Разговорите наидоа на замка, според неколку медиуми, кога некои земји сакаа повеќе да се фокусираат на движење напред во транзицијата од фосилните горива, додека други, главно земји производители на нафта и гас, сакаа да го ограничат разговорот за договорот КОП28 постигнат минатата година и главно да се фокусираат на финансиите.
„Да се откажеме од идејата дека финансирањето на климата е добротворна акција“, рече шефот на ОН за климата, Сајмон Стил во говорот.
„Амбициозната нова цел за финансирање на климата е целосно од интерес на секоја нација, вклучувајќи ја и најголемата и најбогатата“.
Со прогнозата на Светската метеоролошка организација на ОН дека 2015-2024 година ќе биде најжешката деценија некогаш забележана, а екстремните климатски настани се појавуваат низ целиот свет, разговорите во Баку, кои ќе траат до 22 ноември, се сметаат за клучни за постигнување напредок пред тоа да биде премногу доцна.
Нов проблем во разговорите е минатонеделниот избор на Доналд Трамп за претседател на САД.
Трамп водеше кампања за зголемување на производството на фосилни горива во Соединетите држави, кое веќе е на рекордно високо ниво.
Дури и американскиот претставник за климата Џон Подеста не можеше да ја скрие својата загриженост за тоа како идната администрација ќе се справи со климатските промени со оглед на често наведената цел на Трамп да ја исклучи државата од меѓународните договори за климатска соработка.
„За оние како нас, посветени на климатските активности, минатонеделниот исход во Соединетите држави очигледно е разочарувачки“, рече Подеста на самитот.
„Но, она што сакам да ви го кажам денес е дека додека федералната влада на Соединетите држави, под Доналд Трамп, може да ги стави климатските активности настрана, работата за спречување на климатските промени ќе продолжи во Соединетите држави“.
Дури и пред почетокот на КОП29, се поставуваа прашања околу посветеноста на вистински напредок со оглед на изборот на Азербејџан богат со нафта како домаќин на настанот.
Авторитарниот претседател Илхам Алиев е критикуван поради неуспехот да смисли и спроведе доволни планови за климатски промени дома, каде што е обвинет и за кршење на човековите права, вклучително и притворање на независни медиумски фигури, како што е новинарот и економист Фарид Мехрализада, кој е поврзан со РСЕ и неодамна го одбележа петтиот месец во притвор поради обвиненија за кои тој и неговите поддржувачи велат дека се измислени.
„Азербејџан, користејќи го КОП29 како фасада, ја засилува контролата под лажна „зелена“ агенда, ја зајакнува моќта и ги ескалира регионалните тензии“, рече шведската еколошка активистка Грета Тунберг во објава на X.
Тунберг водеше протест во соседна Грузија на 11 ноември, откако рече дека нема да присуствува на КОП29 поради климатските и човековите права во Азербејџан.
Азербејџан долго време го смета одржувањето на настани од големи размери како пат кон меѓународен престиж.
Тој беше домаќин на натпреварот за песна на Евровизија во 2012 година. Постојано, иако неуспешно, се кандидираше за домаќин на Летните олимписки игри и беше домаќин на два настани слични на Олимпијадата, Европските игри во 2015 година и Игрите на исламската солидарност во 2017 година. Од 2017 година, Азербејџан е домаќин на трката за големата награда на Азербејџан во Формула 1 низ центарот на Баку.
Но, на улиците на Баку, жителите не се импресионирани од напорите на нивната влада да биде домаќин на уште еден меѓународен настан од висок профил.
„КОП 29 се одржува затоа што [властите] сакаат да го промовираат Азербејџан, тоа е една работа. Второ, луѓето ќе дојдат и ќе се соберат овде и парите на Азербејџан ќе одат [за нивно хранење]“, се пожали една жена жителка на главниот град.
„Сиромашните семејства, семејствата на ветераните, инвалидите ќе бидат оставени настрана, нема да бидат поддржани, но КОП29 ќе се одржи овде. Тие ќе потрошат милиони [за организација на КОП29]. Зошто ни треба ова?"
