Дневен печат - Доказите на Заев и загадувањето

Првиот човек на СДСМ, Зоран Заев, повторно со изјави за поседување некакви докази против Груевски: на трибината во Битола тој изјавил дека премиерот ќе морал да поднесе оставка во рок од три дена, а Македонија „ќе треба да се срами од доказите зашто се сензитивни и допираат до меѓуетничките односи“.

За ова, под наслов „Доколку со доказите не го урнеме Груевски, ќе поднесеме оставки!“ информира Нова Македонија. Инаку, „Опозицијата не се враќа во Парламентот“, оди со наслов Утрински, известувајќи за состанокот на Заев со Жерновски и Тито Петковски, на кој се разговарало и за незадоволството на неколкумина пратеници од опозициската коалиција, кои срамежливо најавуваат враќање во Собранието. Вечер го цитира Заев: „Опозицијата не се враќа во Парламентот. СДСМ почнува со јавни трибини кои ќе бидат организирани во 16 градови“. Дневник како да се сомнева: „Заев убедува дека се единствени во бојкотот, но се гледаат напукнувања“.

Утрински и Вечер, врз основа на изјавата на Земри Ќамили, заменик министер за внатрешни работи, дадена за порталот Журнал, пишуваат: Утрински - „Во Тетово забележани лица во црни униформи кои легитимирале и им се заканувале на граѓани“. Вечер - „Не се Илирида, ама се во црни униформи и легитимираат во Тетовско“.

„Македонија загуби уште еден случај пред Стразбур - за предмет во врска со денационализација и невоедначена судска пракса, при што е утврдено дека македонските судови за едни се мајка, за други маќеа“, објави Утрински.

Во истиот весник читаме дека „И без Макстил, воздухот во Скопје е загаден“. Вечер смирува дека „Отровни лимони не стигнале во Македонија?!“, повикувајќи се на Царината која тврдела дека за сите пратки имаат одобренија од Агенцијата за храна. Звучи навистина алармантно насловот во Вечер: „Алармантно: Депресијата царува, секој втор Македонец пие Дијазепам!“ А Србија решила да штеди - Утрински информира дека „Во Србија се намалени платите на претседателот на државата и на пратениците за 10%“.