Вести
Израелските специјални сили ослободија двајца заложници во рација во Рафа
Израелската армија објави дека ослободила двајца заложници за време на рацијата на нејзините специјални сили ноќта на 11 февруари во Рафа во јужниот дел на Појасот Газа.
Заложниците биле пренесени во болницата Шеба во централниот дел на Израел, каде што биле прегледани и утврдено е дека се во добра состојба.
Во објава на социјалните мрежи, израелските одбранбени сили (ИДФ) соопштија дека за време на ноќната „заедничка операција на ИД, ИСА (Израелската безбедносна агенција или Шин Бет) и израелската полиција, двајца израелски заложници биле спасени од Кибуц Нир Јицак: Фернандо Симон Марман (60) и Луис Хар (70)“.
Според соопштението на армијата, тие биле киднапирани на 7 октомври минатата година во напад на Хамас, организација која САД и Европската Унија ја сметаат за терористичка.
Израелскиот министер за одбрана Јоав Галант на мрежата Х објави дека станува збор за „импресивна операција за ослободување“. Тој додаде дека акцијата ја следел од Командниот центар заедно со премиерот Бенјамин Нетанјаху и високи воени команданти.
„Тоа беше многу сложена операција“, изјави портпаролот на израелската армија, полковник Ричард Хехт.
„Долго работиме на оваа операција. Ги чекавме соодветните услови“, изјави тој и рече дека заложниците се чуваат на вториот кат од зградата во која израелските сили упаднаа под силен оган од соседните згради.
„Многу сум среќен што можам да објавам дека оваа ноќ двајца ослободени заложници слетаа овде во Медицинскиот центар Шеба, најголемата израелска болница“, рече проф. Арнон Афек, директор на општата болница Шеба.
Тие се примени во нашата Итна помош, а првите прегледи ги направи нашиот персонал од Брзата помош и тие се во стабилна состојба и се згрижени“, рече тој.
За време на инвазијата на јужен Израел во октомври, милитантите на Хамас, која ЕУ и САД ја прогласија за терористичка организација, убија околу 1200 луѓе, а околу 240 од нив киднапираа и ги одведоа во Газа.
Одговорот на Израел на нападот на Хамас предизвика големи разурнувања во Газа. Палестинското Министерство за здравство, кое е под контрола на Хамас, објави дека од 7 октомври досега се убиени повеќе од 27 500 луѓе.
Најмалку 60 луѓе загинаа вечерта на 11 февруари во израелското гранатирање на Рафа, град кој се наоѓа на самиот југ од Појасот Газа и во близина на египетската граница.
Во последните месеци, Рафа стана град во кој се населиле повеќето палестински бегалци кои останале без домови по израелското бомбардирање на северниот дел на Појасот Газа, а според проценките на ОН, во него моментално има 1,4 милиони луѓе. .
Нападот на Рафа се случи иако Хамас претходно најави во текот на денот на 11 февруари дека офанзивата врз тој град ќе го уништи секој договор во врска со ослободувањето на заложниците кои се уште се во заробеништво од 7 октомври минатата година.
Соединетите Држави, главниот сојузник на Израел, исто така се изјаснија против офанзивата во Рафа.
види ги сите денешни вести
Радмила Шекеринска избрана за заменик генерален секретар на НАТО
НАТО објави дека поранешната министерка за одбрана Радмила Шекеринска ќе стане нов заменик генерален секретар на воената алијанса.
„Среќен сум што можам да го објавам именувањето на Радмила Шекеринска за заменик генерален секретар. Таа е вистински посветена на НАТО, ја знае работата што е потребна за приклучување во Алијансата и што значи да се биде полноправна членка. Со нетрпение очекувам да работам со неа кога ќе ја преземе оваа витална улога“, изјави шефот на Алијансата, Марк Руте.
Пополнувањето на заменичката позиција беше еден од приоритетите на генералниот секретар Марк Руте, кој ја зазеде функцијата на 1 октомври.
Неколку функционери на НАТО, кои зборуваа под услов да останат анонимни, за Радио Слободна Европа изјавија дека имало силна желба заменикот да биде од Централна и Источна Европа и да биде жена.
Меѓу другите кандидати беа поранешната бугарска министерка за надворешни работи Марија Габриел, поранешната претседателка на Хрватска Колинда Грабар-Китаровиќ и Оливера Ињац, која беше министерка за одбрана на Црна Гора 2020-2022 година.
Шекеринска, која беше министерка за одбрана на Северна Македонија од 2017-2022 година, го надгледуваше пристапот на нејзината земја во НАТО во 2020 година. Таа ќе го замени вршителот на должноста заменик генерален секретар на НАТО Борис Руге, кој привремено ја презеде функцијата, откако тогашниот заменик генерален секретар Мирчеа Џоана објави дека ќе се кандидира за претседател на Романија.
Шекеринска ќе биде највисокиот функционер на НАТО од регионот на Западен Балкан, надвор од Европската Унија. Таа ќе ја преземе функцијата до крајот на годината.
Шекеринска е поранешна министерка за одбрана. Од 2002 до 2006 година беше и заменик претседател на Владата на РМ задолжена за европски интеграции. Во моментот е потпретседател на Партијата на европските социјалисти.
Примарната улога на заменикот на генералниот секретар е да го заменува шефот и да претседава со состаноците на 32-та амбасадори во Северноатлантскиот совет двапати неделно или на кој било итен состанок, вклучувајќи го и Советот НАТО-Украина.
Полицијата во Тбилиси ги растури шаторите на демонстрантите кои бараат нови избори
Полицијата во Тбилиси го растури шаторскиот камп што демонстрантите го поставија на главната улица во знак на протест поради резултатите од парламентарните избори минатиот месец и бараат ново гласање.
По изборите одржани на 26 октомври партијата Грузиски сон остана на власт, но противниците тврдат дека гласањето било наместено. Таа партија блиска до Русија на тој начин обезбеди четврти мандат на власт.
Многу Грузијци ги сметаа изборите како референдум за обидот на земјата да се приклучи на Европската унија. Оттогаш се одржаа неколку големи протести.
Кога поставија шаторски камп, демонстрантите ветија дека ќе останат деноноќно барајќи нови парламентарни избори.
Кога полицијата почна да ги растерува, настана тепачка и неколку демонстранти беа приведени. Некои од демонстрантите носеа знамиња на Европската Унија.
Претседателката на Грузија, Саломе Зурабишвили ги отфрли официјалните резултати и смета дека Грузија е жртва на руски притисок за да не влезе во Европската Унија.
Руте: Најдобро е земјите кои и даваат оружје на Украина да не поставуваат ограничувања за користење
Најдобро е земјите кои обезбедуваат оружје за Украина да не поставуваат ограничувања за тоа како силите на Киев можат да го користат, изјави генералниот секретар на НАТО, Марк Руте, при пристигнувањето на состанокот на министрите за одбрана на ЕУ во Брисел.
„Секој сојузник донесува одлуки за ова прашање независно“, рече Руте и додаде:
„Денеска ќе разговараме како Украина може да победи, а за тоа се потребни повеќе пари и помош“, истакна Руте.
Според него, тоа е уште попотребно по вклучувањето на севернокорејските војници во воените дејствија на руската страна и поддршката за Москва од Кина и Иран.
Според Руте, рускиот претседател Владимир Путин му се оддолжува на Пјонгјанг со обезбедување ракетна технологија, а тоа претставува смртна закана не само за Европа, туку и за Јужна Кореја, Јапонија и САД.
„Треба да го зголемиме военото производство, НАТО и ЕУ тесно соработуваат на ова, два проценти од БДП трошоците за одбрана и одвраќање не се доволни. Плановите на Путин не смеат да успеат, Украина мора да надвладее“, сумираше Руте по повод 1000 дена од почетокот на руската воена инвазија на украинска почва.
Путин потпиша декрет дека нуклеарното оружје е последната мерка за заштита на суверенитетот
Рускиот претседател Владимир Путин потпиша декрет со кој нуклеарното оружје останува последната линија на одбраната.
Во новата уредба „Основи на геополитиката во областа на нуклеарното задржување“ се прецизирани параметрите под кои може да се користи ова оружје, пренесоа руските медиуми.
„Државната политика во областа на нуклеарното ограничување е од одбранбена природа, насочена кон одржување на потенцијалот на нуклеарните сили на ниво доволно за да се обезбеди нуклеарно ограничување и да се гарантира заштитата на суверенитетот и територијалниот интегритет на државата“, се наведува во документот.
Исто така, во него се додава дека нуклеарниот одговор може да се активира во случај на напад на Белорусија, по што ќе следи масовен напад од воени авиони, крстосувачки ракети, беспилотни летала и други авиони кои летаат над руските граници.
Потегот на Путин доаѓа само два дена откако медиумите објавија дека администрацијата на американскиот претседател Џо Бајден и дозволила на Украина да користи ракети со долг дострел за напади длабоко на руска територија.
Според извештаите, Бајден ја донел одлуката откако дознал дека војници од Северна Кореја наводно пристигнале во регионот Курск.
Руските власти предупредија дека таквите потези може да доведат до избувнување на Трета светска војна.
Шест лица, меѓу кои и едно дете, загинаа во нов руски напад врз Суми
Шест лица, меѓу кои едно дете, беа убиени, а 12 други беа ранети во текот на ноќта во нов руски напад во градот Хлухив во регионот Суми во Украина, објави воената администрација на регионот рано на 19 ноември.
Оттаму додаваат дека нападот бил насочен кон студентски дом во градот.
Властите соопштија дека спасувачките операции се во тек и дека се уште има луѓе под урнатините.
На 18 ноември, ракетен напад опустоши станбена зграда во градот Суми, 40 километри од руската граница, при што според властите загинаа 11 лица, меѓу кои две деца, а 89 беа повредени.
Русија ја почна инвазијата на Украина на 24 февруари 2022 година.
ЕУ и Северна Македонија ќе потпишат Договор за безбедносно и одбранбено партнерство
Министерот за надворешни работи и надворешна трговија Тимчо Муцунски денеска (19 ноември) во Брисел заедно со високиот претставник на ЕУ за надворешна политика и безбедност Жосеп Борел ќе потпишат Договор за безбедносно и одбранбено партнерство меѓу Република Северна Македонија и Европската Унија.
Се очекува овој Договор за партнерство да ја зајакне отпорноста на земјата и да овозможи заедничко справување со безбедносните предизвици и поефикасна соработка во сферата на безбедноста и одбраната.
Церемонија на потпишување на Договорот, ќе се одржи на маргините на заседанието на Советот за надворешни работи на ЕУ на ниво на министри за одбрана, на кое ќе се расправа за поддршката на Унијата за Украина и за одбранбената подготвеност на блокот.
Инаку, како дел од досегашната соработка ЕУ во рамки на Европскиот мировен фонд (ЕПФ) во септември годинава одобри 13 милиони евра помош наменети за зајакнување на капацитетите и способностите на Армијата на Република Северна Македонија (АРСМ).
Доделените средства се наменети за набавка на технологии за разузнавање, надзор, извидување, електронско војување и сигнално разузнавање, на логистичка и инженерска опрема, како и на комуникациски и информациски системи, а со нив ќе се обезбеди и техничка обука за користење на опремата.
Како што соопшти Советот на ЕУ, овие средства ќе ги зајакнат македонските капацитети за нејзино учество во операциите и мисиите во рамки на заедничката безбедносна и одбранбена политика на Унијата, како и други меѓународни мисии и таа помош дополнително ја илустрира зголемената поврзаноста на блокот со земјава во областа на безбедноста и одбраната.
Преку Европскиот мировен фонд (ЕПФ), ЕУ финансира активности наменети за зајакнување на капацитетите на трети држави и регионални и меѓународни организации поврзани со воени и одбранбени прашања. Фондот е основан во март 2021 година со цел да овозможи финансирање на активности во рамките на заедничката надворешна и безбедносна политика на ЕУ, насочени кон спречување конфликти, зачувување на мирот и зајакнување на меѓународната безбедност и стабилност.
Почнува амандманска расправа за Предлог-буџетот за 2025
Со претрес по амандмани за Предлог-буџетот за 2025 година, денеска (19 ноември) треба да продолжи комисиската расправа во Собранито.
Расправата за Буџетот за следната година на собраниската Комисија за финансирање и буџет трае 10 дена и треба да заврши најдоцна до 30 ноември по што продолжува на пленарна седница.
За Предлог–буџетот за 2025 година се поднесени вкупно 308 амандмани од кои 204 од опозициската СДСМ. Согласно законот, Буџетот за 2025 година треба да биде изгласан до 31 декември.
На четвртиот ден од собраниската комисиска расправа со кој вчера беше исцпрен општиот претрес, пратениците од власта и опозицијата ги спротивставија ставовите. Според едните, буџетот е развоен и домаќински, а според другите е нереален, покажува немање визија и треба да се врати на доработка во Владата.
Со Предлог-буџетот за 2025 година, вкупните приходи се планирани на ниво од 358,8 милијарди денари, а расходите на ниво од 400,2 милијарди денари. Буџетскиот дефицит е проектиран во апсолутен износ од 41350 милиони денари или на ниво од 4 проценти од планираниот БДП, а се предвидува раст на економијата од 3,7 проценти.
Трамп го потврди планот за воведување вонредна состојба и депортација на мигрантите
Новоизбраниот американски претседател Доналд Трамп потврди дека планира да воведе вонредна состојба поради безбедноста на границата и дека има намера да ја искористи американската војска за да изврши масовно депортирање на мигранти без документи.
Имиграцијата беше главното прашање во неговата изборна кампања, а Трамп вети дека ќе депортира милиони луѓе и ќе ја стабилизира границата со Мексико, откако рекорден број мигранти илегално влегле во земјата за време на администрацијата на претседателот Џо Бајден, пишува Франс прес.
На својата социјална мрежа „Truth Social“, Трамп сподели објава на конзервативен активист кој рече дека новоизбраниот претседател „е подготвен да воведе вонредна состојба и ќе користи воени средства за да ја запре инвазијата од времето на Бајден преку програмата за масовно депортирање“.
Освен што ја сподели објавата, Трамп напиша: „Вистина“.
Трамп се враќа на власт по победата на демократската потпретседателка Камала Харис на претседателските избори на 5 ноември.
Тој ги објави имињата на кандидатите за плановите на неговиот кабинет, од кои многумина се залагаа за цврст став кон мигрантите и го избра Том Хоман, поранешниот в.д. директор за имиграција и царинско спроведување (ICE) како највисок службеник задолжен за границата.
Хоман се појави на Националната конвенција на Републиканците во јули, кога им рече на поддржувачите:
„Имам порака за милионите илегални имигранти што Џо Бајден ги пушти во земјата: подобро почнете да се пакувате сега“.
Властите проценуваат дека околу 11 милиони луѓе живеат во САД без документи. Се очекува дека планот на Трамп за депортации би можел директно да погоди околу 20 милиони семејства, потсетува АФП.
Додека американската влада со години има проблеми во полициската контрола на јужната граница со Мексико, Трамп ги преувеличува овие грижи тврдејќи дека е во тек „инвазија“ на мигранти.
За време на кампањата, Трамп постојано ги критикуваше мигрантите кои влегуваат во земјата без потребните документи, користејќи запалива реторика дека странците ја „трујат крвта“ на Соединетите Држави и ја доведуваат во заблуда статистиката и политиките за имиграција, пренесува АФП.
Трамп не даде никакви детали за тоа како ќе ја спроведе репресијата против нерегуларната миграција, но за време на кампањата тој постојано ветуваше дека ќе го реактивира Законот за надворешни непријатели од 1798 година за да ги забрза депортациите.
Критичарите велат дека законот е застарен и посочуваат дека последен пат бил користен за време на Втората светска војна, кога Јапонците во САД биле затворени во логори за интернација без соодветна постапка.
Бројот на мигранти кои нередовно ја минуваат границата и се пресретнати од агенти на американската гранична патрола сега е ист како и во 2020 година, последната година од првиот мандат на Трамп. Рекорден број на нерегуларни гранични премини - 250 000 е забележан во декември 2023 година.
Четворица мртви, 18 ранети во израелски напад врз Бејрут
Во израелски воздушен напад врз населба во централен Бејрут во понеделникот (18 ноември) загинаа четири лица, соопшти либанското Министерство за здравство, втор ден по ред откако Израел гаѓаше цели во главниот град на Либан во неговата кампања против Хезболах.
„Чад се издигна од местото на нападот во областа Зукак ал Блат, на кратко растојание од централниот округ на Бејрут каде се наоѓа седиштето на либанската влада. Во нападот се повредени 18 лица“, соопшти Министерството.
Израел ги интензивираше своите бомбардирања на цели во и околу либанскиот главен град во текот на изминатата недела, ескалација што се совпаѓа со знаци на напредок во дипломатските напори предводени од САД за посредување за прекин на огнот.
Од крајот на септември, Израел успеа да му нанесе голема штета на Хезболах со атентат на неговиот водач Саид Хасан Насрала, со бомбардирање големи области на Либан со воздушни напади и испраќање војници во јужен Либан. Хезболах, од друга страна, продолжи да истрелува ракети кон северниот дел на Израел, каде сирените повторно се огласија во понеделникот.
Инаку Хезболах е и вооружена група и политичка партија која контролира голем дел од јужен Либан. ЕУ не го стави на црната листа неговото политичко крило, туку само вооруженото. Политичката партија Хезболах има места во либанскиот парламент.
Од почетокот на израелската офанзива против Хезболах, цел на серија воздушни напади беа јужните упоришта на групата во главниот град Бејрут.
Во неделата, Израел нападна цели во строгиот центар на Бејрут, при што загинаа десет луѓе во два напади, меѓу кои и портпаролот на Хезболах
Претседателот на Абхазија поднесе оставка
Претседателот на отцепениот грузиски регион Абхазија поднесе оставка по неколкудневните протести на опозицијата, пренесе ДПА повикувајќи се на Интерфакс, која цитира опозициски лидери кои воделе неколкучасовни преговори со владини претставници.
Како дел од постигнатиот договор, се очекува претседателот на Абхазија Аслан Бжанија и премиерот Александар Анкваб да ги потпишат своите писма со оставка во текот на ноќта.
Писмото со оставка на Бжанија беше објавено на каналот Телеграм на претседателската канцеларија денеска (19 ноември) во раните утрински часови.
Илјадници поддржувачи на опозицијата во петокот го окупираа парламентот во знак на протест против планираната ратификација на инвестицискиот договор со Русија. Предвидената собраниска седница не се одржа поради протестот.
Договорот, за кој противниците стравуваат дека ќе ја отвори вратата за руските олигарси да купуваат земјиште во популарниот, но економски проблематичен регион, предизвика големо негодување.
Опозициските демонстранти стравуваат дека инвестицискиот договор ќе им овозможи на руските олигарси да купуваат имот во популарниот, но релативно неразвиен регион и дека локалното население повеќе нема да може да си дозволи да живее таму.
Абхазија се прогласи за независна држава, заедно со грузискиот регион Јужна Осетија, по војната против Грузија во 2008 година во која Русија ги поддржа сепаратистичките сили.
Русија ги признава двата региони како независни држави, а западните држави сметаат дека Москва де факто има контрола врз двете територии.
Бжанија, поранешен офицер на советската разузнавачка агенција КГБ, се соочи со обвинувања дека „се продал“ на Москва.
Со неговата оставка се отвори пат за нови избори.
Мултимедија
Најпосетени
Што треба да знаете