Арбер Адеми: Вечерва Европски фронт ќе триумфира, јас не гласав на претседателските избори
Европскиот фронт, на чело со ДУИ, вечерва објави дека оствариле „голема победа, како што победи и пред две недели и таа е одлучувачка за натамошното унапредување на демократијата“.
Шефот на изборниот штаб на Европскиот фронт, Арбер Адеми, на првата прес-конференција по затворањето на избирачките места рече дека нивното очекување е дека коалицијата Европски фронт ќе добие најмалку 20 пратеници.
„Европскиот фронт вечерва ќе биде сведок на историски триумф на овој сенароден референдум, кој ќе ја запечати европската иднина на земјата. Враќање назад нема да има, народот го кажа својот збор и ние ке останеме верни на волјата на граѓаните. Победата е наша и на сите вас кои кажавте НЕ на Русија, ДА за Европа. Масовното учество на граѓаните ќе биде одлучувачко за натамошното унапредување на демократијата“, рече Адеми.
На новинарско прашање дали Европскиот фронт повикуваше на бојкот на изборите, Адеми рече дека тие објавиле „сооппштение дека Европскиот фронт оставил на граѓаните да изберат дали ќе гласаат за избор на претседател на државата“. Тој не кажа дали првите луѓе на ДУИ и Европскиот фронт гласале и на претседателските и на праламентарните избори, туку само додаде: Јас не гласав (на претседателските избори).
Муцунски: Македонија ќе има нов претседател, ДУИ оди во опозиција
Македонија ќе има нов претседател, цензусот е постигнат. Отворениот повик за бојкот од страна на ДУИ не успеа - елитите на власта се поразени од народот, рече Тимчо Муцунски, потпретседател на ВМРО-ДПМНЕ, во првата оценка по денешните двојни избори во Северна Македонија.
Тој рече дека денешниот ден на површина ги извади сите игри на власта и сценариото на кое укажа ВМРО-ДПМНЕ, дека „ДУИ посакува криза и преку бојкот на претседателските избори практично сака да се факторизира“.
„Добрата вест е што ДУИ изгуби двојно. Бојкотот не е успешен и сосема и извесно дека ДУИ оди во опозиција“, рече Муцунски.
Се бројат гласовите, цензусот исполнет
Во 19 часот, заврши гласањето на двојните избори во Северна Македонија - парламентарните и вториот круг од претседателските.
Со затворањето на гласачките места, почнува и броењето гласови, а првичните резултати од Државната изборна комисија (ДИК) се очекуваат околу 22 часот.
Граѓаните на Северна Македонија гласаа на единаесеттите парламентарни избори во Македонија, како и на вториот круг од претседателските избори. Идниот претседател/ка заклетвата ќе ја даде пред стариот собраниски состав, по што ќе треба да се конституира новиот парламент, за чие место се борат кандидати од 17 партии и коалиции.
Се затворија гласачките места, се очекуваат првични резултати
Заклучно со 19 часот заврши гласањето на двојните избори во Северна Македонија - парламентарните, на кои граѓаните избираат пратеници во Собранието и вториот круг на изборите за претседател на државата.
Гласачките места беа отворени утрово во 7 часот. За парламентарните избори, во избирачкиот список се запишани 1.815.350 избирачи, кои гласаат на вкупно 3.477 избирачки места. Право на глас на претседателските избори, пак, имаат 1.814.317 избирачи, на вкупно 3.480 избирачки места.
За сите детали, видеа и фотогалерии од изборите кликнете ТУКА.