„Time collectors project“ во Националната галерија на Македонија
Шеснаесет домашни и странски автори со своите дела ќе учествуваат на меѓународната изложба TIME COLLECTORS PROJECT што од 13 мај се одржува во Националната галерија на Македонија, објект Чифте амам во Скопје. Автори и куратори на постановката се Биба Кајевиќ и Дејан Буѓевац, а нивната идеја е да фрлат светлина врз прашањето кои се тие визуелни слоеви и поетски естетизации на сликата „време“.
Силвија Горак од Полска, Серџо Парела од Аргентина, Феликс Брасје од Франција, Паоло Чампини од Италија, Мустафа Узбакир од Турција, Лана Васичевиќ и Горан Деспотовски од Србија и нашите Биба Кајевиќ, Гаврило Миловановиќ, Мирна Арсовска, Душан Перчинков, Кирил Геговски, Ѓорѓе Јовановиќ, Владимир Симоновски, Владо Ѓорески и група „Колегиум“, се уметниците од неколку генерации чии дела ќе се најдат на меѓународната изложба TIME COLLECTORS PROJECT, што од 13 мај се одржува во Националната галерија на Македонија - објект Чифте амам во Скопје.
Се работи за некаков наш обид да собереме уметници и не само уметници кои што на некој начин естетски ќе го истретираат поимот „време“. Значи тематиката е „време“, меѓутоа секој од нив си ја доживува на свој начин.
Биба Кајевиќ, уметник
Постановката се состои од дела изработени во разни медиуми како што се сликарство, цртеж, графика, фотографија, видео, инсталација, објекти и друго, и е следбеник на минатогодишната што се одржа во просториите на Н.У Завод и Музеј Битола, а на која учествуваа само дел од споменатите автори.
Биба Кајевиќ.
Биба Кајевиќ, која заедно со Дејан Буѓевац се јавуваат како автори и куратори, вели дека станува збор за проект во развој кој во иднина треба да се развива и сем изложби да вклучува и други активности.
„Се работи за некаков наш обид да собереме уметници и не само уметници кои што на некој начин естетски ќе го истретираат поимот „време“. Значи тематиката е „време“, меѓутоа секој од нив си ја доживува на свој начин. Дали ќе биде тоа некој сликар, дали ќе биде графичар, некој кој што се бави со видео или научник сеедно...битно е да ни го долови начинот на доживување на времето естетски претставено.“
Интересен им е проектот, интересна им е идејата. Луѓето се заинтересирани и за учество како уметници, а заинтересирани се и галериите и институциите да го претстават во сопствените средини.
Биба Кајевиќ, уметник.
Кајевиќ дополнува дека со оглед на тоа што ова, по промотивното во Битола, им е второ пројавување во јавноста секој простор каде ќе изложуваат ќе си ја наметне својата приказна и дека тежнеат заедно со учесниците (врз основа на нивниот различен визуелен, естетски, поетски и ликовен јазик и културен сензибилитет) да заокружат една сторија која што самата ќе си ја раскаже својата замисла за времето.
Во своите творби да ги претстават моментот на повторување, суптилната естетика на „минималистичката“ репетитивност, немиот ритам на фрагментарната слоевитост како лично бележење на одредени „временски“ состојби од самата виртуелна, физичка или психичка стварност; визуелно-медитативното процесуирање и тактилната забавеност во граничните области помеѓу замисливото време, имагинарното, и „ смислата“ на животот; камерно случување на делото преку временски исечености и деликатни изрежаности... , непредвидливиот ритам, долготрајното повторување на одредена форма кое креира различни/спротиставени почетоци, изместеност, отпорност, кадрирани паузи во спојот меѓу избришаните траги, знаци и сенки; обликување, одложување, разградување и бришење на почетокот како творечки процес; „временскиот“ колапс...и така со ред.
Уметницата говорејќи за иднината на проектот појаснува дека таа зависи од дадените околности, но дека најнапред ќе се фокусираат да му дадат некаква „правна форма“ која што ќе му овозможи соработка со слични или институции и организации за размена на идеи и заеднички настапи, предавања и семинари. Тоа, како што вели, значи дека проектот ќе се шири, но објаснува дека е прерано да се зборува за натамошните исчекори.
„Најверојатно ќе направиме некаков сајт кој ќе ги врзе уметниците, всушност сите учесници во проектот, и кој што ќе ни биде на некој начин појдовна база за комуникација со другите субјекти за натамошна соработка. Во тој правец планираме да продолжиме.“
Од друга страна, она што е особено интересно е што наскоро TIME COLLECTORS PROJECT ќе го започне своето патешествие во земјите од регионов. Првичната станица треба да биде Нови Сад во соседна Србија.
„Имаме покана од еден од учесниците да организираме заедничка изложба во Музејот за современа уметност во Нови Сад. Тоа е идеја во процес за која дополнително треба да се чекаат одговорите од интитуциите, а имаме исто така подршка од некои галерии во Полска за претставување на TIME COLLECTORS PROJECT кај нив. Интересен им е проектот, интересна им е идејата. Луѓето се заинтересирани и за учество како уметници, а заинтересирани се и галериите и институциите да го претстават во сопствените средини“, потенцира Биба Кајевиќ.
Како новинар, водител и уредник Јолевски во новинарството е безмалку 4 децении. Кариерата ја почнал во Млад Борец на почетокот од 1980-тите. Потем долги години бил во Телевизија Скопје и во Македонското радио - Втора програма, како и во други медиуми. Во Радио Слободна Европа Јолевски е од самиот почеток на емитувањето на програмата на македонски јазик.
