Илинденот помина, граѓаните добија уште еден продолжен викенд и бегајќи од пеколните горештини, особено помладите ги наполнија Охрид, Дојран... А медиумите информираат и за пеколни турканици по плажите, дење, и по дискотеките и клубовите – ноќе. И речиси никој не носи заштитна маска и не држи дистанца – божем пандемија веќе нема.
Инаку, големиот празник Илинден помина вообичаено, со политички говори и пораки на највисоките претставници на естаблишментот – со повици за заедништво и борба со ковид-19, но со малку луѓе на Пелинце и во Крушево. И со пораката од претседателот на државата, Стево Пендаровски, дека, покрај другото, државата не може да оди напред без правда.
На ФБ страницата на РСЕ, меѓутоа, многу непријателски настроени коментари. Никола Кусиников смета дека „од гнидите северџански“ – како што напишал, „се изнаслушавме за ЕУ и НАТО на најсветлиот македонски национален празник, како да се работи за некој ʼбриселскиʻ празник“. Драган Стојковски вели: „Со северџаните никогаш заедништво, може кога ќе го вратат уставот назад“, а Александар Колчкоски го коментира присуството на полицијата во Крушево: „Какво заедништво кога секој Илинден власта е исвиркана и чувана од илјадници полицајци, тоа е брука невидена од вазалска влада...“ А Ивица Михајловиќ подбивно: „И така се крена третото Илинденско востание против короната и беше формирана Северно Крушевската Република“.
Во Крушево, на Гумење, се степале припадници на Илинденската коњица со крушевчанец, а Елена Ѓурческа со пост: „Племиња од ВМРО-ДПМНЕ“, и потоа, по неа дрва и камења од цел куп посетители на ФБ страницата, што нема да ги цитираме. Владимир Костов, пак, со комичен коментар: „Може сакале да реконструираат некоја битка, или па ракијата им била лоша“. Горан Петковски извикува: „Новокомпонирани сдсмоооовци... предавник до предавник“, а Драган Цветковиќ прашува со подбив: „Овие со коњиве да не тргнале да прават крушевска република и да го ослободат Крушево од владеење на СДСМ?“ Но, Леонид Павловски е назадоволен од известувањето на нашево Радио: „Слободна Европа зошто кажувате сосема различна приказна од вистината?“, а РСЕ само го пренесе известувањето од МВР.
Што ако никогаш не се развие вакцина за ковид-19?
Посетителите на нашата ФБ страница реагираат негативно и на прилогот со наслов: „Што ако никогаш не се развие вакцина за Ковид-19?“ Сулејман Елмас напишал: „Ќе се рестартира цела земјина топка“, Љупчо Слаѓана Манчеви прашува со малку непримерен речник: „Абе, дебили, што ако има смак света?“ Азиз Сејх Кадери верува дека „ако нема вакцина тука е живиот Бог кој живот дава и живот зема...“, а Оливера Кецкароска е оптимист: „Ќе исчезне вирусот. Сѐ што е живо исчезнува, исчезнале диносауруси, човек, шпанскиот грип, колера и уште којзнае уште колку болести“. И Тони Надица Стојанови, како и Тодоровски Игор не се задоволни од нашево радио. За првите сме ја „тупеле работата со насловите, бидете оригинални не излегувајте од колосек“, а за вториот – насловите ни биле „прости само за да ви се чита порталот и да лапате пари за тоа“.
