Достапни линкови

Вести

„Букинг“ најави реорганизација на своето работење

„Букинг“ (илустрација)
„Букинг“ (илустрација)

Платформата за резервации за сместување booking.com (Букинг) најави реорганизација на своето работење, сигнализирајќи дека може да ги намали работните места, пренесува Ројтерс.

Анализата на бизнисот штотуку започна и се уште не е донесена конкретна одлука, соопштија преку електронска пошта од компанијата, членка на групацијата Букинг Холдингс.

„Ова е тежок, но неопходен проактивен чекор што треба да ја гарантира агилноста на „Букинг“ во високо конкурентен сектор и иновации фокусирани на клиентите“, се вели во извештајот.

На крајот на минатата година, Букинг Холдингс вработуваше околу 23.600 луѓе, според годишниот извештај на групацијата.

Во петокот, групата напиша во поднесување до американската Комисија за хартии од вредност дека ќе даде повеќе детали за временската рамка на реорганизацијата и нејзиното веројатно влијание врз вработените и финансиите „во догледно време“.

„Веруваме дека овие напори ќе ја подобрат оперативната трошковна ефикасност, ќе ја подигнат организациската агилност на повисоко ниво и ќе ослободат ресурси за инвестирање во понатамошно подобрување на нашата понуда за патниците и партнерите“, се вели во извештајот.

Букинг холдингс додаде дека како дел од реорганизацијата ќе ги модернизира процесите и системите и ќе ги оптимизира набавките.

Букинг холдингс кон крајот на октомври објави дека вкупните оперативни трошоци во третиот квартал биле за 14,3 отсто повисоки од минатата година, достигнувајќи 4,8 милијарди долари.

Вкупните приходи се зголемија за девет отсто на 7,99 милијарди долари. Бројот на ноќевањата е зголемен за 8,1 отсто, на 299 милиони.

Растот на приходите следеше по стапката на бруто вредноста на резервациите, која достигна 43,4 милијарди долари.

Бројот на ноќевањата е зголемен за 8,1 отсто, на 299 милиони. Нето добивката се задржа на минатогодишното ниво и изнесува 2,5 милијарди долари.

Побарувачката во Европа и бројни азиски земји за патувања во странство е стабилна и компензира за послабите резултати во сегментот на домашни патувања во САД и Кина поради послабата лична потрошувачка во услови на макроекономски тешкотии.

види ги сите денешни вести

Рубио: Средбата Трамп-Путин зависи од напредокот за завршување на војната

Државниот секретар на САД, Марко Рубио
Државниот секретар на САД, Марко Рубио

Можната средба меѓу американскиот претседател Доналд Трамп и рускиот претседател Владимир Путин ќе зависи од тоа дали ќе биде постигнат напредок за завршување на војната во Украина, изјави на 20 февруари американскиот државен секретар Марко Рубио.

Рубио разговараше со американската новинарка Кетрин Хериџ во интервју емитувано на платформата Х.

Тој рече дека му рекол на рускиот министер за надворешни работи Сергеј Лавров за време на нивната средба на 18 февруари во Саудиска Арабија дека нема да има средба „се додека не знаеме за што ќе биде состанокот“.

„Ваквите состаноци обично не се одржуваат „додека не знаете некој исход или дали некој напредок е постигнат“, додаде тој.

На разговорите во Ријад, Русија и САД се согласија да формираат тимови за да преговараат за патот до завршување на војната што започна кога Русија ја нападна Украина во февруари 2022 година. И Путин и Трамп рекоа дека сакаат да одржат средба.

„Значи, мислам дека кога ќе се случи тој состанок во голема мера ќе зависи од тоа дали можеме да постигнеме некаков напредок за завршување на војната во Украина, и ако можеме, а тој состанок е она што го запечатува договорот, мислам дека сите треба да слават дека претседателот Трамп е миротворец“, рече тој.

Трамп се залагаше за брз договор за ставање крај на војната, но неговата тактика ги вознемири Украина и европските влади бидејќи стравуваат дека Русија и САД би можеле да склучат договор што ги игнорира нивните безбедносни интереси.

Трамп на 19 февруари ги шокираше Украина и нејзините европски сојузници нарекувајќи го претседателот Володимир Зеленски „диктатор“ и лажно ја обвини Украина за целосната инвазија на Русија.

Лавров на 20 февруари присуствуваше на состанокот на Групата 20 нации во Јужна Африка и на маргините се сретна со кинескиот министер за надворешни работи Ванг Ји.

Рускиот шеф на дипломатијата рече дека односите на Русија со Кина „станаа и остануваат сè позначаен фактор за стабилизирање на меѓународната ситуација“, се наведува во соопштението објавено од руското Министерство за надворешни работи.

„Ванг им рече на другите министри за надворешни работи на Г-20 дека се отвора „прозорец за мир“ за Украина, а Кина ги поддржува „сите напори кои придонесуваат за мир“, се вели во соопштението на кинеското Министерство за надворешни работи.

Групата Г-20 е составена од 19 од најголемите светски економии, Европската Унија и Африканската унија. Јужна Африка моментално претседава со организацијата, чија цел е да ги зближи развиените и земјите во развој за да создадат основа за глобална економска стабилност и да ја поттикнат соработката.

Рубио одлучи да не присуствува на дводневниот состанок на Г20 поради тензиите со Јужна Африка поради некои од нејзините политики кои администрацијата на Трамп ги карактеризира како антиамерикански. САД беа претставени од Дејна Браун, нивен вршител на должноста амбасадор во Јужна Африка.

Калас: Ако му дадеме сѐ на агресорот, ќе охрабриме нови војни

Високата претставничка на ЕУ за надворешна и безбедносна политика Каја Калас
Високата претставничка на ЕУ за надворешна и безбедносна политика Каја Калас

Високата претставничка на ЕУ за надворешна и безбедносна политика Каја Калас предупреди дека дипломатските контакти меѓу САД и Русија покажуваат дека Москва не се откажува од своите територијални цели во Украина, што испраќа опасен сигнал.

За време на состанокот на министрите за надворешни работи на Г-20 во Јужноафриканската Република, Калас нагласи дека претседателот Доналд Трамп со својата одлука да преговара директно со Русија без вклучување на Украина ги загрижил европските партнери.

„Јасно ни е од овие контакти дека Русија не се откажала од своите цели. Тие сакаат да добијат максимум и уште повеќе. Ако му дадеме сè на агресорот, тоа испраќа сигнал до сите агресори во светот дека можат да го сторат истото“, изјави Калас.

Таа посочи дека некои земји се премногу фокусирани на посредување, наместо да вршат политички и економски притисок врз Русија за да ја запре војната.

Трамп во средата го нарече украинскиот претседател Володимир Зеленски „диктатор“ и го повика да прифати мировен договор со Русија, предупредувајќи дека во спротивно ризикува да ја загуби својата земја.

„Клучното прашање, кое често се игнорира, е дека Русија не сака мир“, порача Калас.

Таа додаде дека е прерано да се зборува за испраќање мировни трупи во Украина пред да биде постигнат прекин на огнот, тема што се дискутираше меѓу европските лидери во Париз оваа недела.

Британскиот министер за надворешни работи, Дејвид Лами, изјави дека „не гледа никаква подготвеност“ од страна на Москва за мир, откако го слушнал говорот на рускиот министер за надворешни работи Сергеј Лавров на состанокот во Јоханесбург.

Нетанјаху најави „интензивни операции“ на Западниот брег

Израелскиот премиер Бенјамин Нетанјаху
Израелскиот премиер Бенјамин Нетанјаху

Израелскиот премиер Бенјамин Нетанјаху ѝ нареди на израелската армија да спроведе „интензивни операции“ на Западниот Брег, по експлозиите во неколку празни автобуси во близина на Тел Авив вчера (20 февруари), се наведува во соопштение од неговиот кабинет.

Во експлозиите нема повредени, а полицијата ги истражува како можен терористички напад.

Израелската полиција соопшти дека три експлозии одекнале во автобуси во две населени места во предградијата на Тел Авив, при што биле пронајдени уште четири експлозивни направи. Локалните медиуми прецизираа дека сите автобуси биле паркирани во депоа.

Во истрагата учествуваат израелската армија, полицијата и безбедносната служба „Шин Бет“. Полицијата трага по осомничени и ги повика граѓаните на зголемена внимателност.

Досега никој не презел одговорност за нападите.

Нетанјаху синоќа одржа итен состанок со министерот за одбрана, воениот врв, директорот на „Шин Бет“ и полицискиот комесар.

Портпарол на полицијата изјави дека пронајдените експлозивни направи биле опремени со тајмери, а како превентивна мерка, сите јавни превозни средства се подложени на безбедносна проверка.

Во одговор на нападите, израелската армија најави зголемување на антитерористичките активности на Западниот Брег и блокирање на неколку влезни пунктови кон палестинските територии, без да прецизира кои.

Мицкоски по трет пат во Вашингтон за шест месеци

Премиерот Христијан Мицкоски на средби во Вашингтон
Премиерот Христијан Мицкоски на средби во Вашингтон

Македонскиот премиер Христијан Мицкоски во рамките на посетата на Вашингтон, е дел од годишната Конференција за конзервативна политичка акција. Тој на 20 февруари се сретна со Фред Кемпе, претседател и извршен директор на Атлантскиот совет.

„Разговаравме за актуелните геополитички предизвици, улогата на Македонија во евроатлантските интеграции и можностите за продлабочување на соработката во иднина. Средбата претставуваше одлична можност за размена на ставови и идеи со еден од водечките експерти за меѓународни односи“, напиша Мицкоски на својот профил на социјалната мрежа Х.

На тридневниот состанок на конзервативците, како што објави Гласот на Америка, ќе се обратат американскиот претседател Доналд Трамп и политичари од Аргентина, Велика Британија, Полска и Италија.

Американскиот потпретседател Џеј-Ди Венс ја води Конференцијата за конзервативна политичка акција, а другите сесии ќе вклучуваат дискусии за криптовалутите и мирот на Блискиoт Исток, како и панел со роднини на заложниците кои се држат во Газа.

Покрај претседателот на Претставничкиот дом на САД Мајк Џонсон, на агендата за говори се и поранешната британска премиерка Лиз Трас , словачкиот премиер Роберт Фицо, аргентинскиот претседател Хавиер Милеи и италијанската премиерка Џорџа Мелони.

Претседателот на македонската Влада, Мицкоски, кој во Вашингтон е придружуван од шефот на дипломатијата Тимчо Муцунски, синоќа имал средба со Александар Касаноф, заменик помошник секретар за Западен Балкан во Бирото за европски и евроазиски прашања на Стејт департментот, на која станало збор состојбата во државата, за европските интеграции и препреките со кои се соочува земјава на тој план, како и за реформската посветеност на Владата и фокусот на клучните области.

Станало збор и за актуелните случувања во регионот на Западен Балкан, со посебен акцент на регионалната безбедност, економската соработка, доброто владеење и демократијата.

На средбата заеднички е потврден интересот за одржување континуитет во политичкиот дијалог и зацврстување на билатералните односи помеѓу двете земји, преку засилена комуникација и институционална соработка, продолжување на активностите во рамки на Стратешкиот дијалог, како и преку продлабочена соработка и партнерство во рамки на НАТО алијансата.

Американската амбасадорка Агелер вчера констатираше дека македонскиот премиер за кратко време по трет пат е во САД што е доказ за тоа дека Македонија сака да ги зацврсти односите со стратешкиот партнер.

„Вашингтон не дава гаранции за патот кон Европската Унија, бидејќи ние не сме членка на Европската Унијата. Мислам дека за тоа се водат и се воделе разговори со високите претставници на ЕУ, но воодушевена сум што премиерот и членовите на неговиот кабинет се во Вашингтон, тоа е важна врска. Фактот што тој е неколку пати таму, откако ја презема неговата позиција како премиер, исто како и многу други министри, само зборува за близината на нашите односи и на многу начини покажува дека ние како САД и Северна Македонија билатерално може да соработуваме. Очекувам дека таа соработка да биде зајакната“, изјави Агелер.

Прекршочна постапка за ланци на маркети - се договарале за цени

Macedonia - Plastic bags and canvas bags in markets in Skopje
Macedonia - Plastic bags and canvas bags in markets in Skopje

Поведена е прекшочна постапка за четири ланци на маркети поради меѓусебно незаконско договарање на цени, соопшти Комисијата за заштита на конкуренцијата. Членови на комисијата, извршиле ненајавен увид во четири трговски ланци и во една од стопанските комори во која се здружени истите.

Во нивното соопштение е наведено дека увидот е направен поради сомневање дека неколку ланци на маркети кои вршат трговија на мало со прехранбени и непрехранбени производи го прекршиле законот за заштита на конкуренцијата, кој забранува картели односно забранува договори и усогласено однесување на две или повеќе претпријатија, а се со цел нарушување на конкуренцијата.

„При контролата во службените простории на правните лица, извршен е увид во службената документација и направен е и увид во средствата за електронска комуникација при што се пронајдени докази дека истите донеле незаконита одлука која и јавно ја објавиле преку средствата за јавно информирање,“ се наведува во соопштението од Комисијата за заштита на конкуренцијата објавено на Фејсбук.


Според Комисијата, контролираните субјекти незаконски се договориле дека заедно нема да набавуваат стоки од добавувачи кои ќе достават нови ценовници за нивните производи.

Во нивното соопштение е наведено дека Комисијата интензивно врши контроли кај повеќе фирми кои се дел од синџирот на снабдување со земјоделски и прехранбени производи, најавувајќи ригорозни мерки и санкции, за како што велат, секое нарушување на конкуренцијата на пазарот и изигрување на законите на штета на граѓаните.

Законот за нефер трговски практики стапи на сила на 28 септември, кога беше краен рок трговците да ги усогласуваат договорите за снабдување меѓу добавувачите и производителите. Во нив трошоците за рабат и други маркетинг трошоци се ограничени на 10%, а кои, според досегашната пракса изнесувале од 20% до 35%.

Во изминатиот месец македонските граѓани преку социјалните мрежи се организираа на бојкот на маркетите по примерот на Хрватска, откако трет месец последователно се забележува поскапување на храната.

Руте: Стабилноста на Косово е во интерес на НАТО

Генералниот секретар на НАТО Марк Руте во посета на Словачка
Генералниот секретар на НАТО Марк Руте во посета на Словачка

Генералниот секретар на НАТО Марк Руте изјави дека стабилноста на Косово, Босна и Херцеговина и Србија е во интерес на сите и дека не гледа причина да верува дека може да има драматични промени во однос на посветеноста на САД кон западната воена алијанса.

Тој ги даде овие коментари за време на престојот во Братислава, Словачка, кога во дебата со студентите беше прашан дали гледа можност за обновување на конфликтот во Косово, откако се појавија гласини дека новите американски политики може да доведат до нивно воено повлекување.

„Дозволете ми да бидам апсолутно јасен, од она што го разбирам од американскиот систем, тие се целосно посветени на НАТО и сегашните обврски. Но, да видиме што ќе се случи. Секогаш можеме да имаме промени во политиката или мали прилагодувања што можат да се случат. Словаците, Холанѓаните и другите го прават тоа. Но, јас немам причина да верувам дека ќе има драматични одлуки. И генерално, во Западен Балкан, мораме да се погрижиме да го задржиме фокусот на овој регион бидејќи стабилноста на Косово, стабилноста во Босна и стабилноста во Србија е во интерес на сите нас“, одговори Руте.

НАТО има мировна мисија на Косово од крајот на војната. Во моментов, како дел од КФОР, на Косово се распоредени над 4.600 војници од 28 земји во светот. Најголем број од нив доаѓаат од Италија, а потоа следат САД, Унгарија и Турција.

НАТО го зголеми своето присуство во Косово во текот на 2023 година, по зголемените тензии на северот со мнозинско српско население.

КФОР е третото ниво на безбедносен одговор во Косово, по косовската полиција и мисијата на Европската унија за владеење на правото, ЕУЛЕКС. Оваа мисија, меѓу другото, е одговорна и за безбедноста на граничната линија меѓу Косово и Србија.

Зеленски: Украина е подготвена за договор за инвестиции и безбедност со Трамп

Украина е подготвена за силен, ефективен договор за инвестиции и безбедносен договор со претседателот на САД. Ова го напиша украинскиот претседател Володимир Зеленски на социјалната платформа Х по средбата на 20 февруари со американскиот претставник Кит Келог во Киев.

Тој посочи дека неговиот тим го предложил најбрзиот и најконстуктивен начин за постигнување на резултати.

„Нашиот тим е подготвен за работа 24/7“, напиша на Х, Зеленски.

Зеленски во објавата рече дека имале добра дискусија со многу важни детали, заблагодарувајќи им се на САД за сета помош и двопартиска поддршка за Украина и украинскиот народ.

„Важно е за нас и за целиот слободен свет да се почувствува силата на Америка“, рече тој.

Зеленски додаде дека имале детална дискусија за ситуацијата на бојното поле, како Украина може да ги врати воените заробеници и ефективни безбедносни гаранции.

„Од првиот момент на оваа војна, Украина се стреми кон мир. Мораме и можеме да обезбедиме овој мир да биде силен и траен за Русија никогаш повеќе да не се врати со војна“, рече Зеленски по разговорите со американскиот претставник за војната во Украина.

Во својот пост, Зеленски се осврна и на украинско-американските односи.

„Успехот не обединува сите. Од силни украинско- американски односи имаат корист за целиот свет. Му благодарам на генералот Келог за заедничката работа за постигнување важни резултати“, напиша Зеленски.

Украинскиот министер за надворешни работи Андриј Сибиха претходно разговараше со Келог за начините за постигнување праведен и траен мир во конфликтот со Русија.

Посетата на Келог на Киев доаѓа во дипломатски тежок момент за Украина, откако американскиот претседател Доналд Трамп стави крај на политичката изолација на рускиот лидер Владимир Путин со вклучување во билатерални разговори со Москва.

„Ја потврдив подготвеноста на Украина да постигне мир и нашата визија за неопходните чекори“, напиша Сибиха на мрежата Х.

Тој му рекол на Келог, кој пристигнал во главниот град на Украина, дека безбедноста на Украина и трансатлантскиот брег се „неделиви“.

Американскиот пратеник веќе се сретна со врховниот командант на украинската армија, шефовите на разузнавачките и специјалните служби.

Зеленски се сретна со Келог, откако Трамп го нарече „диктатор“

Украинскиот претседател Володимир Зеленски
Украинскиот претседател Володимир Зеленски

Украинскиот претседател Володимир Зеленски на 20 февруари се сретна со американскиот пратеник Кит Келог, откако Доналд Трамп го нарече украинскиот лидер како „диктатор“ и рече дека Русите „имаат карти“ во какви било разговори за ставање крај на војната, јавува новинската агенција Франс Прес.

На тавките коментари Зеленски возврати со забелешка дека Трамп, подлегнал на руската „дезинформација“ повторувајќи ги точките за разговор во Кремљ.

По средбата меѓу Зеленски и Келог во Киев, портпаролот на кабинетот на Зеленски соопшти дека нема да има изјави по разговорите.

Вообичаено, претставниците кои доаѓаат во посета на Киев, до сега одржуваа заедничка прес-конференција по разговорите.

„На барање на американската страна, форматот на состанокот предвидува протоколарно снимање и не вклучува изјави или прашања“, изјави за новинарите портпаролот на Зеленски, Сергиј Никифоров.

Во Соединетите Држави, главниот советник на Трамп за безбедност во четвртокот рече дека критиките на Зеленски кон американскиот претседател се „неприфатливи“ и го повика да потпише договор со кој се дава преференцијален пристап до клучните минерали и природните ресурси на Украина.

„Тие треба да го намалат тонот и внимателно да погледнат и да го потпишат тој договор“, изјави советникот за национална безбедност Мајк Волц за американскиот медиум Фокс њуз.

Според американскиот претседател Доналд Трамп, Зеленски ја урнал демократијата во неговата земја.

„Диктатор без избори, Зеленски е подобро да се движи брзо или нема да му остане земја“, напиша тој на својата платформа Truth Social.

Зеленски беше избран во 2019 година за петгодишен мандат и остана лидер во согласност со украинските правила според воената состојба, која настана по руската инвазија во врз Украина во 2022 година. Тензиите меѓу Зеленски и Трамп почнаа да растат по новата позиција на САД за војната.

Но, Зеленски даде попозитивен тон пред средбата со Келог во четврток, велејќи дека „за нив е многу важно средбата и нашата соработка со САД да бидат конструктивни“.

„Заедно со Америка и Европа, мирот може да биде посигурен и тоа е нашата цел“, додаде тој.

Русија, која со години се противи на американското воено присуство во Европа, сака реорганизација на безбедносната рамка на континентот како дел од каков било договор за ставање крај на борбите во Украина, јавува Франс прес.

Русија и Белорусија на заедничка воена вежба во септември

Илустрација од воена вежба
Илустрација од воена вежба

Русија и Белорусија ќе одржат заедничка воена вежба во септември, изјавија официјални лица на 20 февруари. Ова се дел од напорите на двата соседа и сојузници да ги прошират своите воени врски во услови на борби во Украина.

„Во воената вежба ќе учествуваат над 13 илјади војници“, изјави претставникoт на белоруската одбрана Валериј Ревенко.

Тој додаде дека набљудувачите од Организацијата за безбедност и соработка во Европа, ќе бидат поканети да ги следат вежбите.

Авторитарниот белоруски претседател Александар Лукашенко, кој владее со Белорусија со железна рака повеќе од 30 години и се потпира на субвенциите и поддршката на Кремљ, и дозволи на Русија да ја користи територијата на неговата земја за испраќање војници во соседна Украина во 2022 година и да биде домаќин на дел од нејзиното тактичко нуклеарно оружје.

Руските трупи влегоа во Украина од Белорусија на 24 февруари 2022 година, по заедничката вежба со белоруската армија. Украина и Белорусија делат 1.084 километри граница.


Претходно украинскиот претседател Володимир Зеленски изјави дека руското воено засилување во Белорусија, која се граничи со членките на НАТО со Латвија, Литванија и Полска, може да ја подготви сцената за потенцијален напад. Русија постојано ги негираше обвинувањата дека би можела да ги нападне членките на НАТО.

Ревенко рече дека Белорусија е отворена за меѓусебни воени инспекции со Полска долж 80 километри длабоко во една на друга територија, нешто што, како што вели тој, ќе ја сигнализира намерата на Полска да продолжи со „добрососедските врски“.

„Ако Полска ја отфрли или игнорира таквата акција, ние ќе имаме поинакво мислење“, изјави Ревенко.

Соединетите Американски Држави и Европската Унија воведоа низа санкции против Белорусија поради нејзиното масовно задушување на протестите по претседателските избори во 2020 година и потегот на Лукашенко да и дозволи на Русија да ја користи територијата на неговата земја за испраќање војници во Украина.

Во декември, Лукашенко и рускиот претседател Владимир Путин потпишаа договор со кој се даваат безбедносни гаранции за Белорусија, најблискиот сојузник на Москва, вклучително и можната употреба на руско нуклеарно оружје за да се помогне да се одбие каква било агресија.

Во тоа време, Лукашенко побара од Путин да распореди понапредно оружје во Белорусија, вклучително и балистичката ракета со среден дострел Орешник, способна за нуклеарно оружје, која Русија првпат ја употреби во ноември против Украина.

Путин одговори дека ракетите Орешник би можеле да бидат распоредени во Белорусија во втората половина на 2025 година, додавајќи дека тие ќе останат под руска контрола, но Москва ќе му дозволи на Минск да ги избере целите.

Потпишувањето уследи по ревизијата на Москва на нејзината нуклеарна доктрина, која за прв пат ја стави Белорусија под руски нуклеарен чадор среде тензиите со Западот поради конфликтот во Украина.

Русија не откри колку тактичко нуклеарно оружје има распоредено во Белорусија, но Лукашенко во декември рече дека неговата земја моментално има неколку десетици од нив. Распоредувањето ја проширува способноста на Русија да гаѓа неколку сојузници на НАТО во Источна и Централна Европа.

Европол предупредува на насилни онлајн култови кои регрутираат малолетници

Илустратина фотографија
Илустратина фотографија

Агенцијата за спроведување на законот на Европската унија (Европол) на 20 февруари издаде предупредување за криминалните мрежи кои користат сајбер методи за поттикнување на терористички дејствија и насилство екстремно насилство.

Според предупредувањето колку повеќе се споделуваат таквите содржи на социјалните платформи меѓу членовите, толку повисоко се рангираат во групата.

„Овие криминални или насилни екстремистички групи се натпреваруваат меѓусебно за споделување на најнасилната содржина“, се вели во соопштението.

„Ширењето на екстремни содржини служи како средство за десензибилизација на ранливите луѓе, со цел да се прекршат општествените норми и да се нормализираат насилството врз корумпираните малолетници и да се подготват кон идните насилства, се вели во сооопштението од Европол.

Овие дела честопати беа поврзани со заедници со насилни десничарски екстремистички врски.

„Нивните лидери се залагаат за колапс на модерното општество преку акти на терор, хаос и насилство, ширејќи идеологии кои инспирираат масовни престрелки, бомбашки напади и други акти на тероризам“, соопшти Европол , посочувајќи дека жртвите се бараат на платформи за игри, услуги за стриминг или социјални медиуми

Во некои случаи, сторителите се инфилтрирале во групи за поддршка на интернет за да ги идентификуваат и регрутираат ранливите млади луѓе.

Вчитај повеќе

XS
SM
MD
LG