Вести
Бајден начелно се согласува на средба со Путин
Американскиот претседател Џо Бајден начелно се согласува на состанок со рускиот претседател Владимир Путин во наредните денови, во обидот да го одврати од инвазија врз Украина. Бајден ќе се сретне со Путин по разговорите на 24 февруари меѓу државниот секретар Ентони Блинкен и рускиот министер за надворешни работи Сергеј Лавров „ако не се случи инвазија“, рече портпаролката на Белата куќа Џен Псаки. Идејата за билатерална средба беше предложена од францускиот претседател Емануел Макрон, кој претходно разговараше одделно со двајцата лидери.
Зеленски бара итни разговори за смирување во Украина
Не е објавен конкретен датум или локација за самитот. Бајден и Путин се сретнаа за прв пат како соодветни шефови на нивните нации во јуни во Женева. Тој самит беше поттикнат од помало руско воено засилување во близина на Украина пролетта. Пред самитот, Бајден ќе учествува на виртуелен состанок со неговите колеги од Групата седум (Г7) за да разговара за кризата предизвикана од зголемувањето на руските војници. Г7 ги вклучува САД, Британија, Франција, Германија, Канада, Италија и Јапонија. Американскиот претседател на 18 февруари рече дека е „убеден“ дека Путин донел одлука да ја нападне Украина и дека тоа би можело да се случи во наредните денови. Бајден рече дека САД и европските сојузници ќе воведат строги санкции кон Русија доколку Путин продолжи со нападот.
Блинкен - Бајден подготвен да се сретне со Путин во секое време
Русија во моментов има повеќе од 150.000 борбено подготвени војници околу Украина. Кремљ се обидува да ја спречи Украина еден ден да му се приклучи на НАТО и сака цврсто да ја повлече земјата назад во својата сфера на влијание. Русија постојано негира дека има намера да ја нападне Украина и тврди дека почнала да повлекува некои сили. Соединетите држави и НАТО рекоа дека не гледаат знаци за делумно повлекување.
види ги сите денешни вести
Европската унија одобри царини за САД
Земјите членки на Европската унија (ЕУ) ги одобрија првичните одмазднички тарифи од 10 до 25 отсто за увозот од Соединетите Американски Држави (САД), кои според Европската комисија ќе стапат на сила следната недела, јави агенцијата ДПА.
Ова вклучува специјални давачки за артикли како фармерки и мотоцикли од САД, додека виски и другите алкохолни пијалоци произведени во САД беа отстранети од предложената листа на комисијата.
Дополнителни контра-царини треба да бидат воведени на средината на мај и на крајот на 2025 година, што ќе влијаат на производи како говедско месо, живина и цитрусно овошје. Царини за јаткасти плодови и за сојата се планирани за почетокот на декември, пренесе ДПА.
Царините од ЕУ се одговор на американските царини за увоз на челик и алуминиум воведени пред околу еден месец.
Според пресметките на ЕУ, мерките на САД влијаат на извозот во вредност од 26 милијарди евра (28,8 милијарди долари). Мерките што ги наметнува Брисел се насочени кон стоки во вредност од приближно 21 милијарда евра.
Сè уште се работи на дополнителен пакет мерки како одговор на царините за автомобили и речиси сите други извози од ЕУ во САД неодамна објавени од американскиот претседател Доналд Трамп.
Царинската политика на Трамп има за цел да ги исправи наводнита трговска нерамнотежа и да го префрли производството во САД, истовремено делумно неутрализирајќи ги даночните намалувања ветени за време на неговата изборна кампања, пренесе ДПА.
Триесет дена притвор за директорот на Геријатрија поради примен поткуп
Судија на претходна постапка им определи триесетдневен притвор на две лица осомничени дека примиле поткуп за да згрижат болно лице, соопшти Основниот кривичен суд - Скопје.
Според информациите што ги објавија медиумите, станува збор за Мухсин Арифи, директор на Специјализирана болница за геријатриска и палијативна медицина и за негов помагач.
Јавното обвинителство претходно соопшти дека првоосомничениот, како директор, преку второосомничениот, негов човек од доверба, побарал награда од 100 илјади евра за згрижување на лице во болницата. На 8 април годинава, второосомничениот е фатен како во име на директорот директно примил износ од 20.000 евра.
Министерството за внатрешни работи на 8 мај информираше дека се приведени две лица под сомнение за кривични дела „примање поткуп“ и „примање награда за противзаконито влијание“, по што директорот на Бирото за јавна безбедност, Александар Јанев, потврди дека се приведени две лица, меѓу кои и директор на здравствена установа, поради сомнение за примање поткуп во износ од 20.000 евра.
Министерот за здравство Арбен Таравари во врска со сллучајот изјави дека „испораката на правда мора да биде неселективна и во согласност со сите уставно-правни механизми и темелни вредности“.
Директорот на Геријатриската болница „13 ноември“, Мухсин Арифи, беше назначен за в.д. директор на Геријатрија во јули минатата година од страна на Таравари. Претходно беше директор на психијатриската болница во Бардовци.
Во Специјализираната болница за геријатриска и палијативна медицина се примаат возрасни пациенти, во најтешка здравствена состојба, листите на чекање се големи, а бројот на кревети е ограничен.
Меѓународна новинарска мисија бара од ЕУ јавно да ги осуди нападите врз медиуми и организации во Србија
Членовите на Мисијата за брза реакција за слободата на медиумите (МФРР) ја повикаа Европската унија (ЕУ) „да престане да се однесува како ништо да не се случува во Србија“ и јавно да ги осуди сите случаи на напади врз новинари, медиуми и граѓански организации.
„ЕУ мора да се изјасни. Бараме ЕУ да продолжи доследно и јавно да ги споменува овие причини секогаш кога ќе се сретне со претставници на српските власти, вклучително и со претседателот, и тоа да го објави јавно“, рекоа членовите на Мисијата на прес-конференција на крајот од посетата на Србија, јави агенцијата Бета.
Тие побараа и ЕУ „јавно да изјави дека нема да ги продолжи преговорите со Србија за поглавјето 23 додека не престанат сите напади врз новинари и граѓански организации“.
Членовите на Мисијата, која ја сочинуваат претставници на меѓународни новинарски здруженија, апелираа да се прекинат сите јавни напади врз новинарите, особено оние кои покриваат протести предводени од студентите.
Тие оценија дека Србија, кога се медиумите во прашање, се соочува со невидена криза која бара брза реакција.
За време на престојот во Србија, членовите на Мисијата за брза реакција за слободата на медиумите се сретнаа со новинари, претставници на медиумски здруженија, полицијата и обвинителството, како и претставници на ОБСЕ, Советот на Европа и делегацијата на ЕУ, но не и со претставници на српските институции.
Во Србија има повеќемесечни масовни протести, организирани од студенти кои ги блокираат државните универзитети - со барање да се утврди одговорноста на властите за смртта на 16 лица барајќи одговорност за падот на настрешницата на Железничката станица во Нови Сад кога загинаа 16 лица.
Зад барањата на студентите застанаа универзитетски професори, просветни работници, земјоделци, адвокати и актери, заедно со граѓани кои со месеци се собираат на протести.
Демонстрациите станаа симбол на пошироко незадоволство од владеењето на правото во земјата, при што се отворија прашања дали несреќата во Нови Сад е предизвикана од невнимание и од корупција на системот.
Пандов: Околу илјада телефони најдени кај затвореници за девет месеци
Околу илјада телефони се пронајдени кај затвореници во земјава за период од девет месеци, кажа Александар Пандов, директор на Управата за извршување на санкции, на прес-конференција на 9 април.
За споредба, Пандов рече дека во затворите во Хрватска во 2023 година се најдени само 26 мобилни телефони, а кај затвореници во Косово се откриени 51 телефон во 2024 година.
Тој смета дека проблемот со телефоните, дрогата и останати недозволени работи по затворите може да се реши, но само доколку има казнивост за корумпираните затворски полицајци, кои според негови проценки, во некои затвори се и над 50 отсто.
„Имаме работа со вмрежена група на вработени по затворите и затворениците. Ако успееме дел по дел да ги отстраниме корумпираните во затворскиот систем, можеме да го решиме проблемот со телефоните, дрогата и со другите недозволени предмети. Се додека ги имаме нив и додека тие сметаат дека неказниво може да поминуваат, ќе имаме и телефони, и дрога, и недозволени предмети“, рече Пандов.
Тој информираше и дека Управата за извршување санкции поднела кривични пријави против затворски полицајци во Штип, осомничени дека му помагале на затвореник да најде дрога што била префрлена во дворот на затворот.
Настанот се случил на 20 февруари, а според Пандов, во тоа учествувале командирот на смена, петмина затворски полицајци кои помагале во барањето на дрогата и уште еден кој бил дежурен на капија таа вечер, како и тројца членови на Комисијата, која потоа донела одлука дека тие не се виновни за инцидентот.
Германските партии постигнаа договор за формирање нова влада
Христијанско-демократската унија на Германија (ЦДУ) постигна договор за коалиција со Социјалдемократската партија (СПД).
Договорот го отвора патот за нова влада во најголемата европска економија по неколку месеци политички ќор-сокак.
Притисокот за постигнување договор стана уште поголем бидејќи владата ја презема власта во време на глобални турбуленции предизвикани од ескалирачкиот трговски конфликт предизвикан од огромните увозни царини на американскиот претседател Доналд Трамп.
Фридрих Мерц, лидерот на ЦДУ, треба да стане нов германски лидер. Тој ќе го замени канцеларот во заминување Олаф Шолц.
Мерц, кој ја нарече Америка на Трамп несигурен сојузник, веќе вети дека ќе ги зголеми трошоците за одбрана, додека Европа се соочува со непријателска Русија. Тој вети и поддршка за компаниите кои се борат со високите трошоци и слабата побарувачка.
Мерц претходно изјави дека ќе ја заостри миграциската политика, оддалечувајќи ја Германија од полибералните имиграциски политики што ги водеше неговата конзервативна претходничка Ангела Меркел за време на мигрантската криза во 2015 година.
Коалицискиот договор меѓу ЦДУ и СПД допрва треба да биде ратификуван со гласање на членовите на СПД.
Доколку членството на СПД го поддржи договорот, канцеларството ќе се врати во рацете на конзервативците по тригодишниот мандат на Олаф Шолц од СПД, чиј мандат беше обележан со економските и политичките последици од целосната руска инвазија на Украина во 2022 година.
Ќе помине уште некое време пред парламентот да го избере Мерц за канцелар, и тоа најверојатно ќе се случи на почетокот на мај.
Новиот коалициски сојуз ги обединува двете традиционални големи партии во модерна Германија.
Изборните резултати на Унијата во февруари беа разочарувачки, а социјалдемократите паднаа на својот најлош резултат на националните парламентарни избори по војната.
Овие партии заедно имаат 328 места во 630-члениот Долниот дом на парламентот, Бундестагот.
Пезешкијан: Иран не развива нуклеарна бомба
Иранскиот претседател Масуд Пезешкијан денеска (9 април)изјави дека Иран не развива нуклеарна бомба и дека не се противи на американските инвестиции во својата економија.
Пезешкијан ги повика американските инвеститори да инвестираат во економијата на Иран, наведувајќи дека иранскиот врховен лидер Али Хамнеи не е против тоа.
Иранскиот претседател не оспори дека постои можност за директни американски инвестиции во Иран доколку САД и Техеран постигнат договор за иранската нуклеарна програма.
Пезешкијан, кој за време на предизборната кампања минатата година се залагаше за приближување кон Западот, рече дека разговорите во сабота во Оман меѓу иранскиот министер за надворешни работи Абас Арагчи и американскиот пратеник за Блискиот Исток Стив Виткоф ќе се водат „индиректно“.
Трамп рече дека разговорите ќе бидат директни, што Техеран не го отфрли како опција по првата рунда преговори.
Откако постигна договор за својата нуклеарна програма, Иран со светските сили во 2015 година, им забрани на американските компании да влезат во земјата.
ЕУ се согласи на нови правила за спречување на загадувањето со пластични пелети
Европската Унија дебатираше за новите регулативи насочени кон намалување на испуштањето на пластични пелети во животната средина. Според договорот постигнат од преговарачите од Европскиот парламент и земјите-членки на ЕУ, од компаниите што употребуваат пластични пелети ќе се бара да усвојат конкретни мерки на претпазливост за да се спречат загубите во синџирот на снабдување.
Пластичните пелети, суровина за производство на пластични производи, често се истураат за време на транспортот, што претставува значителна закана за животната средина.
Според ЕУ, ваквите излевања се трет по големина извор на ненамерно загадување со микропластика во животната средина на блокот.
„Регулативите ќе важат за сите компании кои користат повеќе од 5 тони пластични пелети годишно во рамките на ЕУ“, се вели во соопштението објавено од Европскиот парламент во средата.
Тие ќе ги опфатат компаниите што користат патишта, железници или внатрешни водни патишта, како и оператори на бродови кои влегуваат или излегуваат од пристаништата на ЕУ. Од овие фирми ќе се бара да спроведат проценки на ризик и да спроведат мерки поврзани со пакување, процедури за утовар и истовар и обука на персоналот.
Операторите на бродот, исто така, мора да обезбедат дека пелетите се безбедно спакувани и способни да издржат нормални транспортни услови. Во случај на случајна загуба, службите за итни случаи мора веднаш да бидат известени и да се преземат сите неопходни чекори за минимизирање на еколошката штета.
Правилата се засноваат на законски предлог од Европската комисија. Тие сега мора да бидат формално усвоени и од парламентот и од Европскиот совет пред да стапат на сила.
Извештај на ЕП за Турција: Во сегашните околности невозможно е продолжување на евроинтегративниот процес
Турција бележи континуирано влошување на демократските стандарди, за што показател е и политички мотивираното отстранување на истанбулскиот градоначалник Екрем Имамоглу од функцијата, поради што процесот на пристапување на земјата во Европската Унија мора да остане замрзнат, се наведува во Извештајот на Европскиот парламент за Турција.
Во документот кој беше усвоен денеска (9 април) од страна на Комитетот за надворешни работи на ЕП (АФЕТ) со 48 гласа „за“, 3 „против“ и 23 „воздржани“, европратениците оценуваат дека и покрај геополитичките и стратешките императиви на процесот на пристапување, не може да се занемари непочитувањето на демократските принципи, па затоа во сегашните околности и покрај демократските и проевропските аспирации на голем дел од турското општество, процесот на пристапување на Турција во ЕУ не може да продолжи.
„Турската Влада не ги презема неопходните чекори за надминување на постоечките фундаментални демократски недостатоци“, се вели во Извештајот, при што се посочува дека во ЕУ се појавува тенденција да се воспостави „поинаква рамка за односите, што може да биде на сметка на процесот на пристапување“.
Европратениците изразуваат „длабока загриженост“ поради континуираното влошување на состојбата со почитувањето на демократските стандарди во Турција и поради „немилосрдното задушување на критичките гласови од страна на турските власти“ и го осудуваат постојаното таргетирање на политичките партии и членовите на опозицијата.
Во документот се нагласува и „крајната загриженост“ поради неодамнешното апсење и смена од функцијата на градоначалникот на Истанбул, Екрем Имамоглу.
Протести во Турција поради апсењето на противникот на Ердоган
„Ова е политички мотивиран потег, кој има за цел да спречи легитимен аспирант да се кандидира на претстојните избори и кој дополнително ја турка земјата кон целосно авторитарен модел, се вели во Извештајот и се повикуваат турските власти „да стават крај на сегашните сериозни ограничувања на основните слободи, особено на слободите на изразување и на собирање“.
Известувачот на ЕП за Турција, шпанскиот европратеник Начо Санчез Амор истакна дека турските власти постојано ја повторуваат нивната „наводна посветеност“ на членството во ЕУ и нагласуваат колку е важно за Унијата да го заживее пристапниот процес со земјата поради безбедносни и геополитички причини.
Европратениците посочуваат дека пристапувањето на Турција кон ЕУ зависи од исполнувањето на критериумите за членство, кои бараат стабилни институции што гарантираат демократија, владеење на правото и човекови права, почитување и заштита на малцинствата, добрососедски односи и усогласеност со меѓународното право и заедничката надворешна и безбедносна политика на Унијата.
Четири пациенти лекувани во Хрватска, Шведска и Италија се враќаат во државата
Четири од повредените лица во пожарот во Кочани, денеска (9 април) се враќаат од странство, соопшти Министерството за здравство.
Станува збор за двајца пациенти кои се лекувани во Хрватска, еден во Шведска и друг во Италија.
„Во странство се хоспитализирани 60 пациенти. Непроменета останува состојбата на пациентите кои се третираат во странство, вклучително и состојбата на критичните пациенти“, појаснуваат од Министерството за здравство.
Во болниците во државава во моментов се лекуваат седуммина пациенти. Четворица се во хируршката клиника „Свети Наум Охридски“, двајца пациенти во приватната болница „Систина“ и еден пациент на Клиниката за пулмологија.
Од Министерството за здравство истакнуваат дека континуирано се следи состојбата со повредените пациенти, со цел обезбедување најдобар можен третман, како и понатамошна рехабилитација.
Пожарот во дискотеката „Пулс“ во Кочани избувна рано наутро на 16 март. Во трагедијата животот го загубија 61 лице, а близу 200 беа поврдени.
Десетици ранети во руски напади врз неколку украински градови
Во напад на руски беспилотни летала врз украинските градови Днипро, Харкив и Краматорск доцна на 8 април беа ранети повеќе од дваесет луѓе и оштетени повеќе станбени згради, соопштија локалните власти.
Серхиј Лисак, гувернер на регионот Днепропетровск, изјави дека „Днипро најмногу настрада“ од рускиот напад во текот на ноќта, во кој беа ранети најмалку 15 лица, а речиси сите беа во тешка состојба.
„Луѓето имаат исеченици, рани од шрапнели, модринки и повреди на главата. На некои им беше потребна помош поради силен стрес“, рече Лисак.
Лисак додаде дека нападот оштетил 15 приватни куќи и речиси дваесетина автомобили. Според него, оштетени се повеќе деловни објекти, административни згради и градска инфраструктура.
Вториот по големина град во Украина, Харкив и источниот град Краматорск беа погодени од руски беспилотни летала.
Локалните власти соопштија дека во Харкив се слушнале повеќе од 20 експлозии, при што се повредени најмалку две лица. Уште петмина се повредени во Краматорск, во областа Доњецк.
„Во нападот се ранети 11-годишно девојче, нејзината 34-годишна мајка и 55-годишна баба“, изјави шефот на регионалната воена управа на Доњецк, Вадим Филашкин.
Украинското воено воздухопловство соопшти дека во текот на ноќта собориле 32 од 55 беспилотни летала лансирани од Русија, а уште осум „не стигнале до своите цели“.
Во меѓувреме, руското Министерство за одбрана во објава на Телеграм соопшти дека нејзините единици за противвоздушна одбрана во текот на ноќта уништиле 158 беспилотни летала, вклучувајќи 29 над јужниот регион Ростов.
Руската авијација, Росавијација, соопшти дека неколку аеродроми на југот на Русија биле затворени рано на 9 април за да се обезбеди безбедност на воздухот.
На теренот, според последниот извештај на американскиот Институт за проучување на војната руските сили во моментов извршуваат три различни операции во обид да го заземат клучниот град Покровск во регионот на Доњецк.
„Ситуацијата јужно и југозападно од Покровск останува исклучително динамична во услови на засилени руски офанзивни операции“, се вели во извештајот.
Со оглед на тоа што руските сили ги поминаа последните 13 месеци обидувајќи се да го освојат градот, Институтот за проучување на војната дополнително подвлече дека операциите на украинските беспилотни летала и локализираните контранапади продолжуваат да го комплицираат напредокот на Москва во областа.
Мултимедија
Најпосетени
Што треба да знаете