Достапни линкови

Вести

Забраната за македонското знаме на „Австралија Опен“ било техничка грешка

Македонското знаме на списокот на забранетите за пренос преку камерите на тенискиот турнир „Австралија Опен“, 15 јануари 2024 година
Македонското знаме на списокот на забранетите за пренос преку камерите на тенискиот турнир „Австралија Опен“, 15 јануари 2024 година

По добиените информации за пропустот поврзан со истакнувањето на официјалното знаме на Република Северна Македонија на тенискиот турнир „Австралија Опен“, Министерството за надворешни работи, соопшти дека реагирало преку амбасадата во Канбера, до Министерството за надворешни работи и трговија на Австралија, како и до организаторот на турнирот, „Австралија Опен“.

Како што се наведува, оттаму МНР добило уверување дека се работи за ненамерен пропуст - техничка грешка која е веднаш исправена и која не предизвикала ефективни ограничувања.

„Беше испратено длабоко извинување и уверување дека инцидентот нема да влијае врз силните врски помеѓу граѓаните на Австралија и Северна Македонија, кои се карактеризираат со пријателство и љубов кон спортот. Организаторот појасни дека согласно важечките правила, на трибините за време на натпреварите на турнирот дозволено е да се веат само знамиња на учесниците на натпреварот“, се вели во соопштението од МНР.

Од МНР додаваат дека добиле и потврда дека за време на учеството на нашата натпреварувачка Лина Ѓорчевска, официјалното знаме на земјава било присутно на трибините меѓу гледачите без никакви ограничувања.

Македонската заедница во Австралија вчера алармираше дека македонското знаме е забрането за пренос преку камерите на тенискиот турнир „Австралија Опен“, покрај знамињата на Палестина, Израел, Русија, Белорусија и Тајван, кои исто така се забранети.

види ги сите денешни вести

Мицкоски по трет пат во Вашингтон за шест месеци

Премиерот Христијан Мицкоски на средби во Вашингтон
Премиерот Христијан Мицкоски на средби во Вашингтон

Македонскиот премиер Христијан Мицкоски во рамките на посетата на Вашингтон, е дел од годишната Конференција за конзервативна политичка акција. Тој на 20 февруари се сретна со Фред Кемпе, претседател и извршен директор на Атлантскиот совет.

„Разговаравме за актуелните геополитички предизвици, улогата на Македонија во евроатлантските интеграции и можностите за продлабочување на соработката во иднина. Средбата претставуваше одлична можност за размена на ставови и идеи со еден од водечките експерти за меѓународни односи“, напиша Мицкоски на својот профил на социјалната мрежа Х.

На тридневниот состанок на конзервативците, како што објави Гласот на Америка, ќе се обратат американскиот претседател Доналд Трамп и политичари од Аргентина, Велика Британија, Полска и Италија.

Американскиот потпретседател Џеј-Ди Венс ја води Конференцијата за конзервативна политичка акција, а другите сесии ќе вклучуваат дискусии за криптовалутите и мирот на Блискиoт Исток, како и панел со роднини на заложниците кои се држат во Газа.

Покрај претседателот на Претставничкиот дом на САД Мајк Џонсон, на агендата за говори се и поранешната британска премиерка Лиз Трас , словачкиот премиер Роберт Фицо, аргентинскиот претседател Хавиер Милеи и италијанската премиерка Џорџа Мелони.

Претседателот на македонската Влада, Мицкоски, кој во Вашингтон е придружуван од шефот на дипломатијата Тимчо Муцунски, синоќа имал средба со Александар Касаноф, заменик помошник секретар за Западен Балкан во Бирото за европски и евроазиски прашања на Стејт департментот, на која станало збор состојбата во државата, за европските интеграции и препреките со кои се соочува земјава на тој план, како и за реформската посветеност на Владата и фокусот на клучните области.

Станало збор и за актуелните случувања во регионот на Западен Балкан, со посебен акцент на регионалната безбедност, економската соработка, доброто владеење и демократијата.

На средбата заеднички е потврден интересот за одржување континуитет во политичкиот дијалог и зацврстување на билатералните односи помеѓу двете земји, преку засилена комуникација и институционална соработка, продолжување на активностите во рамки на Стратешкиот дијалог, како и преку продлабочена соработка и партнерство во рамки на НАТО алијансата.

Американската амбасадорка Агелер вчера констатираше дека македонскиот премиер за кратко време по трет пат е во САД што е доказ за тоа дека Македонија сака да ги зацврсти односите со стратешкиот партнер.

„Вашингтон не дава гаранции за патот кон Европската Унија, бидејќи ние не сме членка на Европската Унијата. Мислам дека за тоа се водат и се воделе разговори со високите претставници на ЕУ, но воодушевена сум што премиерот и членовите на неговиот кабинет се во Вашингтон, тоа е важна врска. Фактот што тој е неколку пати таму, откако ја презема неговата позиција како премиер, исто како и многу други министри, само зборува за близината на нашите односи и на многу начини покажува дека ние како САД и Северна Македонија билатерално може да соработуваме. Очекувам дека таа соработка да биде зајакната“, изјави Агелер.

Прекршочна постапка за ланци на маркети - се договарале за цени

Macedonia - Plastic bags and canvas bags in markets in Skopje
Macedonia - Plastic bags and canvas bags in markets in Skopje

Поведена е прекшочна постапка за четири ланци на маркети поради меѓусебно незаконско договарање на цени, соопшти Комисијата за заштита на конкуренцијата. Членови на комисијата, извршиле ненајавен увид во четири трговски ланци и во една од стопанските комори во која се здружени истите.

Во нивното соопштение е наведено дека увидот е направен поради сомневање дека неколку ланци на маркети кои вршат трговија на мало со прехранбени и непрехранбени производи го прекршиле законот за заштита на конкуренцијата, кој забранува картели односно забранува договори и усогласено однесување на две или повеќе претпријатија, а се со цел нарушување на конкуренцијата.

„При контролата во службените простории на правните лица, извршен е увид во службената документација и направен е и увид во средствата за електронска комуникација при што се пронајдени докази дека истите донеле незаконита одлука која и јавно ја објавиле преку средствата за јавно информирање,“ се наведува во соопштението од Комисијата за заштита на конкуренцијата објавено на Фејсбук.


Според Комисијата, контролираните субјекти незаконски се договориле дека заедно нема да набавуваат стоки од добавувачи кои ќе достават нови ценовници за нивните производи.

Во нивното соопштение е наведено дека Комисијата интензивно врши контроли кај повеќе фирми кои се дел од синџирот на снабдување со земјоделски и прехранбени производи, најавувајќи ригорозни мерки и санкции, за како што велат, секое нарушување на конкуренцијата на пазарот и изигрување на законите на штета на граѓаните.

Законот за нефер трговски практики стапи на сила на 28 септември, кога беше краен рок трговците да ги усогласуваат договорите за снабдување меѓу добавувачите и производителите. Во нив трошоците за рабат и други маркетинг трошоци се ограничени на 10%, а кои, според досегашната пракса изнесувале од 20% до 35%.

Во изминатиот месец македонските граѓани преку социјалните мрежи се организираа на бојкот на маркетите по примерот на Хрватска, откако трет месец последователно се забележува поскапување на храната.

Руте: Стабилноста на Косово е во интерес на НАТО

Генералниот секретар на НАТО Марк Руте во посета на Словачка
Генералниот секретар на НАТО Марк Руте во посета на Словачка

Генералниот секретар на НАТО Марк Руте изјави дека стабилноста на Косово, Босна и Херцеговина и Србија е во интерес на сите и дека не гледа причина да верува дека може да има драматични промени во однос на посветеноста на САД кон западната воена алијанса.

Тој ги даде овие коментари за време на престојот во Братислава, Словачка, кога во дебата со студентите беше прашан дали гледа можност за обновување на конфликтот во Косово, откако се појавија гласини дека новите американски политики може да доведат до нивно воено повлекување.

„Дозволете ми да бидам апсолутно јасен, од она што го разбирам од американскиот систем, тие се целосно посветени на НАТО и сегашните обврски. Но, да видиме што ќе се случи. Секогаш можеме да имаме промени во политиката или мали прилагодувања што можат да се случат. Словаците, Холанѓаните и другите го прават тоа. Но, јас немам причина да верувам дека ќе има драматични одлуки. И генерално, во Западен Балкан, мораме да се погрижиме да го задржиме фокусот на овој регион бидејќи стабилноста на Косово, стабилноста во Босна и стабилноста во Србија е во интерес на сите нас“, одговори Руте.

НАТО има мировна мисија на Косово од крајот на војната. Во моментов, како дел од КФОР, на Косово се распоредени над 4.600 војници од 28 земји во светот. Најголем број од нив доаѓаат од Италија, а потоа следат САД, Унгарија и Турција.

НАТО го зголеми своето присуство во Косово во текот на 2023 година, по зголемените тензии на северот со мнозинско српско население.

КФОР е третото ниво на безбедносен одговор во Косово, по косовската полиција и мисијата на Европската унија за владеење на правото, ЕУЛЕКС. Оваа мисија, меѓу другото, е одговорна и за безбедноста на граничната линија меѓу Косово и Србија.

Зеленски: Украина е подготвена за договор за инвестиции и безбедност со Трамп

Украина е подготвена за силен, ефективен договор за инвестиции и безбедносен договор со претседателот на САД. Ова го напиша украинскиот претседател Володимир Зеленски на социјалната платформа Х по средбата на 20 февруари со американскиот претставник Кит Келог во Киев.

Тој посочи дека неговиот тим го предложил најбрзиот и најконстуктивен начин за постигнување на резултати.

„Нашиот тим е подготвен за работа 24/7“, напиша на Х, Зеленски.

Зеленски во објавата рече дека имале добра дискусија со многу важни детали, заблагодарувајќи им се на САД за сета помош и двопартиска поддршка за Украина и украинскиот народ.

„Важно е за нас и за целиот слободен свет да се почувствува силата на Америка“, рече тој.

Зеленски додаде дека имале детална дискусија за ситуацијата на бојното поле, како Украина може да ги врати воените заробеници и ефективни безбедносни гаранции.

„Од првиот момент на оваа војна, Украина се стреми кон мир. Мораме и можеме да обезбедиме овој мир да биде силен и траен за Русија никогаш повеќе да не се врати со војна“, рече Зеленски по разговорите со американскиот претставник за војната во Украина.

Во својот пост, Зеленски се осврна и на украинско-американските односи.

„Успехот не обединува сите. Од силни украинско- американски односи имаат корист за целиот свет. Му благодарам на генералот Келог за заедничката работа за постигнување важни резултати“, напиша Зеленски.

Украинскиот министер за надворешни работи Андриј Сибиха претходно разговараше со Келог за начините за постигнување праведен и траен мир во конфликтот со Русија.

Посетата на Келог на Киев доаѓа во дипломатски тежок момент за Украина, откако американскиот претседател Доналд Трамп стави крај на политичката изолација на рускиот лидер Владимир Путин со вклучување во билатерални разговори со Москва.

„Ја потврдив подготвеноста на Украина да постигне мир и нашата визија за неопходните чекори“, напиша Сибиха на мрежата Х.

Тој му рекол на Келог, кој пристигнал во главниот град на Украина, дека безбедноста на Украина и трансатлантскиот брег се „неделиви“.

Американскиот пратеник веќе се сретна со врховниот командант на украинската армија, шефовите на разузнавачките и специјалните служби.

Зеленски се сретна со Келог, откако Трамп го нарече „диктатор“

Украинскиот претседател Володимир Зеленски
Украинскиот претседател Володимир Зеленски

Украинскиот претседател Володимир Зеленски на 20 февруари се сретна со американскиот пратеник Кит Келог, откако Доналд Трамп го нарече украинскиот лидер како „диктатор“ и рече дека Русите „имаат карти“ во какви било разговори за ставање крај на војната, јавува новинската агенција Франс Прес.

На тавките коментари Зеленски возврати со забелешка дека Трамп, подлегнал на руската „дезинформација“ повторувајќи ги точките за разговор во Кремљ.

По средбата меѓу Зеленски и Келог во Киев, портпаролот на кабинетот на Зеленски соопшти дека нема да има изјави по разговорите.

Вообичаено, претставниците кои доаѓаат во посета на Киев, до сега одржуваа заедничка прес-конференција по разговорите.

„На барање на американската страна, форматот на состанокот предвидува протоколарно снимање и не вклучува изјави или прашања“, изјави за новинарите портпаролот на Зеленски, Сергиј Никифоров.

Во Соединетите Држави, главниот советник на Трамп за безбедност во четвртокот рече дека критиките на Зеленски кон американскиот претседател се „неприфатливи“ и го повика да потпише договор со кој се дава преференцијален пристап до клучните минерали и природните ресурси на Украина.

„Тие треба да го намалат тонот и внимателно да погледнат и да го потпишат тој договор“, изјави советникот за национална безбедност Мајк Волц за американскиот медиум Фокс њуз.

Според американскиот претседател Доналд Трамп, Зеленски ја урнал демократијата во неговата земја.

„Диктатор без избори, Зеленски е подобро да се движи брзо или нема да му остане земја“, напиша тој на својата платформа Truth Social.

Зеленски беше избран во 2019 година за петгодишен мандат и остана лидер во согласност со украинските правила според воената состојба, која настана по руската инвазија во врз Украина во 2022 година. Тензиите меѓу Зеленски и Трамп почнаа да растат по новата позиција на САД за војната.

Но, Зеленски даде попозитивен тон пред средбата со Келог во четврток, велејќи дека „за нив е многу важно средбата и нашата соработка со САД да бидат конструктивни“.

„Заедно со Америка и Европа, мирот може да биде посигурен и тоа е нашата цел“, додаде тој.

Русија, која со години се противи на американското воено присуство во Европа, сака реорганизација на безбедносната рамка на континентот како дел од каков било договор за ставање крај на борбите во Украина, јавува Франс прес.

Русија и Белорусија на заедничка воена вежба во септември

Илустрација од воена вежба
Илустрација од воена вежба

Русија и Белорусија ќе одржат заедничка воена вежба во септември, изјавија официјални лица на 20 февруари. Ова се дел од напорите на двата соседа и сојузници да ги прошират своите воени врски во услови на борби во Украина.

„Во воената вежба ќе учествуваат над 13 илјади војници“, изјави претставникoт на белоруската одбрана Валериј Ревенко.

Тој додаде дека набљудувачите од Организацијата за безбедност и соработка во Европа, ќе бидат поканети да ги следат вежбите.

Авторитарниот белоруски претседател Александар Лукашенко, кој владее со Белорусија со железна рака повеќе од 30 години и се потпира на субвенциите и поддршката на Кремљ, и дозволи на Русија да ја користи територијата на неговата земја за испраќање војници во соседна Украина во 2022 година и да биде домаќин на дел од нејзиното тактичко нуклеарно оружје.

Руските трупи влегоа во Украина од Белорусија на 24 февруари 2022 година, по заедничката вежба со белоруската армија. Украина и Белорусија делат 1.084 километри граница.


Претходно украинскиот претседател Володимир Зеленски изјави дека руското воено засилување во Белорусија, која се граничи со членките на НАТО со Латвија, Литванија и Полска, може да ја подготви сцената за потенцијален напад. Русија постојано ги негираше обвинувањата дека би можела да ги нападне членките на НАТО.

Ревенко рече дека Белорусија е отворена за меѓусебни воени инспекции со Полска долж 80 километри длабоко во една на друга територија, нешто што, како што вели тој, ќе ја сигнализира намерата на Полска да продолжи со „добрососедските врски“.

„Ако Полска ја отфрли или игнорира таквата акција, ние ќе имаме поинакво мислење“, изјави Ревенко.

Соединетите Американски Држави и Европската Унија воведоа низа санкции против Белорусија поради нејзиното масовно задушување на протестите по претседателските избори во 2020 година и потегот на Лукашенко да и дозволи на Русија да ја користи територијата на неговата земја за испраќање војници во Украина.

Во декември, Лукашенко и рускиот претседател Владимир Путин потпишаа договор со кој се даваат безбедносни гаранции за Белорусија, најблискиот сојузник на Москва, вклучително и можната употреба на руско нуклеарно оружје за да се помогне да се одбие каква било агресија.

Во тоа време, Лукашенко побара од Путин да распореди понапредно оружје во Белорусија, вклучително и балистичката ракета со среден дострел Орешник, способна за нуклеарно оружје, која Русија првпат ја употреби во ноември против Украина.

Путин одговори дека ракетите Орешник би можеле да бидат распоредени во Белорусија во втората половина на 2025 година, додавајќи дека тие ќе останат под руска контрола, но Москва ќе му дозволи на Минск да ги избере целите.

Потпишувањето уследи по ревизијата на Москва на нејзината нуклеарна доктрина, која за прв пат ја стави Белорусија под руски нуклеарен чадор среде тензиите со Западот поради конфликтот во Украина.

Русија не откри колку тактичко нуклеарно оружје има распоредено во Белорусија, но Лукашенко во декември рече дека неговата земја моментално има неколку десетици од нив. Распоредувањето ја проширува способноста на Русија да гаѓа неколку сојузници на НАТО во Источна и Централна Европа.

Европол предупредува на насилни онлајн култови кои регрутираат малолетници

Илустратина фотографија
Илустратина фотографија

Агенцијата за спроведување на законот на Европската унија (Европол) на 20 февруари издаде предупредување за криминалните мрежи кои користат сајбер методи за поттикнување на терористички дејствија и насилство екстремно насилство.

Според предупредувањето колку повеќе се споделуваат таквите содржи на социјалните платформи меѓу членовите, толку повисоко се рангираат во групата.

„Овие криминални или насилни екстремистички групи се натпреваруваат меѓусебно за споделување на најнасилната содржина“, се вели во соопштението.

„Ширењето на екстремни содржини служи како средство за десензибилизација на ранливите луѓе, со цел да се прекршат општествените норми и да се нормализираат насилството врз корумпираните малолетници и да се подготват кон идните насилства, се вели во сооопштението од Европол.

Овие дела честопати беа поврзани со заедници со насилни десничарски екстремистички врски.

„Нивните лидери се залагаат за колапс на модерното општество преку акти на терор, хаос и насилство, ширејќи идеологии кои инспирираат масовни престрелки, бомбашки напади и други акти на тероризам“, соопшти Европол , посочувајќи дека жртвите се бараат на платформи за игри, услуги за стриминг или социјални медиуми

Во некои случаи, сторителите се инфилтрирале во групи за поддршка на интернет за да ги идентификуваат и регрутираат ранливите млади луѓе.

Јаневска најави големи промени во законот за високото образование

Весна Јаневска, министерка за образование и наука на Северна Македонија
Весна Јаневска, министерка за образование и наука на Северна Македонија

Големи промени ќе претрпи законот за високо образование, најави на 20 февруари министерката за високо образование Весна Јаневска. Таа најави дека е предвидена реорганизација со која Агенција за квалитет во високото образование ќе биде заменета за Одбор за акредитација и евалуација,што ќе работи со поинакви правила и принципи. Таа очекува овие измени да донесат зголемување на квалитетот на образованието.

„За Националниот совет сметаме дека и натаму треба да постои и ги договараме неговите ингеренции и на другите институции, како што се Министерството за образование и наука (МОН), Одборот за акредитација и сите други“, изјави министерката Јаневска.

Таа по средбата со претседателот на Самостојниот синдикат за образование, наука и култура (СОНК) истакна дека во подготовката на новиот закон се вклучени експерти од МОН и претставници од сите државни и приватни универзитети.

„Сега се при крај со решенијата за да излезе новиот закон, кој кога ќе биде дефинитивно готов ќе оди на подолготрајна јавна расправа и нема да биде само 20 дена на ЕНЕР. Ќе го доставиме до сите универзитети и ќе го оставиме подолго на електронска јавна расправа, а ќе организираме и јавна расправа со физичко присуство по што ќе ги анализираме и сублимираме препораките од вработените во високото образование и тогаш ќе излеземе со конечна верзија“, истакна Јаневска.


Таа посочи дека ни еден студент кој што добил стипендија за студирање на престижните универзитети во странство, а не го исполнил условот да се врати во државата, не и ги вратил парите за стипендијата на државата зпоради лошите услови во потпишаниот договор за стипендија со државата.

„Ако треба да вратите десеткратно од она што ви го дала државата и до крајот на животот ако исплаќате една третина од платата каде и да сте вработени и колкава и да ви е платата не можете тоа да го постигнете. Затоа ги направивме промените во договорот да бидат реални, она што е вложено да биде вратено, но и обврска подолго да бидат во земјата и да пренесуваат знаења дури ди да се во странство, прецизира Јаневска.

Претходно на 19 февруари, Јаневска изрази очекување дека со новото раководство во Одборот за акредитација ќе може да се воведат нови студиски програми, некои да се стават во мирување, дел да се укинат.

Инаку, новиот Закон за високо образование треба да биде усвоен во текот на оваа година. Јаневска за ова информираше од собраниската говорница за време на седницата за пратенички прашања на 28 ноември лани.

Шпанскиот поранешен претседател на фудбалската федерција Рубиалес осуден за присилен бакнеж

Шпанскиот Врховниот суд во четвртокот објави дека поранешниот претседател на шпанската фудбалска федерација Луис Рубиалес е прогласен за виновен за сексуален напад затоа што ја бакнал фудбалерката Џени Хермосо без нејзина согласност на завршната церемонија на Светското првенство за жени во август 2023 година.

Рубиалес беше казнет парично со над 10.000 евра, но беше ослободен од обвиненијата за принуда.

Обвинителите побараа затворска казна за Рубиалес во случај што предизвика дебата во Шпанија за сексизмот во женскиот фудбал и поширокото општество.

„Пресудата му забранува на Рубиалес да се приближува до Хермосо на 200 метри и да комуницира со неа една година“, се вели во соопштението на судот.


47-годишниот Рубиалес беше обвинет за сексуален напад бидејќи го бакнал Хермосо во уста.

Тој, исто така, беше обвинет, заедно со уште тројца поранешни функционери на Фудбалската асоцијација, дека се обидел да ја принуди да каже дека бакнежот на церемонијата на доделување на наградите на Светското првенство во 2023 година во Сиднеј бил консензуален.

Адвокатката Џени Хермосо не беше веднаш достапна за коментар, објави Ројтерс.

Рубиалес поднесе оставка како претседател на Шпанската фудбалска федерација во септември 2023 година, како и потпретседател на Извршниот комитет на УЕФА.

Републиканци се спротивставија на критиките на Трамп кон Зеленски

Архивска фотографија, Сенаторот Роџер Викер, за време на настан на Капитол Хил во Вашингтон, 9 април 2024 година
Архивска фотографија, Сенаторот Роџер Викер, за време на настан на Капитол Хил во Вашингтон, 9 април 2024 година

Високи претставници на Републиканската партија на САД се спротивставија на последните изјави на претседателот Доналд Трамп за напад на неговиот украински колега, Володимир Зеленски.

Трамп ги засили своите критики кон Зеленски во последните денови, опишувајќи го како „диктатор без избори“ и сугерирајќи дека Украина сноси одговорност за тековната руска инвазија на нејзиниот сосед.

Коментарите на претседателот предизвикаа загриженост кај традиционалните членови на Републиканската партија. Тие се загрижени дека сигнализирањето на подготвеноста да се прекине поддршката за Киев може да го охрабри рускиот претседател Владимир Путин.

Инсистирањето на Трамп да го опишува Зеленски со негативни термини е во целосна спротивност со многу републиканци во Сенатот кои продолжуваат да ја гледаат Украина како жртва на руска агресија.

Клучните сенатори на Републиканската партија изразија силна поддршка за Украина на 19 февруари и предупредија да не се смирува руската агресија.

Сенаторот Џон Кенеди кој е републиканец од Луизијана не штеди на критики во осврт на заканата од Путин, опишувајќи го како „ганстер со црно срце“

„Владимир Путин е тој што ја започна војната. Исто така, преку горко искуство верувам дека Владимир Путин е гангстер... Тој има вкус на Сталин за крв,“ вели Кенеди.

Сенаторот Роџер Викер кој е републиканец од Мисисипи ја повтори загриженоста на Кенеди, велејќи дека разговорите за ставање крај на руската инвазија на Украина мора да се одржат со учество на Украинците, а истовремено да се земат предвид и европските интереси.

„Путин е воен злосторник и треба да биде во затвор до крајот на својот живот, ако не биде погубен“, рече тој.

Во интервју за украинскиот сервис на РСЕ, шефот на украинската Централна изборна комисија, Олех Диденко, рече дека разговорите за избори во Украина ѝ користат само на Русија.

„Ова прашање се поставува со цел да се поткопа легитимитетот на владата во Украина, да се ослабне довербата во владата, да се ослабне поддршката за Украина од меѓународните партнери“, рече тој.

„Ова е елемент на хибридна војна, според мое мислење, што активно го користи нашиот непријател“.

Коментарите уследија по објавата на Трамп за Вистината на социјалните мрежи претходниот ден, каде што напиша „успешно преговараме за крај на војната со Русија“. Тој додаде дека Зеленски „подобро да се движи брзо или нема да му остане земја“.

Забелешките на Трамп дојдоа откако Зеленски го обвини Трамп дека живее во руски „балон на дезинформации“ и рече дека би сакал тимот на Трамп да биде „повистинит“.

Сенаторот Том Тилис , републиканец од Северна Каролина не се согласи со карактеризирањето на Трамп за Зеленски како „диктатор“, иако избегнуваше директно да го критикува Трамп.

„Тоа не е збор што би го употребил“, рече тој, додавајќи дека „нема морална еквивалентност меѓу Владимир Путин и претседателот Зеленски“.

„Јасно е дека Владимир Путин е одговорен за оваа војна“, им рече Тилис на новинарите во Вашингтон на 19 февруари. „Неговата одлука резултираше со убиство, силување, тортура и киднапирање на невиден број Украинци. Тој ја поседува одговорноста за оваа војна“.

Водачот на мнозинството во Сенатот Џон Тун кој е републиканец од Северна Дакота, исто така, одби да го критикува Трамп за неговите забелешки.

„Претседателот зборува за себе“, им рече тој на новинарите.

„Мислам дека она што го поддржувам е мирен исход и резултат во Украина... И мислам дека токму сега, администрацијата, претседателот и неговиот тим работат на тоа да го постигнат“.

Иако претседателскиот мандат на Зеленски требаше да истече во мај 2024 година, Украина не можеше да одржи избори бидејќи останува под воена состојба, која беше воведена кога Русија ја започна својата целосна инвазија во февруари 2022 година и која се уште трае.

Вчитај повеќе

XS
SM
MD
LG