Вести
Вучиќ заинтересиран за изградба на пругата од Коридорот 10
Пругата која ќе ги поврзе Србија од Прешево преку Табановце и Гевгелија со Солун е дел од разговорот меѓу македонската и српската делагација при денешната посета.
Македонската претседателка Гордана Сиљановска Давкова, по повод одбележувањето на 2 Август, Илинден – Денот на Републиката, денеска беше во посета на манастирот „Св. Прохор Пчински“, каде е одржано првото заседание на Антифашистичкото собрание на народното ослободување на Македонија и положи цвеќе пред спомен-плочата на АСНОМ.
Во манастирот „Св. Прохор Пчински“ претседателката Сиљановска Давкова беше пречекана од нејзиниот српски колега Александар Вучиќ, со кој во придружба на митрополитот врањски г. Пахомије, го разгледаа манастирскиот комплекс.
„Сигурен сум дека Србија и Северна Македонија ќе ги развиваат понатамошните односи меѓусебно и дека ќе работиме на проектите. На сите во Србија им честитам на Македонците голем празник и нека слават уште многу години“, изјави Вучиќ по билатералната средба.
![Северна Македонија - Почеток на изградбата на источниот дел од железничката пруга на Коридорот 8 [28.10.2022]](https://gdb.rferl.org/012e0000-0aff-0242-6fb7-08dac3cab737_w100_r1.jpg)
Тој истакна дека со неа разговарал за политички прашања, за проблемите и интересите на двете земји, но и за пругата до Солун.
„Ја искажав заинтересираноста на Србија да ја градиме пругата до Прешево, а тие оние 190 километри, од Табановце до Гевгелија за да имаме брз пат до Солун, брза пруга и сметам дека тоа би било од исклучително значење“, рече Вучиќ.
Македонската претседателка во изјава за медиумите истакна дека не може да говори за железницата но смета дека предлогот на нејзиниот колега е логичен.
„Сега ќе ве насмеам, но реков дека, ако за време на Отоманската империја овде одел ‘Ориент експрес’, ние денес имаме сериозен проблем. Пругата е прашање на Владата, ние овде имаме претставник од Владата, но сметам дека тоа е логично решение“, изјави Сиљановска Давкова.
Таа оцени дека билатералните односи меѓу двете држави се добрососедски во вистинска смисла на зборот, односи зад кои стои желба за солидарност, за помош и за трајна соработка.
„Јас сум, како што знаете голем заговорник на регионалната соработка. Убедена сум дека ако не се разбираме едни со други и ако не си помагаме, не можеме да очекуваме да бидеме разбрани од останатите. Затоа, треба да сториме се да ги решаваме проблемите меѓу себе, да не дозволуваме на зелени маси да се решаваат, затоа што не случајно живееме едни крај други“, изјави претседателката Сиљановска Давкова.
Таа му се заблагодари на Вучиќ за помошта од Србија во гаснењето на пожарите.
види ги сите денешни вести
Власта очекува автопатот Прилеп-Битола да биде готов во 2027 година
Власта во Северна Македонија очекува автопатот Прилеп-Битола да биде готов за три години односно во 2027. Оваа делница е дел од коридорот 10Д, а ја гради американско-турскиот конзорциум „Бехтел и Енка“.
Премиерот Христијан Мицкоски, министерот за транспорт Александар Николоски, директорот на Јавното претпријатие за државни патишта (ЈПДП) Коце Трајановски, како и американската амбасадорка во земјава, Анџела Агелер денеска правеа увид на терен.
Автопатот Прилеп-Битола треба да биде долг 40 километри, а во моментов, според она што беше соопштено, фронт на работа се шест километри.
Од околу 1.300 парцели, експропријација е направена на 850. На терен досега се пронајдени околу 19.500 експлозивни материјали кои се отстрануваат со помош на Армијата. Досега се извадени околу 200.
„Ние сега сме еден чекор пред ’Бехтел и Енка‘. Ако претходно чекаа зашто не беше извршена експропријацијата, ако чекаа бидејќи не беше решено деминирањето, сега тоа е решено и нема да плаќаме толку пенали, туку, напротив, ’Бехтел и Енка‘ треба да не следи нас“, изјави директорот на ЈПДП, Коце Трајановски.
Министерот Николоски рече дека со автопатското поврзување од Скопје до Прилеп ќе се патува за 1 час и 15 минути, а час и половина до Битола.
„Овој автопат води до два големи центри во Македонија, до Прилеп и до Битола, а тука води и до границата со Грција, до нашиот втор граничен премин со Грција, што значи целосно отворање и за туризмот и за економијата“, рече Николоски.
„Бехтел и Енка“ треба да го изградат и коридорот 8 – од Тетово до Гостивар, Кичево, преку Струга до Ќафасан.
Договорот со американско-турскиот конзорциум беше потпишан во време на минатата власт предводена од СДСМ и ДУИ кога ВМРО-ДПМНЕ како опозиција обвинуваше за „историски криминал“.
„Граѓаните секојдневно гледаат како Мицкоски и ВМРО-ДПМНЕ ги промовираат и се фалат со проектите на СДСМ за коридорите кои ги напаѓаа и велеа дека се криминални и штетни. Од историски криминал, коридорите на Бехтел и Енка станаа историски значајни проекти, слепите тунели кон Бугарија наеднаш прогледаа, а наводните криминални зделки сега се добри за ВМРО-ДПМНЕ“, реагираа денеска од СДСМ.
Собранието во јули 2021 донесе Закон за стратешко партнерство со „Бехтел и Енка“ за градба на автопатиштата, а целиот проект од самиот старт го следат контроверзии. Имаше проблеми и со изборот на надзор. Првиот обид пропадна поради руска врска, а и вториот се поврзуваше со скандали со фирмите кои беа избрани за надзорот. Случај отвори и обвинителството.
Инаку, проектот за градба на делниците од коридорите 8 и 10Д, како што наведува компанијата „Енка“ на својата веб-страница, вклучува седум клучки, 34 мостови, 34 надвозници, 24 подвозници, над 21 милион метри кубни ископ, над 10 милиони метри кубни земјени насипи, 620.000 метри кубни бетон, 2,2 милиони метри куби подлога, 1,1 милион тони асфалт итн.
Кеми Баденох е нова лидерка на британските конзервативци
Кеми Баденох е избрана за нова лидерка на конзервативците во Велика Британија со што стана првата црна жена на чело на оваа партија.
Таа е актуелна пратеничка, а претходно извршувала функции и како државна секретарка и министерка.
44-годишната конзервативка победи во внатрепартиската трка со своите ветувања дека ќе ја врати партијата на нејзините основачки принципи. Таа ќе го замени поранешниот британски премиер Риши Сунак и најави дека ќе ја води партијата низ период на обнова откако конзервативците претрпеа убедлив пораз на изборите во јули.
Лабуристичкиот премиер Кир Стармер ја поздрави нејзината победа, велејќи дека тоа што на чело на ривалската партија за првпат застанува жена со црна боја на кожата е „горд момент за земјата“.
Баденох, пак, претходно потенцираше дека не сака фокусот да биде на нејзината раса.
Кога на конференција на конзервативната партија претходно оваа година ја прашаа какво би било чувство да се стане првата црна жена лидер на партијата, таа одговори: Јас сум некој што сака бојата на нашата кожа да не биде позначајна од бојата на нашата коса или бојата на нашите очи“.
На внатрепартиските избори денеска таа освои 57 отсто од гласовите и ќе биде дури петти лидер на чело на конзервативната партија од 2016 година.
Процесот на избор траеше неколку месеци. Од првичните шест кандидати, изборот се стесни на двајца – Баденох и поранешниот министер за имиграција Роберт Џенрик, кој освои 43 отсто од гласовите.
Конзервативците на последните избори во Велика Британија одржани во јули годинава освоија само 121 место во 650-члениот парламент. За споредба, на изборите во 2019 тие имаа 365 пратеници.
Во Шпанија регистрирани најмалку 211 жртви од поплавите
Во најсмртоносните поплави во модерната историја на Шпанија загинаа најмалку 211 луѓе, а десетици сè уште се водат како исчезнати, четири дена откако поројните дождови го зафатија источниот регион на Валенсија, изјави во саботата шпанскиот премиер Педро Санчез.
Во телевизиска изјава, Санчез рече дека Владата испраќа уште 5.000 армиски трупи да помогнат во расчистувањето и обновувањето откако претходно веќе беа распоредени 2.500 војници.
„Тоа е најголемата операција на вооружените сили во Шпанија во време на мир. Владата ќе ги мобилизира сите потребни ресурси сè додека се потребни“, рече Санчез.
Оваа трагедија е најголемата катастрофа поврзана со поплави во Европа од 1967 година кога во Португалија загинаа најмалку 500 луѓе.
Надежите за пронаоѓање на преживеани се зголемија кога спасувачите пронајдоа жена која останала жива откако три дена била заробена на паркинг во Монткада, Валенсија. Кога шефот на цивилната заштита Мартин Перез ја објави веста, жителите ја дочекаа со аплауз.
Во меѓувреме, волонтери се собраа во центарот на градот во Валенсија за да започнат со првото координирано чистење организирано од регионалните власти.
„Се чувствуваме напуштено, има многу луѓе на кои им треба помош. Не е само мојата куќа, туку и сите куќи го фрламе мебелот. Кога ќе пристигне помошта за да добиеме фрижидери и машини за перење?“, изјави за Ројтерс 74-годишната Емилија, жителка на предградието Пикања во Валенсија.
Медицинската сестра Марија Хозе Гилаберт (52), која исто така живее во Пикања, рече: „Ние сме уништени затоа што нема многу светлина што може да се види овде во моментов – не затоа што не доаѓаат да помогнат, доаѓаат од цела Шпанија, но затоа што ќе помине многу време пред ова повторно да стане место за живеење“.
Мицкоски: ДУИ да се подготват за одговорност, а за избори кога ќе дојде време
ДУИ да се подготват за одговорност, а за избори кога ќе дојде време ќе се подготвуваме, е пораката што премиерот и лидер на ВМРО-ДПМНЕ, Христијан Мицкоски, ја испрати на прозивката од Али Ахмети кој вчера рече Мицкоски „добро да се подготви за догодина“ доколку има предвремени парламентарни избори.
Премиерот рече дека актуелната влада на изборите пред помалку од шест месеци добила над 600 илјади гласови и планираат во наредните четири години да го испорачаат тоа што го ветиле.
„Јас разбирам дека раководството на ДУИ не сака да биде во опозиција, исплашени дека конечно ја чувствуваат и тие одлучноста на Владата за борба против криминалот и корупцијата. Знаат сè што имаат правено во изминатите 20 години, свесни се и знаат дека полека но сигурно доаѓа денот кога ќе треба да бидат одговорни. Како резултат на тој страв, тие непринципиелно се храбрат и мислат дека на тој начин ќе магнетизираат повеќе гласачи“, рече Мицкоски.
Инаку, самиот Мицкоски на првите пратенички прашања за неговата Влада одржани на 31 октомври ја фрли ракавицата за предвремени парламентарни избори кои би се одржале заедно со локалните во октомври следната година. Тој ова го кажа откако лидерот на опозицискиот СДСМ, Венко Филипче, повика Владата да си поднесе оставка.
„Мицкоски на власт и Мицкоски во опозиција очигледно не се познаваат, буквално го плукнавте секое ветување... Велевте дека ќе го вратите мандатот ако некогаш кажете Северна. Ајде премиере, еве сега е шанса, во Собранието да го вратите мандатот. Наместо тоа, вие и вашите министри на мала врата почнавте да го користите уставното име, а некои богами тоа и со гордост го изговараат“, рече Филипче од собраниската говорница на 31 октомври.
Откако Мицкоски му возврати со идејата да си ги одмерат силите на предвремени избори, се јави и лидерот на ДУИ, Али Ахмети.
„Самиот Мицкоски вчера изјави дека ќе имаме предвремени парламентарни и локални избори по една година. Македонската опозиција мора да биде храбра затоа што немаат што да загубат, нека се подготват добро по една година на терен на избори со ВМРО, а ние на избори со сите оние кои не мислат како нас и се претставуваат како претставници на Албанците во институциите на државата“, изјави синоќа Ахмети на средба со граѓани во Боговиње.
Од коалицијата Вреди (ВЛЕН), која е дел од Владата, пак, реагираше првиот вицепремиер и министер за животна средина Изет Меџити велејќи дека ДУИ треба да се подготви да биде уште долго време во опозиција.
„Наместо да се претставува како некој голем фактор на политичката сцена, ДУИ би било подобро да се врати на внатрешните реформи и да ги исчисти своите редови од организираниот криминал и корупцијата“, порача Меџити.
Последните парламентарни избори се одржаа на 8 мај, а по нив ВМРО-ДПМНЕ, Вреди и ЗНАМ ја формираа новата Влада на Северна Македонија.
СДСМ и ДУИ, по седумгодишно владеење, заминаа во опозиција.
Најмалку 20 лица на сослушување во српското обвинителство по несреќата во Нови Сад
Вишото јавно обвинителство во Нови Сад соопшти дека во текот на денот ќе бидат сослушани најмалку 20 лица за да се утврдат „сите суштински елементи на кривични дела и кривична одговорност“ за несреќата на железничката станица во Нови Сад.
Во вчерашната несреќа падна настрешницата пред влезот на главната железничка станица во овој град при што загинаа 14 лица, а тројца беа тешко повредени.
Според соопштението на Вишото обвинителство, меѓу другите, ќе бидат сослушани претставници од Министерството за градежништво, транспорт и инфраструктура, надлежниот министер Горан Весиќ, претставници од Железници Србија и Заводот за заштита на спомениците на културата на градот Нови Сад, како и други лица.
Универзитетскиот клинички центар во Војводина (УКЦВ) на 2 ноември потврди дека нема нови жртви, а тројца од повредените сè уште се во тешка состојба.
„Оперативно се третирани, во тек е дополнителна дијагностика, но сите тројца се во многу тешка состојба. Многу е тешко да се дадат прогнози. Станува збор за многу тешки телесни повреди кои се опасни по живот“, изјави директорката Весна Туркулов за РТС.
Досега, според информациите на новосадската полиција, идентификувани се тринаесет жртви.
Една од жртвите е државјанин на Северна Македонија, кој како што веќе објавија медиумите во Србија, е 45-годишен Македонец кој како научник работел во институт во Нови Сад, каде се истражуваат информатички технологии за земјоделството.
Премиерот Христијан Мицкоски денеска изјава дека министерот за внатрешни работи Панче Тошковски разговарал со неговиот српски колега и оти како Влада ќе помогнат колку што на семејството на настраданиот македонски државјанин.
Инаку, спасувачката акција во Нови Сад траеше до доцна вечерта на 1 ноември, екипите во текот на целиот ден ги извлекуваа жртвите од под урнатините.
Зградата на главната железничка станица во Нови Сад беше отворена во јули 2024 година по тригодишна реконструкција. Единствениот дел кој не бил реновиран била настрешницата.
Пентагон најави распоредување дополнително оружје за одбрана на Блискиот Исток
Секретарот за одбрана на САД, Лојд Остин, нареди распоредување дополнително оружје за одбрана од балистички ракети, борбени ескадрили и авиони танкер, како и неколку бомбардери со долг дострел Б-52 на Блискиот Исток, соопшти Пентагон на 1 ноември.
Дополнително оружје ќе биде распоредено во знак на предупредување за Иран.
Новите вооружени сили ќе почнат да пристигнуваат во регионот во следните месеци за да ја заменат ударната група на носачи на авиони УСС, Абрахам Линколн, која е во заминување, изјави портпаролот на Пентагон, генерал-мајор Пат Рајдер.
Најавата доаѓа три недели откако американскиот претседател Џо Бајден рече дека му наредил на Пентагон да испрати напреден противракетен систем и војници во Израел, како дел од напорите на САД да го поддржат сојузникот Израел и да изградат позиции на источниот Медитеран.
„Овие потези ја демонстрираат флексибилната природа на глобалната одбранбена положба на САД и способноста да распоредат свои сили низ светот за кратко време за да се справат со растечките закани за националната безбедност“, рече Рајдер.
Во соопштението се додава дека секретарот за одбрана Лојд Остин „продолжува јасно да покажува дека доколку Иран и неговите партнери го искористат овој момент за да го нападнат американскиот персонал или да ги загрозат интересите во регионот, Соединетите држави ќе ги преземат сите неопходни мерки за одбрана на нашиот народ“.
Американскиот нуклеарен бомбардер Б-52 неколку пати беше распореден на Блискиот Исток како предупредување до Иран. Рајдер не прецизираше колку авиони и бродови ќе бидат распоредени во наредниот период.
Тој изјави дека потезите се во согласност со обврските на САД да ги заштитат американските граѓани и американските сили на Блискиот исток, да го бранат Израел и да ја деескалираат ситуацијата преку одвраќање и дипломатија.
Најавата на Пентагон за распоредување дополнително оружје за одбрана на Блискиот исток доаѓа во екот на војната во Газа меѓу Израел и Хамас, кои САД и ЕУ го прогласија за терористичка организација, како и во екот на војната во Либан меѓу Израел и Хезболах, кој исто така е на црната листа на САД додека ЕУ го санкционираше само вооруженото крило на групата, но не и политичката партија.
САД инсистираат на прекин на огнот на Блискиот исток, а официјалните претставници на земјата постојано повторуваат дека ќе го бранат Израел и ќе продолжат да го штитат американското и сојузничкото присуство во регионот.
Во напад со руски дронови повредени две лица во Киев, пет во Суми
Две лица се повредени во текот на изминатата ноќ во Киев кога остатоци од руски дрон паднале врз станбена зграда од 16 ката и бил предизвикан пожар, соопштија украинските власти на 2 ноември.
Градоначалникот на Киев, Виталиј Кличко, изјави дека на една од жртвите и е потребна хоспитализација.
Пожарот што настанал бил изгаснат од службите за итни случаи.
Во североисточниот град Суми, пак, уште пет лица биле повредени, од кои едно потешко,откако руски дрон удрил во деветокатница во доцните вечерни часови на 1 ноември, објавија тамошните обвинители.
Украинските власти ја обвинуваат Русија дека во текот на нејзината инвазија започната пред две и пол години, постојано рутински напаѓа цивилни мети на украинска територија, обвинувања што Москва ги отфрла како невистинити.
Две убиства изминатиот ден во Северна Македонија
Во текот на вчерашниот ден, 1 ноември, во два одделни случаи – во Арачиново и Штип, убиени се две лица.
Во скопско Арачиново, вчера во попладневните часови во вооружен инцидент биле ранети две лица на 50 и 19-годишна возраст. Тие биле пренесени во Клиничкиот центар „Мајка Тереза“, но 50-годишникот починал и покрај обидите на медицинските тимови за реанимација.
„На 01.11.2024 околу 19 часот од Ургентен центар Мајка Тереза во СВР Скопје е пријавено дека со повреди од огнено оружје биле донесени С.А. и А.А. од Арачиново. Според пријавеното, во нив во селото Арачиново било пукано со огнено оружје од страна на две лица кои биле со возило ауди“, информираа од МВР.
Од Јавното обвинителство, пак, соопштија дека според првичните сознанија можен мотив се „нерасчистени должничко-доверителски односи“. За настанот, едно лице е приведено, а по второ се трага.
Во Штип, пак, убиена е 29-годишна жена, а според првичните информации осомничен е нејзиниот 25-годишен партнер.
Според првичните информации од полицијата, синоќа околу 20:15 часот во полициската станица дошол Ф.З. (25) од Штип и пријавил дека ја убил неговата партнерка Е.П. Тој кажал дека телото се наоѓа во објект во Штип, кое подоцна било пронајдено од полицијата.
„Дежурен јавен обвинител од Штип изврши увид на лице место каде според првичните информации, во близина на сопствениот дом била лишена од живот една 29-годишна жена. Едно лице е задржано во полициска станица. При увидот беа подигнати траги од лице место кои ќе бидат предмет на вештачење со цел утврдување на околностите“, соопштија од Јавното обвинителство.
Телото на убиената жена е дадено на обдукција.
На територијата на Северна Македонија во 2023 година имало 23 убиства. Во 2024, според инфорамциите кои во четвртокот (31 октомври) ги соопшти министерот за внатрешни работи Панче Тошковски, до крајот на минатиот месец се регистрирани 16 убиства.
Зеленски ги критикува партнерите за слаб одговор на севернокорејските трупи во Русија
Украинскиот претседател Володимир Зеленски на 1 ноември ги критикуваше партнерите на Киев за недостаток на акција како одговор на руското распоредување севернокорејски трупи, пренесува украинскиот сервис на Радио Слободна Европа (РСЕ).
Украина знае каде Русија на нејзина територија собира војници од Северна Кореја, а превентивен напад би бил можен доколку Киев не биде ограничен, рече Зеленски.
Соединетите Американски Држави (САД) на 31 октомври соопштија дека имаат информации оти околу 8.000 севернокорејски војници се наоѓаат во руската област Курск, во близина на границата со Украина, и Русија „има намера целосно“ да ги распореди во борбата против украинските војници.
Зеленски на Телеграм се пожали дека САД и другите сојузници „само гледаат“ наместо да и дозволат на Украина да користи оружје со долг дострел, доставено од САД, за да може гаѓа воени цели во Русија.
„Сите само чекаат севернокорејската армија да почне да ги напаѓа Украинците“, рече тој.
Тој додаде дека сите земји кои сакаат војната да не се прошири во другите региони во светот „треба да дејствуваат“.
Зеленски со месеци ги повикува сојузниците на Украина да им дозволат на нејзините сили да користат напредно западно оружје за цели подлабоко на руска територија. Тој го повтори апелот по рускиот напад на Харкив на 31 октомври, во кој загинаа три лица, а најмалку 36 беа ранети.
Американскиот секретар за одбрана Лојд Остин во септември изјави дека употребата на донираното американско оружје за долгосежни напади против Русија нема да го сврти бранот на војната во корист на Украина.
САД и нивните сојузници претходно ја отфрлија можноста оружјето што и го донираа на Украина да се користи за таргетирање цели подлабоко на руска територија поради загриженоста дека тоа би можело да доведе до руска одмазда со нуклеарно оружје.
Остин и американскиот државен секретар Антони Блинкен разговараа со нивните јужнокорејски колеги на 31 октомври во Вашингтон за распоредувањето и тестирањето на интерконтиненталната балистичка ракета (ICBM), потег што Пјонгјанг го направи рано на 31 октомври.
„Силно апелираме (Северна Кореја) веднаш да ја прекине серијата провокативни и дестабилизирачки дејствија кои ги загрозуваат мирот и безбедноста на Корејскиот полуостров и пошироко“, се вели во заедничката изјава, во која не се споменува Украина.
Пентагон претходно изрази загриженост за вмешаноста на севернокорејските трупи во војната и изјави дека тие ќе станат „легитимни воени цели“ доколку бидат распоредени на бојното поле.
Германија ја повика Србија да ги разгледа нацрт-законите за Косово
Министерството за надворешни работи на Германија ја повика Србија да ги разгледа новоусвоените нацрт-закони за судска јурисдикција на Косово и да го прогласи Косово за „посебна зона на социјална заштита“.
Со објавa на мрежата Х, Германија се приклучи на ставот на САД и Европската унија (ЕУ) дека Владата на Србија ги прекршила обврските од бриселскиот дијалог со усвојувањето на овие предлог-закони, кои се очекува да се изгласаат во Собранието.
„Ги повикуваме Србија и Косово да го спроведат Охридскиот договор без одлoжување, вклучително и Заедницата на општини со српско мнозинство“, објави германското министерство денеска (1 ноември).
Владата на Србија на почетокот на неделата соопшти дека го усвоила Предлог-законот за, како што ја нарече, организацијата и надлежноста на српските правосудни органи во гонењето на кривични дела извршени на територијата на Косово, како и вториот Предлог-закон за прогласување на Косово за „област на специјална социјална заштита“.
Во текот на неделата овие закони беа критикувани од САД и ЕУ, кои едногласно рекоа дека со нив очигледно се прекршуваат обврските на Србија од бриселскиот дијалог со Косово за нормализација на односите.
Вицепремиерот на Косово, Бесник Бислими, ја обвини Србија дека со овие предлог закони ги прекршува договорите и го нарушува суверенитетот и територијалниот интегритет на Косово.
Но, шефот на Канцеларијата за Косово во Владата на Србија, Петар Петковиќ, ги правдаше предлог-законите велејќи дека тие доаѓаат како одговор на, како што рече, „угнетувањето на српскиот народ од режимот во Приштина и недостатокот на видливи акции на мисијата на ЕУ во Косово, ЕУЛЕКС“.
Косово и Србија постигнаа договор за правосудството во 2015 и 2017 година и се договорија за негово спроведување и интеграција на косовските Срби во судските институции на Косово.
Сепак, стотици припадници на српската заедница на северот поднесоа оставки од косовските институции, вклучително општините, полицијата, судовите и обвинителството, во ноември 2022 година, како знак на незадоволство од некои одлуки на Владата на Косово.
Во текот на оваа година, владата на Косово презеде неколку чекори - како што се отстранување на српскиот динар од употреба и затворање на српските паралелни структури - во обид да ги прошири своите овластувања на север што е можно повеќе.
Ова го натера официјален Белград во септември да објави дека ќе формира специјално обвинителство за територијата на Косово, како мерка за заштита на „виталните национални интереси на српскиот народ“ на Косово.
Во меѓувреме, српскиот претседател, Александар Вучиќ, претходно оваа недела претстави некои мерки за Косово, велејќи дека специјалното обвинителство и специјалните судски панели „ќе го гонат секој што учествува во прогонот на српското население“ на Косово.
Нацрт-законот што го подготви Владата на Србија предвидува судење за сите кривични дела предвидени во Кривичниот законик на оваа земја, а кои беа сторени по прогласувањето на независноста на Косово во февруари 2008 година.
Мултимедија
Најпосетени
Што треба да знаете