Вести
Советот за безбедност на ОН ќе одржи вонреден состанок за Газа
Советот за безбедност на Обединетите Нации вечерва на 29 февруари ќе одржи состанок зад затворени врати по смртта на околу сто лица, кои новинарските извештаи, загинале за време на дистрибуцијата на помош во храна во Појасот Газа од напад спроведен од израелски војници.
Според информациите од здравствените власти во Газа, загинале над 100 луѓе, со што бројот на загинати од почетокот на војната меѓу Израел и Хамас,којшто САД и Европската унија го сметаат за терористичка организација, се искачи на повеќе од 30.000.
Претставниците на болницата првично известија за израелски напад врз толпата, но очевидци подоцна рекоа дека израелските војници отвориле оган додека луѓето ваделе брашно и конзервирана стока од камионите, јавува новинската агенција Асошиетет прес.
Израелската војска одби да даде изјава за улогата на војниците во инцидентот.
Градот Газа и околните области на северот на енклавата беа првите цели на израелската воздушна, морска и копнена офанзива, започната како одговор на нападот на Хамас,којшто САД и Европската унија го сметаат за терористичка организација, на 7 октомври.
види ги сите денешни вести
Волц ја презеде одговорноста за скандалот со безбедносната грешка
Советникот за национална безбедност на американскиот претседател Мајк Волц, кој стои зад спектакуларната безбедносна грешка поврзана со американските напади во Јемен, синоќа (25 март) изјави дека ја презема одговорноста откако новинар се нашол во групата што тој ја создал на мрежата Сигнал.
„Ја преземам целосната одговорност. Јас ја создадов таа група“, изјави Мајк Волц на Фокс њуз, во првото интервју откако беше откриено дека новинарот по грешка бил ставен во групен разговор со високи функционери каде што се споделувале информации за нападот врз Хутите во Јемен.
Волц сугерираше дека можеби имал снимен телефонски број на новинарот за кој мислел дека му припаѓа на некој друг.
„Ги имаме најдобрите технички тимови кои се обидуваат да дознаат како тоа можело да се случи. Не го познавам тој тип, го познавам само по неговата репутација и тоа е страшно, но не му пишувам“, нагласи тој.
Канцеларијата за односи со јавноста на Белата куќа преку соопштение го осуди „координираниот обид да се одвлече вниманието од успешните“ неодамнешни американски напади врз Хутите во Јемен.
Претходно Белата куќа потврди дека главниот уредник на списанието Атлантик по грешка бил вклучен во високо доверлив групен разговор со група високи американски функционери посветени на нападите врз јеменските Хути.
Ова несомнено се смета за еден од најсериозните безбедносни неуспеси во поновата американска воена историја.
Новинарот Џефри Голдберг во понеделникот во подолга статија откри дека однапред, преку апликацијата за пораки Сигнал, добил детален план за нападот на американската војска на 15 март против оваа група бунтовници во Јемен.
Голдберг објаснува дека во тој групен разговор учествувале вкупно 18 луѓе, меѓу кои, според него, шефот на дипломатијата Марко Рубио, потпретседателот Џеј Ди Венс, шефот на ЦИА Џон Ретклиф и секретарот за одбрана Пит Хегсет.
Белата куќа вчера соопшти дека нема протечени доверливи информации кога планот за напад на Хутите во Јемен по грешка бил споделен со американски новинар. Во вчерашниот телефонски разговор со Ен-Би-Си претседателот Доналд Трамп рече дека вклучувањето на новинарите во доверлива група за дискусија е „грешка“ која на крајот „не била сериозна“, додавајќи дека Мајк Волц ја „научил лекцијата“ од оваа грешка.
Американскиот суд и нареди на Агенцијата за глобални медуми да ги запре чекорите за затворање на РСЕ
Американскиот суд во вторникот (25 март) го одобри барањето на Радио Слободна Европа за привремена забрана (TRO) во тужбата која ја поднесе против Американската агенција за глобални медиуми (УСАГМ) поради прекинот на финансирањето на РСЕ наменето од американскиот Конгрес.
Окружниот суд во Вашингтон во својата одлука наведе дека агенцијата најверојатно постапила „произволно и каприциозно“ при прекинувањето на грантот за РСЕ и дека таквите дејствија ќе предизвикаат „ненадоместлива штета“ на медиумот доколку се спроведат.
Окружниот судија Ројс Ламберт напиша во пресудата на 10 страници дека ТРО е потребна за да се запре затворањето бидејќи РСЕ покажа дека веројатно ќе го добие случајот на судењето, дека дозволувањето на дејствијата на УСАГМ да продолжат додека судот не ја слушне судбината на финансирањето на РСЕ ќе предизвика „ненадоместлива штета“ на медиумот.
„Раководството на УСАГМ не може, со оправдување од една реченица што практично не нуди објаснување, да ја принуди РСЕ да се затвори - дури и ако претседателот ѝ рекол да го стори тоа“, објасни Ламберт.
Следниот чекор ќе биде одлука за барањето на РСЕ за прелиминарна наредба со која се бара од УСАГМ да ги обезбеди приближно 77-те милиони долари што Конгресот ги додели за активностите на РСЕ за остатокот од фискалната 2025 година, која завршува на 30 септември. Се очекува судот да донесе одлука за ова во наредните недели.
Заканата за финансирањето на РСЕ предизвика бран глобална поддршка од организациите за заштита на медиумите, аналитичарите и застапниците на демократијата, како и публиката на 27 јазици и 23 земји каде што дејствува РСЕ.
Се чини дека Ламберт го призна ова во својата одлука, пишувајќи дека Владата конкретно ја поддржува РСЕ од 1950 година како средство за обезбедување „сигурни, локално релевантни вести за публиката изложена на комунистичка пропаганда“.
„Ја цениме промислената и неконтроверзна одлука на судијата Ламберт да го спречи УСАГМ да ја игнорира волјата на Конгресот. Очекуваме понатамошен напредок во нашиот случај дека е неуставно да се задржат средствата што Конгресот ги додели на РСЕ до крајот на фискалната година“, рече претседателот и извршен директор на РСЕ, Стивен Капус по одлуката.
„Оваа пресуда дополнително испраќа силна порака до нашите новинари ширум светот: нивната мисија, како што е дизајнирана од Конгресот, е вредна и драгоцена и треба да продолжи. 75 години РСЕ е тесно усогласена со американските национални безбедносни интереси борејќи се против цензурата и пропагандата во многу од најрепресивните општества во светот“, додаде тој.
УСАГМ тврдеше дека го прекинала грантот за РСЕ на 15 март, неколку часа откако извршната наредба потпишана од американскиот претседател Доналд Трамп повика на кратења на седум агенции - вклучително и УСАГМ - до „максимална мерка во согласност со важечкиот закон“.
Потегот за укинување на грантот за РСЕ беше објавен во писмо потпишано од Кери Лејк, која ја наведе нејзината титула „Виш советник на в.д. директор на(УСАГМ) со овластување делегирани од в.д. директорот“.
Во писмото се наведува дека „со доделените средства повеќе не се постигнуваат приоритетите на агенцијата“.
Не беа дадени дополнителни објаснувања, а судијата Ламберт рече дека УСАГМ не дала дополнително образложение за потегот за намалување на финансирањето за време на сослушувањето на рочиштетот во понеделникот.
„Објаснувањето понудено од УСАГМ тешко може да се окарактеризира како објаснување: се сведуваше на еден ред во писмото за прекинување, во кое се наведува дека доделените средства повеќе не ги постигнуваат приоритетите на агенцијата“, напиша Ламберт во пресудата.
За време на сослушувањето во понеделникот, УСАГМ изјави дека презела „итни административни чекори“ за да иницира исплата на 7,46 милиони американски долари средства што РСЕ ги бараше за деновите во март додека работеше пред објавувањето на писмото.
Абигејл Стаут, адвокатка од Министерството за правда што ја застапува УСАГМ, исто така, на сослушувањето тврдеше дека договорот за грант помеѓу УСАГМ и РСЕ, како што е наведено во Законот за меѓународна радиодифузија и дава право на агенцијата да го раскине договорот доколку РСЕ не ги почитува одредбите наведени во него.
Ламберт рече дека барањето на Агенцијата за глобални медиуми, РСЕ да ги користи тие средства за да ги исплати своите финансиски обврски наместо за операции е „функционален еквивалент на тоа воопшто да не ги добие“.
„РСЕ ќе биде принудена да ги раскине договорите за закуп, да ги раскине договорите за вработување - со што ќе се уништи кредибилитетот што го изгради со децении и да ги прекине сите други операции“, напиша судијата Ламберт.
УСАГМ (USAGM) е независна американска владина агенција која го надгледува емитувањето на вести и информации на повеќе од 60 јазици на над 400 милиони луѓе секоја недела.
Вкупното буџетско барање за USAGM за фискалната 2025 година беше 950 милиони американски долари за финансирање на сите негови операции и капитални инвестиции.
Тие вклучуваат медиуми како што се РСЕ/РЛ, Гласот на Америка, Радио Слободна Азија, Радио Марти за Куба, Блискиот Исток радиодифузна мрежа (MBN) и Фондот за отворена технологија.
Буџетското барање за 2025 година само за РСЕ беше околу 153 милиони американски долари, покажуваат документите на Агенцијата за глобални медиуми.
Русија и Украина одделно постигнаа договор со САД за прекин на воените дејствија во Црното Море
Украина и Русија одделно постигнаа договор во разговорите со САД во Саудиска Арабија за прекин на воените дејствија во Црното Море, како и за развој на мерки за забрана на напади врз енергетски објекти во двете земји.
Белата куќа во одделни изјави рече дека тоа ќе и помогне на Москва да го врати пристапот до глобалните пазари за руските земјоделски производи и извозот на вештачки ѓубрива, кои беа прекинати откако Кремљ започна целосна инвазија на Украина пред повеќе од три години.
Иако во изјавите не се споменува прекин на нападите врз други цивилни инфраструктурни цели, тие се чини дека се чекор кон поширок договор за прекин на огнот за ставање крај на најголемиот и најсмртоносниот конфликт во Европа од Втората светска војна.
Сепак, како знак за тоа колку тешки беа преговорите во изминатите неколку дена и колку е веројатно дека ќе продолжат да бидат, министерот за надворешни работи Сергеј Лавров рече дека Кремљ ќе бара „јасни гаранции“ од Вашингтон дека Украина ќе го почитува договорот.
Во меѓувреме, украинскиот министер за одбрана Рустем Умеров на мрежата Х изјави дека Киев ќе го смета секое движење на бродови на руската морнарица надвор од источниот дел на Црното Море како кршење на договорите постигнати во Ријад.
„САД ќе продолжат да ги олеснуваат преговорите меѓу двете страни за да се постигне мирно решение, во согласност со договорите постигнати во Ријад“, објави Белата куќа.
Денешните (25 март) преговори уследија еден ден откако американските и руските претставници одржаа 12-часовни преговори во Саудиска Арабија, како дел од напорите на американскиот претседател Доналд Трамп да стави крај на војната во Украина.
Кремљ изјави дека обновувањето на пристапот за руските земјоделски производи и ѓубрива, заедно со намалувањето на трошоците за осигурување за поморскиот транспорт, како и проширениот пристап до пристаништата и платните системи, ќе биде можно само откако ќе бидат укинати некои санкции и ограничувања за Русија.
Трамп претходно изјави дека територијалните линии и потенцијалната американска сопственост на нуклеарната централа Запорожје во јужна Украина се дел од преговорите.
Минатата недела Трамп ја изнесе идејата САД да ја преземат контролата врз оваа електрана, која Русија ја зазеде на почетокот на војната.
Во исто време, и Русија и Украина продолжија да вршат напади.
Во рускиот ноќен ракетен напад врз украинскиот град Суми беа ранети повеќе од 90 луѓе, меѓу кои 23 деца.
Украинскиот претседател Володимир Зеленски го осуди нападот како последен пример на „загуба, болка и уништување, нешто што Украина никогаш не го сакаше“.
Зеленски рече дека Русија е „единствениот ентитет што ја продолжува оваа војна и го мачи нашиот народ и целиот свет“.
„За да се принуди Русија да постигне мир, потребни се силни мерки и решителни акции. Подготвени сме да поддржиме секоја силна иницијатива што ја прави дипломатијата поефикасна“, рече Зеленски.
Украинскиот министер за надворешни работи Андриј Сибиха напиша на мрежата Х дека нападот во понеделникот врз Суми покажа дека изјавите на Москва за мир се „празни“.
„Москва зборува за мир додека извршува брутални напади врз густо населените станбени области во големите украински градови“, напиша Сибиха.
За украинскиот напад извести и руската страна. Официјален претставник на окупираниот украински регион Луганск изјави дека шест лица загинале во гранатирање на Краина, меѓу кои и новинар на рускиот весник „Известија“.
Весникот наклонет кон Кремљ го идентификуваше новинарот како Александар Федорчак, велејќи дека тој бил убиен „во регионот Харкив“.
Рускиот канал Звезда, кој е спонзориран од Министерството за одбрана, објави дека неговиот снимател и возачот загинале додека снимале репортажа со Федорчак.
Минималната плата ќе се зголеми за 1.812 денари
Владата денеска (25 март)на седница ја усвои информацијата за утврдување на минималната плата за 2025 применувајќи ги законски утврдените критериуми, каде минималната плата за 2025 година ќе бележи пораст од 2.685 денари во бруто износ, односно 1.812 денари во нето износ, соопшти владината прес-служба.
Претходно премиерот Христијан Мицкоски, на новинарско прашање рече дека од април ќе се исплаќа законски предвидениот минималец или околу 2 200 денари повеќе од сегашната минимална плата и најави дека доколку следните месеци дојде до договор меѓу работниците и работодавачите за повисок износ, ќе се направат законски измени и дополнително нивелирање.
„Согласно Законот мислам дека минималната плата ќе се зголеми на ниво од 24.400, така е според Законот. Немаме репрезентативен синдикат во Економско-социјалниот совет, се формираше Комисија која ќе ја утврди репрезентативноста. Се надевам дека наскоро тие што ќе бидат репрезентативни претставници на работниците заедно со работодавачите ќе постигнат консензус, а ние тој консензус ќе го почитуваме. Ако се договарат за поголема сума, ќе го промениме Законот и ќе навлеземе во дополнително нивелирање“, рече премиерот Мицкоски.
Како што најави министерот за економија и труд Бесар Дурмиши, до крајот на месецов треба да се направат пресметките и да се утврди висината на минималната платата. Во таа насока веќе е формирана Комисијата за утврдување на репрезентативноста на синдикатите и минатата недела е изгласана на седница на Владата.
„Тие почнаа да работат за да одберат кој синдикат исполнува услови за да биде репрезентативен. По утврдувањето на репрезентативноста веднаш ќе го свикаме Економско социјалниот совет на кој ќе ја отвориме како тема минималната плата. Доколку работодавачите и синдикатите се договорат за друг начин на утврдување или друга вредност на минималната плата ние ќе бидеме таму за да им помогнеме на двете страни“, рече Дурмиши на новинарско прашање на денешната прес-конференција во Владата.
Данките би можеле да бидат повикани во војска на 1 јули
Младите Данки би можеле да бидат повикани на воена служба веќе на 1 јули 2025 година, изјави денеска (25 март) министерот за одбрана Троелс Лунд Поулсен.
„Со оглед на моменталната ситуација во одбранбената и безбедносната политика, вооружените сили треба да регрутираат повеќе луѓе и затоа е важен сигнал да се воспостави целосен паритет меѓу жените и мажите до 1 јули 2025 година“, рече Поулсен.
Првично, новиот рамковен договор со кој се зголемува стажот на воениот рок од четири на 11 месеци, предвидено е млади жени да бидат повикани од 2027 година. Поточно, жените кои ќе наполнат 18 години по 1 јули 2025 година, ќе бидат поканети да учествуваат на Денот на одбраната во 2026 година, годишен настан на кој младите мора да учествуваат во лотарија.
Тие извлекуваат број кој одредува дали мораат или не да служат војска, во случај бројот на доброволци да е недоволен.
Како одговор на зголемената закана од Русија, Данска во февруари објави дека ќе одвои дополнителни 6,8 милијарди евра за одбрана во следните две години, пренесува АФП.
Минатата година веќе има зголемување од 5,4 милијарди евра.
Се врати првиот од 115 повредени во пожарот кои се лекуваат во странство
Првиот од 115-те пациенти настрадани по трагедијата во дискотеката во Кочани на 16 март, кои се лекуваат во странство, попладнево се врати во земјава.
Тој се лекувал во болница во Белград, Србија и ќе биде на опсервација во ЈЗУ Клиника за Токсикологија – Скопје.
Беше пречекан од министрите за здравство Арбен Таравари и за надворешна политика и наворешна трговија Тимчо Муцунски.
Директорот на ЈЗУ Клиника за Токсикологија – Скопје, Андон Чибишев изјави дека вратениот пациент е во сосема подобрена општа клиничка состојба, но извесен период, можеби до утре, ќе биде опсервиран на клиниката.
„Ќе направиме некои наши иследувања за да бидеме сигурни дека можеме да го пуштиме дома да си оди кај семејството. Протоколот вели дека треба да земеме барем основна лабораторија, да направиме едно интервју за да видиме низ се што прошол додека се лекувал таму. Доаѓањето во својата држава и дома, секако дека за него е да не кажам малку стресна состојба и ние не можеме веднаш да го пуштиме да си оди дома, туку ете малку тука ќе биде со нас, ќе се дружи со нашиот персонал, а во меѓувреме ние ќе ги направиме иследувања, рече Чибишев.
Директорот на Токсикологија нагласи дека според Планот на Кризниот штаб има подготвено повеќе тимови кои се составени од психијатри и психолози кои ќе работат со пациентите кои се лекуваат во земјава и тие што ќе се вратат од странство.
Светската атлетика воведува тест со брис за да се потврди полот на спортистите
Меѓународниот атлетски сојуз денеска (25 март) објави дека го одобрил воведувањето на тест со брис за да се утврди дали спортистот е биолошки жена или не.
„Ова е важен начин да се задржи фокусот на интегритетот на женската конкуренција. Ова е несомнено патот напред“, рече претседателот на Сојузот, Себастијан Коу.
Од 2018 година, регулативите на Светската атлетика бараат од спортистите со родови разлики да го намалат нивото на тестостерон преку хормонска терапија со цел да се натпреваруваат на меѓународно ниво во женска конкуренција.
Оваа регулатива беше потврдена од Судот за спортска арбитража, како и од Федералниот суд во Лозана, кој во својата одлука ја истакна правичноста на натпреварувањето како основен принцип на спортот, врз основа на тоа што нивото на тестостерон им дава предност на спортистките во конкуренција.
Датумот за воведување на новите мерки не е одреден, но „се очекува тие да бидат во сила за време на Светското првенство во Токио“, кое ќе се одржи од 13 до 21 септември оваа година, пренесува АФП.
Не беа откриени доверливи планови, тврди Белата куќа
Белата куќа денеска (25 март) соопшти дека никаква доверлива информација не протекла кога планот за напад на Хутите во Јемен по грешка бил споделен со американски новинар, што е неверојатен безбедносен пропуст за кој се дозна во понеделникот, пренесува АФП.
„Не се зборуваше за 'воени планови'“ и „не беа споделени никакави доверливи информации во дискусијата“, напиша портпаролката на Белата куќа Керолин Левит на „Икс мрежа“.
„Белата куќа се обидува да открие како бројот на (Џефри) Голдберг ненамерно бил додаден во разговорот“, додаде Левит, мислејќи на главниот уредник на Атлантик.
Белата куќа потврди во понеделникот дека главниот уредник на списанието Атлантик по грешка бил вклучен во високо доверлив групен разговор со група високи американски функционери посветен на нападите против Хутите во Јемен.
Ова несомнено се смета за еден од најсериозните безбедносни пропусти во поновата воена историја на САД, оценува АФП.
Голдберг во долгата статија во понеделникот (24 март)откри дека однапред, преку апликацијата за пораки Сигнал, добил детален план за нападот на 15 март извршен од американската војска против оваа бунтовничка група во Јемен.
„Секретарот за одбрана Пит Хегсет ми го испрати планот за напад“ два часа пред почетокот на нападот, вклучувајќи „прецизни детали за оружјето, метите и распоредот“, пишува Џефри Голдберг, главен уредник на престижното списание „Атлантик“.
Голдберг објаснува дека во тој групен разговор имало вкупно 18 луѓе, меѓу кои, според него, државниот секретар Марко Рубио, потпретседателот Џеј Ди Венс и шефот на Централната разузнавачка агенција Џон Ретклиф, како и секретарот за одбрана Пит Хегсет.
До 15 март, тој видел серија пораки од највисоките функционери на американската влада, вклучително и онаа од Пит Хегсет од 15 март, во која се опишани неодамнешните напади.
Новинарот рече дека, додека не излегле првите информации за вистинските напади, тој „силно се сомневал“ во кредибилитетот на оваа група.
„Не знам ништо за тоа“, рече претседателот Доналд Трамп во понеделникот, додека бројни пратеници го осудија протекувањето на информации
Денеска, во телефонски разговор со NBC, Трамп рече дека вклучувањето на новинарите во групата за доверливи дискусии е „грешка“ која на крајот „не била сериозна“.
Тој додаде дека Мајк Волц, советникот за национална безбедност, „научил лекција“ од оваа грешка.
Проверка на лиценците двапати годишно, Владата усвои предлози за законски измени и дополнувања
Владата денеска (25 март)усвои предлози за измени и дополнувања на седум закони во надлежност на Министерството за транспорт и врски. Со нив, ќе се воведе обврска двапати годишно да се врши проверка на сите иматели на лиценци.
Имајќи ги предвид последните трагични случувања, како што посочуваат од Владата, целта е вршење почести контроли на сите иматели на лиценци, дозволи и одобренија односно овластувања.
„Имајќи предвид дека се издаваат многу лиценци, одобренија, дозволи или овластувања од страна на Министерството за транспорт овие законски измени имаат за цел да предвидат законска обврска двапати годишно да се врши таа проверка на сите иматели на лиценци издадени согласно Закон. Тоа секако не ја исклучува можноста да се вршат повеќе контроли односно почести од предвидените со закон“, соопшти владината прес-служба.
Дополнително, како што се посочува во соопштението, законските измени предвидуваат за следните контроли жалбата да не го одлага извршувањето односно суспензијата ќе оди веднаш.
Вицепремиерот Александар Николоски претходно информираше дека од досега исконтролираните над 3 100 лиценци во делот на градежното работење и урбанистичкото планирање, кај 479 е констатирано неправилно работење поради што ќе бидат одземени од правните лица.
„Целта не е да казнуваме, туку компаниите кои доброволно се согласиле на условите што ги предвидува законот, да ги исполнуваат. Феноменот е дека во моментот на поднесување на барањето ги исполнуваат условите, а потоа престануваат да ги исполнуваaт тие услови“, истакна вицепремиерот Николоски.
Тој најави дека листа ќе биде доставена до соодветните институции за натамошно постапување и оти со законски измени таквите контроли ќе бидат обврзувачки на секои шест месеци, а не како досега на доброволна основа.
Папата Франциск бил толку блиску до смртта што лекарите размислувале да го прекинат лекувањето
Поглаварот на Римокатоличката црква бил толку блиску до смртта во еден момент за време на неговата 38-дневна битка со пневмонија во болницата Џемели во Рим што неговите лекари размислувале да го прекинат лекувањето за да му дозволат да умре во мир, изјави шефот на медицинскиот тим на папата Франциск.
По респираторната криза на 28 февруари, кога папата за малку ќе се задушеше од повраќање, „постоеше реален ризик да не успее“, рече лекарот од болницата Џемели, Серџо Алфиери.
„Моравме да одлучиме дали да застанеме таму и да го пуштиме или да продолжиме со сите можни лекови и терапии, изложувајќи го на висок ризик од оштетување на другите органи. На крајот се одлучивме за втората опција“, изјави Алфиери за италијанскиот весник Кориере дела сера, пренесе Ројтерс.
Папата Франциск (88) во неделата (23 март) се врати во Ватикан по најтешката здравствена криза што ја доживеа во неговиот 12-годишен понтификат.
Тој беше примен во болница на 14-ти февруари поради бронхитис кој се разви во билатерална пневмонија, особено сериозна здравствена состојба за некој кој боледувал од плеврит како млад човек, а кај кого потоа хируршки бил отстранет дел од едното белодробно крило.
Ватикан во своите дневни извештаи за здравствената состојба на папата Франциск за време на неговиот престој во болница достави невообичаена количина на детали и информации, пишува Ројтерс.
За време на престојот во болницата, Светиот Отец помина низ четири „респираторни кризи“ кои се манифестираа како тешки напади на кашлање предизвикани од стеснување на неговите дишни патишта, кои потсетуваат на напади на астма.
Со цел Папата целосно да закрепне, лекарите наредиле двомесечен одмор по неговото пуштање од болница.
Не се знае колку ќе може да биде виден во јавноста во наредните денови.
Мултимедија
Најпосетени
Што треба да знаете