Вести
Сеул: Северна Кореја испрати 3.000 војници во Русија
Северна Кореја испрати 3.000 војници во Русија за да ги поддржи силите на Кремљ во војната во Украина, а се очекува да испрати уште илјадници, соопштија денеска (23 октомври) јужнокорејските пратеници, пренесе Ројтерс.
Пјонгјанг вети дека ќе обезбеди вкупно околу 10.000 војници, кои се очекува да бидат распоредени до декември, изјавија пратениците пред новинарите откако за тоа беа информирани од јужнокорејската национална разузнавачка агенција.
Проценката е двојно поголема од претходната бројка.
„Во септември и октомври во Северна Кореја беа откриени значи дека има обука на војници. Се чини дека војниците сега се распоредени во повеќе објекти за обука во Русија и се прилагодуваат на локалната средина“, рече Парк Сун-вон од парламентарната комисија за разузнавање.
Американскиот секретар за одбрана Лојд Остин, исто така, денеска изјави дека има докази за севернокорејски трупи во Русија, иако останува да се види што ќе прават тие таму.
Остин, говорејќи во Рим, рече оти наводното распоредување војници на Северна Кореја може да биде дополнителен доказ дека руската војска има проблеми со човечки ресурси во војната против Украина.
Русија ја нападна својата соседна земја во февруари 2022 година и оттогаш тоа се претвори во војна која се води долж линијата на фронтот во источна Украина со огромни жртви на двете страни.
Кремљ го отфрли тврдењето на Јужна Кореја за распоредување на трупите како „лажна вест“, а севернокорејскиот претставник во Обединетите нации во Њујорк ги карактеризираше информациите како „неосновани гласини“.
И Москва и Пјонгјанг, исто така, негираа трансфер на оружје, но ветија дека ќе ги зајакнат воените врски, потпишувајќи договор за заемна одбрана на самитот во јуни.
Последните податоци за испраќањето 3.000 војници дојдоа откако Националната разузнавачка служба на Сеул во петокот соопшти дека Северна Кореја со бродови испратила во Русија околу 1.500 припадници на специјалните сили.
Украинскиот претседател Володимир Зеленски исто така го обвини Пјонгјанг дека се подготвува да испрати 10.000 војници во Русија. Во вторникот тој ги повика своите сојузници да одговорат на доказите за вмешаноста на Северна Кореја во руската војна.
Ли Сеонг-квеун, пратеник од Јужна Кореја, рече дека властите во Пјонгјанг се обиделе да спречат ширење на веста за распоредувањето војници.
„Постојат знаци дека севернокорејските власти ги преселиле и изолирале тие семејства (на војници) на одредено место за ефективно да ги контролираат и темелно да ги отфрлат гласините“, рече Ли, повикувајќи се на информации од разузнавачката агенција.
Ли исто така рече дека агенцијата потврдила оти Русија регрутирала „голем број“ преведувачи за севернокорејските војници додека ги обучувала за употреба на воената опрема како што се беспилотните летала.
„Руските инструктори оценуваат дека севернокорејската војска има одлични физички атрибути и морал, но нема разбирање за модерното војување, како што се нападите со беспилотни летала. Затоа, може да има многу жртви доколку бидат распоредени на фронтот“, рече тој.
Во вторникот, претседателскиот кабинет на Јужна Кореја повика на итно повлекување на севернокорејските трупи од Русија, предупредувајќи дека може да ја разгледа можноста за снабдување на Украина со смртоносно оружје доколку воените врски меѓу двете држави (Северна Кореја и Русија) отидат предалеку.
Претставници на американските власти, кои сакаа да останат анонимни, велат дека Русија претрпела загуби од повеќе од 600.000 војници кои биле убиени или ранети во војната во Украина.
Остин рече дека наводното распоредување на Северна Кореја може да укаже на недостиг на руски регрути.
„Ова е показател дека тој (рускиот претседател Владимир Путин) можеби е во уште поголема неволја отколку што мислат повеќето луѓе“, рече Остин.
Пратеникот Парк рече дека Пјонгјанг за возврат може да побара брза интервенција од Русија во случај на непредвидена ситуација на Корејскиот полуостров, како и економска помош.
види ги сите денешни вести
Смртоносни напади на руските сили во источна Украина
Во руски воздушен напад врз градот Купјанск во источна Украина загина едно лице, а десет други беа ранети, соопштија регионалните власти на 24 октомври.
„Непријателот удри во близина на продавница и на градскиот пазар“, рече регионалниот гувернер Олех Синјехубов во својата првична изјава за утринскиот напад врз градот во регионот на Харков.
Во руското гранатирање подоцна во текот на денот загинаа три лица во областа околу стратешкиот центар Покровск во источниот регион Доњецк, објави гувернерот Вадим Филашкин на Телеграм.
Филашкин рече дека Покровск и неговата околина се цел на руските војници и ги повика локалните жители да се евакуираат.
Генералштабот на украинската војска, исто така, соопшти дека најинтензивните руски напади долж линијата на фронтот се случуваат во областа Покровск, вклучително и во близина на градот Селидове, на околу 20 километри југоисточно од Покровск.
Претходно на 24 октомври, украинската противвоздушна одбрана собори 40 од 50-те беспилотни летала лансирани од Русија во 11 украински региони, додека други седум се изгубија поради електронско заглавување на нивните навигациски системи, се вели во соопштението на украинските воздухопловни сили.
Русија, исто така, лансираше две наведувани ракети и две крстосувачки ракети, кои ги промашија своите цели, соопшти војската.
Група влади и меѓународни организации собраа милијарда долари за помош на Либан
Група влади и меѓународни организации од целиот свет собраа милијарда долари за помош во хуманитарната криза во Либан, додека американскиот државен секретар Антони Блинкен ја продолжи својата турнеја на Блискиот Исток, велејќи дека Вашингтон е отворен за „различни опции“ за ставање крај на војната во Појасот Газа која се прелеа во соседен Либан.
Францускиот министер за надворешни работи, Жан-Ноел Баро, рече дека на конференцијата во Париз на 24 октомври се собрани 800 милиони долари за помош на стотиците илјади луѓе во Либан раселени поради борбите меѓу Израел и Хезболах, поддржан од Иран, милитантна група и политичка партија која контролира голем дел од јужен Либан.
На конференцијата беа ветени уште 200 милиони долари за помош на либанските вооружени сили (LAF). Тоа се силите за национална безбедност кои помагаат во спроведувањето на резолуцијата 1701 на Советот за безбедност на ОН, која повикува јужниот дел на Либан да биде ослободен од какви било војници или оружје освен оние на либанската држава.
„Бурата на која моментално сме сведоци е различна од која било друга, бидејќи го носи семето на целосно уништување“, рече привремениот либански премиер, Наџиб Микати, на донаторската конференција.
Тековната војна меѓу Израел и групите Хезболах и Хамас поддржани од Иран, означени како терористички организации од Соединетитете Американски Држави(САД), беше предизвикана откако милитантите на Хамас извршија упад во Израел на 7 октомври 2023 година, при што загинаа околу 1.200 луѓе.
Тие исто така зедоа околу 240 луѓе назад во Газа како заложници.
Европската унија, исто така, го означи Хамас како терористичка организација и иако го стави на црната листа на вооруженото крило на Хезболах, не ја дава истата ознака за неговата политичка партија. Политичката партија на Хезболах има места во либанскиот парламент.
Многу западни функционери рекоа дека смртта на водачот на Хамас, Јахја Синвар, претходно овој месец, отвори простор за оживување на мировните преговори.
По разговорите со официјални лица од Египет и Катар на 24 октомври, Блинкен рече дека фокусот бил на „опциите за капитализирање на овој момент и на следните чекори за придвижување на процесот напред“.
Во разговорите во Доха е предвидено да се вклучат и израелски претставници на 25 октомври, додека катарските власти во последните денови се сретнаа со претставници на политичката канцеларија на Хамас во катарската престолнина.
Европскиот парламент ја осуди „репресијата“ на Азербејџан врз активисти, новинари и опозициски лидери
Европскиот парламент(ЕП) го осуди, како што го нарече, кршењето на човековите права и меѓународното право од страна на Азербејџан, велејќи дека Европа треба да ја прекине зависноста од гасот од оваа кавкаска држава.
Во строго формулирана резолуција, 453 европратеници на 24 октомври гласаа за изјава со која се осудува „репресијата“ на Азербејџан врз активисти, новинари и опозициски лидери дома и во странство, која „забележително се засили“ пред Баку да биде домаќин на 29 Самит за климатски промени (COP29) наОбединетите нации, следниот месец.
„Постојаните прекршувања на човековите права во Азербејџан се некомпатибилни со неговата улога на домаќин на конференцијата за климата и [ние] ги охрабруваме лидерите на ЕУ, како што е претседателката на Европската комисија, Урсула фон дер Лајен, да го искористат собирот како можност да се осврнат на лошите резултати на земјата на ова поле“, соопштија од Европскиот парламент.
ЕП ја повика владата во Баку да ги прекине сите форми на репресија во и надвор од Азербејџан, да ги ослободи сите лица произволно приведени и да ги отфрли сите политички мотивирани обвиненија.
Во резолуцијата одобрена од европратениците се бара и нормализација на односите меѓу Азербејџан и соседна Ерменија и потпишување на долгоочекуваниот мировен договор.
Азербејџан повторно ја презеде контролата врз регионот Нагорно-Карабах, етничка ерменска енклава која целосно се наоѓа на територијата на Азербејџан, во септември 2023 година. Оттогаш, Азербејџан и Ерменија водеа преговори за мировен договор за кој двете страни во септември рекоа дека е 80 отсто завршен.
Сиљановска Давкова: Клучот за нашиот развој е во интеграција согласно Копенхагенските критериуми
Македонските институции во повеќе области се подготвени за забрзана интеграција и вклучување во повеќе иницијативи и мрежи на Европската унија (ЕУ), очекувањето е дека процесот на интеграција ќе се спроведе врз основа на принципот на заслуги и Копенхагенските критериуми. Ова е ставот што ѝ го пренела македонската претседателка Гордана Сиљановска Давкова на претседателката на Европската Комисија, Урсула фон дер Лајен, на средбата во Скопје на 24 октомври, соопшти Кабинетот на Сиљановска Давкова.
„Посочувајќи ја важноста од одржување на кредибилитетот на Европската Унија во однос на политиката на проширувањето, претседателката ја истакна потребата од засилена поддршка од страна на европските институции со цел надминување на билатералните предизвици и забрзување на евроинтеграциите. Претседателката изрази подготвеност за натамошно продолжување на дијалогот и ја истакна важноста новиот пристап на постепена, фазна интеграција да продолжи паралелно со процесот на пристапување“, пишува во соопштението.
Сиљановска Давкова посочила дека Планот за раст е важен механизам со голем потенцијал, кој ќе ги забрза реформите, ќе придонесе за стандардизација, економскиот раст и напредок и ќе ја приближи земјата до Европската Унија.
Претседателката на Европската Комисија претходно се сретна и со македонскиот премиер Христијан Мицкоски.
Урсула Фон дер Лајен е на четиридневна турнеја во регионот. По Скопје, таа ќе ги посети подрачјата погодени од поплавите во Босна и Херцеговина и ќе се сретне со високите државни претставници. Во Србија, на 25 октомври, Урсула фон дер Лајен ќе се сретне со претседателот и премиерот на Србија. Претседателката на ЕК Урсула фон дер Лајен на 26 октомври ќе ја заврши посетата на Косово и Црна Гора.
Прорускиот претседателски кандидат на Молдавија го брани својот романски пасош
Александр Стојаногло, кандидат за претседател на Молдавија кој ќе се соочи со проевропската актуелна претседателка Маја Санду во вториот круг од претседателските избори на почетокот на следниот месец, го бранеше стекнувањето романско државјанство и ги критикуваше медиумските извештаи дека неговите ќерки работат во Западна Европа.
Санду победи во првиот круг претседателски избори во Молдавија на 20 октомври со освоени 42,49 отсто од гласовите, додека социјалистот Стојаногло, поранешен државен обвинител кој се соочува со обвинувања за корупција, освои 25,9 отсто гласови покажаа конечните резултати.
Во кампањата имаше тврдења за купување гласови, како и кампањи за дезинформации и манипулација на гласачи, наводно оркестрирани од Русија.
Вториот круг на изборите е закажан за 3 ноември.
Поголем дел од Молдавија беше дел од Романија до крајот на Втората светска војна, а многу Молдавци имаат и романско државјанство, што им дава можност слободно да патуваат во Европската унија и да работат таму.
Стојаногло го бојкотираше референдумот за интеграција на Молдавија во Европската унија (ЕУ) што беше одржан во ист ден со претседателските избори и на кој европската опција предводена од Санду победи со тесно мнозинство.
Откако медиумите открија дека Стојаногло поседува романски пасош, тој тврдеше дека го добил во 2019 година во „аполитички контекст“, без да каже детали.
Стојаногло ги нападна медиумите за извештаите дека двете негови ќерки работат на Запад.
Според јавните податоци на социјалните мрежи, неговата постара ќерка Кристина магистрирала економија и бизнис во Виена и работи за компанија со седиште во Швајцарија, додека помладата Корина студирала на Универзитетот во Мастрихт во Холандија и работи за Европската централна банка (ЕЦБ) во Франкфурт, Германија.
Многу набљудувачи го сметаа двојното гласање во Молдавија како клучно во одлучувањето за насоката во која ќе се движи земјата – ќе има поблиски врски со Европа или ќе остане во сенка на Русија.
Русија го одобри Договорот за воена помош со Северна Кореја
Руската Државна Дума, Долниот дом на парламентот, го одобри договорот за стратешко партнерство со Северна Кореја, кој дозволува „воена и друга помош“ од една на друга земја, пренесе сервисот на англиски јазик на Радио Слободна Европа(РСЕ).
Договорот, одобрен на 24 октомври, откако првично беше договорен меѓу претседателот на Русија, Владимир Путин и севернокорејскиот лидер Ким Џонг Ун во Пјонгјанг во јуни, ја носи соработката меѓу двете земји на повисоко ниво, вклучително и изјава во која се наведува дека доколку едната страна биде нападната и се најде во воена состојба, другиот мора „веднаш да обезбеди воена и друга помош со сите средства што му се на располагање“.
Не е јасно како треба да се толкува таа клаузула, но и Јужна Кореја и Соединетите Американски Држави(САД) неодамна рекоа дека имаат докази дека севернокорејските трупи се во Русија и се чини дека одржуваат вежби.
Таквото распоредување ја зголемува можноста севернокорејските војници да им се придружат на руските трупи кои се борат во Украина, бидејќитаму продолжува војната предизвикана од целосната инвазија на Москва врз нејзиниот сосед во февруари 2022 година.
Секретарот за одбрана на САД, Лојд Остин, на 23 октомври рече дека има докази за испраќање војници во Русија од страна на Северна Кореја откако Пјонгјанг ѝ обезбеди оружје на Москва.
Аналитичарите сè уште ја проценуваат ситуацијата, рече Остин, но Пјонгјанг, кој ги негираше обвинувањата, може да се соочи со последици за директната помош на Русија.
Портпаролот на Советот за национална безбедност, Џон Кирби,изјави дека Белата куќа верува дека најмалку 3.000 севернокорејски војници отпатувале со брод до Владивосток на рускиот Далечен Исток меѓу почетокот и средината на октомври.
Минатата недела, јужнокорејската Национална разузнавачка служба (НИС) соопшти дека го следела движењето на војската на Северна Кореја од 8 октомври до 13 октомври и дека снимила транспорт на специјални сили на руска територија преку руски транспортен брод.
Институтот за проучување на војната, тинк-тенк организација со седиште во Вашингтон, исто така неодамна објави дека неколку илјади севернокорејски војници пристигнале во Русија и се подготвуваат за распоредување во Украина.
Кремљ претходно ги отфрли тврдењата на Јужна Кореја дека Пјонгјанг ѝ испорачувал артилериски гранати и ракети со краток дострел на Москва, но не ги коментираше последните тврдења ниту на Сеул ниту на украинскиот претседател Володимир Зеленски, кој на 14 октомври рече дека „ова веќе не е само пренос на оружје. Всушност се работи за трансфер на луѓе од Северна Кореја до окупаторските воени сили“.
Пјонгјанг и Москва се сојузници од основањето на Северна Кореја по Втората светска војна и уште повеќе се зближија по руската инвазија на Украина во 2022 година, при што Сеул и Вашингтон долго време тврдат дека Ким Џонг Ун испраќал оружје за употреба во Украина.
Апсења во БиХ и во Хрватска за криумчарење најмалку 159 мигранти
Полицијата на Босна и Херцеговина и Хрватска уапси 16 лица за криумчарење на најмалку 159 мигранти од Босна и Херцеговина во Хрватска преку реката Сава, соопшти европската полициска агенција Европол на 24 октомври.
Според Европол, разбиената група е одговорна за криумчарење мигранти „под животно опасни околности“.
„Користејќи преполни чамци, лицата осомничени за криумчарење доброволно ги загрозувале животите и безбедноста на мигрантите. По преминувањето на реката, мигрантите тајно биле превезувани со разни видови возила, биле скриени во приватни автомобили или товарни простори на транспортни возила и пренесени во Словенија, Италија, Германија и други европски земји на Унијата“, соопштија од Европол.
Се проценува дека осомничените од криумчарење мигранти заработиле најмалку 80.000 евра.
Акцијата беше спроведена како дел од Оперативната работна група формирана во март 2023 година, која вклучува тела за спроведување на законот од Хрватска, Словенија и Босна и Херцеговина. Таа е насочена кон мрежите на организиран криминал за криумчарење мигранти кои се активни на западнобалканската рута.
Регионот на Западен Балкан е важна транзитна зона за илегални миграции, особено за оние кои се обидуваат да стигнат до Западна и Северна Европа. Трасата на нерегуларната миграција кон Европската Унија преку Западен Балкан, поточно преку Албанија, Босна и Херцеговина и Србија, се зголемува уште од 2018 година, покажа извештај на Меѓународната организација за миграција (ИОМ).
Полицијата приведе еден од помилуваните од претседателката Сиљановска Давкова
Полицијата го приведе А.Р.(29) од скопското село Арачиново, кој е еден од осудениците на кои со одлука на македонската претседателка извршувањето на изречената казна затвор му беше заменето со условна осуда, соопштија од Министерството за внатрешни работи (МВР) и од Јавното обвинителство(ЈО).
Причина за приведувањето е тоа што за истото лице е поведена истрага за обид за убиство.
Претседателката Гордана Сиљановска-Давкова, помилува десет осуденици по повод Денот на Македонската револуционерна борба, 23 Октомври. Според таа одлука, на тројца извршувањето на затворската казна им се заменува со условна додека на останатите седуммина со одлуката им се скратува времетраењето на казната.
Од Министерството за внатрешни работи (МВР) соопштија дека против А.Р. е поднесена кривична пријава по брза постапка, за настан од 14 октомври во Чаир, кога од огнено оружје бил повреден Е.А. (35) од Скопје. По изготвените вештачења, полицијата утврдила дека сторител на делото бил А.Р.
Од Јавното обвинителство соопштија дека полициски службеници на 24 октомври „непосредно по излегувањето од КПУ „Идризово“ – Скопје лишија од слобода лице на кое со Одлука на Претседателот на Република Северна Македонија извршувањето на изречената казна затвор му беше заменето со условна осуда, бидејќи за истото лице е поведена истрага за ново кривично дело“.
До судија на претходна постапка од Основниот кривичен суд Скопје ќе биде доставен предлог за определување мерка притвор, соопштија од Јавното обвинителство.
Меѓу помилуваните има и лица кои беа осудени во познати случаи во јавноста. Еден од нив е поранешниот градоначалник на Битола, Владимир Талески, кому претседателката му скрати една година од затворската казна од која му остануваат за извршување уште околу три години.
Талески беше осуден на седум години затвор во предметот „Транспортер“ покренат од поранешното Специјално јавно обвинителство (СЈО) кое го гонеше за злоупотреба на службената положба во врска со организирањето превоз на ученици во Битола.
Делумно помилување со три месеци помала казна доби и Марјан Ефремов, кој беше првообвинет во предметот „Шпион“.
Меѓу делумно ослободените се и лицата: Мухарем Али од Скопје, Тодор Попов од село Миравци, Томислав Симонов од Скопје, Перо Кузмановски од Градско и Живко Делиџаков од селото Богородица. Тие добија намалување на затворските казни по два односни три месеци.
Извршувањето на затворската казна, според одлуката за помилување, пак, се заменува со условна осуда на: Акиф Равмановски од село Арачиново, Никола Трпчески од Охрид и Шенол Маслани од Арачиново.
Дел од медиумите јавија дека едно од помилуваните лица е член на наркокартелот „Барон“, а опозицискиот СДСМ реагираше дека помилувањето на вакво лице е најшокантно од целата листа.
Одлуките за помилување на осуденици, претседателот на државата ја носи по препорака на Комисијата за помилување, која е постојано работно тело во служба на претседателот.
Сиљановска Давкова, која функцијата ја презеде во мај, нови членови на оваа Комисија именуваше на крајот на јули годинава.
Градоначалниците на Струмица и на Карпош најавија дека ќе излезат од ЗЕЛС, за Перински и Ѓорѓиевски таков потег не е решение
Секоја најава за нарушување на единството на Заедницата на единици на локална самоуправа(ЗЕЛС) му штети и на ЗЕЛС и на сите општини, изјави министерот за локална самоуправа, Златко Перински, откако градоначалниците на општините Струмица и Карпош најавија дека ќе го напуштат ЗЕЛС поради проблеми со министри од Владата.
„ ЗЕЛС е единствената асоцијација на единиците на локалната самоуправа што има мандат да ги застапува нивните интереси пред Владата. Добро е и во иднина да остане така. Ваквото однесување сериозно ја нарушува позицијата на ЗЕЛС, затоа што само единствен ЗЕЛС може да биде сериозен партнер на Владата во разговорите за унапредување на системот на локалната самоуправа и на развојот на општините“, изјави Перински.
Орце Ѓорѓиевски, претседател на ЗЕЛС и градиначалник на Кисела Вода, во изјава за медиумите попладнево, рече дека досега до ЗЕЛС нема стигнато официјално барање за излегување од ова тело. Тој кажа дека таква одлука носи Советот на општината.
„За да се пристапи кон одредена изјава или одредени обвинувања, особено кон ЗЕЛС, треба претходно да се седне и да се разговара. Апелирам до двајцата колеги да се вразувамат и малку посериозно да погледнат на овие нивни потези, затоа што Орце не може самоиницијативно да одлучи како градоначалник на Кисела Вода да ги стави во заложништво сите граѓани повлекувајќи личен потег или потег побуден од различна политичка причина или понуда“, изјави Ѓорѓиевски.
Претходно, Костадин Костадинов, градоначалник на Струмица, на Фејсбук објави дека од денеска, 24 октомври, општина Струмица се откажува од членство во ЗЕЛС, а тој ќе поднесе оставка на функцијата член на Управниот одбор. Причината е „револт заради индиферентниот однос кон Струмица и нејзините граѓани во периодот кога тие се соочуваат со еден од најголемите предизвици - водата за пиење, но и заради истиот однос по одбивањето од Владата на единствениот проект од Струмица за реализација со средства од унгарскиот кредит“.
Агенцијата за храна и ветеринарство (АХВ) ја продолжи забраната за користење на водата за пиење во Струмица поради пронајдени колиформни бактерии. Проблемот со водата во Струмица трае веќе еден месец.
Стевче Јакимовски, градоначалник на Карпош, најави дека општина Карпош може да го напушти ЗЕЛС поради „големи притисоци од страна на централната власт“.
-„Што прават со мене тука? Министерот за транспорт вика јас не потпишувам планови додека сум министер и уште се фали дека со новиот закон му се зголемиле ингеренциите. Сега јавно да го прашам. Вие одите кон Брисел или одите кон Москва? Ако одите кон Брисел вие треба да ги намалувате дискреционите права, а не да ги зголемувате. Ако одите кон Москва, тогаш ќе функционирате со декрет“, изјави Јакимовски.
Тој рече дека МВР му пушта кривични пријави, а не се гласаат општинските програми и буџетот.
ЗЕЛС е единствена национална асоцијација која ги застапува интересите на единиците на локалната самоуправа пред централната власт.
Во ЗЕЛС на доброволна основа членуваат сите 80 општини и Градот Скопје.
Опозициската партија Тиса е пред Фидес на Орбан, покажуваат анкетите
Унгарската опозициска партија Тиса има мала предност пред владејачката партија Фидес, покажа анкетата објавена во четврток (24 октомври). Ова е втора анкета која покажува дека Тиса ја престигнува партијата на премиерот Виктор Орбан.
Лидерот на партијата на десниот центар, Петер Маѓар (43), поранешен инсајдер во владата, претставува голем предизвик за Орбан, капитализирајќи го незадоволството од другите опозициски партии кои се покажаа поделени и неефикасни против Фидес поради изминатите 14 години, пишува Ројтерс.
Толпа од околу 10 000 луѓе се собраа на митингот на Тиса во Будимпешта во средата кога земјата ја одбележа годишнината од востанието против советската власт во 1956 година, кое беше задушено од Црвената армија.
За време на својот говор на митингот, Маѓар ги објави чекорите за подготовка на неговата партија и избор на кандидати за изборите во 2026 година.
Тој вети дека ќе ја искорени корупцијата, ќе инвестира во здравството и образованието и ќе започне „национален дијалог“ со гласачите од 5 ноември, токму кога владата на Орбан се подготвува да испрати анкети до милиони Унгарци ширум земјата за нејзината економска агенда.
Економијата се бори да закрепне од инфлаторната криза, наведува Ројтерс.
Анкетата на Институтот Публикус објавена во четвртокот, спроведена помеѓу 11 и 18 октомври, покажа дека Тиса има 39 отсто поддршка меѓу посветените гласачи, додека Фидес има 37 отсто.
„Еве повеќе студии кои покажуваат дека трката меѓу Фидес и Тиса е речиси изедначена. Вреди да се напомене: на изборите за Европскиот парламент Фидес победи со 45 до 30 проценти, споредено со тоа, ова би била многу сериозна промена“, напиша аналитичарот Габор Торок на својот блог.
Друга анкета објавена во средата, спроведена од Истражувачкиот центар 21 во првата половина на октомври, покажува дека Тиса има 42 отсто поддршка меѓу посветените гласачи, а Фидес 40 отсто.
Што се однесува до електоратот во целина, Фидес продолжува да ја предводи Тиса со 29 отсто поддршка. Две други неодамнешни анкети покажуваат дека Фидес има намалена предност пред Тиса. Во сите анкети околу 30 отсто од гласачите се неопределени.
Орбан, чија десничарска влада се противи на политиката на Европската Унија за обезбедување воена помош за Украина против руската инвазија и одржува добри односи со Русија, во средата рече дека неговата суверена политика за војната во Украина и миграцијата е неприфатлива за Брисел, обвинувајќи ја извршната власт на ЕУ за политичко мешање.
Мултимедија
Најпосетени
Што треба да знаете