Вести
Полицискиот час не го почитувале 502 граѓани
Министерот за внатрешни работи Наќе Чулев денеска изјави дека мерките и препораките на Владата, генерално се почитуваат од страна на граѓаните.
„Тие се совесни и свесни за комплексноста на состојбата во која се наоѓаме и за важностана почитување на мерките во овој исклучитлено важен момент и период за сите нас“, рече Чулев.
Според него, надлежните институции вршат приспособување на објектите кои ќе бидат наменети за граѓаните кои нема да ги почитуваат мерките за изолација и самоизолација, а кои ќе бидат сместени согласно одлуките на Владата во карантин на сопствена сметка.
Влада: Државните карантини се безбедни и строго контролирани
Чулев истакна дека мерката за ограничување на движењето од донесувањето на 22 март, не ја почитувале вкупно 502 граѓани, од нив 459 лица се на возраст од 18 до 67 години. Досега приведени се 199 лица, а 136 лица се опоменати за непочитување на полицискиот час.
Чулев информираше дека се поднесени 123 кривични пријави за непочитување на мерката за забрана за движење. Од почетокот на мерките до сега има 1.620 решенија за изолација, а за нивно прекршување се поднесени 123 кривични пријави.
види ги сите денешни вести
Почина една од тешко повредените во несреќата во Нови Сад
Почина една од повредените при падот на настрешницата на железничката станица во Нови Сад, потврди за Радио Слободна Европа в.д. директорката на Клиничкиот центар во Војводина, Весна Туркулов.
Таа е 15-та жртва на трагедијата што се случи на 1 ноември.
„Станува збор за девојката кое беше најтешко повредена. И покрај сите напори на лекарите од Клиничкиот центар Војводина, таа почина“, изјави Весна Туркулов.
Во уривањето на настрешницата на железничката станица во Нови Сад на 1 ноември, на лице место загинаа 14 лица, додека три беа тешко повредени.
Настрешницата се урна откако зградата на Железничката станица во Нови Сад беше свечено отворена во јули 2024 година по тригодишна реконструкција.
Изведувач беше кинескиот конзорциум CRIC&CCCC („China Railway International Co.Ltd“ и „China Communications Construction Company Ltd“), додека за стручен надзор беа ангажирани шест компании од Србија и Унгарија.
По притисокот на јавноста, министерот за градежништво, транспорт и инфраструктура на Србија, Горан Весиќ, на 5 ноември поднесе оставка.
Обвинителството во Нови Сад досега сослушало 71 лице, но засега никој не е лишен од слобода.
Во Нови Сад беа организирани неколку протести на кои граѓаните побараа кривично гонење на одговорните за трагедијата.
Последниот протест во форма на шестчасовна сообраќајна блокада се одржа денеска (17 ноември).
Повеќе загаден воздух - повеќе предвремено родени бебиња
Вкупно 604 предвремено родени бебиња имало лани во Северна Македонија. Оваа година, досега, бројот e 681, соопшти заменик министерот за здравство, Јовица Андовски.
Еден од ризик факторите за предвремено породување е загадениот воздух. Ова го истакна директорката на Клиниката за гинекологија и акушерство (ГАК), д-р Ирена Алексиоска Папестиев, на денешната прес-конференција, по повод Светскиот ден на предвремено родените бебиња - 17 Ноември.
„Се повеќе податоци од литературата говорат дека дефинитивно има влијание загадениот воздух, за да дојде до предвремени породувања, при што потоа овие пациентки ќе станат дел од интензивната нега“, рече Алексиоска Папестиев.
Ризик фактори, вели, се и возраста на жената, инфекции, како и повеќеплодова бременост.
„Денес современата жена прво ја реализира кариерата, а потоа се посветува на завршување на репродуцијата. Еден од ризик факторите е токму ова бременоста после 35 годишна возраст. Тоа е така затоа што во таа возраст, кај мајката веќе постојат коморбидитети на некои органи, кои нас гинеколозите не приморуваат предвремено да ја терминираме бременоста, за да ја заштитиме мајката“, посочи Алексиоска Папестиев.
Подем на прееклампсија
Планот е оваа година клиниката да се фокусира најмногу на прееклампсијата, бидејќи во последните две децении се бележи континуиран пораст, дури до 25 %, на ова мултиорганско заболување кое се карактеризира со покачен крвен притисок.
Тоа е, како што рече директорката на ГАК, резултат на зголемување на старосната граница на родилките.
Пет до осум отсто од трудниците можат да добијат прееклампсија. Од 16 илјади раѓања во државата, 800 до 1.280 пациентки имаат ризик за појава на преекламспија.
За да се превенира предвремената бременост, во ГАК од крајот на оваа година ќе почне пилот студија за бесплатна скрининг програма за детектирање на пациентки кои што би развиле прееклампсија.
Во употреба е пуштен и интраклинички транспортен респираторен апарат за респираторна вентилација.
„Тоа значи дека самите недоносени бебиња додека да пристигнат до интензивно одделение ќе бидат навремено, во текот на првиот час од раѓањето, соодветно респираторно третирани“, рече Алексиоска Папестиев.
Заменик министерот за здравство Јовица Андовски, информираше дека статистиките кои од 2017 година покажуваа смртност на над 21 процент, годинава се намалени на 6,7 проценти, односно 2 проценти во прочистената перинатална смртност.
„Беше изгласан мастер планот за регионализација на перинаталната здравствена заштита, и овој мастер план е многу значаен, затоа што во него точно се утврдени траекторијата и начинот на превоз на високо ризичните бремени жени од која било точка, на територија на државата до Клиниката за гинекологија и акушерство“, рече заменик министерот.
Тој очекува со овој мастер план во иднина стапката на смртност понатаму да се намалува.
„Подем“ и на честичките ПМ2,5
Во меѓувреме, идни мајки со кои разговараше Радио Слободна Европа се шокирани од податокот од Обединетите нации, дека секој деветти смртен случај кај новороденчиња во Северна Македонија е заради загаден воздух.
Државата со години е на европскиот врв по загаден воздух, но за животна средина се издвојуваат само 0,8 отсто од буџетот. Скопје беше меѓу десетте најзагадени градови во светот, но единствената мерка е бесплатен јавен превоз кога воздухот е најзагаден.
Освен Скопје, меѓу најзагадените градови се и Тетово и Битола, каде мерните станици често покажуваат високи концентрации на честичките ПМ2,5 кои се меѓу најопасните загадувачи.
Сепак, бројни анализи и упатени во проблемот укажуваат дека воздухот е загаден речиси во секое населено место, со концентрации на ПМ2,5 и други загадувачки материи кои редовно ги надминуваат нивоата поставени од ЕУ и Светската здравствена организација.
Шолц: Ставот на Путин за војната во Украина не е променет
Германскиот канцелар Олаф Шолц рече дека неговиот разговор со Владимир Путин во петокот (15 ноември) не дава индикации за промена на размислувањето на рускиот претседател за војната во Украина, но ја брани неговата одлука да се јави во Кремљ.
Шолц изјави дека вреди да се разговара со Путин за да се отфрлат сите илузии дека Западот ќе се откаже од поддршката за Украина, говорејќи на аеродромот во Берлин денеска (17 ноември), непосредно пред да замине на самитот на Г20 во Бразил.
Осврнувајќи се на претстојното враќање на Доналд Трамп на функцијата претседател на САД, додаде дека исто така не би било добро Вашингтон да биде во редовен контакт со Путин, додека ниту еден европски лидер не е.
„Разговорот беше многу детален, но придонесе да се сфати дека малку се променило во ставовите на рускиот претседател за војната – и тоа не е добра вест“, изјави Шолц за новинарите.
Германскиот канцелар ја потврди поддршката на неговата земја за Украина, велејќи дека без Киев нема да се донесе одлука за прекин на војната со Русија.
„Украина може да смета на нас“ и „нема да се донесе одлука зад грбот на Украина“, рече канцеларот.
Германскиот канцелар разговараше телефонски со рускиот претседател Владимир Путин на 15 ноември, барајќи од лидерот на Кремљ да ја прекине војната против Украина и да преговара со Киев за „праведен и траен мир“.
Кремљ соопшти дека разговорот бил воден „на иницијатива на германската страна“. Путин, како што е наведено, му рекол на Шолц дека сите договори за Украина „треба да започнат од новата територијална реалност и што е најважно, да ги елиминираат основните причини за конфликтот“.
Ова беше прв разговор меѓу германскиот и рускиот лидер од декември 2022 година.
Украинскиот претседател Володимир Зеленски предупреди дека повикот на Шолц до Путин е „Пандорината кутија“ што може да му помогне на рускиот претседател „да ја олесни својата изолација, изолацијата на Русија и да се вклучи во конвенционални преговори кои нема да завршат со ништо“.
Трет ден демонстрантите го запоседнаа собранието во Абхазија
Ситуацијата останa тензична и денеска (17 ноември) во грузискиот отцепен регион Абхазија, поддржан од Русија, при што самонаречениот претседател рече дека не е постигнат компромис со опозицијата.
Според информациите, демонстрантите сè уште се наоѓаат во зградата на парламентот во главниот град Сухуми, каде што упаднаа на 15 ноември во знак на протест поради инвестицискиот договор со Москва.
Де факто лидерот на регионот, Аслан Бжанија, вчера (16 ноември) изјави дека ќе поднесе оставка откако демонстрантите ќе го напуштат комплексот. Меѓутоа, подоцна истиот ден, тој се состана со неговиот кабинет во неговиот роден град Тамиш за да разговара за „начините за стабилизирање на ситуацијата што настана“.
Имаше стравувања од ескалација на насилството среде упадот во парламентот, кој уследи по неколкунеделните тензии во регионот чија независност Москва ја поддржува по петдневната војна против грузиските сили во 2008 година поради друга отцепена грузиска провинција, Јужна Осетија.
Опозициските лидери побараа не само трајно откажување од предложениот договор со Русија за кој противниците велат дека неправедно ќе го отвори пазарот за недвижнини за богатите Руси, туку и оставка на Бжанија и на неговиот потпретседател и премиерот на отцепеното раководство.
Бжанија, поранешен началник на службата за државна безбедност на Абхазија, им рече на своите поддржувачи на 16 ноември дека „се врши огромен притисок врз членовите на парламентот, така што парламентот донесе незаконска одлука за разрешување на претседателот“.
Но, тој предупреди дека „сценариото од 2014 година нема да се повтори“, повикувајќи се на еден од двата случаи кога лидерите на Абхазија поднесоа оставки поради протестите на опозицијата.
Министерството за внатрешни работи на Абхазија и службата за безбедност изјавија дека ќе ги почитуваат наредбите на претседателот.
Демонстрантите изјавија дека окупацијата не била насочена кон блиските врски на Абхазија со Русија, туку против Бжанија, кого го обвинија дека „се обидува да ги искористи овие односи за свои себични интереси [и] манипулирање со нив заради зајакнување на неговиот режим“.
Руската државна новинска агенција ТАСС го цитираше претставникот на демонстрантите, Адгур Арџинба, кој рече дека тие ќе останат на своите места додека претседателот не поднесе оставка.
Москва на 15 ноември соопшти дека со загриженост ја следи „кризната ситуација“ и ги повика руските граѓани да избегнуваат патување во Абхазија.
Извори: РСЕ Грузиски сервис и Ројтерс
Герасимовски: Малолетници обиле па возеле багер во Капиштец
Во текот на изминатата ноќ, во паркот во скопската населба Капиштец каде што се изведуваат реконструктивни работи, малолетни лица обиле багер, го стартувале и управувале и предизвикале штета на паркирано возило, информираа од Општина Центар.
Општината вели дека уништени се и каблите за системот за наводнување и направена е значителна материјална штета, додавајќи дека „направен е увид, а истрагата продолжува“.
Ова е втор ваков инцидент во овој реон, откако пред неколку месеци беше обиен и ограбен комуналниот пункт на Општината, потсетуваат од Центар.
Во објавата на социјалните мрежи апелираат до родителите да разговараат со своите деца за последиците од ваквите постапки, бидејќи „јавното добро е за сите нас“.
„Преминати се сите граници! Оштетен е јавен и приватен имот. Нарушена е безбедноста и јавниот ред. Не смее да се дозволи уништување на јавниот и приватен имот. Ваквото однесување мора да запре пред да се случи и нешто полошо. Повикувам на свест и одговорност“, порача градоначалникот на Центар, Горан Герасимовски.
Општината во јули објави видео снимки доставени од граѓани, на кои се гледаат сцени во кои млади лица уништуваат реквизити на детско игралиште во истата населба.
Градоначалникот тогаш побара засилено присуство на полицијата на терен, а во разговор со Радио Слободна Европа (РСЕ) најави и дека тим правници од Центар заедно со стручни лица ќе состави предлог законски измени во Законот за семејство и законите за основно и средно образование, но и дека можни се и предлог измени на членови на други закони.
Општината планира да постави камери на одредени детски игралишта и пофреквентни локации каде навечер има вандализам. Состаноците со педагози, психолози и универзитетски професори, ќе бидат насока за почеток на кампања за подигнување на јавната свест кај децата и родителите, изјави Герасимовски во јули.
И претходно игралиштето во Капиштец беше мета на вандали за што пишуваше РСЕ во ноември минатата година. Дел од реквизитите беа уништени само два месеца по реновирањето.
Шестчасовна блокада во Нови Сад поради несреќата на железничката станица
Во Нови Сад, денеска (17 ноември) напладне започна протест на кој граѓаните бараат кривично гонење на одговорните за смртта на 14 лица по уривањето на настрешницата на Железничката станица во тој град.
Граѓаните се собраа на крстосница во близина на железничката станица, за трет по ред протест во Нови Сад, по трагедијата што се случи на 1 ноември.
Тага, бес, беспомошност
Славица Цревар од Нови Сад за Радио Слободна Европа (РСЕ) вели дека Србија станала „земја на стравот“. Дошла со надеж дека тоа ќе се промени.
„Не верувам во судството, навистина не верувам во институциите на овој систем. Верувам дека вистината ќе излезе еден ден кога овој систем ќе падне“, вели таа.
Јанко Фејди, активист од Нови Сад, дошол на собирот за да им оддаде почит на загинатите.
„Мислам дека сите присутни граѓани овде дојдоа токму поради таа причина, да им оддадат почит на оние луѓе кои буквално со глава ја платија најголемата цена за алчноста и корупцијата“, рече Фејди.
Тој додаде дека она што се случи во Нови Сад на 1 ноември можело да се случи каде било во Србија.
„Луѓето прво треба да тргнат од себе, да знаат дека тоа можело да бидат тие или некој од нивните членови на семејството, пријателите... Тоа е доволен момент да ги 'мотивираме' да излезат, да кажат: Аман, веќе доста! Веќе нема да ни паѓаат настрешниците на глава“, вели Фејди.
Блокадата ќе трае од 12 до 18 часот, најавија организаторите од здруженијата „Став“ (Студентите против авторитарната власт) и „Свиќе“.
Како што соопштија од двете здруженија, со оглед на тоа што режимот се уште не одговорил на поставените барања, постепеното зголемување на притисоците и барикадите продолжува.
Се бара одговорност
Според известувачот на РСЕ од местото на настанот, активистите на почетокот ги читале имињата на жртвите. Пред станицата беше поставен црн транспарент со слика на гулабот на мирот, симбол од грбот на градот Нови Сад, на кој беше истурена црвена боја што симболизира крв.
Музичарот и писател Марко Шелиќ Марчело во говорот пред толпата рече дека повеќе не верува во говори на граѓански протести, туку во „акции“.
„Ништо од говори, ништо од беседи, туку гнев. Акција, акција, акција, како оваа денеска овде“, рече Марчело на протестот во Нови Сад.
Тој додаде дека му претставува чест што денеска стои до граѓаните на Нови Сад и оцени дека „животот во Србија одамна е бесмислен, а ова што сега го гледаме е обид да се направи смртта бесмислена“.
Ги повика сите граѓани, спортисти, репрезентативци, актери, музичари да се придружат „и да запомнат дека се луѓе, а не робови“.
„Имаме 14 жртви, имаме нула уапсени виновници, а имаме невини луѓе во затворите. Па кога, ако не сега?“, праша Марчело.
Несреќата на Железничката станица во Нови Сад се случи откако зградата беше официјално отворена во јули 2024 година по тригодишна реконструкција.
Во јавно достапните документи на државните институции во Србија не може да се пронајде дека железничката станица има употребна дозвола, која согласно законот се издава откако ќе се изврши технички преглед и ќе се утврди дека објектот е безбеден за употреба.
Во српскиот парламент на 15 ноември стигна предлог за гласање недоверба на премиерот на Србија, кој го поддржаа 71 пратеник од опозицијата.
Како причини наведени се „пропусти во вршењето на надлежноста и преземањето мерки, како и неизвршување на должноста за утврдување одговорност од надлежните лица, што довела до смрт на 14 лица“ при уривањето на бетонската настрешница.
Поради притисок од јавноста, министерот за градежништво, транспорт и инфраструктура, Горан Весиќ поднесе оставка на 4 ноември.
Тој изјави дека поднесува оставка поради морална одговорност, но дека не ја прифаќа вината за трагедијата.
Дел од јавноста повеќе од две недели бара одговорните да бидат кривично гонети.
Вишото јавно обвинителство во Нови Сад на 13 ноември соопшти дека испрашало 66 лица, а наредено е тој ден да бидат сослушани уште пет.
Од Обвинителството изјавија дека во тек е градежното вештачење и анализа на примероци од градежните остатоци од урнатата настрешница.
Фрлени факели кон резиденцијата на Нетанјаху
Израелската полиција уапси тројца осомничени откако беа фрлени факели кон приватната резиденција на премиерот Бенјамин Нетанјаху во крајбрежниот град Цезареја, објави Асошиејтед прес. Во меѓувреме, во израелските воздушни напади врз Газа во текот на ноќта и денеска (17 ноември) загинаа 12 лица, според тамошните медицински претставници.
Властите соопштија дека Нетанјаху и неговото семејство не биле во резиденцијата и дека нема повредени. Полицијата не објави детали за осомничените кои стојат зад фрлањето на факелите, но официјалните лица посочија на „домашните политички критичари“ на Нетанјаху.
Израелскиот претседател Исак Херцог, го осуди инцидентот и предупреди на „ескалација на насилството во јавната сфера“.
Нетанјаху се соочи со повеќемесечни масовни протести поради неговото справување со заложничката криза предизвикана од нападот врз Израел од страна на Хамас на 7 октомври 2023 година - која САД, ЕУ и други земји ја сметаат за терористичка организација - што ја разгори војната во Газа.
Критичарите го обвинуваат Нетанјаху за пропусти во безбедноста и разузнавањето што го овозможија нападот, како и за неуспехот да се постигне договор со Хамас за ослободување на голем број заложници кои сè уште се во Газа. Израелците повторно се собраа во Тел Авив во саботата навечер барајќи договор за прекин на огнот со што би се вратиле на заложниците.
Министерот за правда, Јарив Левин, во меѓувреме, го искористи нападот за да повика на обновување на неговите планови за реконструкција на судството во Израел, што предизвика повеќемесечни масовни протести пред војната и кои сè уште предизвикуваат длабоки поделби.
„Дојде време да се пружи целосна поддршка за обновувањето на правосудниот систем и системот за спроведување на законот и да се стави крај на анархијата, дивеењето и обидите да му се наштети на премиерот“, рече тој во изјавата.
Поддржувачите велат дека промените во судството имаат за цел зајакнување на демократијата преку ограничување на овластувањата на неизбраните судии и пренесување на поголема моќ на избраните функционери.
Противниците го гледаат предлогот како заробување на власта од страна на Нетанјаху, кому му се суди по обвиненија за корупција и напад врз клучниот ревизор.
Опозицискиот лидер Јаир Лапид, во објава на платформата Х рече дека „остро го осудува“ фрлањето факели кон домот на Нетанјаху, а истовремено го отфрла предлогот на Левин.
„Левин треба да си оди дома со остатокот од оваа неодговорна влада“, напиша Лапид, додавајќи дека „нема да му биде дозволено да го претвори Израел во недемократска држава“.
Ноќни напади во центарот на Газа
Во нападот на Израел врз Газа во текот на ноќта загинаа шест лица во Нусејрат и уште четворица во Буреи, два бегалски кампа изградени во централна Газа кои датираат од војната во 1948 година, кога е создаден денешен Израел, извести Министерството за здравство на Газа кое е под контрола на Хамас.
Уште две лица загинаа во нападот на главниот автопат што се протега од северот кон југот на Газа, соопшти болницата „Ал Акса“ во централниот град Деир ал Балах, која ги прими сите 12 тела, пренесува агенцијата Асошиејтед прес.
Војната меѓу Израел и Хамас започна откако палестинските милитанти го нападнаа Израел на 7 октомври 2023 година, убивајќи околу 1.200 луѓе - главно цивили - и киднапирајќи 250 други. Во Газа се уште има околу 100 заложници, а се верува дека една третина од нив се мртви.
Министерството за здравство на Газа соопшти дека околу 43.800 Палестинци биле убиени во војната. Министерството не прави разлика меѓу цивили и борци, но рече дека повеќе од поовина од загинатите се жени и деца.
Околу 90 отсто од населението на Газа кое броеше 2,3 милиони е раселено, а големи области се срамнети со земја во израелските бомбардирања и копнени операции.
Во четвртокот, десетте избрани членки на Советот за безбедност на ОН расправаа за нацрт-резолуција со која се бара „итен, безусловен и траен прекин на огнот“ во Газа. САД, најблискиот сојузник на Израел, е клучната земја за тоа дали Советот за безбедност ќе ја усвои резолуцијата.
Полска подигна авиони поради рускиот напад на Украина
Полска соопшти дека дека денеска (17 ноември) ги подигнала борбените авиони и ги мобилизирала сите расположливи сили како одговор на рускиот ракетен и беспилотен напад врз Украина.
„Поради масовниот напад на Русија, која врши напади со крстосувачки ракети, балистички ракети и беспилотни летала на локации кои се наоѓаат, меѓу другото, во западна Украина, започнаа операциите на полските и сојузничките авиони“, соопшти денеска на социјалните мрежи полската оперативна команда, пренесе Ројтерс.
Тие мерки беа „насочени кон безбедноста во областите во непосредна близина на загрозените зони“.
Украинскиот министер за енергетика, Герман Галушченко, на платформата Телеграм објави дека „масовен напад врз нашиот енергетски систем е во тек“ и дека руските сили „напаѓаат капацитети за производство и пренос на електрична енергија низ Украина“.
„Русија изврши еден од најголемите воздушни напади: со беспилотни летала и проектили кон мирни градови, заспани цивили и критична инфраструктура“, изјави украинскиот министер за надворешни работи, Андриј Сибига, по бомбардирањето што предизвика прекин на електричната енергија во Киев и два други региони на исток.
Градоначалникот на Киев, Виталиј Кличко, изјави дека едно лице е повредено кога остатоци од дрон паднале врз станбена зграда.
Локалните власти и украинските медиуми објавија бројни експлозии низ целата земја, вклучително и Запорожје, Одеса и Миколаев на југ и Чернихив на север.
Украинската енергетска инфраструктура цел на масовен руски напад
Русија изврши еден од најголеми воздушни напади врз Украина, рече министерот за надворешни работи на Киев денеска (17 ноември), со беспилотни летала и проектили насочени кон енергетската инфраструктура и други цивилни локации во градовите низ земјата.
„Ова е вистинскиот одговор на воениот злосторник (претседателот Владимир) Путин за сите оние кои му се јавија и го посетија неодамна. Ни треба мир преку сила, а не смирување“, напиша украинскиот министер за надворешни работи Андриј Сибиха, на платформата X.
Подоцна, украинскиот претседател Володимир Зеленски рече дека Русија лансирала околу 120 проектили и 90 беспилотни летала во, како што рече, „масовен“ комбиниран воздушен напад врз енергетската инфраструктура на Украина.
Експлозии беа пријавени рано на 17 ноември во главниот град Киев, како и во други градови низ земјата, вклучително и Одеса на брегот на Црното Море и југоисточниот град Запорожје.
Рускиот ракетен напад беше насочен кон енергетската инфраструктура низ Украина, принудувајќи превентивни прекини на струја, изјави украинскиот министер за енергетика Херман Галушченко.
Масовниот напад доаѓа во време кога руската инвазија врз Украина се приближува кон својот 1.000-ти ден. Русија троши огромни количини на оружје и човечки животи за да оствари мали, но постојани територијални придобивки на речиси една петтина од Украина што веќе ја контролира.
Во меѓувреме, Украина се бори да ги минимизира загубите, да го одржи моралот и да ги убеди сојузниците дека, со поголема воена помош, може да ја сврти ситуацијата. Новоизбраниот американски претседател Доналд Трамп изјави дека може брзо да ја заврши војната, иако не е јасно како.
Ракетниот напад уследи по нападот со беспилотно летало во текот на ноќта врз главниот град на Украина. Покрив на станбена зграда се запали во Киев поради паѓање на остатоци и најмалку едно лице е повредено, соопштија градските власти на платформата Телеграм.
Комбинираниот напад со беспилотни летала и ракети беше најмоќниот во последните три месеци, според шефот на воената администрација на Киев, Серхи Попко.
Воздухопловните сили на Украина издадоа предупредувања за воздушен напад низ сите региони на земјата околу 6 часот по локално време, предупредувајќи за нападот.
Во соопштението на социјалните мрежи, најголемиот приватен снабдувач на енергија во земјата - ДТЕК, објави дека вработените ја поправаат опремата, но не прецизираше што точно е погодено.
Најмалку 10 загинати во израелски напад врз училиште во Газа
Најмалку 10 лица загинаа, а 20 се ранети во израелски напад во градот Газа, кој погоди училиште во кое моментално престојуваат раселени семејства, соопштија лекарите во саботата (16 ноември).
Во училиштето Абу Аси управувано од ОН, луѓето можеби сè уште се заробени под урнатините, рекоа здравствените власти. Израелските власти сè уште не го коментирале нападот.
Израелската војска подоцна во саботата објави дека пресретнала две ракети истрелани врз Израел од северниот дел на Појасот Газа.
Лансирањето покажува дека палестинските милитантни групи сè уште можат да истрелуваат ракети врз Израел и покрај тоа што повеќе од 13 месеци спроведуваат воздушни и копнени офанзиви кои претворија огромни делови од Појасот Газа во пустош и раселија голем дел од неговото население кое броеше 2,3 милиони.
Здравствените власти во Појасот Газа контролиран од Хамас - која САД и ЕУ ја сметаат за терористичка организација - соопштија дека најмалку 30 луѓе биле убиени во израелските воени напади низ Појасот Газа во саботата.
Во војната во Појасот Газа, според здравствените власти на таа територија под контрола на Хамас, досега загинале 43.799 луѓе.
Војната изби кога на 7 октомври 2023 година, членови на Хамас и други радикални организации ја нападнаа територијата на Израел и, според израелските податоци, убиле околу 1.200 Израелци и киднапирале околу 250 заложници кои ги однеле во Газа.
Напади во Либан
Либанското Министерство за здравство објави дека шест лица, меѓу кои три деца, биле убиени во израелски напад во долината Бека на истокот од земјата во саботата.
Официјалната либанска национална новинска агенција (ННА) објави дека во израелскиот напад врз селото Храјбех загинале шест лица од исто семејство.
Израелската армија изврши нови напади во утринските часови врз упориштата на проиранското движење Хезболах во јужните предградија на Бејрут, откако го повика населението да се евакуира.
Во пресрет на нападот, портпаролот на израелската армија преку социјалната мрежа Х, ги предупреди жителите на населбата Харет Хреика да се евакуираат.
Израел почна да бомбардира цели во Либан на 23 септември, а на 30 септември започна копнена офанзива на југот на земјата.
Во текот на ноќта Хезболах изврши и два ракетни напади врз штабот на пешадиски баталјон во северен Израел. САД сметаат дека либанската група е терористичка организација, додека ЕУ на црната листа го стави само нејзиното вооружено крило, но не и политичката партија која има места во либанскиот парламент.
Подгреан од војната во Појасот Газа, конфликтот меѓу Израел и Хезболах траеше една година пред Израел да започне офанзива во септември.
Израел му нанесе тешки удари на Хезболах, убивајќи многу од неговите водачи, вклучително и Хасан Насрала, и го опустоши јужен Либан.
Според податоците на либанските власти, од октомври минатата година во израелските напади во таа земја загинале повеќе од 3.400 луѓе. Како резултат на конфликтот со Израел, штетите на инфраструктурата и економските загуби на Либан достигнаа, според проценките на Светска банка, повеќе од осум милијарди американски долари.
Мултимедија
Најпосетени
Што треба да знаете