Собранието на Србија со мнозинство гласови го отфрли предлогот на опозицијата за изменување и дополнување на Законот за рударски и геолошки заводи, со кои опозицијата бараше забрана за истражување и експлоатација на литиум и бор.

Од присутните 214 пратеници, 84 гласале „за“, 128 гласале „против“, додека двајца пратеници не гласале.

Пратениците во српското Собрание четири дена расправаа за Предлогот за изменување и дополнување на Законот за рударско-геолошки истражувања, што го предложија 86 пратеници од опозицијата.

Српската влада летово го обнови планот на меѓународниот рударски гигант Рио Тинто за отворање рудник за литиум во долината Јадра во западна Србија, иако пред две години, под притисок на еколошките протести, проектот беше прекинат.

Претседателката на Собранието на Србија, Ана Брнабиќ, во расправата од претходните денови рече дека не слушнала никакви аргументи зошто опозицијата бара однапред забрана за истражување и експлоатација на литиум и бор кога компанијата не ја заврши студијата за влијанието на тој рудник врз животната средина.

Брнабиќ тврди дека рудникот нема да се отвори додека студијата не покаже дали е опасен за животната средина и ја обвини опозицијата дека го „политизира“ проектот.

Видете и ова:

Вучиќ: Предложениот закон за забрана за ископ на литиум е „неписмен и глупав“

Пратениците од опозицијата, кои бараат забрана за ископ на литиум, укажаа на негативните последици по животната средина доколку се отвори рудникот и ги обвинија властите дека се „промотори“ на Рио Тинто.

Во претходните месеци протести против отворањето на рудници за литиум беа организирани во десетици градови низ Србија.

Дел од граѓаните и еколошките активисти се против експлоатација на литиум и бор поради, како што наведоа, голем ризик за животната средина.

Рио Тинто претходно во одговор за Радио Слободна Европа изјави дека „домашни и меѓународни експерти потврдија дека проектот Јадар може да се реализира безбедно и во согласност со највисоките стандарди за заштита на животната средина“.

Сепак, бројни експерти од Србија и од странство посочуваат дека во процесот на експлоатација на литиумот неминовно има и еколошки последици, пред се загадување на речниот слив и на земјиштето.

Активистите во Србија потсетуваат и дека во текот на својата долга историја компанијата Рио Тинто се соочила со неколку обвинувања за уништување на животната средина или за кршење на човековите права.

Украинскиот претседател Володимир Зеленски разговараше на 10 октомври со францускиот претседател Емануел Макрон во Париз, како дел од напорите за обезбедување дополнителна воена и финансиска помош за Украина.

Европската турнеја на Зеленски и посетата на Франција доаѓа во време кога Киев се соочува со немилосрдни секојдневни воздушни напади и жестока руска офанзива на исток, која постепено напредува.

Зеленски се состана со Макрон по разговорите во Лондон со британскиот премиер Кир Стармер и со генералниот секретар на НАТО, Марк Руте, кој минатата недела беше во Киев.

Зеленски на мрежата Икс (поранешен Твитер) напиша дека на состанокот со Стармер и Руте ги „изнел деталите“ од неговиот план за пораз на руските сили и додаде дека тој и другите лидери се согласиле да работат на планот заедно.

Зеленски кажа и дека разговарале за трансатлантска соработка и за дополнително воено зајакнување на Украина. Тој не даде детали, но рече дека „ова се чекорите што ќе создадат најдобри услови за враќање на праведен мир“.

Видете и ова:

Зеленски на европска турнеја за да обезбеди воена и финансиска помош за Украина

Прес-службата на Зеленски соопшти дека тој ќе започне преговори „со клучните партнери од кои зависи воената компонента на нашето зајакнување“.

Портпаролот на Стармер им рече на новинарите дека британскиот премиер „ќе ја повтори железната поддршка на Обединетото Кралство за Украина во тековната руска агресија“.

Украинскиот лидер исто така треба да разговара со францускиот претседател Емануел Макрон во Париз, а потоа да отпатува во Рим на средби со италијанската премиерка Џорџа Мелони на 10 октомври и со папата Франциск во Ватикан на 11 октомври.

Зеленски на 11 октомври треба да замине во Германија на консултации со германскиот канцелар Олаф Шолц.

Инаку Зеленски на 9 октомври присуствуваше на самитот со балканските лидери во Хрватска, каде што ја истакна важноста на европското единство за траен мир.

Учесниците на самитот донесоа декларација со која се осудува руската агресија врз Украина се поддржуваат мировните напори на Зеленски, членството на Украина во НАТО и нејзината реконструкција по војната.

Советодавниот комитет на Советот на Европа за заштита на националните малцинства објави нови мислења со кои се оценува развојот на ситуацијата со националните малцинства во Бугарија и Црна Гора и се даваат препораки до властите на двете земји.

„Додека Бугарија игра сè поактивна улога во унапредувањето на правата на лицата кои припаѓаат на бугарските малцинства во странство, не можат да се видат истите напори и на внатрешен план. Генерално, има недоволна свест за малцинските права како составен дел на човековите права. Не е направен никаков напор за спроведувањето на голем број препораки за прашања како што е принципот на слободно самоопределување, поддршка за унапредување и заштита на малцинските права, вклучувајќи ги и јазичните права и потребата да се обезбеди целосна еднаквост и интеграција во општеството на сите што живеат во Бугарија“, оценува Советодавниот комитет на Советот на Европа за Рамковната конвенција за заштита на националните малцинства во своето шесто мислење за состојбите во Бугарија објавено на 10 октомври.

Комитетот дава препораки до бугарските власти за промоција на културите и јазиците на малцинствата, за негување доверба и меѓусебно почитување, како и подобрување на состојбата со ромското малцинство.

„Како и во претходните циклуси, лицата кои се идентификуваат како Македонци ја повторија својата долгогодишна желба да бидат заштитени според Рамковната конвенција, но бидејќи властите не го прифаќаат постоењето на објективни критериуми за нив, овие лица не можат да уживаат пристап до индивидуалните малцински права. Нивните долгорочни обиди да регистрираат здруженија кои ја промовираат македонската заедница не беа успешни“, пишува во документот.

Видете и ова:

Мицкоски од Благоевград: Зошто правото на Македонците во Бугарија не е признаено

Советодавниот комитет нагласува дека е потребно да се следи прагматичен пристап кон лицата кои се самоидентификуваат како Македонци, врз основа на принципот на слободна самоидентификација.

Во извештајот се посочува дека Европскиот суд за човекови права во 12 случаи против Бугарија поднесени од здруженија чија цел е заштита на интересите на македонското малцинство во земјата, утврди прекршување на член 11 од Европската конвенција за човекови права во врска со слободата на собирање и здружување поврзани со здружението ОМО Илинден и со одбивањата на националните судови да ги регистрираат здруженијата на жалителите.

Комитетот посочува дека Европскиот суд за човекови права оценил оти ваквите судски одлуки се неоправдани и претставуваат „непропорционално мешање во правото на слобода на здружување, меѓу другото, бидејќи здруженијата апликанти не се залагале за употреба на насилство или други недемократски средства за постигнување на нивните цели“.

За Црна Гора, во документот пишува дека и покрај силните политички и општествени турбуленции во земјата во последните пет години, таа останува посветена на правата на малцинствата, останувајќи активна во промовирањето на културите, идентитетите и учеството на националните малцинства во услови на тешки општествените услови.

Комитетот смета дека позицијата на Ромите и Египќаните во Црна Гора е алармантна од некои аспекти, особено во однос на домувањето и здравствената заштита. Комитетот смета и дека припадниците на малцинствата во голема мера се недоволно застапени во
малцинските совети и во политичкиот живот воопшто.

Седницата на Управниот одбор на Академијата за судии и јавни обвинители „Павел Шатев“ на која денеска, 10 октомври, беше предвидено да се именува нов директор на Академијата се одложи поради отсуство на претставник од Министерството за правда.

Како што информираше членот на Управниот одбор, Зоран Герасимовски, согласно Законот за Академија за судии и јавни обвинители, одлуките од круцијално прашање како што е избор на директор на Академијата, се носат со мнозинство гласови од вкупниот број членови.

По барање на Герасимовски, седницата беше одложена за в понеделник, 14 октомври во 15 часот, како последен ден за избор.

На огласот за нов директор се пријавија судиите од Основниот кривичен суд во Скопје, Ненад Савески и Оља Ристова, судијата Андреј Димовски од Граѓанскиот суд, судијката Едита Насковска од Управниот суд, како и актуелниот заменик-директор на Академијата, Илир Исени, чија судиска функција е во мирување.

Од редовите на обвинителите пријавени се Спасенка Андонова од Основното јавно обвинителство Скопје и Ирина Трајкоска-Стрезоски од Вишото јавно обвинителство Битола.

Видете и ова:

Академијата за судии и јавни обвинители избира директор, ќе биде ли последен?

Јавниот оглас за избор на директор на Академијата беше објавен на 26 август годинава, откако поранешната директорка Наташа Габер-Дамјановска, поднесе неотповиклива оставка од функцијата кон средината на јули.

Нејзината оставка дојде по спорот околу постапката за прием на 130 кандидати во деветтата, најголема генерација на АСЈО. До него дојде бидејќи една од фазите на тестирања беше закажа во изборниот период поради што Државната комисија за спречување корупција (ДКСК) покрена иницијатива за одговорност. Случајот се најде и пред Управен суд, кој првично пресуди во корист на Академијата, но потоа донесе одлука дека треба да се стопира приемот.

Габер-Дамјановска, во целиот овој процес тврдеше дека тие не ги прекршиле изборните правила бидејќи во случајот со постапката за тестирање за кандидатите не станува збор за вработувања.

Академијата за судии и јавни обвинители постои од 2006 година и таа е единствениот пат по кој некој може да стане судија или обвинител. Прва директорка на Академијата за судии и обвинители беше Анета Арнаудова. Во 18-годишното постоење, обуката во Академијата ја поминале над 1200 кандидати.

Русија во четвртокот ги укина визните ограничувања за Грузија, давајќи им на нејзините граѓани право да работат во Русија две недели пред парламентарните избори на кои владата која се повеќе е во судир со Западот ќе бара четврти мандат, јави агенцијата Ројтерс.

Овој потег уследи по коментарот на амбасадорот на Европската унија во Грузија минатиот месец, дека блокот ќе размисли за суспендирање на безвизниот режим со Грузија, кој е во сила од 2017 година, доколку гласањето не биде слободно и фер.

Уредбата објавена на интернет-страницата на Кремљ го укина правилото за ограничување на безвизните посети на Грузијците на Русија на 90 дена и ги отстрани ограничувањата што ги спречуваа да работат или да студираат во Русија без виза.

Видете и ова:

Грузиската владејачка партија повторно се обидува да ја отповика прозападната претседателка

Двете земји сè уште немаат формални дипломатски односи по кратката војна меѓусебна војна во 2008 година и последователното признавање од страна на Русија на два отцепени грузиски региони како независни држави.

Владејачката партија „Грузиски сон“ ги обвини западните земји дека сакаат да ја вовлечат Грузија во конфликт со Русија.

ЕУ ѝ додели на Грузија кандидатски статус во декември, но потоа соопшти дека го замрзнала процесот за членство откако „Грузиски сон“ го усвои законот за странски агенти, за кој критичарите велат дека е авторитарен и инспириран од Русија.

Руските власти постојано сигнализираа дека сакаат „Грузиски сон“ да остане на власт.

Сергеј Наришкин, шеф на руската служба за надворешно разузнавање, минатата недела изјави дека Москва сака да види „здрави, национално ориентирани сили“ да ја задржат власта во Грузија и ги обвини Соединетите Американски Држави за мешање во изборите.

Јужнокорејската писателка Хан Канг ја доби Нобеловата награда за литература, соопшти Шведската кралска академија.

Во објаснувањето од академијата се наведува дека Канг е наградена за поетска во која се опишуваат историските трауми а воедно ја разоткрива кревкоста на човечкиот живот.

Канг е првата јужнокорејска добитничка на наградата која комисијата за доделување на Нобеловата награда ја нарекува личност „посветена на музиката и уметноста“. Во соопштението, исто така, се додава дека нејзината работа ги поместува границите со истражување на широк спектар на жанрови.

Видете и ова:

Нобелова награда за физика за двајцата пионери во вештачката интелигенција

Хан Канг (53) е најпознатата јужнокорејска современа писателка и добитничка на Букеровата награда за нејзиниот роман „Вегетаријанец“ во 2016 година.

Меѓу имињата кои кружеа во книжевните кругови беа руската авторка и отворена критичарка на Путин, Људмила Улицка, кинескиот авангарден писател Кан Кју, како и британскиот писател Салман Ружди.

Шведската академија често става акцент на малку познати автори, иако минатата година наградата и припадна на француската феминистичка икона Ани Ерно.

Хан Канг е само осумнаесеттата жена што ја добила наградата откако таа се доделува од 1901 година.

Во последниве години, наградата ја добија три жени: гореспоменатата Ани Ерно, американската поетеса Луиз Глук и полската Олга Токарчук и тројца мажи: норвешкиот писател Јон Фосе, австрискиот писател Петер Хандке и танзанскиот писател Абдулразак Гурна.

Името на добитникот на Нобеловата награда за мир ќе биде објавено на 11 октомври, а за економијата на 14 октомври.

Економско - социјалниот совет (ЕСС) на денешната конституивна седница ќе ги разгледа барањата на социјалните партнери по што се очекува да се донесат заеднички одлуки и мерки, изјави министерот за економија и труд Бесар Дурмиши, кој е именуван за нов претседател на ЕСС.

„Ќе ги слушнеме барањата и на синдикатите и на работодавачите, односно на сите засегнати страни и на крај ќе донесеме заеднички одлуки и мерки бидејќи сите страни имаме една цел, а тоа е подобрување на стандардот на нашите граѓани. Ќе се разгледуваат сите барања кои ќе бидат поставени на денешната седница“, изјави Дурмиши.

Видете и ова:

Работниците бараат повисоки плати, владата нуди минимални корекции

Од Сојузот на синдикати на Македонија(ССМ) и од Организацијата на работодавачи на 1 октомври, кога се одбележаа 100 дена од работата на Владата, изразија очекување дека наскоро ќе биде свикана седница на Економско - социјалниот совет за да се разговара за зголемување на минималната плата на 450 евра од сегашните околу 365 евра.

Од ССМ изјавија дека ништо не може да ги убеди дека нема услови за таа висина на минималецот, со образложение дека најголемиот дел од стопанствениците се подготвени да ја плаќаат оваа сума како минимална плата, но дека потребно е да се направи бизнис клима од страна на власта.

Министерот за јавна администрација Горан Минчев одговорајќи на новинарско прашање во врска со укинувањето на „балансерот“ од страна на Уставниот суд, порача дека Министерството не навлегува во содржината на одлуките, туку истите ги спроведува и применува. Тој потенцира дека владината коалиција има политички капацитет да почне со дијалог за да се најде соодветно решение кое би било солгасно уставот, но е на ставот дека не треба да се брза, туку да се отвори широка и јавна дебата.

„Министерството за јавна администрација не ја коментира одлуката на Уставниот суд, исто како и во првиот случај кога беше донесена времена мерка за стопирање на примената на одредени одредби од два закони кои се однесуваат на јавниот сектор и на административните службеници. Така и сега, Министерството не навлегува во содржината на одлуките, туку истите ги спроведува и применува. Првиот пат дадовме конкретни инструкции и насоки или пак упатство до сите државни институции, сега сепак би почекал да излезе комплетната содржина за оваа одлука од страна на Уставниот суд во службен весник и притоа би пристапиле кон реализација на истата“, рече Минчев на денешната прес-конференција.

Според него, правичната застапеност на ентичките заедници е многу важна уставна категорија. Но, останува на ставот дека не треба да се брза со содржината на евентуално ново решение.

„Мислам дека е подобро да се отвори широка и јавна дебата, во која што би се вклучиле сите заинтересирани страни, тука мислам на делот од владината коалиција, но исто така добра можност е да се повика и експертската и академската заедница со цел да се најде соодветно решение кое што ќе биде долгорочно, ќе биде солидно, ќе биде содржајно, и нема повторно да не доведе во ситуација на евентуална ваква одлука од страна на Уставниот суд“, додаде Минчев.

Видете и ова:

ДУИ пред Уставниот суд: Укинувањето на балансерот е „тежок удар врз мултиетничката стабилност“

Коментирајќи ја синоќешната прес-конференција на ДУИ, посочи дека оваа политичка партија треба да се занимава со реформи, но реформите да не ги насочува кон јавната администрација, туку кон себе.

„Би ја поздравил идејата на ДУИ да се занимаваат со реформи, но би им препорачал тие реформи да не ги насочат кон реформите во јавната администрација, туку кон себе. Да ја реформираат својата партија, затоа што единствените реформи кои што ги направија во минатиот мандат, се реформите на зголемување на контото на своите приватни сметки и реформите кои што се зголемување на стапката на криминалот. Треба да сфатат дека се опозиција“, рече Минчев.

Видете и ова:

Балансерот укинат, доаѓа нов Закон за правична застапеност

Прашан за коментар на изјавата на Халид Снопче од „Вреди“ дека веќе имаат подготвено драфт верзија на новиот Закон за етничка припадност која ќе ја поднесат во Собранието, Минчев рече дека не сака да коментира содржина која не ја видел. Но, повтори дека не сака избрзани решенија.

Уставниот суд вчера на седница донесе одлука за укинување на „балансерот“ - алатката за вработување според национална припадност во државните институции. Претседателот на Уставниот суд Дарко Костадиновски образложи дека одлуката на судот е донесена со мнозинство гласови и нема да важи ретроактивно. Манипулација, ги нарече, тврдењата дека Уставниот суд укинал права на заедниците.

Претседателот на Турција, Реџеп Таип Ердоган е во посета на Албанија. Ердоган денеска (10 октомври) беше примен од претседателот на Албанија, Бајрам Бегај.

Подоцна, Ердоган ќе се сретне со премиерот Еди Рама за време на неговата посета на Тирана. Потоа ќе се одржи состанок на високиот албанско-турски совет за соработка, а на крајот се очекува да бидат потпишани неколку договори поврзани со образованието, земјоделството и медиумите.

Договорот за формирање на овој Совет беше потпишан во јануари 2021 година, додека првиот состанок се одржа во февруари годинава. Шест договори и меморандуми за разбирање беа потпишани во Анкара за време на посетата на премиерот Еди Рама на 20 февруари во областа на животната средина, земјоделството, медиумите и војската.

Министерот за одбрана Нико Пелеши во март годинава за време на говорот во Парламентот рече дека Турција е земја „со која имаме интензивна соработка на полето на безбедноста, одбраната и цивилните вонредни состојби“.

Тој најави дека во моментов се реализира поддршката на грант од 100 милиони турски лири за модернизација на вооружените сили, а со овој договор се обезбедени и три беспилотни летала „Бајрактар“.

Видете и ова:

Косово не може да ги користи беспилотните летала Бајрактар без одобрение на КФОР

Од доаѓањето на власт на Социјалистичката партија, премиерот Рама ја опиша Турција како стратешки партнер и изјави дека соработката меѓу двете земји ќе достигне досега непознати нивоа.

Турција е меѓу најголемите инвеститори во Албанија со околу 3,7 милијарди евра, додека повеќе од 15 000 Албанци се вработени во 830 турски компании кои работат во Албанија.

Свеченото отворање на Намазѓа џамијата ќе се одржи попладне, пред 17:00 часот. Изградбата на џамијата започна во 2015 година, а темелите ги постави турскиот претседател Ердоган.

Видете и ова:

Отворена нова база на НАТО во Албанија

На оваа важна церемонија за муслиманските верници нема да учествува поглаварот на албанската муслиманска заедница Бујар Спахиу, а нема да учествуваат ниту други лидери. Заедницата ќе ја претставува муфтијата на Тирана Газменд Теќја, кој ќе биде и поглавар на џамијата Намазѓа.

Намазѓа џамијата има површина од 10 000 метри квадратни и капацитет за 5000 верници. Нејзината изградба траеше 9 години.

Министерката за финансии Гордана Димитриеска-Кочовска уверува дека е против замрзнување на трговските маржи и според неа таквата мерка не носи никакви резултати.

„Никогаш не можам да се согласам со мерката на замрзнување на цени, маржи, тоа се сложени методологии за пресметка, и во државните институции нема доволно капацитет кој може точно да ги пресмета тие маржи и да потврди дека тоа е така. Во периодот кој следи очекувам да има промени во тој дел, и да не се продолжува на истиот овој начин, затоа што јас сметам дека ефектите нема да бидат толку големи колку што се очекува особено во услови кога имаме ниска инфлација“, појасни Димитриеска-Кочовска на денешната прес-конференција по повод отчетот 100 дена Влада.

Со Одлуката на Владата за посебни услови за трговијата на одделни стоки се врши ограничување на профитните маржи до 10 отсто на 73 основни прехранбени производи, поради што се очекуваше нивните цени да се намалат за 10 отсто. Оваа одлука Владата ја донесе на вонредна седница на 20 септември.

Видете и ова:

По одлуката за намалување на маржата, се менуваат цените на производите

Спротивно на ова, како што рече, го подржува Законот за нефер трговски практики.

„Сметам дека тој повеќе ќе го регулира пазарот отколку овие математики кои ги правиме. Законот за нефер трговски практики многу поедноставно може да се проверува и следи во однос на она што значи замрзнување на цени. Јас сум човек што има став и не го менувам така едноставно, затоа што ниедна одлука досега не сум ја донела избрзано, ниту сум ја донела поради некаков инает, туку само врз база на тоа што значи анализа на бројки и воочување на реалноста“, одговори Димитриевска-Кочовска на прашањето дали била осамена во моментот на носењето на одлуката за маржите на Влада.

Независно од тоа дали била осамена или не, таа вели дека одлуката на Владата е конечна.

Видете и ова:

Закон за нефер трговски практики од утре, пониски цени од крајот на октомври

Законот за нефер трговски практики предвидува повеќе од 2500 земјоделски и прехранбени производи да имаат ограничени маржи до 10 отсто. Тој почна да ссе применува од 28 септември 2024 година.