Мароканците во неделата работат за да ги спасат преживеаните и се молат за жртвите од силниот земјотрес во земјата, додека војниците и работниците носат вода и залихи во планинските села во урнатините. Меѓународните хуманитарни екипи останаа во неизвесност чекајќи ја земјата да побара помош од нив. Повеќе од 2.000 луѓе загинаа - бројка што се очекува да се зголеми.
Оние кои останаа без покрив над главата од уништувањето на земјотресот во петокот вечерта, спиеја надвор на улиците на античкиот град Маракеш или под импровизирани настрешници во градовите на планината Атлас. Најмногу урнатини има во малите, рурални заедници до кои е тешко да стигнат спасувачите поради планинскиот терен.
Земјотресот со магнитуда од 6,8 ги принуди луѓето да бегаат на улиците. Се урнаа згради во планинските села и градови кои не се изградени да издржат таков силен земјотрес.
Потврдено е дека загинале околу 2.012 луѓе, а повредени се уште најмалку 2.059 луѓе, од кои 1.404 се критични, објави Министерството за внатрешни работи на Мароко во саботата навечер.
„Почувствувавме огромен потрес како да е суден ден. Десет секунди и сè исчезна “, рече Ајуб Тудит, жител на Мулај Брахим.
Прогласена тридневна жалост
Знамињата беа спуштени низ Мароко, бидејќи кралот Мохамед Шести нареди тридневна национална жалост почнувајќи од недела. Армијата мобилизираше специјализирани тимови за пребарување и спасување, а кралот нареди да им се обезбеди вода, храна и засолниште за оние кои ги загубија своите домови.
Кралот повика џамиите ширум кралството да одржат молитви во недела за жртвите, од кои многумина беа погребани во саботата.
Земјотрес во Мароко: Стотици мртви и повредени
Некои Мароканци се пожалија на социјалните мрежи дека Владата не дозволува поголема меѓународна помош.
Понуди за помош пристигнуваат од целиот свет. Од Обединетите нации велат дека има тим во Мароко кој се координира со тамошните власти за тоа како меѓународните партнери можат да обезбедат поддршка. Според проценките на Обединетите нации, повеќе од 300.000 луѓе се погодени во Маракеш и околината.
Шпанија испрати спасувачи
Шпанската војска соопшти дека испратила авион на воздухопловните сили во Макареш со тим за пребарување и спасување од 56 војници и 4 кучиња.
Министерот за надворешни работи, Хозе Мануел Албарес во интервју за шпанско радио рече дека распоредувањето е одговор на билатералното барање за помош од мароканските власти.
Околу 100 тимови кои сочинуваат вкупно 3.500 спасувачи од целиот свет се регистрирани во Глобалната платформа на Обединетите нации и подготвени да се распоредат во Мароко, но, чекаат зелено светло од мароканските власти.
„Заспав кога се случи земјотресот. Не можев да избегам бидејќи покривот падна врз мене. Бев заробен. Ме спасија моите соседи кои со голи раце ги расчистуваа урнатините“, рече Фатна Бечар во Мулај Брахим. „Сега живеам со нив во нивната куќа бидејќи мојата беше целосно уништена“.
Некои сопственици на продавници во Маракеш се вратија на работа во неделата наутро, откако кралот ги охрабри да ги обноват економските активности на национално ниво и нареди да се започне со планирање за реконструкција на уништените згради.
Во поголемиот дел од саботата во историскиот Маракеш, луѓето можеа да се видат како се собираат на улиците, плашејќи се да се вратат во зградите кои можеби се уште се нестабилни.
Мароканците, исто така, објавија видеа на кои се гледа оштетување на делови од познатите црвени ѕидови што го опкружуваат стариот град, место прогласено за светско наследство на УНЕСКО.
Според Геолошкиот институт на САД, земјотресот се случи нешто по 23 часот по локално време на 8 септември, на релативно мала длабочина од 71 километар југозападно од Маракеш.
