Во секојдневните разговори кумановци велат дека живеат лошо. Нема работа, нема пари, нема расположение, нема доволно паркинзи, сметот не се изнесува редовно и што уште не. А кога ќе се погледне во летните бавчи на кафулињата и рестораните безмалку през цел ден секое место е исполнето. Најчесто тоа се младите и оние до 40 годишна возраст. Некои од запрашаните не сакаат да зборуваат јавно, некои тивко и во брзање дофрлуваат добро или лошо. Повозрасните граѓани често пати велат дека сиромав човек е жив ѓавол, се снаоѓа и троши повеќе отколку што заработува.
За некои од запрашаните квалитетот на животот зависи од локалната, за некои од централната власт.
„Немаме финансии. Пензиите ни се мали, а децата не работат, ние ги финансираме“, вели една кумановска. Таа вели дека нешто треба да се смени, оти според неа и локалната и централнат власт не работат добро.
„Немаме доверба во ниту една власт, зошто децата не се вработени.“
„Ма се ми е преку глава“, вели запрашан кумановец.
Има и такви кои велат дека им е добро.
„Многу добро. Убаво живееме.“
„Во Македонија се живее зависно од тоа кој што работи. Оние што работат живеат добро, оние што не работат потешко. Во суштина сите се снаоѓаат некако. Гледама дека кафулињата секогаш се полни, та мислам дека во Куманово се живее убаво.“
„Катастрофа е. Нема работа. Треба се да се смени. Власта особено. Власта во Куманово е добра.“
Градоначалникот Зоран Дамјановски не е изненаден од незадоволството на граѓаните.
„Општината како никогаш до сега во мојата 11 годишна политичка практика како градоначалник не била во потешка финансиска состојба. Дали е тоа како резултат на политичка дестабилизација во општеството, или е резултат на економската немоќ на граѓаните, приходната страна на општинскиот буџет е преполовена во изминатите три до четири месеци. Тоа ни ги успорува сите динамики во имплементирање на развојната програма и се она што е зацртано како комунална инфраструктура, трансфери социјални, поддршка на културата и се она што е одговорност и надлежност на локалната самоуправа.“
Тој им препорачува на граѓаните да бидат трпеливи, оти се надева дека со разбирањето на партнерските фирми барем делумно ќе биде исполнето планираното за оваа година.
