Вести
Забрана за увоз и употреба на желудник од живина во производи од месо
Агенцијата за храна и ветеринарство (АХВ) донесе решение за забрана за увоз и употреба на пилешки желудник наменет за човечка исхрана во производството на подготовки и производи од месо. Решението кое ќе почне да се применува од 1 август годинава е донесено поради утврдени потенцијали ризици од употребата на мускулниот дел од желудникот на живината за здравјето на луѓето (можна контаминација со патогени – бактерии и вируси, присуство на токсини и сл.).
Сите количини пилешки желудник што се претходно увезени и складирани операторите со храна треба да ги потрошат во рок од 60 дена од денот на почнувањето на примената на решението.
„Со цел превенирање можна злоупотреба на веќе увезените количини, во наредните два месеца инспекциските служби на Агенцијата ќе спроведуваат засилени контроли во малопродажните објекти во кои се продава месо, подготовки и производи од месо, како и во месарниците и месните индустрии“, соопшти АХВ.
Инспекциските контроли на Агенцијата утврдиле употреба на овој вид внатрешен орган од живина во подготовки од месо, каде што не смее да ги има во согласност со одредбите од правилникот за изменување и дополнување на правилникот за барањата во однос на квалитетот на меленото месо, подготовки од месо и производи од месо.
Со овој подзаконски акт забранета е употребата на некои внатрешни органи, вклучително и мускулен дел од желудник на живина, во производство на мелено месо и подготовки од месо, како што се плескавиците и ќебапите, а кои исклучително може да се подготвуваат од месо од говеда, овци, кози и свињи и други додадени состојки, но не и од пилешки желудници и МОМ (месно обескостено месо).
Употребата на мускулен дел од желудник на живина сега е дозволена исклучиво во производство на производи од месо (колбаси, сувомесни производи, конзерви и други производи), само во одобрен објект (месни индустрии) и само доколку наведените производи подлежат на соодветен термички топлотен третман.
види ги сите денешни вести
Јужна Кореја: Испраќањето војници од Северна Кореја во Русија е закана за безбедноста
Кабинетот на јужнокорејскиот претседател Јун Сук-Јол објави дека испраќањето војници од Северна Кореја во Русија е „сериозна закана за меѓународната безбедност“ и дека ќе одговори на тоа со сите расположливи средства.
На состанокот со клучните разузнавачки, воени и безбедносни претставници, беше истакнато дека моменталната ситуација во воените односи меѓу Русија и Северна Кореја е „сериозна закана не само за Јужна Кореја, туку и за меѓународната заедница“.
Јужнокорејските власти соопштија дека е веројатно некои севернокорејски војници во Русија да се вмешани во конфликтот во Украина, но не дадоа дополнителни детали.
Украинскиот претседател Володимир Зеленски претходно ја обвини Северна Кореја дека испраќа офицери да и помогнат на Русија, додека генералниот секретар на НАТО Марк Руте рече дека во моментов нема докази за присуство на Пјонгјанг во војната.
Јужнокорејски и американски официјални лица тврдат дека Северна Кореја и доставува балистички ракети и друга муниција на Русија, обвинение кое и Пјонгјанг и Москва го негираа.
Кремљ, исто така, ги отфрли тврдењата на Јужна Кореја за испраќање воен персонал во Русија.
Пјонгјанг и Москва се сојузници од основањето на Северна Кореја по Втората светска војна и уште повеќе се зближија по руската инвазија на Украина во 2022 година, при што Сеул и Вашингтон долго време тврдат дека Ким Џонг Ун испраќал оружје за употреба во Украина.
Бајден во посета на Берлин, главна тема - Украина
Американскиот претседател Џо Бајден ќе разговара за Украина со лидерите на Германија, Франција и Велика Британија денеска (18 октомври) во Берлин. Посетата е еден ден откако украинскиот претседател Володимир Зеленски им претстави на лидерите на ЕУ и на највисоките претставници на НАТО низа мерки за кои рече дека ќе и помогнат на неговата земја да ја заврши кризата конфликтот и 31-месечната руска инвазија.
Посетата на Бајден на Берлин доаѓа откако Русија ги засили нападите врз украинските градови и инфраструктура, што кулминираше со, како што рече еден украински функционер, „еден од најмасовните“ напади со беспилотни летала врз земјата.
Бајден, кој во четвртокот пристигна во Германија, требаше да ја посети земјата минатата недела и да присуствува на состанокот на Рамштајн групата, позната и како Контакт група за одбрана на Украина.
Американскиот претседател најпрвин ќе разговара со својот германски колега Франк-Валтер Штајнмаер, кој, според најавите, ќе му го врачи Големиот крст на Орденот за заслуги, највисокото германско признание.
Потоа се планира разговор со германскиот канцелар Олаф Шолц, францускиот претседател Емануел Макрон и британскиот премиер Кир Стармер.
Советникот за национална безбедност Џејк Саливан рече дека Бајден сака „да ја направи нашата посветеност на Украина одржлива и институционализирана на долг рок“.
Во четвртокот, Зеленски ги изнесе деталите од неговиот „план за победа“ на украинските сојузници во Европската Унија и НАТО додека се обидува да ги убеди да упатат покана до Украина да се приклучи на алијансата.
Сепак, НАТО сè уште нема дефинирано јасен рок за тоа, додека рускиот претседател Владимир Путин предупреди дека намерата на Киев да се приклучи на НАТО е една од причините поради која Москва ја започна инвазијата.
Во меѓувреме, Русија изврши еден од најголемите напади со беспилотни летала во Украина рано во петокот, изјави шефот на воената администрација на Киев, Серхи Попко.
Сè уште нема извештаи за можни жртви во нападот на Киев, кој траел повеќе од 4,5 часа, рече Попко.
Украинските воздухопловни сили соопштија дека нападите биле насочени кон регионите Киев, Черкаси, Житомир, Виница, Чернихив, Суми и Полтава, а во некои области сè уште е во сила воздушната тревога. Украинската воздушна одбрана соборила 80 од 135 дронови лансирани од Русија.
Двајца работници повредени во експлозија во фабриката „Слобода“
Двајца работници се повредени во експлозија во фабриката „Слобода“ во Чачак, во централна Србија, што се случи во петокот наутро (18 октомври), соопштија од компанијата.
Во соопштението се наведува дека во осум часот наутро дошло до технолошка експлозија во лабораторијата за артилериски гранати.
Од претпријатието изјавија дека едниот работник по прегледот е отпуштен на домашно лекување, додека другиот повреден работник кој е во стабилна здравствена состојба е задржан на болничко лекување.
Според информациите на РТС, една работничка приведена во болница има изгореници на лицето и вратот и повреда на десната рака.
Од компанијата изјавија дека ги преземаат сите неопходни мерки за продолжување на производниот процес.
Српскиот премиер Милош Вучевиќ изјави дека е потребно да се почека полицијата и воената полиција да спроведат истрага.
„Најважно е повредените да закрепнат и да се вратат кај семејствата и да работат. Во фабриката работат со опасни материјали и многу запаливи еклозиви“, рече тој на ТВ Пинк.
Тој изјави дека фабриката „Слобода“ во Чачак е една од најдобрите фабрики во наменската индустрија.
Тројца фабрички работници беа повредени во две експлозии што се случија во 2021 година во рок од 15 дена, а причината за експлозиите не беше откриена во јавноста.
Орбан: Војната во Украина не може да се добие со планот на Зеленски
Војната во Украина не може да се добие со „планот за победа“ предложен од украинскиот претседател Володимир Зеленски, изјави денеска (18 октомври) унгарскиот премиер Виктор Орбан.
„Со ова можеме само да загубиме, а Унгарија нема да биде дел од тоа“, изјави Орбан за јавниот сервис Кошут радио.
Орбан истакна дека ЕУ е поделена на две групи по прашањето за војната.
„Тука сме ние и останатите. Унгарија на почетокот на војната рече дека нема да учествува во воените напори, додека другите земји на ЕУ се во неа. ЕУ се однесува како воинствена страна“, рече Орбан, додавајќи дека Унгарија на почетокот јасно ставила до знаење дека тоа е погрешна стратегија“, рече Орбан.
Тој нагласи дека оваа војна не може да се добие и дека преговорите се неопходни.
„Сега другите 26 земји од ЕУ зачудено слушаат дека претседателот Зеленски има „план за победа“. Зошто, што имаше до сега? Тоа што досега го имаа како план испадна дека е план за пораз, а сега тие се обидуваат да го заменат со план за победа“, рече Орбан и повтори дека Унгарија нема да учествува во тоа.
Украинскиот претседател Володомир Зеленски го претстави својот „План за победа“, пред лидерите на ЕУ и НАТО, а ден пред тоа и пред украинските пратеници.
Едно од главните барања на Зеленски е повикување на „укинување од страна на партнерите на ограничувањата за употреба на оружје со долг дострел на целата територија на Украина окупирана од Русија и на руска територија и на непријателската воена инфраструктура“, како и помош во „опремувањето на украинските резервни бригади“.
Продолжува судењето за двојното убиство на Вања и Панче
Со испитување на сведоци на Обвинителството денеска (18 октомври) во десет часот во Кривичниот суд продолжува судењето за убиството на Вања Ѓорчевска и Панче Жежовски.
На минатото рочиште инспекторите во СВР Скопје и Велес посочија дека двајца од осомничените ги довеле до телата на Вања и Панче.
На првото одржано рочиште на 14 октомври, обвинетите Љупчо Палевски, Боре Видевски, Велибор Манев и Влатко Кешишов, како и таткото на девојчето, Александар Ѓорчевски се произнесоа дека не се чувствуваат за виновни.
На првото рочиште, меѓу сведоците беше и мајката на убиената Вања, Зорица Ѓорчевска, која тврдеше дека не ги познава обвинетите за убиството. Таа сведочеше и дека таткото, кој сега е обвинет, веднаш се сомневал дека ќерка им е киднапирана.
Истиот ден сведочеа и ќерката и зетот на 74-годишниот Жежовски од Велес. Тие раскажаа дека го пријавиле исчезнувањето на велешанецот откако во неговиот дом наишле на запалена греалка и сијалица, а пензионерот го немало. Го немало ниту возилото „Цитроен“ кое, инаку, не го давал никому и имало голем багажен простор.
Малолетната Вања и велешанецот Панче, кои беа пријавени за исчезнати на 27 и 24 ноември, беа пронајдени мртви во близина на Скопје и Велес на 3 декември 2023 година.
Во врска со овој случај е осомничено уште едно лице за помагање по извршување на кривичното дело против кого постапката ќе се води одвоено.
Судењето го води судијата Ивица Стефановски, а застапник на обвинението е обвинителката Жаклина Крстевска.
Русија извршила „масовен“ воздушен напад врз Украина
Русија го започна еден од најголемите бранови напади со беспилотни летала врз Украина рано на 18 октомври, објави шефот на воената администрација на Киев, Серхи Попко.
„Руските трупи извршија еден од најмасовните напади со дронови врз цивилното население и инфраструктурата на Украина. Непријателските беспилотни летала му се заканија и на Киев. Но, благодарение на координираната работа на одбранбените сили, сите беспилотни летала се движеа кон главниот град беа неутрализирани“, напиша Попко на Телеграм.
Нема информации за жртви за време на нападот на Киев, кој траеше повеќе од 4 и пол часа, додаде Попко.
Воздухопловните сили на Украина соопштија дека нападите биле насочени кон регионите Киев, Черкаси, Житомир, Винца, Чернихив, Суми и Полтава, а предупредувањата за воздушни напади сè уште биле активни во некои региони.
Нетанјаху: Војната може да заврши уште утре, ако Хамас ги врати заложниците
Израелскиот премиер Бенјамин Нетанјаху во изјава на англиски јазик го нарече убиството на лидерот на Хамас, Јахја Синвар, „почеток на крајот“ на војната во Газа.
„Имам едноставна порака до жителите на Газа - оваа војна може да заврши уште утре. Може да заврши доколку Хамас го положи оружјето и ги врати нашите заложници. Израел ќе ја гарантира безбедноста на сите оние кои ќе ги вратат нашите заложници. Ако некој им наштети на заробениците Израел ќе ги лови и ќе ги изведе пред лицето на правдата“, рече Нетанјаху.
Израелскиот премиер додаде дека оската на теророт изградена од Иран „се урива пред нашите очи“.
„Владеењето на теророт што го наметна иранскиот режим врз својот народ и народите на Ирак, Сирија, Либан и Јемен ќе заврши“, рече Нетанјаху.
Јаја Синвар беше убиен вчера (17 октомври). Израелскиот министер за надворешни работи Израел Кац објави дека Синвар бил убиен за време на воените операции во Појасот Газа.
Синвар е осомничен дека наводно го организирал смртоносниот напад врз Израел на 7 октомври 2023 година. Нападот без преседан ја предизвика израелската војна во палестинската енклава.
Тој стана главен лидер на Хамас, по атентатот на Исмаил Ханије, шеф на политичкото биро на групата, кој беше убиен во Техеран на 31 јули во наводен израелски напад.
Кинески компании за беспилотни летала цел на новите санкции на САД
Соединетите американски држави (САД) денеска (17 октомври) воведоа санкции за две кинески компании и поврзана руска компанија, вклучени во производство и испорака на беспилотни летала што Русија ги користи во нејзината инвазија на Украина.
Двете кинески компании санкционирани од американското Министерство за финансии се Xiamen Limbach Aircraft Engine Company и Redlepus Vector Industry Shenzhen.
Компанијата Xiamen Limbach го произведува моторот што ги напојува руските беспилотни летала со долг дострел Гарпија, соопшти американското Министерство за финансии. Се наведува дека Redlepus Vector Industry Shenzhen е вклучена во испорака на беспилотни летала за напад.
Во санкциите беа именувани и руски државјанин и руска компанија поврзана со две кинески компании. Станува збор за Артем Јамшиков, извршен директор и сопственик на ТСК Вектор, кој служи како посредник меѓу претходно назначената руска компанија и добавувачот со седиште во Кина за рускиот проект Гарпија.
Јамшиков, исто така, го поседува и управува со Друштвото со ограничена одговорност Трговска куќа Вектор, руска подружница која исто така беше именувана во објавата за санкции.
Министерството за финансии објави дека ова се првите американски санкции за кинески субјекти кои произведуваат целосни системи за оружје во партнерство со руски фирми. Претходно воведените санкции врз кинеските субјекти беа насочени кон оние кои обезбедуваа компоненти клучни за руската воено-индустриска база.
„Русија сѐ повеќе се потпира на експертизата на странските експерти и увозот на софистицирани технологии за да ја одржи својата програма за оружје и да ја унапреди својата воена кампања против Украина. Ќе продолжиме да ги попречуваме мрежите кои ѝ дозволуваат на Русија да го набави и користи ова напредно оружје “, рече вршителот на должноста потсекретар за тероризам и финансиско разузнавање на Министерството за финансии, Бредли Т. Смит.
Русија го користи Гарпија во нејзината брутална војна против Украина, уништувајќи ја критичната инфраструктура и предизвикувајќи масовни жртви, соопшти Министерството за финансии.
Беспилотните летала се дизајнирани и развиени од експерти со седиште во Кина и се произведуваат во фабрики во Кина во соработка со руски одбранбени фирми пред да бидат пренесени во Русија за употреба против Украина, се вели во соопштението.
Санкциите ги замрзнуваат сите средства на поединци и компании кои се под јурисдикција на САД и ги спречуваат американските граѓани да имаат бизнис соработка со нив.
МАНУ: Не се занимаваме со партиски дискусии, има само една Академија
Академијата никогаш не се занимавала и нема да се занимава со дневнополитички расправи и партиски дискусии, кои ја оптоваруваат редовната дејност, односно со работи во доменот на Законодавниот дом и на државните институции, се наведува во соопштението од МАНУ во однос на најавите од некои политички партии за основање на академија на етничките Албанци во Македонија.
„Во Македонија, како и во земјите во регионот и во светот, постои само една национална академија која ја претставува државата во европската и во други меѓународни асоцијации на академии. Постојат примери во државите во регионот и пошироко за формирање на т.н. струкови академии во рамките на соодветни стручни здруженија (Академија за архитектура, Академија за медицински науки и др.), како и други научно-уметнички друштва во поголемите градови и во регионалните центри, но нема примери за формирање на паралелни национални академии“, се подвлекува во соопштението од Претседателството на МАНУ.
Реакцијата на МАНУ доаѓа откако градоначалниците на Тетово, Гостивар, Желино и Чаир, кои се од коалицијата „Вреди“, на 15 октомври, во Тетово, најавија дека ќе го финансираат работењето на здружението - Албанска академија на науките и уметностите.
Академиците велат дека МАНУ секогаш била отворена за сите граѓани кои ги исполнуваат високите научни и уметнички критериуми за членство во неа, независно од етничката, верската и од каква било друга припадност. И дека од нејзиното основање до денес, членови во Академијата биле припадници на македонскиот народ, но исто така и на сите етнички заедници.
Против иницијативата на градоначалниците од Вреди се огласија владејачка ВМРО-ДПМНЕ и опозициските СДСМ и ДУИ.
Премиерот, Христијан Мицкоски кој е и лидер на ВМРО-ДПМНЕ, тврди дека советниците од оваа партија нема да гласаат за општински буџет од кој ќе се одвојат средства за оваа намена. Тој вчера (16 октомври) порача дека постои само една Академија на науките и уметностите.
Ривалски групи на православни верници се судрија во Черкеси, Украина
Верници од православните цркви во централниот украински град Черкаси се судрија откако соборната црква Свети Михаил, украинска православна црква на Московската патријаршија, беше предадена на Православната црква на Украина.
Во август оваа година, Парламентот на Украина усвои закон за забрана на Руската православна црква во Украина.
Околу 100 маскирани лица насилно упаднаа во црквата, која беше гарнизонска црква на украинските вооружени сили, за време на ноќната литургија на 17 октомври, јавува украинскиот сервис на Радио Слободна Европа (РСЕ).
Инцидентот ескалирал во физички конфликт меѓу верници од ривалските цркви.
Тензиите околу црквата Свети Михаил се случуваат додека Украина се обидува да го ослабне влијанието на Украинската православна црква на Московската патријаршија, која историски била поврзана со Руската православна црква.
И покрај прогласувањето независност од Москва во 2022 година, украинските власти и понатаму се сомневаат во оваа црква поради нејзиниот наводен проруски став.
Во судирите се повредени неколку лица, изјави Зоја Вовк, портпарол на Националната полиција во регионот Черкаси. Вовк потврди дека е отворена истрага за „хулиганство“.
Претставници на Украинската православна црква на Московската патријаршија, наводно, ги пробиле влезните порти и фрлиле солзавец врз групата верници на Православната црква на Украина.
Сведоците рекоа дека свештениците и верниците на Украинската православна црква на Московската патријаршија се забарикадирале во црквата и ги спречиле другите да влезат.
Дописникот на РСЕ јави дека конфликтот завршил дури по пристигнувањето на полицијата и активистите.
На крајот се одржа богослужба на украински јазик.
Украина се обидува да се дистанцира од руската црква од 2014 година, а напорите се забрзани по руската инвазија од 2022 година.
Мултимедија
Најпосетени
Што треба да знаете