Вести
Обвинителството отвори уште една истрага против Рашковски
Обвинителството за борба против организиран криминал и корупција отвори нова истрага за веќе осомничениот поранешен генерален секретар на Владата Драги Рашковски во друг предмет за оштетување на буџетот за 100 илјади евра со незаконито спроведување на јавна набавка. Обвинителството покрај на наребата за спроведување нова истражна постапка, од судот продолжување на мерките за обезбедување присуство, со оглед на тоа што за неколку дена истекува притворот на поранешниот генерален секретар на Владата.
Како што соопштија од Обвинителството, од прибраниот доказен материјал од претходната истрага произлегло дека тројца од веќе осомничените лица сториле уште две кривични дела, оштетувајќи го буџетот за над 6,6 милиони денари.
„Првоосомничениот се товари дека во периодот од 2017-2019 година при спроведување на постапка за јавна набавка потпомогнат од останатите двајца осомничени ја злоупотребил службената положба и овластување. Исто така, првоосомничениот со умисла помогнат од второосомничениот во периодот од 2019 – 2021 година за себе прибавил противправна имотна корист во поголем износ со што двајцата сториле кривично дело Злоупотреба на службената положба и овластување“ се вели во соопштението на Обвинителството.
Според досегашната предистражна постапка, Рашковски во периодот од 2017-2019 година со умисла спровел две јавни набавки со помош на останатите двајца осомничени, при што не биле почитувани одредбите од Законот за јавни набавки, и дополнително без спроведена постапка за јавна набавка, првоосомничениот извршил плаќање по разни основи на правно лице сопственост на третоосомничениот во вредност од 2.720 евра.
„Во временскиот период од месец мај 2019 година до месец февруари.2021 година, првоосомничениот го искористил службеното овластување и со умисла помогнат од второосомничениот склучиле два авторски договори за кои на месечно ниво на второосомничениот му бил исплаќан нето износ од 80.000,00 денари. Согласно претходен договор меѓу двајцата осомничени, паричните средства биле делени во сооднос 5:3 во корист на второосомничениот, со што првоосомничениот за себе прибавил противправна имотна корист во поголем износ од вкупно 590.000,00 денари.“ се вели во соопштението.
Рашковски е во притвор во врска со „истрагата за набавка на софтвер“. Поранешниот генерален секретар на Владата и доскоро висок владин службеник е осомничен во случајот за јавна набавка на софтер за сообраќајни прекршоци кој што Министерството за внатрешни работи со месеци не го користело.
види ги сите денешни вести
Песков: Засега нема сигнал од европските земји за вклучување во мировните преговори за Украина
Рускиот претседател Владимир Путин не добил знак од европските држави дека сакаат да се вклучат во разговори за завршување на војната во Украина, соопшти Кремљ.
„Досега немаше никакви сигнали“, рече портпаролот на Кремљ, Дмитриј Песков во Москва, цитиран од државната новинска агенција ТАСС.
Песков се осврна на изјавите на финскиот претседател Александар Стуб, кој сугерираше дека една или две земји треба да преговараат со Москва во име на европските нации кои ја поддржуваат Украина, најверојатно, Франција или Обединетото Кралство досега ги преговараа земјите од Европа во Украина и Обединетото Кралство.
Русија и САД досега ги заобиколија европските земји во преговорите за можен крај на војната во Украина. На разговорите не беа поканети ниту европските земји, ниту самата Украина.
Во меѓувреме, Велика Британија и Франција го обвинија рускиот претседател Владимир Путин за одложување на мировните преговори во Украина и побараа тој веднаш да одговори на Соединетите Држави.
Во нашата проценка, Путин продолжува да одолговлекува, му рече британскиот министер за надворешни работи Дејвид Лами на својот француски колега Жан-Ноел Баро во седиштето на НАТО во Брисел.
Лами истакна дека наместо да се согласи со предлогот за прекин на огнот, рускиот лидер „продолжува да ја бомбардира Украина, нејзиното цивилно население, нејзините енергетски структури“.
„Те гледаме Владимир Путин, знаеме што правиш“, рече шефот на британската дипломатија.
Баро, од своја страна, рече дека Украина се согласила со условите за прекин на огнот уште пред три недели и дека сега Русија „му должи одговор на САД“.
Американскиот претседател Доналд Трамп изрази разочарување од неговиот руски колега и украинскиот претседател Володимир Зеленски, откако тој вети дека брзо ќе ја заврши војната.
Пожарот во Кочани зеде уште една жртва, почина еден од критично повредените пациенти
Министерот за здравство Арбен Таравари потврди дека има уште една жртва од трагедијата во Кочани. Починатиот, кој беше на лекување во Литванија, имал 40 отсто изгореници, а на 1 април му откажале бубрезите.
Според првичните информации, се работи за Александар Карадакоски, управителот на дискотеката „Пулс“.
Овој пациент беше еден од четворицата пациенти кои беа во критична состојба.
„Од 1 април му откажа работата на бубрезите, практично беше ставен на дијализа. За жал, утрово ја добив лошата информација дека тој починал. Да се надеваме дека другите критични да им се подобри состојбата. Пациентот што почина, 40 отсто од телото му беше со изгореници. На крајот, главниот проблем беше инфекцијата која што ја добив поради огромна површина на рани кои ги имаше на телото. Да се надеваме дека другите критични ќе поминат подобро и да ни се вратат во државата“, рече Таравари по посетата на Здравствениот дом во Липково.
Извори од МНР за МИА информираат дека е започната процедурата за враќање на телото на пациентот.
Ова е 60-тата жртва од пожарот во дискотеката во Кочани што се случи рано изутрина на 16 март. Повеќе од 200 луѓе беа повредени. Најголемиот дел од нив беа испратени на лекување во странство.
Почнува предизборната кампања во Романија, за претседателската функција се борат 11 кандидати
Во Романија денеска (4 април) официјално започна претседателската изборна кампања, а 11 кандидати ќе се натпреваруваат за функцијата шеф на државата. Кампањата се одвива во сенка на неодамнешната дисквалификација на кандидатот Калин Ѓоргеску, кој првично важеше за фаворит.
Актуелниот претседател Клаус Јоханис, кој во моментов нема уставно право за уште еден мандат, ги повика граѓаните да учествуваат во демократскиот процес и да изберат кандидат кој ќе ја одржи стабилноста на земјата.
Политичките аналитичари очекуваат неизвесна трка, бидејќи дел од гласачите на дисквалификуваниот Ѓоргеску сè уште не одлучиле кого ќе поддржат.
Изборите се закажани за 4 мај, а евентуален втор круг би се одржал на 18 мај.
За функцијата ќе се борат 11 кандидати, меѓу кои четворица независни и седум кандидати, поддржани од партии и коалиции. Изборите ќе се одржат по вторпат, откако на крајот на минатата година Уставниот суд на земјата го поништи првиот круг одржан во ноември и нареди изборниот процес да започне одново.
На претходните избори, пред вториот круг, закажан за 8 декември минатата година, се појавија сомнежи дека кандидатот Ѓоргеску, кој се пласираше на прво место, се користел со недекларирано финансирање и масовна онлајн кампања, зад која можеби стои Русија. Москва ги отфрли овие обвинувања. Врз основа на извештаи од разузнавањето, Уставниот суд на 6 декември го поништи резултатот од првиот круг и одлучи целиот процес да започне од почеток.
На неколку кандидати, меѓу кои Ѓоргеску, не им е дозволено учество во повторените избори оваа година. Меѓу нив е и крајно десничарската европратеничка Дијана Шошоака, на која ѝ беше забрането учество и минатата година поради ставови што го загрозуваат членството на земјата во ЕУ и НАТО.
За првпат во посткомунистичката историја на земјата, најголемата партија-Социјалдемократската (СДП), нема да има свој кандидат на изборите. Премиерот Марчел Чолаку-единствениот досегашен кандидат на СДП што не успеа да стигне до вториот круг, одби повторно да се вклучи во трката. Владејачката коалиција на СДП, Национално-либералната партија (НЛП) и Демократскиот сојуз на Унгарците во Романија (ДСУР) се определи за заеднички кандидат-поранешниот лидер на либералите Крин Антонеску.
Сепак, на гласачките ливчиња ќе се појави името на еден поранешен лидер на СДП-Виктор Понта, кој се враќа во трката за претседателската палата Котрочени по 10 години, овој пат како независен кандидат.
Елена Ласкони, претседателка на опозициската реформаторска партија „Сојуз за спас на Романија“ (ССР), која беше еден од финалистите на минатогодишните избори, ќе се натпреварува „во истиот коридор“ со градоначалникот на Букурешт Никушор Дан, кој ја основаше оваа партија, но подоцна ја напушти и сега влегува во трката како независен, посочува телевизијата Диџи 24.
Суверенистичките партии-Алијансата за обединување на Романците (АУР) и Партијата на младите луѓе (ПОТ), одлучија лидерката на ПОТ Анамарија Гаврила да се повлече од трката за да не ги дели гласовите, додека лидерот на АУР Џорџе Симион остана нивни заеднички кандидат.
Големото прашање на новите претседателски избори е кој од кандидатите ќе успее да ги привлече симпатизерите на Калин Ѓоргеску, кои според анкетите на јавното мислење од последните месеци се близу 40 проценти.
Светските берзи во пад, на Волстрит избришани 2400 милијарди долари
Откако Вашингтон најави воведување драстични царини, сите најголеми светски берзи паднаа нагло, при што само на Волстрит се избришани околу 2400 милијарди долари од пазарната вредност на компаниите од индексот СиП 500.
Откако американскиот претседател Доналд Трамп објави царини од 10 отсто на целиот увоз и на увозот од земјите со кои САД имаат најголем трговски дефицит и дополнителни реципрочни царини, на светските берзи владее паника.
Ова може да предизвика ескалација на царинската војна, прекини во синџирите на снабдување и меѓународната трговија, зголемување на инфлацијата и забавување на растот на најголемите светски економии, па дури и рецесија во некои од нив.
Азиските берзи беа првите на удар вчера бидејќи Трамп најави драстични реципрочни царини за увоз од Кина, Јапонија, Индија, Тајван, Јужна Кореја. Увозот од Кина, кој веќе подлежи на царини од 20 отсто, во иднина ќе подлежи на дополнителни давачки од 34 отсто, 24 отсто увоз од Јапонија, 26 отсто од Индија, 25 отсто од Јужна Кореја.
Како резултат на тоа, цените на акциите паднаа на сите азиски берзи вчера, најмногу во Јапонија, Јужна Кореја и Хонг Конг.
Следеа европските берзи, каде индексите беа во длабока негатива од самото отворање бидејќи Трамп најави дополнителни царини на увозот од Европската Унија од 20 отсто, а многу европски лидери возвратија со остар тон и најавија контрамерки.
На крајот од тргувањето, лондонскиот ФТСЕ индекс се намали за 1,55 отсто, на 8474 поени, додека франкфуртски ДАКС потона за 3,01 отсто, на 21717 поени, а париски ЦАЦ за 3,31 отсто, на 7598 поени. Индексот Доу Џоунс падна за 3,98 отсто, на 40545 поени, додека СиП 500 потона за 4,84 отсто, на 5.396 поени, а индексот Насдак падна за 5,97 отсто, на 16550 поени.
За сите три индекси ова е најголем дневен пад од 2020 година, кога на пазарите владееше паника поради кризата со корона. Ова вчера избриша околу 2400 милијарди долари од пазарната вредност на компаниите од индексот СиП 500.
Во исто време, меѓу најголемите губитници беа акциите на голем број технолошки гиганти. Цената на Епл потона за 9,2 отсто, Амазон за 9 отсто, Енвидиа речиси 8 отсто.
Кина и Европската Унија најавија контрамерки. Јужна Кореја, Мексико, Индија и неколку други земји рекоа дека засега ќе се воздржат и ќе се обидат да преговараат.
И додека вчера паднаа сите најважни индекси на Волстрит, само индексот на страв ВИКС порасна, пробивајќи се над нивото од 30 поени за прв пат од август. Тоа значи дека инвеститорите се повеќе ги осигуруваат своите портфолија од можен понатамошен пад на цените на акциите.
Трамп вчера рече дека е отворен за преговори. Токму затоа на светските берзи и во наредните денови се очекува неизвесно тргување.
Јужнокорејскиот претседател Јун Сук Јеол отстранет од функцијата
Јужнокорејскиот претседател Јун Сук Јеол е отстранет од функцијата откако Уставниот суд во петок (4 април) го потврди неговото отповикување. На 3 декември, Јун прогласи воена состојба за време на буџетскиот спор со опозицијата, што ја втурна земјата во криза и доведе до негово отповикување од страна на парламентот.
Јун ја оправда својата мерка со тоа што ја обвини опозицијата дека дејствува против државата и дека е инфилтрирана од комунисти, иако не се обезбедени докази за поддршка на овие тврдења.
Во својата едногласна одлука, судот тврди дека наметнувањето на воената состојба од страна на Јун не е оправдано со национална криза. Исто така, Јун го прекршил законот кога испрати војници во Националното собрание за да спречи укинување на воената состојба.
Вршителот на должноста претседател на судот Мун Хјунг Бае ја прочита пресудата, која беше емитувана во живо.
„Негативните ефекти врз уставниот поредок и последиците од прекршувањето на законот од страна на обвинетиот се сериозни, што ги прави придобивките од заштитата на Уставот со разрешувањето на обвинетиот поголеми од националните загуби од разрешувањето на претседателот“, рече Мун.
Јун изјави дека му е жал што не ги исполнил очекувањата на јавноста во изјавата неколку часа по одлуката на судот, објави јужнокорејската новинска агенција Јонхап.
„Длабоко жалам што не можам да ги оправдам вашите надежи и очекувања. Најголема чест во мојот живот беше да ѝ служам на нашата нација. Искрено сум благодарен за вашата непоколеблива поддршка и охрабрување“, рече Јун во изјавата.
Владејачката Партија за народна моќ на Јун соопшти дека „скромно ја прифаќа“ одлуката на судот, додека главната опозициска Демократска партија ја поздрави како „народна победа“, објави Јонхап.
Пресудата значи дека нови избори мора да се одржат во рок од 60 дена.
Дотогаш премиерот Хан Дак Су ќе остане в.д. премиер. Тој тесно загуби од Јун на претседателските избори во 2022 година. Пред пресудата, областа околу судот беше опколена. Повеќе од 14 000 полицајци беа распоредени во центарот на Сеул за да спречат насилни немири.
За Јун, правните битки не се завршени и покрај последната пресуда. Се очекува да му се суди по обвиненијата за бунт поради воведувањето воена состојба. Доколку биде прогласен за виновен, тој може да се соочи со долготрајна затворска казна.
Најмалку три лица загинале, а 32 се повредени во напад со руски дрон во Харкив
Руски дронови синоќа (3 април) го нападнаа вториот по големина град во Украина, Харкив, погодувајќи станбени згради и подметнувајќи пожари во кои загинаа најмалку три лица, а 32 беа повредени, соопштија локалните власти.
Регионалниот гувернер Олег Синегубов изјави дека меѓу ранетите има и две деца.
Тој рече дека се зафатени неколку високи станбени згради, при што избувнал пожар на покривот на една од зградите. Спасувачките екипи ги пребаруваат урнатините по преживеани.
Градоначалникот Игор Терехов изјави дека под урнатините се пронајдени останките на трето лице.
Синегубов, исто така, рече дека едно лице е повредено во напад со дрон во село во близина на Харкив.
Во текот на изминатата недела, Харкив, во североисточна Украина, беше цел на напади со руски дронови речиси секоја ноќ.
Во градот Днипро три лица се повредени во масовен напад со дрон. И во регионот Запорожје, најмалку седум беспилотни летала нападнаа цели во регионот, при што беше повредено едно лице, соопштија локалните власти.
Во меѓувреме, московскиот градоначалник Сергеј Собјанин изјави дека руските единици за противвоздушна одбрана одбиле дрон што се приближувал кон Москва.
„Единиците за воздушна одбрана на Министерството за одбрана одбија напад на беспилотно летало што леташе кон Москва“, напиша Собјанин на апликацијата Телеграм.
Рубио: САД остануваат посветени на НАТО, повик за зголемување на одбранбените трошоци
Американскиот државен секретар Марко Рубио на 3 април рече дека администрацијата на Трамп е посветена на останување во НАТО и ги повика 32-те членки на воената алијанса да се заложат за зголемување на трошоците за зајакнување на нивните одбранбени способности.
По пристигнувањето на дводневниот состанок на министрите за надворешни работи на НАТО во Брисел, Рубио рече дека САД се „активни како што некогаш биле“ во алијансата, додека се обидува да ја смири загриженоста на сојузниците дека Трамп ги поткопува трансатлантските односи.
„Претседателот Трамп јасно стави до знаење дека го поддржува НАТО. Ќе останеме во НАТО“, рече Рубио пред средбата.
„Сакаме да заминеме одовде со разбирање дека сме на пат, реален пат, секоја земја-членка да се обврзе и да го исполни ветувањето дека ќе достигне пет проценти од потрошувачката. Тоа ги вклучува и САД“, рече тој.
Пред состанокот, генералниот секретар на НАТО Марк Руте, исто така, се обиде да ја намали загриженоста за посветеноста на Трамп кон алијансата, велејќи дека според него, посветеноста на САД кон НАТО е „апсолутно јасна“.
„Знам дека има остри зборови. Знам дека има сојузници, на пример, од оваа страна на океанот кои се загрижени за долгорочната посветеност на САД кон НАТО“, рече Руте во средата.
„Апсолутно сум убеден дека оваа алијанса е тука да остане со САД. Нивната посветеност е апсолутно јасна“, додаде тој.
Сојузниците на НАТО се решени да претстават обединет фронт против руската инвазија на Украина, но европските сојузници чувствуваат дека нивните напори се маргинализирани.
Барајќи брз договор за прекин на огнот, Вашингтон сугерираше дека Украина можеби ќе треба да направи територијални отстапки и да преземе чекори за повторно започнување на дијалогот со Русија.
Се очекува Рубио да се соочи со прашања од сојузниците кои се вознемирени, лути и збунети од потезите на администрацијата на Трамп да ги поправи односите со Русија, како и нејзините вербални напади врз долгогодишните трансатлантски партнери.
Врз основа на она што го виделе и слушнале откако Трамп ја презеде функцијата во јануари, европските претставници изразија длабока загриженост за идната улога на САД во алијансата.
Рубио, исто така, веројатно ќе биде принуден да ја објасни желбата на Трамп да ја направи Канада 51-ва држава и неговиот притисок да го анектира Гренланд, кој е автономен во рамките на Данска, уште еден сојузник на НАТО.
Лидерите на НАТО се очекува да одлучат во јуни дали да ги зголемат трошоците за одбрана за секоја членка од сегашниот минимум од два отсто од бруто домашниот производ (БДП).
Администрацијата на Трамп претходно ја промовираше идејата за минимално трошење од пет проценти од БДП, додека Руте повика секој сојузник да се обврзе да потроши најмалку 3,7 проценти од БДП за одбрана што е можно поскоро.
Некои европски сојузници нема да бидат подготвени да трошат премногу брзо за одбрана со оглед на проблемите со нискиот раст и зголемените дефицити.
Најавата на Трамп за царини за речиси секоја земја ширум светот - што еврокомесарот за трговија Марош Шефчовиќ ги нарече „неоправдани“ - ги зголеми стравувањата дека економскиот раст би можел уште повеќе да забави.
На состанокот на НАТО ќе присуствува и украинскиот министер за надворешни работи Андриј Сибиха, кој се очекува да даде ажурирање за ситуацијата на бојното поле во војната против Русија.
Иако членството на Украина во НАТО засега не е на маса, повеќето европски сојузници сакаат барем да добијат гаранции дека американското оружје ќе продолжи да оди во Украина и дека мисијата на НАТО за обука на украински војници ќе продолжи да функционира.
Сепак, САД повеќе не претседаваат со Контакт групата за одбрана на Украина, позната како Рамштајн група, која ја координира воената поддршка за Киев.
Обединетото Кралство претседаваше со последниот состанок на групата во февруари, а наредниот, кој е привремено закажан за 11 април, би можеле да биде копретседаваат ОК и Франција.
Муцунски се сретна со Рубио во Брисел, најавени нови иницијативи за соработка
Министерот за надворешни работи и надворешна трговија, Тимчо Муцунски, остварил, како што наведе, кратка, но продуктивна средба со американскиот државен секретар, Марко Рубио, на маргините на министерскиот состанок на НАТО во Брисел.
„Се согласивме за важноста од натамошно интензивирање на политичкиот дијалог на високо ниво. Следуваат многу заеднички иницијативи“, наведе Муцунски во објавата.
Како што објави Муцунски на социјалните мрежи, разговорот се фокусирал на актуелните прашања од заеднички интерес за Скопје и Вашингтон, како и на соработката во рамките на НАТО.
Двајцата се согласиле за важноста од натамошно интензивирање на политичкиот дијалог на високо ниво и најавија нови заеднички иницијативи.
Муцунски учествува на дводневниот состанок на шефовите на дипломатиите на земјите членки на НАТО, каде што главни теми се безбедносните предизвици, поддршката за Украина, зајакнувањето на партнерствата и подготовките за јунскиот Самит на НАТО во Хаг.
Санкции на Австрија и Германија кон Додик и соработниците за сецесионистички активности
Германија и Австрија иницираат мерки за забрана за влез на тројца лидери од Република Српска во двете земји, се вели во соопштение на германската амбасада.
Претходно австриската министерка за надворешни работи Беате Мајнл Рајзингер и германската државна министерка за Европа и клима, Ана Лирман разговараа во Сараево со претседавачот на Советот на министри на Босна и Херцеговина, Борјан Кришто. Но, во соопштението не наведуваат имиња за кои лидери на Република Српска станува збор.
Инаку, во тек е истрага против претседателот на Република Српска, Милорад Додик, претседателот на собранието на ентитетите, Ненад Стевандиќ и премиерот на Република Српска, Радован Вишковиќ, поради сомнение дека нивните активности го нарушиле уставниот поредок на Босна и Херцеговина.
По нив е распишана централна потерница бидејќи одбиваат да одговорат на поканите за распит во таа истрага.
Во соопштението на германската амбасада се наведува дека министрите од Германија и Австрија рекле дека итно мора да се преземат дополнителни чекори против сторителите на уставната криза во Босна и Херцеговина.
„Нападите врз уставниот интегритет на Босна и Херцеговина од страна на водечките политичари од Република Српска, кои свесно ја ослабуваат државата, се неприфатливи и претставуваат закана за безбедноста и стабилноста на Босна и Херцеговина и на целиот регион. Тие исто така го блокираат понатамошниот процес на пристапување во ЕУ и ја доведуваат во опасност иднината на земјата во ЕУ, се вели во заедничката изјава.
„Затоа, Австрија и Германија, во тесна координација со другите партнери, одлучно се спротивставуваат на одговорните политичари од ентитетот на РС. За таа цел, се иницираат мерки кои во иднина ќе го спречат влезот на тројца одговорни политичари од Република Српска. Милорад Додик со своите сецесионистички провокации и акции отиде во ново на крајност и правно гледано јасно ги премина црвените линии. Со тоа тој ја загрозува безбедноста, стабилноста, уставниот поредок и територијалниот интегритет на земјата на Западен Балкан. Такво однесување повеќе нема да толерираме“, се вели во соопштението.
Во соопштението се повикуваат вклучените актери во БиХ да „придонесат за смирување на ситуацијата“ за да се избегне натамошна ескалација.
Владата на РС, предводена од прорускиот лидер Додик, се обидува да ги уништи основните институции на Босна и Херцеговина преку серија антиуставни одлуки и закони.
Додик, заедно со членовите на неговото семејство и клучните политички соработници, веќе е на списокот со санкции на САД, а санкции воведе и Обединетото Кралство.
Додик одбива да ја прифати и пресудата на Судот на БиХ, кој во прв степен го осуди на една година затвор и шестгодишна забрана за политичко дејствување поради непочитување на одлуките на високиот претставник на БиХ.
Заедно со претседателите на Собранието на РС и на Владата на РС, Ненад Стевандиќ и Радован Вишковиќ, Додик одбива да одговори и на повиците на правосудните институции кои ги товарат за кршење на уставниот поредок на БиХ, поради што пред половина месец се најдоа на централната листа на потерница во земјата.
Покрај тоа, РС се заканува дека ќе поднесе кривични пријави против оние што живеат во таа босанска покраина, ентитет, и работат во институциите на БиХ, доколку не ги испочитуваат барањата на мнозинството на Додик да ги напуштат државните институции.
Европската унија досега не можеше да се договори за санкциите против Додик, поради противењето на унгарскиот лидер Виктор Орбан.
Германија и претходно реагираше на неуставните активности на раководството на РС, со замрзнување на проекти во тој ентитет во април 2022 година со вкупна вредност од околу 105 милиони евра, а во август 2023 година тие средства се целосно се повлечени.
Унгарија најави дека подоцна ќе преземе проекти чие финансирање беше повлечено од германската влада.
Мицкоски и Филипче договориле работни групи за реформи во неколку области
Претседателот на СДСМ, Венко Филипче, ја оцени како конструктивна денешната средба со премиерот и лидер на ВМРО-ДПМНЕ, Христијан Мицкоски, нагласувајќи дека ова е позитивен сигнал дека политичките лидери ги слушаат барањата на граѓаните.
Филипче и Мицкоски се договориле да формираат работни групи за реформите во правосудството, енергетиката и здравството, со учество на експерти од овие области. Следната средба сè уште не е закажана, а беше кажано дека се очекува и другите партии да се вклучат во процесот.
„Имавме добар и навистина конструктивен состанок со премиерот. Сметам дека и до него јасно е стигната пораката и барањето на граѓаните за некаква форма на заедничка работа во сфери кои што се битни да го подобрат квалитетот на живеење. Начелно договоривме дека ќе работиме на начинот да формираме заеднички тела или работни групи во делот, пред се, на спроведување на реформската агенда“, рече Филипче.
Според него, првичните закони кои треба да стигнат во Собранието се од правосудството како нешто што ги тангира сите граѓани, а потоа и од областа на енергетиката и од здравството.
Премиерот Мицкоски на социјалните мрежи кусо напиша дека се разговара за актуелните случувања, нагласувајќи дека „одговорност, мудрост и чесност ѝ се повеќе од потребни на Македонија.“
На средбата се разговарало и за евроинтеграциите и уставните измени, каде двете страни имаат различни ставови.
Филипче истакна дека состанокот не бил етнички, туку фокусиран на суштински реформи за подобрување на квалитетот на живот во земјата.
Во однос на случајот со Модуларната болница, Филипче изјави дека не чувствува одговорност, но нема проблем истрагата да биде повторно отворена.
Мултимедија
Најпосетени
Што треба да знаете