентите бараат одговорност за смртта на 16 лица при уривањето на настрешницата на железничката станица во Нови Сад на 1 ноември 2024 година.
Според Судскиот совет, возачот што ја прегазил Теодора не можел да добие повисока казна
Во случајот со прегазувањето на 22-годишната Теодора Ристовска во Тетово во 2022 година, судот не можел да изрече повисока казна за возачот бидејќи од страна на Обвинителството немало жалба во досегашната судска постапка.
Ова е заклучокот што може да се извади од извештајот што го објави Судскиот совет откако работна група го разгледа случајот по досудената двегодишната казна затвор за возачот Менсур Пајазити што покрена лавина реакции во јавноста.
„Согласно член 428 од Законот за кривична постапка (ЗКП), ако е изјавена жалба само во корист на обвинетиот пресудата не смее да се измени на негова штета во однос на правната оцена на делото и на кривичната санкција“, велат од Судскиот совет.
Пред да го наведат ваквиот заклучок, од Судскиот совет хронолошки се осврнуваат на тоа како се движел случајот во судската постапка изминатите години, каде не може да се сретне дека имало жалба од обвинителството.
Според хронологијата, за прегазувањето на младата Теодора, во јуни 2023 Основното јавно обвинителство (ОЈО) Тетово поднело обвинителен предлог за кривичното дело „тешки дела против безбедноста на луѓето и имотот во сообраќајот“. За ова дело, предвидена е казна затвор од една до пет години.
Во судот се оформил предмет, а пресуда била донесена на 30 ноември 2023 со која обвинетиот Пајазити добил затвор од три години и шест месеци.
Против пресудата на тетовскиот Основен суд, само обвинетиот преку својот адвокат поднел жалба до Апелацискиот суд Гостивар, а Вишото јавно обвинителство Гостивар се изјаснило таа да се одбие како неоснована, покажува извештајот на Судскиот совет.
Апелација одлучила делумно да ја уважи жалбата така што „на обвинетиот ќе му се изрече поблага кривична санкција“.
„Со пресуда на Апелациониот суд Гостивар пресудата на Основниот суд Тетово се преиначува само во делот на одлуката за кривичната санкција, така што обвинетиот се осудува на казна затвор во траење од две години“, наведуваат од Судскиот совет.
На ова, било поднесено барање за вонредно преиспитување на пресудата, за што Врховниот суд одлучил да ја укине пресудата и да го врати предметот на повторно судење.
Тогаш се оформил нов предмет, и за нов судија бил назначен Ељведин Ферати.
На 7 април годинава, се одржало судско рочиште, обвинетиот возач признал вина, а Ферати ја изрекол пресудата во траење од две години.
Тој, според заклучокот од Судскиот совет, не можел да изрече казна на штета на обвинетиот бидејќи претходно имало жалба само во негова корист.
Муцунски сo Герапетритис во Делфи – разговарале за билатералните односи со Грција
Министерот за надворешни работи и надворешна трговија, Тимчо Муцунски, денеска (10 април) оствари средба со неговиот грчи колега, Јоргос Герапетритис, соопштија од Министерството за надворешни работи и надворешна трговија.
Средбата се случи на маргините на Делфи економскиот форум во Грција.
„Двајцата министри ја нагласија заедничката подготвеност и потребата од понатамошно унапредување на билатералната соработка – преку интензивиран политички дијалог, приоритетно поврзување во сферата на инфраструктурата и енергетиката, како и нова динамика во економијата, културата и туризмот“, велат од МНР.
Оттаму додаваат дека Муцунски се заблагодарил за помошта од Грција во згрижувањето пациенти кои беа повредени во трагедијата во дискотеката во Кочани, во која загинаа 61 лице, а околу 200 беа повредени.
Северна Македонија и Грција, имаа речиси тридецински спор околу старото уставно име на државата – Република Македонија, кој беше надминат со потпишување на Преспанскиот договор на 17 јуни 2018 година кога со двете држави раководеа владите предводени од премиерите Зоран Заев и Алексис Ципрас.
Годишниот економскиот форум што се одржува во грчкиот планински град со античко и историско значење Делфи, е јубилеен – десетти. Тој претставува независна, непрофитна организација со меѓународен карактер, која секоја година на едно место собира истакнати личности од економијата, политиката и академската заедница. Целта на форумот е да се прикаже реална рамка на цели и активности, да се бараат политики за справување со глобалните предизвици и да се најдат соодветни решенија за сложените прашања, како и да се промовираат иновативни идеи за одржлив и конкурентен раст за Европа и поширокиот регион на Источен Медитеран.
На форумот, покрај Муцунски, кој има обраќање на пленарна сесија на тема „Дали ЕУ – САД алијансата е надвор од поправка?“, учествува и министерката за финансии Гордана Димитриеска-Кочоска.
ОН: Талибанците апсат мажи поради фризури и неодење на молитва
Талибанската полиција за морал уапсила мажи и нивни бербери поради фризурите и брадите што ги направиле кога се потстрижувале, додека други поради тоа што пропуштиле молитви во џамиите за време на Рамазан, се вели во извештајот на Обединетите Нации (ОН) објавен денеска (10 април), шест месеци по стапувањето на сила на Законот за морал со кој Талибанците сакаат да го регулираат однесувањето на луѓето.
Министерството за пороци и доблести, минатиот август објавија низа закони опфаќаат многу аспекти од секојдневниот живот во Авганистан, вклучувајќи ги јавниот превоз, музиката, бричењето и прославите. Најзначајно е тоа што Министерството издаде забрана за жените да зборуваат и да го откриваат своето лице во јавноста.
Истиот месец, висок функционер на ОН предупреди дека законите, заедно со постојните ограничувања за вработување, образование и кодови за облекување за жените и девојчињата, се „вознемирувачка визија“ за иднината на земјата.
Талибанските власти ја отфрлија загриженоста на ОН за Законот за морал.
Во извештајот на мисијата на ОН за Авганистан се вели дека во првите шест месеци од имплементацијата на законот, повеќе од половина од притворите биле „мажи кои немаат соодветна должина на брада или фризура или бербери кои ја потстрижувале или сечеле брадата спротивно на прописите“.
Во извештајот се наведува дека полицијата за морал редовно приведува луѓе самоволно „без соодветна постапка и законска заштита“.
„За време на светиот муслимански месец на постот, Рамазан, присуството на мажите на задолжителните заеднички молитви беше внимателно следено, што понекогаш доведуваше до произволно притворање на оние кои не се појавиле“, се додава во извештајот.
Мисијата на ОН соопшти дека биле погодени и двата пола, особено луѓето со мали бизниси, како што се приватните образовни центри, бербери и фризери, кројачи и угостители, што доведува до намалување или целосно губење на приходите и можностите за вработување.
„Директните и индиректните социо-економски ефекти од спроведувањето на законот најверојатно ќе ја влошат страшната економска ситуација во Авганистан“, се вели во извештајот.
Студија на Светска банка проценува дека владината забрана за образование и работа може да ја чини земјата повеќе од 1,4 милијарди долари годишно.
Водачот на талибанците, Хибатула Акунџада, пак, го истакна приматот на исламскиот закон и улогата на Министерството за пороци и доблести во реформирањето на авганистанското општество и неговиот народ.
Во пораката објавена во пресрет на верскиот фестивал Рамазан Бајрам, кој го означува крајот на Рамазан, Акунџада рече дека е неопходно „да се воспостави општество без корупција и искушенија и да се спречи идните генерации да станат жртви на погрешни верувања, штетни практики и лош морал“.
Повеќе од 3.300 инспектори, главно мажи, имаат задача да ги информираат луѓето за законот и да го спроведуваат, се вели во извештајот.
Никој од Министерството за пороци и доблести не беше веднаш достапен за коментар за извештајот.
И ЕУ ги суспендира царините за САД на 90 дена
Претседателката на Европската комисија, Урсула фон дер Лајен, објави дека ЕУ ќе ги стави во мирување планираните царини за американските стоки „за да им даде шанса на преговорите“. Ова следува откако американскиот претседател Доналд Трамп го паузираше воведувањето царини од САД на 90 дена.
Унијата, во која членуваат 27 европски држави, вчера (9 април) даде зелено светло за да ги презеде првите мерки како одмазда за царините за извоз на челик и алуминиум во САД.
„Додека го финализираме усвојувањето на контрамерките што ќе ги преземе ЕУ, кои имаа силна поддршка од нашите земји-членки, ќе ги ставиме царините во мирување 90 дена. Доколку преговорите не бидат задоволителни, нашите контрамерки ќе стапат на сила“, рече Фон дер Лајен.
Претседателот Трамп минатата недела најави воведување тарифи од 20 отсто за увоз од ЕУ, како дел од неговите глобални „реципрочни“ мерки против голем број земји.
Контрамерките што ЕУ ги одобри вчера се насочени кон американски производи во вредност од повеќе од 20 милијарди евра, вклучувајќи соја, мотоцикли и козметика.
Унијата сè уште работи на одговор на универзалните царини на Трамп, кои ја погодија ЕУ со стапка од 20 проценти, како и на наметнатите тарифи за автомобилскиот сектор.
Фон дер Лајен нагласи дека „работата продолжува“.
„Сите опции остануваат на маса“, рече таа.
Брисел јасно стави до знаење дека претпочита да избегне одмазда.
Во претходна изјава во текот на денот, шефицата на Европската комисија ја поздрави одлуката на Трамп да ги паузира планираните царини нарекувајќи ја „важен чекор кон стабилизирање на глобалната економија“.
Таа рече дека ЕУ „останува посветена на конструктивни преговори со САД“ и ја повтори понудата на Унијата за билатерално царинско ослободување за автомобили и други индустриски стоки.
ОЈО Скопје отвори истрага за измами со брзи кредити
Основното јавно обвинителство (ОЈО) Скопје отвори истрага против 43 лица за измами поврзани со брзи кредити. Осомничените се товарат дека на име на други граѓани подигале кредити во различни кредитни друштва. Со измамите, според обвинителството, успеале незаконски да прибават над три милиони денари (околу 50 илјади евра).
Четворица од осомничените, меѓу кои и еден вработен во Фондот за здравствено осигурување се гонат за неколку кривични дела: компјутерски измами, фалсификување исправи и злоупотреба на лични податоци. Останатите, велат од ОЈО Скопје, се опфатени со „поединечни дејствија на помагање и соизвршителство во секој од случаите поединечно“.
Дел од осомничените, тврди Обвинителството, користеле туѓи лични податоци, правеле лажни јавни исправи и преправале вистински јавни исправи со намера да ги користат како вистински.
„Со внесување невистинити податоци во информатичките системи на десетина различни друштва за „брзи кредити“, како и со фалсификување на електронски потписи, без знаење на оштетените на нивно име земале кредити, создавајќи им обврска на лицата да ги враќаат наводно позајмените средства“, велат од Обвинителството.
Еден дел од осомничените, додаваат оттаму, лажирале податоци и невработени лица ги прикажувале како вработени и кредитоспособни и така извлекувале пари од друштвата за брзи кредити.
„Во тоа им помагал и осомничениот – службеното лице вработено во Фондот за здравствено осигурување на РСМ, ставајќи им средства на располагање, односно ЕЗБО број кој претходно го обезбедувал преку својот компјутер од електронскиот систем на Фондот. Ваквите лажни податоци лицата ги користеле за да подигнат и по неколку кредити од различни друштва во еден ден, со што прибавувале значителна имотна корист. Потоа парите ги извлекувале од сметка и во најголем дел ги давале на осомничените организатори на вакви измами“, велат од ОЈО Скопје.
Обвинителството за тројца од осомничените ќе бара да им се определи притвор, додека еден веќе се наоѓа во притвор за друго кривично дело во друг случај.
Извештајот од работната група за случајот со Теодора доставен до Судски Совет
Работната група до претседателот на Судскиот совет Александар Камбовски го доставила извештајот за случајот со Теодора Ристовска, која беше прегазена на пешачки премин во Тетово, а на обвинетиот Менсур Пајазити доби две години затвор.
Работната група, составена од три члена, требаше да го разгледа предметот од првиот ден кога обвинението влегло во судот па се до понеделникот кога по вторпат почна и заврши во тетовскиот суд.
„Завршена е работата на работната група, доставена е информација, меѓутоа се уште немав можност да ја видам таа информација и веднаш ќе биде објавена и предметот ќе биде вратен назад во судот. Во текот на денот очекуваме да излеземе со повеќе информации“, изјави денеска Камбовски по свечените изјави на неколкумина нови претседатели на судови.
Претходно, премиерот Христијан Мицкоски го повика Судскиот совет да ја преразгледа работата на судијата кој донесе одлука да го казни возачот кој ја прегази Ристевска на две години затвор. Тој рече дека е згрозен од ваквата пресуда и дека тоа не е правда, туку целосно потфрлање на системот.
Камбовски не сакаше да ја коментира и информацијата за парична казна за судијата од Кривичниот суд, Пајазит Пајазити.
Медиумите веќе објавија дека на затворена седница на Судскиот совет минатата недела, била донесена одлука Пајазити да се казни со 30 отсто помала плата за шест месеци, поради одлуката да го пушти косовскиот државјанин Блерим Рамадани од УЧК од ефективен во домашен притвор, по што тој избега. Одлуката за Пајазити е донесена осум месеци откако Рамадани избега од земјава.
„Не би ја коментирал, тоа не е правосудно завршена постапка. До овој момент нема жалба“, рече Камбовски.
Рамадани беше уапсен на 17 јули на граничниот премин Јажинце и однесен на 30 дена екстрадициски притвор во затворот во Шутка, но на 1 август мерката му беше преиначена од „притвор“ во „куќен притвор“ и тој според решението бил упатен на адреса во Скопје. Со оваа одлука се предвидуваше тој да остане во „куќен притвор“ до 16 август.
Во однос на трагедијата во Кочани, Камбовски истакна дека е рано да се разговара за тоа што доколку не може таму да се реализира судењето.
„Мислам дека е рано за тоа да разговараме. Се во свое време. Судскиот совет не треба да одлучува за тоа. Ќе се постапи согласно законот, рече Камбовски.
Во пожар во дискотеката „Пулс“ во Кочани животот го изгубија 61 млади луѓе, а околу 200 беа повредени. Поголемиот дел од нив сѐ уште се на лекување во странските здравствени установи.
ДЗР: Несоодветни услови и безбедносни ризици-главни проблеми во затворите
Пренатрупаноста, недоволната инвестиција во инфраструктурата, нецелосно воспоставен видео надзор, недостатокот на медицински персонал и несоодветната техничка опременост влијаат негативно врз обезбедувањето хумани услови за лицата лишени од слобода. Овие се главните заклучоци од спроведената ревизија на успешност на тема „Реформа на пенитенцијарниот систем“ од страна на Државниот завод за ревизија (ДЗР).
Дополнително, ограничената примена на пробациски мерки и недоволната постпенална поддршка ја намалуваат ефикасноста на ресоцијализацијата, додека нерегуларниот надзор ја доведува во прашање усогласеноста со препораките за подобрување на состојбите, се наведува во извештајот на ДЗР.
Во ревизијата меѓудругото, се нагласува дека недоволниот развој на пробацијата во правосудниот систем во насока на имплементирање на соодветни и одржливи мерки за реинтеграција на сторителите во заедницата на кои се извршуваат алтернативни мерки и недоволно изрекување на пробациски мерки од страна на надлежните органи неповолно влијае на остварување на основната цел на пробацијата и намалувањето на затворската популација.
„Со спроведената ревизија и применетата ревизорска методологија, прибраните ревизорски докази, стекнавме разумно уверување дека преземените активности од страна на надлежните институции не придонесуваат во целост за унапредување и хуманизирање на системот за извршување на санкции и реформи во пенитенцијарниот систем“, велат од ДЗР.
Материјалните услови во одделни установи или одделенија при установите и пренатрупаноста, додаваат, не придонесуваат за обезбедување на хумани услови за сместување, предвидени во меѓународните стандарди од областа, почитување на личноста и достоинството на лицата лишени од слобода.
Поради недостиг на финансиски средства, се додава, установите не можат да планираат активности, а планираните активности да ги реализираат и да ги подмират обврските од минати години.
„Во установите недостасува безбедносна опрема, ниту е воспоставен унифициран концепт за визуелно-електронско набљудување и одржување на видео надзорот, ниту имаат предвидена обврска за изготвување на проекти/планови за утврдување на сите клучни ризични точки, потребниот број и вид на камери, местото на поставување на камерите за видео надзорот, а врз основ на претходна анализа изработена од стручни лица во областа. Поради недоволен број на припадници на затворската полиција зголемени се трошоците за прекувремена работа, а тужбите од страна на затворската полиција за работа подолго од полното работно време и останати додатоци на плата придонесуваат за зголемени судски трошоци и исплати по извршни решенија“, се вели во ревизијата.
Исто така се нагласува дека не е обезбедена целосна здравствена заштита на лицата лишени од слобода заради недоволен медицински персонал, а отсуството на ажурирани податоци за задолжително здравствено осигурување доведува до неостварување на правото за здравствено осигурување на лицата кои се на издржување казна затвор и издржување на воспитна мерка во воспитно - поправен дом.
Покрај ова се посочува и дека установите не се доволно кадровски екипирани со инструктори кои би можеле да вршат стручно оспособување на осудените лица, а не располагаат ниту со доволен број на воспитувачи за спроведување на третмански мерки.
Ослободена е американско-руската државјанка Карелина осудена за предавство
Адвокатот на руско-американската државјанка Ксенија Карелина, која беше осудена на 12 години затвор во Русија, изјави дека таа била ослободена на 10 април во размена на затвореници меѓу Москва и Вашингтон.
Минатиот август, Карелина беше прогласена за виновна за предавство од руски суд за донирање пари на добротворна организација со седиште во САД, која обезбедува хуманитарна помош за Украина.
„Карелина замина за САД со авион од Абу Даби во четврток наутро“, изјави нејзиниот адвокат Михаил Мушаилов за Ројтерс.
Руските медиуми објавија дека Карелина платила околу 50 евра на невладината организација „Разом“, која обезбедува материјална поддршка во Украина.
Рускиот суд пресуди дека парите биле користени од вооружените сили на Украина за купување лекови, опрема, оружје и муниција.
Судот прецизираше дека парите биле префрлени на 24 февруари 2022 година, денот кога започна руската инвазија на Украина.
Триесет и четиригодишната Ксенија Карелина е по потекло од Екатеринбург на Урал, а живеела во САД, каде што емигрирала пред повеќе од десет години и добила американско државјанство.
Минатата година, Вашингтон ја осуди бруталноста на казната на Карелин, тврдејќи дека Русија намерно апси американски државјани со цел подоцна да ги искористи за размена со Руси затворени во странство.
Најголемата размена на затвореници од Студената војна меѓу Москва и Западот се случи во август минатата година, кога американски новинари и руски опозициски личности беа ослободени за осомничени руски агенти затворени на Западот.
Уапсена министерката за високо образование на Кантонот Сараево и нејзината помошничка
Во рамките на акцијата со кодно име „Плик“, по наредба на вршителот на должноста обвинител на Обвинителството на Кантонот Сараево, истражителите на МВР на Кантонот Сараево (КС) ги лишија од слобода Адна Месиховиќ, министерка за наука, високо образование и млади на КС и нејзината помошничка Џенита Витешкиќ.
Ова во заедничко соопштение го објавија Обвинителството на КС и МВР на КС.
Тие се осомничени за кривично дело злоупотреба на положба или овластување. Поконкретно, тие се осомничени за незаконски вработувања во министерството.
„Рано утрово е извршен претрес во становите на осомничените и во канцелариите на Министерството за наука, високо образование и млади на КС, пронајдена е документација и други предмети кои можат да се користат во понатамошна кривична постапка“, стои во соопштението.
Акцијата, меѓу другото, е резултат на протоколот во гонење на коруптивни кривични дела потпишан од страна на Обвинителството на КС со Канцеларијата за борба против корупција на КС и Управат на полицијата на МВР на КС. Помош била укажана и од Агенцијата за разузнавање и безбедност на Босна и Херцеговина, се наведува во соопштението.
Осомничените по криминалистичката обработка во МВР на КС ќе бидат предадени во натамошна надлежност на Обвинителството на Кантонот Сараево.
Мултимедија
Најпосетени
Што треба да знаете