Никола Панов, Стефан Николовски, Оливер Цветковски, Лазар Ангелов, Виктор Гаврилoски и Магдалена Мирческа, Јована Велинова, Кристина Неделковска, Марија Николаевска и Владимир Трајановски се авторите со најдобро оценети стрипови во 2018 година кои со изложба и публикација испечатена по тој повод ќе бидат претставени на доделувањето на првата награда за стрип насловена „Лифт“. Настанот ќе се одржи в петок, на 1 февруари во 20 часот, во Младинскиот културен центар во Скопје. Зад оваа идеја, чија крајна цел е да се промовираат и афирмираат овдешните стрип автори, но и да се унапредува стрипот како запоставен медиум кај нас, стојат книгоиздателството Темплум и невладината организација од областа на комуникациите ОХО.
„Чудна е историјата на стрипот во Македонија. Циклична. Кога ќе се појават некои списанија, издавачи, иницијативи за изложби и за промоции, работилници, ќе живне малку сцената, ама има периоди кога ништо не случува. Не дека сега ништо не се случува на стрип сценава кај нас, има интересни иницијативи, ама токму и поради тоа ние на овој начин сакавме малку да им дадеме ветар во грбот и на тој начин да вградиме уште еден камен во тоа здание наречено македонска стрип култура“, вели Никола Гелевски, уредник на Темплум и заедно со Јана Јакимовска, Ласко Џуроски и Владимир Битољану член на жирито што за оваа пригода е формирано.
Тој појаснува дека се задоволни од одѕивот и дека првичните резултати од конкурсот на којшто се пријавиле триесеттина стрип автори се добри. Надежни. И дека следниве години сето тоа ќе си добие убав тек. Од таму, според него, иницијативата е навреме, па дури и малку задоцнета. Ова го илустрира со информацијата дека и самиот е сведок и пример за таа цикличност во неговиот интерес за бавење со стрип.
„Јас бев и уредник на едно списание за стрип од кое во петте години на постоењето, некаде од 1995 до 2000, излегоа дури 12 броја. „Лифт“ се викаше, а и во Маргина, нашето друго списание, често сме објавувале стрипови. Сега имаме и едиција која се вика „Лифт“, така што на некој начин во континуитет се бавам со стрип, ама со прекини,“ истакнува Гелевски.
Споредувајќи ја актуелната македонска стрип сцена со она што се создава во регионот, Гелевски смета дека сега и не сме блиску како некогаш. Како на средината на 1990-те кога излегувал „Лифт“ како единствено и добро испечатено издание во опкружување главно на фанзини во останатите нам блиски културни средини.
„Мислам дека со исклучок на неколку автори, и тоа е целата среќа, кои и на некој начин се професионализираа цртајќи за телевизија итн. кои го усовршија стилот, и на тој начин можат да се издвојат, со друго и не може пофалиме. За жал поголемиот дел од продукцијата не е на некое ниво и тоа е една од причините зошто се решивме малку да ја насочиме сцената и да ја стимулираме продукцијата со нашава награда“, вели тој.
Донатор на првото доделување на наградата „Лифт“ е Град Скопје, а наградите за тројцата најдобро оценети и благодарниците за сите учесници ги изработи, во дрво, уметницата Калина Игновска. Тие имаат и свој симболичен паричен дел.
„Наградите се „толку можевме“. Сите кубуриме со пари. Наградниот фонд ни е 600 евра – 300 за првонаградениот автор, 200 за второнаградениот и 100 за третиот во низата. Некогаш станува збор и за кратки стрипови. Можеш со една табла, ако добро ја осмислиш да бидеш во врвот. Лимитот ни беше до 16 страници, се* потоа не влезе во конкуренција. Како и да е наградата во ова време на беспарица и не е толку симболична. Се согласувам не е нешто „спектакуларна“, ама од некаде треба да се почне. Всушност, гласната работа е сето тоа медиумски да го подигнеме на повисоко ниво, да направиме малку џева, да го привлечеме вниманието врз стрипот. Бидејќи реално него го нема во нашите медиуми. Се разбира и да ги стимулираме луѓето да работат. Тоа се главните цели на наградата „Лифт“, смета Гелевски.
