Единствена цел во мојот мандат е да и помогнам на Северна Македонија да влезе во ЕУ што е можно побрзо, изјави новиот евроамбасадор во земјава Михалис Рокас во интервју за државната агенција МИА. Ова е негово прво интервју откако стапи на новата должност во Северна Македонија минатиот месец.

Рокас смета дека членството во ЕУ нема алтернатива и оти проширувањето е најуспешната политика на Унијата. Вели дека го разбира предлогот на Владата за одложена примена на уставните измени, но, нагласува оти пристапувањето е процес заснован на едногласност.

„Проширувањето е процес заснован на едногласност, ние сме сите свесни за овој предлог на Владата. Мое скромно мислење е дека тешко дека ќе биде прифатен, како што објаснив претходно има став на ЕУ од 27-те членки во овој поглед. Значи, се разбира, од суштинско значење е да се осигураме дека сме свесни за овој контекст. Одлуката за уставни измени е суверена одлука на Владата, и е многу важна, ние имаме огромна почит за тоа како Владата сака да продолжи понатаму и решенијата кои сака да ги постигне, но процесот е сосема јасен, и тој може да биде веднаш и може да се одвива многу брзо и она што можам да го повторам е целосната посветеност за пристапување кон ЕУ, што ја вклучува и Северна Македонија“, потенцира Рокас.

Евроамбасадорот Рокас говорејќи за реформите во судството, вели дека е задоволен што Судскиот совет е на врвот на агендата на Владата. Неговиот став е дека гледа силна посветеност да се работи и да се следат овие сугестии и препораки на ЕУ без разлика дали се од Оценската мисија, Извештајот за напредокот на земјата.

„Сега, приоритетот треба да биде законот за Судски совет, што е многу важна реформа во поглед на начинот како е формиран, како се избираат и разрешуваат судии. Значи, има многу елементи за тоа дека работата е огромна и напредувала релативно брзо, ова е клучната област за сè, борбата против корупцијата, привлекување инвестиции, давање доверба на граѓаните во судскиот систем“, изјави Рокас.

Американскиот претседател Џо Бајден треба да замине за Германија кон крајот на следната недела, само неколку дена по откажувањето на претходно планираната посета поради ураганот Милтон што ја погоди државата Флорида, изјавија извори за ДПА и за германскиот магазин Шпигел.

Бајден планира средба со германскиот канцелар Олаф Шолц и претседателот Франк-Валтер Штајнмаер во петок во Берлин. Сепак, засега нема официјална потврда за ова.

Бајден првично го планираше патувањето за минатиот петок и сабота, но го откажа поради прогнозите за јачината и последиците од ураганот Милтон што го погоди источниот брег на САД.

Бајден претходно планираше да помине два ипол дена во Германија и да ја посети американската воена воздухопловна база Рамштајн во западниот дел на земјата за да одржи самит за воена помош за Украина. Потоа планираше да отпатува за Ангола.

Посетата на Германија првично требаше да биде официјална државна посета со официјален банкет и други формални настани, но програмата сега е многу збиена, пишува Шпигел.

Сепак, Штајнмаер, наводно, сè уште планира да му додели на Бајден специјален медал, Големиот крст на Орденот за заслуги, за неговиот придонес во германско-американското пријателство.

Израелскиот министер за надворешни работи, Израел Кац, во неделата повтори дека го смета генералниот секретар на Обединетите нации, Антонио Гутереш за „персона нон грата“ затоа што не го осудил ракетниот напад на Иран и како што го опиша како „антисемитско и антиизраелско однесување“.

Изјавата на Кац доаѓа десет дена откако тој рече дека му забранува на Гутереш да влезе во земјата затоа што не „недвосмислено“ го осудил ракетниот напад.

Иран истрела повеќе од 180 балистички ракети кон Израел на 1 октомври, во услови на ескалација на израелските борби со Хезболах во Либан, кој САД го прогласија за терористичка организација.

На црната листа на Европската унија е и вооруженото крило на Хезболах, но не и политичката партија која има места во либанскиот парламент.

Во исто време, израелскиот премиер Бенјамин Нетанјаху во неделата го повика шефот на ОН „да ги отстрани мировните сили распоредени во јужен Либан од опасност“.

Повикот на Нетанјаху до Гутереш доаѓа еден ден откако привремените сили на ОН во Либан (УНИФИЛ) одбија да се повлечат од пограничната област, и покрај тоа што петмина нејзини членови беа ранети во последните денови.

Нетанјаху, говорејќи на состанокот на владата, рече дека израелските сили неколкупати побарале од УНИФИЛ да замине, но дека „наиделе на постојано одбивање“, што претставувало „човечки штит за терористите на Хезболах“.

„Вашето одбивање да ги евакуирате војниците на УНИФИЛ ги прави заложници на Хезболах. Ова ги загрозува нив и животите на нашите војници. Жалиме за повредата на војниците на УНИФИЛ и правиме се што е во наша моќ да ја спречиме. Едноставен начин да се обезбеди ова е едноставно да се извлечат од опасната зона“, рече Нетанјаху.

Околу 40 земји ги осудија нападите врз членовите на УНФИЛ, во заедничката изјава, објавена од полската мисија во ОН, предупредија дека мора веднаш да престанат.

САД и европските земји претходно го повикаа Израел да ја гарантира безбедноста на мировниците на ОН.

УНИФИЛ, мисија од околу 9.500 војници од различни земји, има задача да го надгледува прекинот на огнот со кој заврши 33-дневната војна меѓу Израел и Хезболах во 2006 година.

Стотици жени демонстрираа во Турција против фемицид, по двојното апсење на жени во Истанбул. На митингот во Истанбул можеа да се слушнат извици против турскиот претседател Реџеп Таип Ердоган и неговата политичка партија АКП.

„Вие сте влада која дозволува убивање жени“, рече организаторот на маршот Гунеш Фадиме Ахсахин.

Гулизар Сезер, мајка на едно од убиените девојчиња, порача дека масакрот мора да се прекине. Телото на нејзината ќерка беше пронајдено во јуни, откако беше завиткано во тепих и фрлено во морето.

Други протести се одржаа во Анкара и Измир. Слични собири се одржуваат секој ден во различни градови, најмногу во универзитетските кампуси.

Протестите започнаа откако минатата недела беа убиени две девојчиња, а осомничениот за нивната смрт се самоуби.

Турскиот функционер тогаш изјави дека и осомничениот маж и убиените девојчиња се на возраст од 19 години.

Ердоган, кој претходно ги обвини алкохолот и социјалните мрежи за убиствата, во средата вети дека ќе го зајакне правосудниот систем и ќе се бори против криминалот. Турција со години бележи случаи на убиства на жени, а невладиниот сектор предупредува дека само годинава во оваа земја со 85 милиони жители се убиени 299 жени.

Во 2021 година, Турција се повлече од Истанбулската конвенција, која го занемарува спречувањето на насилството врз жените. Конвенцијата на Советот на Европа ги обврзува државите да ги истражат и казнуваат сторителите на насилство врз жените.

Миланчо Митревски, кој е назначен за шеф на контрола на наплатната служба на патарините во Петровец, самиот не плаќа патарини, изјави на денешната прес - конференција од партиското седиште на СДСМ, Менде Илиевски, советник во Советот на Општина Битола.

Тој побара директорот на Јавното претпријатие за државни патишта (ЈПДП), Коце Трајановски веднаш да го разреши Митрески, а надлежните институции да преземат мерки за соодветна одговорност веднаш.

„Снимки од патарините кои ни ги доставија свиркачи покажуваат дека Митревски кога проаѓа со возилото на патарина не плаќа патарина. На 15.08.2024 во 08:47 часот непосредно од кога е назначен заедно со неговата сопруга Бети, присилно го тера вработениот на наплатна станица Отовица да го пропушти без да плати. Оваа е честа пракса на Митревски. Веднаш надлежните институции да преземат мерки и да установат колку пати Митревски направил вакви дела. Бидејќи овие податоци се јавно достапни, СДСМ ги провери на веб порталот од Системот за електронска контрола на патарините и тие се целосно потврдени“, изјави Илиевски.

Во текот на вчерашниот ден, опозицискиот СДСМ објави и дека Митревски бил фатен како ја злоупотребува службената положба за што имал и изречена дисциплинска санкција. Опозициската партија обвини дека Митревски наплаќал повеќе пари на патарините, а вишокот пари си ги земал за себе.

„Тој не ги исполнува условите да биде шеф на контролорите, единствена квалификација му е тоа што е “хард кор“ партиски кадар на ДПМНЕ и сопруг на советничка на ДПМНЕ во Велес“, рече Илиевски.

Од владејачката ВМРО-ДПМНЕ реагираат дека ова се неосновани напади, велејќи дека опозициската партија гледа колку е подобрена работата на ЈПДП и затоа го напаѓаат Коце Трајановски.

„СДС гледаат како сега се работи во ЈПДП и со која брзина се реализираат работите, нешто што беше незамисливо во нивно време. Втора работа која СДС сака да ја сокрие и заради која го напаѓа Коце Трајановски е тоа што непосредно пред избори во ЈПДП бројот на вработени го зголемиле за 50%, т.е. вработиле нови 150 луѓе. СДС ја кријат партизацијата која ја направиле и мислат дека со неосновани напади ќе го измамат народот“, се вели во партиската реакција.

Според ВМРО-ДПМНЕ, најголемиот страв во СДСМ „пред се е заради одговорноста за милионските криминали кои ги правеле, за која знаат дека доаѓа“.

Литванците гласаат во недела на првиот круг од парламентарните избори на кои би можело да дојде до замена на владејачката централно-десничарска коалиција со нова коалиција која се очекува да ги вклучи опозициските социјалдемократи и помалите централно-левичарски партии.

И покрај економските успеси на земјата, строгите мерки за време на пандемијата на корона вирусот и влезот на мигранти од Белорусија фрлаат сенка врз конзервативната влада на премиерката Ингрид Пимонтија, која дојде на власт во 2020 година, пишува Асошиетед Прес.

Иако Литванија забележа годишен двоцифрен раст на платите и има една од најниските стапки на инфлација од 27-те земји на Европската унија (ЕУ), многу гласачи не изгледаат импресионирани, пренесува агенцијата АП.

„Постои големо разочарување и незадоволство кај гласачите. Тоа е поврзано со бројни кризи и шокови и не може да се компензира со економски фактори како што е позитивната промена во куповната моќ“, рече политичкиот аналитичар од Универзитетот во Вилнус, Рима Урбонаите.

Премиерката Ингрида Шимонита беше критикувана за строги мерки за време на пандемијата и многумина се пожалија дека владата не направила доволно за да им помогне на компаниите додека земјата беше „под клуч“. Други велат дека илјадници луѓе немале соодветен пристап до здравствените услуги.

Потегот на Шимонита беше критикуван и за одговорот на доаѓањето на мигрантите преку Белорусија. Литванија го обвини својот источен сосед, како и Русија за организирање на приливот на луѓе, главно од Африка и Блискиот Исток.

Според неодамнешната анкета на Вилморус, Социјалдемократската партија, предводена од Вилија Бликевичиуте, поранешна министерка за труд и социјала, ќе победи со двојно повеќе гласови од Татковинскиот унија на премиерката Шимонита.

Околу 2,4 милиони луѓе имаат право да изберат 141 пратеник за четиригодишен мандат. Гласањето се одвива во два круга.

Во првиот круг од изборите, со пропорционално гласање ќе се утврдуваат околу половина од вкупно 141 место во парламентот, а останатите места ќе се утврдат во вториот круг, на 27 октомври.

Израелската армија го прошири нападот на северот на Појасот Газа, а тенковите стигнаа до северниот раб на градот Газа, што принуди многу семејства да ги напуштат своите домови, пишува Ројтерс.

Во тек се судири меѓу палестинските милитанти и израелските војници, кои побараа да се евакуираат стотици илјади луѓе од северниот дел на енклавата.

Жителите тврдат дека израелските сили ги изолирале Беит Ханун, Џабалија и Беит Лахија, на далечниот север, од градот Газа, блокирајќи го движењето освен оние кои сакаат да ги напуштат тие градови.

Министерството за здравство на Газа, кое го води Хамас, соопшти дека десетици биле убиени во осумдневните израелски напади во северниот дел на Газа.

Се стравува дека има уште десетици мртви на патиштата и под урнатините на куќите, надвор од дофатот на медицинските екипи.

Во северниот дел на Газа, израелските воздушни и копнени сили ја напаѓаат Џабалија, каде, според армијата, милитантите се прегрупирале.

Во текот на изминатата година, израелските сили постојано се враќаа во тој бегалски камп и во другите области кои беа нападнати. Израел нареди целосна евакуација на северниот дел на Газа, вклучувајќи го и самиот град Газа.

Се проценува дека околу 400.000 луѓе останале на северот по масовната евакуација наредена во првите недели од војната. Израелската армија во саботата потврди дека во наредбата за евакуација се вклучени и болници, но не прецизираше конкретен рок.

Армијата соопшти дека медицинскиот конвој кој требало да ги префрли пациентите од болницата Камал Адван бил откажан од безбедносни причини, но дека во саботата бил снабден со гориво.

Палестинските медицински претставници во неделата објавија дека осумчлено семејство е убиено во израелски напад врз централниот дел на Појасот Газа. Во соопштението се наведува дека се ранети уште седум лица, меѓу кои две жени и едно дете во критична состојба.

По повеќе од една година од војната со Хамас, група која САД и ЕУ ја сметаат за терористичка група, Израел продолжува речиси секојдневно со напади врз цели на милитантите во Газа, како што тврди, пишува АП.

Израелската армија соопшти дека избегнува да им наштети на цивилите и ги обвини Хамас и другите вооружени групи за нивната смрт бидејќи „оперираат во густо населени области“. Израелската армија ретко коментира поединечни напади, во кои често се убиени жени и деца, пишува АП.

Војната меѓу Израел и Хамас започна на 7 октомври минатата година, по нападот на палестинскиот Хамас на израелските територии.

Претседателката Гордана Сиљановска Давкова вчеравечер во Охрид присуствуваше на комеморацијата и изрази сочувство по повод смртта на Алекс Салмонд, поранешен прв министер на Шкотска.

„Искрено сочувство по повод смртта на поранешниот прв министер на Шкотска Алекс Салмонд кој вчера почина во Охрид за време на Вториот Форум за културна дипломатија што се одржа во ко-организација на Кабинетот на поранешниот македонски претседател Ѓорге Иванов, заедно со Институтот за културна дипломатија од Берлин, Градот Скопје и Меѓународниот центар „Алијанса на цивилизациите“. Моите мисли се со неговото семејство и најблиските во овој тежок период. Нека почива во мир“, се вели во соопштението од кабинетот на Сиљановска Давкова.

Алекс Салмонд, поранешен прв министер на Шкотска (од 2007 до 2014 година) почина вчера во Охрид, каде учестувуваше како панелист на вториот Форум за културна дипломатија.

„За жал, Алекс Салмонд, поранешниот прв министер на Шкотска кој беше еден од панелистите на вчерашниот форум за културна дипломатија што се одржа во Охрид, денеска ненадејно почина“, информираа синоќа од канцеларијата на поранешниот претседател Ѓорге Иванов.

Според информациите од Министерството за внатрешни работи, случајот бил пријавен во СВР Охрид во 15:30 часот, по што итната медицинска помош, полицијата и основен јавен обвинител констатирале смрт.

Војската на Тајван е во состојба на готовност откако кинески носач на авиони беше забележан јужно од островот во неделата во услови на зголемени тензии меѓу Тајпеј и Пекинг.

„Кинескиот носач на авиони „Лиаонинг“ навлезе во водите во близина на каналот Баши и најверојатно се движи кон западниот Пацифик“, соопшти тајванското Министерство за одбрана.

Како што се наведува, „армијата останува во состојба на готовност и е подготвена да реагира доколку е потребно“.

Пекинг го засили воениот и политичкиот притисок врз Тајван во последните години.

Кина никогаш не се откажа од прибегнувањето кон воена сила за да ја врати контролата врз островот, кој го смета за дел од нејзината територија што треба повторно да се обедини со континентална Кина.

Во последните години, Кина организираше три серии големи воени вежби околу тој автономен остров, на кои учествуваа нејзините авијациски и поморски сили. Пекинг, исто така, испраќа воени бродови и воени авиони да патролираат околу Тајван речиси секој ден.

Односите меѓу Пекинг и Тајпеј се влошија од 2016 година и доаѓањето на Цаи Инг-вен за претседател во Тајван, а потоа и нејзиниот наследник Лаи Чинг-те оваа година.

Лаи, кој ја презеде функцијата во мај, вети дека ќе „се спротивстави на кинеската анексија“ или на обидите за газење на суверенитетот.

Пекинг, кој го означи Лаи како сепаратист, реагираше со предупредување дека „провокациите“ на тајванскиот претседател ќе доведат до „катастрофа“ за неговиот народ.

Портпаролката на кинеското Министерство за надворешни работи, Мао Нинг, исто така оцени дека зборовите на Лаи „ја откриваат неговата мрачна намера да ги влоши тензиите во Тајванскиот теснец заради лични политички интереси“.

Американскиот државен секретар Ентони Блинкен во петокот ја предупреди Кина да се воздржи од провокации кон Тајван.

„Во интерес на целиот свет е да се одржат мирот и стабилноста, да се зачува статус кво и да се избегне каков било конфликт што може да ги наруши елементите неопходни за светската економија“, рече тој.

Вашингтон го призна Пекинг како легитимна влада од 1979 година, но останува најмоќниот сојузник на Тајван и негов главен снабдувач на оружје.

Косовскиот премиер Албин Курти во саботата навечер изјави дека „Србија повторно провоцирала, придвижувајќи ги своите војници на околу 50 метри до границата со Косово“, поточно во близина на општина Каменица.

Споделувајќи неколку фотографии на Фејсбук, Курти рече дека српските воени трупи заминале откако забележале дека косовските власти ги снимиле нивните акции.

„Владата на Република Косово инвестираше многу во градење и подобрување на капацитетите на разузнавачките, безбедносните и одбранбените структури, кои се подготвени да спречат каква било закана за територијалниот интегритет и суверенитет на нашата земја“, рече Курти.

Тој рече дека Србија продолжува да ги крева тензиите со хибридни акции, со цел дестабилизација на регионот, „иако просторот за овие маневри од ден на ден се стеснува“.

Засега нема реакции од Србија за тврдењата на Курти. Најавата на Курти доаѓа неколку недели по годишнината од нападите во Бањска и Звечани. Вооружена група ја нападна косовската полиција во септември минатата година, кога беше убиен наредникот Африм Буњаку. Во размената на оган загинаа и тројца српски напаѓачи.

Косово ја обвинува Србија за организирање и извршување на нападот, но Белград тоа го негира. Одговорноста за нападот ја презеде Милан Радоичиќ, поранешен потпретседател на Српската листа, најголемата партија на Србите на Косово, која има поддршка од официјален Белград. Косовските власти го обвинија него и десетици други луѓе за кои се верува дека се на слобода во Србија. Тројца се уапсени на Косово.

Косово и Србија ја делат границата долга околу 350 километри, а повеќе од 60 отсто од оваа линија се состои од општини на северот на Косово, каде претежно живеат Срби.

Двете земји постигнаа договор за интегрирано гранично управување во декември 2011 година. Мисијата на НАТО на Косово, КФОР, е одговорна за безбедноста на границите на Косово со Србија, додека косовската полиција е одговорна за остатокот од граничната линија.

Во моментов, КФОР има повеќе од 4.400 војници на Косово. НАТО го засили своето присуство на Косово во 2023 година, по зголемените тензии на северот, каде мнозинството е српско население.