Вооружен напаѓач пукал со огнено оружје кон група американски републикански политичари, кои играле безбол во близина на Вашингтон. При нападот повреден е американскиот конгресмен Стив Скејлис, двајца полицајци и еден вработен во кабинетот на конгресменот од Тексас Роџер Вилијамс. Полицијата соопшти дека напаѓачот е застрелан и убиен. Станува збор за 66-годишниот Џејмс Т. Хоџкинсон.
Американскиот пратеник Мо Брукс за Си-Ен-Ен изјави дека напаѓачот испукал неколку куршуми на безбол теренот во Александрија, во државата Вирџинија.
Конгресменот Скејлис од Луизијана е шеф на мнозинството во Претставничкиот дом.
Од Кабинетот на Скејлис соопштија дека конгресменот излегол од операција и е во стабилна состојба, а стабилни се и двајцата полицајци.
„Ќе имаше многу жртви доколку не реагираа двајцата полицајци и го соборија напаѓачот и покрај тоа што имаа прострелни рани во овој многу, многу брутален напад“, рече претседателот Доналд Трамп, пренесува Белата куќа.
Околу 20 републикански политичари играле безбол во време на нападот.
