Господине Тодоров ќе пишува ли во македонските учебници историја по бугарски терк, како што има обвинувања во дел од јавноста?
Не, во македонските учебници нема да пишува историја по бугарски терк, во македонските учебници ќе пишува историја по македонски терк. Но каков ќе биде тој македонски терк зависи од идните автори на учебниците по историја. Она што е важно, новите учебници, доколку сакаме да ги надминуваме конфликтите, ќе треба да го следат и да се пишуваат во насока на градење на долготраен и одржлив мир, т.е кон педагогија на мирот и кон развивање на критичко мислење кај учениците, нешто што денеска во учебниците во Македонија, но и во регионот не го наоѓаме.
Има ли Македонија заедничка историја со Бугарија?
Во јавноста често од страна на политичарите и историчарите се користи терминот заедничка историја, притоа имам впечаток дека тоа се користи по потреба на политичкиот интерес на тој или таа кој го користи терминот заедничка историја. По правило кога академска дефиниција, кога за одреден концепт во историјата како што е заедничка историја се употребуваат академски дефиниции и националистички дефиниции доаѓа до краток спој. Заедничка историја не подразбира –„един народ, две држави“, заедничка историја Македонија и Бугарија имаат и тоа е историјата која припаѓа на историјата на османлиската империја. Исто така и Македонија и Србија имаат заедничка историја од 1912 до 1991 во рамките на Југославија. Но Македонија и Бугарија имаат и преплетена историја, еден друг концепт во историографијата кој се користи. Преплетена историја подразбира дека нациите, империите, цивилизациите, ако сакаме и комунизмот и капитализмот не се исклучиви и ексклузивни категории на историографијата, напротив тие настануваат со меѓусебна интеракција и денеска нема историја што не е преплетена историја.
Претпоставувам сте го прочитале Договорот со Грција. И во него се предвидени некаков тип заеднички комисии. Кои обврски од него произлегуваат за Македонија?
Лично сметам дека Договорот со Грција и членот кој се однесува на формирање на заедничка комисија меѓу Македонија и Грција е многу подобро дефиниран и многу подобро ја дефинира идната работа на таа комисија. Работата на Комисија со Грција ќе биде иста како и на онаа со Бугарија. Тоа ќе претставува дијалог во кој двете страни треба да си кажат за работите кои им пречат во учебниците по историја. Се надевам дека како и за Комисијата со Бугарија, така и за Комисијата со Грција, дека ќе придонесе за надминување на конфликтот кој Македонија го има со Грција.
Тодоров во интервјуто зборува и за работата на Комисијата, која досега имала еден состанок во Софија. Комисијата за историски и образовни прашања има за цел да помогне во надминувањето на теми кои се сметаат за болни во заедничките односи и да помогне во надминување на конфликтите. Тодоров им порачува на политичарите да не им робуваат на националистите.
„Доколку се продолжи со изјави кои се одлика на минатите времиња и кои предизвикуваа конфликти, тогаш како член на Комисијата, сметам дека воопшто и не требаше да се формира Комисијата“, вели тој.
Според него стравувањата дека Македонија ќе се откажува од одредена историја, се неосновани. Тодоров понатаму вели дека често политичарите во недостаток на конкретни и конструктивни политики се фаќаат за историјата и често таа политика доведувала до сериозни последици.
Целото интервју со историчарот Петар Тодоров, може да го погледнете на видео снимката на почетокот на овој текст.
