Уставните судии ја убија изборната демократија, велат демонстрантите кои протестираа пред Уставниот суд, откако тој се произнесе дека ќе ја разгледува иницијативата за зголемување на ингеренциите на претседателот со што би му се овозможило да помилува осудени за изборен криминал. Тие објаснуваат дека овој преседан е неприфатлив, затоа што според Уставот изборите се слободни, непосредни и демократски и со овозможување на помилување на осуденици за изборен криминал директно се крши уставното начело.
Во најблаг случај да си дадат оставка на своите работни места како судии, а сакаме и опозицијата да ја предизвикаме да заземе поцврст став во однос на сето она што се случува.Васко Лазаревски, граѓански активист.
„Ние можеби се плашиме да си признаеме, но сите показатели укажуваат дека осмосептемвриската Република Македонија е убиена република. Протестот е првото и најочигледното средство на граѓаните, не за да ја заштитат, туку за да ја возобноват Македонија,“ вели еден од активистите кои протестираа деновиве пред Уставниот суд, Васко Лазаревски.
Платформата за граѓанска политика „Ајде“ повика на протести под паролата „ Да го одбраниме Уставот од уставните судии.
Намерата на иницијативата која е во рацете на уставните судии е да се амнестираат сите кои досега сториле измама на изборите, како и амнестирање на лицата од „Титаник“, велат дел од иницијаторите на протестот.
„Не е само проблем само за тие лица, тука се гледа намера дека во иднина се охрабруваат партиски војници да сторат кривични дела против изборната волја на граѓаните и да сторат дело со кое ќе ја променат слободно изразената волја на граѓаните, само тоа не предизвикува да излеземе на улиците и да се спротивставиме,“ вели Алек Гочев од „Ајде“.
Лазаревски очекува дека резултатот од протестот ќе биде потсетување на 5-те уставните судии кои гласаа „за“, дека се правници и дека треба да работат исклучиво според правните начела и да го штитат Уставот.
„Во најблаг случај да си дадат оставка на своите работни места како судии, а сакаме и опозицијата да ја предизвикаме да заземе поцврст став во однос на сето она што се случува, затоа што не веруваме дека во догледно време ќе може во Македонија да има кредибилни избори, а да не зборуваме за фер и демократски избори кои би придонеле за позитивна промена во Република Македонија.“
Иницијаторите најавуваат дека протестите ќе продолжат се додека не издејствуваат промена.
