Вести
Ковачевски по средбата со Борел побара брз старт на преговори со ЕУ
Македонскиот премиер Димитар Ковачевски по денешната средба со еврокомесарот за надворешни работи и потпреседател на Европската Комисија Жозеп Борел апелираше за побрза интеграција на земјава и регионот во Европската Унија нагласувајќи дека тоа ќе ги спречи влијанијата од трети страни врз регионот, но и ќе придонесе за стабилност и развој на цела Европа. Тој изјави дека ЕУ и сите нејзини земји членки треба да делуваат стратегиски и храбро и да повикаат на интеграција на земјите од Западен Балкан во ЕУ.
„Брзата интеграција на С.Македонија и регионот ќе обезбеди стабилност, но и развој на Европа. Потребни ни се предвидливи, веродостојни, засилени и забрзани процеси на интеграција во ЕУ“, изјави Ковачевски на заедничката прес конференцијата.
Борел изјави дека целта на неговото патување не е да го подигне евроспектицизмот, и мисли дека моментот е сега, односно дека С. Македонија е подготвена за започне пристапни преговори со ЕУ и дека земјата е целосно усогласена со европските стандарди. Борел повтори дека местото на земјава е во ЕУ и оти Брисел прави сѐ што може преговорите да започнат на следната меѓувладина конференција.
„Местото на С Македонија е во европското семејство. Ветување? Не можам да ветам. Но, можам да ве уверам дека чиниме сѐ што можеме за пристапните преговори со Албанија и С Македонија да започнат на следната меѓувладина конференција затоа што тоа е приоритет за ЕК и но за мене. Се надевам дека ќе се разрешат билатералните прашања преку заемни прифатливи решенија“ изјави Борел.
Тој изјави дека ги разбира емоците на македонските граѓани и нивното разочарување.
„ Но, кога велам дека преговорите за пристапување на С. Македонија и Албанија соЕУ е висок приоритет и постојано проценуваме дека земјата е подготвена за пристапување, тоа не е реторичка изјава, тоа е цвста проценка и заложба, изјава за заложба дека тоа е приоритет. Реков и повторувам дека одлуките донесени од Владата на Северна Македонија уште повеќе ја поврзуваат со вредностите на ЕУ затоа што таа многу јасно ја искажа својата волја да оди по тој пат. Но постои проблем, и вие многу добро знаете кој е тој проблем, и се обидуваме да го решиме со сите наши капацитети“ вели Борел.
Ковачевски изјави дека денеска на средбата со Борел во детали разговарале за македонската посветеност на реформите и за напредокот во разговорите со бугарската влада. Во однос на самото отпочнувањето на преговорите ќе зависи од сите земји членки на ЕУ кои ќе дадат согласност на некој нареден состанок на ЕУ. Тој вели дека не се врзува за датуми, туку за цели и решение кое ќе биде прифатливо за двете страни во однос на отворените прашања со соседна Бугарија, кои ќе се базираат на задржување на достоинството на двете земји, по што би се одржала првата меѓувладина конференција со ЕУ.
Борел истакна дека Скопје е првата станица на неговата балканска турнеја и посочи дека е благодарен што С. Македонија се приклучила кон санкциите против Русија поради инвазијата врз Украина. Тој додаде дека состојбата со Украина е сериозно загрижувачка и очекува земјите соседи на Украина во наредниот период да пречекаат можеби и 4 до 5 милиони Украинци бегалци од војната. Во текот на овие 17 дена колку што трае војната 2,6 милиони Украинци избегаа од својот дом и од бомбите на руската армија, а тоа е најголемото движење на луѓе од Втората светска војна навака.
„Војната на Путин не е само за Украина. Се работи за непочитување на меѓународното право и приципите, се работи за безбедност и стабилност на европскиот континент. Случувањата во Украина не засега сите, во економски и политички термини ве засега вас, не засега нас и ЕУ. Ние мора да зборуваме и со идните земји членки на Унијата како што сте вие и мора да го кренеме гласот за да ставиме крај“ изјави Борел.
Тој се заблагодари на македонската влада за како што вели, јасниот став и осудување на руската агресија како и поддршката за Украина и украинскиот народ.
Борел на заедничката прес конференција соопшти дека министрите за надворешни работи на ЕУ наскоро ќе гласаат за нов четврт пакет на сакнции против Русија кој ќе го таргетира нејзиниот пристап до европскиот пазар, до криптовалути како и извоз на луксузни стоки и челичниот и енергетскиот сектор.
види ги сите денешни вести
Затворениот руски математичар Мифтахов ставен во самица
Рускиот математичар и политички затвореник Азат Мифтахов е ставен во самица на седум дена, пишува Радио Слободна Европа на англиски јазик.
Според групата за поддршка на Мифтахов, одлуката била донесена откако тој пријавил дека се чувствувал загрозен од цимерот во неговата ќелија.
Во писмото што го сподели групата, Мифтахов објаснил дека наместо да биде префрлен во друга ќелија, тој бил сместен во самица.
Останува нејасно дали Мифтахов ќе биде вратен во истата ќелија по неговата самица.
Неговата група за поддршка соопшти дека цимерот на Мифтахов најверојатно е ментално болен. Мифтахов вели дека човекот добил третман додека бил во притвор, но сепак бил осуден на повеќе од 10 години затвор и сега е во ќелија без пристап до медицинска нега.
Мифтахов моментално ја отслужува казната во затвор во Димитровград, Улјановската област. Во март 2023 година, тој беше осуден на четири години затвор за „оправдување тероризам“.
Обвиненијата произлегоа од коментарите што Мифтахов, наводно, ги дал додека отслужувал претходна казна, во кои му изразил поддршка на Михаил Злобицки, кој го изврши самоубиствениот напад во 2018 година на зградата на Федералната служба за безбедност во Архангелск. Во нападот загина само Жлобицки.
Пред тоа, Мифтахов одлежа пет години и девет месеци под обвинение за хулиганство за неговата наводна вмешаност во нападот на канцеларијата на владејачката партија Единствена Русија во Москва во 2018 година.
Тој и неговите поддржувачи остануваат на ставот дека се невини, наведувајќи дека во текот на истрагата бил мачен и принуден да потпише признание, кое тој го повлекол.
Во 2019 година, руската организација за човекови права Меморијал го призна Мифтахов како политички затвореник.
По распадот на Сириза, ПАСОК станува главна опозиција во Грција
Грчката социјалдемократска партија ПАСОК стана водечка опозициска сила во парламентот откако повеќе пратеници ја напуштија левичарската партија Сириза.
ПАСОК, кој во минатото беше доминантна партија во Грција, сега има шанса да се натпреварува со десноцентристичката Нова демократија, предводена од премиерот Киријакос Мицотакис.
Сириза, која до неодамна беше водечка опозициска партија, сега има само 29 пратеници, додека ПАСОК располага со двајца повеќе.
Падот на Сириза започна со серија внатрешни проблеми, вклучувајќи борби за лидерската позиција. Клучен момент беше напуштањето на двајца пратеници, кои дополнително ја ослабнаа партијата.
Со новиот статус како главна опозициска партија, ПАСОК добива и поголеми привилегии, вклучувајќи повеќе време за говор во парламентот. Партијата планира да го искористи овој момент за да привлече гласачи кои се незадоволни од владејачките партии.
ПАСОК беше на власт во Грција повеќе од три децении, но изгуби голем дел од поддршката на граѓаните по 2010 година, кога прифати меѓународен пакет помош во замена за строги мерки за штедење.
Сириза дојде на власт во 2015 година со ветување дека ќе ја прекине политиката на штедење, но подоцна го промени курсот и прифати нов пакет помош. Последниот изборен пораз на Сириза во 2023 година доведе до оставка на лидерот Алексис Ципрас, кој беше заменет од Стефанос Каселакис.
Сепак, неговото раководење предизвика незадоволство кај пратениците, што доведе до нивно напуштање и формирање нова група. Каселакис подоцна најави создавање нова политичка партија, со што дополнително ја ослаби Сириза.
Владата ќе одржи вонредна седница за проблемот со јавниот превоз
Владата за денеска (21 ноември) во 14 часот закажа вонредна седница на која ќе се расправа за проблемот со јавниот превоз во главниот град. Скопјени од вчера имаат редуциран градски превоз поради недостиг на гориво за автобусите. Најголем дел од автобусите се лоцирани во базите во „Скопје“ во Автокоманда и Ѓорче Петров.
За денеска во 18 часот е закажана и вонредна седница на Советот на Град Скопје.
Од советничката група на СДСМ предлагаат Владата под итно да обезбеди 2,5 милиони литри евро-дизел од државните резерви на нафта, да се свика надзорна расправа во Собранието за состојбата во главниот град, како и да се донесат измени за Законот за финансиска поддршка на општините и јавните претпријатија основани од нив, коишто Собранието треба да ги усвои по скратена постапка за да се обезбеди финансиска стабилност на Градот.
Од Либерално демократската партија пак преку соопштение побараа оставка од градоначалничката Арсовска.
Од Град Скопје одговорноста во врска со кризата што настана Јавното сообраќајно претпријатие (ЈСП) кое остана без нафта, ја префрлаат на советниците на ВМРО-ДПМНЕ и на директорката на Бирото за јавни набавки поради поништената постапка за набавка на гориво за автобусите.
Од Бирото за јавни набавки денеска ги отфрлија ставовите во соопштението од Град Скопје како непримерни и непрофесионални нагласувајќи дека ЈСП избрал неприфатлива понуда за најповолна.
Од Основното јавно обвинителство соопштија дека ги следат сите информации и веќе се дадени одредени насоки на Управата за финансиска полиција да ги испита постапките за јавни набавки на мазут за потребите на ЈСП.
За утре (22 ноември) се најавени јавни протести поради состојбата со превозот во градот. Градоначалникот на Општина Шуто Оризари Курто Дудуш, ги повика сите жители на протест, а со барање за нормализирање на јавниот превоз излегоа и студентите од УКИМ кои најавија дека ќе се приклучат на протестот.
Захарова: Сили на НАТО во Украина значи влегување на Алијансата во војна со Русија
Портпаролката на руското Министерство за надворешни работи, Марија Захарова, денеска предупреди дека испраќањето сили на НАТО во Украина ќе доведе до катастрофални последици за целиот свет и ќе означи влегување на алијансата во војна против Русија.
Таа ја коментираше изјавата на естонскиот министер за надворешни работи Маргус Цакна, кој повика на испраќање воени сили од европските земји во Украина со цел да се „зајакне“ мировниот договор со Русија.
Захарова нагласи дека присуство на трупи на НАТО на украинска територија ќе биде „еден од клучните чекори кон ескалација на конфликтот“ и ќе има сериозни последици за Европа и остатокот од светот.
„Не разбирам, можеби тие не сфаќаат, но појава на контингенти на НАТО на територијата на Украина ќе значи директно влегување на алијансата во војната против Русија. Ние веќе неколку пати ги предупредивме за ова“, рече Захарова.
Според неа, таквиот развој на настаните би значел „катастрофа“, не само за Европа, туку и за целиот свет.
Захарова, исто така, ја критикуваше Естонија и другите балтички земји, нарекувајќи ги „радикално крило на НАТО“ кое поттикнува ескалација на конфликтот со Русија. Тие земји, како што истакнува таа, поддржуваат зголемување на тензиите со „агресивни, провокативни изјави“ кои само „водат до нови жртви“.
Таа, исто така, истакна дека членките на НАТО се одговорни за одбивањето на Киев да преговара со Москва, поддржувајќи ја употребата на оружје со долг дострел и дозволувајќи и на Украина да користи оружје што може да ја нападне руската територија.
Захарова нагласи дека таквите изјави се „неодговорни, агресивни и провокативни“.
Русија продолжува да повторува дека секое натамошно зајакнување на присуството на НАТО во Украина дополнително ќе ги усложни шансите за постигнување мировно решение во регионот.
Агелер: Црната листа на САД е отворена за нови имиња
Американската амбасадорка Анџела Агелер изјави дека „црната листа“ на САД е многу динамична и дека постојано се дискутира за нови имиња. Таа нагласи дека нема конкретна временска рамка за додавање нови лица на листата, бидејќи тоа е одлука на Вашингтон.
Во изјава за медиуми по отворањето на првата Конференција за борба против корупцијата во Западен Балкан организирана од Амбасадата на САД во Скопје, во соработка со Бирото за меѓународни наркотици и спроведување на законот (INL), амбасадорката посочи дека листата е отворена за дополнувања.
„Црната листа на САД е многу динамична, постојано се дискутира за имиња. Немам временска рамка, бидејќи тоа е одлука на Вашингтон, но, ве уверувам дека додека зборуваме има имиња кои се земени предвид и секогаш сме отворени кон додавање нови лица на листата“, рече амбасадорката.
Во однос на прашањето за препораките на Државната комисија за спречување на корупција за назначувањето на членовите на Управниот одбор на Академијата за судии и јавни обвинители, таа порача дека треба да се почитуваат.
„Немам конкретни детали, но ќе нагласам дека е важно овие коментари и препораки да бидат внимателно разгледани на начин на којшто јавноста ќе добие одговори на прашањата“, посочи Агелер во зијава за новинарите.
Инаку Антикорупциската комисија побара Судскиот совет и Советот на јавни обвинители да си ги повлечат своите членови од Управниот одбор на Академијата на судии и јавни обвинители. Ова доаѓа откако утврди дека постапиле спротивно на законот за спречување на корупција и судир на интереси и на законот за Академијата.
Според антикорупционерите, Законот за спречување на корупција и судир на интереси, не дозволува членовите на советите да бидат членови на УО на институции и претпријатија со државен капитал.
Донесена Наредба за воведување мерки за намалување на емисиите на штетните супстанции
Донесена е Наредба за воведување мерки за намалување на емисиите на загадувачки супстанции при надминување на праг на информирање, соопшти денеска (21 ноември) Министерството за животна средина и просторно планирање (МЖСПП). Во рамки на оваа Наредба, се воведуваат повеќе мерки кои ќе се применуваат во случаи на надминување на праговите на алармирање дефинирани во Уредбата за гранични вредности за нивоа и видови на загадувачки супстанци во амбиентинот воздух и прагови на алармирање.
Мерките вклучуваат зајакнати контроли на возилата, а МВР ќе спроведе засилени и вонредни контроли на возилата со цел утврдување на техничката исправност на возилата за емисијата на испусните гасови. Ова, како што се наведува, ќе помогне во намалување на загадувањето од сообраќајот.
Меѓу мерките е и посебен сообраќаен режим за тешки товарни возила. Општините и Град Скопје, во соработка со Министерството за внатрешни работи ќе обезбедат посебни сообраќајни режими за тешките товарни возила, насочувајќи ги кон обиколни патишта со цел да се намали сообраќајот во урбаните средини.
Се препорачува намалување на употребата на службени возила. Сите органи на државна управа, агенции, фондови, бироа, заводи, јавни претпријатија и акционерски друштва во државна сопственост, како и единиците на локалната самоуправа, се задолжени да ја намалат употребата на службените возила до 50 отсто. Оваа мерка, како што се наведува, има за цел да го намали службениот сообраќај и емисиите од него.
Понатаму се предвидува ослободување од работни обврски на ранливите групи. Сите правни субјекти (работодавци) треба да ги ослободат од работни обврски: бремените жени, лицата постари од 60 години, лицата со малигни заболувања, хронична астма, прележан миокарден инфаркт или мозочен удар, без оглед на возраста, со препорака од матичен лекар.
Се препорачува реорганизација на работното време и обезбедување заштитни маски. Сите правни субјекти (работодавци) се задолжени да го реорганизираат работното време за лицата кои работат на отворено. Работните активности треба да се извршуваат во периодот од 11:00 до 17:00 часот. Дополнително, работодавците се должни да обезбедат заштитни маски тип KN95 или најмалку FFP2 за своите работници.
Меѓу мерките е и намалување на капацитетот на инсталациите со А интегрирана еколошка дозвола. Инсталациите кои поседуваат А-интегрирана еколошка дозвола се задолжени да го намалат капацитетот на производство. Исклучок од оваа мерка се инсталациите кои произведуваат топлинска и електрична енергија.
Се препорачуваат вонредни контроли на инсталациите со А интегрирана еколошка дозвола. Државниот инспекторат за животна средина ќе започне со вршење на вонредни контроли на инсталациите со А интегрирана еколошка дозвола, а се препорачуваат вонредни контроли на правните субјекти со Б интегрирана еколошка дозвола и елаборати, со цел да се осигура усогласеноста со еколошките стандарди.
Исто така се препорачуваат и вонредни контроли на градилишта.
Министерството за животна средина апелира до сите надлежни институции, органи, правни субјекти и граѓани за целосно почитување и имплементација на наведените мерки.
Русија, наводно, истрелала интерконтинентална балистичка ракета во Украина
Русија изврши голем ракетен напад врз Украина рано на 21 ноември, што предизвика штета во најмалку два региони, објавија украинските воздухопловни сили и регионалните лидери, а целата земја беше во состојба на готовност за воздушен напад неколку часа.
Рускиот напад, кој вклучуваше употреба на интерконтинентална балистичка ракета, доаѓа само неколку дена по извештаите дека Украина користела британски ракети „Сенка на бурата“ и системите АТАКМС произведени од САД за да нападне воени цели длабоко во Русија по долго бараното одобрение од претседателот Џо Бајден.
Главната цел на рускиот напад бил југоисточниот регион Дњепропетровск, најважниот индустриски регион во Украина, и главниот град Днипро.
Портпаролот на Кремљ, Дмитриј Песков во разговор со новинарите, одби да коментира, јави Си-Ен-Ен.
„Тоа е прашање за нашата војска“, рече тој.
Воздухопловните сили на Украина соопштија дека покрај ICBM, Русија лансирала и хиперсонична ракета Kh-47M2 Kinzhal и седум субсонични крстосувачки ракети Kh-101.
„Украинската противвоздушна одбрана собори шест ракети Кх-101“, соопшти Военото воздухопловство.
Гувернерот на Днепропетровск, Серхиј Лисак, рече дека неговиот регион е најмногу погоден од нападот.
„Од раните утрински часови, агресорот масовно го нападна нашиот регион“, објави Лисак на Телеграм, додавајќи дека прелиминарните информации покажуваат дека е оштетен индустриски објект во главниот град на реонот Днепар, каде од нападот биле предизвикани два пожари.
Експлозии беа забележани и во Кременчук, во централниот регион Полтава.
Употребата на Москва на голем број софистицирани ракети, за разлика од вообичаените напади со беспилотни летала, се чини дека е одговор на одобрението на Украина да користи некои ракетни системи со долг дострел донирани од Западот за да напаѓаат подлабоко во Русија.
Целата територија на Украина беше во состојба на готовност за воздушен напад неколку часа на 21 ноември, бидејќи украинските воздухопловни сили известија дека Русија лансирала неколку проектили кон различни цели.
Руски воени блогери и извор цитиран од Ројтерс на 20 ноември објавија дека Украина истрелала до 12 француско-британски проектили во руската област Курск, од кои дел беше под украинска контрола по ненадејниот упад на украинските војници во август.
Портпаролот на британскиот премиер Кир Стармер одби да потврди дали биле користени проектили. Претходно, Лондон даде дозвола за користење на ракетите „Сенка на бурата“, кои имаат домет од 250 километри, на територијата на Украина.
Претходно оваа недела, Украина, наводно, користела ATACMS за да нападне воен објект во руската област Брјанск, откако Бајден, наводно, дал зелено светло. Белата куќа официјално не го потврди одобрувањето, а Украина директно не ја призна употребата на ATACMS на руски цели.
Северна Кореја и Русија потпишаа протокол за соработка
Северна Кореја и Русија потпишаа протокол за соработка по состаноците за трговија, економија, наука и технологија во Пјонгјанг, објави во четврток (21 ноември) севернокорејската државна новинска агенција КЦНА.
КЦНА не даде детали за договорот, кој во средата го потпишаа највисоките трговски претставници на Северна Кореја и руската делегација предводена од Александар Козлов, рускиот министер за екологија и природни ресурси.
Руската новинска агенција ТАСС во вторникот објави дека властите се согласиле да го зголемат бројот на чартер летови меѓу двете земји за да го промовираат туризмот.
Козлов, кој пристигна во Северна Кореја во неделата, се состана со севернокорејскиот лидер Ким Џонг Ун и неговиот висок економски функционер, премиерот Ким Ток Хун, пред да се врати дома во средата, објави КЦНА.
За време на посетата на делегацијата, повеќе од 70 животни од руската зоолошка градина беа префрлени во Северна Кореја како подарок од претседателот Владимир Путин.
Во последниве месеци, Ким Јонг Ун им даде приоритет на односите со Москва во обид да излезе од меѓународната изолација и да ја зајакне сопствената позиција, постојано поддржувајќи ја војната на Путин во Украина и претставувајќи ја Северна Кореја како дел од обединет фронт против Вашингтон.
Ким допрва треба директно да признае дека и дал на Русија воена опрема и војници за да ја поддржи нејзината војна против Украина.
На парламентарна седница зад затворени врати, јужнокорејската Национална разузнавачка служба (НИС) во средата соопшти дека околу 11 000 севернокорејски војници влегле во рускиот регион Курск - каде што украинските војници презедоа делови од територијата оваа година.
САД, Украина и други земји имаат слични проценки за бројот на севернокорејски војници во Русија.
Единаесет уапсени за трагедијата во Нови Сад, меѓу нив и поранешниот министер Весиќ
Вишото јавно обвинителство во Нови Сад денеска (21 ноември) соопшти дека се уапсени и приведени вкупно 11 лица поради постоење основано сомнение дека се одговорни за падот на настрешницата од зградата на Железничката станица во Нови Сад.
Според РТС, меѓу нив се Горан Весиќ, поранешниот министер за градежништво, транспорт и инфраструктура, поранешната директорка за железничка инфраструктура Јелена Танасковиќ, нејзиниот претходник Небојша Шурлан, како и помошничката на Весиќ задолжена за железнички и интермодален транспорт, Анита Димоски.
Како што се наведува во соопштението, апсењето е извршено по прибирање и детална анализа на целата потребна документација, разговори со поголем број граѓани, а по извршеното вештачење за утврдување на причината и околностите под кои паднала настрешницата.
За наведените кривични дела е пропишана затворска казна од две до 12 години.
Горан Весиќ на социјалната мрежа Х напиша дека не е уапсен, туку дека „доброволно се јавил на повикот на полицајците и им е на располагање на полициските органи“.
„Не бев уапсен, доброволно се одзвав на повикот на полицајците со кои дојдов во Нови Сад и се ставив на располагање на истражните органи за целосно да се истражат сите околности кои довеле до несреќата во Нови Сад. Секогаш, како и досега, ќе им стојам на располагање на надлежните органи и ќе докажам дека не сносам кривична одговорност за овие трагични настани“, напиша Весиќ.
На 1 ноември 15 лица загинаа, а двајца беа тешко повредени при уривање на бетонската настрешница на железничката станица во Нови Сад. Несреќата се случи четири месеци по официјалното отворање на станицата, која беше отворена по тригодишна реконструкција.
И покрај негодувањето на групите за права, САД ќе и дадат на Украина противпешадиски мини
Белата куќа соопшти дека ќе и обезбеди на Украина противпешадиски мини за да и помогне да го одбрани напредокот на руското бојно поле, и покрај широкото противење за употреба на такво оружје од страна на меѓународните групи за човекови права.
Американскиот секретар за одбрана Лојд Остин на 20 ноември беше цитиран од новинските агенции дека за време на посетата на Лаос изјавил дека одлуката за обезбедување на контроверзните мини била донесена поради промената на руската тактика.
„Тие веќе не водат со нивните механизирани сили. Тие водат со демонтирани сили кои се способни да затворат и да прават работи за да го отворат патот за механизираните сили“.
Украина има потреба „за работи кои можат да помогнат да се забави тој напредок од страна на Русите“, рече Лојд.
Хјуман рајтс воч (ХРВ) соопшти дека Русија употребила најмалку 13 видови противпешадиски мини во Украина од февруари 2022 година.
„Русија нашироко користеше противпешадиски нагазни мини во Украина... предизвикувајќи стотици жртви и контаминирајќи огромни површини земјоделско земјиште“, се вели во извештајот.
Групите за човекови права и хуманитарни цели долго време ја критикуваа употребата на противпешадиски мини, велејќи дека тие претставуваат опасност за цивилите.
Во соопштението по соопштението на САД, ХРВ вели дека „одлуката за пренос на противпешадиски нагазни мини ги ризикува животите на цивилите и ги уназадува меѓународните напори за искоренување на ова неселективно оружје“.
Повеќе од 160 земји се согласија да забранат употреба на противпешадиски мини, иако САД и Русија не се потписници на конвенцијата.
Украина ја ратификуваше конвенцијата во декември 2005 година.
Запрашана во минатото за можна употреба на такви мини, Украина рече дека не може да коментира за видовите на оружје користени за време на сегашниот вооружен конфликт „пред крајот на војната и обновувањето на нашиот суверенитет и територијален интегритет“.
Противпешадиските мини се скриени во земјата и се дизајнирани да се активираат кога непријателските трупи одат на или во нивна близина.
Некои извештаи велат дека мините што ги обезбедува Вашингтон се „непостојани“, што значи дека по одреден временски период тие повеќе не работат и стануваат безопасни.
Претседателот Володимир Зеленски ја поздрави одлуката за мините, нарекувајќи ги „многу важно“ оружје во обидот да се забават руските напади додавајќи дека овој потег „целосно ќе ги зајакне“ украинските трупи на првата линија.
Во меѓувреме, американските власти рекоа дека амбасадата на Вашингтон во Киев најверојатно ќе продолжи со нормална работа на 21 ноември, откако претходно беше затворена на 20 ноември кога добила „конкретни информации“ за „потенцијален значаен воздушен напад“.
Доцна во текот на денот, портпаролот на Стејт департментот Метју Милер на брифинг изјави дека „не можам да навлегувам во деталите за заканата, но ние секогаш внимателно ја следиме ситуацијата“.
„Се очекува амбасадата нормално да работи утре“, додаде тој.
Амбасадата ги повика вработените и граѓаните на САД во главниот град на Украина веднаш да се засолнат доколку биде објавено предупредување за воздушен напад.
Амбасадите на Италија, Грција и Шпанија соопштија дека, исто така, ги затвориле своите операции по невообичаеното предупредување од САД. Шпанија подоцна соопшти дека повторно го отворила својот објект по привременото затворање.
Предупредувањето на САД дојде еден ден откако Москва рече дека Украина користела ракетни системи со долг дострел произведени во САД за да нападне складиште за оружје во руската област Брјанск по пријавеното овластување од американскиот претседател Џо Бајден за нивна употреба.
Украинската војска сугерираше дека информациите на кои се повикува амбасадата на САД се „лажни“.
„Гласниците и социјалните мрежи… шират порака за закана од „особено масовен“ ракетен и бомбашки напад врз украинските градови денес. Оваа порака е лажна. Содржи граматички грешки типични за руските информации и психолошки операции“, се додава во соопштението на украинската војска.
Оттаму ги повикаа жителите да не ги игнорираат сирените за воздушни напади, но и „да не подлегнуваат на паника“.
Предупредувањето на САД дојде еден ден откако Москва рече дека Украина користела ракетни системи со долг дострел произведени во САД за да нападне складиште за оружје во руската област Брјанск по пријавеното овластување на американскиот претседател Џо Бајден за нивна употреба.
Белата куќа официјално не ја потврди одлуката.
Зеленски не ја потврди ниту негираше употребата на ракетите ATACMS во нападот врз Брајанск, велејќи за време на прес-конференција дека „Украина има оружје со долг дострел... Сега имаме долг „Нептун“ (крстосувачки ракети од украинско производство) и не Само еден и сега имаме и ATACMS и ќе го користиме сето ова.
На 20 ноември, украинската воена разузнавачка агенција соопшти дека командната станица на руската војска била „успешно погодена“ во градот Губкин во руската област Белгород, на околу 168 километри од украинската граница. Не е наведено какви проектили биле користени во нападот.
Во меѓувреме, „Блумберг њуз“ објави дека украинската војска, исто така, за првпат испукала британски ракети „Сенки на бура“ (Storm Shadow) во Русија, цитирајќи неименуван западен функционер.
Исто така, украинските воздухопловни сили соопштија дека руските трупи ја нападнале Украина рано на 20 ноември со 122 беспилотни летала, од кои 56 биле соборени во 14 региони -- Киев, Черкаси, Чернихив, Полтава, Кироворад, Житомир, Хмелницки, Суми, Миколајев, Херсон, Запорожје, Дњепропетровск, Донецк и Харкив.
Градоначалникот на украинското црноморско пристаниште Одеса, Хенадиј Труханов, изјави дека бројот на загинати по рускиот напад врз градот на 18 ноември се искачил на 11.
Мултимедија
Најпосетени
Што треба да знаете