Американскиот претседател Доналд Трамп во понеделникот (24 март 2025) објави дека наскоро ќе објави царини за автомобили, алуминиум и фармацевтски производи, истовремено воведувајќи секундарни давачки од 25 отсто за секоја земја што купува нафта или гас од Венецуела.

Говорејќи пред новинарите во Белата куќа, Трамп рече дека ќе воведе царини за автомобили, фармацевтски производи и алуминиум во „многу блиска иднина“, тврдејќи дека на САД ќе им требаат сите овие производи во случај на војни или други проблеми.

Тарифите за автомобилите ќе дојдат во следните неколку дена, изјави денеска Трамп, додавајќи дека ќе следат царини за граѓа и полупроводнички чипови.

Трамп предвидува дека секторските царини и реципрочните тарифи, што се очекуваат на 2 април, ќе соберат „прилично астрономски“ суми на пари за американскиот буџет, што ќе овозможи даночните стапки да останат ниски или да се намалат.

Трамп, кој рече дека земјите сè уште можат да ги избегнат царините ако ги намалат сопствените тарифи или го префрлат производството во Соединетите држави, исто така најави инвестиција од 21 милијарда долари во САД од страна на јужнокорејската групација Hyundai Motor Group во Белата куќа во понеделникот.

Зборувајќи заедно со претседателот на Хјундаи, Еуисун Чунг и гувернерот на Луизијана, Џеф Лаундри, тој рече дека инвестицијата ќе опфати нова фабрика за челик во Луизијана од 5,8 милијарди долари.

Трамп рече дека нема да бидат објавени сите нови царини на 2 април и посочи дека можеби „многу земји“ би можеле да бидат поштедени од тарифи, но не наведе детали.

Во следните 24 часа, односно максимум 36 часа, претседателот на државата ќе биде известен за името на мандатарот за нова влада, човек за кој мислиме дека треба да му се довери мандатот.

Ова денеска (3 април) го изјави претседателот на Српската напредна странка, Милош Вучевиќ.

Според него, партиските органи ќе донесат одлука за името на мандарот.

Неговата партија заедно со коалициските партнери со кои учествуваше на изборите е за формирање нова влада, а не за нови избори.

Видете и ова:

Во Србија почнуваат консултации за нова влада

Претседателот на Србија, Александар Вучиќ денеска ги продолжи консултациите за мандатот на новата влада што почнаа вчера.

Вучевиќ, по разговорите со Вучиќ, изјави дека имаат парламентарно мнозинство и сметаат дека има законски и легитимни услови да се избере нова влада до 18 април, односно до истекот на рокот што го дефинира законот по оставката на премиерот.

Доколку не се избере нова влада до 18 април на полноќ, кога истекува законскиот рок од 30 дена за избор на нов премиер и членови на владата, откако српскиот парламент ја констатира оставката на премиерот Милош Вучевиќ на 19 март, со што го прекина мандатот на целата влада, претседателот на државата е должен да го распушти Парламентот.

Министерството за здравство информира дека еден пациент од повредените лица од пожарот во Кочани, кој беше хоспитализиран во медицински центар во Австрија, денеска (3 април)се враќа во државава, по што согласно протоколите, ќе биде задржан под 24-часовен надзор.

Во државава се пристигнати и странски тимови за рехабилитација на пациентите.

„Со тоа, во странските медицински центри се третираат 80 пациенти, од кои двајца се третираат амбулантски, а нема промена во нивната состојба во однос на минатите денови. Инаку, во изминатото деноноќие на Клиниката за пластична хирургија е примен пациент кој е вратен од Грција и по неопходните испитувања, ќе биде пуштен на домашно лекување. Во моментов на оваа клиника се хоспитализирани тројца пациенти“, појаснуваат од ресорното министерство.

Изминатото деноноќие немало згрижени пациенти на Клиниката за токсикологија.

Видете и ова:

Навалица на институциите за обезбедување на противпожарна опрема

Како што информираат, во ГОБ „8 Септември“ се хоспитализирани тројца пациенти, а во „Свети Наум Охридски“ остануваат шестмина кои се хоспитализирани на одделение.

„Пристигнати се и тимови од странство со големо искуство во областа на рехабилитација на пациенти со изгореници кои во моментов прават евалуација на просторните услови, апаратурата во неколку центри за рехабилитација на пациенти со изгореници. Министерството за здравство останува во постојана комуникација со медицинските тимови во земјата и странство, посветено на обезбедување најдобра можна нега за секој еден од пациент од повредените од несреќата во Кочани“, се нагласува во денешното соопштение.

Видете и ова:

Преживеани од пожарот во романската дискотека „Колектив“ нудат помош на погодените од несреќата во Кочани

На Клиниката за пулмологија се хоспитализирани двајца пациенти, додека во приватните установи останува непроменета состојбата со бројот на хоспитализирани пациенти.

Во пожарот во дискотеата „Пулс“ во Кочани загинаа 59 млади луѓе, а околу 200 беа повредени. Повеќе од половина од повредените беа испратени на лекување во странски медицински центри.

Претставници на семејствата на жртвите од трагедијата во модуларната болница во Тетово изјавија дека се приклучуваат кон јавното писмо од иницијативата Нула до државниот јавен обвинител Љупчо Коцевски за обновување на истрагата за овој случај.

Според претставниците на семејствата, постојат сериозни докази кои сметаат дека Обвинителството ги има отфрлено во досегашната постапка пред судот во Тетово.

„Целата јавност знае дека постојат сериозни докази за пропусти при изградбата на модуларната болница кои можат да бидат единствени причини за пожарот. Тоа беше потврдено и со германското вештачење-независен и кредибилен доказ кој за жал беше отфрлен од обвинителството. Затоа, драг Љупчо, како наш сограѓанин од Тетово, Вие најдобро ја разбирате болката и гневот на семејствата на жртвите и на целата заедница. Ова не е само правно прашање. Ова е морална обврска кон тие што ги изгубивме, но и кон сите граѓани што денес живеат со страв дека ова може да се повтори, а никој нема да одговара“, изјави Агрон Арифи од Иницијативата, во име на семејствата на жртвите.

Семејствата на 14-те жртви бараат од Обвинителството да ја обнови истрагата за како што велат, вистинските виновници на пожарот во модуларната болница во Тетово.

„Време е некој да преземе одговорност. Време е правдата да излезе од фиока. Како семејства на загинатите, бараме од Вас: да формирате независен тим кој ќе ги испита сите аспекти на случајот, вклучително и евентуалното одолговлекување на постапката. Да гарантирате дека судската постапка ќе се води без политичко-бизнис влијание. Да обезбедите транспарентност и отчетност во Вашата работа, во согласност со законските обврски. Да го земете германското вештачење како клучен доказ во истрагата. Ние нема да молчиме. Ќе продолжиме да зборуваме за нашите најблиски кои ги изгубивме, за вистината, за правдата која е ветена, но никогаш донесена“, истакна Арифи.

Во Основниот суд Тетово денеска (3 април) продолжи доказната постапка во рамки на повторно судење за пожарот во модуларната болница во кое осомничени се двајцата поранешни директори на болница и Јавната здравствена установа Клиничка болница Тетово како правно лице.

Видете и ова:

Три години од несреќата во модуларната болница во Тетово, одговорност нема

На 5 јуни 2023 година Основениот суд Тетово одреди условна осуда за обвинетите директори Флорин Бесими и Артан Етеми за кривично дело „тешки дела против општата сигурност“, додека правното лице ЈЗУ Клиничка болница беше прогласено за виновно за делото „предизвикување општа опасност“ во судскиот процес по пожарот во модуларната болница во Тетово во 2021 година кога животите ги загубија 14 луѓе.

Судот тогаш одлучи да има ослободителна пресуда за докторот Бобан Вучевски и Клиничка болница за делото „непостапување по здравствени прописи“.

Според пресудата, на обвинетите Флорин Бесими и Артан Етеми им беше утврдена казна затвор од по една година и шест месеци, условна осуда и утврдената казна затвор дека нема да се изврши доколку обвинетите секој за себе во време од по три години нема да сторат ново кривично дело.

Правното лице требаше да плати парична казна во висина од еден милион денари, 30 дена по правосилност на пресудата.

Во пожарот во модуларната болница во Тетово животот го загубија 14 луѓе, а десетина лица беа повредени. Од 14-те луѓе кои починаа поради пожарот, 12 беа на болничко лекување таму, како заболени од Ковид-19, додека двајца беа членови на семејствата на болните.

Основното јавно обвинителство Скопје поднесе обвинителен предлог против 50-годишниот Зоран Јованов, татко на Васил Јованов, кој ја усмрти Фросина Кулакова во сообраќајната несреќа на булеварот „Партизански одреди“.

Јованов се товари за кривично дело-предизвикување општа опасност, бидејќи во периодот од ноември 2022 до јануари 2025 година свесно му дозволувал на својот син да управува возило пежо 207, иако знаел дека нема возачка дозвола и дека претходно направил повеќе сообраќајни прекршоци и кривични дела.

Според обвинението, Васил Јованов бил сторител на сообраќајна несреќа со полесни последици во ноември 2022 година, а во текот на 2023 и 2024 година сторил 11 сообраќајни прекршоци, меѓу кои возење без возачка дозвола, управување под дејство на алкохол и непочитување на сообраќајните правила.

Видете и ова:

Поднесено обвинение за сообраќајката во која загина Фросина Кулакова

Обвинителството смета дека таткото со своите постапки создал опасност за животот на луѓето, иако бил свесен за можните последици.

Младата Фросина беше прегазена на печашки премин на булеварот „Партизански одреди“ на 29 јануари, 15 минути пред полноќ. Јованов, како што соопшти ОЈО, управувал со возилото под дејство на алкохол и возел со речиси двојно поголема брзина од пропишаната.

Основното обвинителство до Кривичниот суд на 28 март достави обвинителен акт против Васил Јованов со кој се товари за тешки дела против безбедносната на луѓето и имотот и му е запретена максимална затворска казна од 20 години.

Инаку во текот на минатиот месец, граѓани неколку пати излегоа на протест излегоа на протест со порака „ Не умираме од несреќи, туку од корупција“. Тие бараа одговорност од институциите, суштински промени, во како што велат, корумпираниот систем и правда за жртвите загинати во сообраќајни несреќи.

Деловниот центар „Соравиа“ во центарот на Скопје е ставен на извршителска продажба закажана за 24 април годинава поради неисполнети финансиски обврски.

Почетната вредност на објектот е 1.377.978.526 денари или околу 22,4 милиони евра.

„Соравиа“ беше во фокусот на јавноста поради контроверзниот процес на промена на сопственичката структура на компанијата што го поседува атрактивниот објект – „Соравиа Инвест“ и влегувањето на внукот на Али Ахмети, Дрин Ахмети, кој оперираше со овој објект.

Дрин Ахмети, кој е основач и сопственик на „Тор индустрис“, компанијата која го купи трговскиот центар „Соравија“, во март годинава преку соопштение информираше дека ќе се повлече од раководна функција. Според соопштението од „Тор индустрис“, новите сопственик е американската компанија „Тексас американ интернешенал холдингс“.

Видете и ова:

Дрин Ахмети без вложен денар станува косопственик на „Соравија“

Продажбата на деловниот објект од 1307 метри квадратни е по барање на долг од 930 илјади евра, чиј доверителот е „Прва инвестициска банка“ од Софија, Бугарија, согласно Договор за залог од септември 2022 година. Јавната усна лицитација, како што е објавено на веб страната на Комора за извршители, ќе се одржи на 24 април во канцеларијата на извршителот Андреја Буневски.

Почетната цена за објектот е 1.377.978.526 денари односно околу 22.406.000 евра, а на јавното наддавање можат да учествуваат само лица кои претходно положиле гаранција која изнесува 1/10 (една десеттина)од утврдената вредност на недвижноста, односно износ од 137.797.853 денари или околу 2,2 милиони евра.

Студенти и членови од академската заедница на Србија тргнаа со велосипеди од Нови Сад во акција „Тур д Стразбур“ со цел дополнително да ги информираат европските претставници за ситуацијата во Србија, која се соочува со криза по бранот протести по трагедијата на железничката станица во Нови Сад во ноември лани.

Со нив заминаа и новинари од неколку белградски медиуми. За патувањето студентите ќе објавуваат на социјалните мрежи.

Во новата акција 80 студенти со велосипед ќе пристигнат до Стразбур за да им се обратат на претставниците на Советот на Европа, Европската Унија, Европскиот парламент и Европската комисија.

Голем број граѓани утринава подготвија испраќање за студентите кои ќе ја возат првата делница до Суботица, а потоа преку Будимпешта, Братислава, Виена, Линц и Улм планираат да пристигнат во Стразбур на 17 април.

„Нашата иницијатива е насочена кон две важни европски институции - Советот на Европа и Европската Унија, организации што играат клучна улога во поддршката на демократијата, човековите права и владеењето на правото“, велат тие.

Видете и ова:

„Науката (за)стана“: Протести во Белград и Нови Сад

Тие претходно се обратија до ПССЕ, Комесарот за човекови права, Директоратот за човекови права и достоинство и Комитетот на министри, пред Европскиот парламент и Европската комисија и очекуваат нивното патување да предизвика реакција кај високи претставници на ЕУ.

„Се обидуваме да допреме до поголем број луѓе во странство, за да слушнат повеќе за нас и да добијат поддршка однадвор затоа што сè уште ни е потребна. Бидејќи ја пропатувавме цела Србија, веруваме дека беше клучно луѓето лично да не запознаат и да ја разберат нашата мисија и цел, па веруваме дека и таму ќе не сфатат сериозно откако решивме да започнеме на овој начин“, изјавија тие.

Трасата е поделена на неколку етапи, од кои секоја е долга приближно 100 километри.

Европската Унија мора да покаже единство и сила во одговорот на царините воведени од САД, изјавија германските министри за економија и финансии.

„Силата на Европа е нашата сила. Ние го имаме најголемиот единствен пазар во светот и мора да го искористиме тоа“, рече министерот за економија Роберт Хабек.

Министерот за финансии Јорг Кукис, исто така, ја истакна потребата од решителен одговор на ЕУ, но во исто време истакна дека блокот е отворен за преговори.

„Би било наивно да се мисли дека работите ќе се подобрат ако само седиме и гледаме. Очекувам силен одговор од Европската Унија“, изјави Кукис за Би-Би-Си, додавајќи дека „вратата за договор останува отворена“.

Видете и ова:

Трамп воведува основна царина од 10 отсто за целиот увоз во САД, за Северна Македонија 33 отсто

Американскиот претседател Доналд Трамп синоќа (2 април)воведе царини од 20 отсто за стоките од ЕУ кои се увезуваат во САД.

Претседателката на Европската комисија, Урсула фон дер Лајен остро ги критикуваше новите царини, предупредувајќи дека тие ќе имаат „катастрофални последици“ за економијата и милиони луѓе ширум светот.

Таа најави дека ЕУ веќе подготвува контрамерки и го нагласи европското единство и одлучност.

Бројот на загинати од разорниот земјотрес во Мјанмар надмина 3.000, а стотици други се водат како исчезнати, додека прогнозите за несезонски дожд претставуваат нов предизвик за спасувачите и хуманитарните работници.

Земјотресот со јачина од 7,7 степени според Рихтеровата скала што го погоди Мјанмар пред шест дена, еден од најсилните во оваа југоисточна азиска земја овој век, го потресе регионот во кој живеат 28 милиони луѓе, уривајќи згради, израмнувајќи ги заедниците, а многумина останаа без храна, вода и засолниште, пишува Ројтерс.

„Бројот на загинати во средата се искачи на 3003, со 4515 повредени и 351 исчезнати“, соопшти амбасадата на Мјанмар во Јапонија во објава на Фејсбук.

Условите би можеле да станат потешки откако се предвидува несезонски дожд од недела до 11 април да ги загрози областите најтешко погодени од земјотресот, како што се Мандалеј, Сагаинг и главниот град Најпидау.

Видете и ова:

Земјотрес од 7,7 степени го погоди Мјанмар, се урна висококатница во Бангкок

„Дожд доаѓа и има уште толку многу затрупани. А особено во Мандалеј, ако почне да врне, луѓето кои се под урнатините ќе се удават дури и ако преживеале до овој момент“, изјави хуманитарец во Мјанмар за Ројтерс.

Досега имало 53 авионски префрлувања на помош во Мјанмар, се додава во соопштението од амбасадата во Јапонија, додека повеќе од 1900 спасувачи пристигнале од 15 земји, вклучувајќи ги соседите и Кина, Индија и Русија.

Речиси седум дена по земјотресот, спасувачите во соседен Тајланд проверија „планина од урнатини“ за преживеаните откако се урна облакодер во изградба во главниот град Бангкок.

Спасувачите користат машини и булдожери за да разбијат 100 тони бетон и да ги лоцираат сите преживеани по уривањето на облакодер во кој загинаа 15 луѓе, а 72 се водат како исчезнати.

Во Тајланд загинаа вкупно 22 лица.

Израелската војска синоќа (3 април) започнала воздушни напади врз сириските градови Дамаск, Хомс и Хама, а цел беа истражувачки центар и воени локации.

Израелскиот напад го погодил Центарот за научно истражување во резиденцијалната област Барзех во сирискиот главен град Дамаск, при што беа ранети неколку луѓе.

Израелската војска ја нападнала и воздухопловната база Хама во централна Сирија, гаѓајќи ја нејзината инфраструктура, додека дроновите продолжиле да летаат над градот. По израелските воздушни напади, службите за итни случаи веднаш се упатиле кон аеродромот, со извештаи за жртви, вклучително и мртви и ранети.

Израелските сили гаѓале складишта со оружје и муниција, како и воени авиони во воздухопловната база Хама. Нападите биле насочени и кон возила во близина на аеродромот и воени позиции долж патот Мисјаф-Хама, соопштија локални извори додавајќи дека бројот на израелските воздушни напади надмина 15, а базата сега е опишана како речиси целосно уништена.

Видете и ова:

Израел ги напаѓа Газа, Либан, Сирија, заканувајќи се дека повторно ќе разгори војна

Во Хомс, локалните медиуми објавија силни експлозии во близина на воениот аеродром Т4 во предградието на Хомс, кој израелскиот Канал 12 го наведе како една од целите.

Напредокот на Израел во Дара наиде на отпор од локалното население. Истовремено со оваа ескалација, локални извори објавија за израелски напад со неколку оклопни возила во шумата на браната Џабалија во западниот дел на провинцијата Дара. Израелската артилерија, исто така, го обнови гранатирањето на областа околу ридот Тал Џуму, лоциран помеѓу градот Нава и селото Цил во западната провинција Дара. Изворите рекоа дека израелското гранатирање било насочено кон шумската област на браната Цил и околината на ридот Тал Џуму.

Видете и ова:

Израел ги проширува копнените операции во Газа „за да го уништи“ Хамас

Според сириските медиуми, 10 цивили биле убиени во израелски напад врз Хорш ал-Џибајлех во западниот дел на Дара. Уште 10 цивили се ранети и пренесени во болницата Нава.

Сириското Министерство за надворешни работи објави соопштение во кое ја осудува израелската агресија насочена кон воздухопловната база Хама. Тие соопштија дека бомбардирањето довело до „речиси целосно уништување“ на базата, додавајќи дека резултатот бил десетици воени и цивилни жртви.

Дамаск нагласи дека агресијата го крши и „меѓународното право и суверенитетот на Сириската Арапска Република“.

Израелските напади се дел од пошироката шема на агресија врз воени локации откако различни фракции го соборија долгогодишниот претседател Башар ал Асад. Израел распореди војници долж тампон зоната во Голанската висорамнина, додека премиерот Бенјамин Нетанјаху повика на демилитаризација на јужна Сирија, во близина на сириската Голанска висорамнина окупирана од Израел.

Министрите за надворешни работи на НАТО на 3 април треба да го отворат дводневен состанок во Брисел на кој ќе разговараат за зајакнување на одбранбените капацитети на Алијансата, бидејќи европските членки се соочуваат со зголемен притисок од САД да трошат повеќе за одбраната.

Генералниот секретар на НАТО, Марк Руте, рече дека состанокот се одржува во „особено клучно време за нашата заедничка безбедност, со предизвици премногу големи за кој било од нас да ги поднесе сам“.

Руте инсистираше на тоа дека Соединетите Држави се посветени на Алијансата и покрај критиките дека американскиот претседател Доналд Трамп ги поткопува трансатлантските односи.

„Знам дека имаше нешки муабети. Знам дека има сојузници, на пример, од оваа страна на барата кои се загрижени за долгорочната посветеност на САД во НАТО. Американците постојано изјавуваа: „Ние сме посветени на НАТО. Ние сме посветени на членот 5“, рече Руте, мислејќи на ветувањето за колективна одбрана на алијансата и додаде:

„Апсолутно сум убеден дека овој сојуз е таму за да остане со САД. Нивната посветеност е апсолутно јасна“, рече Руте.

Сојузниците на НАТО се решени да претстават обединет фронт за да се спротивстават на целосната инвазија на Русија на Украина, но европските сојузници чувствуваат дека нивните напори се маргинализирани.

Во потрага по брз договор за прекин на огнот, Вашингтон сугерираше дека Украина можеби ќе треба да направи територијални отстапки и презеде чекор за повторно започнување на дијалогот со Русија.

Американскиот државен секретар Марко Рубио се очекува да присуствува на состанокот заедно со украинскиот министер за надворешни работи Андриј Сибиха и шефицата за надворешна политика на Европската Унија Каја Калас.

Рубио може да очекува да се соочи со прашања од сојузниците кои се вознемирени, лути и збунети од потезите на администрацијата на Трамп да ги поправи врските со Русија и нејзините реторички напади врз долгогодишните трансатлантски партнери.

Врз основа на она што го виделе и слушнале откако Трамп ја презеде функцијата во јануари, европските претставници изразија длабока загриженост за идната улога на САД во Алијансата.

Видете и ова:

Зеленски: Партнерите на Украина ќе разговараат за распоредување странски војници

Рубио, исто така, најверојатно ќе биде притиснат да ја објасни желбата на Трамп да ја направи НАТО сојузникот- Канада 51-та држава на САД и неговиот притисок да го анектира Гренланд, кој е автономен во рамките на Кралството Данска, која е друг сојузник на НАТО.

Рубио треба да пристигне во Брисел на 3 април. Со него на патувањето ќе биде и новопотврдениот амбасадор на САД во НАТО, Мет Витакер. Се очекува тој да ја пренесе пораката дека европските сојузници треба да ги засилат трошоците за одбрана и споделување на товарот.

Водачите на НАТО во јуни се очекува да одлучат дали да ја зголемат целта на трошоците за одбрана за секоја поединечна членка од нејзиниот сегашен минимум од 2 отсто од бруто домашниот производ (БДП).

Видете и ова:

ЕУ размислува за заедничко финансирање на одбраната

Администрацијата на Трамп ја промовираше идејата за минимумот од 5 проценти од БДП. Руте се залага секој сојузник да се обврзе да потроши најмалку 3,7 отсто од БДП за одбрана што е можно побрзо и со редовни извештаи за напредокот.

Некои европски сојузници нема да бидат подготвени да се посветат премногу на одбраната, со оглед на тоа што се борат со низок раст и со големиот буџетски дефицит.

Се очекува Сибиха да обезбеди ажурирање за ситуацијата на бојното поле.

Додека членството на Украина во НАТО засега не е на маса, повеќето европски сојузници сакаат барем да добијат гаранции дека американското оружје ќе продолжи да оди во Украина и дека мисијата за обука на НАТО за украинските војници продолжува да работи.

Сепак, Соединетите Држави повеќе не претседаваат со Контакт групата за одбрана на Украина, позната како Рамштајн група, која ја координира воената поддршка за Киев. Обединетото Кралство претседаваше со последниот состанок на групата во февруари, а со наредниот, кој е привремено закажан за 11 април, би можеле да биде копретседаваат Обединетото Кралство и Франција.