Повеќе од 10.000 корисници во областите Златибор, Рашин и Рашкa во Србија во моментов се без електрична енергија поради дефекти на мрежата предизвикани од снежните врнежи и бурните ветрови, објави Радио-телевизија Србија (РТС) на 22 ноември.

Станува збор за области во централниот и југозападниот дел на Србија.

Според јавниот сервис, 160 екипи на Електродистрибуција Србија биле ангажирани за санирање на дефекти на територијата на дистрибутивната област Краљево, која опфаќа 43 општини и 11 градови со околу 900.000 корисници.

Видете и ова:

Делови од Шпанија во опасност од обилни врнежи и поплави

Балканскиот сервис на РСЕ побара повеќе детали од Електропривреда Србија, но до објавувањето на веста, одговорот не стигна.

Во текот на вечерта во Србија се очекува формирање на снежна покривка од пет до 10 сантиметри во пониските делови, а повеќе од 20 сантиметри на планините.

Компанијата „Ер Србија“ соопшти дека неповолните временски услови во Белград и на одредени аеродроми во регионот, ќе се одразат на протокот на сообраќајот на српската национална авиокомпанија и ќе доведат до доцнења и можни откажувања на одредени летови.

Претседателката на Северна Македонија, Гордана Сиљановска-Давкова денеска (22 ноември) во својот кабинет остварила средба со Радмила Шекеринска откако во вторникот поранешната министерка за одбрана беше избрана за заменик-генерална секретарка на НАТО.

Сиљановска-Давкова преку социјалните мрежи соопшти дека имале пријатна средба и плоден разговор, а назначувањето на Шекеринска, порача, е и државно признание.

„Искрени честитки за престижната функција, којашто е не само лично, туку и државно признание, доказ дека единството и консензусот меѓу носителите на највисоките функции се клучот за успехот и афирмацијата на државата“, напиша Сиљановска-Давкова на социјалните мрежи.

Во соопштение објавено од претседателскиот кабинет, пак, наведоа дека претседателката изразила уверување дека Шекеринска „ќе даде значаен придонес во остварувањето на клучните цели на Алијансата: унапредувањето на колективната безбедност, зајакнувањето на солидарноста меѓу сојузниците и справувањето со современите закани“.

„Со изборот на Радмила Шекеринска на високата функција во НАТО, Алијансата јасно и отворено ја манифестира свеста за важноста на регионот, како и посветеноста кон него“, соопштија од кабинетот на Сиљановска-Давкова.

Претходно, премиерот и лидер на ВМРО-ДПМНЕ, Христијан Мицкоски, изјави дека како Влада ја поддржале кандидатурата на Шекеринска која, инаку, долги години беше функционер до ривалскиот СДСМ.

Веста за изборот на Шекеринска за заменик-генерална секретарка на НАТО ја објавија од Алијансата на 19 ноември.

Дента, таа не доби честитки ниту од премиерот ниту од претседателката. Мицкоски ден потоа изјави дека имале телефонски разговор и и честитал.

Сиљановска-Давкова, исто така, на 20 ноември објави дека разговарале телефонски и ја поканила Шекеринска на средба.

Видете и ова:

Шекеринска - првата жена од Западен Балкан на висока функција во НАТО

Претседателката, како што може да се забележи на фотографии објавени од функционери на социјалните мрежи, присуствувала и на свечениот прием што го организирала Шекеринска денеска по повод назначувањето на функцијата.

Со нејзиното назначување, поранешната министерка за одбрана на Северна Македонија, стана највисокиот функционер во Алијансата досега што доаѓа од регионот на Западен Балкан, но и од земја надвор од Европската унија.

Пополнувањето на заменичката позиција беше приоритет за генералниот секретар Марк Руте, кој ја презеде оваа функција на 1 октомври, по 14 години како холандски премиер.

Ескалираат верските тензии во северозападниот дел на Пакистан откако беше извршен смртоносниот напад врз шиитски муслимански конвој, кој се закани да предизвика ново разгорување на насилството во регионот Кибер-Пахтунхва.

Еден ден по нападот на конвојот од 200 возила што патуваше од Пешавар до Парачинар, главниот град на областа Курам, властите денеска (22 ноември) воведоа полициски час и ги прекинаа услугите на мобилната телефонија во оваа оддалечена планинска област.

Дописниците на РСЕ јавија дека вооружени мажи запалиле воен контролен пункт во Курам во текот на ноќта.

Група од десетици гневни луѓе кои носеа автоматско оружје се собраа во Парачинар, додека стигаат информации дека неколку пакистански воени и паравоени објекти на граничната полиција биле нападнати и уништени.

Видете и ова:

Смртоносна експлозија одекна низ пакистанската железничка станица, над 20 загинати

Дописниците на РСЕ јавуваат дека постојано се слушаат силни пукотници.

Џамшед Ширази, активист во Парачинар, за РСЕ изјави дека неколку владини згради биле оштетени од демонстранти.

„Луѓето го изразуваат својот гнев со напади на владини канцеларии“, рече Ширази.

Џалал Хусеин Бангаш, локален шиитски водач, изрази вознемиреност од насилството за време на петочната молитва и рече дека шиитите немаат никаква врска со тоа, јавуваат репортерите на РСЕ.

Хамид Хусеин, пратеник од Курам во националниот парламент, тврди дека насилството е дело на провокатори.

„Ние сме беспомошни. Ниту шиитите, ниту сунитите не се вклучени во ова. Тоа се некои други невидливи сили кои не сакаат да видат мир во областа“, изјави Хусеин за РСЕ.

Најмалку 48 лица, меѓу кои неколку жени и деца, загинаа, а повеќе од 40 беа ранети кога вооружени напаѓачи отворија оган врз конвој возила во областа Курам во провинцијата Хајбер-Пахтунхва, во близина на границата со Авганистан во четвртокот.

Локалните лидери за РСЕ изјавија дека повеќето од убиените се шиити, но оти меѓу загинатите има најмалку четворица сунити.

Никој не ја презеде одговорноста за нападот кој беше последен во серијата смртоносни судири во Курам, област која долго време е позната како жариште на шиитско-сунитскиот конфликт.

Локалниот племенски водач Малик Дилдар Хусеин за РСЕ изјави дека во конвојот имало околу 700 луѓе.

Видете и ова:

Конвој со странски дипломати нагази на мина во Пакистан

Тензиите во Курам почнаа да се зголемуваат во последниве месеци, бидејќи повторно се појавија судири меѓу сунитските и шиитските муслимански племиња.

Во напад на конвој на 12 октомври загинаа 17 лица, а оттогаш имаше уште неколку други смртоносни напади.

Сунитите и шиитите живеат заедно во Курам и со години имаат меѓусебни судири за земја, шуми и други имоти, како и за религијата, и покрај напорите на владата и безбедносните агенции да го вратат мирот во областа.

Малцинските шиити долго време трпат дискриминација и насилство во Пакистан кој е со мнозинството сунити.

Бугарија и Романија би можеле да станат полноправни членки на Шенген зоната од почетокот на 2025 година, соопшти денеска (22 ноември) Унгарија – земјата претседавач со ЕУ, додавајќи дека конечната одлука ќе биде донесена на состанокот на министрите за внатрешни работи на ЕУ во декември.

Двете источноевропски земји се приклучија на Европската унија во 2007 година, но не беа дел од безграничната Шенген зона до март годинава, кога делумно беа укинати граничните контроли односно само за морскиот и воздушниот сообраќај.

Контролата на копнената граница остана на сила поради противењето првенствено од Австрија, која долго време го блокираше влезот на двете земји во Шенген зоната поради загриженоста за илегалната миграција.

Откако министрите за внатрешни работи на Австрија, Бугарија, Унгарија и Романија денеска се сретнаа во Будимпешта, Австрија се повлече од своето противење, отворајќи го патот за конечна одлука на самитот на министрите за внатрешни работи на ЕУ во декември.

Видете и ова:

Романија и Бугарија делумно влегоа во Шенген зоната

Унгарскиот министер за внатрешни работи, Шандор Пинтер, изјави дека Романија и Бугарија, кои се граничат со земји надвор од ЕУ, сега се „чекор поблиску до полноправни членки на Шенген“.

Тој додаде дека постои „јасна можност“ да се заврши процесот до крајот на годината и дека земјите ќе мора заеднички да испратат најмалку 100 граничари на границата меѓу Бугарија и Турција.

Еврокомесарката за внатрешни работи, Илва Јохансон, која исто така учествуваше на состанокот, во видеото објавено на мрежата Х порача: „Ова е голем ден за целосна слобода за сите граѓани на Бугарија и Романија во Шенген зоната и многу сум среќна“.

Романскиот премиер Марсел Чолаку претходно во понеделникот најави дека двете земји ќе се приклучат на Шенген зоната следната година, опишувајќи го состанокот во Будимпешта на четворицата министри за внатрешни работи како „клучен“.

Чолаку рече дека холандскиот парламент, кој исто така се спротивстави на пристапувањето на Бугарија во Шенген, исто така ќе мора да даде зелено светло.

Романија и Бугарија се на главните рути за илегална трговија со оружје и дрога, но и со луѓе. Сепак, Европската комисија по деталната анализа објави дека тие ги исполнуваат сите шенгенски услови.

Почнувајќи од 31 март 2024 година, Романците кои патуваат со авион до и од земјите од Шенген, повеќе нема да бидат предмет на контрола на граничната полиција. За децата, пак, ќе бидат потребни валидни патни документи и родителска согласност.

Романија го опиша австриското вето како неоправдано, повикувајќи се на податоци на граничната агенција Фронтекс кои покажуваат дека илегалните мигранти најмногу влегле во ЕУ од Западен Балкан, а не од Романија.

Шенген зоната е основана во 1985 година. Пред делумниот прием на Бугарија и Романија, во неа беа 23 од 27-те земји-членки на ЕУ, заедно со Швајцарија, Норвешка, Исланд и Лихтенштајн.

Претседателката на Европската комисија Урсула фон дер Лајен, преку мрежата X порача дека двете земји „целосно припаѓаат на Шенген зоната“.

„Го поздравувам позитивниот исход од неформалните разговори во Будимпешта денеска. Шенген нека биде посилен во 2025 година“, напиша Фон дер Лајен.

Граѓани од скопската општина Шуто Оризари, но и средношколци и студенти попладнето на 22 ноември излегоа на протест пред Град Скопје за да го искажат својот револт од нередовниот градски превоз во главниот град на Северна Македонија.

„Јавен превоз, а не јавен хаос“ е мотото под кое излегоа студентите и побараа политичките препукувања да не влијаат на благосостојбата на граѓаните.

„Ако сакаат младите да си заминат од државата и да не нудат решение, нека не нудат“, изјави за Радио Слободна Европа, Александар Николовски, претседател на Универзитетското студентско собрание на Универзитетот „Св. Кирил и Методиј“ – Скопје (УКИМ).

Протестот следуваше откако претходните два дена автобусите на Јавното сообраќајно претпријатие (ЈСП) Скопје останаа без нафта и во главниот град едвај сообраќаа 30-тина автобуси.

Владата на итна седница вчера одлучи да даде нафта за седум дена од државните резерви односно додека ЈСП не ја спроведе јавната набавка.

„Седум дена не се решение, нас ни треба долгорочни решенија и срамота е во 21 век немањето автобус да е проблем на студентите, средношколците и на сите граѓани. Овој револт го искажуваме затоа што сметаме дека не треба политичките и партиските препукувања помеѓу раководството на Градот да влијаат на благосостојбата на граѓаните“, рече Николовски.

На нивниот повик за протест се приклучи и Сојузот на средношколци, кој меѓу другото бара градските власти да ја почитуваат одлуката на Уставниот суд и бесплатен јавен превоз да имаат и средношколците од приватните училишта, а не само тие од државните.

Видете и ова:

Ако сака, Владата може да и одземе ингеренции на Арсовска

Покрај тоа, со нередовен превоз, како што велат, се соочуваат од стартот на учебната година.

„Проблемот е повеќе од два дена, од стартот на септември учениците што се подалеку од училиштето не може да стигнат на првите часови. Некои професори имаат разбирање, некои немаат. Губат часови и тоа отсуство им прави проблеми и за оценки и за учење“, изјави за РСЕ претседателот на Сојузот на средношколци, Берим Мухамед.

Студентите и средношколците се собраа кај стариот објект на Пошта од каде се упатија кон канцелариите на Град Скопје. Таму веќе беа дел од жителите на Шуто Оризари, општина во рамки на Градот Скопје каде од ЈСП сообраќа само автобусот со број 19.

„Дојдовме да си го бараме правото како и секој граѓанин на Скопје. И ние имаме потреба од јавен превоз, последнава година немаме јавен превоз во Шуто Оризари. Се случува во текот на денот скоро ич да нема автобуси. Доцниме на работи, тие што идат на училиште имаат проблеми со професорите. Се организираме со тие што имаат коли, но не е тоа решение“, рече Рамиз Хамез за РСЕ, еден од граѓаните кои присуствуваа на протестот.

Има само една 19-ка државна и врти по цел ден, кога ќе дојде се полни уште на прва станица, додаде негов сограѓанин, Ѓувим Бајрами.

„Искрено не верувам дека ќе има решение зашто вака и пред една година се собравме, немаше ништо. Како што гледате во Советот на Град Скопје и градоначалничката се препукуваат меѓу себе. Хаос е, а граѓаните трпат. Да не зборуваме дека ни беше ветен бесплатен превоз“, вели Бајрами.

Жителите на Шуто Оризари за време на протестот револтирано се доближија и до портата на Град Скопје повикувајќи ја градоначалничката Данела Арсовска да излезе и да се соочи со нив.

Порачаа дека ќе излезат на протест повторно за да побараат редовен јавен превоз.

Од Град Скопје, пак, се огласија по денешниот протест, но во реакцијата ги споменаа само жителите на Шуто Оризари кои се од ромска националност, обвинувајќи ја владејачката партија ВМРО-ДПМНЕ за „злоупотреба на најзагрозеното малцинство во Македонија за остварување на теснопартиските политички цели“.

„Пред да го организираат протестот пред градот Скопје од ВМРО-ДПМНЕ, претседателот на Општинскиот комитет на ВМРО-ДПМНЕ од Шуто Оризари Ерџан Демир кој ги предводи и кој воедно беше и кандидат за пратеник од истата партија, би требало да ги информира своите сограѓани дека во Шуто Оризари нема јавен превоз бидејќи советничката група на ВМРО-ДПМНЕ во Советот на Град Скопје одбива да им овозможи на приватните превозници да возат на нивните автобуски линии согласно барањата кои ги имаат доставено до Трајко Славевски пред неколку месеци“, реагираа од Град Скопје.

По градоначалникот на Шуто Оризари, Курто Дудуш, кој го поддржа протестот, пак, од кабинетот на Арсовска го обвинија дека сака да и се допадне на ВМРО-ДПМНЕ.

Едно од клучните ветувањата на градоначалничката Данела Арсовска и ВМРО-ДПМНЕ, партија која ја поддржа на локалните избори во 2021, беше бесплатен јавен превоз за скопјани. Меѓутоа, патиштата им се разделија по помалку од една година од мандатот со меѓусебни обвинувања и јавно изнесени сомнежи за криминални активности. Оттогаш, голем број проекти во Градот Скопје се блокирани, меѓу кои и набавката на нови автобуси како и реализација на проектот за брз автобуски систем – Бас рапид транзит (БРТ). Покрај со јавниот превоз, жители на главниот град на Северна Македонија изминатиот период изразуваат незадоволство и од работата на останатите градски институции меѓу кои и комуналните претпријатија односно проблемите со отпадот и хигиената во градот.

Авторитарниот лидер на Белорусија Александар Лукашенко се закани дека ќе го исклучи интернетот во земјата во случај на масовни протести за време или по претстојните претседателски избори.

Ваквата закана од Лукашенко следува откако по изборите пред четири години избувнаа немири, а опозицијата тврдеше дека гласањето било наместено.

Обраќајќи им се на студентите на Државниот лингвистички универзитет во Минск, Лукашенко ги бранеше ограничувањата кои тогаш ги воведе и предупреди дека ќе има и нови за да ги сузбие различните мислења.

„Ако ова се повтори, целосно ќе го изгаснеме. Мислите ли дека ќе седам со скрстени раце и ќе се молам да не испраќате пораки кога е во прашање судбината на земјата“, рече Лукашенко, според извештајот од државната новинска агенција БелТА.

Видете и ова:

Човечката цена на уништувањето на независните медиуми во Белорусија

Лукашенко призна дека прекинот на интернетот за време на протестите во 2020 година се случил со негово одобрение, наведувајќи ја потребата да се „заштити земјата“.

По изборите на 9 август 2020 година, за кои многу западни влади рекоа дека не биле слободни и фер, пристапот до Интернет низ Белорусија беше прекинат неколку дена и повремено блокиран.

Спорните избори, со кои Лукашенко го продолжи своето владеење од 1994 година, беа осудени од САД, Европската унија и другите меѓународни актери.

Како одговор на протестите со кои се бараше оставка од Лукашенко, следеа масовни апсења, наводни мачења на затвореници и насилни акции во кои загинаа неколку луѓе.

Многу опозициски лидери се во затвор или во егзил, а Лукашенко одбива да разговара со своите критичари.

Следните претседателски избори во Белорусија се закажани за 26 јануари.

Алсу Курмашева, новинарка на Татарско-башкирскиот сервис на Радио Слободна Европа, ја прими Меѓународната награда за слобода на печатот од страна на Комитетот за заштита на новинарите (CPJ) на церемонијата одржана во Њујорк на 21 ноември.

Курмашева, која неодамна беше ослободена откако помина 288 дена во притвор во Русија, се заблагодари на Комитетот за напорите да биде ослободена.

„Новинарството не е кривично дело“, рече таа, истакнувајќи дека во моментов во Русија се затворени повеќе од 20 новинари.

Курмашева додаде дека наградата им ја посветува на нејзините колеги кои сè уште се затворени, вклучувајќи ги новинарите на РСЕ Ихар Лосик и Андреј Кузнечик во Белорусија, Владислав Јесипенко на Крим и Фарид Мехрализада во Азербејџан.

„Моите колеги не се само статистика. И тие како и мене се вистински луѓе со семејства на кои им недостасуваат и ги сакаат. Има десетици други новинари во руските затвори. Тие треба веднаш да бидат ослободени“, рече Курмашева.

Меѓу другите добитници на наградата оваа година беа палестинскиот новинар Шорук ал-Аила, новинарот од Гватемала Кими де Леон и нигериската истражувачка новинарка Самира Сабу.

Embed share

„Конечно во добри раце“: Ослободената новинарка на РСЕ, Алсу Курмашева, за животот по рускиот затвор

Embed share

The code has been copied to your clipboard.

---

width px height px

---

The URL has been copied to your clipboard

No media source currently available

0:00 0:14:00 0:00

Директен линк

• 240p | 38,6MB
• 360p | 56,2MB
• 480p | 83,6MB
• 720p | 185,6MB
• 1080p | 259,7MB

Приведена од властите во јуни 2023 година додека била во посета на роднините во централниот руски град Казан, Курмашева првично беше обвинета дека не го пријавила американскиот пасош. Прво беше ослободена, но и беше забрането да ја напушти земјата.

Во октомври Курмашева беше уапсена, затворена и обвинета дека е непријавен „странски агент“ - според спорниот руски закон насочен против новинари, активисти на граѓанското општество и други.

Нејзиното обвинение подоцна беше дополнето со дистрибуирање на, како што тврди владата, лажни информации за руската војска, обвинение што произлегува од нејзината работа како уредник на книга за Русите кои се противат на тековната инвазија на Украина.

Видете и ова:

Затворениците кои останаа во Русија по историската размена

РСЕ, како и владата на САД, ги нарекоа обвиненијата апсурдни.

Размената на затвореници, која се реализираше на 1-ви август, опфати вкупно 24 лица, вклучувајќи ги Курмашева, новинарот на Вол Стрит Џурнал, Еван Гершкович и рускиот политички активист Владимир Кара-Мурза.

На украинските пратеници им беше препорачано да ја избегнуваат областа околу парламентот на 22 ноември, а парламентот ја откажа закажаната седница поради предупредувањата за потенцијален ракетен напад.

„Ние бевме информирани за ризикот од ракетен напад врз Врховната Рада во Киев во наредните денови. Путин значително го зголеми влогот. Утрешната парламентарна седница е откажана“, објави вчера пратеникот Тарас Батенко.

Другите пратеници за Радио Слободна Европа го потврдија откажувањето на седницата, а пратеникот Олексеј Хончаренко на Телеграм рече дека следната седница сега е планирана за декември.

Лидерите на парламентот официјално не ги коментираа предупредувањата. Кабинетот на претседателот ја увери јавноста дека ќе продолжи да работи „како и обично“ на 22 ноември.

Овој потег доаѓа еден ден откако рускиот претседател Владимир Путин го објави „успешното борбено тестирање“ на новата балистичка ракета со среден дострел „Орешник“ во Украина.

Путин тврди дека проектилот бил употребен во нападот врз источниот украински град Днипро, тврдејќи дека тоа е одговор на „агресивните дејствија“ на НАТО и тоа што Украина користи ракети испорачани од Западот за цели на руска територија.

Видете и ова:

Путин:Русија истрела нова ракета со среден дострел, а не балистичка

Воздухопловните сили на Украина известија за повеќекратни ракетни напади врз Днипро на 21 ноември, вклучително и употреба на, како што рече, интерконтинентална балистичка ракета. Локалните власти потврдија штети на индустриски капацитети, два пожари и три повредени.

Киев веќе неколку дена е цел на интензивните напади околу Украина од страна на Русија.

Амбасадата на САД во Украина предупреди на значителен руски воздушен напад на 20 ноември, што доведе до привремено затворање на нејзините операции. Амбасадите на Шпанија, Италија и Грција, исто така, ги прекинаа услугите за тој ден.

Во меѓувреме, на социјалните мрежи кружеа шпекулации за потенцијални напади со балистички ракети РС-26 Рубеж од рускиот регион Астрахан, иако на 20 ноември информациите не беа потврдени.

Годинава се убиени повеќе хуманитарни работници отколку во било која година досега, соопшти во петок (22 ноември) хуманитарната канцеларија на Обединетите Нации, наведувајќи дека мнозинството биле убиени во конфликтот во Појасот Газа.

Според базата на податоци за безбедност на хуманитарните работници, која евидентира вакви инциденти од 1997 година, досега оваа година загинале 281 хуманитарен работник.

Претходниот рекорден број на смртни случаи на хуманитарни работници беше минатата година кога беа убиени 280 лица.

Базата на податоци покажува дека 178 хуманитарни работници биле убиени на окупираните палестински територии, вклучувајќи го и Појасот Газа. Во Судан загинаа 25 хуманитарни работници.

Видете и ова:

САД го повикаа Израел да ја повлече забраната за работа на агенциите на ОН

Повеќето од загинатите се локални вработени во хуманитарни организации, додека 13 од нив се хуманитарни работници кои дошле од други земји, соопштија од ООН.

„Ова насилство е несовесно и уништувачко за хуманитарните операции. Државите и страните во конфликтот мора да ги заштитат хуманитарците, да го почитуваат меѓународното право, да ги гонат одговорните и да стават крај на оваа ера на неказнивост“, изјави портпаролот на Канцеларијата за хуманитарна помош на ОН (OCHA), на прес-конференција во Женева.

Хуманитарните работници уживаат заштита според меѓународното хуманитарно право, но експертите велат дека има мал преседан таквите случаи да одат на суд, бидејќи бариерите за тоа вклучуваат загриженост за обезбедување иден пристап за хуманитарните организации и тешкотии во докажувањето на намерата.

Унгарскиот премиер Виктор Орбан го покани својот израелски колега да ја посети Унгарија, пркосејќи му на налогот за апсење за Бенјамин Нетанјаху, издаден од Меѓународниот кривичен суд (МКС).

Орбан, говорејќи за време на неговото редовно неделно интервју за унгарското државно радио, на 22 ноември рече дека одлуката на МКС еден ден претходно да издаде налог со кој се обвинува Нетанјаху за „злосторства против човештвото и воени злосторства“ извршени за време на војната во Газа е „безобразно дрска“ и „цинична“.

МКС издаде слични налози за апсење на поранешниот израелски министер за одбрана Јоав Галант и воениот водач на Хамас за кој Израел тврди дека го убил, но чија смрт групата која е прогласена за терористичка од САД и ЕУ официјално не ја признаа.

МКС соопшти дека Нетанјаху и Галант се осомничени дека користеле „гладување како метод на војување“ со ограничување на хуманитарната помош додека гаѓале цивили во израелската војна во Газа - обвиненијата што израелските власти ги негираат.

Орбан рече дека потегот на МКС против Нетанјаху „интервенира во тековен конфликт... обликуван како правна одлука, но всушност за политички цели“.

„Подоцна денеска ќе го поканам израелскиот премиер г-дин Нетанјаху да ја посети Унгарија, каде што ќе му гарантирам, доколку дојде, дека пресудата на МКС нема да има ефект во Унгарија и дека нема да ги следиме нивните услови“, додаде тој.

„Овде нема избор, мораме да и пркосиме на оваа одлука“, рече Орбан.

Видете и ова:

Судот во Хаг бара апсење на Нетанјаху и воениот лидер на Хамас, Деиф

Набргу по објавувањето на одлуката на МКС, првиот човек на Европската Унија, Жозеп Борел, рече дека одлуките на МКС „се обврзувачки за сите земји-членки на Римскиот статут, кој ги вклучува сите земји-членки на ЕУ“.

Унгарија, земја членка на НАТО и Европската Унија, го потпиша и ратификуваше документот од 1999 година. Сепак, таа не ја објави поврзаната конвенција на статутот и затоа тврди дека не е обврзана да се придржува кон одлуките на МКС.

Како десничарски националист на власт од 2010 година, Орбан одржува блиски односи со рускиот претседател Владимир Путин и изрази противење на санкциите на ЕУ наметнати на Москва по нејзината неиспровоцирана инвазија на Украина во февруари 2022 година.

Орбан претходно изјави дека ниту Унгарија нема да го уапси Путин, и покрај налогот за апсење на МКС издаден по името на рускиот лидер за воени злосторства за неговата улога во депортирањето на украинските деца.

Понатаму, тој отпатува за Москва во јули веднаш откако Унгарија го презеде ротирачкото шестмесечно претседавање со ЕУ за да се сретне со Путин.