Од информацијата за приведувањата во Солун на Горан Грујевски и Никола Бошкоски, двајцата поранешни високи службеници во Управата за безбедност и контраразузнавање, би требало да бидат вознемирени и високи политички кругови во Скопје, оценуваат упатените.
Исказите на двајцата бегалци кои беа барани со меѓународна потерница, според Љубомир Ѓурчевски, поранешен началник во Министерството за внатрешни работи и магистер по безбедносни науки, може сериозно да влијаат врз други личности и од политичката сфера.
„Мислам дека ќе влијаат многу сериозно. Може да се случат одредени, би рекол, тектонски поместувања внатре во партијата, особено за оние функционери кои се предмет на истрагите на Специјалното јавно обвинителство”, вели Ѓурчевски.
На Грујeвски, кој е поранешен началник на петтата управа и Бошкоски, поранешен вработен во разузнавањето, им беше одреден притвор, но откако полицијата не ги пронајде во јули беше распишана и меѓународна потерница по нив.
Тие се обвинети во предметот на Специјалното јавно обвинителство наречен Тврдина за уништување на системи за следење на комуникации непосредно по објавување на таканаречените опозициски „бомби“ пред две години.
Во тој случај кој подоцна беше споен со случајот Таргет, покрај нив обвинети се и поранешниот шеф на УБК Сашо Мијалков и поранешната министерка за внатрешни работи Гордана Јанкулоска. И двајцата покрај државни функционери, до неодамна беа и во извршниот комитет на ВМРО-ДПМНЕ. Мијалков летово сам си поднесе оставка, а Јанкулоска не беше избрана во новиот состав.
Раководните лица во управата не го правеле ова без знаење на врвот на партијата што беше на власт, тврди поранешниот јавен обвинител Јован Трпеноски. Тој ова го поткрепува, со како што вели, очигледниот факт дека следењето на комуникациите имало политичка заднина и цел. Грујевски и Бошковски во текот на постапката ќе се соочат со прашања за нивната одговорност но и со странични прашања на кои ќе треба да одговорат, додава тој.
„Овој дел ќе има одраз и врз политиката. Нормално и лицата кои веќе знаат дека се инволвирани во целиот овој незаконски процес веќе очекуваат јавноста да почне да осознава за целиот овој незаконски процес што беше табу тема или се оправдуваше дека е резултат на некои служби надвор од ингеренциите на раководните лица во УБК“, вели Трпеновски.
До екстрадирањето на Грујевски и Бошкоски во Македонија треба да се завршат низа процедури, испраќања документи и докази, а упатените проценуваат дека тоа би требало да се случи во следниве триесет дена. Трошоците за преземање на лице чијашто екстрадиција и е одобрена на Македонија од договореното место на преземање паѓат на товар на буџетот на земјава.