Силни експлозии се слушнаа рано на 10 декември во Дамаск по извештаите дека Израел систематски ги напаѓа сириските воени постројки по соборувањето на бруталниот режим на сирискиот претседател Башар ал Асад.
Сириската опсерваторија за човекови права, воен мониторинг со седиште во Британија, во изјава на 10 декември рече дека Израел ги „уништил најважните воени локации во Сирија“, додека израелските трупи биле распоредени во тампон зона во близина на висорамнината Голан, анектирана од Израел. Нападите по падот на Асад, се поради, како што соопшти израелската влада, од „безбедносни причини“.
Опсерваторијата соопшти дека Израел извршил „околу 250 воздушни напади на сириска територија“ во изминатите два дена со цел да ги уништи воените капацитети на Сирија.
„Израел ги уништи најважните воени локации во Сирија, вклучувајќи ги сириските аеродроми и нивните складишта, авионски ескадрили, радари, воени сигнални станици и многу складишта за оружје и муниција на различни локации во повеќето сириски локации“, се вели во соопштението на опсерваторијата.
Извештаите дојдоа додека премиерот Бенјамин Нетанјаху рече дека Израел „го трансформира лицето на Блискиот Исток“ и ги победува своите непријатели „чекор по чекор“ во, како што рече, „егзистенцијална војна што ни е наметната“.
Нетанјаху рече дека режимот на Асад бил „централен елемент на иранската оска на злото“, обвинувајќи го за олеснување на „каналот за оружје“ меѓу Иран и либанската милиција Хезболах, која САД ја прогласија за терористичка организација. Израел започна повеќемесечна воздушна кампања во Либан против Хезболах.
Вашиот пребарувач не подржува HTML5
Наследството на Асад: смртни случаи, опсади и хемиско оружје
Вашингтон, исто така, изведе околу 75 воздушни напади врз милитантите на Исламската држава (ИД), кои сè уште имаат присуство во Сирија, во последните денови за да ја спречи групата да ги искористи превирањата што следеа по падот на Асад.
Соединетите Држави имаа војници во Сирија во последните 10 години за да се борат против ИД.
„[ИД] ќе се обиде да го искористи овој период за да ги обнови своите способности, да создаде безбедни засолништа“, рече американскиот државен секретар Антони Блинкен на 9 декември. „Како што покажуваат нашите прецизни напади во текот на викендот, ние сме решени да не дозволиме тоа да се случи .“
На 9 декември, Советот за безбедност на ОН одржа состанок зад затворени врати за ситуацијата во Сирија, свикан од Русија, која заедно со Иран беше главен поддржувач на режимот на Асад.
„Советот, мислам, беше повеќе или помалку обединет за потребата од зачувување на територијалниот интегритет и единство на Сирија, да се обезбеди заштита на цивилите, да се осигура дека хуманитарната помош доаѓа до населението кое има потреба“, рече рускиот амбасадор во ОН Василиј Небензја во изјава објавена по средбата.
Во меѓувреме, новите де факто владетели во Дамаск започнаа со напорите да ја стабилизираат ситуацијата.
Бунтовниците, предводени од исламистичката милитантна група Хајат Тахрир ал-Шам (ХТС), на 9 декември објавија дека даваат амнестија на целиот воен персонал ангажиран за време на владеењето на Асад, кое започна во 2000 година по смртта на неговиот татко, Хафез ал- Асад, кој ја презеде власта во 1970 година.
Извештаите од бунтовничкиот камп велат дека ветеранот, политичар, Мухамед ал-Башир е избран да ја води преодната влада. Тој служеше како шеф на таканаречената Влада за спас на Сирија на ХТС во изминатата година.
Не се појавија многу детали за тоа каде се наоѓа Асад откако Русија објави дека тој и неговото семејство добиле „политички азил“.
Портпаролот на Кремљ, Дмитриј Песков, на 9 декември им изјави на новинарите во Москва дека иако претседателот Владимир Путин лично ја донел одлуката да им даде азил на Асад и неговото семејство, нема обврска да дава дополнителни детали.
„Немам што да ви кажам за тоа каде се наоѓа Асад“, додаде Песков.
Новинската агенција ТАСС цитираше официјален претставник на сириската амбасада во Москва дека Асад се наоѓа во руската престолнина. Извештајот не е потврден.
Во заедничката изјава Франција и Германија соопштија дека се условно подготвени да соработуваат со новите лидери во Сирија.
Неколку европски држави на 9 декември објавија дека го суспендираат одобрувањето на барањата за азил од Сиријците додека го чекаат развојот на настаните.
Поплавата од сириски бегалци за време на 14-годишната граѓанска војна во земјата беше експлоатирана од екстремно десничарските политичари во Европа и многумина ја искористија за да ја зајакнат својата поддршка меѓу гласачите.
Меѓу земјите што најавија суспензии се Германија, Велика Британија, Франција, Австрија, Шведска, Норвешка и Данска.