Со испружена рака и тажен поглед, седнат на мермерните плочки во Градскиот трговски центар во Скопје, повозрасен човек моли за помош. Системот, како и граѓаните кои поминуваат покрај него, го гледаат, знаат дека постои, но не го забележуваат. Минусни температури му го отежнуваат и без тоа тешкиот живот. Дел од луѓето оставаат по некој денар, кој колку може, вели питачот кој ни се претстави како Азир Азир. Ни објасни дека ваквиот начин на живот го запознал уште како дете. Има 60 години, ама во животот работа не нашол. Документи нема, освен лична карта.
„Еве просам, барам, со тоа се крпам, немам јадење, стара куќа имам, што најдам јадам, пијам, најчесто наоѓам храна по контејнери“, вели Азир.
Тој раскажува дека живее во стара куќа со сопруга инвалид, и дека храната ја обезбедува со помош на милостината од сограѓаните. Тој додава дека на овој студ, куќа со речиси урнат покрив не се грее.
„Ми падна цел кров, да дојдеш да видиш, ќе си речеш овде не може да живее ни мачка ни куче, а камо ли пак човек“, додава тој.
Капа, шал, неколку дебели џемпери и јакна е целата заштита на пазарџиите кои работат на отворено. Велат навистина им е студено, ама леб дома мора да се донесе.
Вашиот пребарувач не подржува HTML5
Од студот најпогодени сиромашните
Јовица Костовски веќе десет години продава лук и везени пиперки во близина на скопскиот пазар, за да може неговото семејство да излезе на крај. Тој вели дека со домашниот буџет од 12 илјади тешко се живее. Заработка голема нема, ама мора на студот да се обиде да најде начин да ги закрпи дупките во паричникот, објаснува Костовски.
„Се прилагодуваме, кога некој е принуден на нешто, или има цврста желба и волја, човек се привикнува, станува навика, иако е малку ладнично, ама се навикнавме“, вели тој.
Костовски додава дека откако пред десетина година станал технолошки вишок во Железара, друга работа не можел да најде па затоа сега се обидува да заработува продавајќи на картонска тезга пред скопски пазар.
„Не е тоа заработувачка, тоа е за еден гол живот, некои поситни трошоци да се покријат, да се закрпи нешто, за толку стасува само“, вели Костовски.
Според последните податоци на Државниот завод за статистика, околу 450 илјади граѓани живееле под праг на сиромаштија. Големиот студ во најдолгиот месец од годината најмногу ги погоди сиромашните, оние кои деновите ги поминуваат на отворено во потрага по некој денар плус за да се истурка месецот. Според официјалните податоци, студот зема најмалку 4 жртви од кои двајца се бездомници. Во земјава се евидентирани 150 бездомници.