Вести
Столтенберг смета дека НАТО мора да го зголеми производството на оружје
НАТО мора да го зголеми производството на оружје бидејќи војната во Украина продолжува и потребите на Киев растат, рече генералниот секретар на Алијансата, Јенс Столтенберг во интервју за ББЦ објавено на 1 јануари.
Западните земји мора да бидат подготвени да обезбедат долгорочна поддршка на Украина, бидејќи Русија не покажува знаци на попуштање, истакна секретарот на НАТО.
Јенс Столтенберг смета дека воената поддршка ќе обезбеди опстанок на Украина како суверена земја и ќе ја принуди Русија да преговара за крај на војната.
„Мораме да го зголемиме производството и токму тоа го прават сојузниците“, изјави лидерот на воената алијанса од 30 нации.
НАТО, исто така, мора да биде подготвен да ја поддржи Украина на долг рок, смета Столтенберг.
„Она што го видовме е дека Русија не покажува знаци на повлекување и нејзината главна цел е да ја преземе контролата врз Украина. Украинските сили имаа замав веќе неколку месеци, но ние исто така знаеме дека Русија мобилизира многу повеќе сили, многу од нив сега се обучуваат“, истакна тој.
Според Столтенберг, сето тоа укажува дека Русија е подготвена да ја продолжи војната и потенцијално да се обиде со нова офанзива.
„Веројатно и оваа војна ќе заврши на преговарачката маса, но одлучувачки фактор за исходот од таквите разговори беше силата на Украина на бојното поле“, рече тој.
Тој нагласи дека на раководството во Киев е да одлучи под кои услови ќе седнат на преговарачка маса.
Претходно, рускиот претседател Владимир Путин одржа новогодишен говор во кој се обиде да добие поддршка на руските војници кои се борат во Украина, велејќи дека иднината на земјата е загрозена. Украинскиот претседател Володимир Зеленски пак го обвини Путин дека се крие зад неговите војници, наместо да ги води.
Руската воена инвазија врз Украина почна на 24 февруари минатата година, а резултираше со голем број убиени и ранети, како и милиони расселени лица низ Украина и надвор од нејзините граници.
види ги сите денешни вести
Состанок на министрите за надворешни работи на НАТО во Брисел
Министрите за надворешни работи на НАТО на 3 април треба да го отворат дводневен состанок во Брисел на кој ќе разговараат за зајакнување на одбранбените капацитети на Алијансата, бидејќи европските членки се соочуваат со зголемен притисок од САД да трошат повеќе за одбраната.
Генералниот секретар на НАТО, Марк Руте, рече дека состанокот се одржува во „особено клучно време за нашата заедничка безбедност, со предизвици премногу големи за кој било од нас да ги поднесе сам“.
Руте инсистираше на тоа дека Соединетите Држави се посветени на Алијансата и покрај критиките дека американскиот претседател Доналд Трамп ги поткопува трансатлантските односи.
„Знам дека имаше нешки муабети. Знам дека има сојузници, на пример, од оваа страна на барата кои се загрижени за долгорочната посветеност на САД во НАТО. Американците постојано изјавуваа: „Ние сме посветени на НАТО. Ние сме посветени на членот 5“, рече Руте, мислејќи на ветувањето за колективна одбрана на алијансата и додаде:
„Апсолутно сум убеден дека овој сојуз е таму за да остане со САД. Нивната посветеност е апсолутно јасна“, рече Руте.
Сојузниците на НАТО се решени да претстават обединет фронт за да се спротивстават на целосната инвазија на Русија на Украина, но европските сојузници чувствуваат дека нивните напори се маргинализирани.
Во потрага по брз договор за прекин на огнот, Вашингтон сугерираше дека Украина можеби ќе треба да направи територијални отстапки и презеде чекор за повторно започнување на дијалогот со Русија.
Американскиот државен секретар Марко Рубио се очекува да присуствува на состанокот заедно со украинскиот министер за надворешни работи Андриј Сибиха и шефицата за надворешна политика на Европската Унија Каја Калас.
Рубио може да очекува да се соочи со прашања од сојузниците кои се вознемирени, лути и збунети од потезите на администрацијата на Трамп да ги поправи врските со Русија и нејзините реторички напади врз долгогодишните трансатлантски партнери.
Врз основа на она што го виделе и слушнале откако Трамп ја презеде функцијата во јануари, европските претставници изразија длабока загриженост за идната улога на САД во Алијансата.
Рубио, исто така, најверојатно ќе биде притиснат да ја објасни желбата на Трамп да ја направи НАТО сојузникот- Канада 51-та држава на САД и неговиот притисок да го анектира Гренланд, кој е автономен во рамките на Кралството Данска, која е друг сојузник на НАТО.
Рубио треба да пристигне во Брисел на 3 април. Со него на патувањето ќе биде и новопотврдениот амбасадор на САД во НАТО, Мет Витакер. Се очекува тој да ја пренесе пораката дека европските сојузници треба да ги засилат трошоците за одбрана и споделување на товарот.
Водачите на НАТО во јуни се очекува да одлучат дали да ја зголемат целта на трошоците за одбрана за секоја поединечна членка од нејзиниот сегашен минимум од 2 отсто од бруто домашниот производ (БДП).
Администрацијата на Трамп ја промовираше идејата за минимумот од 5 проценти од БДП. Руте се залага секој сојузник да се обврзе да потроши најмалку 3,7 отсто од БДП за одбрана што е можно побрзо и со редовни извештаи за напредокот.
Некои европски сојузници нема да бидат подготвени да се посветат премногу на одбраната, со оглед на тоа што се борат со низок раст и со големиот буџетски дефицит.
Се очекува Сибиха да обезбеди ажурирање за ситуацијата на бојното поле.
Додека членството на Украина во НАТО засега не е на маса, повеќето европски сојузници сакаат барем да добијат гаранции дека американското оружје ќе продолжи да оди во Украина и дека мисијата за обука на НАТО за украинските војници продолжува да работи.
Сепак, Соединетите Држави повеќе не претседаваат со Контакт групата за одбрана на Украина, позната како Рамштајн група, која ја координира воената поддршка за Киев. Обединетото Кралство претседаваше со последниот состанок на групата во февруари, а со наредниот, кој е привремено закажан за 11 април, би можеле да биде копретседаваат Обединетото Кралство и Франција.
Трамп воведува основна царина од 10 отсто за целиот увоз во САД, за Северна Македонија 33 отсто
Американскиот претседател Доналд Трамп во средата изјави дека ќе воведе основна царина од 10 отсто за целиот увоз во САД и повисоки царини за некои од најголемите трговски партнери на земјата, проширувајќи ја на тој начин трговската војна што започна по враќањето на Белата куќа.
Огромните царини ќе покренат нови бариери во најголемата светска економија, поништувајќи ја децениската либерализација на трговијата што го обликуваше глобалниот поредок. Од другите земји се очекува да одговорат со контрамерки кои би можеле да доведат до драматично повисоки цени.
„Тоа е наша декларација за независност“, рече Трамп на настан во дворот на Белата куќа со порака: „Конечно ја ставаме Америка на прво место“.
На настанот Роуз Гарден, Трамп покажа табла на која се прикажани новите царини за повеќето земји - од 10 проценти до 49 проценти.
Меѓу земјите кои се на листата со нови царини се Србија со царина од 37 отсто, Босна и Херцеговина со 35 отсто и Северна Македонија со 33 отсто.
Трамп рече дека трговските дефицити повеќе не се само економски проблем, тоа е, како што рече, „национална вонредна состојба“.
„Во многу случаи, пријателот е полош од непријателот кога е во прашање трговијата. Ние субвенционираме многу земји и ги одржуваме“, рече Трамп за трговските партнери, особено Мексико и Канада.
Трамп воведува царини од 20 отсто за Европската Унија, додека за Велика Британија одреди 10 отсто и за Швајцарија 31 отсто.
Тој предвиде царини од 34 отсто за Кина, 32 отсто за Тајван, 25 отсто за Јужна Кореја и 24 отсто за Јапонија. Тој воведе највисоки царини за Камбоџа - 49 отсто, додека за Виетнам предвиде 46 отсто.
Администрацијата на Трамп претходно објави официјално соопштение дека одвоениот сет на царини за увоз на автомобили што Трамп го објави минатата недела ќе стапи на сила на 3 април, а Трамп веќе воведе царини за челик од 20 отсто на сите производи во вредност од 150 милијарди долари.
Неговите советници велат дека царините ќе го вратат стратешки виталниот производствен капацитет на САД.
Економистите предупредуваат дека царините може да ја забават глобалната економија, да го зголемат ризикот од рецесија и да ги зголемат трошоците за живот на просечното американско семејство за илјадници долари.
Загриженоста за царините веќе ја забави производствената активност ширум светот, истовремено зголемувајќи ја продажбата на автомобили и други увезени стоки, бидејќи потрошувачите брзаат да ги купат пред да се зголемат цените.
Во исто време, на финансиските пазари владееше нестабилност додека инвеститорите ја чекаа објавата на Трамп. Американските акции изгубија речиси пет трилиони долари во вредност од февруари.
Мицкоски и Филипче утре на средба во Владата
Премиерот, Христијан Мицкоски и лидерот на опозициската СДСМ, Венко Филипче утре во 14 часот ќе имаат средба во Владата.
-Согласно јавната комуникација и упатените иницијативи и демонстрираната подготвеност од двете страни, за утре во 14 часот е закажана средба меѓу премиерот Христијан Мицкоски и претседателот на СДСМ, Венко Филипче – соопшти попладнево владината прес служба.
Во изјава за медиумите во Штип, Мицкоски искажа подготвеност за средба со Филипче, кој денеска повика на политички и општествен дијалог.
Филипче на прес-конференција рече дека по трагедијата во Кочани граѓаните реагираа со револт и бес, системот не функционира како што треба, а за тоа вина, како што посочи, имаат сите политички партии.
Областите каде што треба системски пристап, според Филипче се - образование, здравство, правосудство, животна средина, партизација и политизација.
По неговата денешна прес конференција, од Движењето ЗНАМ реагира преку писмено соопштение во кое обвинија дека „СДСМ и Филипче немаат политички кредибилитет, ниту легитимитет да нудат какви било концепти за Македонија овој момен.
- Оттука, Венко Филипче и СДСМ не можат да бидат решение на проблемите, бидејќи покажаа дека тие се проблем за секое решение, наведуваат од ЗНАМ.
-Дали самопрогласениот лидер на опозицијата со ова бара начин да се факторизира како политички фактор во јавноста и да седне на преговарачка маса, имајќи ја в предвид очајната состојба на неговата партија – се наведува во реакцијата на ЗНАМ.
Во меѓувреме, прашан за повикот на Филипче за средба, премиерот Мицкоски кажа дека ова е сериозна тема за која се разговара.
„Доколку навистина има план и желба да помогне стојам на располагање во секое време ќе го прераспределам мојот распоред, на полноќ на полноќ, после полноќ, кога ќе каже тогаш да го сослушам неговиот план и да видиме дали во тој план може нешто да се реши“, изјави Мицкоски.
ДУИ: Јавноста е згрозена од јавниот флерт на Мицкоски и Филипче
По најавата за средба, ДУИ во писмено соопштение изрази силна загриженост, поради како што велат од партијата, „сѐ понагласената моноетничка доминација која Власта ја демонстрираше во првата година од своето владеење“.
-Сега веќе на јавна сцена ја вклучува и етничката македонска опозиција во својата намера. Јавноста е просто згрозена од овој јавен флерт на Мицкоски и Филипче, за полноќни средби во политички интимна атмосфера на која ништо помалку туку ќе се крои планот за нов општествен договор за регулација на идните политички текови – велат од ДУИ.
Според партијата, Република Северна Македонија претставува „препознатлив модел на функционална мултиетничка демократија со јасно изразена евроатлантска ориентација“.
Основниот модел на мултиетничкиот карактер на земјата е системски загрозен, а загрозен а и интегративниот процес на земјата во Европската унија. Тоа се две клучни стратешки основи кои што сериозно ја загрозуваат долгорочната стабилност и просперитет на земјата, и тоа се двата приоритети за кои треба да се отвори суштински политички дијалог – додаваат од ДУИ.
Азири: Мицкоски ќе се сретне со претседателот на најголемиот огранок на ВМРО-ДПМНЕ, Филипче
Реакција пристигна и од потпретседалот на Алијанса за Албанците, Елми Азири:
„Претседателот на ВМРО-ДПМНЕ Христијан Мицкоски ќе се сретне со претседателот на најголемиот огранок на ВМРО-ДПМНЕ, Венко Филипче! Откако беше избран за претседател на СДСМ, првата средба му беше со претседателката на државата, г-ѓа Силјановска-Давкова! Последниов веќе неколку години од ВМРО го нарекуваат министер за смрт! Оваа моноетничка средба е практична имплементација на платформата Македонија повторно твоја“, вели Азири.
Мицкоски по повикот на Филипче: На располагање сум во секое време за средба
Премиерот, Христијан Мицкоски вели дека е подготвен на средба со лидерот на опозициската СДСМ, Венко Филипче доколку, како што изјави денеска, навистина има план и желба да помогне.
По денешниот повик од Филипче за политички и општествен дијалог Мицкоски одговарајќи на новинарско прашање рече дека стои на располагање во секое време и ќе го усогласи распоредот за да го слушне планот на Филипче и да се види дали во тој план може нешто да се реши.
„За мене е малку непристојно да разговараме преку медиуми, реков доколку има план како што најавија, подготвен сум да го примам на средба пртседателот на СДСМ да го образложи планот, да го слушнеме планот бидејќи се сериозни времиња, јас сум сериозен човек, сериозни работи се во прашање и најмалку што треба да се прави е естрада на јавна сцена“, изјави Мицкоски.
Тој додаде дека доколку Филипче навистина има план и желба да помогне, тој стои на располагање во секое време ќе го прераспредели својот распоред.
„На полноќ на полноќ, после полноќ, кога ќе каже тогаш да го сослушам неговиот план и да видиме дали во тој план може нешто да се реши. Но, доколку планот опфаќа пристап „Стабри“, како што беше во минатото за време на короната тогаш такви планови не можам да прифатам“, посочи Мицкоски за повикот од Филипче и дали ќе има лидерска средба со останатите претставници на партиите.
Прашан дали ќе имаат заеднички став со СДСМ околу изборот на в.д градоначалник на Кочани за да нема криза во градот по трагедијата со пожарот и оставката на градоначалникот Љупчо Папазов, рече не разговарале со советниците за потецијалнот кандидат, но оти апсолутно ќе се избере в.д градоначалник и оти тука нема дилема.
Претходно, лидерот на СДСМ Венко Филипче рече дека уште денеска или утре (2 и 3 април) ќе побара состанок со премиерот за да се организира таа средба.
Нагласи дека треба да се изготви стратегија во која ќе се влучат сите, во форма на политички дијалог, врз основа на која државата ќе функционира во следните децении, многу повеќе од мандат на која било влада и која било партија или коалиција да ја води таа влада.
Курти почна разговори со малцинските партии за формирање на новата влада
Вршителот на должноста премиер на Косово, како и претседател на Движењето Самоопределување, партијата која победи на парламентарните избори на 9 февруари во земјата, почна состаноци со малцинските политички партии за да се консултира за формирањето на новата влада.
Овој процес отпочна по потврдувањто на изборните резултати и почетокот на уставните рокови за формирање на законодавната власт и новата влада, додека претседателката на Косово, Вјоса Османи го одреди 15 април како датум за одржување на конститутивната седница на Собранието на Косово.
Косовскиот премиер, Албин Курти, изјави дека се сретнал со претседателката на Новата демократска партија (НДС) од бошњачката заедница, а воедно и вршител на должноста заменик на премиерот, Емилија Реџепи.
Според изјавата од канцеларијата на премиерот, Реџепи „ја потврдила својата целосна подготвеност да продолжи да соработува" со Движењето Самоопределување и да го поддржи Курти во неговите напори да формира нова влада.
Курти, исто така, се сретна со претседателот на Партијата за слобода, правда и опстанок од српската заедница, кој е и вршител на должноста министер за заедници и враќање, Ненад Рашиќ.
За време на разговорите, министерот Рашиќ ја потврди својата поддршка на премиерот Курти за формирање на нова влада и продолжување на соработката - се вели во соопштението од кабинетот на премиерот.
Движењето за самоопределување тврди дека може да обезбеди 61 глас потребен за формирање на нова влада во Косово.
Во меѓувреме, двете опозициски партии, Демократската лига на Косово и Алијансата за иднината на Косово, ја отфрлија можноста за заедничко владеење со Движењето Самоопределување, додека Демократската партија на Косово и Социјалдемократската иницијатива не поставија црвени линии за коалиции.
Ниту една политичка партија нема доволно гласови за да формира нова влада.
Движењето Самоопределување, како и трите други албански политички партии зад него, сметаат дека немнозинските заедници имаат десет гарантирани места во собранието.
„Науката (за)стана“: Протести во Белград и Нови Сад
Вработени во научноистражувачката дејност денеска (2 април) организираа протести во Белград и Нови Сад на повик на српскиот Синдикат на науката во знак на поддршка на студентите во блокада.
Протестите беа организирани под слоганот „Науката (за)стана“.
Претставници на Синдикатот на науката и на Мрежата на академска солидарност заедно со група граѓани и студенти се собраа пред платото кај Филозофскиот факултет во Белград.
Луѓето на собирот носеа транспаренти на кои меѓу другото пишуваше „Науката ви мавта со дипломите, нашите се вистински, а какви се вашите“ и „За враќање на академското достоинство“.
Претставник на неформалната организација Мрежа на академската солидарност, Оливер Тошковиќ, рече дека владата „живее во свет во кој позицијата е пред аргументот".
„Факт е дека оваа влада е подготвена да ја уништи и деформира научната активност во оваа земја само за да ни се одмазди лично и да нѐ понижи", рече Тошковиќ.
Собраните со 16-минутно молчење им оддадоа почит на загинатите при падот на настрешницата во Нови Сад. По молкот, тие се движеа низ централните улици на Белград до зградата на Владата на Србија.
Во Србија, десетици илјади граѓани со месеци излегуваат на улиците со клучно барање да се утврди кривичната и политичката одговорност за несреќата во Нови Сад, во која 15 лица загинаа при пад на настрешницата на главната железничка станица во градот, додека шеснаесеттата жртва им подлегна на повредите повеќе од два месеци подоцна.
Во фокусот на протестите се обвинувањата дека корупцијата довела до паѓање на настрешницата. Претставниците на властите ги отфрлија овие обвинувања.
Тројца пациенти од пожарот во Кочани се враќаат од Шведска и Грција
Тројца пациенти од повредените лица од пожарот во Кочани се враќаат во земјава, од кои двајца беа хоспитализирани во Грција и еден пациент во Шведска – соопшти Министерството за здравство денеска (2 април).
Согласно протоколите ќе бидат задржани под 24-часовен надзор.
Во Србија остануваат хоспитализирани 23 пациенти, Бугарија 14 паценти, Турција 10 пациенти, Грција 8 пациенти, Словенија 4 пациенти, во Унгарија, Хрватска, Шпанија, Австрија и Литванија се хоспитализирани по 3 пациенти, во Италија и Полска по еден пациент.
Во Скопје, на Клиниката за токсикологија вчера беше хоспитализиран пациент по враќање од Полска, истиот денеска се пушта на домашно лекување.
На Клиниката за пластична хирургија остануваат двајца пациенти, а во Хируршката клиника Св.Наум Охридски 6 пациенти.
Во ГОБ 8 Септември се хоспитализирани пет пациенти, од кои еден е планирано да биде пуштен на домашно лекување, на Клиниката за пулмологија двајца пациенти, а во приватната болница Систина се хоспитализирани тројца пациенти.
Ресорниот министер, Арбен Таравари вчера изјави дека засега во Северна Македонија се враќаат полесно повредените пациенти, што се рехабилитирани целосно. Од следната недела треба да се разговара за враќање на лицата кои беа потешко повредени во пожарот.
Филипче предлага нов концепт на општествен и политички дијалог
Лидерот на СДСМ Венко Филипче предложи нов концепт за општествен и политички дијалог. Како што рече на денешната прес-конференција, трагедијата во Кочани покажала дека системот не функционира како што треба, а за тоа како што посочи, вина имале сите политички партии.
Во однос на лидерската средба рече дека уште денеска или утре (2 и 3 април) ќе побара состанок со премиерот Христијан Мицкоски, за да се организира таа средба.
Според него областите каде што треба системски пристап се - образование, здравство, правосудство, животна средина, партизација и политизација.
„По големата трагедија во Кочани, ја видовме реакцијата на граѓаните, револт, на места и бес. Би рекол сосема оправдано, бидејќи тоа што во изминатите три децении, тоа што се нарекува реформи, тоа што се нарекува транзиција, очигледно не го даде посакуваниот резултат. Системот на многу места очигледно не фукционира како што треба. Јавните сервиси немаат перформанс каков што граѓаните заслужуваат. За тоа вина имаме сите политички партии, СДСМ, ВМРО-ДПМНЕ, ДУИ, другите политички партии“, рече Филипче.
Нагласи дека треба да се изготви стратегија во која ќе се влучат сите, во форма на политички дијалог, врз основа на која државата ќе функционира во следните децении, многу повеќе од мандат на која било влада и која било партија или коалиција да ја води таа влада.
Во однос на правосудството, предлага неминовно да се донесат реформската агенда во што пократок рок реформските закони во одреден систем во којшто ќе се постигне широк консензус не само политички, туки и други фактори од делот на правосудството на коишто ова навистина им е експертиза.
„Тоа што граѓаните најмногу ги иритира а тоа е партизацијата и политизацијата. Мора да ги ослободиме институциите од канџите на политиката и партијата за да младите луѓе имаат навистина добар, компетитивен мерит систем и на тој начин да се вработуваат и напредуваат поради тоа што само на тој начин можеме експертизата да ја издигнеме на соодветно и заслужено ниво“, истакна Филипче, додавајќи дека добро е на овие теми да седнат лидерите на сите партии.
Лидерот на СДСМ истакна дека на премиерот Христијан Мицкоски и подетално би му го образложил овој план на средба во следните денови. Во однос дали очекува неговиот предлог за лидерска средба да биде прифатен, тој рече дека уште денеска или утре (2 и 3 април) ќе побара состанок со премиерот Мицкоски, согласно агендите, за да се организира таа средба.
„Оставам простор и се надевам дека сега кога политичките партии ќе го слушнат ова ќе ја прифатат таа лидерска средба. Но добро е прво тоа да го поразговараме со премиерот, имајќи предвид дека тој прв подаде рака и на прва одговори дека средбата е прифатлива. Навистина не знам што би било неприфатливо или некој зошто не би сакал да разговара, кога тоа е констатација на секој еден граѓанин во државата“, рече Филипче.
На новинарско прашање дали на средбата ќе ја постави темата за евроинтеграции и уставни измени, рече дека најверојатно ќе се зборува и за таа тема.
Премиерот Христијан Мицкоски деновиве изјави дека тој е подготвен да разговара со Филипче, додавајќи дека лидерската средба е пресериозна тема за да се разговара преку медиуми.
Мицкоски: Милошоски и Филков имаа лош ден, Владата е стабилна
Премиерот Христијан Мицкоски изјави дека владината коалиција е стабилна, а јавното препукување меѓу пратеникот од ВМРО-ДПМЕ Антонијо Милошоски и министерот за правда Игор Филков од коалицискиот партнер ЗНАМ, според него, ќе застане на, како што вели, на овие два лични става.
„Владината коалиција е стабила. Пратеникот Антонијо Милошоски е член на Извршниот комитет на партијата, тој е дел од мојот најблизок периметар. Јас соработката со Антонијо Милошоски ја оценувам на највисоко ниво, тој е додадена вредност и во рамки на пратеничката група и во рамки на партијата. Министерот Игор Филков знам со какви проблеми се соочи, знам каква состојба затекна во Министерството за правда, континуирано на дневна основа соработуваме во делот на реформите, кои се многу важни посебно во секторот правда. Но, она што можев да го заклучам, а убеден сум дека сето ова ќе застане на овие два лични става е дека секој има право на лош ден, па така јас мислам дека тој лош ден и за едниот и за другиот завршува“, рече Мицкоски, по пуштањето на фабриката на „Магна мехатроникс“ во ТИРЗ Штип.
Прашан дали има проблеми со коалицијата Вреди во која е министерот за здравство Арбен Тараври кој предвои едно од крилата во Алијанса за Албанците, рече дека нема такво чувство и оти имаат исклучителна соработка.
„Не, немам такво чувство. Напротив, имаме исклучителна соработка. Граѓаните да бидат сигурни, Владата е стабилна, повеќе од две третини неофицијално, а официјално 78 пратеници ја поддржуваат оваа Влада. Граѓаните, според она што го гледам од анкетите даваат поддршка, огромно е позитивното мислење дека и Македонија се движи во позитивна насока и тоа претставува за нас инспирација да продолжиме понатаму да се движиме и да работиме“, рече Мицкоски.
Пратеникот на ВМРО-ДПМНЕ и потпретседател на Собранието, Антонијо Милошоски вчера во телевизиско гостување рече дека министерот за правда Игор Филков има слаб придонес во областа со која раководи. Посочи дека очекувал досега барем во нацрт верзија до Собранието да бидат доставени Предлог-законот за судови, Предлог-законот за судски буџет, Предлог законот за јавнообвинителската служба, новиот Кривичен законик...
Министерот за правда Филков, пак, во реакција на изнесените наводи на Милошоски рече дека „Кусурот на Груевски, познат под прекарот - Џуџето од Небрегово, а јавноста добро го памети по аферите поврзани со АМСМ и семејните бизниси од Кичево, изгледа дека сè уште нема навика да одговара пред граѓаните кои го избрале“.
„Бидејќи очигледно е неинформиран и изолиран од партијата, го упатувам во неговата матична партија или пак во Владата-можеби конечно ќе го известат за постапките, роковите и статусот на законите! И, бидејќи изгледа како некој што работи по туѓи наредби, за кого одработува во моментов? Дали се тоа интересите на граѓаните или некои други агенди? Во минатото е познат по Ванчо Михајловистички ставови, многу лаги и невистини. Ова е лош де-фокус на македонската јавност по двонеделниот „одмор“! Да го потсетам дека во парламентот е од 2011 година, откако се повлече од функцијата министер за надворешни работи и активно учествуваше во креирање на „канцерогениот“ правосуден систем. Сега е добар момент да се потсети јавноста дека токму тој директно учествуваше во процесот на донесувањето на штетните измени на КЗ во 2023 година, со што се спаси од одговорност за кривичното дело ,,Моќник”“, наведе Филков, набројувајќи ги законите на кои работел во изминатиот период.
По еднодневна пауза, Русија ги продолжува масовните напади врз Украина
Русија започна нови воздушни напади врз Украина по еднодневна пазуа од напади со дронови. Во регионот Запорожје, едно лице загинало, а две други се повредени, изјави во среда (2 април) на Телеграм регионалниот гувернер Иван Федоров.
Петнаесет беспилотни летала, исто така, го нападнале источниот град Харкив, при што биле повредени најмалку осум лица.
Украинските сили за цивилна одбрана соопштија дека биле погодени згради кои припаѓаат на цивилни фирми, а исто така била нанесена штета и на станбени области.
Откако Украина во вторникот ја доживеа првата ноќ без беспилотни летала во годината, воздушната одбрана на земјата извести дека Русија распоредила 74 дронови и мамки со беспилотни летала во текот на ноќта до среда наутро.
Нападите првенствено ги погодиле регионите Харкив, Доњецк и Одеса.
Во Москва, руското Министерство за одбрана тврдеше дека соборило 93 украински беспилотни летала во текот на ноќта, главно над пограничниот регион Курск.
Војувањето со беспилотни летала стана речиси секојдневна тактика во војната, иако размерите на уништување и жртви предизвикани од руските напади го надминуваат влијанието на украинските напади.
Украина се брани од руската инвазија повеќе од три години, потпирајќи се во голема мера на поддршката од Западот.
Мултимедија
Најпосетени
Што треба да знаете