Вести
Руски напад на Одеса: Убиен цивил, 19 ранети, оштетена познатата катедрала
Едно лице загина, а 19 се ранети, меѓу кои четири деца, во нов руски ракетен напад врз украинскиот пристанишен град Одеса, соопштија украинските власти на 23 јули.
Православна катедрала, исто така, беше сериозно оштетена во рускиот воен напад во текот на ноќта, изјави Олех Кипер, гувернер на јужната украинска област Одеса, на апликацијата за пораки Телеграм.
Руската војска започна воени напади врз Одеса и други украински објекти за извоз на храна во текот на изминатата недела, откако Кремљ се повлече од договорот за поморски коридор, постигнат со посредство на ОН, кој овозможи безбедна испорака на украинско жито.
Киев ја обвини Москва дека ги таргетира резервите на жито и инфраструктурата од витално значење за договорот.
„Ракети против мирни градови, против станбени згради, катедрала... Не може да има оправдување за руското зло. Како и секогаш, ова зло ќе изгуби. И дефинитивно ќе има одмазда на руските терористи за Одеса. Тие ќе ја почувствуваат оваа одмазда“, рече украинскиот претседател Володимир Зеленски во објава на Твитер по новиот руски воен напад врз Одеса.
Нападот се случува неколку часа пред планираната средба меѓу рускиот претседател Владимир Путин и белорускиот лидер Александар Лукашенко, кој во саботата пристигна во Санкт Петербург.
Украинската јужна оперативна команда соопшти дека Одеса била цел на најмалку пет типа ракети, вклучувајќи ракети со висока прецизност Оникс, крстосувачки ракети Калибр и балистички ракети Искандер.
Воената управа на градот соопшти дека системите за противвоздушна одбрана уништиле „значаен дел“ од нив.
Одеса од почетокот на инвазијата неколку пати беше цел на напади, а во јануари УНЕСКО го прогласи историскиот центар на градот за загрозено светско наследство.
Во Санкт Петербург, Лукашенко и Путин треба да разговараат за „стратешкото партнерство и сојузот“ меѓу нивните земји, според Кремљ.
Состанокот се случи два дена откако Москва предупреди дека секоја агресија врз сојузничката Белорусија ќе се смета за напад врз Русија.
Откако Полска одлучи на почетокот на неделава да ги придвижи воените единици поблиску до границата со Белорусија како одговор на пристигнувањето во Белорусија на силите од руската група Вагнер, Путин рече дека Москва ќе ги искористи сите средства за да одговори на секое непријателство кон Минск.
Иако не ги испрати своите војници во Украина, Лукашенко и дозволи на Москва да ја користи белоруската територија за да ја започне својата инвазија на Украина во февруари 2022 година и оттогаш често се среќава со Путин.
види ги сите денешни вести
Преговарачите на Косово и Србија на 2 јули во Брисел
Главните преговарачи на Косово и Србија, Бесник Бислими и Петар Петковиќ ќе се сретнат на 2 јули во Брисел во рамки на дијалогот за нормализација на односите.
Портпаролот на Европската унија за надворешна политика и безбедност, Петер Стано, изјави дека приоритет на средбата ќе биде „итен почеток на имплементација на Договорот за патот кон нормализирање на односите“.
Косово и Србија постигнаа договор во 2023 година, но тој не беше спроведен на терен.
Средбата на главните преговарачи минатата недела ја најавија премиерот на Косово, Албин Курти и претседателот на Србија, Александар Вучиќ, по одвоени разговори со високиот претставник на ЕУ, Жозеп Борел.
Курти и Вучиќ не седнаа на иста маса поради, како што беше речено, условите што ги постави премиерот на Косово, а кои претседателот на Србија не ги прифати да го спроведе договорот со Косово и екстрадицијата на Милан Радоичиќ , осомничен за вооружен напад во Бањска.
На 1 јули, Стано им рече на новинарите дека целта на дијалогот меѓу Косово и Србија е „нормализација на односите“.
„Оваа задача беше дадена од ЕУ како мандат за посредници во дијалогот. Значи, мандатот е да им помогне на двете страни да ги нормализираат односите. Признавањето [на Косово од Србија] не е дел од мандатот. Се разбира, логичното последица на нормализацијата би било признавање, но ова е нешто многу подолу на патот на процесот“, рече Стано.
Директорот на Канцеларијата на Владата на Србија за Косово, Петар Петковиќ, пред средбата изјави дека портпаролот на ЕУ е „апсолутно во право“ дека целта на процесот на нормализација не е признавањето на Косово.
Тој на социјалната мрежа Х напиша дека „силите“ сакаат „Србија да го признае насилното отцепување на нејзината територија“ и дека „нема да го гледаат тој филм. Дипломатски извори во Брисел велат дека Европската унија се обидува да ги придобие страните да се договорат за последователен план за имплементација.
За средбата на главните преговарачи на 1 јули зборуваше и претседателот на Собранието на Косово, Глаук Коњувца.
На новинарско прашање за целта на овие разговори, по условите што ги постави Курти, тој рече дека „секоја инстанца мора да остане на својот став“ во однос на тие услови.
Според него, тие услови се разумни и „мора да се разјаснат за да успее дијалогот“.
Коњувца рече дека од ЕУ се очекуваат највисоки стандарди на политика и етика во политиката.
Руски новинар осуден во отсуство за кршење на „законот за странски агенти“
Градскиот суд во Псков го прогласи главниот уредник на весникот „Псковскаја губернија“ („Гувернерат на Псков“) Денис Камаљагин за виновен за административен прекршок поради непочитување на таканаречениот закон за „странски агенти“.
Во пресудата се наведува дека Камаљагин, кој е вклучен во регистарот на странски агенти, не доставил извештаи за своите активности до Министерството за правда во предвидениот рок, пишува редакцијата на Радио Слободна Европа (РСЕ) на англиски јазик.
Судот одлучи лично да го казни со 30.000 рубљи (околу 320 евра), а весникот што тој го води со 300.000 рубљи (околу 3.200 евра).
Претходно против Камаљагин, како и против поранешниот координатор на Псков „Глас“ Владимир Жилински беа покренати кривични дела за наводно избегнување на должноста „странски агент“.
Ова е веќе втор кривично дело против Камаљагин.
Тој претходно беше обвинет за постојано „дискредитирање“ на руските војници.
Минатата година тој беше казнет со 35.000 рубли според административниот член за „дискредитација“.
Законот за странски агенти во Русија се појави во 2012 година и му овозможи на Министерството за правда да ги признае непрофитните организации како странски агенти доколку добиваат средства од странство и се занимаваат со политички активности.
Критериумите со кои се утврдуваат ваквите активности не се јасно дефинирани со закон, што им овозможува на властите да ги гонат организациите кои работат во областа на образованието, културата, здравството, екологијата и заштитата на човековите права, а не добиваат странски средства „под странско влијание“.
Руското законодавство не прецизира што точно треба да се смета за странско влијание.
Украина се соочува со прекини поради летната побарувачка и руските напади
Украинскиот снабдувач со електрична енергија Укренерхо предупреди на прекини на струја и други ограничувања на 1 јули поради руските напади врз енергетската инфраструктура, но и зголемената побарувачка поради високите летни температури.
Предупредувањето дојде откако украинските воздухопловни сили издадоа предупредување за ракетен и воздушен напад за повеќето региони на Украина, вклучително и главниот град Киев, и откако најмалку седум цивили беа повредени во напад на руско беспилотно летало во текот на ноќта во реонот на Днепар.
Во регионот на Киев, три лица, меѓу кои и едно дете, наводно биле повредени во ракетен напад во кој беа оштетени три приватни куќи и неколку возила, објавија властите доцна на 30 јуни.
Истакнувајќи дека на 1 јули се предвидуваат температури над 30 степени Целзиусови за поголемиот дел од земјата, компанијата ги повика Украинците да ја следат потрошувачката и да избегнуваат истовремено користење на уреди кои трошат многу електрична енергија.
Укренерхо додаде дека Украина со електрична енергија се снабдува од Полска, Словачка, Романија, Унгарија и Молдавија.
„Но, поради обемот на штетата од руските напади, овие мерки не се доволни за одржување на рамнотежата во енергетскиот систем“, изјавија тие на Телеграм.
Русија со месеци ја гаѓаше електричната мрежа на Украина, што доведе до чести прекини на струја.
Во март, премиерот Денис Шмихал рече дека 80 отсто од термички генерираниот капацитет за производство на енергија во земјата е уништен.
Во исто време, Министерството за енергетика соопшти дека термоелектраните под контрола на Центроенерхо и Укрхидроенерхо се тешко оштетени.
Минатиот месец претседателот Володимир Зеленски побара од Европската унија да го зголеми извозот на електрична енергија во Украина, како и да испрати потребна опрема и други ресурси за поправки.
Среде политички ќорсокак, во Бугарија предлог за нов владин кабинет
Не долго откако бугарскиот претседател Румен Радев побара од централнодесничарската коалиција ГЕРБ-СДС да формира нова влада на 1 јули, партијата го поднесе својот предлог за малцински кабинет на чело со поранешниот претседател на парламентот Росен Жељазков.
Предложениот кабинет, во кој доминираат поранешни министри од ГЕРБ и претставници на актуелната привремена влада, ќе биде доставен на разгледување до парламентот, пишува редакцијата на Радио Слободна Европа на англиски јазик.
За прифаќање на предлогот е потребно просто мнозинство.
„Ова е влада која може да ја сподели одговорноста и влада во која ГЕРБ и СДС се целосно одговорни“, рече лидерот на ГЕРБ и поранешен премиер Бојко Борисов.
ГЕРБ на изборите на 9 јуни освои 68 места во законодавниот дом од 240 места.
Партијата Движење за права и слободи, која има 46 пратенички мандати, најави дека ќе гласа за предложената влада.
Борисов побара поддршка и од релативно новата коалиција „Континуирани промени-Демократска Бугарија“, која има 39 места и беше партнер на ГЕРБ во коалициската влада која пропадна во март дека предложената влада би можела да биде краткотрајна и дека ќе биде фокусирана за итните прашања, особено за носењето на буџетот.
„Во моментов не зборуваме за програма за управување за четири години“, рече Желјазков.
„Зборуваме за конкретни политики кои можат да го смират политичкиот разговор. Најважно е стабилизацијата на јавните финансии и стабилноста во нашата европска перспектива“, додаде тој.
Привремената влада предводена од премиерот Димитар Главчев положи заклетва во парламентот на 9 април, откако беше именувана од претседателот Румен Радев, кој најави и предвремени општи избори за 9 јуни.
Јунските избори беа шести национални избори во последните три години.
МВР го лоцираше човекот кој го извади македонското знаме од Кораб и постави албанско
Министерството за внатрешни работи работи на случајот со отстранувањето на македонското знаме од врвот Кораб и поставувањето на знаме на Република Албанија. Од таму информираат дека веќе е утврден идентитетот на лицето кое го објави видеото на социјалните мрежи.
„Во врска со видеото објавено на социјалните мрежи каде од страна на едно лице на Кораб е симнато македонското знаме и е поставено знаме на Република Албанија, Министерството за внатрешни работи ја информира јавноста дека по преземени мерки од страна на Одделот за компјутерски криминал утврдено е дека се работи за лице кое не е државјанин на Северна Македонија“, се вели в осоопштението од МВР.
Оттаму додаваат дека се преземаат дополнителни мерки за расчистување на случајот, за што јавноста ќе биде соодветно известена.
Претходно, на Фејсбук профилот на албанскиот државјанин, Изет Шулку, сопственик на ресторан, беше објавено дека го отстранил македонското знаме од врвот Голем Кораб и поставил албанско знаме.
Во објавеното видео на неговиот Фејсбук профил, тој вели дека „македонското знаме не припаѓа на албанските територии, туку само албанското знаме“ и на крај силно извикува Албанија
Заменикот на Лавров во Белград, разговара за безбедносни прашања
Заменик-министерот за надворешни работи на Русија Александар Грушко на 1 јули ја изрази својата поддршка за Србија во зачувувањето на стабилноста и безбедноста и ја истакна важноста на иницијативите за борба против тероризмот, организираниот и сите други видови криминал.
Грушко на средба со потпретседателот на Владата на Србија и министерот за внатрешни работи, Ивица Дачиќ, разговарале за актуелни безбедносни прашања и ја изразиле потребата од континуирана координација на надлежните безбедносни институции, соопшти МВР на Србија.
Дачиќ посочи дека безбедноста на сите граѓани на Србија, како и на сите дипломатско-конзуларни претставништва во земјата е приоритет на работата на МУП и дека Србија ќе ја обезбеди нивната безбедност.
Тој ја истакна посветеноста на Србија во борбата против тероризмот и важноста на меѓународната соработка во оваа област, соопшти МУП.
Српските власти нападот врз припадник на Жандармеријата на 29 јуни го прогласија за терористички напад, а во цела Србија беа подигнати безбедносни мерки и за продолжување на билатералната соработка меѓу двете земји, министерот Дачиќ и заменик министерот за надворешни работи на Русија со посебен акцент на натамошното интензивирање на соработката во областа на внатрешните работи, особено вонредните ситуации.
На средбата беше оценето дека односите меѓу двете земји на полето на внатрешните работи се интензивни и дека се одвиваат на повеќе различни нивоа, преку размена на информации и криминална соработка меѓу полициите на двете земји во борбата против организираниот и сите други видови криминал.
Како што соопшти МУП, соговорниците констатирале дека дијалогот и соработката се клучни за решавање на сите предизвици со кои се соочува глобалната заедница.
Проблемот со хируршките сали на клинички ќе трае до декември
До крајот на 2024 година хирурките сали на Клиничкиот центар во Скопје нема да функционираат нормално, според најавите на новиот министер за здравство Арбен Таравар. Тој денеска изјави дека веќе е објавен тендер за компресорите, но и дека ако е потребно ќе се обиде да се најде начин за реновирање и на салите во болницата „8 Септември“.
„Полека се наоѓа решение за проблемот со хируршките сали на Клиничкиот центар. Веќе е објавен тендер за компересорите кои не работат. Максимум времето до кога треба да се поправи и да се завршат и да се вратат во функција се надевам дека ќе биде крајот на декември. Во меѓувреме ние ќе инсистираме доколку може што поскоро да заврши да бидат функционални салите на Хирургија во Клиничкиот центар, изјави денеска министерот за здраство Арбен Таравари, кој имаше средба со новинарите.
На 18 мај беа затворени дел од хируршките сали поради проблеми со системот за кислород и непријатна миризба. Сега дел од нив работат со надворешни компресори, но тоа не го намалува драстично напливот од пациенти во болниците „8 септември“ и „Св.Наум Охридски“.
Таравари за реновирањето на хируршките сали на ГОБ „8 Септември“, кажа дека таму не бил но оти слушнал оти салите не се во добра состојба.
„Дефинитивно и во Клинички центар јас кога бев во салите, навистина не изгледаат добри. Во „8 Септември“ не сум бил да ги видам салите, меѓутоа ми кажуваат дека и таму не се во добра состојба. Меѓутоа, морам да се консултирам и со финансии да видиме како стоиме со финансиски средства. Ако добијам дозвола, јас се надевам дека што побргу што можам, не можам да кажам рок сега, бидејќи ми треба да видам што се можностите. На Клинички центар ќе се обидам што побргу и на „8 Септември“ доколку имаме начин некако да се менаџира плаќањето во неколку години ќе инсистирам и таму да завршиме или да започнеме со реновирање, одговори Таравари.
Владата на седница на 6 јуни донесе одлука опремата на централната компресорска станица да се замени со нова.
Претходникот на Таравари, Илир Демири на прес-конференција на 27 мај кажа дека ќе се чекаат резултати од испитувања во лабораторија во Германија, која треба да утврди што го предизвикува непријатниот мирис во хируршките сали.
Случајот е пријавен и во Јавното обвинителство.
Невладини од регионот со осуда за забрана на фестивал на српскиот и албанскиот народ во Белград
Околу стотина граѓански организации од регионот ја осудија одлуката на властите во Србија да го забранат фестивалот „Mirëdita, добар ден“.
Во заедничкото соопштение се наведува дека ги поддржуваат колегите од Младинската иницијатива за човекови права и граѓанските иницијативи од Србија, како и Интегра од Косово, чиј фестивал кој промовира пријателство и соработка меѓу српскиот и албанскиот народ во Србија е забранет.
„Ја осудуваме одлуката на властите во Србија да го забранат фестивалот само затоа што беше нападнат од криминални структури, членови на десничарски групи кои ја загрозуваат безбедноста и најбрутално им се закануваат на неговите организатори и учесници“, се вели во него.
Во соопштението се изразува загриженост поради негативниот однос на највисоките претставници на Србија кон фестивалот.
„Ги повикуваме властите на Србија да ја преиспитаат одлуката за забраната, да ги заштитат нашите колеги и да ги санкционираат сите оние кои ја загрозуваат нивната безбедност“, се вели во соопштението потпишано од организации и активисти од Босна и Херцеговина, Хрватска, Црна Гора, Северна Македонија, како и од Косово и Србија.
Фестивалот „Mirëdita, добар ден“ на 27 јуни во Белград не ни започна кога ултрадесничарските групи се собраа пред просторот каде што требаше да се одржи и го блокираа влезот.
Полицијата, која не била на лице место, набрзо наредила „прекин“ на фестивалот поради „опасност од загрозување на безбедноста“.
Српскиот премиер Милош Вучевиќ изјави дека не ја гледа поентата на фестивалот и дека лично смета дека најдобриот одговор кон организаторите на настанот е „презир“.
Забраната на фестивалот ја осудија некои опозициски партии во Србија, а жалење изрази и Европската унија.
Ден откако беше забранета „Mirëdita, добар ден“, на адреса на Софија Тодоровиќ, една од организаторите на фестивалот, пристигна пакет со заканувачки писмо и отсечена свинска глава.
Писмото во кое се наведува дека „ситуацијата во светот се менува и дека доаѓаат некои други времиња“, го потпишала „Националната патрола“.
Станува збор за нерегистрирана ултрадесничарска организација, позната по антиимигрантските акции и врските со идеолошки блиски групи од Русија.
Првото основно јавно обвинителство во Белград нареди идентификација на лицето кое го испрати пакетот со заканувачката порака.
Гир: Нема можност за промена на преговарачката рамка
Не гледам можност за промена на преговарачката рамка и таа позиција не е променета по изборите, изјави евроамбасадорот Дејвид Гир, по денешната средба со Министерот за европски прашања Орхан Муртезани. Ова е одговорот на Гир на прашањето дали има шанса за промена на преговарачката рамка.
„Секогаш сум бил многу јасен за овој договор што беше постигнат во јули 2022 година што резултираше со отворање на пристапните преговори и скрининг процесот. Не гледам можност за промена на преговарачката рамка “, рече Гир.
Претходно премиерот Христијан Мицкоски рече дека не гледа причина да не се додаде уште еден предлог кон Договорот за добрососедство со Бугарија.
Мицкоски појасни дека т.н. француски предлог од кој прозилегоа уставните измени е всушност репреговарање на Договорот за добрососедство.
Неговиот коментар следуваше откако американската амбасадорка Анџела Агелер во интервју за Радио Слободна Европа рече дека преговори нема да има ниту за Преспа, ниту со Бугарија за влез во ЕУ.
Во однос на пораката што се праќа со намалувањето од вицепремиерско на министерско место за европски прашања според Гир, важно е тоа што процесот на евроинтеграција останува високо на политичката агенда.
„Ова е тоа што Владата го вели. Ќе ја оценуваме Владата врз основа на тоа што го прави. Ако сака да продолжи напред на евроинтегративниот пат ние ќе бидеме цврсти и посветени партнери, изјави Гир.
Прашан за планот на Питер Ванхојте за евроинтегративниот пат на земјава, Гир рече дека не е сигурен дека постои таков план, посочувајќи дека Ванхојте работи на проект, финансиран од Белгија, за градење на добрососедски односи во Северна Македонија и соседите.
- Но, надвор од тоа ние во ЕУ не сме поврзани со таа конкретна иницијатива, нагласи Гир.
Министерот за европски прашања Орхан Муртезани посочи дека секоја помош во процесот на зачленување кон ЕУ е добредојдена, вклучителчно и помошта на Питер Ванхојте, но дека тој како новоназначен министер нема видено никаков конкретен план, за да може да даде коментар.
Иранците размислуваат за продолжување на бојкотот на претседателските избори
Повеќе од 60 отсто од гласачкото тело во Иран не гласаше на претседателските избори на 28 јуни, и покрај тоа што беа наведени како важна анкета со оглед на улогата што следниот претседател би можел да ја игра во наследувањето на врховниот водач, Али Хамнеи.
Бидејќи ниту еден кандидат не успеа да обезбеди доволно гласови за целосно да победи на изборите, на 5 јули ќе се одржи втор круг гласање меѓу реформаторот Масуд Пезешкијан и тврдокорниот конзервативец и поранешен преговарач за нуклеарната програма Саид Џалили.
Рекордно нискиот одѕив дојде по широко распространетите повици на неистомислениците дома и во странство за бојкот на изборите, тврдејќи дека нема промена од гласањето на минатите избори.
Иран бележи тренд на опаѓачки одѕив на гласачите од 2020 година, кој делумно е поттикнат од зголемената фрустрација поради недостатокот на слободи, нестабилната економија и падот на животниот стандард. Голру рече дека намалениот одѕив на гласачите на неодамнешните големи избори е, исто така, директен резултат на „координиран чин на граѓанска непослушност“ што ѝ овозможува на разочараната јавност „да им го соопшти своето несогласување на властите“.
Повеќе од 50 политички активисти во Иран и други земји ги повикаа масите да продолжат со бојкотот на вториот круг од 5 јули.
„Секое политичко учество или глас за избрани и немоќни кандидати е мрачна и горчлива шега“, рекоа активистите, вклучително и затворената нобеловка Наргес Мохамади, во изјавата на 30 јуни.Тие тврдат дека избегнувајќи ги „наместените сценарија“ на исламската република. јавноста би се ставила во позиција на моќ и би го олеснила „падот на режимот“.
Мултимедија
Најпосетени
Што треба да знаете