Вести
„Сесрпски собор“ во Белград: Србија и Република Српска усвоија заедничка Декларација
Од молебен за Србија и Република Српска, преку декларацијата, до фолклор.
Така беше организиран „Сесрпскиот собор“ под името „Еден народ, еден собор – Србија и Српска“.
Со идеја да се потврди српското единство, оваа манифестација, најавена и како „голема фешта“, се одржа во саботата (8 јуни) во Белград.
Меѓу гостите беше и пратеникот во Собранието на Северна Македонија, Иван Стоилковиќ од Демократската партија на Србите во Македонија.
Се одржа и заедничка седница на владата на Србија и ентитетот Република Српска во Босна и Херцеговина на која беше усвоена Декларација за заштита на националните и политичките права и заедничката иднина на српскиот народ.
Како што рече српскиот претседател Александар Вучиќ, документот се однесува на Дејтонскиот договор и не се споменува разединување во Босна и Херцеговина.
Овој документ треба да биде одобрен од парламентите на Србија и на Република Српска во следните 90 дена.
Исто така, двете влади усвоија предлог за иницирање меѓународен конкурс за издигање споменици и меморијални центри посветени на жртвите од Јасеновац.
Соборот се одржува во време на засилена реторика на власта во Србија за „загрозување на српскиот народ“ поради усвојувањето на Резолуцијата за геноцидот во Сребреница во Обединетите нации, на што се спротивставија Белград и Бањалука.
На настанот учествуваа претседателот на Србија, Александар Вучиќ и претседателот на Република Српска, Милорад Додик, како и претставници од највисоките институции на Србија и Република Српска.
Покрај Стоилковиќ, имаше и други претставници на Србите од регионот, како Андрија Мандиќ, претседателот на Парламентот на Црна Гора и пратеникот Милан Кнежевиќ.
Присутни беа и претставници на Српската листа, најголемата партија на косовските Срби поддржана од официјален Белград.
На соборот учествуваа и патријархот на Српската православна црква (СПЦ) Порфирије и други црковни великодостојници.
Соборот почна во храмот Свети Сава со молебен, како што беше речено, за Србија и за Република Српска.
Потоа функционерите, како и патријархот и црковните великодостојници, се преселија во Палатата Србија, каде се одржаа состаноци и заедничката владина седница.
Што кажаа Вучиќ и Додик?
Претседателот на Србија, Александар Вучиќ, на заедничката седница изјави дека зборовите во Декларацијата се внимателно избрани и дека „нема збор за разединување“ во Босна и Херцеговина.
Документот, рече тој, се однесува на Дејтонскиот договор, кој ја дефинираше Босна и Херцеговина како држава на два ентитета – Федерацијата БиХ и Република Српска и дистриктот Брчко.
Тој додаде дека се испочитувани „одредени барања на Република Српска“, бидејќи, како што наведе, „не можеме ние да бидеме тие што ќе им кажеме на жителите на Република Српска дека подобро ги разбираме нивните проблеми“.
Вучиќ рече дека Србија „никогаш нема да ја остави Република Србија на цедило“.
„Вие ги донесувате вашите одлуки, јас само ве замолувам милион пати да размислите колку ни треба мир на сите. Моето барање е да се обидете да ги решите проблемите во мир и разговори и во согласност со Дејтонскиот договор“, додаде тој.
Претседателот на Србија рече дека „многу е важно да им подадеме рака на Бошњаците на секое место“.
Вучиќ рече дека во Декларацијата се зборува и за Косово и за почитување на резолуцијата 1244.
„Но, ние јасно зборувавме и за дијалогот како суштински начин за решавање на проблемот меѓу нас и Албанците. Нема друго решение освен дијалогот“, додаде тој.
Според неговите зборови, Декларацијата јасно зборува за европската перспектива, но има и точка која зборува за зачувување на традиционалните пријателства.
Зборувајќи за Резолуцијата за геноцидот во Сребреница, која беше усвоена во ОН, Вучиќ рече дека никој не дал одговор на прашањето дали таа донесе помирување во Босна и Херцеговина и во регионот. Тој оцени дека „некому донесе радост, а на други гнев и бес“.
Претседателот на Република Српска, Милорад Додик изјави дека „нема да се откаже“ 15 февруари, кој е Ден на српската државност, да се одбележува како ден на Република Српска.
Тој додаде дека ќе останат посветени на фактот дека Република Српска е создадена на 9 јануари и соодветно ќе го одбележуваат тој ден. Денот на Република Српска, кој се одбележува на 9 јануари, Уставниот суд на Босна и Херцеговина три пати го прогласи за неуставен.
„Република Српска беше задоволна со автономијата што ја доби преку Дејтонскиот договор, но тоа е доведено во прашање. Босна и Херцеговина не може да продолжи да го крши Дејтон, подобро е да живеете како добри соседи отколку да бидете трајно скарани дома“, рече Додик.
Тој додаде дека српскиот народ сака мир.
Додик оцени дека Декларацијата за заштита на националните и политичките права и заедничката иднина на српскиот народ е историски документ кој ги рехабилитира српските национални интереси.
„Декларацијата даде одговори на многу предизвици за тоа што треба да правиме во иднина“, рече тој.
И Додик се осврна на Резолуцијата на ОН за геноцидот во Сребреница.
„Ние не сме геноциден народ и оваа резолуција не нè засега во смисла на тоа дека треба да ја спроведеме“, рече Додик.
Резолуцијата, која беше усвоена од Обединетите нации на 23 мај, го прогласува 11 јули за Меѓународен ден на сеќавање на геноцидот во Сребреница и го осудува негирањето на геноцидот и глорификацијата на воените злосторници.
види ги сите денешни вести
Англија и Холандија во полуфиналето на ЕП 2024
Фудбалските репрезентации на Англија и Холандија се пласираа во полуфиналето на Европското првенство.
Во саботата прво Англија на пенали ја совлада Швајцарија, откако резултатот на крајот од регуларниот дел од натпреварот беше 1:1 (Сака 80' / Емболо 75'), па бидејќи ниту една екипа не постигна гол во продолжението, беа изведувани пенали.
Благодарение на промашениот пенал на Швајцарците, Англичаните славеа во Дизелдорф Арената, во истоимениот германски град.
Во вториот четвртфинален натпревар на ЕП 2024 Холандија ја победи Турција со резултат 2:1. Иако Турцја поведе во 35 минута со голот на Акајдин, во второто полувреме резултатот го израмни Де Вриј, а шест минути подоцна Мулдур си постигна автогол.
Претходно во полуфиналето се пласираа селекциите на Шпанија и Франција.
Вонреден конгрес на Алтернатива, Зеќирија Ибрахими избран за нов претседател
Партијата Алтернатива од албанскиот блок денеска во Куманово одржа вонреден изборен конгрес, на кој делегатите го избраа Зеќирија Ибрахими - досегашниот генерален секретар, за нов претседател.
Околу 500 делегати беа на Конгресот за нов претседател, откако досегашниот Африм Гаши поднесе оставка од лидерската позиција и беше назначен за претседател на Собранието.
„Секој делегат има право да предложи, потребно е да има поддршка од десет отсто од вкупниот број на делегати и секој е потенцијален кандидат за претседател на партијата, изјави потпретседателот на партијата, Амир Елези пред почнувањето на конгресот.
На конгресот присуствуваат претставници од политички партии кои се дел од владиното мнозинство.
Партијата Алијанса за Албанците - Алтернатива се подели на две крила – едното на Арбен Таравари, кој сега е во владината коалиција и другото на Зијадин Села кое е дел од коалицијата Европски фронт предводена од ДУИ.
Ваквиот раскол настана во пресрет на парламентарните и претседателските избори закажани за 24 април (прв круг претседателски) и 8 мај 2024 (втор круг претседателски и парламентарни).
Јавноста сведочеше на јавни конфронтирања, паралелни конгреси, партиски одлуки од двата табори.
Таборот на Таравари потоа се приклучи на опозицскиот блок во кој се Беса на Биљал Касами, Алтернатива на Африм Гаши и Демократското движење на Изет Меџити. Тие ја формираа коалиција „Вреди“, која е сега дел од владината коалиција со која се ВМРО-ДОМНЕ, Вреди и ЗНАМ.
Се предаде осомничениот за жртвите во стампедо на собир во Индија
Организаторот на верски настан во индиската држава Утар Прадеш, каде пред четири дена загинаа повеќе од 120 луѓе, и се предал на полицијата, пренесе Ројтерс.
Пред предавањето на главниот осомничен Девпракаш Мадукар, се вели дека полицијата понудила награда од 1.200 долари за информации што ќе доведат до негово апсење.
Мадукар е осомничен дека незаконски организирал настан со 250.000 учесници, бидејќи властите издале дозвола за собир на само 80.000 луѓе.
Најмалку 121 лице загинаа во стампедо на митинг во селото Могал Гархи минатиот вторник, кога голем број луѓе побрзаа да го допрат проповедникот Бола Баба.
Индиските медиуми објавија дека голем број луѓе, од кои повеќето жени и деца, паднале во отворена канализација во близина на местото на собирот.
Полицијата соопшти дека организаторите на настанот не им пружиле помош на повредените и дека се обиделе да го прикријат инцидентот со криење на облеката и обувките кои луѓето ги изгубиле во стампедото.
Истрагата е во тек додека полицијата трага по Боле Баба.
Русија додаде уште двајца новинари на листата „странски агенти“
Руското Министерство за правда додаде уште двајца независни новинари, Олесија Герасименко и Сергеј Јежов, на својата листа на „странски агенти“.
Герасименко работи за „Verstka“ - независна онлајн публикација за вести основана во април 2022 година од група независни руски новинари.
Јежов е истражувачки новинар во „The Insider.“
Адвокатот Григориј Вајпан, заменикот од Санкт Петербург и ЛГБТ активист Сергеј Трошин и поранешниот општински заменик во Санкт Петербург, Фјодор Уткин, исто така беа додадени на списокот „странски агенти“.
Русија го користи својот закон за „странски агенти“ од 2012 година за да ги етикетира и казнува критичарите на владините политики.
Бајден најави дека не се откажува од кампањата за реизбор
Претседателот Џо Бајден се бореше да го задуши бунтот меѓу некои демократи кои го туркаат да се откаже од кампањата за реизбор по лошиот настап во дебатата, ветувајќи дека останува во трката.
Во жестокиот говор пред приврзаниците во Висконсин на 5 јули и во интервју за ABC News, Бајден тврдеше дека тој е најдобриот демократски кандидат за да го спречи републиканецот Доналд Трамп да ја врати Белата куќа на изборите на 5 ноември.
Настапот на Бајден на неговата дебата со Трамп на 27 јуни предизвика сериозна загриженост кај некои демократи за неговата ментална острина и издржливост на 81-годишна возраст.
Има движење во партијата за да го убеди да се повлече, при што критичарите предупредуваат дека се соочува со речиси сигурен пораз и дека може да ги повлече и другите демократи со себе.
Демократите во Претставничкиот дом и група сенатори се очекува да се состанат на оваа тема кога ќе се вратат во Вашингтон следната недела.
Некои анкети на јавното мислење покажаа дека Трамп ја зголемил предноста по дебатата, а анкетата на Ројтерс/Ипсос покажа дека секој трет демократ сака Бајден да се откаже од трката.
Бајден го отфрли движењето во петокот.
„Имавме мала дебата минатата недела. Не можам да кажам дека тоа беше мојот најдобар настап. Но, оттогаш има многу шпекулации. „Што ќе прави Џо? Дали ќе остане во трката? Дали ќе се откаже? " - изјави Бајден.
„Па, еве го мојот одговор: трчам и повторно ќе победам“.
Молдавија, Романија и Украина потпишаа договор за борба против руските дезинформации
Молдавија, Романија и Украина потпишаа заеднички договор за соработка за борба против руските дезинформации.
Договорот беше потпишан за време на трилатералниот состанок на министрите за надворешни работи на трите земји во главниот град на Молдавија, Кишињев, на 5 јули.
Украинскиот министер за надворешни работи Дмитро Кулеба за новинарите по состанокот изјави дека рускиот „хибриден воен арсенал“ се користи не само против Украина, која Москва ја нападна во февруари 2022 година, туку и против Молдавија.
Средбата меѓу Кулеба и министрите за надворешни работи на Молдавија и Романија, Михаи Попсои и Луминита Одобеску, беше трет трилатерален собир од 2022 година.
Петмина загинати во руски напад врз Доњецк, Украина ги одбива нападите со дронови
Воздухопловните сили на Украина соопштија дека одбиле уште еден бран напади со беспилотни летала насочени кон 12 региони рано на 6 јули, откако регионален официјален претставник изјави дека Москва лансирала наведувани бомби во регионот на Доњецк, при што загинале најмалку пет лица и ранети се неколку други.
„Ноќта на 6 јули, непријателот гаѓаше со 27 беспилотни летала Шахед“, се вели во пораката на воздухопловните сили на својот канал Телеграм.
Украинските системи за противвоздушна одбрана „успеаа да соборат 24 беспилотни летала во регионите Дњепропетровск, Полтава, Запорожје, Херсон, Харкив, Доњецк, Суми, Чернихив, Виницја, Киев, Кировохрад и Миколајев“, соопштија од воздухопловните сили.
Одделно, официјални лица во регионот Суми, северно од главниот град Киев, изјавија дека руските беспилотни летала го прекинале напојувањето на локалниот водоводен систем, предизвикувајќи привремен прекин на водоснабдувањето.
Украинската државна телевизија во меѓувреме објави неколку експлозии во градот Суспилне, североисточно од главниот град Киев.
На 5 јули, руските војници лансираа две наведувани воздушни бомби врз градот Селидово во источниот регион Доњецк, при што загинаа најмалку пет лица, а беа повредени уште осум, изјави на Телеграм началникот на воената администрација на регионот, Вадим Филашкин.
Во меѓувреме, во рускиот регион Краснодар, два магацини за нафта се запалија, а една кула за мобилни телефони беше оштетена поради напад со дрон ноќта на 6 јули, соопшти оперативниот штаб на регионот, обвинувајќи ја Украина за нападот.
Британскиот премиер го назначи кабинетот, Ривс е прва министерка за финансии
По убедливата изборна победа на лабуристите, новиот британски премиер Кир Стармер го именуваше кабинетот.
Анџела Рајнер е назначена за вицепремиер и државен секретар за домување и заедници.
Рејнер, висок функционер на лабуристите, треба да игра клучна улога во поттикнувањето на владината агенда за социјалната еднаквост и реформите за домување.
Рејчел Ривс влезе во историјата со тоа што стана првата жена на чело на британското Министерство за финансии. Во својата 800-годишна историја, првата позиција во британското Министерство за финансии никогаш не ја имала жена.
„Чест е да бидам назначен за канцеларка на финансии. Економскиот раст беше мисија на Лабуристичката партија. Сега е национална мисија“, рече Ривс.
Дејвид Лами е избран за нов министер за надворешни работи.
„Шивотна чест е да се биде назначен за државен секретар за надворешни работи, прашања на Комонвелтот и развој. Светот се соочува со огромни предизвици, но ние ќе се исправиме на оваа прилика со огромната сила на Обединетото Кралство. Ќе ја поврземе повторно Британија заради нашата безбедност и просперитет“, напиша Лами на платформата X.
Лами ќе го замени Дејвид Камерон на чело на британската дипломатија.
Ивет Купер е назначена за министерка за внатрешни работи, чија задача е да ја надгледува домашната безбедност, имиграцијата и законот и редот.
Џон Хили ќе ја извршува функцијата секретар за одбрана и е одговорен за одбранбената стратегија на земјата и за вооружените сили.
На изборите одржани во четвртокот лабуристите освоија 34 отсто од гласовите, што е два отсто повеќе од претходните избори.
Конзервативната партија, која владееше со земјата во последните 14 години, претрпе голем пораз: освоија 24 отсто од гласовите, што е за 20 отсто помалку од изборите во 2019 година.
Како и на последните избори, Либерал-демократите освоија 12 отсто, додека Реформа ОК, десничарска популистичка партија, освои 14 отсто, односно 12 отсто повеќе од последните избори. Зелените освоија седум отсто, што е четири отсто повеќе од претходните избори.
Сепак, поради мнозинскиот систем од една област на изборите во Обединетото Кралство, процентот на освоени гласови не одговара на освоените места во 650-члениот парламент.
Според досега објавените резултати, лабуристите освоиле 411 места, конзервативците 119, либералдемократите 71, реформи во Велика Британија четири и Зелените четири.
Унгарија го откажа состанокот со Германија
Унгарија ја откажа средбата на министрите за надворешни работи на таа земја и на Германија закажана за 8 јули во Будимпешта, соопшти денеска унгарското Министерство за надворешни работи.
Од Министерството изјавија дека станува збор за техничка, а не политичка причина.
„Поради непредвидена промена на календарот на министерот Петер Сијарто, побаравме посетата да се одржи подоцна, се надеваме во блиска иднина“, се вели во соопштението на министерството на 6 јули.
Министерството за надворешни работи на Германија соопшти дека е изненадено од откажувањето и дека е неопходна дискусија за посетата на унгарскиот премиер Виктор Орбан на Москва.
На 5 јули, Орбан се сретна со рускиот претседател Владимир Путин како дел од, како што рече, мировната мисија за ставање крај на војната во Украина.
Неколку дена претходно тој се сретна со украинскиот претседател Володимир Зеленски во Киев, додека неговата посета на Русија доаѓа пет дена откако Унгарија го презеде претседавањето со Европската унија (ЕУ).
Шефот на унгарската дипломатија Петер Сијарто беше со Орбан во Русија.
„Мировната мисија продолжува. Втора станица: Москва“, напиша Орбан на платформата Х.
На средбата со Орбан во Кремљ, Путин изјави дека верува оти унгарскиот лидер некако дејствува во име на ЕУ.
Тој исто така рече дека очекува Орбан да го претстави ставот на европските партнери за ситуацијата во Украина и дека е подготвен да разговара за нијансите на мировните предлози.
Посетата на Орбан на Русија наиде на критики од дипломатите на ЕУ.
Високиот претставник на ЕУ за надворешни работи осеп Борељ изјави дека Орбан во Москва не го претставува Брисел и дека во прашање се билатералните односи меѓу Унгарија и Русија.
Околу 6.000 луѓе се евакуирани поради пукање на брана во Кина
Околу 6.000 луѓе се евакуирани по пукање на брана на езерото Донгтинг во централна Кина, јави новинската агенција Ксинхуа.
Кинеското Министерство за вонредни ситуации испрати повеќе од 800 луѓе, 150 возила и десетици чамци во провинцијата Хунан за да помогнат во спасувачката операција.
Засега нема информации за можни жртви од поплавата што се случи попладнето на 5 јули.
Водата од езерото се излеа на куќи и земјоделски површини во блиското село.
Кинеските власти соопштија дека се во процес на санирање на последиците и санирање на оштетените објекти.
Мултимедија
Најпосетени
Што треба да знаете