Северна Македонија останува во категоријата делумно слободни земји во друштво со Албанија, Косово, Србија, Црна Гора, Босна и Херцеговина, Унгарија, Украина и Молдавија, се вели во новиот извештај на Фридом Хаус.

Најголем пад за последниве десет години од државите во регионот имаат Србија која бележи пад за 21 поен, како и Босна и Херцеговина со намалување на 10 поени.

Во извештајот се наведува дека војните, изборните манипулации и авторитарните режими предизвикале влошување на политичките права и граѓанските слободи во 52 земји во 2023 година, што е една петтина од светската популација.

„Глобалната слобода направи голем чекор назад во 2023 година“, рече Мајкл Џеј Абрамовиц, претседател на организацијата Фридом Хаус.

На таквата слика влијаеле и широките напади на плурализмот, односно мирниот соживот на луѓе со различни политички идеи, религии или етнички идентитети, се наведува во извештајот објавен на 29 февруари.

„Доколку демократските општества не одговорат на овие предизвици, поголем дел од глобалното население ќе биде лишено од основните слободи во годините што доаѓаат, што на крајот ќе влијае на мирот, просперитетот, безбедноста и слободата за сите“, предупреди Абрамовиќ.

Забележан е напредок во 21 земја. Сепак, како што е наведено во извештајот, ова беше засенето од големиот пад на слободите забележан во сите делови на светот.

Категоризирана како „делумно слободна“ земја, Србија е, заедно со Русија, единствената европска земја која се наоѓа на листата на земји со најголем пад во изминатата година. Извештајот не кажува што придонело за ова.

Србија на тој начин го задржа статусот на една од земјите со најзначаен пад во последната деценија. Во оваа група спаѓаат и Босна и Херцеговина, Унгарија, Русија, Турција и Полска.

Слободата во Нагорно Карабах е во најголем пад

Нагорно-Карабах доживеа голем пад на слободата во претходната година, откако речиси целото население од 120 000 етнички Ерменци беше принудено да ја напушти енклавата под силен притисок на азербејџанската војска.

Минатата година Азербејџан започна воена операција за враќање на контролата врз Нагорно Карабах.

Тој регион, со Ерменците како мнозинско население, е меѓународно признат како дел од Азербејџан. Ерменците имаа локална власт таму, поддржана од Ерменија, бидејќи азербејџанските сили и цивилите беа истиснати за време на војната, која заврши со прекин на огнот во 1994 година.

Следна е Нигер, каде слободите се значително намалени како резултат на воениот удар што ја собори демократски избраната влада во јули 2023 година. Тунис, Перу и Судан се меѓу земјите каде е забележан голем пад на слободите.

Војни и авторитарни режими на патот кон слободата

„Вооружените конфликти и заканите за агресија од авторитарни режими го направија светот помалку безбеден и помалку демократски“, предупредува Фридом Хаус.

Тие конкретно се осврнаа на руската инвазија на Украина, која започна на 24 февруари 2022 година.

Посочуваат дека на окупираните украински територии се повеќе се кршат основните права и дека е забележано „сериозно влијание врз и онака малата слобода што претходно постоеше во Русија“.

„Од 2022 година, Кремљ вложи големи напори да го искорени антивоеното несогласување, да го замолчи критичкото медиумско покривање и да го милитаризира руското општество“, се вели во извештајот.

Фридом Хаус понатаму наведува дека илјадници луѓе се соочиле со административни обвиненија и извештаи за критикување на политиката на Кремљ или војната во Украина.

Извештајот се фокусира и на терористичкиот напад на Хамас врз Израел на 7 октомври, во кој загинаа околу 1 200 луѓе, а за кој се вели дека го уништил чувството на безбедност на Израелците во нивните домови.

„Израелската воена кампања што следеше во Појасот Газа, место кое веќе беше меѓу најмалку слободните во светот, доведе до фактот дека до крајот на годината 1,9 милиони луѓе беа раселени, а околу 22 000 загинаа“, се посочува во извештајот.

„Репресиите главно беа вршени од автократски режими, но демократски избраните влади на Израел и Индија беа соучесници во кршењето на основните права на Западниот Брег и Појасот Газа, односно во Кашмир под индиска управа“, заклучува Фридом Хаус.

Во извештајот се споменува и дека цивилите го сносиле најголемиот товар од граѓанската војна што произлезе од воениот удар во Мјанмар во 2021 година, како и од бруталните борби меѓу воените и паравоените фракции во Судан.

Изборни манипулации и глобални слободи

Изборните манипулации беа меѓу водечките причини за глобалната ерозија на слободата, се истакнува во извештајот на Фридом Хаус.

Во различни форми, изборни манипулации и насилство се забележани во дури 26 земји.

Како пример за сериозна закана за демократијата и изборните процеси, тие ги истакнуваат нееднаквите услови за опозицијата, воспоставени многу пред самите избори.

Фридом хаус, меѓу другото, забележува обиди за поништување на легитимниот исход од изборите, по одржувањето на гласањето.

Ова, додаваaт, се случило во Гватемала, Тајланд и Зимбабве, каде имало обиди да се спречат победничките кандидати и партии да стапат на функција.

Како што е нагласено во извештајот, ваквите манипулации го дискредитираат демократскиот процес и доведуваат до фактот дека гласачите всушност немаат право на збор за тоа кој управува со нив.

Во извештајот се посочуваат и примери на прекршување на интегритетот на изборите преку насилство и лоша администрација, кои се забележани во Еквадор, Нигерија и Тајван.

Правата на ЛГБТ-луѓето на удар

Правата на ЛГБТ+ лицата беа цел на рестриктивните закони и во 2023 година, истакнува Фридом Хаус.

Како драстичен пример ја наведуваат Русија, која во текот на годината ја прошири „својата веќе обемна анти-ЛГБТ+ политика“.

Тие потсетуваат дека рускиот претседател Владимир Путин во јули 2023 година потпиша закон со кој се раскинуваат браковите на трансродовите лица и им се забранува да посвојуваат деца.

„Во ноември, рускиот Врховен суд го означи „меѓународното социјално движење ЛГБТ“ како екстремистичка организација и покрај отсуството на кој било конкретен ентитет со тоа име, отворајќи ја вратата за произволно гонење на лица обвинети дека се идентификуваат како ЛГБТ+“, се објаснува во извештајот.

Фридом Хаус во својот извештај укажува и на кршењето на правата на ЛГБТ+ лицата во Турција. Претседателот Реџеп Таип Ердоган ја обвини ЛГБТ+ заедницата за деградацијата на „семејната институција“. Неговата владејачка Партија на правдата и развојот предложи законска промена на дефиницијата за семејство како „единица фокусирана на маж и жена“.

Насилство врз мигрантите и бегалците ширум светот

Мигрантите и бегалците биле подложени на произволна депортација и физичко насилство низ светот во 2023 година, според Фридом Хаус.

Тие посочија неколку од најдрастичните примери.

Потсетуваат дека во април и мај, либанската армија депортирала илјадници Сиријци, вклучително и деца без придружба, кои побарале засолниште во таа земја.

Тие се осврнаа и на фактот дека пакистанската влада најави дека ќе ги депортира сите нерегистрирани мигранти.

„Самата декларација и последователните напори за нејзино спроведување принудија повеќе од 500.000 од 1,7 милиони авганистански бегалци во земјата да преминат во Авганистан“, се истакнува во извештајот.

Фридом Хаус е меѓународна организација, со седиште во Соединетите Држави, која ја документира состојбата со човековите права и слободи во светот. Во своите извештаи секоја година ја проценува состојбата на слобода во 195 земји и 15 територии и ги рангира врз основа на различни индикатори.

Конечно, врз основа на резултатите, земјата или територијата добива статус на слободна, делумно слободна или неслободна.

Русија го погоди украинскиот главен град со балистичка ракета и фрли моќна бомба „глајд“ врз град источно од Харкив, дополнително поткопувајќи ги напорите за зацврстување на примирјето меѓу Москва и Киев.

Редакцијата на Freedom TV беше тешко оштетена во нападот на 6-ти април -- што е втор пат радиодифузерот финансиран од државата да биде цел на руски напади.

Киевските власти соопштија дека едно лице загинало, а најмалку три лица се ранети кога проектилот погодил индустриски кварт, предизвикувајќи пожари и оштетувајќи магацин и други згради.

Жртвите се чинеше дека се минимални бидејќи во областите главно се наоѓаат индустриски бизниси и складишта.

Во соопштението, Freedom TV, која беше основана пред сеопфатната инвазија на Русија во февруари 2022 година, рече дека нејзините редакции биле тешко оштетени, но нема повредени вработени.

Во Купјанск, град источно од Харкив, руските сили фрлија бомба“глајд“ врз станбен кварт, предизвикувајќи голема штета, а ранети се две лица.

Голем дел од градот, кој е блиску до линиите на фронтот, беше евакуиран поради приближувањето на руските сили од север.

„Глајд“ бомбите се тешка муниција и се фрлаат од авиони зад линиите на фронтот. Од овие оружја е тешко да се одбрани, а руските сили ги користат за разурнувачки ефект против украинската одбрана долж линијата на фронтот.

Севкупно, Русија истрела речиси 20 проектили врз украински цели и повеќе од 100 дронови, соопштија официјални лица. Според нив, биле соборени половина од ракетите и речиси половина од дроновите.

Украина од своја страна истрела 11 дронови врз руски цели, соопшти руското Министерство за одбрана.

Во февруари, Кремљ и Белата куќа, како и украинските власти, објавија рамка за ограничен прекин на огнот што ќе ги ограничи нападите врз енергетската инфраструктура како што се електрани, далноводи и трафостаници. Москва и Вашингтон најавија и договор за ограничување на воените активности во регионот на Црното Море.

Сепак, украинските и руските сили продолжија со нападите со дорнови и ракети речиси секоја вечер.

На 4 април, руска ракета за која украинските власти соопштија дека била вооружена со касетна муниција, погодила населба во градот Криви Рих, југоисточно од Киев, при што загинале 19 лица. Беше погодено и детско игралиште, при што загинаа најмалку девет деца. Десетици луѓе беа повредени.

Москва тврдеше дека цел на нападот бил состанок на украинската армија.

Украинските власти прогласија ден на жалост на 6 април за загинатите во нападот.

„Мораме да извршиме притисок врз Русија, која избира убивање деца наместо примирје“, рече претседателот Володимир Зеленски во видео обраќање во текот на ноќта, додавајќи „мораме да воведеме дополнителни санкции против оние кои не можат да постојат без балистички напади врз соседните нации“.

Зеленски, исто така, ја критикуваше изјавата на американската амбасадорка Бриџит Бринк, која рече дека е згрозена од нападот, но не ја именуваше Русија.

„За жал, одговорот од американската амбасада е изненадувачки разочарувачки - толку силна земја, толку силен народ, но сепак толку слаба реакција“, напиша тој во објавата на Телеграм.

Сѐ уште нема реакција од американската амбасада на критиките на Зеленски.

Украинскиот претседател Володимир Зеленски го поздрави „опипливиот напредок“ на потенцијалните мировни сили по средбата со француските и британските воени лидери, набргу откако го критикуваше Вашингтон за, како што рече, „слаб“ одговор на најновиот руски воздушен напад во кој загинаа девет деца, објави Украинскиот сервис на РСЕ, според извештаите на агенцијата Ројтерс.

„Има опиплив напредок и први детали за тоа како може да се распореди безбедносниот контингент на партнери“, рече Зеленски на социјалните мрежи на 5 април, без да даде конкретни детали.

Изјавите дојдоа откако украинскиот воен командант Олександар Сирски и министерот за одбрана Рустем Умеров се сретнаа со началникот на британскиот Генералштаб, Тони Радакин и францускиот колега, Тиери Буркхард во Киев.

Коментарите се појавија и пред пријавениот руски воздушен напад врз главниот град Киев во раните утрински часови на 6 април.

„Експлозии во главниот град. ПВО е активна“, напиша градоначалникот Виталиј Кличко на апликацијата Телеграм. Веднаш немаше достапни информации за жртви или материјална штета.

На почетокот на март, британскиот премиер Кир Стармер најави формирање на „коалиција на подготвени“ за воспоставување воена мисија во Украина, иако напредокот е бавен и многу прашања остануваат нерешени.

Францускиот претседател Емануел Макрон, исто така, презеде водечка улога во напорите да се создаде, она што тој го нарекува „сили за убедување“ за Украина по каков било крај на војната која станува сè повеќе смртоносна по целосната инвазија на Русија во февруари 2022 година.

„Заедно со Коалицијата на подготвените за Украина, ги продолжуваме нашите разговори за долгорочна поддршка за украинскиот народ“, напиша Макрон на X на 5 април.

Британскиот министер за одбрана Џон Хили треба да биде домаќин на министрите за одбрана на ЕУ на 10 април во Брисел за да разговараат за Украина, соопшти Министерството за одбрана во Лондон. Хили потоа ќе ја води Контакт групата за одбрана на Украина со својот германски колега следниот ден.

Претходно, Зеленски силно го критикуваше, како што го нарече „слабиот“ американски одговор на рускиот воздушен напад што погоди игралиште, при што загинаа најмалку 18 лица, од кои половината беа деца.

Москва тврдеше дека цел на нападот, доцна на 4 април -- за кој Киев рече дека вклучува употреба на касетна муниција -- бил кон воен состанок.

Фотографиите и видеата од местото на настанот, сепак, покажаа уништување на игралиште во станбена населба во градот Криви Рих, родниот град на Зеленски.

Амбасадорката на САД во Киев, Бриџит Бринк, во објава на социјалните мрежи рече дека е „згрозена“ од нападот, во кој исто така беа повредени најмалку 74 лица, велејќи дека „затоа оваа војна мора да заврши“.

Но, Зеленски ја критикуваше изјавата за неименување на Русија, нешто што Бринк -- која беше назначен од поранешниот претседател Џо Бајден -- редовно го правеше во изјавите пред претседателот Доналд Трамп да ја преземе функцијата.

Во објава на социјалните мрежи, тој ги наведе имињата и возраста на деветте деца кои починаа, на возраст од три до 17 години, додека го критикуваше Вашингтон за изјавата на амбасадорката Бринк.

„За жал, одговорот од Амбасадата на САД е изненадувачки разочарувачки – толку силна земја, толку силен народ, а сепак толку слаб одговор“, напиша тој, додавајќи „тие се плашат дури и да го кажат зборот 'руски' кога зборуваат за ракетата што ги уби децата“.

Руските напади се меѓу најсмртоносните против цивили оваа година, рекоа украинските власти, и предизвикаа нов гнев во Украина поради тоа што Москва не е посветена на завршување на војната во услови на тековни разговори предводени од САД со двете земји за постигнување примирје.

Денеска (6 април) е прогласен за ден на жалост поради трагедијата во Криви Рих, соопштија украинските власти.

Стотици илјади луѓе учествуваа на повеќе од 1.400 протести низ сите 50 сојузни сојузни држави на САД против претседателот Доналд Трамп и американскиот милијардер Илон Маск, кој е шеф на Одделот за владина ефикасност (DOGE), објавија светските медиуми.

Така, американскиот Си-Ен-Ен и некои други медиуми јавуваат дека милиони луѓе учествувале на протестите, организирани од продемократското движење. Организаторите на демонстрациите велат дека се против, како што го нарекуваат „непријателско преземање“ и напад врз американските права и слободи со, како што велат, преземените потези од Трамп и Маск.

Протести се одржаа во престолнините на американските држави, федералните згради, канцелариите на Конгресот, центрите за социјално осигурување, парковите и градските сали низ САД.

Демонстрантите изразија незадоволство поради низа политички одлуки, вклучително и намалување на правата на трансродовите лица, масовни депортации на мигранти, ограничувања на правата за абортус и планови за намалување на социјалното осигурување.

Организаторите на протестот ги повикаа сите кои меѓу другото се противат на нападите врз демократијата, кратењето на работните места, да се приклучат на демонстрациите.

Според Си-Ен-Ен, Трамп отпуштил најмалку 121.360 вработени во федералните агенции заклучно со 28 март.

Според податоците на организаторите, околу 150 активистички групи се пријавени за учество на протестите. Некои демонстранти носеа украински знамиња, додека други носеа палестински кефии и натписи „Слобода за Палестина“.

Покрај САД, протести против Трамп и Маск се одржаа и во неколку европски градови, вклучувајќи ги Берлин, Франкфурт, Лондон и Лисабон.

Лишено од слобода е едно лице, по друго се трага, во врска со пукањето објавено на социјалните мрежи, информираат од Министерството за внатрешни работи (МВР).

Во текот на вчерашниот ден, врз основа на споделено видео на социјалната мрежа „Фејсбук“ во кое се пука, а поради постоење основи за сомнение за сторено кривично дело, полициски службеници извршиле претрес во село Црнилиште, општина Долнени, во домот на Џ. Ќ., на 51-годишна возраст.

„Пронајдени се три парчиња оружје што ги поседува со дозвола и тоа: полуавтоматска ловна пушка, репетирачки карабин и полуавтоматски пиштол, како и 395 куршуми различен калибар, 17 парчиња ловен патрон и еден ресивер поврзан на видео-надзор инсталиран во домот“, појаснуваат од Министерството.

Пронајдените предмети биле одземени поради сомнение за извршено кривично дело, а потоа, како што инфомира МВР, следи постапка за одземање на дозволата за оружје.

„Џ. Ќ. е лишен од слобода, а се преземаат мерки за пронаоѓање на неговиот син А.Ќ. и за расчистување на случајот“, истакнуваат од МВР.

Израелската армија призна дека нејзините војници направиле грешки во инцидентот на 23 март, кога загинаа 15 работници на итната помош во јужниот дел на Газа, пишува Би-Би-Си. Конвој од амбулантни возила на палестинското здружение Црвена полумесечина (PRCS), возило на ОН и противпожарно возило на Цивилната заштита на Газа беа под оган во близина на Рафах.

Израел првично тврдеше дека војниците отвориле оган бидејќи конвојот „сомнително“ се приближувал во мракот, без вклучени светла или сигнали. Меѓутоа, видеото од мобилниот телефон, снимено од еден од загинатите работници, покажува дека возилата ги вклучиле светлата додека реагирале на повикот за помош за повредените.

Израелските одбранбени сили (ИДФ) тврдат дека најмалку шест болничари биле поврзани со Хамас, кој САД и Европската унија го сметаат за терористичка организација, но допрва треба да достават докази. Признале дека сите биле невооружени кога почнало пукањето. Снимката која прво ја објави Њујорк тајмс покажува како возила застануваат патот пред да започне пукањето без предупредување.

ИДФ соопшти дека војниците претходно пукале во автомобил во кој се наоѓале тројца членови на Хамас. Кога пристигнале возилата на брзата помош и застанале до тој автомобил, војниците претпоставиле дека се под закана и отвориле оган, и покрај тоа што немало докази дека лицата од итната помош биле вооружени.

Телата на 15-те загинати работници биле закопани во песок за да се заштитат од диви животни, а возилата преместени и закопани следниот ден за да се расчисти патот. Телата не беа пронајдени седум дена по инцидентот поради неможноста на меѓународните агенции, вклучително и ОН, да организираат безбеден премин во областа.

Инцидентот поттикна повици од меѓународни организации, вклучувајќи ја и Црвената полумесечина, за независна истрага. Израелската армија вети „темелна истрага“ за да се разбере редоследот на настаните и како да се справи со ситуацијата.

Израел го продолжи своето воздушно бомбардирање и копнена офанзива во Газа на 18 март, откако првата фаза од договорот за прекин на огнот заврши и преговорите за втората фаза заглавија.

Оттогаш во Газа се убиени повеќе од 1.200 луѓе, според Министерството за здравство управувано од Хамас.

Израелската војска започна кампања за уништување на Хамас како одговор на прекуграничен напад на 7 октомври 2023 година, во кој загинаа околу 1.200 луѓе и беа земени 251 заложник.

Оттогаш во Газа се убиени повеќе од 50.600 луѓе, според податоците на Министерството за здравство на територијата.

Времето денеска ќе биде претежно облачно и студено со врнежи од дожд, а во повисоките места од дожд и снег. На планините врнежите ќе бидат од снег. Ќе дува умерен до засилен северен ветер (наместа над 70км/ч.), информираат од Управата за хидрометеоролошки работи (УХМР).

Минималната температура ќе биде во интервал од 2 до 8, а максималната ќе достигне од 5 до 13 степени.

Во Скопје, претежно облачно и студено со врнежи од дожд. Кон крајот на денот во повисоките делови од котлината врнежите ќе бидат од дожд и снег. Ќе дува умерен до засилен северен ветер. Минималната температура ќе се спушти до 7, а максималната ќе достигне до 8 степени.

Во понеделник ќе биде променливо облачно и студено, а наместа повремено ќе провејува слаб снег. Ќе дува засилен северен ветер. Потоа, времето ќе биде стабилно и ветровито со утрински температури кои насекаде ќе бидат негативни, а дневните ќе бидат во пораст, велат метеоролозите.

Основното јавно обвинителство Гостивар до судијата за деца во гостиварскиот суд поднесе барање за поведување подготвителна постапка и предлог за определување мерка притвор за 15-годишно дете за кое постои сомнение дека сторило продолжено кривично дело – Силување дете кое не наполнило 15 години, соопшти Јавното обвинителство.

„Осомничениот, во неколку наврати, искористувајќи отсуство на родителите, намамувал петгодишно девојче во куќа и вршел обљуба врз него“, стои во соопштението.

Судијата за деца денеска(5 април) го прифати предлогот и определи притвор, додаваат од Обвинителството.

Неофицијалните податоци на Институтот за јавно здравје, зборуваат дека сме 9.200, меѓутоа потребите според нашите стандарди се некаде на 14-15.000 медицински сестри, изјави на денешната прес-конференција, Гордана Бешлиовска, претседателка на Унијата што ја предводи Здружението на медицински сестри, техничари, акушерки и стоматолошки сестри „За нас“.

Прес-конференецијата се одржа по повод Првата конференција на медицински сестри од Југоисточна Европа, што се одржува во Скопје.

„Многу е важен моментот со конкурсите што ги очекуваме сега во текот на месец април за да се решат статусите на сестрите коишто се со договор на дело во овој момент во болниците, коишто чекаат и секојдневно се јавуваат во унијата и во здружението и ја очекуваат и понатаму нашата поддршка“, додаде Бешлиовска.

Тоа дека медицинските сестри се многу важни, како што беше истакнато, се покажало и со последната трагедија - пожарот во дискотеката „Пулс“ во Кочани, што се случи на 16 март и зеде 60 жртви.

Ова го нагласија и медицинските лица - гости од странство, кои споделија информации околу состојбата на македонските пациенти повредени во пожарот, кои се лекуваат во нивните земји.

Адриано Фигановиќ, претседател на Европската организација на медицински сестри специјалисти, ја истакна важноста на медицинските сестри, особено во кризни ситуации.

Бешлиовска повторно побара да се направи сестринска комора, закон за сестри и сестрите да бидат лиценцирани.

„Ова што денеска ние ќе го размениме како мислење, со сите наши колеги од Европа и Југоисточна Европа и регионот, не е ништо поразлично нивното од сето она што ние овде го работиме и го правиме, само што тие имаат преточени закони и имаат сестринска документација за истото. Ние сето тоа го работиме, само ни треба за истото запис и ни треба признавање на нашите компетенции и нашите образовни квалификации да ги следат нашите работни задачи во болниците. Тоа е и начинот како ќе ги задржиме сестрите да бидат овде“, децидна беше Бешлиовска.

Според најавата, конференцијата е посветена на важни аспекти што ја дефинираат автономијата и напредокот на сестринството во современото здравство.

Тема е „Патот за автономија на сестринството“, што опфаќа прашања како што се законодавството, образованието и кариерниот развој на медицинските сестри, лиценцирањето и одговорноста, професионалниот авторитет и миграцијата на медицински кадар.

Високата претставничка за надворешна политика и безбедност на Европската унија (ЕУ), Каја Калас, од 7 до 9 април ќе посети повеќе земји од Западен Балкан.

За време на нејзината прва посета на регионот како шефица на европската дипломатија, Калас ќе ги посети Црна Гора, Албанија и Босна и Херцеговина.

ЕУ соопшти дека на првиот ден од нејзината турнеја, во Црна Гора, високата европска функционерка ќе се сретне со претседателот Јаков Милатовиќ и премиерот Милојко Спајиќ. Тој ќе се сретне и со претставници на граѓанското општество.

Црна Гора меѓу земјите во регионот најмногу напредуваше на патот кон членство во ЕУ.

Калас на 8 април во Албанија ќе има средби со претседателот Бајрам Бегај и со премиерот Еди Рама. Таа ќе одржи и заедничка прес-конференција со Рама.

Шефицата на европската дипломатија во Албанија ќе се сретне и со министерот за Европа и европски прашања Игли Хасани и со министерот за одбрана Пиро Венгу.

„Ќе учествува на првиот состанок за Дијалогот за безбедноста и одбраната ЕУ-Албанија со министрите Хасани и Венгу. Исто така, Калас ќе присуствува на церемонијата на потпишување на грант од Европската инвестициска банка и договор за заем за пругата Драч-Рогозин“, се наведува во соопштението.

На последната станица од посетата на Западен Балкан, Каја Калас ќе престојува во Босна и Херцеговина, каде ќе оствари средби со членовите на тричленото Претседателство, претседателот на Советот на министри и министерот за надворешни работи на Босна и Херцеговина, како и со претставници на ЕУФОР.

За време на сослушувањето за потврда за нејзиното назначување за шефица за надворешни работи на ЕУ, Калас вети дека ќе работи на тоа проширувањето на ЕУ да стане реалност. Шест земји од Западен Балкан - освен Косово - како и Украина, Молдавија, Грузија и Турција се кандидати за членство во ЕУ.

Косово поднесе барање за членство во европскиот блок, но оваа апликација уште не е разгледана.

Со транспарент на кој пишува „Марш за 59-те ангели“, држејќи фотографии на жртвите во пожарот во кочанската дискотека, членови на нивните семејства го предводеа денешниот (5 април) мирен протест на кој стотици граѓани облечени во црно маршираа низ улиците во Кочани.

Кој го уби мојот ангел, кој го уби мојот херој, кој ги пеплоса тие ангелски лица? Вакво прашање пред судот во Кочани постави мајка на една од жртвите.

Учесниците во маршот побараа правда и одговорност и преку транспаренти на кои пишуваше „стоп за селективна правда, коруптивниот ситем ги уби нашите деца како и ова не е несреќа, ова е убиство“.

Во известувањето за маршот до МВР Кочани кое претходно беше објавено на социјалните мрежи, стоеше дека тој се одржува „за потсетување на институциите дека семејствата ќе ја бараат правдата за нивните покојни деца сè до последен здив и дека ќе бараат брза и непристрасна истрага и судска постапка“, а како организатори беа наведени семејствата на жртвите.

Организаторите на маршот во известувањето нагласија и дека тој „не е за лицата од обезбедувањето во дискотеката, а граѓаните кои не го прифаќаат тоа укажување не мора да се приклучуваат“.

Мирниот собир почна во Паркот на Револуцијата во 12 часот и 5 минути, како симбол на задоцнетата институционална реакција.

За денеска и утре попладне во Кочани е закажан уште еден протестен марш наречен „Ваш профит – наши животи“, но во објавите на социјалните мрежи не е наведено кој е негов организатор.

Од вчера (4 април) бројот на жртви е 60, откако почина Александар Карадакоски, кој на хартија беше управител на дискотеката „Пулс“, а кој беше на лекување во Литванија.

По пожарот што се случи рано изутрина на 16 март, повеќе од 200 луѓе беа повредени. Најголемиот дел од нив беа испратени на лекување во странство.