Жестоката размена на зборови во Белата куќа меѓу украинскиот претседател Володимир Зеленски од една и американскиот претседател Доналд Трамп и потпретседателот Џеј Ди Венс од друга страна, допре многу Украинци на многу различни начини.
Некои почувствуваа наплив на гордост во нивниот лидер, додека други ја ублажуваат таа гордост со зголемена загриженост за иднината на американско-украинските односи – и што тоа би можело да значи за тригодишната војна на нивната земја против Русија.
„Подигање на гласот во Овалната соба“
Кај Андриј Веселовски, поранешниот украински амбасадор во Европската унија, сепак, чувството кое преовладало било ужаснатост.
„Жал ми е што се согласив на оваа изјава за вас бидејќи сум многу лошо расположен по она што го видов“, изјави Веселовски за украинскиот сервис на РСЕ на 28 февруари.
„Да се крева гласот во Овалната соба кај потпретседателот и претседателот и да ги прекинуваш и двајцата не е стил којшто може да им помогне на интересите на Украина“, додава тој.
Состанокот на Зеленски со Трамп на 28 февруари заврши со тензичната дискусија во Овалната соба, по што Зеленски набргу ја напушти Белата куќа, а Трамп рече дека украинскиот лидер не покажал почит и порача дека може „да се врати кога ќе биде подготвен за мир“.
Пред да се прекине состанокот, Трамп рече дека Украина ќе мора да направи компромиси и оти Киев треба повеќе да ја цени помошта од САД во војната на земјата против Русија. Зеленски притискаше за безбедносните обврски на САД и рече дека „не треба да има компромиси со убиецот“ алудирајќи на рускиот претседател Владимир Путин.
Олексиј Хончаренко, од централно-десничарската Европска партија за солидарност, го споделува чувството на ужаснатост како Веселовски, велејќи дека тоа е „крај на односите со Трамп“.
Другите Украинци, сепак, чувствуваат само гордост гледајќи го соочувањето на нивниот претседател во Белата куќа.
Горди на нивниот претседател
Наталија Серхиенко, пензионерка во Киев, за Асошиејтед прес (АП) изјави дека „Зеленски се борел како лав“.
„Имаа жесток состанок, многу жесток разговор“, рече таа, но Зеленски „ги бранеше интересите на Украина“.
Олех Синиехубов, воениот гувернер на регионот Харкив што се граничи со Русија, исто така го пофали Зеленски, велејќи за АП дека украинскиот претседател се држел до тоа дека не може да има мировен договор без безбедносни гаранции за Украина.
„Нашиот лидер, и покрај притисокот, стои цврсто во одбраната на интересите на Украина и Украинците. Ни треба само праведен мир со безбедносни гаранции“, рече Синиехубов.
Покрај гордоста, кај некои Украинци има и чувство на гнев поради тоа како бил третиран Зеленски.
„Ние се стремиме кон демократија и сме пресретнати со целосно непочитување кон нашите воини, нашите војници и народот на нашата земја“, изјави за Ројтерс, Артем Василиев, по потекло од источниот украински град Луганск, кој е окупиран од Русија.
Како може да се поправат односите?
Трамп, според Василиев, „не разбира дека луѓето умираат, дека градовите се уништуваат, страдаат луѓето, мајките, децата, војниците“.
Без разлика дали нивната емоција е гордост или ужаснатост, повеќето Украинци имаа една заедничка грижа: како да ги поправат заладените односи на Украина со нејзиниот најважен воен сојузник.
Поранешниот амбасадор во ЕУ, Веселовски рече дека одговорот на Зеленски требало да биде повоздржан и сега се сомнева дека украинскиот претседател воопшто ќе може да влезе во Белата куќа.
Олександр Мережко, пратеник од партијата Слуга на народот на Зеленски, за РСЕ изјави дека, и покрај сите тешкотии, Украина мора да работи со Трамп бидејќи влогот е многу голем.
Мораме да ги намалиме тензиите. Постојат некои врски – конгресмени и сенатори, кои имаат влијание врз Трамп … Треба веднаш да стапиме во контакт со овие луѓе“, вели Мережко.
Градоначалникот на Киев, Виталиј Кличко, во објава на Телеграм напиша дека се надева оти „Украина нема да ја изгуби поддршката од САД, што е исклучително важно“.
„Денес не е време за емоции, од ниту една страна. Треба да најдеме заеднички јазик“, напиша Кличко.
