Вести
Поднесено обвинение за струшкиот градоначалник Рамиз Мерко
Поднесено е обвинение против градоначалникот на Струга, Рамиз Мерко за набавката на службениот автомобил „Ауди А6“. Обвинителството за гонење на организиран криминал и корупција на 29 февруари го поднело обвинението до Кривичниот суд Скопје за злоупотреба на службената положба и овластување. Според обвинението Мерко се соочува со максимална затворска казна од 5 години.
„Иницијативата на државната комисија за спречување корупција лутала долго време по обвинителствата и конечно пристигна кај нас. Се состоеше во целосно повикување на извештај на Државниот завод за ревизија, по што следуваше макотрпна работа. Нашето обвинителство го поднесе предлогот, откако се одржа колегиум во кој се договоривме да ги сработиме предметите кои можеби се во друга надлежност а се стигнати кај нас. Ние го испративме во кривичниот суд во Скопје, кој ако се прогласи за ненадлежен, ќе го препратиме во судот во Струга“, велат од обвинителството.
Инаку за името на Рамиз Мерко, кој во три мандати управува со општина Струга, досега се врзуваа афери и обвинувања за корупција, но ниту една не добила судска завршница.
Антикорупциската комисија (ДКСК) во 2019 година за градоначалникот на Струга иницираше поведување постапка за кривично гонење пред Јавното обвинителство за набавката на луксузниот автомобил „ауди А6“ во Општина Струга.
Рамиз Мерко и неговите членови на семејството во јули 2023 година беа ставени ставени на американската „црна листа“, со што беа првите црната листа на САД по доаѓањето на новата американска амбасадорка Анџела Агелер.
Од ДКСК во 2019 година истакнаа дека градоначалиникот на Општина Струга Рамиз Мерко ја злоупотребил својата положба при набавка на четири автомобили во вкупна вредност на набавката од 114.000 евра меѓу кои и луксузниот автомобил марка „Ауди А6“ со вкупна вредност на набавката од 66.700 евра кое тој го користи. Тие тогаш посочија дека градоначалникот во неговото писмено изјаснување ги отфрла изнесените наводи.
Тие наведоа дека Мерко во своето писмено изјаснување ги отфрлува наводите со образложение за дотраен возен парк на возила на Општина Струга кој, според него, пред објавување на јавниот оглас за набавка на возила го сочинувале стари возила и тоа еден „Мерцедес Е-класа“ од 2006 година, две „Шкода Фабија“ од 2010 година, едно комбе „Фиат“ од 2010, едно „Ауди А6“ од 2011 година со блокиран мотор и една „Шкода Октавија“ од 2010 година, наведоа од ДКСК.
Од Комисијата посочија дека тој во своето изјаснување навел дека се воздржал од патувања на многу важни состаноци и средби со образложение „од други причини“, бидејќи му било срам да ја каже правата вистина дека нема возило за патување со повисоки перфорамнси, кои гарантираат сигурност и безбедност при патувањето на градоначалникот на Општината.
види ги сите денешни вести
Претседателката на ДКСК, Димитровска доби мерки за претпазливост за предметот „Адитив“
Кривичниот суд го прифати предлогот на Обвинителството за борба против организиран криминал и корупција и определи мерки за претпазливост за претседателката на Државната комисија за спречување на корупција (ДКСК), Татјана Димитровска, која е трето-осомничена во рамки на истрагата за предметот „Адитив“.
По распитот во обвинителството, Димитровска беше спроведена во Кривичниот суд, пред судија на претходна постапка заедно со уште две лица, чии имиња засега не се откриваат.
„Во однос на осомничената Т.Д. која доцна попладнево беше изведена пред судија на претходна постапка во однос на продолжување на акцијата во јавноста позната како "Адитив", по нејзино произнесување во однос на предлогот на ЈО за определување мерки за претпазливост, донесено е решение со кое се прифаќа предлогот на ОЈО ГОКК и се опредлуваат мерки за претпазливост, односно Привремено одземање на патната исправа и забрана за издавање нова и Забрана за преземање на одредени работни активности поврзани со кривичното дело“, информираа попладнево од Кривичниот суд.
Според Јавното обвинителство, „третоосомничената, како службено лице, претседател на ДКСК од мај до декември 2024 година на неповикано лице обвинето во предметот Адитив на друг начин му овозможила да му бидат достапни податоци кои претставуваат службена тајна“.
„Таа преку својот службен телефон и апликациите Viber и WhatsApp му давала податоци на обвинетиот за поведени постапки, за отворање на предмети против сега обвинетите правни и физички лица во предметот Адитив и одлуки по истите, како и податоци за проверка на имот и неговото семејство. Со своите дејствија таа открила податоци што согласно закон се сметаат за службена тајна и чие откривање може да има штетни последици како за службата, така и за постапките што се водат пред ОЈОГОКК“, се наведува во соопштението на Обвинителството објавено доцна попладнево.
Претходно од Обвинителството за гонење на организиран криминал и корупција соопштија дека во рамки на предметот „Адитив“ од прибраните докази е донесена Наредба за спроведување на истрага за уште три лица.
Предметот „Адитив“ се однесува на истрага за злоупотреба на јавни набавки и перење пари во врска со набавката на адитиви за јаглен за потребите на АД ЕСМ – Подружница РЕК Битола и РЕК Осломеј.
Во предметот се обвинети 31 физичко лице и 5 правни лица.
Според обвинителството, осомничените лица организирале и извршиле пререгистрација на правни субјекти за да ги изиграат постапките за јавна набавка, со што овозможиле одредени компании да добијат договори и да се стекнат со значителна имотна корист.
Истрагата за случајот „Адитив“ беше отворена на 10 декември минатата година.
Меѓу обвинетите во предметот се и ексдиректорот на ЕСМ, Васко Стефанов, како и неговиот претходник на функцијата, Васко Ковачевски, кој се наоѓа надвор од државата и по кого е распишана меѓународна потерница. Обвинет е и поранешниот директор на ТЕЦ „Неготино“, Небојша Стојановиќ.
Под истрага 49 лица кои давале и земале поткуп во замена за инвалидска пензија и туѓа нега
Дваесет и три лица се уапсени во вчерашната акција на полицијата која следува по повеќемесечна предистражна постапка во рамките на Основното јавно обвинителство за гонење на организиран криминал и корупција (ОЈО ГОКК). Едно лице не е достапно на органите на прогонот.
Од ОЈО ГОКК денеска (24 април) информираат дека предметниот обвинител донел Наредба за спроведување на истражна постапка против 49 лица.
Станува збор за основано сомнение за извршени низа кривични дела со кои е направена штета на државниот буџет.
„Во текот на 2023 година првоосомничената порано вработена на универзитетска клиника заедно со други двајца осомничени создале злосторничко здружение-група, која имала за цел вршење на кривични дела „Злоупотреба на службената положба и овластување“, „Примање поткуп“, „Давање поткуп“, „Примање награда за противзаконито влијание“ и „Давање награда за противзаконито влијание“, се вели во соопштението од ОЈО ГОКК.
Во меѓувреме припадници на групата станале уште деветмина осомничени од кои двајца како лекари специјалисти биле претседатели на Стручната комисија за издавање на наод, оцена и мислење за потребата од помош и нега од друго лице во рамките на ЈЗУ Општа болница Велес, а останатите лекари специјалисти вработени во ЈЗУ Општа болница Велес, Универзитетска клиника за неврологија Скопје, ПЗУ – ординација за општа медицина и специјалистички ординации од Велес, адвокат од Велес и службено лице во ЈУ Центар за социјална работа – Тетово.
„Заради стекнување со противправна имотна корист, криминалната група од лица баратели на социјалното право помош и нега од друго лице – туѓа нега, барала и примала парични средства – поткуп или награда за противзаконито влијание. За возврат организаторите и припадниците на криминалната група преземале противправни дејствија на директно или индиректно давање или нудење на парични награди, поткуп на службени лица, како и противправни дејствија на директно или индиректно примање на парични награди или поткуп со што на барателите им обезбедувале исполнување на условите за успешно водење на постапката за стекнување со право на туѓа нега. За остварување на право на туѓа нега тие ги пријавувале барателите што давале поткуп кај матични доктори кои вршат дејност во Велес со цел надлежна за постапување да биде Стручната комисија за издавање на наод оцена и мислење при ЈЗУ „Општа болница Велес“ чиј поранешен и актуелен претседател на комисијата се членови на групата“, информира ОЈО ГОКК.
На 3 матични лекарки им се става на товар кривичното дело – Злоупотреба на службената положба и овластување, 16 осомничени кои понудиле и дале поткуп заради обезбедување на медицинска документација со невистинита содржина се осомничени дека сториле кривично дело - Давање награда за противзаконито влијание и кривично дело - Давање поткуп, додека на 9 осомничени кои се согласиле и дале парична награда на товар им се става кривичното дело – Давање награда за противзаконито влијание.
Припадниците на групите освен за кривично дело Злосторничко здружување се осомничени и за други кривични дела и тоа: 5 лица за кривично дело – Давање поткуп, Примање награда за противзаконито влијание, Давање награда за противзаконито влијание и Злоупотреба на службена положба и овластување, 4 лица за кривично дело - Давање поткуп, Примање награда за противзаконито влијание и Давање награда за противзаконито влијание, едно лице за кривично дело-Примање награда за противзаконито влијание, Давање награда за противзаконито влијание и Злоупотреба на службена положба и овластување, две лица за Злоупотреба на службена положба и овластување, Примање поткуп и Примање награда за противзаконито влијание, едно лице за кривично дело – Злоупотреба на службена положба и овластување, две лица Злоупотреба на службена положба и овластување и Примање награда за противзаконито влијание и две лица за Злоупотреба на службена положба и овластување, три лица за Примање награда за противзаконито влијание и Давање награда за противзаконито влијание и едно лице за Злоупотреба на службена положба и овластување, Примање поткуп, Давање награда за противзаконито влијание и Примање награда за противзаконито влијание.
Осомничените се изведени пред судија на претходна постапка во Основниот кривичен суд.
За 12 осомничени обвинителството предложи определување на мерка притвор, додека за 3 лица мерка куќен притвор. За останатите лица се предложени мерки на претпазливост.
Седумнаесет општини не аплицирале на вториот повик за пари од унгарскиот кредит
Вкупно 450 апликативни формулари од 63 општини се доставени до архивата на Министерството за локална самоуправа на вториот јавен повик за поддршка на инфраструктурни општински проекти.
Како што информира министерот за локална самоуправа Златко Перински, 36 општини аплицирале со проекти во вредност од максимумот на финансиски средства кои им следуваат согласно формулата по глава на жител, 27 општини имаат можност да аплицираат со уште проекти до максимум предвидената сума, а 17 општини воопшто немаат поднесено апликации.
Воопшто не аплицирале општините Сарај, Центар, Чаир, Шуто Оризари, Липково, Пробиштип, Валандово, Росоман, Боговиње, Врапчиште, Маврово Ростуше, Теарце, Дебар, Струга, Битола, Крушево и Долнени.
„Апелираме до сите локални самоуправи да ја искористат оваа можност и да го запазат законскиот предвиден рок за пријавување кој истекува на 30 април годинава“, рече Перински.
Тој вели дека во вториот јавен повик биле предвидени и ставени на располагање до 15 милијарди денари за капитални и инфраструктурни проекти.
„Се покажа од првиот повик дека најголем интерес има за подобрување на патната инфраструктура, бидејќи од 288 проекти дури 225 се за подобрување на патната инфраструктура и се реализираат преку Министерството за транспорт. Согласно информациите кои ги имаме и во вториот јавен повик во најголем дел фокусот на локалните самоуправи е во делот на подобрување на патната инфраструктура“, рече Перински во одговор на новинарско прашање.
Од досега пристигнатите 450 апликации на вториот јавен повик, повеќе од 330 се за подобрување на патната инфраструктура.
„Има и проекти кои се за подобрување на квалитетот на животот на граѓаните во делот на животната средина, изградба на училишта, градинки спортски сали“, истакна Перински.
Роковите за изведба на проектите од првиот јавен повик ги одредуваат локалните самоуправи.
Од првиот јавен повик 251 проект е со склучен договор, 140 се веќе воведени во работа, 30 се целосно завршени, 33 се во постапка на тендерирање и само за четири воопшто не е започната постапка, истакна Перински и појасни дека кај дел од овие четири проекти била почната постапка која се поништила заради одредени фактори и сега повторно треба да се обнови.
Сите пари кои им се доделуваат за реализација на проектите на општините се од кредитот кој Северна Македонија го зеде од Унгарија. Вкупно се задолжи за милијарда евра, од кои 250 милиони се предвидени за општински проекти.
Таравари за злоупотребите во здравството: Сите што грешат, треба да одговараат
Како Министерство за здравство стоиме на располагање за да се исчисти криминалот и корупцијата во здравство, порача министерот за здравство, Арбен Таравари, кој во при посетата на кумановската болница одговараше на новинарско прашање за вчерашната акција на полицијата во врска со незаконско доделување на инвалидски пензии.
Таравари потсети дека претходно имаше и случај во државниот Геријатриски центар, кога директорот беше фатен при земање на мито од 20 000 евра.
„Се случи во Геријатрија една акција, тој беше член на нашата партија, утредента го разрешив од директор и задутре го исклучивме од партија. Сите што грешат треба да одговараат, ние ниту сме полиција, ниту јавно обвинителство, ниту ги следиме луѓето. Меѓутоа ги поздравувам сите овие акции,“ изјави Таравари.
Тој посочи дека има информации за злоупотреби од страна на вработени во здравствените установи, но, како што вели, не сака да генерализира оти не се сите доктори такви.
„Но, таму кај што постојат сомнежи ги поддржувам и стоиме како министерство за здравство да помогнеме на сите вакви акции за да се исчисти криминалот и корупцијата“, истакна Таравари.
Во вчерашната полициска акција по наредба на обвинител од Основното јавно обвинителство за гонење на организиран криминал и корупција беа извршени неколку претреси на различни локации поради сомнение за долгогодишна злоупотреба на системот за доделување надомест за помош и нега од друго лице и незаконско доделување право на инвалидска пензија. Неофицијално, во акцијата биле опфатени педесетина лица.
Локалните избори ќе се распишат на крајот на јули или почетокот на август
Претседателот на Собранието, Африм Гаши соопшти дека кон крајот на јули или почеток на август треба да се распишат локалните избори. Информира дека е побарано да се одржи јавна расправа во Собранието околу измените на Законот за локална самоуправа кои од Министерството за локална самоуправа се најавуваат веќе одреден период.
Во коментар за одлуката на крилото на Алијанса на Албанците на Арбен Таравари да одат сами на локалните избори, а не со заеднички листи за кандидати за градоначалници и советници со коалицијата Влен, Гаши уверува дека во моментов нема нова ситуација во однос на прераспределба на пратеници во други групи.
„Сега засега во Собранието е статус кво во однос на нова распределба на пратениците, се е како што било. Значи, сите пратенички групи кои се формирале на почетокот на овој нов собраниски состав продолжуваат да работат, а ако имаме нови промени ќе треба тоа официјално да го достават до службите и до мене, за да ги информирам потоа другите пратенички групи и пратенци“, рече Гаши на денешниот брифинг со новинарите.
Собранискиот спикер вели дека на следната пленарна седница која треба да се одржи на 29 април се очекува да биде ставена интерпелацијата за министерот за внатрешни работи Панче Тошковски, поднесена од пратеничката група на Левица.
Оваа партија смета дека причина за интерпелацијата е тоа што „Тошковски, од позиција на министер за внатрешни работи, грубо ја занемарил и несоодветно ја извршувал својата јавна функција, постапувајќи нестручно, непрофесионално, несовесно и неодговорно поради што имало низа противзаконски дејствија, скандали и кадрови поместувања во МВР“.
Гаши го коментираше и евроинтегративниот процес на државата. Тој нагласи дека има нов политички моментум за зголемена волја на државава да го забрза евроинтеграциски процес. Спикерот потенцира дека државата има многу пријатели кои сакаат да помогнат и се надева дека ќе се надмине препреката, односно гласањето на уставните измени.
Последици од рускиот ракетен напад врз Киев
Ранета жена седи покрај нејзината куќа во Киев, по рускиот напад
Русија изврши голем напад со проектили и беспилотни летала на повеќе локации низ Украина, срамнувајќи цели станбени згради во Киев. Убиени се најмалку девет лица, а ранети голем број други низ целата земја.
Федерален судија нареди чекори за поништување на затворањето на „Гласот на Америка“
Судија на федералниот суд во Вашингтон ѝ нареди на администрацијата на Трамп да ги поништи обидите насочени кон принудно затворање на Гласот на Америка (VOA), кој беше затворен минатиот месец, во потег што телевизијата го нарече незаконски.
Американскиот окружен судија Ројс Ламберт доцна на 22 април донесе прелиминарна наредба во која се вели дека официјалните лица мора да ги „преземат сите неопходни чекори“ за да ги вратат вработените и дописниците на нивните позиции во Гласот на Америка и да го вратат финансирањето одобрено од Конгресот на две други телевизии финансирани од владата на САД - и радиодифузерите на радио Слободна Азија и Блискиот Исток.
Ламберт, кај кого се шест тужби од вработени и изведувачи погодени од затворањето на американската Агенција за глобални медиуми (USAGM), која ги надгледува федералните радиодифузери, исто така им нареди на медиумите да даваат месечни извештаи за статусот што покажуваат дека USAGM ја почитува наредбата за да им дозволи на станиците да „обезбедат вести кои се постојано сеопфатни, доверливи, објективни и авторски“.
USAGM не одговори јавно на судската одлука.
Гласот на Америка минатиот месец поднесе тужба против USAGM во која се вели дека администрацијата на Трамп презела пристап „со моторна пила“ преку извршна наредба со која и наложи на Гласот на Амеика и на шест други федерални агенции „да го намалат извршувањето на нивните законски функции, да го намалат персоналот на минимум и да дејствуваат во согласност со закон“.
USAGM потоа остави повеќе од 1000 вработени на одмор и раскина договори со околу 600 работници, принудувајќи го Гласот на Америка да ги прекине своите преноси за прв пат откако беше основан во 1942 година.
USAGM во случајот тврдеше дека не е донесена „конечна одлука“ за иднината на Гласот на Америка и дека тужбите треба да се третираат како „спорови за вработување“ со оние работници кои биле прекинати.
Радио Слободна Европа/Радио Либерти, исто така, поднесе тужба против USAGM „за да се избегне непоправлива штета“ на радиодифузерот поради задржувањето на нејзиниот грант одобрен од Конгресот, како дел од напорите на Агенцијата да го прекине финансирањето на РСЕ.
Случајот на РСЕ продолжува да се води на суд.
Дробњак - Нова, вистинска перспектива за проширување во 2030
2030 година ќе биде година на големо проширување, порача поранешниот главен преговарач на Хрватска со Европската Унија, Владимир Дробњак кој изминатите два дена во Скопје зборуваше и во Собранието и со претставниците на Владата.
Според него, оваа перспектива за членство што се нуди сега е вистинска, можна да се исполни и видлива, а остварувањето на реформската агенда треба да го намали јазот дотогаш меѓу земјите од Западен Балкан и Унијата. Тоа е особено од интерес на Европската Унија во контекст на менувањето на меѓународниот поредок.
Споредувајќи го искуството на Хрватска со македонското искуство и билатералните спорови Дробњак смета дека фокусот сега треба да биде на реформите.
„2030 е веднаш зад аголот, а има огромна работа што треба да се спроведе“, рече Дробњак во македонското Собрание, посочувајќи дека за Црна Гора се очекува да ги заврши преговорите во 2028 година, а за Албанија до 2030 година, а тоа треба да најде одраз во финансиската рамка на ЕУ за 2028-2034 година, во смисла Северна Македонија треба да се погрижи да се најде во неа.
И пратениците во македонското Собрание и Владата на демонстрираа посветеност на европскиот пат на земјата.
Мицкоски: Мора да го урнеме системот на корупција
Премиерот Христијан Мицкоски како најголем предизвик ги посочи корупцијата иреформите во правосудството.
„Да бидеме отворени и искрени – корупцијата кај нас не е само појава, таа е дел од начинот на функционирање на одредени делови од општеството. Таа е систем кој се штити сам себе. Ако сакаме во Европската Унија, ако сакаме раст мора да го урнеме тој систем. Реформите во правосудниот сектор се најитни, без нив сите други реформи се безвредни“, изјави Мицкоски.
За лидерот на опозициската СДСМ Венко Филипче најважно е да се постигне консензус.
„Време е да гледаме низ една друга перспектива. Да влеземе, да работиме и да се бориме што и да е на масата. Каква и да е пречка биде исправена пред нас мораме да се обединиме поради тоа што сме заедно ги обединуваме сите капацитети и нема пречка што не можеме да ја совладаме“, рече Филипче на дебатата во Собранието.
Она што Дробњак им го нагласуваше и на власта и на опозицијата во Скопје е дека успехот на Хрватска во преговорите со ЕУ и членството се должи на консензусот меѓу сите политички партии и што тие во никој случај не ги користеле овие преговори за политички поени.
„Сепак, реформите не се само прашање на закони, тие се прашање на лидерство. Потребна е храброст за да се прифати транспарентноста, интегритетот и отчетноста“, рече министерот за европски прашања, Орхан Муртезани,
ЕУ не дава гаранции
Она што треба да го прави Северна Македонија е да ги заврши задачите од реформската агенда која има краен рок 2027 година, а со тоа би завршила и 60 отсто од преговорите со ЕУ.
Но блокадата од Бугарија останува и пристапните преговори Северна Македонија ќе усвои измени на Уставот со внесување на бугарското малцинство во Преамбулата. Брисел не дава никакви гаранции дека и во тој случај нема да има нови блокади од Бугарија.
„Никој не може да и даде гаранции на Северна Македонија дека ако сега го смени Уставот, нема повеќе да има пречки на европскиот пат“, изјави еврокомесарката за проширување Марта Кос во интервју за Европската новинска агенција минатата недела.
Поранешниот хрватски преговарач Дробњак затоа посебно внимание посвети на принципот на условување на преговорите оценувајќи дека се додека една земја не стане членка на ЕУ не е на иста маса со земјите во неа. Тој спомена дека и Хрватска имаше повеќе услови за да влезе во Унијата разделувајќи ги во три групи- решавање на статусот на поморската граница со Италија, барањата од Меѓународниот суд во Хаг за Анте Готовина и решавање на цел пакет погранични прашања со Словенија.
„Со влезот во ЕУ проблемите кои изгледаа огромни претходно станаа само рутински“, заклучи Дробњак.
Тоа што Северна Македонија е првата земја од Западен Балкан која ги доби првите средства во износ од 52,4 милиони евра од предфинасирањето во рамките Планот за раст, во Брисел се толкува како позитивен сигнал за напредок.
За Северна Македонија се предвидени вкупно 750 милиони евра, доколку Владата успешно се придржува кон домашните реформи кои самата ги ветила пред европските институции.
Според последното истражување на јавното мислење на Институтот за демократија Социетас Цивилис, се бележи пад на оптимизмот за подготвеноста на Европската Унија да ги прими земјите од Западен Балкан како членки до 2030 година.
Граѓаните остануваат поделени во ставовите за следните чекори во евроинтегративниот процес. Само 20% од граѓаните сметаат дека уставни измени треба да се неопходниот следен чекор, а 21% од граѓаните сметаат дека со процесот треба да се запре. Ако во 2023 година половината испитаници во исѕтражувањето на институтот за демократија, верувале дека тоа ќе се случи, во декември 2024 година нивниот број се намалил на 30 проценти.
Косовските власти повторно ги затвораат српските институции
Косовските власти ги затворија канцелариите на Пензиското инвалидско осигурување, Националната служба за вработување и Републичкиот фонд за здравствено осигурување во Лепосавиќ на северот на Косово, како и Јавното претпријатие за комунални услуги во Штрпце, општина со српско мнозинство на југот од Косово.
Сите овие институции работат во рамките на српскиот систем, кој Косово го смета за нелегален и паралелен.
Заменик-директорот на косовската полиција за северниот регион, Ветон Елшани за Радио Слободна Европа објасни дека тие им помогнале на општинските власти во Лепосавиќ да ги вратат нивните простории и дека за време на операцијата биле откриени „нелегални активности“.
„Се консултиравме со обвинителот на Националната служба за вработување и беше отворен случај за фалсификување документи. Ќе интервјуираме еден човек во врска со тој случај. Што се однесува до Фондот за здравствено осигурување, колку што знам, општината им даде една недела да ги напуштат своите простории“, изјави Елшани.
Претходно, вршителката на должноста министер за економија на Косово, Артане Ризваноли, објави дека Јавното комунално претпријатие во Штрпце е затворено.
„За ниту една паралелна институција на Србија нема место во Република Косово. Никаков паралелизам на нашите институции и поддирективи на Белград нема да постојат на територијата на нашата земја“, напиша Ризваноли во објава на својот Фејсбук профил.
Српска листа: Косовските власти се обидуваат да му го отежнат животот на српскиот народ
Српска листа, најголемата партија на Србите во Косово, која има поддршка од Белград, објави дека со затворањето на српските институции во Лепосавиќ и Штрпце, косовските власти се обидуваат „да му го отежнат животот на српскиот народ во Косово преку притисок, провокации и институционално насилство“.
Тие изјавија дека акцијата на затворање на српските институции „претставува директно кршење на сите договори, вклучително и на Бриселскиот договор“.
„Упадот во згради нема да ја спречи државата Србија да биде со сите вработени и корисници на услугите што споменатите институции им ги обезбедуваа на сите граѓани, без оглед на националноста“, се наведува во соопштението на Српска листа.
Српскиот претседател Александар Вучиќ кон средината на септември минатата година изјави дека нема да ги укине институциите за Косово и најави отворање на „модерни канцеларии“ на српската страна од граничните премини.
Тој вети дека сите работници во затворените институции ќе продолжат да примаат плати и дека ќе им обезбеди секаков вид поддршка.
Институциите во српскиот систем по 1999 година функционираа и во областите каде што живеат Срби. Косово ги смета за нелегални, но сепак беа толерирани.
Сепак, Владата на Косово, предводена од Албин Курти, почна да ги затвора на почетокот на 2024 година. Досега беа затворени Привремените општински тела, Центрите за социјална работа, Поштата на Србија, Поштенската банка, Јавните претпријатија.
„И се заблагодарувам на косовската полиција за нивната поддршка и во исто време ги молам и полицијата и Обвинителството итно да ги истражат штетите и придобивките предизвикани од нелегалната активност на овие паралелни институцин на Србија“, додаде Ризваноли.
Од друга страна, Канцеларијата за Косово во Владата на Србија објави дека косовските власти „нелегално ги затвораат малкуте преостанати српски институции во Република Косово“.
„Сето ова се случува пред очите на Меѓународната заедница, која молчешкум го набљудува теророт врз Србите и понатамошниот прогон на нашиот народ“, се вели во соопштението, во кое се наведува дека се очекува реакцијата на Меѓународната заедница, особено на Европската Унија, со чие посредство се води дијалогот меѓу Приштина и Белград за нормализација на односите.
Затворањето на институциите што работат во српскиот систем наидува на негодување од страна на српската заедница, но и на критики од Меѓународната заедница, со образложение дека „едностраните и некоординираните дејствија“ можат да ги зголемат тензиите на терен.
Исто така, на почетокот на оваа година, ЕУ објави дека статусот на структурите поддржани од Србија треба да се реши преку дијалог.
Пет пациенти се враќаат дома, на лекување во странство остануваат 38
Пет пациенти од повредените во пожарот во дискотеката „Пулс“ во Кочани денеска (23 април) ќе се вратат од лекување од Клиничкиот центар во Србија. Потоа во согласност со протоколот тројца ќе бидат под опсервација на Клиниката за пулмологија, а по еден пациент на Клиниката за пластична хирургија и во Хируршката клиника „Св.Наум Охридски“.
Како што информира Министерството за здравство, во текот на вчерашниот ден еден пациент се врати од лекување од Хрватска и се наоѓа под опсервација на Клиниката за пластична хирургија.
Во странските медицински центри остануваат на лекување 38 пациенти.
„Во земјава во моментот се лекуваат седум пациенти, од кои во Хируршка клиника „Св.Наум Охридски“ се хоспитализирани вкупно 4 пациенти, на Клиниката за пластична хирургија еден пациент, а во приватната болница Систина двајца пациенти“, се наведува во соопштението од ресорното министерство.
Од Министерството за здравство велат дека континуирано ја следат состојбата со повредените пациенти, со цел обезбедување најдобар можен третман, како и натамошна рехабилитација.
Пожарот во дискотеката „Пулс“ во Кочани избувна рано наутро на 16 март.
Во трагедијата животот го загубија 62 лица, а близу 200 беа повредени.
Мултимедија
Најпосетени
Што треба да знаете