Вести
Политичка криза во Србија: Вучиќ нема да ја направи грешката на ВМРО-ДПМНЕ
Поранешните европратеници Едуард Кукан и Кнут Флекенштајн, во српското Собрание во Белград ја започнаа дводневната посредничка мисија зад затворени врати со претставници на опозицијата и власта поради политичката криза, објавија дел од српските медиуми, а пренесе МИА.
Немања Тодоровиќ Штиплија, основач и главен уредник на порталот „European Western Balkans“, за „Данас“ вели дека Кукан и Флекенштајн доаѓаат во „предмисија“, за да ги слушнат главните проблеми и за да ја утврдат фактичката состојба. Штиплија објаснува дека Кукан и Флекенштајн биле избрани затоа што се многу искусни во вакви работи, затоа што веќе водеа преговори меѓу властите и опозицијата во Северна Македонија. Според него, единственото нешто по што е разликата, кога се споредува тогашната политичка состојба во Северна Македонија и актуелниот политички момент во Србија, е фактот дека во Скопје постоеше голема опозициска партија.
Тој прави споредба на сегашната власт во Србија и поранешната власт во Македонија.
„Мислам дека Српската напредна партија (СНС) и нејзиниот лидер Александар Вучиќ никогаш нема да ги повторат истите грешки што ги направи ВМРО-ДПМНЕ во Северна Македонија. Секако, ситуацијата во Македонија во тоа време и сегашната состојба во Србија не е многу различна“, изјавил Штиплија, додавајќи дека моделот кој е применет во Македонија е целосно копиран во Србија.
види ги сите денешни вести
Над 20 интервенции во поплавени куќи во Тетово ноќеска
Тетовските пожарникари ноќеска имале над 20 повици за интервенции за испумпување на вода од поплавени куќи, дворови, подруми и улици. Најголем дел од поплавените куќи се во селата Мала Речица и Голема Речица, јавува агенцијата МИА.
Интензивниот дожд траеше повеќе часа, а претпладнево нема врнежи.
„Уште пожарникарите во Тетово интервенираат кај подвозниците на излез од градот или внатре во градот каде што има два вакви подвозници“, истакна Авни Амети, командир на Територијалната противпожарна единица Тетово.
Како што објасни Амети, се поплавуваат неколку критички точки каде постојано има проблеми при поинтензивен дожд.
„Имаше шест такви точки, но интервенираше општината, сега имаме три критични точки. Тоа се населба Деребој, подвозникот за Фалише и селата Мала и Голема Речица. Во минатото не се предвидело како ќе биде за 10 или 20 години. Така, имаме мали цевки за атмосферска канализација ставени за 20 куќи, а сега има по 50 куќи“, изјави Амети.
Пожарникарите во текот на вчерашниот ден извлекуваа и неколку возила кои заглавиле кај поплавените подвозници.
Шест пакистански војници загинаа во напад на милитанти
Пакистанската војска соопшти дека шест нејзини војници, вклучително и еден висок офицер, биле убиени вечерта на 4 октомври, кога воен конвој бил нападнат од милитанти во немирниот северозапад на земјата.
Војската го идентификуваше убиениот офицер во денешната изјава (5 октомври) како потполковник Мухамед Али Шукат. Шест милитанти, чија припадност не беше прецизирана, исто така беа убиени во судирот што се случи во Северен Вазиристан, племенски округ во провинцијата Хајбер Пахтунхва, во близина на границата со Авганистан.
Ниту една група не презеде одговорност за нападот.
Според соопштението, операциите за пребарување и спасување продолжуваат. Извор од окружната разузнавачка агенција за РСЕ Радио Машаал, под услов да остане анонимен, изјави дека 24 војници биле повредени во „интензивната размена на оган“.
Северен Вазиристан одамна е плодна почва за милитантите кои дејствуваат од двете страни на границата. Во последниве години, цивили и безбедносни сили беа убиени во целни убиства, а пакистанските власти велат дека нападите се во пораст во последните месеци. Многу од нив беа преземени од пакистанските талибанци (ТТП).
Откако авганистанските талибанци се вратија на власт по повлекувањето на силите предводени од САД од земјата, многу членови на ТТП, наводно, нашле засолниште во Авганистан, користејќи го за почести напади врз пакистанските војници и цивили.
Немирите во Северен Вазиристан и другите области на провинцијата Хајбер Пахтунхва доведоа до масовни протести на цивили кои повикаа на поголема безбедност, но исто така изразија загриженост дека цивилите може да бидат малтретирани или уапсени за време на воената офанзива.
Централната влада и пакистанската војска соопштија дека се посветени на ставање крај на тероризмот во регионот и дека ќе продолжат да ги таргетираат милитантите.
Во 2014 година пакистанската војска започна двегодишна воена операција во Северен Вазиристан за која тврдеше дека резултирала со отстранување на милитантите од регионот.
Офанзивата значително го наруши животот на цивилите. Милиони луѓе останаа без покрив над главата. Многумина се вратија во областа во 2016 година, но мирот беше нарушен кога нападите на милитантите продолжија во 2018 година.
Киев: Русија егзекутирала 93 украински затвореници од почетокот на војната
Украина има документирани докази поврзани со егзекуцијата на 93 украински воени затвореници, според службеник за спроведување на законот задолжен да ги истражува воените злосторства поврзани со руската инвазија на Украина.
Јуриј Белоусов, кој раководи со одделот на Јавното обвинителство задолжен за истрага на злосторствата извршени во вооружени конфликти, ја претстави најновата бројка за време на телевизиско гостување на 4 октомври.
„Сега имаме информации за смртта на 93 наши војници кои беа егзекутирани на бојното поле“, изјави Белоусов за Једини Новини, емисија што комбинира неколку украински телевизиски канали.
Белоусов рече дека околу 80 отсто од егзекуциите биле забележани оваа година, но дека бројот на егзекуции почнал да расте во ноември „кога имало промени на полошо во односот на руските војници кон нашите воени заробеници“.
Јавното обвинителство на 1 октомври објави дека отворило истрага за, како што ја опиша, „најголемата масовна егзекуција“ на украинските воени заробеници од страна на руските војници од почетокот на целосната инвазија на Москва, во февруари 2022 година.
Според официјалното соопштение објавено на каналот Телеграм, руските сили неодамна убиле 16 украински „воени заробеници“ во близина на селата Николаевка и Сухи Јар во областа Покровска во областа Доњецк.
Се чини дека видеата кои кружат на различни канали на Телеграм покажуваат дека украинските војници, кои штотуку биле заробени од руските војници, излегуваат од шумска област.
Oткако заробениците се постројуваат, се чини дека руските сили отвораат оган. На снимката потоа се гледа како руските војници им приоѓаат на оние кои биле само ранети и повторно ги гаѓаат од непосредна близина со митралези.
Хамас ја потврди смртта на својот командант во израелскиот напад врз Либан
Саид Аталах, шефот на вооруженото крило на Хамас, бригадата Ал-Касам, е убиен на северот на Либан, пренесува Ројтерс повикувајќи се на медиум поврзан со палестинското движење.
Медиумите блиски до Хамас објавија дека Аталах бил убиен заедно со тројца членови на семејството во израелски напад врз палестински бегалски камп во северниот либански град Триполи, јавува Ројтерс.
Израел сѐ уште не ја коментираше најавата.
Нема повеќе информации за Аталах, за кој агенциите велат дека е водач на бригадите Ал Касам.
Во средината на јули, Израел го елиминираше Мохамед Деиф, долгогодишниот лидер и еден од основачите на оние бригади кои го предводеа нападот врз Израел на 7 октомври. Деиф беше убиен еден ден откако политичкиот лидер на Хамас, Исмаил Ханија, беше елиминиран во Техеран.
Последното насилство во повеќедеценискиот израелско-палестински конфликт беше иницирано од Хамас - кој САД и ЕУ го сметаат за терористичка организација - со нападот врз Израел на 7 октомври минатата година, кога, според израелските податоци, беа убиени 1.200 луѓе. А околу 250 биле земени како заложници.
Во последователните напади на Израел врз Појасот Газа, управуван од Хамас, загинаа повеќе од 41.000 луѓе, според локалните здравствени власти, и раселено е речиси целото население на крајбрежната палестинска територија.
Во последните израелски воени акции во Либан против Хезболах, стотици луѓе беа убиени, додека еден милион беа раселени.
ЦУК: Три пожари на отворено и над 2000 повици на 112
Центарот за управување со кризи (ЦУК) информира дека изминатото деноноќие на единствениот повикувачки број за итни случаи, 112, имало 2 028 повици. Од нив, 60,6 отсто биле, како што велат, „реални“, а 39,94 проценти не биле итни.
Кон Полиција биле упатени 67,16 отсто, кон Итната медицинска помош 19,82, кон пожарникарите 5,03, а кон АМСМ 0,30 проценти од реалните повици.
Според ЦУК, регистрирани се и три пожари на отворено.
Велат дека се гаснела запалена ниска вегетација во атарот на с. Могила (Општина Битола), запалено ѓубре на патот од Демир Хисар кон Струговско Езеро (Општина Демир Хисар), запалено стрниште во с. Крупиште (Општина Чешиново Облешево) и во атарите на селата Таринци и Карбинци (Општина Карбинци).
Експлозии во Бејрут, во тек се борби меѓу Хезболах и израелската армија
Либанското милитантно движење Хезболах објави дека продолжуваат борбите против израелските сили на границата, а сведоци од Бејрут јавуваат дека во тој град повторно се слушаат експлозии.
Хезболах објави дека израелската армија се обидува да влезе во јужниот либански град Одаисех и дека борбите се во тек, јавува Ројтерс.
Либанската група Хезболах е поддржана од Иран, а САД ја сметаат за терористичка организација, додека Европската унија го стави на црната листа нејзиното вооружено крило, но не и политичката партија која има места во либанскиот парламент.
Очевидци од либанскиот главен град за агенцијата изјавија дека силни експлозии се слушнале во јужните предградија, рано во саботата.
Израел претходно издаде три предупредувања до жителите веднаш да ги напуштат тие делови на Бејрут.
Израел, исто така, го отсече клучниот пат во близина на либанскиот граничен премин Маснаа со Сирија што стотици илјади луѓе го користеа за да избегаат од израелското бомбардирање во последните денови.
Израел го обвини Хезболах дека ги користи граничните премини со Сирија за да внесе оружје. Повеќе од 300.000 луѓе - огромното мнозинство од нив Сиријци - преминаа од Либан во Сирија во изминатите 10 дена за да избегаат од ескалацијата на израелското бомбардирање.
Либанската влада го обвини Израел дека цели на цивили, укажувајќи на десетици убиени жени и деца. Израел вели дека е насочен кон воените капацитети и презема чекори за да се намали ризикот од повредување на цивилите. Ги обвинува Хезболах и Хамас дека се кријат меѓу цивилите, што тие го негираат.
Упадот на Израел во Либан, кој почна претходно оваа седмица, предизвика страв од поширок конфликт на Блискиот Исток.
Загриженоста се зголемени кога Техеран започна масовен, најголем досега, балистички ракетен напад врз Израел на 1 октомври, како одмазда за кампањата што еврејската држава во јужен Либан ја започна против Хезболах поддржан од Иран, што предизвика предупредувања за контрамерки од Израел и неговиот главен сојузник САД.
Израел, во консултација со САД, ги разгледува опциите за одговор на иранскиот ракетен напад на 1 октомври.
Американскиот претседател Џо Бајден, на прашањето на новинарите во Вашингтон во четвртокот - дали Белата куќа поддржува напади врз иранските нафтени објекти, рече: „Зборуваме за тоа“.
Најмалку 13 загинати и 6 исчезнати во поплавите во Босна и Херцеговина
Владата на Херцеговско-неретванската жупанија на вонредна прес-конференција потврди дека се пронајдени 13 тела на загинатите во поплавите, а не 16, како што соопштија вчера.
Појаснија дека вчера двапати биле пријавени три тела. Од тој број, 12 лица се од Долна Јабланица, а еден е од Коњиќ. Потрагата по шест лица во Јабланица и четири во Коњиќ сѐ уште трае.
Поради обилните врнежи, поплавени се и делови од општините Кисељак, Крешево и Фојница, во централна БиХ.
Околу 500 жители на селото Дусина во општина Фојница во централна Босна и Херцеговина сѐ уште се отсечени, откако поплавата и одроните ја уништија патната комуникација кон Фојница и ги поплавија селата Баковиќи, Луке, Гојевиќи.
„Екипата преку шумскиот пат успеа да стигне до Дусина и ја утврди состојбата, а по шумскиот пат над планината е испратена механизација за побрзо да се санира патот“, изјави за РСЕ, Анида Рамиќ, портпарол на општината.
Се проценува дека рехабилитацијата на патот ќе трае со денови, можеби и со недели, бидејќи повторно е забележано издигнување на реката Железница.
„Не верувам дека одроните се предизвикани од обилни дождови. Поради големите суши, карпите пукнаа. Обилните дождови и поројните дождови само направија сето тоа побрзо да се распадне“ вели за РСЕ, Мартин Таис, експерт за климатски промени, коментирајќи ги бројните свлечишта и одрони на југот на Босна и Херцеговина.
На вонредна седница на 4 октомври, Претседателството на Босна и Херцеговина едногласно донесе одлука за ангажирање на вооружените сили на Босна и Херцеговина на поширокото подрачје на општина Јабланица.
Итно биле ангажирани инженерски единици, единици за спасување луѓе и хеликоптер на вооружените сили на БиХ, со цел да се обезбеди итна помош на цивилните власти за одговор на природната катастрофа - големи поплави и лизгање на земјиштето во поширокото подрачје на општината Јабланица.
Променливо облачно време со повремен дожд
Времето денеска ќе биде променливо облачно со повремени врнежи од дожд, наместа во источните делови пообилни, проследени со ретки грмежи. Максималната температура ќе достигне од 19 до 25 степени.
Во Скопје, се очекува променливо облачно со повремени врнежи од дожд, особено попладне и кон крајот на денот. Во делови од котлината врнежите ќе бидат пообилни и проследени со ретки грмежи. Максималната температура ќе достигне до максимални 23 степени.
Во изминатото деноноќие најмногу дожд наврна во Пожаране и Лазарополе. Според мерењата на Управата за хидрометеоролошки работи, наврнат е воден талот од 65 литри на метар квадратен.
До осум часот утрово наврнати се 58 литри на метар квадратен во Маврови Анови, 57 во Дебар, 56 на Попова Шапка, 53 во Тетово, 48 во Крушево, 45 во Охрид, 31 во Скопје-Петровец и Крива Паланка, 28 во Скопје-Зајчев Рид и Куманово, 20 во Велес, 19 во Претор, 14 во Прилеп, 13 во Берово и Тополчани, 11 во Битола, 8 во Кавадарци, Виница и Струмица, 7 во Штип, 4 во Демир Капија и 1 литар во Гевгелија.
Највисокиот суд на ЕУ одлучи дека полот и националноста на Авганистанките се доволни за азил
Европскиот суд на правдата (ЕСП) на 4 октомври пресуди дека само полот и националноста се доволна причина земјата да даде азил на авганистанските жени, каде што владејачките талибанци драстично ги ограничија правата на жените.
Властите во Австрија одбија да дадат статус на бегалец на две Авганистанки кои поднеле барање за азил во 2015 и 2020 година.
Нивната жалба стигна до австрискиот Врховен административен суд, кој потоа побара одлука од Европскиот суд на правдата, највисокиот суд на Европската унија.
„Не е неопходно да се докажува дека постои ризик апликантката да биде конкретно и директно изложена на акти на прогон доколку се врати во нејзината земја на потекло“, се наведува во пресудата на ЕСП.
„Доволно е да се земат предвид нејзината националност и пол“, се додава.
Министерството за внатрешни работи на Австрија не одговори веднаш на барањето на Ројтерс за коментар.
Една жена, идентификувана како А.Х. во судските документи, побегнала од Авганистан во Иран со нејзината мајка и сестрите кога имала 13-14 години, откако нејзиниот татко зависник од дрога се обидел да ја продаде, според судските документи.
Втората жена, идентификувана како Ф.Н., родена во 2007 година, никогаш не живеела во Авганистан. Таа и нејзиното семејство живееле во соседен Иран без дозволи за престој, што значело дека немале право на работа, а Ф.Н. не можел да оди на училиште.
Таа побегна од Иран пред да поднесе барање за азил во Австрија.
„Таа рече дека ако се врати во Авганистан, како жена, ќе биде изложена на ризик да биде киднапирана, нема да може да оди на училиште и можеби нема да може да се издржува без своето семејство“, се наведува во документот на Европскиот суд на правдата.
Од враќањето на исламистичкиот талибански режим на власт во 2021 година, жените во Авганистан се соочуваат со сериозни ограничувања на нивните права, вклучително и забрана за образование, работа и независност во секојдневниот живот.
Во август, талибанците воведоа широк сет на морални правила во согласност со шеријатскиот (исламски) закон.
Овие правила ги спроведува Министерството за морал, кое вели дека привело илјадници луѓе поради прекршување.
Високиот комесаријат за човекови права на Обединетите нации ги повика талибанците да стават крај на „драконските“ закони кои, според него, имаат за цел да ги претворат жените во „сенки“.
Зеленски го посети регионот Суми на границата со руската провинција Курск
Претседателот на Украина, Володимир Зеленски, на 4 октомври објави дека го посетил северниот регион Суми, од каде Украина започна голема воена операција врз соседниот руски регион Курск.
Речиси два месеци по ненадејната операција, украинските трупи контролираат големи делови од руската територија долж границата, иако темпото на напредување е забавено и руските сили почнаа да вршат контранапад.
„Клучно е да се разбере дека операцијата во Курск е навистина стратешка работа, нешто што додава мотивација на нашите партнери, мотивација да застанеме покрај Украина, да бидеме поодлучни и да извршиме притисок врз Русија“, рече Зеленски на Телеграм.
Како што може да се види на видеото објавено на Телеграм, Зеленски ја посети 82-та воздушно-десантна бригада со врховниот командант на армијата, генералот Александар Сирски.
Зеленски се заблагодари на армијата за одбраната на територијалниот интегритет на Украина.
Тој рече дека офанзивата Курск „многу му помогна“ на Киев да обезбеди нови пакети воена поддршка од Западот.
„Мораме да го мотивираме целиот свет и да ги убедиме дека Украинците можат да бидат посилни од непријателот“, им рече тој на војниците.
И покрај почетниот брз успех, воената операција во руската област Курск не успеа значително да ги попречи руските напади во источна Украина.
На 2 октомври, украинската армија објави дека се повлекла од градот Вухледар за да не биде опкружен од руските трупи, кои исто така се приближиле на околу седум километри од стратешкиот центар Покровск, кој се наоѓа нешто посеверно.
Генералот Сирскиј на Фејсбук објави дека неодамна разговарал за соработка на бојното поле и во сајбер просторот со генералот Кристофер Каволи, шеф на американската европска команда и генералот Тимоти Хау, шеф на американската сајбер команда.
Сирскиј ја истакна потребата од зајакнување на сајбер соработката.
„Важно е да ги искористиме сите расположливи можности за да постигнеме супериорност над непријателот, како на бојното поле, така и на сајбер просторот“, додаде генералот Сирскиј.
Претседателот на Украина, Володимир Зеленски, денеска соопшти дека одржал средба со военото раководство, на која разговарале за линиите на фронтот, воздушната одбрана и енергетската ситуација во регионот Суми.
Русија континуирано ја напаѓа електричната инфраструктура, што доведува до прекини на електричната енергија.
Мултимедија
Најпосетени
Што треба да знаете