Вести
ОН: Луѓето во северниот дел на Газа не добиле помош повеќе од 40 дена
Портпаролот на генералниот секретар на Обединетите нации (ОН), Стефан Дижарик изјави дека поради опструкциите од страна на Израел повеќе од 40 дена, речиси и да не е доставена помош за Палестинците кои се борат за опстанок во северна Газа, јави Анадолија.
Дижарик одговараше на прашањата на новинарите за случувањата на Блискиот Исток.
Нагласувајќи дека израелските војници го блокирале преминот кон северниот дел на Газа, Дижарик истакна дека жителите од овој регион речиси и да не добиваат помош повеќе од 40 дена и оти хуманитарната ситуација е особено тешка во одделни региони.
„Луѓето се борат за опстанок во опколените области во северниот дел на Газа“, рече Дижарик, повикувајќи се на информации добиени од Канцеларијата за координација на хуманитарните прашања (ОЦХА) на ОН.
Наведувајќи дека израелските војници продолжуваат да спречуваат помошта да стигне до подрачјата како што се Беит Ханун, Беит Лахија и Џабалија, Дижарик нагласи дека 27 од 31 обид за помош планирани само овој месец се одбиени, а останатите четири се сериозно успорени.
„Искрено кажано, сите обиди на ОН да ги поддржат луѓето во опколените области северно од Газа се отфрлени или блокирани“, рече Дижарик.
Портпаролот на генералниот секретар го сврте вниманието кон гладот што ќе настапи во регионот каде што се затворени сите пекарници и целосно е блокирано снабдувањето со гориво, пренесува Анадолија.
види ги сите денешни вести
Се одржува голем протестен марш „Правда за Фросина“
Со порака „правда за Фросина, започна вечерашниот протест на голема група граѓани предводени токму од родителите и сестрата на загинатата студентка Фросина Кулакова. Онаму каде се случи трагедијата, на булеварот Партизански одреди близу Универзална сала беше испратена порака дека вакви настани не смеат да се повторат. Големиот гнев е предизвикан од несреќата која се случи на 29 јануари, а за која подоцна се дозна дека ја предизвикал пијан млад возач, без возачка дозвола, кој возел со огромна брзина и поминал на црвено на семафорите каде на пешачки премин поминувала Фросина.
На денешниот втор протест беше упатена порака „Кој е следен?“ како реакција на сите инциденти со неконтролирано возење и неказнување, кои резултираат со трагични последици.
„Безбедноста е право, не луксуз“, „Ако корумпиран систем живее, народот умира“, „Денес правда за Фросина, утре за сите нас“, „Не е кобно местото, туку луѓето и системот“, „Партизанска не е Формула1“, „Улиците не се тркачки патеки“ беа дел од транспарентите, кои ги носе учесниците на протестот.
Со извикување „бараме правда“ демонстрантите го продолжија протестот марширајќи кон Собранието на Северна Македонија, кон државното обвинителств и Кривичниот суд Скопје.
Инаку 22 годишната Фросина Кулакова беше студентка од Неготино, а загина откако во неа удри „пежо 207“ управувано од Васил Јованов. Револтот кај граѓаните кулминираше после информацијата дека тој претходно добил судска пресуда од Кривичниот суд Скопје „воспитна мерка“ иако бил гонет за поседување и продажба на голема количина дрога.
Несреќата се случи седум месеци по пресудата додека се чека одлука од Апелациониот суд по жалбата на обвинителството. Исто така Јованов во минатото предизвикал и сообраќајка во која повредил жена пешак, но исплатил само паричен надомест за тоа без да одговара. Гневот на граѓаните е насочен кон неговите родители и судијката која ја донела воспитната мерка.
Нејзината сестра Росица денеска од протест во Кавадарци побара да одговара и таткото на сторителот и судијката.
Вчера пак медиумите објавија дека возачот, 20 годишниот Васил Јованов кој е во притвор има мобилен телефон. Денеска од Управата за извршување санкции рекоа дека ќе истражуваат како за само еден ден успеал да дојде до телефон.
Кривичниот суд имаше објаснување
Од Кривичниот суд Скопје во објаснуваадека судот за две кривични дела „неовластено производство и пуштање во промет на наркотични дроги“ донел осудителна пресуда за момче кое немало полни 20 години.
„Упатување во воспитно поправен дом, каде согласно чл. 48 ст.3 и ст.4 обвинетиот во домот останува најмалку 6 месеци, а најмногу 5 години односно до наполнети 23 годин.
Согласно Законските одредби од ЗКП по досудена Заводска мерка, Мерката притвор не може да опстојува, заради што Јавниот обвинител вложил жалба во однос само на кривичната санкција. Предметот на 07.11.2024 година е доставен на надлежно постапување на Апелациониот суд Скопје, од каде сеуште не е вратен на евентуално извршување“, рекоа на 30 јануари од Судот.
Сепак и покрај тоа што од судот изразија жалење за загубата на млад човечки живот истакнаа дека не им е јасна конекцијата на пресудата со овој настан.
„Станува збор за општествен проблем!“, предупреди Судот.
Инаку сообраќајката во која беше прегазена Фросина Кулакова не е прва која предизвикува бурни реакции и гнев кај граѓаните за дивеењето по улиците. Само на истиот булевар, „Партизански одреди“, изминатите години згаснаа неколку млади животи.
Во 2015 беше прегазена студентката Фросина Цековска од 26-годишен возач возач кој исто така беше под дејство на алкохол и со брзина поголема од дозволената.
24-годишната Викторија Николова од Радовиш во јануари 2022 година, беше прегазена на истиот булевар, но кај трговскиот центар Сити мол. 22-годишниот возач, според Обвинителството, тогаш возел со поголема брзина од дозволената.
Три деца загинаа при уривање на стара зграда во Косово
Три деца загинаа во саботата вечерта при уривање на стара зграда во градот Јабланица, во близина на Ѓаковица, Косово.
Зградата се урна под засега неутврдени околности, при што загинаа три момчиња на возраст од 15 и 14 години, кои биле внатре во моментот на несреќата.
Претставникот на косовската полиција Милазим Луми за локалните медиуми изјави дека урнатата зграда е стара и ненаселена по војната во Косово во 1999 година.
Роднина на жртвите, Запарим Адемај, за локалните медиуми изјави дека камерите од блиската куќа покажале дека зградата се урнала околу 16:35 часот, а телата на децата биле пронајдени речиси четири часа подоцна.
„Полицијата, брзата помош, пожарникарите пристигнаа многу брзо. Ги најдовме без знаци на живот“, рече тој.
Државното обвинителство соопшти дека работи на расчистување на случајот, а телата на жртвите се пренесени на обдукција во Институтот за судска медицина.
Косовската претседателка Вјоса Османи упати сочувство до семејствата, додека неколку политички претставници во земјата повикаа на истрага.
Полициски акции со меѓународна помош за печатење фалсификувани евра
Министерството за внатрешни работи и Јавното обвинителство потврдуваат дека во тек се повеќе полициски акции на територија на земјава, но повеќе детали најавуваат по завршување на акциите.
„Во тек се дејствија на меѓународен заеднички истражен тим, кој на наша територија е координиран од Основното јавно обвинителство за гонење на организиран криминал и корупција. Во тек се повеќе полициски и други дејствија и во овој момент не можат да бидат споделени повеќе детали за да не се наруши постапката. Штом завршат оперативните дејствија, вклучените институции координирано ќе ја информираат јавноста, велат од Јавното обвинителство.
И од Министерството за внатрешни работи потврдија дека во тек е полициска акција, но повеќе информации најавуваат по завршување на акцијата.
Според дел од медиумите, се работи за акција за откривање и запленување на фалсификувани пари. Неофицијално, на територијата на Северна Македонија е откриена нелегална печатница за печатење евра.
Инаку во август 2024 година беше уапсен полицискиот инспектор кој беше фатен како шверцувал лажни монети во Косово. РСЕ објави дека незаконски бил вработен во македонската полиција бидејќи тој не ги поминал основните безбедносни проверки на Агенцијата за национална безбедност.
34 годишниот ресенчанец беше во притвор во Косово поради сомневање дека изработил околу 2 милиони лажни монети од по 2 евра, кои требало да бидат пуштени во оптек во косовската економија.
По приведување косовското и македонското обвинителство продолжија со потрагата по неговите соучесници. Во оваа меѓународна истрага се вклучени Европол и Европравда. Сега нема информации дали денешните претреси се дел од оваа истрага.
Извори од истрагата за Радио Слободна Европа тогаш изјавија дека тој бил дел од мрежата на фалсификатори, но не и „мозокот“ на операцијата.
Турција најавува соработка во борбата против „Исламска држава“ во Сирија
Турција, Сирија, Ирак и Јордан заедно ќе се борат против остатоците од т.н „Исламска држава“ во Сирија, изјави во неделата турскиот министер за надворешни работи Хакан Фидан, нагласувајќи дека тоа е потег што ќе им овозможи на Соединетите Држави (САД) „да ги прекинат врските со курдските милитанти во таа земја“.
Турција се противи на соработката на Вашингтон со силите предводени од Курдите во Сирија.
Анкара тврди дека Единиците за заштита на народот (ЈПГ) се поврзани со Курдистанската работничка партија (ПКК), која води војна против Турција од 1984 година и се смета за терористичка организација од Турција, САД и Европската унија (ЕУ).
Во моментов, САД имаат околу 2.000 војници во североисточна Сирија. ЈПГ, која ги предводи Сириските демократски сили поддржани од САД, одигра централна улога во борбата против милитантите на Исламската држава, заедно со американските специјални сили, и сега држи илјадници затвореници на групата во североисточна Сирија.
Фидан, кој зборуваше на прес-конференција во Доха, Катар, заедно со катарскиот премиер Мохамед бин Абдулрахман Ал Тани, рече дека новата сириска влада посочила дека ќе преземе одговорност за затворениците на Исламската држава.
Турција сака американскиот претседател Доналд Трамп да се повлече од поддршката на курдските борци, кои Анкара ги смета за терористи поради нивните врски со ПКК.
Од ноември, борците поддржани од Турција ги нападнаа курдските сили, заземајќи голем број градови во процесот. Во меѓувреме, турската војска продолжи да врши притисок врз курдските борци и во Сирија и во северен Ирак.
Министерството за одбрана на 2 февруари објави дека турските војници убиле 23 „терористи на ПКК/ИПГ“ во северна Сирија.
Анкара побара Сириските демократски сили да се исчистат од елементите поврзани со ПКК и да се апсорбираат во идната сириска армија.
Сестрата на загинатата Фросина бара правда, денеска нов протест
Сестрата на 22 годишната Фросина која загина во сообраќајната несреќа бара да одговараат и таткото на момчето и судијката. Росица Кулакова денеска од Кавадарци каде се одржа протест порача дека очекувале тие да изразат изразат сочувство, а наместо тоа како што рече тие кукавички бришат профили.
„Оној што не успеал да го воспита сопствениот наследник да ги почитува законите, да разликува добро од зло и да живее чесно, не може да бара доверба да управува со државата. Напротив, ваквите лица не смеат да добијат јавна функција. Ние за Фросина бараме правда, не само од убиецот, бараме да одговара и татко му Зоран Јованов и од судијката Даниела Алексовска Стојановска, кои не излегоа јавно да изразат сочувство за семејството, туку кукавички се кријат и бришат профили. Правда за Фросина мора да има“ порача Росица, сестрата на загинатата Фросина.
Граѓаните на социјалните мрежи и денеска се организираат за протести порадеи прерано згаснатиот живот кој настрада на булеварот Партизански одреди во Скопје, каде ја прегази нејзин врсник кој возел брзо, пијан, без возачка и поминал на црвено.
Фросина Кулакова загина вечерта на 29 јануари, а веќе следниот ден беа организирани масовни протести, бидејќи беше објавено дека тој се спасувал од првдата преку правосудните органи кои го ослободиле за други кривични дела.
Денешниот протест е најавен за во 17 часот од пред Универзална сала, а ќе треба да продолжи пред Собранието, Државното обвинителство и Кривичниот суд.
Расте бројот на жртвите од рускиот напад во Полтава
Бројот на загинати од руски ракетен напад врз станбена зграда во Полтава, централна Украина, се искачи на 14, меѓу кои и две деца, соопштија украинските служби за итни случаи.
Украинската владина агенција на 2 февруари на Телеграм објави дека „17 лица се повредени, меѓу кои четири деца, додека 22 лица се спасени“, додавајќи дека спасувачките операции се во тек.
Локалните власти тврдат дека руските сили погодиле висококатница во ракетниот напад врз Полтава на 1 февруари. Од ударот бил уништен дел од зградата, по што избувнал пожар. Оштетени се и 18 станбени згради и блиска детска градинка.
Јавното обвинителство извести дека, според прелиминарните податоци, нападот бил извршен со суперсонична крстосувачка ракета Кх-22.
Руската војска редовно ги напаѓа украинските региони со различни видови оружје, иако Кремљ негира дека цели на цивилни области.
Во исто време, Украина и Русија разменуваат обвинувања за напад на училиште во град окупиран од Украина во руската област Курск.
Украинската војска и претседателот Володимир Зеленски тврдат дека руските сили го нападнале интернатот, при што убиле најмалку четворица нивни „сопствени граѓани“ и раниле уште десетици.
Нападот на 1-ви февруари се случи неколку часа откако Киев пријави руски напад врз станбена област во украинскиот град Полтава.
"Руски авион бомбардираше интернат во градот Суџа, Курската област. Нападот е извршен намерно", соопшти украинската војска.
Украинскиот претседател Володимир Зеленски објави видео на социјалните мрежи на кое се гледа оштетена зграда, како и ранет маж кој лежи на земја.
„Тие ја уништија зградата иако таму имаше десетици цивили. Руските бомби на ист начин ги уништуваат домовите на Украина. Дури и против сопствените цивили, руската војска користи слична тактика“, напиша Зеленски во објавата на мрежата Х.
Руското Министерство за одбрана подоцна тврдеше дека украинските воени сили го извршиле нападот.
„На 1 февруари, украинските вооружени сили извршија уште едно воено злосторство со извршување на цел напад врз интернат“, се вели во соопштението. министерствата.
Тврдењата на украинската и руската страна не се независно проверени.
Во август минатата година, Украина во ненадејна офанзива зазеде територија во рускиот регион Курск. Откако ја изгуби таа територија, Украина продолжи со нападите за да ја врати.
Руските сили распоредија околу 11.000 севернокорејски војници да се борат заедно со руската армија во регионот Курск, но се соочија со големи загуби, според украинските и западните власти.
Шекеринска: Ниту сум имала контакт со семејството на возачот кој ја прегази Фросина, ниту сум ургирала за некого
Поранешната министерка за одбрана Радмила Шеќеринска и сегашен заменик генерален секретар на НАТО, преку објава на Фејсбук ги демантира наводите што изминатите денови беа пласирани во јавноста за нејзина поврзаност во случајот со возачот кој ја прегази Фросина Кулакова на булеварот „Партизански одреди“.
Шеќеринска вели дека со ниту едно од споменатите лица немала никаков контакт ниту познанство - ниту со возачот, ниту со неговиот татко, ниту со судијката.
„Длабоко сочувство до семејството и блиските на Фросина Кулакова. Од почит кон нивната болка и загуба не сакав јавно да реагирам, но гледам дека некои нелуѓе и криминални структури продолжуваат да лажат и да ловат во матно дури и при вакви лични, семејни и општествени трагедии и на необјаснив начин да ме ставаат во контекст на сообраќајката во која е убиена Фросина Кулакова. Најдиректно сакам да ги демантирам СИТЕ такви наводи - тие се целосна, безобразна и исконструирана лага за која не постои НИКАКВА ОСНОВА. Одговорно тврдам дека со НИТУ ЕДНО од споменатите лица немам никаков контакт, познанство ниту пријателство: ниту со сторителот ниту со неговиот родител, а уште помалку со судијката што одлучувала за неговите предмети. Со ниту едно, наведува Шекеринска.
Нагласува дека никогаш не се јавила кај никој за да побара ургенција за каква било сообраќајна грешка.
„Некои пријатели ми замериле поради тоа (што не сум “им завршила работа”), но сум стоела зад мојот став, бидејќи искрено верувам дека неказнивоста води кон повторување на делата, а тоа значи само чекор до трагедија. НИКОГАШ за НИКОГО не сум се јавила за да побарам ваква ургенција и затоа бев шокирана кога видов дека некој почнал да шири вакви обвинувања за мене без НИКАКВА причина, ниту доказ. Неточни се, но и нелогични бидејќи во годината во која биле носени тие судски одлуки, јас не сум имала никаква функција ниту позиција на моќ од која би можела да вршам такво влијание. За жал, очигледно е дека некои структури можат да продуцираат и најнелогични и целосно исконструирани лаги - доволно им е да имаат интерес и наредбодавател. Токму поради трагедијата и потребата сите ИНВОЛВИРАНИ да одговараат - се надевам дека ширењето невистини и обвинувања без основа нема да бидат искористени за да се кријат ВИСТИНСКИТЕ сторители и соучесници, вели Шекеринска во објавата на Фејсбук.
Инаку несреќата се случи на 29 јануари вечерта во 23:43 часот, кога автомобил „пежо 207“ со скопски таблички управуван од В.Ј.(20) од Скопје, удрил во девојката која била пешак. Подоцна се утврди дека тој возел без возачка дозвола, пијан и поминал на црвено. Ова предизвика огромен револт и масовни протести. Семејството на Фросина побара правда бидејќи осомничениот и претходно бил гонет за други кривични дела како што се предизвикување сообраќајка и поседување и дилање дрога, но поминал само со возпитни мерки.
Четиригодишно дете починало во Струшката болница
Четиригодишно дете утрово починало на Детското одделение во Струшката болница, соопшти денеска СВР Охрид.
Според информацијата, случајот во полиција бил пријавен во 9:50 часот од медицински лица од Општата болница во Струга.
Детето имало тешка форма на церебрална парализа и загрозени витални параметри, потврди за МИА директорот на Струшката болница Владимир Бунчески.
Во изјава за МИА посочи дека детето било донесено во многу тешка состојба со подраширени зеници и оти борбата на лекарите да го вртат во животот била не успешна. Детето било родено во Италија со тешка форма на церебрална парализа, каде докторите им соопштиле на родителите дека ќе живее три до шест месеци.
„Детето во Болницата во Струга е донесено во многу тешка форма со подраширени зеници, ослабено срце и загрозени сите витални параметри. И покрај долгата реанимација и борбата на лекарите да го вратат во живот било неуспешно. Имало тешка форма на респираторна инфекција со загрозени сите витални параметри. Родителите биле свесни околу состојбата, информира Бунчески.
Полицијата во координација со јавен обвинител, презема мерки за целосно расветлување на настанот.
Пред само две недели по два дена откако беше примено, почина деветгодишно дете на скопската Клиника за детски болести. Детето на 14 јануари било доведено на скопската клиника од штипската болница во тешка состојба а после само два дена почина.
Во рок од неколку месеци ова беше петти слиучај да почине дете на истата клиника.
На 16 јануари пак починаа две новороденчиња, близначиња, на околу 15-тина дена старост.
Болници делеле небезбедна храна, уништени 110 кг
Сто и десет килограми небезбедна храна, минатата недела уништија инспекторите за храна на Агенцијата за храна и ветеринарство (АХВ), во кујни во болничките установи во земјава, во рамки на спроведените 43 вонредни инспекциски надзори.
„Со контролите утврдено е дека пет кујни ја немале исполнето законската обврска за регистрација како оператори со храна во АХВ, четири не ги задоволувале техничките барања за безбедност, односно утврдени се оштетувања на просториите каде се подготвува храна. Осум од кујните не ги задоволувале барањата за Добра хигиенска и Добра производствена пракса како барања за безбедност на храната, соопшти АХВ.
За утврдените недоследности – нехигиена, наталожени маснотии во кујната, неводење на записи, несоодветно одржување на опремата, оштетени ѕидни и подни површини, немање сопствен план за анализа на храна, незавршен курс по хигиена на храна од страна на вработените лица, односно не поседување на сертификати за оваа законска обврска, утврдени нерегистрирани оператори со храна и друго, донесени се 15 решенија со наредби за отстранување на констатираните недоследности и изречени се пет парични казни.
Целта на вонредните контроли во кујните, како што информираа од АХВ, била контролата дали кујните се регистрирани како оператори со храна, дали и колку ги исполнуваат општите и посебните барања за хигиена, барањата за безбедност кои се однесуваат на вработените лица во кујните, примената на правилата за добра хигиенска пракса и добра производствена пракса и НАССР процедурите, следливоста, потеклото на суровини, манипулацијата со храна и исполнувањето на микробиолошките критериуми на храната.
Студенти цела ноќ блокираа мост во Нови Сад, добија поддршка од колеги од Словенија
Цела ноќ „Мостот на слободата“ во Нови Сад остана блокиран, а студентите спиеја во шатори или на стиропор.
Студенти на три новосадски факултети, со поддршка на своите колеги кои пеш пристигнаа од Белград, како и моторџии и граѓани, вчера ги блокираа сите три моста во Нови Сад, на денот кога поминаа три месеци од несреќата кај железничка станица во која загинаа 15 лица.
Многумина утрото го дочекаа на мостот, а некои пристигнаа во раните утрински часови да појадуваат со „ноќната смена“, јавува репортерот на РСЕ.
„Сега е време за смена на луѓе, многумина ноќеваа на мостот, а сега пристигнуваме да ги замениме, да ги поддржиме“, вели Милица, студент по медицина.
„Оптимисти сме, со нас се сè поголем број луѓе. Конечно наместо на тераси и прозорци, граѓаните ни се придружуваат на улица“, вели Ѓорѓе, студент на Медицинскиот факултет од Нови Сад.
Неговиот факултет е во карантин повеќе од педесет дена.
Граѓаните пристигнуваат за претпладневното продолжение на блокадата на Мостот Слобода. Жени од Нови Сад подготвуваат појадок за студентите.„Им правиме пити, им правиме кафе, имаме и бурек за гладните“, вели за РСЕ една новосаѓанка.
Група студенти отишле на утринско трчање додека некои се одлучиле за фудбал на маса.
Студентскиот парламент на Факултетот за хуманистички науки во Копер, Словенија во неделата ги поддржа студентите од Србија кои протестираа и им порача дека не се сами, туку дека со нив се и нивните колеги од Словенија.
„Вашите барања се јасни и покрај сите можни техники за пренасочување на вниманието, тие сè уште остануваат неодговорени. Ако вашите зборови се толку силни што спротивната страна се обидува да ги сокрие преку физичко насилство, тогаш знајте дека сте во право“, велат тие.
Додаваат дека поентата на универзитетот е студентите да имаат право јавно да го кажат своето мислење, дека имаат право да зборуваат без никој да ги замолчи.
Поддршка испрати и Студентскиот парламент на Факултетот за хуманистички науки на Универзитетот во Приморска од Копер и професорката Сандра Башиќ Хрватин.
Барањата на студентите за прекин на блокадите вклучуваат објавување на целосна документација за реконструкција на железничката станица во Нови Сад, за утврдување одговорност за несреќата од 1 ноември 2024 година.
Тие бараат и напаѓачите на демонстрантите ширум Србија, за време на протестите кои следеа по несреќата, да бидат идентификувани и да се соочат со кривична одговорност.
Барањата вклучуваат и ослободување на активистите уапсени за време на протестите, прекин на кривичната постапка против нив и зголемување на буџетот за универзитетите.
Мултимедија
Најпосетени
Што треба да знаете