Расте семејното насилство во општините Дебар и Центар Жупа, но и понатаму поради традиционалниот менталитетот бројката на пријавени случаи во споредба со вистинската е многу помала. Со оглед дека и двете општини имаат мал број на жители, поголемиот број на насилства се дознаваат многу брзо, но сепак ретко се случува насилствата да се пријавуваат кај надлежните институции. Во една ваква состојба во центарот за Социјални работи во Дебар информираат дека има пораст на регистрираните случаи на семејно насилство.
„Во 2015 година имавме регистрирано 9 случаи на семејно насилство додека минатата година, односно 2016 година, бројот е поголем и тој изнесува 14 случаи. Станува збор претежно за лица кои се членови на семејства со нарушени партнерски односи, потоа на семејства со социјални проблеми и многу големи материјални проблеми, како и други семејства“, вели социјалниот работник и одговорен за оваа проблематика во Центарот за социјални работи, Исмаил Мерсимоски.
Според него, сопругите најчесто се жртви на насилство, но има и насилство врз родители.
„Во Центарот, по добивање на пријавите од страна на надлежните институции, како што се МВР и Судот, се преземаат мерки за утврдување на степенот на насилството. Потоа се врши, ако има потреба, и заштита на жртвите во согласност со законот. Инаку најчесто жртви во семејното насилство се сопругите, но има и случаи кога жртви се родители кои се малтретираат од страна на своите синови, поради имотно правни односи“, вели тој.
Често пати бројните проблеми во семејството, кои започнуваат со насилство, завршуваат со разводи. Невладиниот сектор во Дебар има организирано неколку проекти за заштита на жената од насилството и се верува дека токму овие проекти влијаеле врз зголемувањето на храброста кај жртвите насилството да го пријавуваат.
