Деветнаесет години откако земјава ја посети поранешниот британски премиер Тони Блер во екот на косовската бегалска криза, денеска во земјава повторно доаѓа британска делегација предводена од премиерката Тереза Меј, поради што дипломатите ја сметаат оваа посета за историска. По тој повод, од кабинетот на британската премиерка информираат дека билатералните односи на двете земји се посилни од кога и да е.
„Оваа година кога одбележуваме 25-години од дипломатските односи меѓу Македонија и Велика Британија, врските меѓу нашите земји се посилни од кога и да е“, се наведува во соопштението од кабинетот на Меј.
Поранешниот дипломат Алајдин Демири вели дека британската премиерка доаѓа во земјава за да испорача поддршката на Македонија на патот кон евроатланските интеграции.
„Оваа година се случуваат многу историски нешта во дипломатијата. Сите тие ги гледам како обиди да и се помогне на Македонија, пред се во решавањето на проблемот со името и туркајќи ја Македонија да биде член на европското семејство отворајќи и врата за преговори. И тоа би била основната причина за посетата, други причини не гледам, освен добронамерната идеја на Англија да има добар партнер во овој дел на регионот,“ вели Демири.
Британската премиерка во Скопје ќе допатува во Скопје по учеството на самитот ЕУ-Западен Балкан во Софија. Од нејзиниот кабинет најавија дека таа ќе има средби со премиерот Зоран Заев, како и со ЛГБТ активисти на Меѓународниот ден против хомофобија, трансфобија и бифобија. Меј ќе ја заврши посетата со говор на прием во Собранието.
Од Владата на Република Македонија пак соопштија дека во рамки на посетата на Меј ќе има состанок и меѓу делегации на двете влади по што премиерите Зоран Заев и Тереза Меј ќе одржат прес конференција.
