Вести
Законите кои не ги потпиша Иванов утре повторно пред пратениците
Законите за заштита од дискриминација и за оперативно техничката агенција и електронски комуникација утре повторно треба да се најдат на собраниска седница, откако денеска претседателот Ѓорге Иванов не ги потпиша указите за нивно прогласување.
Од СДСМ реагираа дека Иванов е кочничар на реформскиот процес.
„Иванов се потврдува како промотор на дискриминацијата и противник на професионална Државна комисија за заштита од дискриминација. Како што го почна, така и го завршува мандатот. Иванов е против реформскиот процес, Иванов е против концептот фер општество, кое штити од секаков облик на дискриминација. И во последните денови од мандатот Иванов останува доследен во своето дејствување спротивно на интересите на граѓаните и државата“, изјави пратеничката Јагода Шахпаска денеска на прес-конференција.
Од ВМРО ДПМНЕ најавија дека за законите ќе гласаат како и претходно.
Познато е дека пратениците од ВМРО ДПМНЕ не беа во салата кога Собранието на печетокот на овој месец го изгласа Законот за заштита од дискриминација, со 52 гласа „за“. Претходно оваа партија во јавноста изнесе дилеми во однос на овој закон.
Пратениците на ВМРО-ДПМНЕ не присуствуваа и на седницата на која со 62 гласа за Собрнието Собранието ги усвои во прво читање законите за новата Оперативно-техничка агенција (ОТА) и за следење на комуникациите, како дел од реформскиот процес во безбедносните служби и системот за следење на комуникациите.
Откако претседателот Ѓорге Иванов не ги потпиша указите за прогласување на законите за заштита од дискриминација и за оперативно техничката агенција и електронски комуникација, и ги врати повторно на гласање во Собранието, тие треба да бидат објавени во Службен весник кога повторно ќе бидат усвоени.
Од Кабинетот на Иванов посочија дека "никој не го спречува Собранието да го повтори веќе направениот преседан и на незаконски начин, без потпис од претседателот на државата во Службен весник да објави укази за прогласување на закони донесени од Парламентот"
Иванов, според образложението што го доставил до Собранието, указите не ги потпишал бидејќи во извршувањето на функцијата секогаш постапувал согласно дадената свечена изјава дека ќе го штити Уставот и, како што вели, ќе ги брани интересите на Република Македонија.
Претседателот Иванов не ги потпишува законите од 11 јануари, кога во Собранието беа усвоени уставните измени за промена на името на државата во Република Северна Македонија.
види ги сите денешни вести
Полска и балтичките држави се повлекуваат од Договорот за забрана на противпешадиски мини
Министрите за одбрана на Полска, Естонија, Летонија и Литванија во заедничко соопштение изјавија дека нивните земји ќе ја напуштат Конвенцијата од Отава за забрана на противпешадиски мини со цел да ја подобрат својата безбедност по руската инвазија на Украина.
Повлекувањето од договорот од 1997 година, што министрите им го препорачаа на лидерите на нивните земји, кои имаат заедничка граница со Русија, ќе им овозможи повторно да почнат да акумулираат противпешадиски мини.
„Со оваа одлука испраќаме јасна порака: нашите земји се подготвени и можат да ги искористат сите неопходни средства за заштита на нивните потреби во безбедносната сфера“, се наведува во соопштението на министрите за одбрана.
Тие тврдат дека по ратификацијата на Конвенцијата од Отава за забрана на противпешадиски мини, се влошила безбедносната состојба во регионот.
„Во светло на ова нестабилно и променливо безбедносно опкружување, обележано со руска агресија и континуирана закана за евроатлантската заедница, од суштинско значење е да се проценат сите мерки насочени кон зајакнување на нашите способности за одвраќање и одбрана“, истакнуваат министрите.
Минатата недела, литванскиот министер за одбрана најави дека Финска, која исто така се граничи со Русија, можеби ќе одлучи да се повлече од Конвенцијата од Отава.
Радев: Бугарија е подготвена да преземе уште повредени од пожарот во Кочани
Бугарскиот претседател Румен Радев денеска (18 март) изрази сочувство до роднините на загинатите во пожарот во Кочани и се потпиша во книгата на жалост во Амбасадата на Република Северна Македонија во Софија.
Радев изјави дека Бугарија е подготвена да прифати на лекување повеќе повредени и оти се чека македонските власти да кажат дали има потреба од преземање на уште десет лица.
Во бугарските болници во моментов се хоспитализирани 14 повредени, кои беа пренесени со воено-транспортен авион „Спартан“ и со амбулантни возила на софиската Итна медицинска помош.
„Во готовност се и авионот „Спартан“ и медицинските тимови, така што ќе продолжиме да даваме помош. Бугарија е подготвена и ќе продолжи да помага во се што е потребно. Најважно е што оваа трагедија покажува дека луѓето од двете страни на границата можеби ќе мора да се потпираат еден на друг, но не само во денови на искушенија како денешните, туку заради нашата заедничка европска иднина“, рече шефот на бугарската држава.
Тој им се заблагодари на бугарските медицински тимови и воениот персонал за брзата реакција и професионалноста во транспортот на повредените и за укажаната специјализирана медицинска помош.
Македонската амбасадорка Агнеза Руси Поповска, која го пречека претседателот Радев во амбасадата, изјави дека денеска во Софија се очекува да пристигнат министрите за здравство и за надворешни работи Арбен Таравари и Тимчо Муцунски за да ги посетатат повредените македонски граѓани хоспитализирани во бугарските болници.
Во Бугарија денеска е прогласен ден на жалост во спомен на жртвите во Кочани и солидарност со народот во Северна Македонија.
Бугарскиот Црвен крст, Националната болница за превенција и контрола на заразни болести „Н.И. Пирогов“ и Националниот центар за трансфузиона хематологија организираат крводарителска акција за повредените во пожарот. Како што пренесуваат бугарските медиуми, само во првите два часа над 120 луѓе во Софија дарувале крв за настраданите во трагедијата во Кочани.
Станков: Приоритет ни се обдукциите и идентификацијата за да може роднините да ги подигнат телата
Приоритет ни е завршувањето на обдукциите и идентификацијата на луѓето, за да може роднините да си ги подигнат телата, изјави за МИА, Александар Станков, директор на Институтот за судска медицина и криминалистика, во врска со обдукциите на жртвите во пожарот во кочанската дискотека „Пулс“, што се случи рано утрото во неделата.
Тој подвлече дека постапката ќе биде завршена, тогаш кога ќе заврши обдукцијата и идентификацијата на сите тела.
Идентификацијата, вели тој, не се извршува само со обдукција, туку и со ДНК анализи.
Станува збор за два паралелни процеса.
„Работиме со планирано темпо. Паралелно се вршат и обдукција и ДНК анализи. Собрани се ДНК материјали за споредба, од роднините на починатите. Очекуваме брзо да се заврши работата. Не може точно да се каже кога, приоритет ни е завршувањето на обдукциите и идентификацијата на луѓето, за да може телата да си ги подигнат роднините“, нагласи Станков.
Во пожарот што се случи во дискотеката „Пулс“ во Кочани животот го загубија 59 млади лица, а над 150 повредени се згрижени во земјава и странство.
Денеска е ден на жалост во неколку земји од регионот. Србија, Бугарија, Црна Гора и Босна и Херцеговина го прогласија денешниот ден 18. март за ден на жалост по повод трагедијата во Кочани пред два дена.
Низ македонските амбасади во светот се отворени книги на жалост. Отворени се книги на жалост и во Собранието и во Министерството за надворешни работи.
Израел ги напаѓа Газа, Либан, Сирија, заканувајќи се дека повторно ќе разгори војна
Израел започна опсежни воздушни напади во Појасот Газа, Либан и јужна Сирија во, како што рече, целни напади врз екстремисти кои планираат терористички напади, што повторно ги разгоре тензиите кои се закануваат да го зафатат регионот во нов, крвав конфликт.
Израелскиот премиер Бенјамин Нетанјаху на 17-ти март рече дека и дал инструкции на војската да преземе „силна акција“ против Хамас поддржан од Иран (кој САД и ЕУ го сметаат за терористичка организација)како одговор на одбивањето на исламистичката група да ги ослободи сите преостанати заложници и нејзиното отфрлање на новите предлози за прекин на огнот.
„Израел отсега ќе дејствува против Хамас со зголемена воена сила“, се вели во соопштението од канцеларијата на Нетанјаху.
Покрај нападите врз Хамас во Газа, израелската војска соопшти дека извршила воздушни напади и во јужен Либан и јужна Сирија.
Првичните извештаи од палестинските власти во Газа говорат дека во нападите загинале најмалку 80 луѓе, а десетици се повредени, но тие рекоа дека бројот веројатно ќе се зголеми. Информацијата не можеше да биде независно потврдена.
Израелската војска соопшти дека нападите во Газа биле насочени кон команданти и водачи на Хамас од средно ниво и инфраструктурата на групата.
Таа рече дека е подготвена да продолжи со нападите врз Хамас онолку долго колку што е потребно и дека ќе ја прошири кампањата надвор од воздушните напади. Израелските тенкови и војници беа силно активни во Газа за време на претходната одмаздничка операција.
Израел се консултираше со Белата куќа за нејзините последни напади врз Газа, изјави портпаролката Каролин Левит за Фокс њуз.
„Како што претседателот Доналд Трамп јасно кажа - Хамас, Хутите во Јемен, Иран, сите оние кои сакаат да го тероризираат не само Израел туку и Соединетите Држави, ќе ја видат цената што ја плаќаат. Ќе биде пекол“, рече Ливит.
Трамп на 5 март го предупреди Хамас дека ќе има „пекол“ доколку веднаш не ги ослободи сите заложници, откако Белата куќа потврди дека имала тајни разговори со екстремистичката група.
Ројтерс цитираше висок претставник на Хамас дека Израел „еднострано го завршува“ договорот за прекин на огнот во Газа и дека акцијата ја загрозила судбината на преостанатите израелски заложници.
Насилството доаѓа во време на спорови меѓу Израел и Хамас за тоа како да се одржи трифазен прекин на огнот кој започна на 19 јануари, вклучително и размена на преостанатите заложници што ги држеше Хамас за палестински затвореници во израелските затвори.
Заседание на Советот за општи работи на ЕУ
Подготовка на мартовскиот Европски совет, односите ЕУ-Велика Британија и приоритетите на блокот за 2025 година, ќе бидат главни теми на денешното заседание (18 март) на Советот за општи работи на Унијата (ГАК) во Брисел.
Состанокот на министрите и државните секретар на земјите членки на Унијата одговорни за европски прашања ќе започне со расправа за нацрт-заклучоците за Самитот на ЕУ закажан за 20-21 март 2025 година.
Во поканата до шефовите на држави или влади на членките на Унијата за учество на Самитот, претседателот на Европскиот совет Антонио Кошта посочи дека главни теми на оваа лидерска средба ќе бидат конкурентноста, најновите случувања во врска со Украина и следните чекори околу европската одбрана.
Во продолжение на заседанието на ГАК, неговите челнови ќе разменат мислења за односите меѓу ЕУ и Велика Британија, како и за приоритетите на Унијата за годинава, во чии рамки Полското претседателство ќе презентира ажуриран Патоказ за Европскиот семестар за 2025 година.
Исто така, Советот ќе расправа и за Нацрт-препораката за економската политика на Еврозоната и се очекува да им ја предложи на европските лидери за усвојување.
Предвидено е ГАК да усвои и заедничка декларација за законодавните приоритети на ЕУ за 2025 година, како и заеднички заклучоци за целите и приоритетите на политиката на Унијата за периодот за 2025-2029 година.
ЕУ вети повеќе од 5 милијарди евра за Сирија
Донаторите на конференцијата предводена од Европската Унија (ЕУ) ветија 5,8 милијарди евра за помош на новите сириски власти, кои се соочуваат со хуманитарни и безбедносни предизвици по падот на Башар ал Асад.
Ветувањата дадени вечерта на 17 март на собирот во Брисел се помалку од минатогодишните 7,5 милијарди евра грантови и заеми, а претставниците на ЕУ како главен фактор ги наведоа кратењата на американската помош.
ЕУ организира годишна конференција од 2017 година, но таа се одржа без учество на претставници на режимот на Асад, кој беше изолиран поради репресијата што ја вршеше.
За прв пат на конференцијата присуствуваше висок функционер од Дамаск - сирискиот министер за надворешни работи Асаад Хасан ал Шибани, заедно со европски и арапски министри и претставници на меѓународни организации.
Според податоците на ЕУ, на околу 16,5 милиони луѓе во Сирија им е потребна хуманитарна помош, а на 12,9 милиони луѓе им е потребна помош во храна.
Претседателката на Европската комисија Урсула фон дер Лајен на состанокот најави зголемување на обврските на ЕУ за Сиријците во земјата и регионот на речиси 2,5 милијарди евра за 2025 и 2026 година, што вклучува зголемување од околу 160 милиони евра во споредба со претходното ветување за оваа година.
Хајат Тахрир ал-Шам, групата што го собори Асад, е прогласена за терористичка организација од ОН, но ЕУ сака да соработува со новите власти се додека тие ги одржат ветувањата дека транзицијата ќе биде инклузивна и мирна.
Според ОН, Сирија изгубила 40 години развој поради војната и ќе и треба најмалку една деценија да се врати во предконфликтната состојба, а поради економската криза речиси целото население живее под прагот на сиромаштија.
Распишана централна потерница по Додик, Вишковиќ и Стевандиќ
Судот на Босна и Херцеговина издаде централна потерница за Милорад Додик, претседателот на на ентитетот на Република Српска (РС), Радован Вишковиќ, премиер на РС и Ненад Стевандиќ, претседател на Собранието на РС, потврди денеска (17 март) за Радио Слободна Европа (РСЕ), Обвинителството на БиХ.
Судот на БиХ им одреди мерка притвор во траење од еден месец, откако ќе бидат доведени на сослушување, беше потврдено од Судот на БиХ за РСЕ на 14 март.
Додик, Вишковиќ и Стевандиќ се осомничени за кривичното дело нарушување на уставниот поредок, а во последните денови не одговараа на повиците да дадат изјави во Обвинителството на БиХ.
Тројцата се уште не се изјасниле за налогот за апсење, ниту пак е познато каде се во моментов.
Сите полициски агенции во Босна и Херцеговина, вклучително и Државната гранична полиција на БиХ, се должни да постапат во согласност со оваа одлука на Судот на БиХ, што треба да го спречи и нивниот евентуален обид за преминување на границата со соседните земји.
Во БиХ има 16 полициски агенции, од кои ниту една досега не ја коментираше распишаната потерница.
Министерот за внатрешни работи на ентитетот на Федерацијата БиХ, Рамо Исак, за РСЕ изјави дека Министерството за внатрешни работи на БиХ се уште официјално не го добило налогот за апсење.
„Не можеме да коментираме повеќе. Чекаме официјално да биде издаден налогот за апсење“, изјави Исак за РСЕ.
Обвинителството на БиХ ги интензивираше своите активности по серијата сецесионистички потези на владата на РС предводена од Додик, со кои на 13 март беше усвоен нацрт-новиот устав, со кој Република Српска се дефинира како држава.
Претходно, на 6 март, Обвинителството соопшти дека од декември минатата година води истрага поради постоење основи на сомнение дека е сторено кривично дело „напад врз уставниот поредок“.
Кривичниот законик на БиХ за ова предвидува затворска казна од пет години, но и можност за забрана за вршење должност.
На крајот на февруари беа донесени неуставни закони, со кои се забранува работата на државните правосудни и полициски институции на територијата на ентитетот РС.
Екс министерот за економија Бектеши ќе биде сослушуван во кочанското Обвинителство
Поранешниот министер за економија Крешник Бектеши ќе биде сослушан во Основниот суд во Кочани пред судија на претходна постапка, потврдија од Јавното обвинителство на Република Северна Македонија (ЈОРМС).
Бектеши вчера (17 март)и денеска беше на информативен разговор во полициска станица во врска со пожарот во ноќниот клуб во Кочани во кој на 16 март загинаа 59 лица.
Од полициската станица Бектеши е спроведен и ќе биде сослушан во ОЈО Кочани.
Адвокатот на Бектеши попладнево во изјава за медиумите рече дека поранешниот министер бил повикан на информативен разговор и дека сам се јавил по што е побарано тој да биде задржан заради понатамошни проверки.
„Вечерва му истекува времето од 24 часа на задржување“, изјави адвокатот Еленко Миланов, додавајќи дека до 14 часот во судот немало никакви известувања за некаква постапка против Бектеши.
Прашан за кои околности е повикан Бектеши во полициска станица, Миланов рече дека засега нема правна квалификација.
Државниот јавен обвинител Љупчо Коцевски во изјава во Кочани рече дека во моментот се држат рочишта по однос на предлозите за притвор.
„Вкупно до овој момент се работи на итно процесуирање на 14 лица обезбедени од нашето постапување до овој момент. По однос на увидот можам да кажам дека сите важни релевантни факти и докази на местото се обезбедени и следат дополнителни анализи и вештачења од соодветна област“, рече тој, дополнувајќи дека во текот на оваа недела има можност да се поведе истражна постапка.
Коцевски не потврди конкретно дека мерките се однесуваат и на поранешниот министер за економија, Крешник Бектеши, градоначалникот на Кочани, Љупчо Папазов, како и инспектори од општината.
„Сите лица кои тимот на јавни обвинители утврди дека имаат, односно немаат преземено некои активности кои подлежат на кривично правен аспект ќе бидат опфатени“, рече тој.
Брисел ја повика Србија на транспарентна истрага за „звучниот топ“
Европската комисија (ЕК) имала увид во извештаи за наводна употреба на звучен топ или слично оружје против мирните демонстранти во Србија и ги повикува властите целосно да ги истражат таквите наводи, изјави портпаролот Гијом Мерсие.
„Видовме извештаи и наводи за употреба на таква опрема. Очекуваме брза, транспарентна и веродостојна истрага за овие наводи и потсетуваме дека според Законот за човекови права на ЕУ, властите мора да ги заштитат сите учесници на протестите од штета и насилство“, рече Мерсиер.
Тој додаде дека внимателно ја следат ситуацијата, како и „протестите во Србија каде луѓето бараат владеење на правото и силни и одговорни демократски институции“.
Од ЕК потврдија дека го очекуваат српскиот претседател Александар Вучиќ во Брисел следната недела на средба со претседателката на Комисијата, Урсула фон дер Лајен.
На видеата објавени на социјалните мрежи се гледаат граѓани собрани на саботниот (15 март) протест кај плоштадот Славија, оддавајќи им почит на загинатите во уривањето на настрешница во Нови Сад, кои откако ја слушнаа вревата, масовно се тргнаа на страна.
Настанот предизвика паника кај граѓаните, а засега нема официјални информации за тоа што ја предизвика ваква реакција кај толпата.
Студентите во блокадата, кои повикаа на протестот, инсистирајќи на утврдување на одговорноста за уривањето на бетонска настрешница во Нови Сад, ги обвинија властите за употреба на звучен топ за време на 15-минутниот молк за 15-те загинати.
Некои опозициски партии, исто така, ја обвинија владата дека користи звучни топови.
Министерството за внатрешни работи и Министерството за одбрана негираа употреба на звучен топ на протестот на 15 март. Овие наводи ги отфрлија министерот за внатрешни работи Ивица Дачиќ и премиерот во заминување Милош Вучевиќ, како и претседателот на Србија, Александар Вучиќ.
Вишото јавно обвинителство (ВЈТ) во Белград му наложи на Првото основно јавно обвинителство да покрене предмет и да ги идентификува лицата кои во јавноста пренеле информации дека Ургентниот центар во саботата лекувал десетици граѓани со заболувања кои можеле да бидат предизвикани од таканаречен „звучен топ“.
Во соопштението на ВЈТ се наведува дека реагирале откако Ургентниот центар на Универзитетскиот клинички центар на Србија ги демантираше овие наводи кои се појавија на социјалните мрежи.
Невладината организација Белградски центар за човекови права на 16 март соопшти дека биле контактирани од голем број граѓани кои ги почувствувале ефектите од звучниот топ на саботниот протест.
Се наведува и дека граѓаните почувствувале силен топлотен бран, татнеж и нешто што наликува на звук на авион или автомобил кој оди со голема брзина и потоа „како некој ветер да се движи и да ги соборува, како да поминала ракета“.
Коцевски: Досега осомничени 14 лица за за несреќата во Кочани
Вкупно 14 лица досега се осомничени за пожарот кој изби во дискотека во Кочани. Тие се сомничат за кривичното дело „тешки дела против општата сигурност“ за кое е предвидено казна затвор од најмалку три години без горна граница на казнување – потврди на прес конференција попладнево, републичкиот јавен обвинител Љупчо Коцевски.
Од пред Основното јавно обвинителство во Кочани, тој информираше дека обвинителскиот тим е проширен на девет обвинители кои како што рече, интензивно постапуваат и преземаат дејствија со кои се обезбедуваат докази за утврдување на одговорност за трагедијата.
„Издадени се 59 наредби за обдукции, наредби за обезбедување на видео материјали од безбедносни и други камери, наредба за одземање на документација од правен субјект врз основа на барање на меѓуинституционална помош и соработка“, рече Коцевски.
Тој додаде и дека со наредби обезбедени преку Основното јавно обвинителство Скопје, се извршени претреси во Министерството за економија и на уште две локации во Скопје.
„Издадени се наредби за пребарување на компјутери и за пребарување на серверите во Министерството, како и наредба за графолошко вештачење на потписи на одредена документација“, посочи обвинителот.
Според него, итно е побарано во рамките на истражните дејствија да бидат вклучени градежна и трудова инспекција.
„Исто така, веќе ангажиравме и вештаци од една високообразовна и научна установа во нашата држава кои ќе треба стручно да се произнесат за одредени околности и факти. Показатели за непостапување по безбедносните правила има уште кога овој таканаречен објект, кабаре, бил пуштен во употреба, а понатаму до денот на случување на настанот работел и како таков“, изјави Коцевски.
Тој рече дека покрај ова, се испитуваат дејствија и на примање и давање поткуп, незаконска набавка и употреба на пиротехнички средства, но и други кривични дела.
Коцевски најави дека денеска (17 март) ќе биде пратено барање и до Инспекцискиот совет да се преземат мерки за „утврдување на факти и околности и лоцирање на одговорност низ годините кај секого по име и презиме“.
Тој информираше и дека во моментов во Основниот суд во Кочани се држат рочишта по однос на предлозите за краткотраен притвор.
„Во текот на вчерашниот ден бевте известени дека ваква мерка е предложена за осум лица, додека три се хоспитализирани во потешка здравствена состојба и постапката за овие лица ќе продолжи веднаш кога нивната здравствена состојба ќе се подобри“, додаде тој.
Коцевски не потврди конкретно дека мерките се однесуваат и на поранешниот министер за економија, Крешник Бектеши, градоначалникот на Кочани, Љупчо Папазов, како и инспектори од општината.
„Сите лица кои тимот на јавни обвинители утврди дека имаат, односно немаат преземено некои активности кои подлежат на кривично правен аспект ќе бидат опфатени“, кусо изјави тој.
Во однос на протестите што се одржуваат во Кочани по повод несреќата рече дека досега нема незаконити дејствија.
Мултимедија
Најпосетени
Што треба да знаете