Вести
Либан соопшти дека речиси 500 луѓе загинале во израелските воздушни напади
Либанското Министерство за здравство соопшти дека бројот на загинати во израелските воздушни напади се искачи на 492 лица, а уште 1645 се ранети.
Како што пренесува ДПА, Министерството соопшти дека 35 деца и 58 жени биле убиени откако Израел го започна својот најсмртоносниот бран воздушни напади врз милицијата Хезболах, поврзана со Иран, од 2006 година.
Нападите, фокусирани на јужен и источен Либан, почнаа вчера наутро и во нив беа погодени 1300 цели на Хезболах, изјави израелскиот министер за одбрана Јоав Галант.
Израелскиот премиер Бенјамин Нетанјаху го опиша како превентивен напад чија цел е да се елиминира оружјето на Хезболах.
Израел ги повика либанските граѓани да се евакуираат од областите каде што тврди дека шиитската група складира оружје.
Либанскиот министер за здравство, д-р Фирас Абијад, изјави дека десетици илјади луѓе ги напуштаат своите домови на југот на земјата, додавајќи дека „главната цел на овие напади била да се поттикне егзодусот на цивилите од целните области“.
Последните напади доаѓаат во време на некои од најтешките прекугранични размени на оган во речиси една година конфликт, додека Израел го префрла фокусот на својата северна граница, каде Хезболах истрелува ракети за поддршка на својот сојузник Хамас (која САД и ЕУ ја прогласија за терористичка организација), кој се бори со израелските сили во Газа.
види ги сите денешни вести
По одлуката за намалување на маржата, се менуваат цените на производите
Од денеска (24 септември), трговците на големо и на мало треба да ја намалат до 10 отсто маржата на основните прехранбени производи. Станува збор за 73 производи, со што цените треба да бидат пониски за десет отсто.
„Оваа мерка ќе трае некаде таму до крајот на октомври месец. Седумдесетина производи се практично производи коишто како резултат на овој закон се со намалени цени. Во периодот што следи ќе продолжиме да ја ажурираме оваа листа, во зависност на потребите на граѓаните. Ќе потсетам, производите не се резултат на шпекулативна мерка, туку се резултат на една анализа и теренски анкети водени со граѓаните кои производи се најкористени во овој период од годината. Така ќе биде можеби и пред новогодишните празници, така ќе биде на пролет и цело време така ќе функционираме. Целта ни е да го олесниме животот на граѓаните и да ја намалиме цената на производите“, рече денеска одговарајќи на новинарско прашање премиерот Христијан Мицкоски, на поставување камен темелник на спортска сала во Општина Ѓорче Петров.
Владата ги задолжи трговците за производите кои се вклучени во есенската кошница и се поставени на полиците, фрижидерите и разладните уреди јасно да ги обележат со натписот „помалку трошоци, повеќе за тебе“, кој е објавен на веб-страницата на Министерството за економија и труд.
На листата на таканаречената есенска кошничка се 73 производи меѓу кои - леб, тестенини, брашно, пекарски производи како бурек и банички со месо и сирење, млеко и млечни производи, месо и преработки од месо, дел од овошјето и зеленчукот, ориз, грав, масло за јадење и дел од конзервираните производи.
Исто така, трговците на големо и трговците на мало ќе имаат обврска за да ги прибавуваат и продаваат во месечни количини од најмалку 70% од прибавените количини во месец август 2024 од овие производи на листата.
Од Сојузот на синдикати на Македонија (ССМ) објавувајќи ја пресметката на синдикалната кошничка рекоа дека на едно четиричлено семејство во септември му биле потребни 61 306 денари, што е зголемување за 107 денари споредено со август. Тоа, како што велат оттаму, укажува дека трговците во текот на месецот ги искористиле најавите за воведување на ограничени маржи на основните прехранбени производи.
На тој начин, како што оценуваат од ССМ, трговците си осигуруваат зголемени цени на производите во наредниот период кога во сила ќе биде владината одлука за ограничени маржи, на штета на граѓаните.
Нова група волонтери од американскиот Мировен корпус пристигна во Скопје
Триесет и осум Американци вчера пристигнале во земјава за да служат како волонтери во Мировниот корпус. Тие ќе волонтираат во различни институции и организации низ земјата, каде што ќе го споделат своето знаење и искуство. Во државата ќе останат две години.
„Мировниот корпус го поздравува пристигнувањето на 38 Американци во државата кои ја претставуваат 27-та група волонтери на Мировниот корпус која ќе служи во Северна Македонија. Овие 38 Американци ќе бидат распределени да живеат и работат во различни заедници низ целата земја. Мировниот корпус е благодарен за соработката со Владата и нашите партнери, со која успеавме да поддржиме речиси 900 волонтери да служат овде од 1996 година па сè до денес“, истакна директорот на Мировниот корпус Дејвид Рисајд.
За време на нивниот двегодишен престој, волонтерите ќе работат како наставници по англиски јазик во училиштата, како и во полето на развој на заедницата во невладините организации и општините.
„Мировниот корпус има одлична соработка со своите локални и национални партнери и ги спроведува своите програми во партнерство со Министерството за образование и наука и Министерството за локална самоуправа“, велат од Мировниот корпус.
Ова е 27-та група на волонтери кои ќе живеат и работат во градови и села низ Северна Македонија. Во текот на првите три месеци, волонтерите ќе ги изучуваат локалните јазици и ќе ја запознаат македонската култура.
Својата служба во земјата ќе ја започнат официјално во декември. Мировниот корпус својата мисија во државата ја почна во 1996 година и досега волонтирале над 800 Американци.
ЕУ на годишнината од нападот во Бањска: Сите одговорни мора да одговараат
Европската Унија очекува властите во Србија навремено да ги преземат сите неопходни чекори со цел да се обезбеди целосна одговорност на сите лица одговорни за нападот на 24 септември 2023 година во Бањска на северот на Косово.
Ова го изјави портпаролот на ЕУ Петер Стано за Радио Слободна Европа по повод првата годишнина од овој напад.
Пред точно една година, во селото Бањска кај Звечан, вооружена група предводена од поранешниот српски политичар и бизнисмен од Косово Милан Радоичиќ, ја нападна косовската полиција.
„Европската Унија постојано изразува очекување дека Србија треба целосно да соработува и да ги преземе сите неопходни мерки за да ги уапси и брзо да ги изведе пред лицето на правдата сторителите на насилните дејствија од страна на демонстрантите на косовските Срби против граѓаните, војниците на КФОР (Мисија на НАТО во Косово), органите за спроведување на законот и медиумите на 29 мај 2023 година и насилниот напад на 24 септември 2023 година на северот на Косово“, посочува Стано во писмената реакција.
Тој го повтори повикот на Брисел дека е неопходно Србија целосно да соработува со Косово во сите претстојни судски постапки „за оние случаи кога наводните сторители се на Косово“.
ЕУ претходно го поздрави обвинението за нападот во Бањска.
И лидерите на Косово, претседателката Вјоса Османи и премиерот Албин Курти, во вторник (24 септември) ја одбележаа годишнината од вооружениот напад врз косовската полиција во Бањска на северот на земјата и ја пофалија „жртвата на полицаецот Африм Буњаку за заштита на суверенитет на земјата“.
„Пред точно една година, наредникот Африм Буњаку стана жртва, за да докажеме уште еднаш, како што тоа го правевме низ вековите, дека оваа земја е нашиот вечен дом“, напиша Вјоса Османи на Фејсбук.
Косовскиот премиер Курти, откако му оддаде почит на гробот на Буњаку, рече дека „Србија мора да сноси одговорност“ и дека Косово бара меѓународната заедница да ја смета за одговорна за нападот во Бањска.
Курти оцени дека настаните во Бањска од 24 септември минатата година претставуваат „план за напад на Косово“ зад кој, според неговите зборови, стојат паравоени, терористички формации финансирани и раководени од Србија.
Во нападот во Бањска вооружена група Срби ја нападна полицијата и го уби полицаецот Африм Буњаку. Во размената на оган загинаа и тројца српски напаѓачи. Владата во Приштина овој напад го означи како терористички.
Одговорноста за нападот ја презеде Милан Радоичиќ. Тој е под истрага и во Белград и во Приштина. Радоичиќ се соочува со обвиненија за тероризам во Косово, заедно со уште 44 лица.
Кремљ стравува од целосна дестабилизација на Блискиот Исток
Кремљ објави дека стравува од „целосна дестабилизација“ на Блискиот Исток поради воената ескалација меѓу Израел и Хезболах во Либан.
„Се разбира, ова е потенцијално исклучително опасен настан со проширување на зоната на конфликтот и целосна дестабилизација на регионот“, изјави за новинарите портпаролот на рускиот претседател, Дмитриј Песков.
Израелската армија соопшти дека утрово над 50 проектили биле истрелани кон северен Израел од Либан, каде што во последните денови се интензивираа прекуграничните борби против проиранското исламистичко движење Хезболах.
„Во понеделникот (23 септември) загинаа 492 лица, од кои 35 деца и 58 жени, а 1645 се ранети“, соопшти либанското Министерство за здравство.
Израелската војска објави „голем број“ на членови на Хезболах убиени во Појасот Газа, движењето кое го поддржува палестинскиот Хамас (организција која САД и ЕУ ја прогласија за терористичка) во неговата војна против Израел.
Во последните напади врз Газа 7 лица загинаа, повеќе од 15 се повредени
Палестинските власти соопштија дека во израелските напади рано во вторник (24 септември) загинале најмалку седум лица во јужниот град Кан Јунис во Газа. Најмалку 15 други, меѓу кои жени и деца, се повредени во нападите, додаваат властите.
Израелската војска соопшти дека ќе стори „сè што е потребно“ за да го оддалечи Хезболах од границата на Либан со Израел. Израел и Хезболах разменуваат оган од почетокот на војната меѓу Израел и Хамас, организација која САД и ЕУ ја сметаат за терористичка.
Болницата во центарот на Газа соопшти дека таму биле донесени телата на две деца убиени во израелски воздушен напад во вторникот.
Болницата Авда во бегалскиот камп Нусејрат соопшти дека нападот погодил група луѓе во блискиот камп Буреиј, а исто така биле ранети уште шест Палестинци.
Во меѓувреме, Министерството за здравство на крајбрежната територија соопшти дека болниците во Газа примиле 12 мртви и 43 ранети Палестинци во последните 24 часа.
Вкупниот број на загинати во Газа од почетокот на војната на 7 октомври изнесува 41 467 лица и 95 921 ранети, соопштија здравствените власти.
Израел блокираше и бомбардираше големи делови од Појасот Газа во војната започната откако палестинската милитантна група Хамас, започна напади врз Израел, на 7 октомври 2023 година, во кои загинаа повеќе од 1200 луѓе.
Зеленски повика на „одлучна“ акција на САД за ставање крај на војната
Пред претстојниот говор на Генералното собрание на Обединетите Нации, украинскиот претседател Володимир Зеленски повика на решителни чекори на Соединетите Држави пред крајот на агресивната војна на Москва против неговата земја.
Зеленски ги даде овие коментари додека се подготвува за своето обраќање подоцна неделава во Обединетите Нации во услови на континуирани руски воздушни напади во кои загинаа и беа ранети повеќе украински цивили и оштетена критична инфраструктура.
Украинскиот лидер, кој е во Соединетите Држави на годишното Генерално собрание на Обединетите Нации (ОНГА), се сретна со двопартиска делегација на американски пратеници, изразувајќи ја благодарноста на Киев за, како што ја нарече, непоколебливата американска поддршка за Киев и меѓудругото, ја истакна критичната улога на САД бранејќи ја слободата на Украина.
Соединетите Држави, главниот поддржувач на Украина и западните сојузници му дадоа на Киев воена и друга помош од повеќе милијарди долари, а исто така и воведоа неколку рунди санкции кон Русија.
За време на неговиот состанок со сенаторите Бен Кардин (Демократ-Мериленд), претседател на влијателниот Комитет за надворешни односи на Сенатот, Ден Саливан (републиканец-Алјаска), Кристофер Марфи (демократ-Конектикат) и претставникот Грегори Микс (демократ од Њујорк), Зеленски рече дека ги информирал американските пратеници за моменталната ситуација на конфликтот и за потезите на Русија.
„Одлучувачка акција сега би можела да го забрза праведниот крај на руската агресија против Украина следната година. Нашиот план за победа ќе помогне да се доведе Русија до мир во пракса. Сега, на крајот на годината, имаме вистинска можност да ја зајакнеме соработката меѓу Украина и САД“, соопшти Зеленски на Телеграм по состанокот.
Зеленски, кој треба да зборува на Генералното Собрание на ОН на 25 септември, а потоа да разговара со американскиот претседател Џо Бајден во Белата куќа на 26 септември, имаше билатерални средби на маргините со германскиот канцелар Олаф Шолц, индискиот премиер Нарендра Моди и Јапонскиот премиер Фумио Кишида.
Во интервју за ABC News што треба целосно да биде објавено на 24 септември, Зеленски рече дека само „силната позиција“ ќе и овозможи на Украина да го доведе рускиот претседател Владимир Путин „да ја запре војната“.
„Мислам дека сме поблиску до мирот отколку што мислиме. Поблиску сме до крајот на војната“, рече Зеленски во делови од интервјуто.
Иако Русија окупира околу 20 отсто од територијата на Украина и напредува кон стратешки важниот центар Покровск во источниот регион Доњецк, Киев ја изненади Москва, започнувајќи упад во западниот руски регион Курск минатиот месец и заземајќи десетици села на руска почва.
Шведска го обвини Иран за испраќање пораки со повик за одмазда за палењето на Куранот
Шведските власти соопштија дека Иран стои зад илјадниците СМС пораки испратени до луѓе низ земјата во кои се повикува на одмазда за палењето на Куранот, во 2023 година.
Властите во Стокхолм тврдат дека иранската паравоена Револуционерна гарда успеала да испрати околу 15 000 СМС пораки на шведски јазик, поради серијата на јавни палења на Куранот.
Обвинителот Матс Љунгквист рече дека прелиминарната истрага, спроведена од шведската агенција за внатрешна безбедност САПО, покажала дека „иранската држава, преку иранскиот Корпус на исламската револуционерна гарда, хакирала податоци на шведска компанија која води големи СМС услуги“.
Шведската компанија не е именувана, а иранските власти не ги коментираа наводите.
„Во август 2023 година, шведските медиуми објавија дека голем број луѓе во Шведска добиле пораки на шведски јазик со кои се повикуваат на одмазда против оние кои го запалиле Куранот, рече Љунгквист, додавајќи дека испраќачот на пораките е „група која себеси се нарекува Тим Анзу“.
Протестите се одржаа во согласност со слободата на говорот заштитена со шведскиот Устав и беа одобрени од полицијата.
Покренато обвинение за убиството на девојчето Данка Илиќ од Србија
Вишото јавно обвинителство во Заечар на 24 септември покрена обвинение против Дејан Драгијевиќ и Срѓан Јанковиќ за убиството на девојчето Данка Илиќ кај Бор во источна Србија, беше потврдено за Радио Слободна Европа (РСЕ).
Според соопштението на обвинителството за РСЕ, Драгијевиќ и Јанковиќ се товарат за „тешко убиство во соизвршителство“, како и за „непријавување на делото“ и „помагање на сторителот по извршувањето на делото“.
Данка Илиќ исчезна на 26 март пред куќа во населбата Бањско Поље кај Бор, а нејзиното исчезнување првпат го активираше системот „Најди ме“, односно „Амбер Алерт“ во Србија, кој итно ја известува јавноста за исчезнувањето на дете.
Полицијата во Србија во април соопшти дека се уапсени две лица осомничени дека го убиле девојчето.
Министерот за полиција на Србија Братислав Гашиќ на прес-конференцијата изјави дека осомничените вработени во јавното претпријатие „Водовод“ во Бор со автомобил ја удриле Данка и нејзиното тело го фрлиле во депонија. Според него, тие на 26 март биле на службена должност во Бањско Поље.
Иако полицијата тогаш соопшти дека осомничените го признале делото, Вишото јавно обвинителство Зајечар во јули соопшти дека осомничениот за убиството на двегодишното девојче негирал дека го сторил делото.
И ова обвинителство претходно соопшти дека од службеното возило на ЈКП „Водовод“ одземени се над 500 траги за кое полицијата се сомнева дека го управувале двајцата осомничени кога ја удриле девојката.
„Досега вештачењата покажаа дека нема трага од ДНК на Данка Илиќ, како во самиот автомобил, така и на надворешните делови на возилото“, соопшти обвинителството во јули.
Полицијата во Србија се уште не го пронашла телото на девојчето.
Рускиот претставник во ОН доби медал од Вучиќ за противењето на Резолуцијата за Сребреница
Претседателот на Србија Александар Вучиќ во Њујорк му го врачи Орденот на српското знаме од прв степен на постојаниот претставник на Русија во Обединетите Нации, Василиј Небензја и Орденот на српското знаме од втор степен на неговите заменици во ОН, Ана Јевстињева и Марија Жболочкаја.
Вучиќ на социјалната мрежа Инстаграм напиша дека Србија се заблагодарува „за помошта што ни ја пруживте овде во Њујорк, за време на дискусијата за Резолуцијата за геноцидот во Сребреница“ и дека се надева на натамошно зајакнување на соработката меѓу Србија и Русија.
„Тоа беше многу тешка работа, многу го ценам тоа и секогаш можете да го очекувате истото од нас“, напиша Вучиќ на Инстаграм вечерта на 23 септември.
Вучиќ претходно во Њујорк изјави дека ќе ги почести претставниците на земјите „кои беа на страната на Белград“ при усвојувањето на резолуцијата за Сребреница во Генералното собрание на Обединетите Нации во мај.
„Гледам дека некои полудеа затоа што им оддаваме чест на луѓето кои го штитеа меѓународното право и ја заштитуваа Србија. Ова е наша работа и наш внатрешен чин“, им рече Вучиќ на новинарите во Њујорк на 23 септември пред 79-та седница на Генералното собрание на Обединетите Нации.
„Секако, тука се Русите и Кинезите, и Никарагва и Мексико и Бразил, Индија, Обединетите Арапски Емирати, Конго, во зависност од нивото на поддршката“, додаде Вучиќ.
Во мај, Генералното собрание на ОН усвои Резолуција со која 11 јули се прогласува за Меѓународен ден на сеќавање на геноцидот во Сребреница. Во геноцидот во Сребреница, извршен во јули 1995 година од страна на припадниците на Армијата на Република Српска, беа убиени најмалку 8372 Бошњаци.
За Резолуцијата гласаа 84 земји, 19 беа против, меѓу кои Русија и Кина, додека 68 земји беа воздржани. Резолуцијата против која лобираше официјален Белград, меѓу другото го осудува негирањето на геноцидот и глорификацијата на воените злосторници.
Резолуцијата се повикува на фактите од пресудите на Меѓународниот кривичен суд за поранешна Југославија, Меѓународниот суд на правдата и домашните судови.
За геноцидот во Сребреница, повеќе од 50 лица беа осудени на околу 700 години затвор, меѓу кои и политичките и воените лидери на Република Српска, Радован Караџиќ и Ратко Младиќ.
Руски беспилотни и ракетни напади врз осум украински региони
Украинската воздушна одбрана собори 66 од 81 беспилотно летало лансирани од Русија во осум украински региони рано во вторник (24 септември), објави украинското воздухопловство на Телеграм, додавајќи дека Москва исто така користела четири проектили во раниот напад.
„Цел на Русија беа регионите Киев, Житомир, Черкаси, Виница, Кировохрад, Полтава, Суми и Миколаев“, соопштија военото воздухопловство.
Во исто време, властите на источниот регион Полтава известија дека во рускиот напад била оштетена енергетската инфраструктура.
Во меѓувреме, руското Министерство за одбрана соопшти дека нејзината воздушна одбрана уништила 13 украински беспилотни летала во текот на ноќта над регионите Белгород, Курск и Брјанск.
Мултимедија
Најпосетени
Што треба да знаете