Вести
Грчките власти испраќаат засилување во областите погодени од пожарите
Грчките власти ги зајакнаа напорите за гаснење на пожарите во североисточниот дел на земјата, каде веќе 10-ти ден беснее голем, смртоносен пожар без знаци на стивнување.
Од вкупно 21 смртен случај поврзани со шумски пожари во Грција минатата недела, 20 жртви се пријавени во областа Александрополис и Еврос.
Од противпожарната служба соопштија дека со пожарот се борат 474 пожарникари, со поддршка од 100 возила, седум авиони и два хеликоптери.
Меѓу пожарникарите има и засилувања од повеќе европски земји, меѓу кои пожарникари од Србија, Романија, Франција, Чешка, Бугарија, Албанија и Словачка, додека Германија, Шведска, Хрватска и Кипар испратија противпожарни авиони, пишува Асошиетед прес (АП).
Пожарот уништи повеќе од 77.000 хектари земја, што го прави еден од најголемите во една европска земја.
Пожарникарите до вчера се бореа со пожарите на вкупно 105 локации во Грција.
Се сомнева дека дел од пожарите се подметнати, а досега се приведени 163 лица.
види ги сите денешни вести
Владата го усвои предлог буџетот за 2025 година „тежок“ 5,8 милијарди евра
Предлог буџеот за 2025 година е проектиран на приходи во вредност од 5,8 милијарди евра, што е за 13 проценти повеќе од овогодишниот буџет. Расходите во предлог буџетот за 2025 година кој помина на владината седница на 29 октомври е прдвидено да изнесува 6,5 милијарди евра, што е за 10 проценти од претходниот.
Министерската за финанасии Гордана Димитриеска Кочоска изјави дека предлог буџетот содржи мерки за фискална консолидација и дисциплинирано даночно трошење и мерки и политики за поттикнување на економскиот раст.
„Креиравме Буџет што треба да носи вистински развој на државата“, изјави Димитриеска- Кочоска.
Таа посочи дека состојбата наметнува штедење, но додава дека Владата внимателно ќе постапува за да им овозможиме на институциите редовно извршување на своите надлежности и да испорачаат квалитетни услуги кон граѓаниет и бизнисот.
Според предлог буцетот Владата планира следната година да потроши над 800 милиони евра во капитални инвестиции односно клучни проекти, од кои половина милијарда евра ќе бидат пари од сопствен буџет, а 300 милиони евра од заем.
Претходно премиерот Христијан Мицкоски изјави дека е добро што нема драматично зголемување на дефицитот и оти постепено има изденачување со капиталните инвестиции.
„ Оваа година е добро тоа што немаме драматично зголемување на дефицитот, постепено капиталните инвестиции и буџетскиот дефицит се изедначуваат. Тие се сега негде на ниво 300 со 400 милиони евра, очекувам до крајот на годината да бидат многу блиску“, рече Мицкоски.
Економскиот раст е планиран на ниво од 3,7 проценти, буџетскиот дефицит на четири проценти, а инфлацијата да изнесува 2,2 проценти.
Од друга страна, Светска банка во нејзината последна проекција, посочи дека очекува македонскиот економски раст годинава да достигне ниво од 1,8 проценти, додека 2, 3 отсто да достигне до крајот на следната година.
Со сличен став е и Виенскиот институт за меѓународни економски студии, која опфаќа 23 земји од регионот, македонскиот економски раст и во наредниот перид ќе „каска “ зад балканскиот. Нивната прогноза се поклопува со таа на Светската банка за раст од 1,8 до крајот на годинава и 2, 3 отсто до крајот на следната.
Зурабишвили повика на притисок од Западот за да се задржи Грузија на европскиот пат
Грузиската претседателка Саломе Зурабишвили го повика Западот да изврши притисок врз владејачката партија „Грузиски сон“ да ги преиспита резултатите од „украдените“ избори кои се спроведоа за време на викендот. Во спротивно се ризикува кавкаската држава која екандидат за ЕУ со аспирации за членство во НАТО, да ја изгуби својата „европска перспектива .
Таа во интервју за грузискиот сервис на Радио Слободна Европа во Тбилиси на 29 октомври, рече дека европските и западните партнери на Грузија треба да извршат „екстремен притисок“ врз властите „за да ги разгледаат резултатите од изборите и да го разгледаат количеството на гласовите што се украдени“.
Според Зурабишвили и опозициските партии, околу 300 илјади гласови биле изманипулирани во корист на владејачката партија „Грузиски сон“, која победи со околу 54 отсто од гласачките ливчиња.
Овие тврдења предизвикаа протести на кои десетици илјади Грузијци излегоа на улиците поради обвинувањата за руско мешање во гласањето, што се сметаше за клучен тест за демократските акредитиви на Грузија.
„Толку многу зависи сега од реакциите на нашите партнери, колку дефинитивна ќе биде нивната реакција, колку е силен нивниот притисок врз властите, затоа што мислам дека никој не може да си дозволи да ја изгуби Грузија од Русија во таква форма“, рече Зурабишвили во интервјуто.
„Ако не се испроба притисокот, тогаш тоа значи дека Западот нема да пробал сè за да се обиде да ја задржи Грузија на западната страна и во европската перспектива“, додаде таа.
САД, Европската унија, Канада и Шведска, меѓу другите, изразија критики по парламентарните избори на 26 октомври, кои уследија по зголемената загриженост за демократското назадување на владата предводена од „Грузискиот сон“.
Грузиската влада неодамна донесе контроверзен закон за „странско влијание“ сличен на рускиот закон за „странски агенти“, како и законодавство што ги ограничува правата на ЛГБТ.
Веднаш по објавувањето на резултатите, Зурабишвили рече дека нема да ги признае изборите за кои рече дека станале жртва на „руска специјална операција“ која користела методологија на „закани од кампањата, а не ветувања, пропаганда, како и ПР кампања која беше копи-пејст на руските кампањи“.
Меѓународните набљудувачи од Организацијата за безбедност и соработка во Европа (ОБСЕ), Советот на Европа, Европскиот парламент и НАТО во соопштија дека денот на изборите бил „оцрнет со нерамномерен терен за игра, притисок и тензија“.
Русија негираше дека играла каква било улога во влијанието на изборите во Грузија.
Во своето интервју за РСЕ, Зурабишвили рече дека локалните организации работат на собирање информации и докази за да ги докажат обвинувањата за злоупотреба при гласањето.
Таа, исто така, посочи, како и опозициските партии, дека резултатите од мислењето и излезните анкети, даваат поинаква слика од официјалните резултати на Централната изборна комисија.
Две излезни анкети на опозицијата предвидуваа дека „Грузискиот сон“ нема да добие повеќе од 42 отсто од гласовите, додека резултатите добија повеќе од 54 отсто.
Анкетите, исто така, сугерираат дека четирите опозициски партии - Коалицијата за промени, Единство-да се спаси Грузија, Силна Грузија и За Грузија - заедно ќе имаат јасно мнозинство, додека официјалните првични резултати покажаа дека добија само 37 проценти заедно.
„Овој став на населението не се промени непосредно пред изборите“, рече Зурабишвили, иако таа не даде конкретни докази.
ОБСЕ соопшти дека евидентирала случаи на купување гласови, двојно гласање, физичко насилство и заплашување.
„Во целина, многу е јасно дека на властите им помогна, инспирираше во нивните активности рускиот модел и она што и го ветија на Грузија по изборите“, додаде Зурабишвили.
„Грузискиот сон“, која е на власт од 2012 година, имаше прозападна агенда, но во последните две години го промени курсот кон Русија.
Кривична пријава за несовесно обезбедување на локалитетот „Плаошник“ во Охрид
Кривична пријава против поранешен времен директор на Управата за заштита на културното наследство и управителот на кичевската фирма за обезбедување „2СС“ поднесе охридската полиција. Првиот е осомничен за кривичното дело „злоупотреба на службена положба и овластување“ додека вториот за „несовесно работење во службата“.
Во полициското соопштение е наведено дека 49 годишниот А.А во својство на в.д. директор без да изврши контрола кај локалитетот „Плаошник“ во Охрид, дозволил агенцијата за обезбедување имоти и лица „2СС“ со седиште во Кичево да се незаконски да заработи 80 илјади евра, со тоа што не се придржувал до потпишаниот договор за физичко и техничко обезбедување на локалитетот.
„Второпријавениот се товари дека како одговорно лице во агенцијата, по склучување на договорот со Управата не постапил по истиот и целосно не ги исполнил предвидените технички услови и ангажирал помал број вработени лица. Тој исто така не се придржувал на законот за приватно обезбедување каде јасно е предвидено дека секој вработен треба да поседува лиценца и легитимација“, се вели во соопштението на Секторот за внатрешни работи-Охрид.
Станува збор за последниот договор кој оваа фирма го склучила со Управата за заштита на културното наследство во 2022 година. Само во изминативе четири години со оваа институција склучила седум договори за јавна набавка - обезбедување на локалитетот на скопското Кале, охридскиот Плаошник и деловен простор на институцијата на Павел Шатев во вредност од над 200 илјади евра.
Во изминативе четири години оваа компанија има потпишано околу сто договори за јавни набавки за обезбедување на голме број на институции во вредност од над 7 милиони евра.
САД, Канада и Шведска ги преиспитуваат односите со Грузија
Соединетите држави, Канада и Шведска изразија критика по парламентарните избори во Грузија откако проруската владејачка партија „Грузиски сон“ соопшти дека победила, иако постојат извештаи за широко распространети нерегуларности и масовни протести на поддржувачите на опозицијата кои велат дека гласањето било наместено и изманипулирано од Москва.
Канада и Шведска најавија конкретни потези насочени кон актуелната грузиска влада.
Шведска објави дека прекинува секаква директна соработка со грузиската влада, додека Канада соопшти дека ги разгледува своите врски со властите во Тбилиси.
Шведскиот министер за развојна соработка и надворешна трговија, Бенџамин Доуса, изјави дека Стокхолм е „загрижен за алармантните“ политички случувања во Грузија и дека неправилностите пријавени од западните набљудувачи ја потврдуваат таа загриженост.
„Затоа, владата ја прекинува директната шведско-грузиска соработка, која сè уште е во тек, вклучително и со грузиската даночна управа“, рече Доуса.
Во исто време, Шведска ќе одвои еквивалент на околу 2,3 милиони американски долари средства за граѓанското општество во Грузија, рече тој.
Во меѓувреме, канадското Министерство за надворешни работи изрази загриженост во соопштението за, како што ги нарече, „раширените акти на заплашување гласачи, купување гласови и други нерегуларности на денот на изборите“, пријавени од меѓународни набљудувачи кои го следеа гласањето.
„Во координација со нашите Г7 и европските партнери, и во светло на однесувањето и резултатите од овие избори, Канада ќе ги преиспита односите со грузиското раководство. Канада останува отворена за соработка со Грузија, се додека грузиското раководство ги почитува демократијата, човековите права, владеењето на правото и се осврнува на неодамнешното назадување на демократијата“, се вели во соопштението.
Американскиот сенатор Бен Кардин и претседател на Комисијата за надворешни односи на Сенатот, изјави дека пријавените неправилности се „вознемирувачки и разочарувачки“ и до ова доаѓа откако Европа и САД „постојано предупредуваа“ за демократското назадување на Грузија.
Израел му се закани на новиот лидер на Хезболах
Израел му се закани на новиот лидер на либанскиот екстремистичка организација Хезболах, Наим Касем, неколку часа откако беше објавено дека ќе го замени поранешниот лидер Хасан Насрала, кој беше убиен кон крајот на септември во израелски воздушен напад во предградието на Бејрут.
„Привремена инсталација. Не за долго“, напиша израелскиот министер за одбрана Јоав Галант на платформата Х со фотографија од Касем, додавајќи на хебрејски: „Одбројувањето започна“.
Ројтерс пренесува дека во 1991 година Касем бил назначен за заменик-шеф на Хезболах, организација која има воено и политичко крило. Тој беше поставен од тогашниот генерален секретар на организацијата Абас ал Мусави, кој беше убиен во напад на израелски хеликоптер следната година.
Касем остана на таа позиција кога Насрала стана лидер и долго време беше водечки портпарол на Хезболах и даваше интервјуа за странски медиуми дури и за време на прекуграничните непријателства со Израел минатата година.
Од убиството на Насрала, Касем во телевизиски интервјуа изјави дека вооружената организација Хезболах ги поддржува напорите за постигнување прекин на огнот во Либан.
„Неговиот мандат би можел да биде најкраткиот во историјата на таа терористичка организација доколку ги следи стапките на неговите претходници Хасан Насрала и Хашем Сафиједин“, објави израелската Влада на официјалниот профил на арапски јазик на платформата Х.
Сафиедин, кој се очекуваше да го замени Насрала, исто така неодамна беше убиен во израелски воздушен напад.
Две директорки осудени на условна за лажни сертификати од фирмата од која потекнува и сертификат на директорот на АНБ Христовски
Една директорка на училиште и една директорка на болница биле осудени на условни затворски казни откако признале вина за фалсификување на ТОЕФЛ Сертификат од училиштето „Јулија, ЦО. ЛТД “ во бугарскиот Пловдив, кое е истото училиште што се јавува како издавач на неговиот јазичен сертификат го посочува новиот директор на АНБ, Бојан Христовски, јавува порталот „360 степени“.
И двете признале вина за што добиле условни затворски казни од две години кои би се реализирале доколку во наредните 4 години сторат ново кривично дело.
На 14 февруари, Министерството за внатрешни работи предводено од тогашниот министер во техничката влада Панче Тошковски, поднело кривична пријава до Основното јавно обвинителство Скопје, поради постоење основи на сомнение за сторено кривично дело „употреба на исправа со невистинита содржина
Пресудата е донесена на 9-ти октомври годинава. Обвинителството преквалификувано делото и наместо за „употреба на исправа со невистинита содржина“ како што стоело во пријавата на МВР, директорките се гонети за фалсификување односно дека изработиле непостоечки документ.
Директорот на АНБ, Бојан Христовски во својата биографија со која конкурирал за асистент на Факултетот за безбедност навел дека има сертификат од истата јазична школа Јулија во Пловдив во Бугарија за која и бугарски новинари открија дека не постои на локацијата и не се занимава со издавање на ТОЕФЛ сертификати.
Државната комисија за спречување корупција (ДКСК) отвори предмет за именувањето на Бојан Христовски за директор на Агенцијата за национална безбедност, откако до институцијата пристигнала анонимна претставка во која пишувало дека тој наводно не ги исполнува условите за да биде директор. Оттаму дополнително велат дека ќе се разгледува и овој спорен дел кој се однесува на исполнување на условот поседување на сертифкат ТОЕФЛ.
„Наводите се однесуваат на неисполнување на услови за именување на директор. Конкретно во делот на образование, стекнување со безбедносен сертификат, како и припадност на политичка партија. Тоа се наводите во оваа анонимна пријава. Предметот е распределен кај член. Ќе се отпочне со обезбедување на потребна документација до АНБ и Владата како орган кој го именува. По рокот за достава на овие податоци од 15 дена, и по обезбедување на документација и утврдување на фактичката состојба ќе донесеме одлука на јаван седница, изјави неодамна претседателката на Антикорупциска, Татјана Димитровска.
Именувањето на Бојан Христовски за директор на институцијата задолжена за безбедноста и контраразузнавањето предизвика реакции во јавноста. Тој до неодамна беше член на владејачката ВМРО-ДПМНЕ и претседател на Градскиот комитет на партијата во Скопје.
Опозицискиот СДСМ побара Владата да го повлече Бојан Христовски од функцијата директор на АНБ. Социјалдемократите изразија сериозни сомнежи во врска со исполнувањето на условите за негов избор на позицијата, велејќи дека е некомпетентен кадар кој ќе му служи на премиерот Христијан Мицкоски.
Владата на седница на 16 октомври го разреши директорот на Агенцијата за национална безбедност Зарко Милошевски, а на негово место го именува Бојан Христовски.
Украинско-руски државјанин осуден за велепредавство во Русија
Руски регионален суд го осуди Серхи Денисенко, украинско-руски државјанин, на 25 години затвор за убиство на поранешниот командант на руска подморница вмешан во гранатирањето на украинските територии во 2022 година.
Пресудата е донесена на 29 октомври откако го прогласи Денисенко, кој доби руско државјанство во март 2023 година, за виновен за убиство, нелегално поседување оружје и велепредавство.
Денисенко беше уапсен на 11 јули 2023 година, еден ден откако Ржицки (42) беше убиен во градот Краснодар додека џогирал. Руските обвинители тврдат дека зад нападот стои Службата за безбедност на Украина.
Шефот на военото разузнавање на Украина, Кирило Буданов, го отфрли тврдењето, велејќи дека антивоените чувства меѓу руската војска можеби го предизвикале атентатот. Ржицки порано командувал со подморницата Краснодар во руската морнарица.
Германија го отповика својот амбасадор во Техеран по егзекуцијата на Шармахд
Германија го отповика својот амбасадор во Техеран по егзекуцијата на Џамшид Шармахд кој е иранско- германски државјанин. Шармахд беше егзекутиран откако беше осуден по спорни обвиненија за тероризам.
Новинската агенција Мизан, која честопати известува за иранското правосудство, објави дека смртната казна против Шармахд била извршена на 28 октомври „по конечната потврда на одлуката на судот од страна на Врховниот суд“.
Германија дополнително го повика иранскиот пратеник во Берлин да одговори на прашањата за смртта на 69-годишниот иранско-германски државјанин.
На судењето минатата година, кое според Германија, САД и организациите за заштита на човековите права, беше политички монтирано, Шармахд беше обвинет од Иран дека раководел со промонархистичка група за која Техеран тврди дека стои зад бомбашкиот напад на џамија во Шираз во 2008 година, во кој 14 луѓе беа убиени и како и за планирање на други напади во земјата.
Семејството на иранско- германскиот државјанин ги отфрли обвинувањата како „смешни“.
Германското Министерство за надворешни работи го осуди „убиството“ на Шармахд и соопшти дека германскиот амбасадор Маркус Потцел е отповикан. Пред да биде отповикан, Потцел се состана и со иранскиот министер за надворешни работи Абас Аракчи за да изразни протест и остра осуда против убиството, соопшти Министерството.
Германската министерка за надворешни работи Аналена Баербок рече дека убиството на Шармахд покажува дека „во Техеран владее нехуман режим“ и вети дека тоа „ќе има сериозни последици“.
Аракчи на 29 октомври ѝ одговори на социјалната мрежа Х порано позната како Твитер на Баербок.
„Германскиот пасош не обезбедува неказнивост на никого, а камоли на терористички криминалец. Доста е со долевањето на масло на огнот, Аналена Баербок“, напиша Аракчи.
Исто така, канцеларијата на германскиот канцелар Олаф Шолц на 29 октомври соопшти дека иранскиот амбасадор во Берлин Махмуд Фаразандех бил повикан од германската влада да одговори на прашањата за смртта на Шармахд.
Американскиот Стејт департмент се осврна на третманот на Иран кон Шармахд, кој исто така имал американско жителство, како третман „за осуда“ и ги опиша иранските судски постапки како „лажно судење“.
Пет градежници загинаа при вооружен напад во Пакистан
Вооружени мажи нападнаа градилиште во јужниот пакистански регион Балучистан, при што загинаа пет градежници кои работеа на брана во близина на границата со Иран.
Во владиното соопштение е наведено дека до сега никој не презеде непосредна одговорност за нападот.
Балучистан е пакистански регион богат со минерали и честопати мета на милитантни напади од почетокот на годината.
Белушките сепаратистички групи, како што е Ослободителната војска на Балучистан (БЛА), означена како терористичка организација од страна на Соединетите Држави, делуваат на терен против пакистанската влада.
На 11 октомври, 20 рудари за јаглен беа убиени во квартот Дуки во Белучистан во напад за кој ниту една група не презеде одговорност.
Внатрешна ревизија откри злоупотреби од 60 фирми во ФИТР
Околу 60 компании со различни дејности кои добиле пари од државата за иновации и развојни проекти, наместо да ги реализираат имале проекти без резултати или тие биле фиктивни или „фантомски“.
Го оштетиле буџетот и му должат вкупно 192.888.642 денари или околу 3,2 милиони евра на Фондот за иновации и технолошки развој (ФИТР) од кој во изминатите неколку години добивале грантови за поддршка на проектите.
Тоа го покажала тековната внатрешна ревизија што ја спроведува новото раководство на ФИТР.
В.д. директорот Никола Додов рече дека се откриени сериозни неправилностите во работата на Фондот кој доделувал пари без исполнети критериуми за поддршка на проекти, а спротивно на правилникот и одредбите од Законот за иновациска дејност, пари добивале и приватни здравствени установи кои со нив купувале медицинска опрема.
Додов соопшти дека ќе бидат преземени „правни чекори кон тие што не ги почитувале договорите и законските обврски“.
Од 60-те компании кои се предмет на истрага, рече, веќе се поведени постапки за наплата на побарувањата пред надлежен извршител додека за дел од нив се во постапки за поднесување кривични пријави до Обвинителството, и граѓански парници по кои понатаму ќе постапува надлежното обвинителство односно надлежните судови.
Посочи дека ревизијата открила компании кои добиле повеќе грантови за идентични проекти, а два града во земјава биле фаворизирани да добијат средства односно имале најголем процент на доделени финансии по глава на жител. Нив Додов не ги соопшти на оваа прес-конференција, но ги нарече „најиновативни“ бидејќи, како што рече, од 50 проекти, 40 завршувале во тие два града.
Загрижувачки е што и покрај овие проблеми, поранешниот менаџмент на Фондот не постапувал според законските начела. Наместо да преземе мерки против должниците, ФИТР вршел плаќања на компании кои не ги почитувале законските прописи и биле должници.
Соопшти и дека според истражувањата, управител на компанија управувал со четири различни фирми кои добиле средства од Фондот.
Во однос на проектите што ги добивале приватни здравствени установи и основот врз кој тие станале корисници на ФИТР, в.д. директорот рече дека посветуваат посебно внимание во ревизијата.
„Станува збор за околу 50 приватни здравствени установи кои во изминатите пет години биле корисници на средства од Фондот. Во тек е посебна ревизија за ова прашање и веднаш штом ќе добиеме првични информации од ревизијата, јавноста ќе биде благовремено информирана“, рече Додов.
Ревизијата открила и неправилности во внатрешните процеси на ФИТР – утврдено е дека во Фондот има осуммина вработени во редовен работен однос, а во изминатиот период, заклучно со август 2024 година, рече Додов, на платен список биле евидентирани повеќе од 40 договорци со хонорари и до 60.000 денари.
Мултимедија
Најпосетени
Што треба да знаете