Вести
Заев: Перспективите ни се на дланка, од нас зависи
Премиерот Зоран Заев денеска изјави дека сите држави, пријатели на Македонија, сакат да ја видат земјата просперитетна.Тој информирајќи за престојот и активностите на владината делегација на 72. Генерално собрание на ОН во Њујорк посочи и дека отворени се вратите за соработка со светот. Според него, останува да се спроведат реформите од Планот 3-6-9.
„Перспективите ни се на дланка, од нас зависи“, рече Заев.
На прес-конференцијата во Владата на која присуствуваше и министерот без ресор задолжен за дијаспората Едмонд Адеми, Заев нагласи и дека Македонија има подадена рака да продолжи по патот на прогресот. Заев посочи и дека идната пролет ЕУ ќе дискутира за проширување и давање шанса на земји од Западен Балкан за почеток на преговори.
„Ние би сакале Македонија да биде една од земјите која ќе ги почне преговорите. Сето тоа најавува, дека до тој период, до средината на 2018 година, логично и нормално е да очекуваме нови идеи од медијаторот Метју Нимиц на кои македонската и грчката страна ќе разговараат и ќе даваат свои коментари, ќе преговараат за се што е во функција на изнаоѓање решение за името“, истакна Заев.
Сите официјални средби меѓу македонската и грчката страна, според него, само во насока на помош за решавање на прашањето за името. Но, како што посочи Заев, не е навлезено во разговори за суштествени прашања поврзани со проблемот.
види ги сите денешни вести
Нови приведувања за пожарот во Кочани
Нова акција за приведување инволвирани во истрагата за пожарот во дискотеката Пулс во Кочани има доцна вечерва, потврдуваат од обвинителството и од МВР за Радио Слободна Европа.
„Во тек е акција на полициски екипи по наредба на Основното јавно обвинителство Кочани, а во врска со постапката за пожарот во клубот "Пулс". Акцијата за приведување лица за кои постои сомнение за инволвираност ќе трае во текот на ноќта, а повеќе информации обвинителството ќе соопшти по завршување на акцијата во текот на утрешниот ден“, велат од двете институции.
РСЕ од извори од истрагата дознава дека акцијата за приведување се уште трае, а меѓу уапсените се актуелниот и двајца поранешни градоначалници на Кочани.
Инаку актуелниот градоначалник Љупчо Папазов, веќе беше повикан на информативен разговор, но по тоа беше пуштен. Во исто време тој на социјалните мрежи објави дека си дава неотповиклива оставка.
Полицијата и обвинителството влегоа и во општинската зграда и запленија документација.
Во пожарот загинаа 59 млади, а 173 се на лекување.
Се бара притвор за раководителот на урбанизам во Маврово осомничен за мито
Јавното обвинителство за гонење организиран криминал и корупција отвори истрага за раководителот на Одделението на урбанизам и комунални дејности при Општина Маврово Ростуше, откако МВР вчера поднесе кривична постапка до него.
Го сомничи дека како раководно службено лице од почетокот на годинава во повеќе наврати директно побарал и примил поголема имотна корист за себе и за трети лица за да извршат службено дејствие што морале да го извршат, се вели во соопштението од обвинителството.
Осомничениот во два наврати директно побарал од подносител на барање паричен износ од 16.000 евра, а потоа износот во понатамошните средби со оштетениот го намалил на 13.000 евра, за да тој и комисијата што одлучувала во управна постапка по барањето за издавање на урбанистички проект да постапат по барањето на оштетениот.
Дел од парите наводно биле за другите службеници вклучени во управната постапка за да одлучат во побрз рок. Со оглед дека било договорено парите етапно да бидат исплаќани како што ќе се одвива управната постапка, осомничениот за првото дејствие побарал износ од 4.400 евра.
Вчеравечер на договорената средба оштетениот му дал 2000 евра, кои осомничениот ги примил и бил фатен од страна на полициските службеници.
Јавен обвинител на судијата на претходна постапка при Основниот кривичен суд Скопје му предложи да биде орпеделена мерка притвор на осомничениот во траење од 30 дена.
Талибанците го ослободија американскиот државјанин Глезман
Американскиот државјанин Џорџ Глезман беше ослободен од притворот во Кабул по првата посета на висок американски функционер на Авганистан откако Талибанците ја презедоа власта во земјата по повлекувањето на меѓународните трупи од земјата разурната од војна во август 2021 година.
Поранешниот американски специјален пратеник за Авганистан Залмај Калилзад во објава на мрежата Х рече дека откако тој и Адам Болер, висок советник во Канцеларијата на специјалниот претседателски пратеник за прашања на заложниците, се сретнале со талибанските претставници на 20 март, 66-годишниот Глезман бил „на пат кон дома“.
„Успеавме да обезбедиме ослободување на американскиот државјанин Џорџ Глезман, по две години во притвор во Кабул. Талибанската влада се согласи да го ослободи како гест на добра волја кон претседателот [Доналд Трамп] и американскиот народ“, рече Калилзад.
Детали од преговорите не беа соопштени. САД, како и повеќето земји, не ги признаваат Талибанците како легитимни владетели на Авганистан.
Не се споменуваше уште еден американски државјанин кој го држат талибанците, Џорџ Махмуд Хабиби, кој исто така е затворен во Авганистан од 2022 година.
Глезман, механичар на авиокомпанија од Атланта, беше уапсен од талибанските власти додека беше на туристичка посета на Авганистан во декември 2022 година, а американската влада сметаше дека тој е незаконски приведен.
Државниот секретар Марко Рубио подоцна го потврди ослободувањето, нарекувајќи го „позитивен и конструктивен чекор“ олеснет од официјални лица во Катар, кој честопати беше домаќин на разговорите меѓу Вашингтон и талибанците.
„Тоа е исто така потсетување дека другите Американци сè уште се затворени во Авганистан“, додаде тој.
Ослободувањето доаѓа два месеци откако двајца други Американци заробени во Авганистан беа разменети за талибански затвореник кој отслужува доживотна казна затвор во Калифорнија под обвинение за дрога и тероризам.
Рајан Корбет и Вилијам Мекенти беа заменети со Кан Мохамед, кој беше осуден на две доживотни затворски казни во 2008 година и беше затворен во американски затвор.
Хуманитарните работници Корбет (40) и Хабиби (37) кои беа на чело на авганистанската авијациска управа под претходната авганистанска влада беа приведени одделно во август 2022 година.
И српското Министерство за информации бара отстранување на материјали од погребот во Кочани
Српското Министерство за информации и телекомуникации денеска издаде јавно предупредување и побара од српските медиуми да ги отстранат фотографиите и снимките што „го нарушуваат достоинството на жртвите и нивните семејства“ од погребот на загинатите во пожарот во дискотека во Кочани, јави дописникот на МИА од Белград.
„Со таквото дејствување, бројни медиуми го нарушија достоинството на жртвите, предизвикаа вознемиреност кај нивните роднини и целата јавност, но и демонстрираа недостиг на свест за потребата од почитување на елементарните професионални стандарди“, се вели во соопштението на Министерството.
Министерството апелираше до медиумите да се придржуваат до законските одредби, професионалните и етичките стандарди при известувањето за прашања од јавен интерес. Тие укажаа на потребата од „зголемено новинарско внимание“ во случаите што вклучуваат теми што можат дополнително да ја вознемират јавноста.
Претходно македонската Влада упати апел до медиумите кои емитувале видео и фото материјали од погребот на жртвите во Кочани спротивно на препораките да ги отстранат содржините и да не ги шират.
И Независното здружение на новинари на Србија (НУНС) ги повика медиумите во државата што известуваат за погребот во Кочани веднаш да ги избришат фотографиите и да ги приспособат вестите на етички и професионални стандарди.
Законот за информации и медиуми го штити достоинството на лицето на кое се однесуваат информациите и затоа го повикаа Министерството за информации и телекомуникации да реагира на известувањето на порталите Република, Курир, Блиц, Ало, Телеграф и Мондо.
Здружение на македонски новинари ЗНМ ги повикува медиумските работници и уредници да не отстапуваат од воспоставениот протокол, да покажат почит и одговорност, да не објавуваат содржини кои можат да предизвикаат дополнителна болка и да се придржуваат до стандардите на етичкото новинарство.
Русија и Украина разменуваат нови напади
Русија и Украина повторно разменија интензивни воздушни напади рано на 20 март, откако американскиот претседател Доналд Трамп и неговиот украински колега Володимир Зеленски телефонски разговараа во услови на интензивни дипломатски напори да се стави крај на најголемиот и најсмртоносниот конфликт во Европа од Втората светска војна.
Двајцата лидери разговараа на 19 март, по телефонскиот разговор меѓу Трамп и рускиот претседател Владимир Путин еден ден претходно, и откако Украина се согласи со американскиот предлог за триесетдневен прекин на огнот.
Путин и Трамп не успеаја да се договорат за целосен прекин на борбите, кои се веќе четврта година, иако Путин прифати запирање на ударите врз украинската енергетска и цивилна инфраструктура.
За време на повикот на 19 март, кој Белата куќа го опиша како „фантастичен“, Трамп вети дека ќе размисли за купување повеќе противвоздушни ракетни системи „Патриот“ за Украина, додека Зеленски исто така се согласи да не ги таргетира руските енергетски капацитети 30 дена.
Украина се бори да ги заштити своите градови од руски напади поради недостаток на противвоздушна одбрана, а Зеленски напиша дека уште еден бран напади во текот на ноќта покажа дека коментарите на Путин се само „пропаганда“.
„Руските напади врз Украина не престануваат, и покрај нивните пропагандни тврдења. Речиси сто или повеќе беспилотни летала се лансираат секој ден и секоја ноќ, заедно со тековните ракетни напади. Со секое такво лансирање, Русите му го откриваат на светот нивниот вистински став кон мирот“, напиша Зеленски во објавата на 20 март на мрежата Х.
Украинските воздухопловни сили на 20 март соопштија дека противвоздушната одбрана соборила 75 од 171 беспилотни летала лансирани од Русија за време на ноќните напади, додека 63 други беспилотни летала биле пренасочени од нивните цели, користејќи електронски системи.
Украинската национална полиција соопшти дека најмалку 10 лица се повредени во ноќен воздушен напад врз градот Кропивницки во централна Украина, меѓу кои и четири деца.
Во нападот беа оштетени станбени згради и приватни куќи. Неколку повредени лица се хоспитализирани по укажаната итна медицинска помош.
Во меѓувреме, Русија објави дека во текот на ноќта соборила 132 украински беспилотни летала, а властите во Саратовската област потврдија дека е запален аеродромот во близина на градот Енгелс, во кој се наоѓа стратешка база на бомбардери.
Украинската војска потврди дека извршила напад врз базата.
Зеленски, пак, пристигна во Норвешка на 20 март, додека интензитетот на мировните разговори продолжува да расте.
„Норвешка ја поддржува Украина во нејзината борба за одбрана и придонесува за напорите за постигнување траен, праведен мир во земјата. Очекувам конструктивни дискусии за тоа како Норвешка најдобро може да и помогне на Украина и на краток и на долг рок“, изјави норвешкиот премиер Јонас Стора.
Барањето на Киев за безбедносни гаранции е во срцето на шатл-дипломатијата меѓу Украина, Русија и САД за да се обезбеди мировен договор.
Зеленски сака каков било конечен мировен договор да вклучува западни безбедносни гаранции за Украина за да ја одврати Русија од повторно инвазија, но Трамп досега одбиваше да ги обврзе Соединетите држави на одбраната на земјата.
ЕУ вети дека ќе продолжи да ја вооружува Украина во услови на преговори за прекин на огнот
Лидерите на Европската унија (ЕУ) ветија дека ќе продолжат да обезбедуваат воена поддршка за Украина и покрај тековните руски напори во преговорите за запирање на испораките на оружје од Запад за Киев.
На собирот во Брисел на 20 и 21 март, лидерите на ЕУ се очекува да ги усвојат заклучоците од самитот во кои се наведува дека „Европската унија го поддржува пристапот „мир преку сила“, кој бара Украина да биде во најсилна можна позиција, со свои силни воени и одбранбени капацитети како клучна компонента“.
Во текстот, кој го виде Радио Слободна Европа, се нагласува и дека тие „остануваат посветени, во координација со партнерите и сојузниците, да обезбедат дополнителна сеопфатна поддршка за Украина и нејзиниот народ, додека таа го користи правото на самоодбрана од руската агресија“.
Средбата во Брисел доаѓа два дена по телефонскиот разговор меѓу американскиот претседател Доналд Трамп и рускиот претседател Владимир Путин, во кој беше договорена 30-дневна пауза во нападите врз енергетската инфраструктура.
Сепак, само неколку часа по повикот, Украинските железници потврдија дека руските беспилотни летала ја гаѓале енергетската инфраструктура поврзана со железничкиот систем во регионот Дњепропетровск.
Текстот на ЕУ обично бара едногласна согласност од сите 27 земји-членки, но дипломатите од унијата, кои зборуваат под услов да останат анонимни, рече дека Унгарија, која долго време се залага за помирувачки тон кон Кремљ, ќе бара изземање. Слично нешто се случи и на самитот на ЕУ одржан претходно овој месец.
Земјите од Европската унија досега беа исклучени од преговорите што се водат во Саудиска Арабија, но во документот се нагласува дека „Европската унија и нејзините земји-членки ќе придонесат за мировниот процес и ќе помогнат да се обезбеди праведен и траен мир за Украина, што е во интерес и на Украина и на цела Европа“.
Сепак, не се споменува именувањето на претставник на Унијата за преговорите. Во Брисел се шпекулира дека за таа улога би можеле да се земат предвид поранешната германска канцеларка Ангела Меркел и актуелниот фински претседател Александар Стуб.
Текстот исто така не содржи директни референци за присуството на европска војска на теренот за да го надгледува потенцијалниот мировен договор, идеја која францускиот претседател Емануел Макрон постојано ја застапуваше, но која Москва досега ја отфрла.
Брисел, сепак, стои на две други позиции кои се чини дека администрацијата на Доналд Трамп ги нуди како дел од преговорите со Москва: олеснување на санкциите против Кремљ и одговорност за воени злосторства.
Унијата неодамна ги продолжи визните забрани и замрзнувањето на имотот за 2.400 компании и поединци, вклучително и Путин, што тие ги воведоа во трите години од почетокот на руската инвазија на Украина. ЕУ наведува дека „останува подготвена да го зголеми притисокот врз Русија, вклучувајќи дополнителни санкции и зајакнување на спроведувањето на постоечките мерки“.
Околу 200 милијарди евра руски средства остануваат замрзнати, главно во Белгија. Средствата треба да останат блокирани „додека Русија не престане со својата агресија врз Украина и не ја надомести штетата предизвикана од оваа војна“.
Земјите-членки, исто така, додадоа дека инсистираат на „целосна одговорност за воените злосторства и другите најтешки злосторства извршени во врска со руската агресија врз Украина“.
Ова доаѓа откако Вашингтон ја објави својата намера да се повлече од Меѓународниот центар за гонење на злосторства за агресија против Украина, група основана од западните земји во 2022 година за да собира докази против одговорните за потенцијални воени злосторства.
Совет на Европа: Длабоко сме загрижени поради наводите за употреба на звучни топови во Србија
Известувачите за Србија на Парламентарното собрание на Советот на Европа (ПССЕ), Аксел Шефер и Викторија Тиблом изјавија дека се загрижени поради порастот на тензиите во Србија и наводите за употреба на звучно оружје на мирните демонстрации на 15 март во Белград.
Новинарите известија дека протестот бил главно мирен, но дека за време на петнаесетминутниот комеморативен молк се слушнал „вознемирувачки звук“, кој предизвикал „мало стампедо“.
Тие додаваат дека има извештаи за лица кои добиваат лекарска помош поради повреди предизвикани од „звучен топ кој можеби бил употребен за разбивање на собирот“.
„Ние сме длабоко загрижени за овие наводи и ги повикуваме властите да ги расветлат и да обезбедат итна медицинска и психолошка помош на сите жртви“, се вели во соопштението.
Студентите на блокадата, кои повикаа на протест инсистирајќи на утврдување одговорност за уривањето на бетонска настрешница во Нови Сад, ги обвинија властите за употреба на звучен топ за време на 15-минутниот молк за 15-те загинати.
На обвинувањата им се придружија и дел од опозициските партии и невладините организации.
Властите во Србија ги негираат обвинувањата.
Известувачите на СЕ, исто така, ги повикаа властите во Србија да „избегнат употреба на насилство“ и да одговорат на барањата на демонстрантите.
„Многу сме загрижени поради ескалацијата на тензиите во земјата, што доведе до демонстрации во Белград во кои учествуваа најмалку 100.000 луѓе. Ова беше еден од најголемите собири во историјата на Србија“, се вели во соопштението на 20 март, пренесе Бета.
Тие додаваат дека „тврдењата во врска со наводната употреба на LRAD или други присилни мерки се целосно лажни и ризикуваат да ја доведат јавноста во заблуда“.
Повеќе од четири месеци во Србија траат масовни протести предводени од студенти кои ги блокираат факултетите на државните универзитети.
Првото барање на студентите во блокадата е да се објави комплетната документација за реконструкцијата на Железничката станица во Нови Сад, за да се утврди одговорноста за несреќата.
Покрај граѓаните што ги собираат на протестите, зад нивните барања застанаа и универзитетски професори, просветни работници, земјоделци, адвокати, актери...
Тројца пациенти од пожарот во Кочани попладнево однесени на лекување во Турција
Уште три лица од пожарот во Кочани ќе се лекуваат во Турција, информираат попладнево од турската амбасада.
Три млади лица денеска со авион биле пренесени во болницата „Чам и Сакура“ во Истанбул.
Турскиот амбасадор во земјава Фатих Улусој ги придружувал повредените на Меѓународниот аеродром, при нивното заминување од Скопје.
Моментално во Турција се лекуваат вкупно 12 повредени. Од нив, половина се во болницата „Чам и Сакура“ во Истанбул, додека другата половина во болницата „Билкент Шехир“ во Анкара.
Пациентите кои се лекуваат во болниците во Северна Македонија и надвор од државата се во стабилна состојба и повеќето се подобруваат. Од 20 пациенти што биле критични, денеска 10 се потешки, но и тие се надвор од животна опасност. Ова на 20 март го соопшти министерот за здравство Арбен Таравари.
Во домашните клиники се лекуваат 72 пациенти, а надвор од државата 101 пациент. Од оние што се хоспитализирани во земјава, тројца се вчера веќе испишани, а утре се планира да бидат испишани уште тројца.
„Надвор од државата се 101 пациент, вчера се испратени помал број пациенти, денеска има понуди од повеќе држави, но ќе видиме, можеби максимум 10 да се испратат, а можеби и не“, рече Таравари.
Пред да бидат пуштени на домашно лекување, на повредените од пожарот во Кочани кои се лекуваат во земјата ќе им се направат токсиколошки анализи. Тоа е одлука на Кризниот штаб при Министерството за здравство, а испитувањата ќе ги прават искусни токсиколози.
Владата алармира медиумите кои објавија видео и фото материјали од семејствата да ги отстранат
Здружение на македонски новинари ЗНМ ги повикува медиумските работници и уредници да не отстапуваат од воспоставениот протокол, да покажат почит и одговорност, да не објавуваат содржини кои можат да предизвикаат дополнителна болка и да се придржуваат до стандардите на етичкото новинарство.
Ова доаѓа откако неколку странските медиуми емитувале експлицитни фотографии и снимки од ожалостените семејства.
И македонската Влада упати апел до медиумите кои емитувале видео и фото материјали од погребот на жртвите во Кочани спротивно на препораките да ги отстранат содржините и да не ги шират.
Во овие тешки моменти, како што велат од Владата, уште еднаш го повторувааат упатениот апел до медиумските екипи кои присуствуваат на денешниот погреб на жртвите од трагичниот пожар кој настана во кочанската дискотека да се придржуваат до етичките принципи.
Најголем дел од медиумите, според Владата, не емитуваат и шират фотографии и видеоматеријали од семејствата на настраданите, а оние кои објавиле такви содржини уште еднаш апелираме да се придржуваат до етичкото информирање.
„Чувствителноста на трагедијата и личната болка на семејствата во овој момент не треба да биде мета на сензационализам, емотивни наративи, фотографии и видеа. Ги повикуваме медиумите да ги почитуваат приватноста и достоинството на семејствата и во никој случај со медиумското известување не треба да се предизвика лично вознемирување и вознемирување на јавноста. Уште еднаш упатуваме апел до медиумите да пренесуваат проверени факти, да избегнуваат шпекулации и дезинформации, да ја запазуваат приватноста на семејствата на жртвите, се вели во соопштението од Владата.
И Независното здружение на новинари на Србија (НУНС) ги повика медиумите во државата што известуваат за погребот во Кочани веднаш да ги избришат фотографиите и да ги приспособат вестите на етички и професионални стандарди, јави дописникот на МИА од Белград.
Законот за информации и медиуми го штити достоинството на лицето на кое се однесуваат информациите и затоа го повикаа Министерството за информации и телекомуникации да реагира на известувањето на порталите Република, Курир, Блиц, Ало, Телеграф и Мондо.
НУНС смета дека денешното известување на повеќе српски медиуми што објавија потресни и вознемирувачки фотографии е длабоко неморално и неприфатливо.
„Би сакале да истакнеме дека Кодексот на новинарите на Србија експлицитно забранува известување за погреби на приватни лица и дека новинарите се должни да ја почитуваат приватноста, достоинството и интегритетот на луѓето и да ги заштитат нивните права. Известувањето за погреби и објавувањето фотографии не е во јавен интерес“.
Објавувањето фотографии и видеа од гробни места, членови на блиско семејство и приватни моменти е директно кршење на препораките за етичко известување и нарушување на достоинството на лицата за кои станува збор.
Путин му нуди „практична соработка“ на лидерот на Сирија за стабилизирање на состојбата во земјата
Рускиот претседател Владимир Путин испрати порака до лидерот на Сирија, Ахмед ал Шара, со поддршка на напорите за стабилизирање на земјата, потврдувајќи ја подготвеноста на Москва за „практична соработка“ со Сирија за ова прашање, соопшти Кремљ.
„Рускиот претседател Владимир Путин испрати порака до шефот на сириската држава Ахмед ал Шара, во која ги поддржа напорите за што поскоро стабилизирање на ситуацијата во земјата во интерес на обезбедување на нејзиниот суверенитет, независност, единство и територијален интегритет“, изјави денеска (20 март) портпаролот на Кремљ, Дмитриј Песков.
Според него, во пораката до Ал Шара, Путин ја потврдил и подготвеноста на Русија да развие „практична соработка“ со сириското раководство за сите прашања на агендата.
„Потврдена е непоколебливата подготвеност на Русија да развие практична интеракција со сириското раководство за целиот спектар на прашања од билатералната агенда со цел зајакнување на традиционално пријателските руско-сириски односи“, рече Песков.
Неодамна Европската Унија (ЕУ) вети 5,8 милијарди евра за помош на новите сириски власти, кои се соочуваат со хуманитарни и безбедносни предизвици по падот на Башар ал Асад.
Ветувањата дадени вечерта на 17 март на собирот во Брисел се помалку од минатогодишните 7,5 милијарди евра грантови и заеми, а претставниците на ЕУ како главен фактор ги наведоа кратењата на американската помош.
Хајат Тахрир ал-Шам, групата што го собори Асад, е прогласена за терористичка организација од ОН, но ЕУ сака да соработува со новите власти се додека тие ги одржат ветувањата дека транзицијата ќе биде инклузивна и мирна.
Според ОН, Сирија изгубила 40 години развој поради војната и ќе и треба најмалку една деценија да се врати во предконфликтната состојба, а поради економската криза речиси целото население живее под прагот на сиромаштија.
Мултимедија
Најпосетени
Што треба да знаете